ПЕРШИН ИВАН — БУР МОРТ

Посадын эз кыв öтiк шытор, но сiя эз узь. Пожарнöй каланча дынö сибалiкö Степанко öтiк керку посöдзись казялiс кык старичокöс. Нiя пукалiсö поспуэз вылын и мыйкö сёрнитiсö öтамöдкöт. Öтыс куритiс махорка, а учöтик биок то öзйывлiс, то куслiс пемытiнас, а кокнитик тöлок нырö вайöтiс курыт табак тшын.

Сырчик, тыдалö, важын думайтöма шоччисьöм йылiсь и сразу жö, кöр ровняйтчис каланчаыскöт, сувтiс. Степанко личöтiс чересседельник, чапкис вöв одзö телегаись турунсö, а ачыс мунiс старичоккес дынö.

— Здорово олат, добрöй йöз, — здоровайтчис ныкöт.

— Здорово, здорово, мужик, — шыасис паныт векнитик чужöма старичок, кöда куритiс табаксö. — Мый, туйö мунан?

— Туйö. Анькытш Кудымкарö кыска.

— Бур дело.

Старичок чапкис чигаркасö му вылö, талис нинкöма кокöн и, кöр пуксис бöр, шуис аслас ёртлö:

— Вот тэныт и попутчик, кум. Öнi некой пору Юрлаöдз локтан.

— Только бы локны, кум, — горöтчис дрöжитана голосöн мöд старикыс и пондiс нёштöма, мороссö киэзöн видзöмöн, кашляйтны. Степанко вежöртiс, что морт шогалö.

Зонка вöлi мыдз, и сiя чожжык пуксис ордчöн стариккескöт. Сы кынöмын öнi эз ни орс некытшöм музыка. Сэтчин только мыйкö сöскис, мыйкö зубыта ветлiс увлань и вывлань. И вöлi сэтшöм умöль, что Степанко нельки повзис: «Вот кöстас эшö шогöт, и сэк...» Мый лоас сэк, сiя эз тöд.

Сiя тöдiс только, что мый бы эз вöв, а часöт жö должен сёйны. Кöть кушман, кöть картов, кöть лэдзöм йöв. Эд сiя локтiс посадö, посадын олö отир и эм жö отирыслöн кытшöмкö сёян. Неужели нем оз сёйö? Эд, натьтö, быдöн казялас, что зонка тшыг и должен сёйны... Вот кöть бы эна старичоккес... Кöть бы учöтик няньтор...

Но стариккез мыйкö баитiсö ассиныс, эзö тэрмасьö юасьны, мыйлö Степанкоыс пуксис ныкöт ордчöн. Öтыс, кöда часто нёштöма кашляйтiс, вöлi, тыдалö, не татiсь. Сiя локтöма кытшöмкö деревняись, кежöма кум ордö шоччисьыштны и вот висьтасьö, кыдз олö эта сьöкыт военнöй кадö ны деревняын йöзыс. Сы коккез дынын валяйтчис неыджыт котомка. И котомкаын, колö думайтны, вöлi мыйкö сэтшöм, кöдö позис сёйны. Корны я мый я?..

Степанко вöлi полiськодь, сiя эз куж уна баитны и часöт сразу жö вежöртiс, что оз бергöтчы сылöн кылыс корны сёянсö. Некöр оз бергöтчы. И сiя лоис эшö гажтöмжык, лоис аслыс нелюбöйöн. Шляпа! И кин сьöрья тэ сэтшöм шляпаыс? Эд эмöсь жö зонкаэз, кöдна нельки тöдтöм йöзкöт сярзьöны-баитöны, каттьöны быд берсясö, сымда öтiк минутаö лёбасö, что, видзöтан, сразу тöдтöм йöзыслö дзик роднöйöсь лоöны. И кöр сэтшöм уна баитiссезлöн сималö кынöм, то нiя первöй жö кыввез бöрын шуöны: «А мый, оз я тiян, добрöй отир, няньтор адззись? Асывсянь кынöмам кишкаэз öтамöдкöт тышкасьöны, судöн öтамöдлö грöзитöны...»

И кыдз сэтшöм бура баитiсьлö откажитан? Медбöрья нянь кусöк сетан.

А Степанко полiс корны няньторсö. Мылякö стыд петiс. Сiя пукалiс поспу вылас и кывзiс, мый баитiсö стариккес. Эта кадö зоночка часто дзарьялiс Сырчиклань, кöда туй дорас марскис-сёйис турун. «Эх, — думайтiс Степанко, — мыля ме пикансö эг лет назапас? Вот тшöктi бы öнi хозяиныслö керны биок, пуи бы витамина турунсö. Старик, конечно, казялiс бы, что сёя öтiк пикан, жалейтыштiс бы и сетiс няньтор. Эх!»

Усис тöдвылö пöрись почтальон, пырисö юрö сылöн кыввез: «А ме бы тэнö пöттöдз вердi». Пожалуй, колiс согласитчыны сыкöт. Нöбöтiс бы Пиля моньлö страшнöй письмосö и вöлi бы пöт. Мый сэтöн сэтшöмыс, умöльыс? Письмо эм письмо. Раз сiйö иньдiсö, то колö сетны адресатлö. Нем сэтöн умöльыс абу. Конечно, Пиля монь бледöтыштiс бы, может, усис бы кок йылiсь, да эд мый керан, кöр ымьялö война, кöр потласьöны снаряддэз, сярзьöны пулемёттэз, а солдаттэз команда сьöртi петöны окоппезiсь, чирзöны ура и мунöны атакаö. Не каждöй бертö атакасис бöр, не каждöй кольччö ловья.

Да, весь, пожалуй, откажитчис Степанко. Вöлi бы часöт пöт.

Усисö тöдвылö стариклöн и мöдiк кыввез: «Гöститöтiс, слава богу, капустаöн да картовкаöн вердiс...»

Кин сiя, Першин Иваныс, кöда гöститöтöма стариксö? Вот адззыны бы сiйö, корны невна капуста...

— Сiдзкö, туйö мунан, мужик? — юалiс бöра старикыс. — Анькытш кыскан? Этö бур. Натьтö, фронтовиккезлö иньдасö. Анькытш солдаттэслö тожö колö. Пуасö котелоккезын горошнича, паняласö пымсö — и пöтöсь. Тэ юскы инö вöвтö, шоччöт. Вон видз дорас лэдз, ась йирсьыштö.

— Мунны колö, деда. Ме луннас сiйö вердi. Öнi ыркыт, öнi кокнитжык муннытö. Луннас жар. А вöлокö сувтöм.

— Сiдз, öнi дöнзьö вöввеслö...

Старик кыскис бöра кисет, пондiс керны куритны. Степанколö мыйкö сiдз и чуткис сьöлöмас, юрас тасасис öтiк дума.

— Меным öтiк бур мортöс бы адззывны колiс. Татöн сiя олö, — шуис зонка.

— Кин сэтшöмыс?

— Першин Иван.

Хозяин лэбтiс юрсö, мылякö, кажитчис, ёна дивуйтчис, нельки чигаркасö керны дугдiс. Дивуйтчöмöн дзарнитiс Степанко вылö и шогалiсьыс.

— Першин Иван? Те-те-те... А мыйлö сiя тэныт?

— Да колiс бы. Пантасис туй вылас почтальон, дак висьталiс меным. Бур, шуö, сiя мужикыс. Капустаöн да картовкаöн, шуö, вердiс. Поди, вузалiс бы сiя невна капустасö? Мöдöдз сутки ни тшыгйöн муна...

Степанколöн, конечно, эз вöв öтiк чегöм грош. Но сiдз и шуис: поди пö вузалiс бы невна. Мыйлö сiдз шуис — ачыс оз тöд. Старичок эшö ёнжыка дивуйтчис, öдззис шовкöтны кывнас, а чигаркаыс йылiсь нач вунöтiс.

— Те-те-те... А эд Першин Иваныс — этö ме!

Вöлi пемыткодь, и стариккес эзö казялö, кыдз дрöгнитiсö Степанколöн киэс, кыдз бледыник чужöмö кинитчис вир, кыдз зонка осьтiс öмсö.

Вон мый вöлöма!

— Да, этö ме. А сiя сiдз шуис: бур морт пö Першиныс? Ах сiя, прокурат, ах, лысöй кöин... Но дак мый нö, пырам сэк керкуö. Бур морт дак. Капуста, конечно, адззисяс. Верда инö. Пырам, кум, баитыштам сэтчин.

Керкуын вöлi пемыт, кыдз гуын, и хозяинлö ковсис öзтыны сартас. Кöр учöтик и тшына бикыв югдöтiс керку пытшксö, Степанко первöй делоöн казялiс джодж шöрись старухаöс. Узис сiя гатш, шебрасьöм важ зипунöн, и, мый главнöйыс, узис петшöрись керöм кытшын.

— Лудыккез öсилейтiсö, — висьталiс хозяин. — Дак нiя, сраммез, петшöрись пö полöны... Вон, адззан, кыдз старухаö яйсö берегитö. Те-те-те... Кыдз барыня узьö. А меным кöть бы мый! Вода гор вылö и бур. Яй кучикö менам, кыдз симöт — чорыт, кыз, дубитöм. Öтiк лудык оз вермы курччöвтны.

Бур морт Першин Иван босьтiс пуовöй бекöр, петiс öтöрö. Чожа сiя пыртiс бекöрас тыр капуста, рочалiс гöссесö пызан сайö. Шогалiсь кумыс сёйны откажитчис, висьталiс, что душаыс нем оз примит, только крахмалiсь кисель и вермö сёйны.

— Вот беда, а кисельыс менам как раз абу, — паськöтiс киэсö хозяин. — Поди, йöлок кöть юан? Вот, ужо, пырта...

Старик бöра петiс öтöрö, а Степанко кутчисис капуста бердö. Капуста вöлi кöдзыт, почти немымда абу нильзьöм. Конечно, сiя вöлi не ма, сiя эз сыв öмын, кыдз сахар, но Степанко сёйис сэтшöм чöскыта, бытьтö одзас пуовöй бекöрын вöлi ма. Сiя сёйис жагöник, старайтчис не риззьыны пиннезöн, быд тороксö бура нямлялiс öмын и нельки эз думайт, мый лоас сэк, кöр пызан сайись чеччикö ковсяс вештiсьны. Некöр вöлi думайтны эта йылiсь.

Шогалiсь старик кашляйтiс, лолалiс сьöкыта. Сы моросын дугдывтöг мыйкö кижгис и бульöтiс. И быдпырся, кöр кутлiс кашель, морт кыкнан кинас видзис мороссö, чужöм вылас и кымöсас эта коста петавлiсö гырись ньылöм воттез. Позис думайтны, что олö сiя эта светын медбöрья луннэз ни.

Кöр хозяин пыртiс кружкаын йöв, шогалiсь морт пöрччалiс котомкасö, кыскис сэтiсь эшö учöтик котомка, кöзичка. Эта кöзичкаись сiя тэчис йöлас мыйкö чочкомö, бура сорлалiс паньöн и пондiс юны неыджыт гульккезöн.

— Картовка пизь невна босьтi сьöрам. Крахмал, — висьталiс старикыс. — Кынмöма тöвнас колхознöй картовка, кöдö кöдзыс вылö пуктылöмась. Вот и локтiс ме дынö председательным... Давай, шуö, тёрит кынсö, тэныт сёравно крахмал колö. А ассит бур картовтö сет колхозлö. Ачыт, шуö, тöдан, кöдзыстöг некыдз оз позь. Но ме думайтi-кери да и согласитчи. Колö дак колö — кытчö нö воштiсян?

— Этö сiдз, — согласитчис хозяин. — Кöдзыстöг некыдз оз позь. И мый, старухаыт эз и видчы?

— Кыдз эз видчы! Ёна ыждалiс, кудоба. Мöдiс ловйöн муö дзебны, да вунöтчис жö сыбöрын...

Кыкнанныс сералыштiсö, шыннялiсö, а Степанко сёйис капуста.

— Те-те-те, — вдруг горöтчис хозяиныс и шупыта мунiс комö. Сiя вылына лэбтiс кисö, мыччалiс чуньнас старухаыс вылö и, кыдз ыджыт заговорщик, чикыртiс синнэсö. — Часöт ми мыйкö керамö...

Мый керис комын старик, Степанко эз адззы. Только сэк, кöр сiя кок чуннез вылын локтiс пызан дынö, зонка вежöртiс быдöс. Хозяин пуктiс сы одзö кык рисьтупöсь, кольть и шогдiовöй нянь шöрöм.

— Семик ашын, зонка. Вежöртiн? Мöдö старухаö аймамсö да дед-бабсö касьтывны, неетша быд берсясö заптöма. Дак вот, запассö чинтiмö невна. Тэ эн пов. Лыдсö сiя оз тöд, сёравно оз кватитчы, что бöбалыштiмö. Только, тöдан, гусьöнжык сёй. А то кылас... Ох, и жаднöй сiя, не приведи господь... Те-е... Ужо, кусöтам бисö.

Стариккез бöра пильснитiсö-серöмтчисö. Степанко тожö шынньöвтiс и кöсйисис сёйны гусьöнжык.

И сiя сёйис.

А кык кум баитiсö ассиныс баснисö, кöдö эз ештö кончитны посöдзас.

— И мый жö ныкöт одзлань лоис? — юасис хозяин.

— А мый лоас... Локтiс, значит, Фёдорыс гортö костыллезöн. Чужöмыс быдöс палитчöм, моросас осколок пö кыскытöм. Öдва лолалö. Локтiс и пырис аслас керкуö. А керкуыс пустöй.

— Сiдз, кум, пустöй...

— Сэк пырöма Фёдоркоыс дынö сосед и висьталöма, кыдз да мый. Мунiс пö иньыт мöдiк сайö, Чуманов Петя сайö...

— Вот юртöм, ах сiя кань род! Да сiя, Фёдоркоыс, кутiс бы иньсö да костыллезнас...

— Эз тышкась. Горюйтыштiс невна и мунiс. Инвалиднöй домö мунiс.

— Сiдз. А миян бöра мöдкодь дело вöлi. Нач мöдкодь, — юöртiс хозяин. — Локтiс тöвнас Проня Питирим, тожö ранитöм — шульга кисö осколокöн нач орöтöм. А сэсся быдöс дзонь. Но и вот... Лун-мöд пируйтiс, ошшасис аслас подвиггезöн. Сыбöрын казялiм: мыйкö часто дöва Сеника ордö пыравлö. Мый сэтшöмыс? Дöва Сеника морт том, олö öтнас, нянёк эм. А жöниксö вийисö, эшö мöйму похоронка локтiс. Оз я этö... э-э... А сэсся вдруг кылам: мунöма Питирим гортсис, чапкöма инькасö кагаöн. Сомуститöма сiйö весёлöй дöва.

— Ох-хо-хо... Дзугсис быдöс, ылöстöмсялiс оланыс. А мыля? Быдöс, кум, эта ёрдöм война увья. Да кöр ни сiя чулалас!

Старикöс пондiс пöдтыны кашель, и сiя лöньсис.

Джоджын узис старуха, часто сьöкыта ружтiс, шушкис аскöттяс — тыдалö, мыйкö вöтасис.

Хозяин пукалiс пызан дорас, видзöтiс, кыдз Степанко сёйис капуста да нянь, гогинялiс юрöн:

― Эка беда... тшыгьялöмыт тэ, зонка, ёна тшыгьялöмыт. Тэ öнi как раз быдман, и тэныт колö уна сёйны. Ме тэнат годдэзö, зонка, öтiк вытьö верми сёйны быдса чöвпан нянь, кык бекöр шыд, дас-мöд лук да эшö öтiкö-мöдiкö. Но тэ эн тöждiсь. Быдöс эшö лоас, И няньыс, и шыдыс. Вот чулалас война — и быдöс лоас. Тэ кыскан анькытш? Кыскы давай. Солдаттэзлö сiя ёна лöсялас. Локтасö, шуам, нiя атакаись, а сэтöн повар быд котелокö горошнича, кисьтö. Сёясö солдаттэз пымсö и бöра атакаö. Пöт солдат — этö воин. Кöр солдат пöт, дак сiя няж-няж только врагсö керас.

Степанко сёйыштiс быдöс, мый вöлi одзас, висьталiс добрöй хозяинлö дзирыт спасибо и, кыдз настоящöй мужик, жмитiс сылiсь кисö.

— Спасибо, деда. Кувтöдз тэнö ог вунöт, — шуис пызан сайись петтöн.

— Менö, кага, верман и вунöтны. Кин ме сэтшöмыс? Простöй морт да и только. А вот энö годдэсö эн вунöт некöр. Пыр видз тöдвылын, кытшöм сьöкыт горе адззылiм мийö ёрдöм Гитлер увья. Аслат друглö висьтав, аслат челядьлö юöрт, кыдз ми пессим врагкöт, медбы Россияным вöлi свободнöй. Эн вунöт этö.

— Ог вунöт, деда.

Хозяин кольлалiс кумсö да Степанкоöс öтöрöдз, желайтiс нылö бур туй да здоровье.

— А старичокыс, шуан, сiдз и горöтчис: «Першин Иван — бур морт»? Те-те-те... Ах сiя лысöй кöин, ах прокурат! Но ладно, мунö инö со Христом... А бöр локтöн кежалö. Висьтасят, кыдз и мый...

Степанко кöсйисис обязательно кежавны. И шогалiсь старикыс висьталiс, что если оз нюжöт коккесö эна луннэзö, то кежалас аслас кум ордö шоччисьны да баитыштны, кыдз баитыштiсö талун.

Першин Иван эна кыввезöн кольччис öддьöн довольнöй.

Дата добавления: 2015-11-16