ГОРЗЫНЫ ОЗ КОВ

Луншöр кадö, кöр шондi öшалiс самöй юр весьтын, Степанко кежис канава сайö, лог дорö, и юскис Сырчикöс. Вöв пыдына поиктiс, быдöс сылöн вывтырыс вöлi куш ньылöм. Степанко малыштiс вöвлiсь боксö долоньнас, и киыс дзик лякасис гöнас, сибдiс сэтчö. Бытьтö не ньылöм вевттьöма вöвсö, а самöй настоящöй клей.

Вöв весьтын утугаöн лэбалiсö лöдззез да гуттэз, но Сырчик сулалiс вöрöтчытöг: эз öвтчы бöжнас, эз öвт юрöн. Одзжык, кöр вöлi эшö боёк и вына, Сырчик эз вермы терпитны не лöдзöс, не номöс. Сiя дугдывтöг швычкöтлiс боккесö кузь бöжнас, вашöтлiс гнуссö юрнас, нельки кучикнас повзьöтлiс: курччöвтас лöдз, дак сэк жö быдöс вывтырыс дрöгнитас, кöрчитчыштас, каждöй мускул вöрзьыштас. А часöт лöдззес лякасьлiсö сы бердö повтöг. Вöв эз повзьöтлы нiйö.

— Беднöй, беднöй, — нюжвыла баитiс Степанко и зыртiс вöвлiсь боккесö турунöн. — Сьöкыт тэныт. Да, сьöкыт. Но тэ эн тöждiсь. Тэ, Сырчик, сёй. Кöр пондан сёйны, сэк быдöс бур лоас.

Но Сырчик эз сёй. Сiя сулалiс коккесö паськöтöмöн, юрсö öшöтöмöн и сё поиктiс и поиктiс.

Ямщикыс и ачыс ёна поиктiс. И сiя öдва сулалiс кок йылын. Охота вöлi брякнитчыны кыминь и быдöс вунöтлыны кöть джын час кежö, нем не думайтны. Кöр вунöтчан и нем он думайт, сэк етшажык сималö кынöм, сэк почти некöр оз вись юр и озжык пессьы сьöлöм.

Кöр вунöтчан, сэк нем оз маит.

А вунöтчыны часöт эз туй. Эз туй водны телега увтö и куньны синнэз. Колiс мыйкö керны. Колiс вöрöтчыны.

Степанко пöрччалiс седёлка, чапкис вöв голяись сийöс. Сийöс гыныс вöлi вамöм шучкöп, вöлi чорыт, и зонка думайтiс, что этадз недыр и изводавны вöвлiсь пельпоннэсö. Чорыт сийöс гын казявтöг зыртас кучик, и сэк он ни мун. Сэк беда.

— Сырчик, Сырчик, — баитiс зонка. — Сырчик, тэ сёй! Вöв эз сёй.

Сэк Степанко кыскис мешöккез увтiсь солöн кöзичкасö, пöрччалiс сiйö и кисьтiс долоняс кынымкö чепöль.

«А мый, если солыс оз отсав?»

Берегитчöмöн, медбы не уськöтны öтiк совчир, Степанко вайöтiс долоньсö вöвлö öм одзас. Сырчик вöрзьöтыштiс нырпыссэсö, вöрöтыштiс öшöтчöм небытик тырпöн. И сэк зонка вевттис долоньнас вöвлiсь öмсö, зыртiс совнас сылiсь тырппесö. Вöв пондiс нювсьыны. Сiя перво нюлiс быдöс öм дорсö, сэсся нюлiс чорыт кывнас Степанколiсь долоньсö и гогинялыштiс юрöн, дзик висьталiс спасибо.

— Но вот и бур, но вот и бур, Сырчик, — шуис сылö Степанко. — Часöт ме нуöта тэнö логас, и пондан сёйны. Логас туруныс небытик, чöскыт. Логас и шорок визывтö. Мый эшö колö?

Лог пыдöсöт былись визывтiс учöтик шорок. И туруныс сэтöн вöлi кузь да небытик. Но Степанко тöдiс, что сiя абу пöтöса. И зонка решитiс нетшкыны ыб вылiсь клевер. Клевер — эта öддьöн бур турун. Эшö Степанколöн айыс баитлiс, что клевер нельки буржык зöрся. Таво тöвнас, кöр зонка уджалiс вöрын, сiя ачыс пондiс тöдны, мый сэтшöм клеверыс. Вöввезлö öтiк грамм зöр эз сетлö, а нiя некöр эз сувтлö, некöр эз муглö. А мыля? Да только сiйöн, мыля прокод вердiсö нiйö бур клеверöн. И тулыснас, сев коста, пöжöм клеверöн вердiсö. Вот и уджалiсö вöввес. А то бы сувтiсö сразу. И öтiк гектар бы эз кöдзö.

Да, клевер — этö öддьöн бур турун. Клеверын уна белок.

Кöр абу нянь, дак и морт клеверсö сёяс. Косьтас турунсö горын, сэсся масьтас гырын — вот тэныт и пизь. Сiдз и керлiсö тавося тшыг тулысö Лобанiсь мукöддэс. Нiя, кöдналöн настоящöй пизьыс эз вöв.

Клевернöй ыб вöлi ордчöн, и зоночка некой пору летiс неыджыт ноша, вайис логас и чапкис Сырчиклö одзас. Вöв гöрöктiс небурика, дзик бöра висьталiс Степанколö спасибо.

— Тэ сёй. Етша лоас, дак ме эшö нетшка. Только бы некин эз адззыв. Сэк быдöс бур лоас, — баитiс аслас друглö том мужичок и радуйтчöмöн видзöтiс, кыдз вöлыс пондiс мурскыны чöскыт да пöтöса турунсö.

Öтiк дело вöлi керöма. И эта öддьöн бур, что вöв пондiс сёйны. Шоччисьыштiс невна, öктiс садьсö и пондiс сёйны. А мый керны, кöр тэнат аслат орöтö-сималö кынöм и абу нельки öтiк крöшки нянь? Медбöрья учöтик няньтор Степанко сёйис тöн. Талун асывсянь сы öмын эз вöв öтiк чир. И, конечно, кынöмын важын орсiс «музыка». Сэтчин дугдывтöг мыйкö гурöтiс, мыйкö дрöжитiс. Кажитчö, кытшöмкö лёк существо нюжöтöма кишкаэсö, косьтöма нiйö и керöма струнаэз. И öнi, кöр сiя, эта лёк существоыс, павкöтлiс энö струнаэсö, кынöмын кылiсö жеркöтчана нёштöм шыэз — дбрунь, дбрунь, дбрунь...

И юрын орсiс «музыка». Каждöй нерв вöлi тожö кыдз струна, каждöй вем торок пиксiс — и вöлi öддьöн зубыт и недолыт.

Сёйны бы, кöть невночка сёйны... Но мый? Вöвлöн кöть турун эм, а мортлöн некытшöм сёян абу.

Кöр Степанко сетiс воныслö буханкасö, то думайтiс, что керö öддьöн бур дело. Сiя думайтiс, что Санко да Симка висьталасö сылö ыджыт спасибо и кувтöдз оз вунöтö ассиныс юрвердiсьöс. И мамыс тожö оз вунöт этö буханкасö кувтöдз. А Санко да Симка, натьтö, сёйисö няньсö пöттöдз, сэк жö водiсö узьны и важын вунöтiсö ыджытжык воннысö. Нылö мый — нiя пöтöсь. Нiя сёйисö нянь, юисö йöв и водiсö узьны...

Лöгасис Степанко воныс да сойыс вылö, лöгасис аслас олан вылö, и ачыс эз казяв, кыдз кытшöмкö ыджыт öбида пондiс пöдтыны ловсö, пондiс нетшкыны мороссö. И ачыс эз казяв, кыдз пондiсö петны синваэз. Гырисьöсь, курытöсь и солаöсь.

А мирыс, быдöс öтöрыс вöлi сэтшöм паськыт, югыт да гажа. Шондi орöттöг пöжис и кисьтiс быдса кольтаэзöн дзирыт югöррез, нельки дöраовöй йöрнöс пыр сотiс яй кучик, палитiс чужöм.

И вöлi лöнь. Лог дорись расокын эзö сьылö кайез, турунын эзö чирскö кöбывкаэз. И кажитчис, бытьтö быдöс паськыт мирас, быдсöн планета вылын, этшöм жö лöнь: некытöн оз потласьö снаряддэз, оз сярзьö пулемёттэз, солдаттэз оз мунö атакаö и озö чирзö ура.

Лог дорын и туй вылын вöлi лöнь.

И только Степанко юрын орсiс кытшöмкö нёштöм музыка, дзик похороннöй марш, кöдасянь учöтик тороккез вылö потласис сьöлöм. Ох-хо-хо!

А Сырчик, сувтöм и мыдз Сырчик, сёйис турун. Сiя перво сёйис шытöг, сэсся пондiс фырскайтны, а чожа мыйись и бöжнас öдззис швычкöтны боккесö. Эта бур. Ась сёйö. Ась вашöтлö дынсис лöдззесö. Эта öддьöн бур.

Степанко лапкöтыштiс вöвлiсь коскаа боксö, сэсся босьтiс котёлок и лэдзчис логас. Мый бы эз вöв, а колiс гумыштны ва, колiс öзтыны биок и пизьöтны васö. «Вот öкта унажык небытик клевер юррез, тэча котелокам и пуа. А мый? Клевер — пöтöса турун. Солала и сёя», — думайтiс сiя.

Шорок вöлi учöтик, кык шаг пасьта, но ваыс визывтiс сöстöм. Тыдалö, кытöнкö неылын вöлi ключ. Шор дорсис, турунсис, Степанко казялiс неетша морт следдэз. Кыдз и сiя, Степанкоыс, вовлöмась татчö подöн ветлöтiссез, вовлöмась сы кодь жö ямщиккез, юöмась кöдзыт ва, шоччисьöмась.

И эшö зоночка казялiс турунсис öддьöн тöдса ёся йыла листоккез. Сiя сiдз и дрöгнитiс. Пикан! Да эта жö как раз сiя, мый колö тшыг мортлö. Пикан, конечно, турун, но сыын пö эм кытшöмкö витамин, и быд коми морт нельки сэк, кöр пызан вылын эм шогдiовöй небытик нянь, сёйö этö пикансö, сёйö да эшö ошкö. Степанко аслас вонкöт да сойкöт таво, натьтö, быдса тонна ни сёйис этö пикансö и ладно. Конечно, сiя турун и, кöр сёян сiйö, дак ыждö кынöм, но сё жö...

Ва эм, котёлок эм, туй дорын валяйтчöны потшпоннэз — этö пес. Лог дорын быдмö пикан. Мый эшö колö? Степанколö лоис нельки не ас сьöртi, мыля лöгасьлiс воныс да сойыс вылö. «Тьфу, — сьöласис сiя, — тожö эд морт! Учöтик челядь вылö лöгаси. Да нiя öдва ни ляшмасьöны, сэтчöдз тшыгьялiсö. Симка и керку порог ни вуджны оз вермы, а ме жö мужик...»

Мужик! Конечно мужик!

Зонка уськöтчис пикан вылö, öдззис летны. Öтiк, кык, куим... Быдса кырым летiс витамина турунсö, тэчис котелокö, сэсся бöра летiс тыр кырым.

— Пуа, сёя пöттöдз да эшö назапас лета, — шуис аслыс зонка. — А горзыны оз ков. Ме — мужик.

И сiя чышкис чужöмсö чорыт йöрнöс соснас.

МОРТ, КÖДА ЗАВИДУЙТÖ СТЕПАНКОЛÖ

Эшö сэк, кöр Степанко лэдзчис шор дорас, сiя казялiс ыджыт туй вылiсь мортöс. Оськалiс мортыс Юм ладорсянь, и сразу позис вежöртны: сiя не ни том да боёк, сiдз кыдз вöрис почти öтiк местаын. Зонка ештiс öктыны пикансö быдса котёлок, ештiс бöрйыны сiйö, керны костёрок, öзтыны би, а мортыс сё жöдзис сiя мысок вылын, кытöн мыччисис.

Да, не боёк вöлi старичокыс.

Степанко перво думайтiс, что этö локтö колхозiсь сторож. Думайтыштiс сiдз и ёна повзис. Мый бы эз вöв, а летны ыб вылiсь клевер, конечно, оз лöсяв. Татiсь колхозниккез кöдзисö сiйö, быдтiсö, и только нылöн эм право керны клевернас быдöс, мый лоас охота. Нiя кöдзисö, нiя и хозяиннэз. Степанко эз кöдз этö клеверсö, сiдзкö, и нетшкыны сiйö сылöн эз вöв некытшöм право.

Но сiдз сiя думайтiс только перво. А кöр казялiс, что мортыс öдва вешшö сылань, дугдiс повны и думайтны пондiс совсем мöднёж. Эка беда — клевер. Гожумыс вöлись пондöтчö, быдмас эшö мортлö моросви. Да и мыйлö сiя летiс клеверсö? Аслыс? Не. Сiя летiс клеверсö колхознöй вöвлö, кöда кыскö казённöй анькытш. Эта анькытш ёна колö фронтлö, солдаттэзлö, а Сырчик сувтiс. И только клевер сылö вермас отсавны — сэсся нем.

Сiдз пондiс думайтны Степанко и повны совсем дугдiс. Война эм война. Сiя оз юась, колiс öнi летны клеверсö или эз.

Да, война эм война.

Кöбы не эта ёрдöм война, дак Степанко öнi котрасис бы школаö. Сiя часöт кончайтiс бы öкмысöт класс. И некин бы, нельки ачыс председатель, эз вермы сiйö иньдыны туйö.

Кöбы не война, Степанколöн некöр бы эз симав кынöм.

А часöт сималiс. Кытшöмкö лёк куль нетшкис кишкаэз, мыйсянь гурöтiс кынöмын, кольмöтiс юр, вевттис синнэз лöз везöн. Зонка орöттöг видзöтiс аслас сьöд котёлок вылö и ньылалiс дульсö.

Котелокын перво шваркйис-пизис ва, сэсся пондiс пышиктыны. Пикан, тыдалö, «ловзис». Öнi колö видзны котелоксö неыджыт öгыр вылын, пöжны турунсö дас минута мымда, и сёян лоас готов.

Степанко вешталiс лишньöй потшпоннэсö бокö, пуктiс котелокö сов и дзарнитiс мысыслань, кытöн жöдзис мортыс. Туй вöлi пустöй. Морт лэдзчöм ни лягаö и, колö думайтны, часöт локтас костёр дынö.

Но чулалiс дас минута мымда, а Степанко сё пукалiс öтнас. «Кежис, видно, бокö, — решитiс зонка. — А жаль. Кыкöн гажажык, бы вöлi. Поди, и няньтор сылöн адззисис бы...»

Зонка бöра ньылыштiс дульсö и бедьöн судзöтiс бисис котелоксö. И только эта кадö тöдтöм морт петiс нiя лапытик кöзоккез сайсянь, кöдна быдмисö туй дорас. Петiс, сибöтчис Степанко дынö, шуис дрöжитан голосöн:

— Здорово тэныт, мужичок.

— Здорово, деда. Пуксьы, шоччись.

Конечно, Степанко вöлi не учöтик ни кага. Сiя неетша ни ештiс адззывны чочком светас. Адззывлiс быдкодь старухаэзöс и стариккезöс. Пöрись отирыс Лобанын тожö неетша. Но этшöм пöрись старикöс сiя панталiс первуись. Кöть дедлöн тошокыс вöлi баля бöж ыжда, летъялiс только тшöка увтас, зато синнэс сылöн эз и тыдалö, чужöмыс вöлi сьöд, кыдз шондi увтын жаритчöм му. Сылiсь чужöмсö сiдз и этадз сывьялöмась чукыррез — ыджытöсь и учöтöсь, пыдынöсь и лажмытöсь. Öм дынас нiя вöлiсö, кыдз бороздаэз, а синнэс дынын поснитикöсь-поснитикöсь и ёна вачкисисö чераньвез вылö.

Кöр старичок босьтiс юр вывсис колпаксö, медбы чышкыны пымалöм кымöссö, Степанко казялiс, что сы юр вылын абу öтiк тылöпок. Юрыс стариклöн вöлi волькыт, дзик галя, и вачкисис тожö калитöм сьöд му вылö.

Да, пöрись ни старикыс. Сто годся етшажык сылö сетны некыдз эз позь.

— Мый, шыд пуин? — юалiс сiя.

— Кытшöм шыд. Сiдз, пиканок öктi.

Старик нюлiс вартчöм тырппесö, мыйлöкö куньлiс вöйöм синнэсö, вöлись гогинялыштiс юрнас:

— М-мда... Пистик да пикан — миян сёян... Ылö иньдöтчин?

— Городö. Туйö иньдiсö.

— Сiдз, мужичок.

Старик эшö чышкис кымöссö, рожабаннэсö, гыжтöтiс спина сайись котомка и жагöник пуксис туй дорас. Степанко пешлiс пикансö, содтiс сов.

— Поди, кынöмыт сималö? — юалiс старикыслiсь. — Сималö, дак сёй. Долытжык лоас.

Зонка мылякö думайтiс, что раз сылöн сималö кынöм, то и мöдiклöн обязательно тожö сималö. Мöднёж, кажитчö, и лоны оз вермы. И эшö сiя думайтiс, что эта кöсыник, бырöм йöрнöс-вешьяна старикыс ветлöтö чочком светöттяс кортöн. Но старик вöлöм пöт, Сiя шуис негорöн:

— Сёй öтнат. Ме закуситi посадас. Олö сэтчин менам öтiк дружок, Першин Ванька. Гöститöтiс, слава богу, капустаöн вердiс, пöжалöм картовкаöн. А уна я меным колö? Нямлалыштi невна — и пöт. Вот сiдз.

Старик бöра куньлiс синнэсö, нюлiс тырппесö. Сэсся нюжöтiс мыдз коккесö, пуксис бытшöмжыка. Сiя, тыдалö, эз тэрмась некытчö, лöсьöтчис пукавны вель дыр.

— Да, пöт ме, мужичок. Горшви ни пöтi быдторнас. Восемьдесят год му вылас ола, адззылi сякöйсö. А вот сё колö овны. Некыдз еныс ас кипод увтö оз босьт. Вунöтöма менö. А тэ том, зонка. Тэ эшö том и нем эн адззыв. И давай сёй.

И Степанко сёйис. Сiя сёйис и гусьöник дзарьялiс старичоклань. Пöрись ни мортыс, öддьöн пöрись. Быд берсясö адззылöм — и бурсö, и умöльсö. И вот корö енлiсь смерть. Сэтöн и ылöстöм морт висьталас: бур олансянь смертьсö некин оз кор.

Пикан, конечно, вöлi не ма, но Степанко сёйис. А старик баитiс нюжвыла, бедуйтöмöн, дзик норасис кинлöкö:

— Восемьдесят год ни ола. Сякöйсö адззылi. А сэтшöмсö эг на адззыв. Да. Эг, мыся, адззыв. Эз вöвлы сэтшöмыс некöр, медбы меись народ полiс. А öнi полöны, кыдз смертись. Пиля монь тöн рытнас сiдз и шуис: «Казяла тэнö, дедушка, и сьöлöмö сразу пот мунö». А Пож Öльöшлöн моньыс, Дунькаыс, сiдз и горöтчис кöдковну: «Лучше бы лешаккöт пантаси, чем тэкöт». Вот эд, зонка, мый. Вот кытчöдз локтi.

— Мыля жö эта, дед, сiдз шогмис? — юалiс Степанко.

— А то тай эта увья, — мыччалiс старик аслас котомка вылö. — Сы увья быдöс. Кышалiс этö котомкасö председательным. Тэ, шуö, пöрись морт, гöрны он ни вермы, а почтаöдз котрасьны эшö верман. А ме, шуö, няньöн понда вердны тэнö. Ме, конечно, перво киöн и кокöн пыксьыны пондi. Ог, мыся, кутчись, кöть юр орöт. Ме, мыся, лучше гöрны понда. Дак кытчö тэ! Сёравно приказ сетiс: пондан почта кыскавны — и точка. Война эм война. Быдöнлö уджавны колö. Тэ, шуö, дед, мортыс опытнöй, быдöс вежöртан, кыдз и мый. Делоыс, шуö, эта деликатнöй, не быдöнлöн петас. И эшö Москваö гижны кöсйисис.

— Москваö? Мыйлö жö?

— Тэ, шуö, öнi солдат, тыртан боевöй заданнё. Если тыртан сiйö бытшöмика, то Москваö гижа, медбы тэныт медаль сетiсö.

Степанко эз вежöрт нем, но юасьны эз понды. Сiя сёйис пикан. Пикан вöлi небытик, ёна пöжшöм. Сылöн нельки лоöма кытшöмкö бытшöм кöр: невна кылiс шомок, невна курыттор. Кинкö шуöма тай; пиканын пö эм витамин. Кин тöдö, поди, былись эм.

Старик эта коста босьтiс котомкасö киö, треситыштiс сiйö и пöрччалiс.

— Тэ грамотнöй, мужичок, а? — юалiс Степанколiсь.

— Квать класс кончитi. А мый?

— Сiдз. Охота тöдны, мый ме талун кыска. Почтаас юалi, дак эз висьталö нем. А ачым ме öтiк буква ог тöд. Да и синнэзö дук оз адззö. А сьöлöмö кылö — казённöй бумагаэз эмöсь.

Сiя кыскис кöзичаись быдса пачка письмоэз, нюжöтiс Степанколö:

— Лыддьöт адрессэсö.

Пачкаын унажыксö вöлiсö треугольниккез. Быд треугольник вылын сулалiс тожö треугольнöй штамп — воинскöй знак. И кажитчис, что быд письмосянь нырö вартiс сотчöм порох дук. Эна письмоэз вöлiсö фронт вывсянь.

Вöлiсö сэтöн и нёль пельöса конверттэз. Öтiк сэтшöм письмо локтöма татчö Москваись, мöдiк — Губахаись, куимöт — кытшöмкö Бершетись. А вот эшö öтiк нёль пельöса письмо. Кытiсь сiя локтiс — сьöкыт вежöртны: адресыс увтын сулалö только ыджыт цифра, военнöй частьлöн номер, сэсся нем абу.

— Кинлö сiя, мужичок?

— Евдокия Тимофеевна Першиналö, — лыддьöтiс Степанко.

— Сiдз ме и тöдi, — шуис старикыс и кунис синнэсö.

Минута мымда сiя пукалiс чöлöмöн, вöрзьöтчытöг, кыдз палитöм сьöд мыр. Сэсся осьтiс вöйöм синнэз, босьтiс юр вывсис колпак, паськыта пернапасасис.

— Царство тэныт небеснöй, Саватеюшко...

— Тэ мый, деда, кинöс дзебан?

— Похоронка эта. И локтöма сiя как раз Пиля моньыслö. Не весь меись полiс, кыдз смертись... Ох, ох!

Степанко уськöтiс письмосö кисис. Мыйкö нёштöм да умöль муныштiс спина коскаöт, жвангис юр пыдöсö, сöтiс ки кузя. И Степанко уськöтiс письмосö. Конечно, сiя вöлi не учöтик кага и похоронкаэз йылiсь кылö не первуись. И Лобанö этшöм конверттэс локтiсö неетша ни, чуть да бöра то öтiк, то мöдiк керкуын кылö иннезлöн да поснит челядьлöн герьялöм. Но талун мылякö öддьöн зубыта эта похоронкаыс вачкис сьöлöм кузя. Эз тöд сiя Пилялiсь моньсö, а жаль лоис.

И вежöртiс Степанко старичоксö. Конечно, не кокнит ноша кышалöма сы пöрись виньöрик пельпоннэз вылö председатель. Не каждöй морт вермас сетавны этшöм письмоэсö соседдэслö. Мужество колö. И лоас заслуга сьöртi, если пöрись почтарьлö талун жö сетасö медаль.

Медбы не пукавны осьта öмöн и не видзöтны, кыдз ыджыт шог нырыштö стариксö, Степанко босьтiс котёлок и лэдзчис бöра шор дорö. Эстöн сiя юис кöдзыт ва, пöттöдз юкталiс Сырчикöс. Вöв юис ыджыт гульккезöн, шоччисьлöмöн. Сылöн паккес син одзын лэбисö, пöльтчисö. Вöв гажöнжык ни гогинялiс юрöн, öвтiс бöжнас и, кöр вирьюись лöдз зубыта курччöвтлiс сылiсь одзись коксö, Сырчик вылына лэбтывлiс сiйö и вынöн буткывлiс му кузя. Сырчик лöгалiс обидчик вылö и энергичнöя мыччалiс ассис лöгсö. Эта гленитчис Степанколö. Раз Сырчик пондiс буткöтны кокöн, сiдзкö, сiя эшö не нач сувтiс, сiдзкö, öнi шоччисьыштiс, сёйис бур турун и сразу жö содiс прокыс.

«Верда сiйö эстöн рытöдз и вöлись доддяла, — решитiс Степанко. — Рытнас, кöр лоас ыркыт, ми некой пору мунам дас-мöд верста. Пожалуй, Юрлаöдз локтам».

Кöр Степанко бертiс телега дынö, почтальон чеччис местасис, кышалiс пельпон сайö ассис сьöкыт котомкасö и горöтчис зонкалö:

— Счастливöй тэ, детина, öддьöн счастливöй. Некöр некинлö эг завидуйт, а тэныт завидуйта.

— Меным?! Да тэ мый, деда?

— Счастливöй тэ, зонка. Тэ том. Тэнат быдöс эшö одзланьын. Тэ адззылан бур олан. Вот чулалас эта войнаыс, и тэ прокод пондан сьывны песняэз. А ме ог ни адззыв. Да.

— Ме талун горзi, деда...

— Но этö весь. Кöр кынöм сималö, сэк эшö позьö овны. Не кынöмын делоыс. Ме вот неделянас öтчидöн* сёйла и то ола. Ог вермы ме сёйнытö...

Сiя ыш ловзисис и вöрзис. Мунiс кузь бедь вылö нырыштсьöмöн, нöбöтiс деревняö, Пиля моньлö, вöвлытöм горе. Степанко гажтöма видзöтiс сылö бöрас и чувствуйтiс, кыдз горшас кайис бöра чорыт комок.

Но вот старик крута бергöтчис бöр, мыйкö думайтыштiс öшöтöм юрöн и шуис:

— Умнöй тэ, адзза, детинаыс, мывкыда. Поди, отсалан меным, а? А ме бы тэныт няньтор сетi, кольттез. Ме бы тэнö бура вердi.

— Отсавны?

— Отсав, мужичок.

— Да мыйöн жö ме тэныт отсала? Адззан, ачым бедаö шедi...

— Нöбöт этö письмосö инькаыслö. Сет сылö. Сет и сразу котöрт бöр. А ме ог вермы, дона морт. Кыдз ме сылö этö письмосö вая? Эд сылöн челядьыс вита. И быдöнныс учö-ö-öтикö-öсь...

Степанко перво нем эз письты горöтчыны, нельки öмсö эз вермы осьтны. А кöр невна садясис, решительнöя откажитчис:

— Ог вермы ме этö, деда. Ме, деда, няньтöг овны верма дас сутки, а керны сiйö, мый тшöктан, ог вермы.

— Сiдз, мужичок, — ыш ловзисис старик и öшöтiс юрсö. Степан казялiс, кыдз сы вöйöм синнэзiсь петiсö синваэз.

Дата добавления: 2015-11-16