Паныт уйис тöлiсь

Телега колесоэз сьöкыта ёркйисö чорыт туй кузя. Колесоэз увтын няжöтiс поснитик галька. Жольöтiс сермöтiсь öмлöс, дзуртiс дуга.

А природа узис. Эшö неважын, шондi лэдзчандорас, туй дорись расокын чивзiсö кайез, видчисö öтамöдкöт, тыдалö, некыдз эз вермö артавны кытшöмкö дело. Но кöр саясис шондiыс, каёккез сразу лöньсисö, и часöт кусттэз сайын эз кыв öтiк шытор.

Юрла ладорын, паськыт вöр весьтын, югьялiс тöлiсьлöн бледыник гöглян, сы дынöт жагвыв уйисö кокнитик кымöррез, и кажитчис, бытьтö тöлiсьыс дюттясьöмöн вешшис талань, паныт Степанколö. А рытвыв ладорын, кытчö саясис шондiыс, небо сё эшö öгралiс биöн, векнитик гöрд рöма полоса кыссис горизонт весьтöт, öтлаасис вöркöт.

Кöть эз пöльт тöлок, но öтöрын вöлi ыркыт, лолассис кокнита, вольнöя. Сырчик буткöтiс коккезнас чорыт туй кузя, жагöник вешшис и вешшис одзлань. Туй эстöн вöлi волькыт, лэдзчис неыджыт мысок увтö, и вöв кыскис сьöкыт телегасö сувтчывтöг.

Медбы не бырöтны галяа туй вылын нинкöммез, Степанко оськалiс канава сайöт, кытi кыссис подöна ветлöтан туёк. Чуть да бöра зоночка öвтiс плетьöн, шовкöтiс горöн. И быдпырся, кöр Сырчик кывлiс плетьöн швычнитöмсö, вöрöтiс пеллезöн, косöя дзарьялiс учöтик хозяиныс вылö. Вöв полiс плетьсис. А раз полiс, то вöлi эшö не öддьöн мыдз. Кöр Сырчик вöвлi öддьöн мыдз, дак плетьсö кöть ныр увтас вайöт, сiя и виш оз кер. И пеллезöн оз вöрзьöт.

Степанко вöлi довольнöй аснас, мыля вежöртiс вердны вöвсö луннас. Жар коста туйын сiйö сразу бы пöдтiс ньылöм, вöв сразу бы атшалiс, а часöт, ыркыт костас, мунiс сувтчывлытöг. Кöть жагöник мунiс, но сёдаки сувтчывлытöг. Тыдалö, и клеверыс отсалiс.

Кöр мунiс Степанко дынiсь пöрись почтальоныс, зонка эшö нетшкылiс клеверсö быдса ноша, вердiс Сырчикöс пöттöдз. И эшö быдса ноша сьöрас босьтiс. Вон сiя куйлö телегаас, öн увтын. И мед куйлö, пригодитчас. Вот локтас Юмöдз, юскас Сырчикöс и бöра вердас. Шоччöтас вöвсö час-мöд и бöра петас туйö. Видзöтан, асыв гöгöрас Юрлаö локтас. Джын туй лоас керöм.

Дзуртiс дуга, ёркйисö телега колесоэз.

Сьöкыта буткöтiс дорöм коккезöн Сырчик.

А небоын югьялiс тöлiсь, кажитчö, кывтiс сiя паныт Степанколö, и быдпырся, кöр зоночка дзарнитлiс эта тöлiсь вылö, сiйö мылякö пондывлiсö öдöлейтны думаэз.

Перво зонка думайтiс мамыс йылiсь. Мый сiя часöт керö? Натьтö, кончитiс высьтыны мöссэз, лэдзис йöвсö сепаратор пыр, часöт локтiс гортö и водiс шоччисьны. Интересно, мый сiя думайтö зоныс йылiсь? А мый думайтöны сы йылiсь Санко да Симка?

Эх, да мый нiя думайтасö! Нылöн öтiк думаыс — сёйны унажык. И кытшöм нiя жоручöсь. Вердан, вердан, а сё корöны, сё пильскöны: «Мама, кынöм сималö...» Таво тöвнас öдва-öдва кыссисö. Симка öддьöн дыр шогалiс, быдöс мылякö пыктывлiс, и, кин тöдö, поди, кулiс бы, но спасибо добрöй соседкалö, бабка Öниссялö, — отсалiс невночка.

Бабка Öниссялöн мöсокыс мöйму котрасьöма сёрöн, и сiя почти тöвбыт высьтiсис. Вот и отсалiс баб йöлокнас. Кöр джын литр сетас, кöр стакан. Симка ювлiс пöжöм йöвсö, невночкаöн сёйлiс йикиа кöрышшез и веськалiс жагöник.

А кöр веськалiс, дак веськыта шуны — беда лоис. Оз ешты саймыны, бöра нюжöтö ни ассис песнясö: «Мама, нянь...» А кысь сiйö, няньсö, ваян? Ковсис Степанколö мунны уджавны вöрö, таборка* вылö. Спасибо председательлö, горба Ошкоковлö, — согласитчис сетны Степанколö Сырчикöс, кöдöн айыс тöв и гожум уджалiс. Сырчик тöвнас вöлi боёк и вына. Пуктас додьö мужиккез отсöтöн кöньöс кыза кер, дак сiя веськыта лымöттяс только мрякöтö-мунö. Ого! Сэк сiя вына вöлi. И кытшöм умнöй! Мунö вöрöт кöззэз коласöт и кöть бы дуганас павкас кытшöмкö пуок бердö. Ачыс тöдö, кытчö кежыштны, кытчö пельпон пöлiньтны.

Кин уджалiс вöрын, сылö сетлiсö казённöй нянь. Конечно, Степанколö аслыс етша дöнзьывлiс: зонка унажыксö олiс картошка вылын, а няньсö почти быдöс ваявлiс Санколö да Сималö.

Ох-хо, мый нiя часöт керöны? Поди, сёйисö ни быдöс тöння буханкасö и часöт узьöны, зырымöсь беддез? Нылö и печаль абу. Учöтöсь эшö сраммез, нем оз вежöртö.

Сьöкыт быдтыны поснит челядьöс военнöй тшыг годö, öддьöн сьöкыт.

Да только разь военнöй годö?

Степанко быдмис мирнöй годдэзö, но тожö быд берсясö адззылiс. Вот босьтны, шуам, тридцать вторöй год. Уна я сэк вöлi Степанколö? Кык год. Значит, как раз Симка ыжда. Нач, позьö шуны, кага вöлi, а видзöт тэ, öнöдз тöдвылын эта страшнöй годыс. Тожö няньыс некинлöн эз вöв, тожö тшыгьялiсö. Мамыс эшö неважын касьтывлiс, кыдз ветлöтöмась йöзыс кортöн, кулöмась канаваэзын. Кулiсö, вежöртана, нiя, кинлöн юрвердiсь эз вöв. Степанколöн вöлi сэк юрвердiсьыс — вöлi сэк гортын айыс. И сiя, Степанко, кольччис ловья. А öнi айыс абу. Да, воюйтö кытöнкö. А поди... Эх, да лучше эта йылiсь не думайтны.

И кыдз быдтыны челядьсö? Санколö дас год, Симкалö только куимöт мунö. Кык учöтик морт, кык öм. Ого! Пуксясö пызан сайö, дак медбур кусöк — нылö. А кер мöднёж, дак нерад лоан. Асьныс учöтöсь, а öммезныс — беда! — пельшы оз кыв, кöр базанитны öдззасö.

Сiдз думайтiс Степанко. А небоöт, вöр весьтöт, сылö паныт уйис паськыт чужöмбана тöлiсь. И вöлi ыркыт. И мыдзисö коккез, сималiс кынöм. И зонка видiс асьсö сы понда, мыля луннас эз öкты назапас пикансö. Вöвлö летiс клевер, а аслыс эз кватитчы сёянсö заптыны.

Сырчик мунiс жагöник. Колесоэз увтын няжöтiс поснитик галька. Но вот неылын одзас лявнитiс понок, дзуз югйöвтiс биок. Неылын вöлi Юм посад. Сiдзкö, сизим верста мунiсö шоччисьтöг.

— Сырчик, дона Сырчик, посад пантасьö! — шуис аслас друглö зоночка. — Тэ, Сырчик, давай эн сувт. Тэ оськав, часöт ме тэнö шоччöта.

Сырчик, тыдалö, вежöртiс хозяинсö. Сiя, кажитчö, содтiс оськöввез, эшö горöнжык пондiс буткöтны дорöм коккезöн.

Кöркö айыс баитлiс Степанколö, что Сырчик öддьöн умнöй вöв: кöр казялас, что локтöны деревняö, дак тэрмöттöг оськалö. А кöр локтан кузь туйись гортö, дак сэк Сырчиклö и вожжи оз ков, и турун оз ков — только орöтö-котöртö тöдса туй кузя. Тöдö, что гортö лэбзьö. «Кудымкарсянь гортöдз öтiк лунöн вайöтiс бöр» — ошшасьлiс айыс.

Посадын эзö кылö некытшöм шыэз. Лявнитiс öтпыр понжуг и лöньсис. Поди, шуис аслыс: «Мый весь горш летны, кöр сэтшöм гажтöм?»

Гажтöм. Öнi быдлаын гажтöм. И Лобанын тожö. А война вотöдз гажа вöвлi. Этшöм тöлiся рытö, вöвлi, петасö деревня сайö нывкаэз да зонкаэз, керасö круг и давай сьывны песняэз. Деревня дынын нiя сьылöны, а лог сайись вöрын мöдiк нывкаэз тонньöтлöны: говкыс сiдз и ветлö валлэзöн, сiдз и чанöтö пеллез.

Сiя гожумö, кöр пондöтчис войнаыс, Степанко тожö петавлiс деревня сайö. Петавлiс сiя, колö висьтавны, не аслас воляöн, а нывкаэз кыскывлiсö. Только сибалас рыт, а нывкаэз локтöны ни быдса утугаöн Степанко ордö, корöны деревня сайö:

— Степанчик, сьöлöмшöриньöй, гажöтышт миянöс. Стрась охота песняэз сьывны, и йöктыны тожö — коккез лудöны. Степанко, тэ йöктöт невночка, орс гармоннянат.

Учöтик мыгöрнас вöлi Степанко, виньöрик, а гармонняöн сысся буржыка орсны Лобанын некин эз куж. Эшö витöт классö котрасикö зонка велалiс орсны частушкаэз, сэсся кыдзкö казявтöг юрö пондiсö пырны виль песняэзлöн мелодияэз. И паськалiс Степанколöн славаыс быдöс деревня пасьта. И кыдз рыт, сiдз и локтöны сы дынö сьывны любитiсь нывкаэз.

А Степанколö мый — корöны, дак колö мунны. Босьтас киö гармоннясö, петас деревня сайö, сэтчин пуксяс колода вылö и давай рытся воздухсö косявны. Перво орсас ассис любимöйсö — «Как родная меня мать...», вöлись виль песняэз пондöтчас. И öдззö деревня сайын настоящöй праздник. Небоын тöлiсь чикнялö-сералö, кыдзовöй расок аслас листтэзöн шушкöтчö, басöк мöдöтчана нывкаэз кругын бергалöны. А гармоння орсö и орсö, висьтасьö, кыдз дзирыт сьöлöма Катюша петавлöма крут берег дорö, сьывлöма ассис песня и сетлöма сьöлöмшöрыслö дзирыт кыв век не вунöтны сiйö.

Пусть он землю бережёт родную,

А любовь Катюша сбережёт...

Гажаöсь сэк вöвлiсö рыттэз, гажаöсь, вöлiсö песняэз, гажа вöлi олан. И отирлöн басниыс вöлi гажа.

Öтпыр, рытся гулянка вывсянь локтöн, Степанко казялiс аслас горт дынiсь мужиккезöс. Нiя пукалiсö мудьöт вылын, куритiсö махорка и сёрнитiсö олан йылiсь. Некöр не вунöтны этö баснисö.

— Тулысыс, тулысыс таво кытшöм вöлi! — дивуйтчис Степанколöн сосед, — веськыта шуны — золотöй. Шоныт. Мича. И кöдзим быдöс аскадö.

— Бытшöм вöлi тулысыс. Эх, осяоккес петöмась! Кыдз зу, — шуис сылö паныт мöдiк сосед. — А öзиммес! Быдöс кö ладно лоас — тырамö няньнас.

— Урожайнöй годыс мöдö лоны, — согласитчис ныкöт Степанколöн айыс. — Лöсявны мöдö оланным. Мöйму трудодень вылö квать килоöн сетiсö, дак мукöдыс сё эшö досповна абу получитöмась, сё колхознöй складын сюнысö видзöны — кисьтны пö гортын некытчö. А таво сизим килоöн, натьтö, дöнзяс. Öддьöн бытшöмöсь петассэс.

Сiдз баитiсö мужиккез.

А ашынас тöвныр вайöтiс Лобанöдз öтiк страшнöй кыв — война.

А кынымкö лун бöртi Степанколöн ай кышалiс ни спина сайö сухаррезöн котомка и, гортiсь петтöн, малалiс ыджытжык зоныслiсь чочком юрсö, баитiс сэтшöм кыввез, кöднö баитö быд мужик война вылö мунтöн аслас ыджытжык зонлö:

— Но, Степанко, öнi тэ семьяын медглавнöй юрвердiсьöн кольччан. Берегит мамтö, берегит вонтö да сойтö. Эн чапкы нiйö...

И вот любуйтчы! Мунö виньöрик зоночка сувтöм вöлöн сьöкыт туйö, локтiс ыджыт стариннöй посадö, кытöн эшö неважын, натьтö, оланыс ключöн пизис, а часöт сiя, посадыс, дзик пустöй, дзик кулöм. Нырыштöма сiйö страшнöй горе, адззывлытöм сьöкыт беда. Оз кылö инькаэзлöн гора басниэз, оз кылö нывкаэзлöн гора песняэз, некытöн оз орс гармоння, кöть рытыс сэтшöм мича да чудеснöй, кöть небоын югьялö тöлiсь, кöда, кажитчö, дюттясьöмöн жагöник кывтö и кывтö Степанколö паныт...

Дата добавления: 2015-11-16