Эта сьöкыт военнöй тулысö Лобан деревняын почти быд керкуын мыччисисö гыррез, öнi, кöр мунан улица шöрöт, дак только сiйö и кылан: гым-йирк... йирк-гым, бут-бут-фирк...
Кыдз быд мортлöн эм аслас голос, сiдз и быд гырлöн вöлi аскодя голос. Öтiк керкуын кылiс кокнита йиркöтчöм, мöдiкын — сьöкыта буткöтöм, а куимöтын мыйкö эшö дзуртiс.
Лобановса масьтiсö быдöс, мый позис масьтыны: кöс идзас, анькытш гöридз, куглина да йики. Кöр видззез вылын петалiс пикан, а ыббезын — пистик, лобановса пондiсö масьтыны и нiйö. Перво косьтасö горын, сэсся масьтасö, пизь керасö, вöлись и кöрышшез пöжаласö.
Гым-йирк... йирк-гым... Бут-бут-бут...
Эшö неделя бöрланьын колхозын кончитчис тулысся сев, удерлун садитсис картов, и председатель Сидор Антонович Ошкоков, ыджыт горба кöсыник мужичок, сетiс народлö куим шоччисян лун. И то шуны — вöлi кад ни: йöз мыдзис, öдва-öдва ляшмасис, вöввез сувтiсö, пондiсö усявны. А одзын вöлi сенокос, лун-мöд бöртi колiс петны гöрны пар, кыскавны назём. Да етша разь уджыс колхозын, кöр мунiс война и фронт корис нянь, а уджалiссес только инькаэз да стариккез?
Сетiс председатель куим шоччисян лун, а нянь некинлö эз сет. Ойбыт пукалiс сiя правленнёын, шваткöтiс счётыöн, лыддис сiдз и этадз быд грамм и шуис счетоводлö:
— Если сетам каждöй уджалiсьлö кöть джын килоöн пизь, то сенокос кежö запас оз ло.
— Оз ло, — согласитчис счетовод. — А няньтöг уна я ытшкисян? Нет, ась лучше öнi невна тшыгьяласö, пикан да пистик сёясö, а сенокоснас пондам нянёк сетавлыны.
Сiдз и решитiсö кык умнöй юр. Вот и орсö öнi быд керкуын сьöлöм поткöтлан музыка: гым-йирк, гым-йирк...
Орсiс эта музыкаыс и Степанко керкуын. Тöн воныскöт нiя ветлiсö Туримыс сайись нюрö пиканла, вайисö сiйö быдса мешöк, косьтiсö горын и талун керисö пизь. Пикан вöлi косьмöма бура, сiдз и чегласис киын. Пуктан сiйö гырас дорресви, пондан тюкöтны, дак только бус кайö, кыдз быльнöй мельницаын. Санко, Степанколöн воныс, эшö учöтик, кык класс вöлись кончитiс, и масьтiсьны немымда эз прокмы. А Сима сойыс йылiсь и баитны нем: куим годся вöлись, сё эшö умöля котрасьö, мыля быдкодь турунсянь коккес чукыльтчисö, а кынöмыс сiдз ыждiс — вот-вот потас. Тоин сы киö, конечно, он сюйышт. И масьтiсьны ковсис Степанколö. Слава богу, вынокыс тырмö ни: кыдз-некыдз четырнадцать тырис.
Степанко — мужичок вежöра и хозяйственнöй. Удерлун, ыб вывсянь локтiкö, сiя адззис тракторнöй плугись кыз пружина. Мöдiк мунiс бы боки, эз и дзарнит бы эта пружина вылö, а Степанко босьтiс киö, бергöтлiс мымдакö, сэсся решитiс: хозяйствоын пригодитчас. И быль — пригодитчис! Ны керку потолокö, матича шöрö, кöркö дорлöмась ыджыт кольцо, кöдаö сюйыштлöмась зыбка öчап — латтянсёр. Öнi учöт челядь эз лоö и öчапсö чапкисö, а кольцоыс сё öшалiс. Степанко думайтiс-керис и домалiс пружинасö кольцо бердö проволокаöн. Пружина бердö дошлöй морт кышалiс тоин — и öнi любуйтчы! Настоящöй механизация петiс: тюкнитан тоиннас гырö, а лэбтыны сiйö оз ков, ачыс бöр вывлань чеччöвтö — пружинаыс сiйö кыскö. И кокнитжык, и долытжык уджавны, интерес кытшöмкö лоис.
Медбы тоиныс эз лязсьы, а буржыка масьтiс, мый пуктан гырö, Степанко сы конецö ыджыт кöрттулöн дорис лэчыт дора гайка. Сöтан сэтшöм тоинöн кöс пикан кузя, дак только няж мунö, сразу пизь шогмö. Гайкаыс эшö тöн сьöд вöлi, а талун свиттялiс ни, кыдз стеклотор, — сыбурна зыртчис гыр пыдöсыс бердö.
Степанко масьтiсис час, сыбöрын мöдiкö. Лабичын куйлiс сипож. Сыын джынас ни веж видзис пикановöй пизь, небытик, поснитик, кöть часöт жö тупöссез пöжав. Но одзöв: мамыс только-только локтiс фермаись, кытöн высьтö колхознöй мöссэз, и часöт вöлi картаын, высьтiс ассис Серанькасö. Вот пыртас сiя йöв, сысъялас и вöлись лонтас гор. Деревняын гор öнi лонтöны асывнас и рытнас, сё пикан да пистик пуöны, кöрышшез пöжалöны.
— Гым-йирк, гым-йирк, — буткöтiс тоин.
— Дзурк-вирк, дзурк-вирк, — дзуртiс крепыт стальнöй пружина.
Степанко лыддис, кынымись тюкнитас гырас: раз, два, три... десять... сто...
— Во, Санко, тысячаись ни тюкнитi талун, — шуис сiя воныслö.
— Тэ вына, Степанко, — ошкис вонсö Санко. — Тэ он и мыдзлы. Киэт эз орö?
— Кыдз эз орö, каждöй коска висьö. Поди, масьтан невна?
Санко öшöтчис тоин бердö, тюкнитiс кыкись-куимись, ыш ловзисис:
— Ог вермы. Кынöмам писькöтö.
— Эх тэ, богатырь! Тэ только пызан сайын прока, — не лöгöн шуис Степанко и бöра локтiс гыр дынö. Симка соёкыс сулалiс сэтöн жö, орöттöг видзöтiс, кыдз уджалö воныс, нималiс чуньсö.
— Мый, сималö кынöмыт, а? — сойсö жалейтöмöн юалiс Степанко.
— Сималö. А кöйышыс нечöскыт. Гойшöс сотö.
— Курыт, конечно, кöрышыс, — согласитчис Степанко. — Но, ужо, чожа озъягöд шогмас, сэсся малина. Вот овнытö пондам! Тэ, Сима, терпитышт невна. Чожа ми богатсялам. Вот сэтöр лоас, тшак петас.
— А пизьсö председательыс кöр сетас? — натьтö, дасöтiсь ни талун юалiс Санко.
— Чожа сетас. Вот петам гöрны пар — и сетас, Няньтöг гöрны некыдз оз туй.
Шондi, кöда лунтыр пöжис мусö жалейттöг, саясис ни Туримыс сайö, и керкуын лоис пемыткодь. Руд вуджöррез нюжалiсö; гыр дынсянь комöдз, вöрисö жагöник. Дугдiсö дзингыны гуттэз. Степанко эшö кынымиськö сöтiс гыр пыдöсö и куралiс медбöрья пизёксö сипожö. Шабаш! Тырмас талун. Сiя вештiс тырсö пельöсö, пöрччалiс пружина бердiсь тоин. Часöт позяс шоччисьыштны. Конечно, сималö кынöм и колiс бы перво сёйны да вöлись пуксьыны лабичö нето водны ольпасьö, а мый сёян?
— Ми ветлiм талун анькытш ыб вылö, — юöртiс Санко.
— Но и мый?
— Петалöма ни анькытшыс. Петассэс небытикöсь-небытикöсь и чöскытöсь.
— Тэ петассэсö сёйин? Ах, зырымöсь бедь! А вдруг председатель адззылас? Эз некин адззыв?
— Кин адззылас? Ми только недырик кежö ветлiм.
— Сэсся эн мун! — строгöя шуис Степанко. — Вартла. Вежöртiн?
Санко, конечно, вежöртiс. Сiя мунiс ылöжык воныс дынiсь, пуксис öшын одзö. Симка ляшмасис пороглань. Вот-вот должен вöлi пырны мамыс подойницаöн, и нылочка лöсьöтчис пантавны сiйö, медбы чожжык öшöтчыны дубас бердö. И вот жолькнитiс посöдз ыбöс, дзуркнитiсö поспуэз. Мам пыртiс йöв. Степанко дзарнитiс сы чужöмö и вежöртiс; радуйтчыны немлö, Серанька бöра йöвсö сетöма етша.
Эшö куим год бöрланьын, войнаыс вотöдз, мам вöлi том и öддьöн боёк. Сiя луннас уджалiс колхозын, ештiс керны быдöс гортся удж, быдöс миськавны-пеславны, некöр эз норасьлы, что мыдзис. Часöт ветлöтiс сiя коккесö му вылöт кыскалöмöн, часто шогавлiс и, гор вылын куйлiкö, ружтiс, кыдз старуха. Сiя и былись пондiс вачкисьны старуха вылö: рожабаннэс вевттисисö чукыррезöн, вежöтiсö, аннэс петiсö, и быдöс высиныс горбыльтчис. Сьöкыт военнöй кад, челядьöс быдтöм да жöникыс понда тöждiсьöм нырыштiсö мортöс.
Мам шы сеттöг сысъялiс йöв, невна кисьтiс кружкаö и сетiс Сималö:
— На, чöскöт öмтö. А тэ, Санко, петав öтöрö, öкты чаггез, пырт пес.
Комас уджавтöн сiя, тыдалö, эз казяв, что Санкокöт пондiс шогмыны мыйкö неладно. Зонка перво бледöтiс, сэсся курни-верни чеччöвтiс öшын дынiсь и чожжык пырис лабич увтö, енугöлö.
— Мый тэкöт лоис? — повзьыштiс Степанко.
— Председатель, — шушкыштiс воныс. — Миянö пырö.
Сидор Антонович Ошкоков, кöдö эшö неважын шуисö Лобанын просто Ош кокöн, пыравлiс татчö не öддьöн часто, но сё жö пыравлiс, и Санко сыись немымда эз повлы. Мый сыись повны, кöр душаыт сöстöм? А талун ляпкисис лабич увтас, нельки дугдiс лолавны. Морт кайлöма ыб вылö, бöбалöма сэтчин. Кин тöдö, поди, адззылiс председательыс. Павкас сэк. Ошкоков, кöть и нездоровöй мужичок, а вына эшö и строгöй. Шед сылö киас...
Гыма-йирка, юасьтöг-висьтасьтöг, кыдз и колö начальниклö, Сидор Антонович пырис керкуö, горöн здоровайтчис хозяйкакöт, а Степанколiсь нельки жмитiс кисö и юалiс:
— Но кыдз шоччисян, молодец, уна я вынтö öктiн?
— Шоччисис!.. Шоччисяс, пожалуй! — лöгöнмоз горöтчис Степанко туйö мамыс. — Лунтыр кокасис тоинöн, дзик кыр. Ох, ох... Кöть бы пизёк невна сетiн, челядь эд.
— Сетам, Марина, сетам. Вот пондöтчас сенокос, и сетам невнаöн. Кыдзкö терпитыштö öнi. Тöвнас эгö кулö, дак öнi огö ни. Турун петалiс, вöрын быд пожум вылын туганнэз шогмисö. Витамин.
Сiя пуксис лабичö, юрсö дзебис пельпоннэзас. Тыдалö, пырöма важнöй могöн — лöсьöтчис баитны. Мый этö сэтшöмыс? Поди, война вывсянь кытшöмкö юöр иньдiсö? «Господи, быдöс я ладно?» — повзьыштас хозяйка.
— Вот кытшöм делоыс, Степанко, значит... Эхма... Кувны некöр, сымда, зонка, уджным. Он ешты керны öтiк дело, видзöтан — мöдiк бердö кутчисьны колö.
Хозяйка невна лöньсис, сылöн дугдiс бытшкыны моросас. Раз Ошкоков баитö удж йылiсь, сiдзкö иньдас Степанкоöс кытчöкö уджавны, этö уж сiдз и тöд. Но да ась, лучше ой и лун уджавны, нежели кывны кытшöмкö умöль юöр. Степанко тожö вежöртiс: шоччисян луннэз сылöн чулалiсö. Сiя только öтiкö эз вежöрт: мыля председатель локтiс наряднас ачыс, а эз иньды бригадирöс? Поди, öддьöн важнöй заданнё мöдö сетны?
Сидор Антонович кыскис юрсö эшö пыдöжык пельпоннэзö, сакыртчис быдöс, дзик ньылыштiс курыт лекарство, шуис, нето Степанколö, нето аслыс:
— Пар гöрны колö, назём кыскавны колö... Не талун, дак ашын колö петны ытшкисьны. Быдлаö колö народ... А сэтöн эшö вайисö районiсь приказ: ашын жö иньдыны туйö кык подвода. Кудымкарö пö нянь кыскыны. Мый бы эз вöв, а колö кыскыны. Он тырт приказсö — беда. Война — нем он кер...
Степанко эз тöд, мый горöтчыны, пукалiс чöлöмöн. Зато мамыс сiдз и клопнитiс киэзнас боккесö, шуис чуть я не бöрдöмöн:
— Господи, да кытчö сiя мунас? Йöз деревняын эшö эз на вöв, торксяс кытöнкö туяс. Да и вöлыс сувтöма, удерлун медбöрья кругсö öдва ни керис... Сiдз и пöрö, сiдз и пöрö, беднöйка. Кытчö сiйöн мунан? Шутка висьтавны — сто верста.
— Ужо, чöв, Марина, — öмалiс сiйö председатель. — Зонка абу ни учöт, жöник, позьö шуны, нем сыкöт туяс оз ло. Вöв, конечно, мыдз — этö кöть кин сiдз шуас. Четырнадцать гектар зоныт шулялiс тулыснас. Но Сырчик вына эшö, ветлас Кудымкарöдззас. Да и не öтнас зоныт вöрзяс, надёжнöй морткöт иньда. Митюбаран бöр тöн бертöма, абу босьтöмась армияас. Вот сыкöт и мунас Степанко. Вöв Митюлöн справнöй, мыйись-мый — отсалас. Но кыдз, Степанко, а?
Зонкалö гленитчис эта басниыс. Лыддисö сiйö не зырымöсь бедьöн ни, а настоящöй колхозникöн. Видзöт, ачыс председательыс сы дынö локтöма, кыдз ыджыт морткöт баитö. Только вöлыс вот... Удерлун, картов садиттöн, былись öдва керис медбöрья кругсö, шатласис, дзик кольмöм. Кыдз сiйöн Кудымкарöдз мунан?
— Нем, натьтö, оз пет. Паддялö* вöлö, — нерешительнöя шуис Степанко.
— Чудак, бур вöвнас и бöбöв бы мунiс, а тэ жö вежöра детинаыс. Не öтнат мунан. Митюбаран дошлöй, отсалас. И, кывзы-ко, районсянь сiдз и висьталiсö: ямщиккезлö Заготзерноын сетасö нянь. Этö тэ вежöртiн? Нянь, настоящöй рудзöговöй нянь. Ме эд сiйöн и иньда тэнö. Ась, мыся, детинаыс невна öмсö чöскöтö. Макариха Паладь корсьö вöлi туяс, дак ме сылö сiдз и висьталi: нет, мыся. Кин медуна гöрис, сiя и мунас. Эта лоас сылö премия туйö. Адззылiн, кытшöм делоыс?
Нянь! Кöр председательыс казьтiс этö кывсö, Степанколöн öзйисö синоккес, мамыс надейтчöмöн дзарнитiс зоныс вылö, а Санко, кöда öнöдз вöрöтчытöг куйлiс лабич увтас, горöн ньылыштiс дульсö. Нянь! Нельки Симка осьтiс öмсö, дыр видзöтiс председатель вылö, бытьтö няньыс вöлi сы киын ни.
— И эшö öтiкö вежöрт: заданнёыс öддьöн важнöй, боевöй, позьö шуны, — одзлань баитiс Сидор Антонович. — Нянь колö фронтлö, армиялö. Кылiн медбöрья юöрресö? Миян армия неважын босьтöма не öтiк город и сё одзлань вешшö. Разь туйö сэтшöм армиясö няньтöг видзны?
Хозяйка босьтiс запон дорсö гаддезöн вевттисьöм киö, вайöтiс сiйö синнэс дынö.
— Кöр ни чулалас эта ёрдöм войнаыс? Ох-хо-хо... Загрек, кыссяс эшö год-мöд, кулам быдöнным.
— Чулалас, чожа чулалас, Марина. Локтасö воиннэз гортö, некой пору хозяйство лэбтасö. Бöра песняэз пондам сьывны.
Председатель вежöртiс, что дело сылöн артассис, и лöсьöтчис мунны. Порог дынын сулавтöн сетiс медбöрья наказ:
— Ашын одзжык и вöрзьö, медбы не сёрмыны. Тэ, Марина, пывсьöтiн бы зонтö баняын, лöсьöтiн бы мый колö. Тэ, Степанко, сьöрат эн вунöт котёлок босьтны. Сов унажык пукты кöзичаö. Вдруг мыйкö пуны ковсяс. Да телега колесоэсö талун жö мавт. Мазь босьт, пригодитчас. И брезентовöй öн запты, вдруг зэрмас... Вадас няньсö...
Председатель висьталiс «Адззисьлытöдз» и петiс öтöрö. Санко чепöссис лабич увтiсь:
— Степанко, кылiн? Нянь пö сетасö. Вот эта дело!
Степанко нем эз висьтав. Сiя тожö думайтiс нянь йылiсь, и баитны вöлi некöр. Интересно, уна я сетасö? Поди, буханка-мöд дöнзяс? Вот бы сiдз!
Дата добавления: 2015-11-16; просмотров: 41 | Нарушение авторских прав
| <== предыдущая страница | | | следующая страница ==> |
| ВОТ СIЯ, ВРАГЫС | | | НЯНЬ — ФРОНТЛÖ! |