Тысяча пятьсот порция

Чожа мыйись кокоринскöй подводаэз петiсö туйö, мунiсö Гайна ладорö. Митюбаран да Степанко кольлалiсö нiйö, сэсся пуксисö телегаэзö и вöрзисö Кудымкарлань. Телега колесоэз сьöкыта ёркйисö чорыт туй кузя, дюттясисö мешöккез увтын дроггез, дзуртiсö дугаэз. Районнöй посад жагöник кольччис бöрö. Кольччис бöрö первöй километровöй столб. Одзын нiя вöлiсö эшö сотня мымда.

Митюбаран чöскыт нянь бöрын пондiс сунасьны, то и дело зэгйис юрнас, а чожа водiс мешöккез вылö кыминь, тыдалö, онмöссис. Степанко сюйыштiс вожжисö гез коласö и чеччöвтiс туй дорö. Мунны сiя решитiс подöн, медбы кöть невночка кокньöтны Сырчиклiсь грузсö. Видзöтан, озжык мыдз, дыржык мунас шоччисьтöг.

Туй дорын омöн лöзöтiсö расоккез, осяэз да öзиммез. Тулысыс вöлi таво дружнöй, шоныт да мича. Апрель конецын пондöтчис сев, и часöт, кöть гожумыс вöлись мыччисис, туй дорын пежьялiс ни турун, кыдззез да пипуэз вевттисисö паськыт небытик листтэзöн. Сю петассэз гажöтiсö син: вöлiсö тшöкöсь, ровнöйöсь. Чулалас кынымкö лун, и рудзöг каттисяс трубкаö, пондас шепьясьны.

Степанко радъялöмöн видзöтiс öтмöдöрö, тыр моросöн лолалiс сöстöм ру. Кытöнкö вылын-вылын, лöз небоын, тюрликайтiс ыбшар, кисьтiс басöк шыэз, и зонкалö кажитчис, бытьтö киссисö му вылö не простöй шыэз, а небоыслöн нежнöй голубöй тороккез. Туй дорись пуоккез коласöт лэбалiсö учöтик каёккез и тожö сьылiсö вöснитик-вöснитик голоссэзöн.

Лун вöлi настоящöй гожумся — гора да жар. Вит-квать верста бöрын вöввез пымалiсö. Сырчиклöн кокольöсь гöныс вевттисис быгöн. Пымалiс и ачыс Степанко, чапкис вывсис дöраовöй шабурсö мешöккез вылö, кольччис öтпöвсöн.

Кöр подводаэз кайисö крут Казаринскöй мыс вылö, син одзын оссис басöк картина. Öтмöдöрын, кытчö бы эн нёджжöвт, ольсассис паськыт вöр. Ылiсянь сiя вачкисис дöмаса пась вылö: кöзъяиннэз вöлiсö сьöдöсь, а лягаэзын кыдззаиннэз — лöзöсь. Вöр весьтöт уйис кокнитик тшынок, и Степанколö кажитчис, бытьтö вöрас лонтöмась баня, койыштöмась иззэз вылö ведра понiсь ва, и öнi парыс везъясис пу йыввез коласöт.

Ыджыт мыс вывсянь Степанко дзарнитiс бöрас, и сьöлöмыс сiдз и вöрзьыштiс: сiя казялiс ассис деревнясö. Видзöт тэ, мый шогмö! Дас верста Лобанöдз лоас, а тыдалö, дзик ки долонь вылын. Керкуэс учöтикöсь-учöтикöсь, зато саддэз — тополлез да кыдззез — тöдчöны öддьöн ятнöя. Вон и сiя ыджыт топольыс, кöда быдмö ны керку öшын увтын, тожö тыдалö. Гажтöмкодь лоис Степанколö, кокнитик шог муныштiс моросöт: чужанiнсö кольö... Натьтö, быд лобановскöй мужик война вылö мунтöн эта мыс вывсянь дыр видзöтiс аслас деревнялань и, кин тöдö, поди, сылöн петiсö сэк синваэз. Натьтö, и Степанколöн айыс сувтчылiс эта мыс вылö и тожö видзöтiс аслас гортлань, кытчö колис куим челядьöс и иньöс... Сьöкыт конечно, вöлi сылö, гажтöм. «Адззисьлытöдз, Лобан, — натьтö, шуис сiя. — Адззисьлытöдз, чужанiн.... Кин тöдö, берта я бöр?»

Керöс увтö подводаэз лэдзчисö кокнита. Лысанко нельки öдззис рöктыны, и Митюбаран саймис. Сiя дыр тулис синнэсö, йöрнöс сосöн чышкис шадра чужöмбансö и паськыта осьтлiс öмсö.

— Ого, ми тай ылын ни, — дивуйтчис сiя. — Этадз пондам ужйыны, дак чожа Кудымкарын лоам.

Степанко паныт шы эз сет. Сiя лöгалiс Митюбаран вылö, мыля юртöм детина тшöктiс гижны накладнöйесö торйöн. «Бöбалас пö зонкаыс, сёяс анькытшсö. Тьфу! Ачыт тэ чожжык сёян...»

Шы эз сет паныт Степанко, а Митюбаран, кыдз и öнтай, бöра кутчис сярзьыны-баитны, неетша быдторсö лёбис.

— Кöбы вöрзимö месяц бöртi, ми тэкöт, Степанко, ёна бы сэк гажöтчим. Месяц бöртi или невна сёрöнжык быд карчйöрын лоас картов, калиг да сёртни. Сёй, мымда колö!

— Йöз карчйöрсис?

— Конечно. Ветлiм мöйму ми Кудымкарас августö, вундан коста, дак гажа вöлi. Локтам ойнас деревняö, шоччисям невна и асыв ладорас, кöр нельки поннэз узьöны садьтöг, пырам карчйöрö да и гарьям тыр мешöк картов. И — сразу аллё! — гöнитам ылöжык, керам костёр, пöжалам, пуам. Беда бур вöлi.

— Тiянлö бур, а хозяиныслö кытшöм? Сылöн, может, тыр керку челядь, карч вылö только и надейтчис.

Митюбаран дзик эз и кыв Степанколiсь баитöмсö, боньгис одзлань, ошшасис.

— А Кудымкар дынын ми инмим колхознöй картов вылö. Вöлöма жö юр председательлöн: садитöм картовсö туй дорö. Уна и гарйим сэк, нельки базарын городскöйеслö вузалiм. Эх, вöлi дело! А часöт мый? Нем эшö эз быдмы. Одзöв иньдiсö. Но да ладно, мый-нибудь керам. Тэ, Степанко, эн пов, мекöт некытшöм бедаö он шед. Вот чожа локтам Горба пос дынö, Коса ю дорö. Видззез сэтöн эмöсь, вöввезлö сёян лоас. Узям ю дорас. А ужнайтны ми лöсьöтам öтiк штука — кывтö ньылыштан...

Степанколöн сималiс кынöмыс, и сылö охота вöлi тöдны, кытшöм сэтшöм штука нiя лöсьöтасö, кöр локтасö Коса ю дорö. Но юасьны эз понды. Митюбаран эм Митюбаран, кутчись сыкöт, — пожалуй, эшö не сiйö кылан.

— А Сырчикыт тэнат, Степанко, сувтны мöдö, — одзлань баитiс сiя. — Мда. Видзöт, кыдз пымалiс. Беда. Тэ öддьöнöв сiйö орöтöмыт тулыснас. Пожалуй, сувтас...

Что Сырчиклö öддьöн сьöкыт, Степанко и ачыс адззис. Быд учöтик мысок вылö сiя кайлiс горбыльтчöмöн и, натьтö, важын бы сувтлiс шоччисьны, кöбы одзас эз вöв Лысанко. Лысанко мунiс бодрöя, и Сырчик мымда прок вöтчис сы сьöрö. Но дыр я вермас сiдз кыссьыны? Вöтчас, вöтчас и сувтчас. Мый сылiсь босьтан?

— Но тэ эн тöждiсь, Степанко, — боньгис Митюбаран. — Мый-нибудь керам. Кывзы-ко, кытшöм случай мекöт öтпыр вöлi. Локтi ме, значит, гортö ФЗО-ись. Станциясянь гортö подöн котöртi. Но и вот, мыдзи, садь бырис. Водi рытнас туй дорö, думайта: мый керны одзлань? И вдруг адзза: вöввез туй дорас йирсьöны. Но, кутi ме öтiк воронкоöс, бадь нинiсь сермöт лöсьöтi, пукси да и гöнитi пятнадцать верста. Сэсся лэдзи бöр вöвсö. Адззылiн, кыдз шогмис? Ого!

— Бöбöтчан тэ быдöс. Кывзыны неохота, — öвтыштiс кинас Степанко. Митюбаранлö колiс бы лöгасьны, но сiя только шынньöвтiс и пондöтiс кытшöмкö виль история. Не весь, тыдалö, баитöны: умöлик артист сцена вылын некöр оз думайт сы йылiсь, кывзöны сiйö отирыс али озö. Сiя тöдö öтiкö — каттьö и каттьö арттöмсö. Сiдз и Митюбаран.

Степанколö лоис гажтöм.

* * *

Кöть кык год ни, ровно кык год, öгралiс виркисьтан война, а коми-пермяцкöй пармаын тöв и гожум орлытöг мунiс удж: вöрзаптiссез пöрлалiсö стогодся пуэз, кыскалiсö береггез дорö и кылöтiсö. Страналö эна годдэзö колiсö не только нянь да снаряддэз, страналö колiс и вöр. Кытöнкö строитсисö виль заводдэз да городдэз, строитсисö кöрттуйез, страна лэдзис самолёттэз да корабллез. Быдлаö колiс вöр.

Таво тöвнас Степанко кык месяц уджалiс вöрын, кыскалiс пожуммез и кöззэз, и часöт, кöр нiя Митюбаранкöт локтiсö Коса ю дорö и казялiсö, кыдз кывтö сы кузя вöрыс, Степанко первöй делоöн думайтыштiс: «Поди, и менам пуэс кывтöны?» Но вöр мунiс орлытöг, свальнöй массаöн, и тöдны, кин заптiс каждöй керсö, конечно, некыдз эз позь.

Митюбаран только ештiс юскыны ассис вöвсö, сразу жö чукöртiс кöс мыррез да потшпоннэз, керис ыджыт костёр. Степанко гумыштiс Косаись котелокö ва, сувтöтiс пизьöтны.

— Сейчас ми керам öтiк штука, Степанко, — баитiс сылö Митюбаран. — Ми тэкöт сыбурна лотошитам, что кык лун сэсся кынöм симавны оз понды. Вот часöт...

«Мый сiя мöдö керны?» — думайтiс Степанко. Ордчöн вöлi ю, и ваас, колö думайтны, уялiс неетша чери. Мылякö думайтсис, что Митюбаран кыскас öн увтiсь кытшöмкö интереснöй штука, кыяс черисö и пуас бытшöм черива. Но Митюбаран эз кыскы öн увтiсь нем. Кыйны щукаэз да кельчиэз сiя эз и думайт.

— Вот мый, Степанко, — баитiс сiя ёртыслö. — Тэ давай-ко кывзы менö. Кывзы, кыдз ми мöйму Кона Öльöшкöт кайлiмö Гайнаö, Вöлi тожö гожум, туй вылö нянь эз сетö, а кыскыны тшöктiсö тожö анькытш. Вöрзаптiссезлö кыскимö сiйö. Но и вот. Кынöм орöтö-сималö, а мый сёян? Сэк ме и шуа: «Кывзы, Öльöш, давай пуам анькытшсö». «Да эд сiя оз пет, сэк эд тюрьма», — отвечайтö Öльöшыс. Морт сiя, ачыт тöдан, невна не совсем юрнас, кытшöмкö винток пö оз тырмы. Но да ладно, менö не велöтны. Кисьтi мешöкись анькытшсö, а медбы весыс эз чин, мешöкас бузнитi быдса ведра ва. Анькытш дак анькытш и эм. Сiя радейтö васö. Кöс анькытш польдö, юö васö. Вот и весыс эз чин. Давай-ко, дружок, ми керам штукасö.

Степанко мигайттöг дыр видзöтiс Митюбаран синнэзö, мыйкö думайтiс, но шы эз сет. Сiя эз письты горöтчыны нем. А ёртыс пöрччалiс ни мешöк, лöсьöтчис кисьтны анькытшсö аслас котелокö.

— Талун менчим пуам, а ашын тэнчит, — баитiс сiя. — Тэ эн пов. Быдöс лоас шито-крыто. Тэ висьтав еныслö спасибо, что мекöт иньдiсö туяс. И эшö висьтав спасибо, что анькытш тшöктiсö кыскыны. Анькытш — эта öддьöн бур. Часöт ми пуам горошница, да сэтшöм бытшöмö — кывтö ньылыштан.

Мешöк вöлi сьöкыт, но вына Митюбаран сувтöтiс сiйö кокнита, кокнита пöрччалiс и гумыштiс котелокö дорресви чочком гырись анькытш. И сiя, конечно, пуис бы, кисьтiс бы мешöкас ва. Но Степанко чорыт шаггезöн локтiс ёртыс дынö, босьтiс сы киись котелоксö и бöр пöрöтiс анькытшсö мешöкö.

— Кöртав мешöктö, — шуис сiя. — Анькытш колö не миянлö, а солдаттэзлö.

— Да тэ мый! Кытшöм солдаттэзлö? — öшис Митюбаран.

— Нылö, кöдна вир кисьтöны. Нылö, кöдна часöт, может, мунöны атакаö, медбы нырыштны фашисттэзöс. Вежöртiн?

Митюбаран минута сьöрна буравитiс Степанкоöс учöтик лöг синоккезöн, шадра чужöмбаныс пыкнитiс биöн, тырппес дрöжитiсö. Сiя, тыдалö, абу и думайтöма сы йылiсь, что учöтик и виньöрик Степанко лоас паныт.

— Вот мый, дружок, — нюжвыла шуис вöлись Митюбаран. — Морт тэ эшö ылöстöм и кывзы, мый баитöны умнöйжыккес. Тэ эн ерепенитчы и эн нюжлав киэтö. Тэ думайтан...

— Ме нем ог думайт, — öмалiс сiйö Степанко. — Ме тöда öтiкö: сёйны этö анькытшсö миян абу некытшöм право. Сiя колö фронтлö, солдаттэзлö.

— Солдаттэзлö, солдаттэзлö! Да вежöрт тэ сiйö, зырымöсь бедь, что анькытшыслöн весыс оз чин. Быдöс лоас шито-крыто. Не первуись. Мöйму, баита тай, бура лöсялiс. Да и солдаттэзлö эта анькытшыс оз дöнзьы. Ми кыскам сiйö Кудымкарö, а сэтчин городскöй начальство юкалас öтамöд коласын — и быдöс. Тэ думайтан, солдаттэс тшыгöсь? Ого, нылöн няньыс тыр. Нiя и яй сёйöны, а сэтöн анькытш — тьфу! Тэ думайтан....

— Ме нем ог думайт! Ме тöда öтiкö: анькытш государственнöй, и ми сiйö огö вöрöтö. А если сёян кöть öтiк тусь, ме сразу висьтала.

— Висьталан?

— Конечно. Локтам Кудымкарö и юöрта кытчö колö. Солдаттэз кисьтöны вир, а ми тэкöт анькытш тшыкöтны пондам.

— Бöбöв, а кыдз тэ тшыгйöн-ту мунан? Эд няньыт тэнат абу ни? Тэ жö быдöс няньсö сетiн вонытлö. Неужели кувны мöдан? Думайт юрнат.

— Эта не тэнат ни печальыт.

— Ачыт тöдан.

Степанко думайтiс, что Митюбаран чередь сiйö кывзас, эшö кутчисяс тышкасьны, пожалуй, и зонка лöсьöтчис сетны отпор. «Дрынга кокнам дзез кынöмас — и готово», — решитiс сiя. Но Митюбаран, ныр увтас мыйкö бобгикö, кöрталiс мешöксö бöр, тышкасьны эз понды.

— Но ладно. Сiдз дак сiдз. Ладно, — шувлiс сiя бедуйтöмöн. — Эшö видзöтам, мый тэ пондан сьывны, кöр кынöмыт лякасяс спинаыт бердö. Видзöтам.

Степанко споритны эз понды. Сiя сэтöр куст бердiсь шырзис небытик листтэз, заваритiс чай. Сэсся кыскис кöзичасис няньторсö, кöдö колис Заготзерноыс дын, кыза солалiс и пондiс сёйны. Сiя сёйис и юис чöскыт кöра кипяток, а Митюбаран лöг синоккезöн видзöтiс сы вылö и сё шувлiс нюжвыла:

— Ладно, сiдз дак сiдз.

Сэсся тожö кыскис няньсö, мургыльтiс ыджыт кусöк и табанитiс öмас.

* * *

Ю дорын, туманын, буткöтiсö сьöвталöм вöввез, марскисö чöскыт турун. Кусттэз сайын нёштöмасис вöрбаран, шыасьлiс эшö кытшöмкö ойся каёк, а ва сайись вöрын зубыта дзуртiс кöс пу — гер-р, гер-р. Косаöт кывтiсö сьöкыт керрез, люкасисö öтамöдкöт — чольс, чольс... Му вылö лэдзчисис гожся ой. Гырись и югыт звездаэз мигайтiсö небоын, куслiсö и öзйылiсö бöр, кисьтiсö му вылö кöдзыт югöр.

Лоис ыркыткодь, и Степанко пырис öн увтö, водiс мешöккес вылö. Лунся жарсянь мешöккез шоналöмась, и öн увтын вöлi шоныт, дзик гор вылын. Зонка эз и казяв, кыдз онмöссис. А Митюбаран дыр эшö пукалiс костёр дынын, сёйис пöттöдз и тожö юис чай. Сэсся мавтiс телега оссез, кынымиськö дзарнитiс небоö и вöлись только водiс телега увтö. Детинаöс маитiс кытшöмкö öбида, юрвем кошшис мыйкö сэтшöмö, мыйöн позис бы накажитны Степанкоöс, мыччавны сылö, кин сэтшöм Митюбараныс, медбы эз вунöт кувтöдз. Сы юрö дыр эз пыр нем, а кöр пырис öтiк идея, сiя эшö öтпырись шуис: «Но ладно» — и тожö онмöссис.

Луннас Степанко ёна мыдзис и узис ойбыт öддьöн крепыта и чöскыта, нельки нем эз вöтась. Кöр саймис, Коса весьтын лэбалiсö ни уткаэз, ю сайын кривзiсö туриэз, а небоын, Лобан деревня ладорын, югьялiс шондi. Но не шондiсö казялiс медперво Степанко. Сiя казялiс, что Коса ю дорын зонкаыт öтнас. Дзарнитiс öтiклаö, дзарнитiс мöдiклаö — Митюбаран некытöн абу. Сы местаын, кытöн сулалiс Митюбаранлöн телегаыс, вöлi только нöитöм турун.

«Колис! Неужели колис?» — повзьыштiс зоночка и чепöссис вöлыс дынö.

Сiя öддьöн шупыта доддялiс Сырчикöс телегаö, петiс туй вылö. Митюбаран, тыдалö, мунöма только неважын, вон и колесо следдэс сё эшö тöдчöны, абу вевттисьöмась лысваöн. И Степанко решитiс, мый бы эз ло, а вöтны ёртсö. «Вöта, сёравно вöта», — шувлiс сiя аслыс. Да, мый бы эз вöв, а Митюбарансö колö вöтны. Степанко первуись вöрзис туйö, вöрзис мыдз вöлöн, и сылöн кылiс сьöлöмыс: öтнас чередь вермас локны Кудымкарöдз. А Митюбаранлöн вöлыс справнöй, сiя отсалiс бы Сырчиклö кайöтны телегасö, если пантасяс крут керöс.

Колö вöтны!

Сырчик ойнас бура шоччисьöма и öнi, кöр Степанко шовкнитiс плетьöн, перво дзеблiс пеллесö, сэсся содтiс оськöввез, мунiс кынымкö верста öддьöн бодрöя. Вот кольччис бöрö кытшöмкö неыджыт деревня, вот подвода жагöник кайис мыс вылö, син одзын оссис паськыт мир: öтмöдöрын тыдалiсö расоккез, ыббез, одзын конецтöг нюжалiс ыджыт туй. Степанко надейтчис казявны эта туй вылiсь öтка подвода, надейтчис казявны Митюбаранöс, но туй вöлi пустöй.

Натьтö, не вöтны сiйö.

Колис Степанкоöс Митюбаран. Вот неморт! А председатель Ошкоков шуис, что Митюбаран — морт надёжнöй, отсалас. Вот тэныт и надёжнöй. Эхма!

Мый öнi керны?

Сырчик, Сырчик! Эн сувт, оськав чожжыка, Сырчик!

Шондi, эн пож! Саясь кöть недырик кежö кымöр сайö!

Сулалiс Степанко керöс йылын, видзöтiс одзас, дзарьялiс бöрас. Коса ю ладорын лöз видзис тайга, Лобан деревня эз ни тыдав. Лобан вöлi ылын ни. Одзын ольсассисö ыббез, ыббез вылöт векнитик руд полосаöн чуклясис туй. Эшö совсем неважын, кык год бöрланьын, эта туй кузя ой и лун ветлiсö чож машинаэз. Нiя кыскисö станцияö сю, яй, ви, гортö вайисö быдкодь бур товар: плуггез да сортировкаэз, вартан машинаэз — öддьöн колана груз. Öнi машинаэз эзö ни гургö, öнi быдöс нiя вöлiсö фронт вылын. А нянь кыскыны сёравно колiс. Вот и мунöны ыджыт туй кузя обоззэз, öтка подводаэз. И Степанко тожö мунö. Тожö кыскö нянь. Кöть Митюбаран и шуис, что солдаттэзлö анькытш немымда оз ков, но верит эта баранлö. Баран дак баран и эм. Тьфу, ылöстöм. Колис Степанкоöс öтнасö. Вот, порсь!

Нет, эта баранкöт мыйкö колö керны. Сiйö колö ёна позоритны. Вот локтас Степанко гортас и юöртас быдöнлö, кин сiя сэтшöм Митюбараныс. Сiдз и висьталас быдöнлö: не морт сiя, а паразит, самöй настоящöй вор. И мыля сiйö армияö эз босьтö? Сэтчин, небось, велöтiсö бы, кыдз радейтны свободасö. А поди, правильно керисö, что эз босьтö. Эд армиялö колö воин, настоящöй солдат, а кытшöм солдат петас Митюбаранiсь? Мунасö, шуам, солдаттэз разведкаö тыртны сьöкыт заданнё, а Митюбаран чуйнитас кытчöкö бокö, коляс ёрттэсö öтнанысö. Вот и надейтчы сы вылö. Нет, конечно, правильно керисö, что баранöс эз босьтö война вылö. Сэтшöм морт вермас дзугны быдöс дело. Враггес туйö эшö асланымиссезöс вияс.

Кыным ылöжык мунiс Степанко, сыным жагöнжык оськалiс Сырчик. Лун пондöтчис бöра жарся-жар, небоын эз уяв öтiк кымöрок. Сэтчин дугдывтöг öгралiс шондi, немымда эз жалейт öдсö, койис и койис му вылö. Кажитчис, кытшöмкö нечистöй вын öзтöма небоас гигантскöй гор, жарöтöма сiйö кöс кыдзовöй песöн и öнi вöрöтö öгырсö кузь гормöччанöн. Горись петöны ыджыт бичиррез и киссьöны и киссьöны му вылö, Степанко юр вылö, сотöны вывтыр.

Эх, кöть бы зэрыштiс невна!

Сувтас, натьтö, Сырчик. Сiдз и тöд — сувтас.

Вот пантасьö бöра деревня. Деревня дынын бöра мыс — ыджыт и гöгрöса, дзик чöвпан. Вермас я кайны сы вылö Сырчик? Если оз кай — беда!

Эшö ылынкодь вöлi мысыс, а Сырчик горбыльтчис ни, öшöтiс юрсö.

— Но, но, Сырчик! Давай! — горöтiс Степанко и шовкнитiс плетьöн.

Дзуркнитiс дуга, зэлалiсö гужиэз. Телега колесоэз увтын пондiс няжöтны галька.

— Сырчик, давай, Сырчик!

Джын мыссö Сырчик кайис сувтчывтöг, сэсся нёштöма пиньöвтiс голясö, керис джын шаг и сувтiс. Сьöкыт телега кыскис вöвсö бöр, и Степанколö ковсис сюйыштны колесо увтö галя.

«Но вот и быдöс! Вот тэныт и Кудымкар!»

Степанко нырыштсис мешöккез вылö, öшöтiс юрсö. Мешöккезын анькытш. Митюбаран висьталiс, что сiя солдаттэзлö оз ков. Поди, былись оз ков? Нет, колö! Анькытш — этö сiя жö нянь. Анькытшись позьö керны уна берсясö. Сыись позьö керны пизь и пуны кисель. Анькытшись позьö пуны чöскыт шыд. Пукты котелокö невна картов, пукты учöтик яйтор да мымдакö анькытш, и лоас настоящöй шыд, кöдö оз откажитчы сёйны нельки пöт морт. Нет, анькытш колö солдаттэзлö.

Кыным грамм кыскö Степанко? Нёль мешöкын триста килограмм. Триста дынö содтыны куим ноль, лоас триста тысяча грамм. Медбы пуны öтiк мортлö шыд, тырмас двести грамм. Сiдзкö... сулав, сулав... сiдзкö, триста килограммись позяс пуны тысяча пятьсот порция. Тысяча пятьсот! Эта анькытшöн позяс вердны быдса полк!

— Сырчик, Сырчик, давай! Дзуркнитiс дуга, зэлалiсö гужиэз.

— Сырчик!

Тысяча пятьсот солдат лоасö пöтöсь, если Степанко ваяс анькытшсö Кудымкарö. Тысяча пятьсот!

Дата добавления: 2015-11-16