НЯНЬ — ФРОНТЛÖ!

Митюбаран, крепыт пельпоннэза и паськыт корпöса абыз, уджалiс мöдöдз бригадаын. Степанкокöт, кöда уджалiс первöйын, сiя пантасьлiс шоча, только разь колхознöй склад дынын нето правленнёын, собраннёэз вылын. Деревняын Митюöс эзö радейтö, томмез и пöриссез сiйö прокод шуисö баранöн, мыля зонкаыс эшö первöй классын велöтчикö быд перемена коста öбидитлiс нылочкаэзöс: то кулакнас горбö сетас, то чикисьöт летыштас, то кымöснас люкалас. Баран дак баран и эм. Велöтчыны прокыс абу, а тышкасьны — кытчö тэ!

Кöр зонкаыс невна быдмыштiс, уваженнё могись сiйö пондiсö величайтны Митю баранöн. А сiдз кыдз Лобанын йöзыс баитö тэрмасьöмöн, кыдз шуöны миянын — бырзьöмöн, то Митюлiсь и нимсö и нимкодьсö шувлiсö öтiк шыöн. Вот и петiс — Митюбаран. Баитöны, бытьтö счетовод нельки ведомосттезö сiдз и гижöма — Митюбаран.

Мыгöрнас Митюбаран неыджыт, метр да джын только и быдмöма, мыля учöтнас вежöтлöм да шогалöм пистиöн, а высиныс ён, кыз. Кыз сылöн и юрыс, настоящöй кыдзовöй швав, кöдаись кöркö керлiсö бекöррез. Писти — страшнöй шогöт — жалейттöг изводалöм мортлiсь не только мыгöрсö, но и чужöмсö: масьтöм сiдз и этадз, бытьтö чёрт вартöма сы вылын анькытш. Дзарнитан сэтшöм чужöм вылö, и сразу охота мунны больницаö примитны укол, медбы тэ бердö некöр эз кутчись пистиыс.

Митю, кажитчö, и минута эз вермы овны чöлöмöн. Степанколö, кöда часöт пукалiс сы телегаын, сiя дугдывтöг висьтасис и висьтасис, кыдз тöн корлöмась военкоматö. Куим верста вöлi Лобансянь районнöй посадöдз, Заготзерноöдз, а Митюлöн эз и мыдз кылыс, сё гардчис öмас.

— Локтi ме военкоматас, пыри капитан жырö. Мыся, сiдз и сiдз, локтi, гражданин начальник, тiян приказаннё сьöртi, босьтi сьöрам котёлок да пань, кыдз и гижöма повесткаас. А сiя юалö: «Мыля öнöдз не война вылын, мыля гортын шатласян, мыля только пань да котёлок сьöрат босьтiн, а куим лун кежö продовольствие вунöтiн?» Лöг вöлi капитаныс, усоккес сiдз и йöктöны кузь ныр увтас, но ме эд мортыс не полiсь. Дзарнитi сылö чужöмас да и кропки паныт: «Ме, мыся, начальник, гортын воюйта. А продовольствиесö эг босьт сiйöн, мыля абу — война вылын ни сiя». Но, ладно. Капитан нуöтiс менö мöдiк жырö, сувтöтiс вес вылö, öшлiс. Семьдесят пять кило, шуö, самöй раз. Сэсся вайöтiс кытшöмкö агрегат дынö, мыгöрöс пондiс меряйтны. Но, мыся, меряйт, меряйт, ежели сiдз он адззы. И меряйтiс эд! Сувтöтiс менö веськыта, юрöс чатыртiс, вывлань нюжöтiс, сэсся рявкнитiс, кыдз ош: «Симулянитан, лешакпиян! Öтiк метра, сорок девять сантиметра! Мыля сэтшöм учöт? А?» Но этö, мыся, аймамлiсь юалö, нiя долженöсь тöдны, а меным кытiсь... Капитан кутiс бöра киöттям, петкöтiс жырсис да кыдз сетiс лёнам! Мун, шуö, гортат и быдмы, зырымöсь бедь.

— Дугды ни, дугды, ылöстöм. Мый арттöмсö каттян? — öмалiс Митюöс мамыс, кöда зоныскöт мыйлöкö мунiс тожö посадö. Но Митюöс сувтöтны некыдз эз позь, сiя боньгис одзлань:

— Петi ме öтöрö, видзöта: мужиккез мудьöт вылын пукалöны, капитан дынö очередь видзчисьöны. Öтiк, славнöй сэтшöм детина, чочком юрсиа, мича чужöма, юалö менчим, кыдз да мый. Ме и висьталi, кытшöм капитаныс. Детина давай серавны, пиннесö кеслыны. Эз гленитчы эта меным. Мортöс война вылö эз примитö, военкоматiсь вашöтiсö, а сiя пиннез кеслö. Но ме и лöгаси. Кы-ыдз бергöтчи да заваритi детиналö пельбокас, сiя сiдз и нюжалiс посöдз дынас.

— Ыджыт вöлi детинаыс? — юалiс Степанко.

— Ыджыт, лешак. Месся кыкись кузьжык.

— Но сэк бöбöтчан.

— Кыдз этö бöбöтча? Мыля?

— Да эн тэ вермы сöтны пельбокас, киэт дженытöсь, — серöмтчис Степанко.

— Но, не пельбокас. Ладно, косас сылö заваритi...

— Дугды! — чирöстiс бöра мамыс. — Вот, проклённöй, аслас юр вылö каттьö абусö. Да тэ тай нач ылöстöм!

Митюбаран пондöтiс висьтасьны мöдiк «подвиг» йылiсь, но Степанко мунiс аслас телегаö. Сiйö öдöлейтiс сьöкыт дума: кыдз сытöг оласö Санко да Сима? Загрек, куласö тшыгйöн? А мамыс? Тожö öдва ляшмасьö... А кыдз сiя мунас Кудымкарöдз, кöр заморитöм Сырчик сьöкыта кыскö и простöй телегасö? Беда, натьтö, лоас. Пожалуй, весь согласитчис муннытö. Поди, бертны бöр, кытчöдз абу сёр? Эхма, кöть кытчö юр пиньöвт. Усис Степанко пельпон вылö адззывлытöм забота — не пырны, не петны. Эхма...

Сырчик вылö жаль вöлi видзöтны. Если эшö тöвнас боккес свиттялiсö сьöд переливвезöн, то часöт вöлiсö куш коколь; тöвся кузь гöныс эз и кырт тулыснас, спина коскаыс лэбтiсьöм, ордлыэс, дзик кöньöс асыккез, петöмась мыльк, лыддьыны позьö.

Сьöкыта дöнзис севыс. Пемытсянь пемытöдз вöлi бороздаын. Шутка висьтавны — четырнадцать гектар шулялiс Степанко. А Митюбаран дышöтчöма уджавнытö, кыкьямыс гектар только гöрöма.

Вот и справнöй сылöн Лысанкоыс, абу мыдзöма. Вот и боньгö часöт Митю арттöмсö, сылö и горе абу...

Вöлi эшö одз, а посадын шуксис ни отир. Мунiсö уджавны инькаэз да нылочкаэз, важнöя оськалiсö стариккез, шочыника пантасьлiсö мужиккез, кытчöкö котöртiсö челядь. Продовольственнöй магазин дынын шумитiс кузь очередь: народ видзчисис, кöр пекарняись ваясö нянь и пондасö вузавны карточкаэз сьöртi. Военкомат одзись площадь вылын сулалiсö подводаэз, натьтö, лöсьöтчисö тожö туйö — кыскыны армияö мобилизованнöйезöс.

Уна подводаэз сулалiсö и Заготзерно дынын. Öтiккез ештöмась ни грузитчыны, мöдiккез видзчисисö очередь. Ямщиккез — унажыксö инькаэз — пукалiсö телегаэзын, горöн баитiсö. Ыджыт ворота бокын нёштöма уннялiс пон — кинкö шырзьыштöма бок кузяс плетьöн. Контора крыша вылын павьялiс гöрд флаг, а стена вылын öшалiс лозунг: «Нянь — фронтлö!» Мöдiк сэтшöм жö лозунг вылö вöлi гижöма: «Миян дело правöй — ми победитам!»

Митюбаран чеччöвтiс телегаись, кыдз шар быгыльтчис паськыт тоша старик дынö, кöда юрсö öшöтöмöн пукалiс поспу вылын.

— Здорово, земляк! — горöтчис сылö. — Бöра туйö?

— Гайнаö иньдöны. Зöр пö леспромхозö колö кыскыны, — нюжвыла шуис старикыс и малыштiс тошсö. — Вöввез сувтiсö, а сё колö мунны.

— Мыйнö, батя. Вот и миянöс Кудымкарö репöтiсö. Степанко тожö чеччис телегаись, чапкис Сырчиклö одзас свежöй клевер. Кинкö не öддьöн зубыта чувйыштiс сылö конувтас плеть оропöн, пильснитiс. Бергöтчис Степанко, а сэтöн Колька Чугайнов рыгзьö-сералö. Степанко шынньöвтiс паныт, здоровайтчис другыскöт, кöдакöт öтiк парта сайын пукалiс кватьöт классын, олiс быдса год интернатын, кöр велöтчис посадас. Колька сэк вöлi учöтик мыгöра, ён и гöрд чужöмбана. Сiя любитiс ыжмалыштны, переменаэз коста ветлiс чуть я не юр вылын, мукöдпырся дозыляйтiс учителлезлö, öтiк кылöн шуны — вöлi бöб зонка. Öнi сiя нюжалöма невна, быдмыштöм, рожабан йыввес озö ни сотчö — няньыс не сiя. И нылöн Кокоринскöй колхозныс не буржык Лобановскöйся лоöм.

— Кытчö иньдöны? Тожö Гайнаö? — юалiс Коля Степанколiсь.

— Не, Кудымкарö.

— Эта бур. Кöть городсö адззылан. Кыдз тэ думайтан, нянь сетасö, озö?

— Кин тöдö. Председательным шуис: кöсйöмась пö.

— Кöть бы сетiсö. Неделя ни настоящöй няньсö эг адззыв. Пуксисö кык дружок телегаö, öшöтiсö юррез. Степанколö усис

тöдвылас, кыдз нiйö Колякöт лэдзлiсö стенгазетаö. Шогмис эта как раз сiя тулысö, кöр пондöтчис войнаыс. Öтiк перемена коста Степанко рисуйтiс доска вылö Колялiсь юрсö, гижис увтас: «Тöлiсь». Коля лöгасис, кыскис сумкасис джын чöвпан нянь да кыдз шентыштiс Степанколö юрбöрас. Степанко эз кольччы долгö: босьтiс няньсö, свистнитiс ёртыслö паныт. И шупкасисö сэтчöдз, кытчöдз чорыткодь ни няньыс эз инмы öшынö. Стекло мунiс рез-паз, нянь лэбзис öтöрö.

— Ох-хо, кытшöм ми бöбöсь вöлiм, — шуис Степанко. — Беда. Эн на вунöт, кыдз стенгазетаас öшалiмö?

— Вунöтан разь! Сё думайта: вот бы адззыны öнi сiйö чöвпанторсö...

Митюбаран пыралiс контораö, а кöр петiс бöр, горöтiс Степанколö:

— Давай складö! Анькытш грузитны тшöктiсö.

— Счастливöй тэ, — шуис Колька. — Анькытшсö и сёйыштны позяс.

Степанко öвтыштiс киöн, нем эз горöтчы.

Ыджыт складын поленичöн куйлiсö мешöккез. Весовщик мыччалiс кинас, тшöктiс тэчны вес вылö. Митюбаран ош моз кватитiс сьöкыт мешöк, нем туйö нöбöтiс вес вылö. Степанко тожö пондылiс босьтны, но эз вермы вöрзьöтны и местаись.

— Етшаöв пикансö сёйöмыт, мужичок, — серöмтчис весовщик. — Мешöкас семьдесят пять кило!

Сералыштiс невна и давай отсасьны.

Митюбаран тэчис аслас телегаö нёль мешöк — куим центнер. Степанко пуктiс тожö нёльö, сразу жö вевттис брезентовöй öнöн, жын-жын домалiс гезöн.

— Тiянлö кыдз, накладнöйсö öтiкö гижны? — юалiс весовщик.

— Кыдз этö öтiкö? — дивуйтчöмöн шуис Митюбаран. — Гиж торйöн. Вдруг зонкаыс бöбалас, а отвечайтны ковсяс меным.

— Ме? Бöбала? — лöгасис Степанко. — Да тэ тай былись ылöстöм. Вот эшö!

Митюбаран шы эз сет.

Весовщик споритны эз понды, гижис кык накладнöй, и подводаэз петiсö öтöрö. И только ештiс Степанко локны контора дынö, кыдз йöзыс коласiсь казялiс кинöскö öддьöн ни тöдсаöс: бöрнас сылань сулалiс учöтик зоночка. Юрсиыс бель чочком, йöрнöсыс сюйöм вешьянö и, медбы вешьяныс эз усь, учöтик морток чапкöм пельпон вылöт вонёвöй лямка. Сэтшöм лямка чочком светас новйис только öтiк морт — этö Санко. Неужели сiя, зырымöсь бедь, лэдзчис посадö? Быль, сiя! Вон и сумка öшалö бокас, кöдöн новйöтлiс тöвнас учебниккез.

Степанко печиктiс сылö юрбöрас, юалiс лöгöнмоз:

— Тэ мыля татöн, а?

— Степанко! — радмис воныс. — А ме чайтi, тэ мунiн ни Кудымкарас. Во, пурт вунöтöмыт. А пурттöг разь позьö? Мамö и шуис: «Лэдзчöт пуртсö, пригодитчас туйын». И ме сразу — прыг-прыг-прыг! Как раз ештi.

Санко баитiс горöн, вöлi рад, что застанитiс вонсö. Митюбаранлöн мамыс, кöда сё эшö павьялiс Заготзерно одзын, локтiс зоночка дынö, шлёп-шлёп керис тырппезöн:

— Ох, углан, углан! И хитрöй жö тэ быдман. Видзöт кытшöм мог адззöма — пурт!

И быль хитрöй вöлöма Санко. Эз ешты пантасьны воныскöт, а юалiс гусьöн:

— А няньсö сетiсö ни? Уна?

Степанко пильснитiс сылö паныт, вежöртiс, мыйлö воныс босьтöма сьöрас сумкасö.

— Эзö на, Санко. Вот сетасö, сэк...

Нянь сеталiсö перво кокоринскöй ямщиккезлö, кöдна быдса обозöн мунiсö Гайнаö. Степанко да Санко сулалiсö ларёк дынын, видзöтiсö, мымдаöн сетöны быд ямщиклö. Лöсялö! Вон паськыт тоша старикыс видзö ни киас буханка да джын, сымда жö и Колька Чугайновлöн. Старик, кöр босьтiс няньсö киö, паськыта и важнöя пернапасасис, а Колька сразу пуксис поспу вылö, чегис джын буханкасис ыджыт тор и пондiс гардны-сёйны.

Но вот локтiс Степанколöн очередь. Уна я сетасö? Ого! — тожö буханка да джын. Зонка первöй делоöн котöртiс аслас телега дынö. Эстöн сiя дыр бергöтлiс буханкасö сiдз и этадз, нюкайтiс. Няньыс небытик, только пекарняись вайöмась, эшö абу на ештöм сайкавны, и дукыс öддьöн ни чöскыт. Санко орöттöг видзöтiс воныс киэзö, ньылалiс дуль.

— Во, Санко, нянь! — гажöн горöтчис Степанко и корис воныслiсь пуртсö.

— Нянь! — шуис Санко и эз вермы терпитны — пешлiс нянь коркасö чуньнас.

Не тэрмасьöмöн Степанко вундыштiс Санколö ыджыт шöрöм, вундыштiс аслыс. Сэсся кыскис öн увтiсь солöн кöзичка и кыза солалiс шöрöмсö, пондiс курччавны пинь дороккезöн. А Санко сёйис совсем мöднёж: табанитiс öмас сымда, мымда тöрис, и — раз, раз! — ньылыштiс сразу.

Митюбаран и мамыс тожö сёйисö. Тыдалö, мамыс сiйöн и лэдзчöма посадас, медбы чöскöтны öмсö. Митюбаран сёйис Санко моз, а мамыс — Степанко моз. Сэсся Митю сюйыштiс буханкасö кöзичаö, дзебис öн увтö.

— А этö тэныт, мам, — сетiс инькалö неыджыт торок, кöда кольччис джыння буханкасис. Нöбöт гортö, рытнас сёян.

Степанко перво мöдiс керны сiдз жö, но, кöр думайтыштiс, что учöтик торок, кöдö сетас Санколö, некинлiсь оз бурмöт сьöлöм, решительнöя сюйыштiс Санко сумкаö быдса буханкасö.

— Вот, нöбöт гортö, — висьталiс воныслö. Сэсся содтiс строгöя: — Да видзöтлы, эн чепляв туй вылас, быдöс сет мамöлö. Невнаöн тырмас куим лун кежö. Чеплялан, дак локта гортö и кучиктö куля. Вежöртiн?

— Кыдз позьö чеплявны? — дивуйтчис Санко. — Тэ давай кöртав сумкасö сiдз, медбы ме эг вермы пöрччавны.

И Степанко, кöда тöдiс вонсö öддьöн бура, кöрталiс сумкасö кытшöмкö хитрöй дзиктасьöм* гöрöдöн.

Санко вöлi радся-рад. Чулаласö уна-уна годдэз, и зонка сё пондас касьтывлыны этö лунсö. Нянь!

Дата добавления: 2015-11-16