Кыкöн мунны гажажык

Кытöнкö неылын, веськытланьын, кольччисö деревняэз, хуторрез. Нiя эзö тыдалö, но чуть да бöра пеллез кылiсö поннэзлiсь вувтöм, мукöдпырся пемытiнас дзуз видзис биок. Ны сьöртi и позис вежöртны, что неылын олiс отир.

Ойшöр кадö деревняэзын китсасисö петуххез, дас минута мымда тонньöтiсö-сьылiсö, öтамöдкöт вермасьöмöн косялiсö вижлоккезнысö. Туйдорся вöрын ветлiс говк, чанöтiс пеллез.

Степанко лыддис верстаэз. Öтiк, кык, куим... Быд верстовöй столб вылiсь зонка видзöтiс цифраэз, горöн горöтлiс Васей Петровичлö — сiдз шуисö шогалiсь стариксö, — кыным верста эшö кольччис Юрлаöдз. Кöть жагöник, но верстаэз чинiсö.

Верстовöй столббез коласын сулалiсö эшö учöтик столбоккез, и ны вылын тожö тöдчисö цифраэз: девять, восемь, семь... Кыдз чулалас öтiк сэтшöм столбок, значит, сто метр кольччис бöрö.

Часто пантасьлiсö мысоккез, керöссэз, логгез. Быд мысок вылö Сырчик кайлiс горбыльтчöмöн, паддялöмöн, телега öдва-öдва вешшис одзлань, кажитчö, дзуртiс öтiк местаын. Зато керöсоккез увтö сiя лэдзчис дюттясьöмöн, кокнита. Вöв сэк паськытжыка оськалiс, сийöс эз нырышт сылiсь пельпоннэз. Мöднёж, сийöс старайтчис мунны вöв голяись, телега сiйö тойыштiс одзлань. Сэтшöм местаэзын Васей Петрович пуксьывлiс телегаö шоччисьны.

Сiя вöлi пöрись ни морт, сiя ёна шогалiс и öнi мунiс Юрлаö кытшöмкö тöдса доктор дынö, кöда локтöма миян крайö блокаднöй Ленинградiсь эшö 1942 годö и вöлöма, старикыс кыввез сьöртi, золотöй киэза и öддьöн сöстöм юра мужик.

— Кöдковну ветлi сы дынö, дак öддьöн бура быдöс видзöтiс, быд жила менчим пешлiс и кöсйисис сувтöтны кок йылö, — висьтасис старик. — Тэ, шуö, эшö дыр чатрасян, эшö адззылан, кыдз Гитлерсö муö сюйыштасö. Главнöйыс — лёгкоэт, шуö, здоровöсь. Мый эшö колö? Сiя тшöктiс меным унажык сёйны кисель. Крахмалын пö эм мыйкö öддьöн бур, кöда отсалö шогалiсь мортлö, кыдз сахар. И эшö ма тшöктiс сёйны. Но маыс, вежöртана, öнi некинлöн абу. И сiйö ме дыр некытiсь эг вермы адззыны...

— И адззин сё жö? — юалiс Степанко.

— Адззи, детина. Батюшко-вöр отсалiс меным. Колö тэныт, Степанко, тöдны, что вöрын быдторыс эм. И яй, и мöдiк быдкодь сёян, и нельки ма. Самöй настоящöй ма.

— Настоящöй ма?

— А кыдз тэ думайтiн? Конечно, настоящöй. Мунi удерлун Таволжанскöй дзибö сира воздухöн невна лолалыштны, лекарственнöй туруноккез да мый да кошшыны и вдруг адзза: мошшез сiдз и койöны-лэбалöны, сiдз и чылöны, бытьтö пуляэз. Но, думайта, не мачурка ли кытöнкö? Пондi ме вöджжыны, пондi видзöтны, кöдöрö нiя унажыксö лэбзьöны. И мый тэ думайтан — казялi эд! Вот öтiк мош лэбалiс-лэбалiс öтiк цвет вывсянь мöдiк вылö, öктiс масö и давай лэбзьыны. Ме бöрсяняс. Сыбöрын казялi: мöдiк мош сэтчин жö лэбзьö, куимöт — мыччалöны меным туйсö. Сiдз ме и локтi гырка пу дынöдз.

Дикöй мошшез, конечно, хитрöйöсь, керöны познысö öддьöн вылö, медбы ош эз вермы кайны да мырддьыны масö. Но ме эд тожö хитрöй. Ме кералi увья кöзоккез, лиснич лöсьöтi. Сэсся кули симöт да öзтi сiйö. Мошшез немись сiдз оз полö, кыдз тшынiсь. И вот кайи лиснич кузя. Вежöртана, неетша меным дöнзис. Мошшес, морпияннэз, сiдз и пöжöны менö, сiдз и пышналöны, но сёравно кайи, повзьöтi нiйö тшыннас. И мый тэ думайтан: быдса туисок масö öктi пугырксис. Позис бы унажык босьтны, но ме не досповна розоритi мапозсö. Ась мошшес эшö öктöны, ветла сёрöнжык маысла... И вот нöбöта öнi Юрлаö масö. Доктор кöсйисис лекарство керны, медбы моросöс веськöтны...

Васей Петрович юöртiс этö Степанколö радуйтчöмöн, шыннялiс. Радуйтчис и Степанко. Бура лöсялöма пöрись мортлö, адззöма как раз сiйö, мый кошшöма. Этö бур, кöр тэ адззан, мый кошшан. Вот локтасö асывнас Юрлаö, умнöй доктор керас маись лекарство, шогалiсь Васей юас сiйö и сразу веськалас, дугдас кашляйтны. Этö, конечно, бур. Кöр пöрись морт шогалö, эта абу ни дело. Сэтöн недыр и кувны.

Телега ёркöтiс чорыт туй кузя, лэдзчис мысок увтö. Сырчик вылына лэбталiс мыдз коккесö, сьöкыта буткöтiс нiйöн и öвтiс бöжöн. Кöр телега ачыс тарöвтчис и сийöс эз нырышт пельпоннэсö, Сырчик сэк пыр öвтлiс бöжöн.

Старик пукалiс мешöккез вылын, öт кинас нырыштсис телега радз бердö, медбы етшажык зэгйис, мöднас видзис мороссö. Степанколö охота лоис тöдны, кытшöм шогöт кусiньтö мортсö и мыйсянь сiя пондöтчис.

— Важын ни мороснат маитчан?

— Джын год ни, детина. Эшö арнас, кушмуподöн, кöстiс менö, да сiдз круто — öдва гортö локтi. Вöлi ме, зонка, трудовöй армияын, Кама дорö военнöй завод строитiмö. Но и вот гарйим öтiк строеннё увтö пыдын котлован. Конечно, кöртзыррезöн гарйим, тачкаэзöн мусö новйим. Кöдздöтны ни пондiс, а ой и лун зэрис, котлованас тыр укнитiс ва. Уджалiм мукöдпырся косви ваас. Заданнё вöлi срочнöй, баитлiсö: Москваись пö ыджыт начальство следитö, чожжык тшöктö заводсö строитны. Ми, конечно, и асьным вежöртiм: колö чожжык строитны. Фронтлö колöны снаряддэз, боеприпассэз колöны. Этö ми вежöртiм. И уджалiм бура... И вот öтпыр, мый и лоис, дикмыны пондiс юрö, коккез дзик ватаись керöмась, оз видзö менö. Ме и нильдi да веськыта и берездаси котлованас. Пöдны, конечно, эг пöд — чожа кыскисö, а ёна кынмассьöма, зэлöтiс шогöтыс. Но вот и комиссуйтiсö менö, лэдзисö гортö. А гортын мый? Кин отсöтсö сетас? Ох-хо... Спасибо добрöй докторлö, отсалiс невночка. Öнi, поди, эшö отсалас. Кин тöдö? Вот локны бы только Юрлаас.

— Локтам жö, поди, — шуис Степанко. — Асывнас локтам, поди.

— Колö бы локны. Юрлаас эм менам öтiк тöдса, крестник, позьö шуны. Пыралам сы дынö. Кывсьö, бура пö олö, пекарняын уджалö. Сiдзкö, нянь дынын...

Нянь дынын! Лучше бы эз касьты няньсö! Степанколöн казявтöг бöра пондiс симавны кынöм, кытшöмкö гаг вöрзис сьöлöм увтсис и давай виклясьны кынöмöт.

Эхма!

И Сырчик эз ни öвт бöжнас, сё жагöнжык буткöтiс коккезöн. Телега сьöкыта кайис мысок вылö. Шогалiсь морт чеччис, бедь вылö нырыштсьöмöн, пондiс оськавны ордчöн телегакöт. Лолалiс сiя сьöкыта, пыдына — уф, уф... Дзик кузнечнöй мех ушкис. И сэтöн, кыдз нарошно, старикöс пондiс пöдтыны кашель.

Пантасис верстовöй столб. Юрсö чатыртöмöн Степанко видзöтiс цифраыс вылö, лыддис сiдз и этадз. Юрлаöдз эшö дас верста.

Дас верста! Ылын...

— Ылы-ын эшö, — шуис Васей Петрович. — Дас верста. Конечно, здоровöй мортлö — эта öтпыр сьöвзьыны. А миянлö, сувтöммеслö, ылын. Но да ладно. Чожа пантасяс деревня Кукольна. Вердам сэтöн вöлокнымöс, асьным шоччисям. А сэсся бöра одзлань. А кыдз жö?

Горбыльтчöмöн оськалiс Сырчик, кыскис керöс вылö сьöкыт телега. Шульгаланьын дун сулалiс кöзъяин, гажтöма и сьöкыта шушкöтчис лыссэзöн. Веськытланьын, паськыт ыббез весьтын, путриктiс уль туман, ветлiс тшакыллезöн. Туман пыр умöлика тöдчис паськыт чужöма тöлiсь. Сiя, кыдз и öнтай, сё уйис паныт.

Васей Петрович öдва вешталiс коккесö, и Степанко жалейтiс старикöс. И сiйö, пöрись ни мортöс, павкöтöма войнаыс, и сiйö аслас варыш гыжжезöн судзöтöма ёрдöм Гитлер. Эх, зараза жö сiя, а не морт. И мыйлö сэтшöммес му вылас чужöны?

Кöбы не вирьюись Гитлер, му вылын эз бы вöв некытшöм война. Сэк бы эз шогав добрöй старичок Васей, сэк Степанколöн некöр бы эз симав кынöм. А часöт сiя бöра сималiс.

Кöр нiя локтiсö Кукольнаöдз и Степанко кежöтiс вöвсö канава сайö, старик кыдз вöлi, сiдз и шлёпкисис му вылö. Минута-мöд сiя чушыктiс, кыдз сувтöм Сырчик, эз вермы нем горöтчыны. А кöр садясис невна, первöй делоöн тшöктiс Степанколö öзтыны биок, пизьöтны котелокын ва.

— Керам кисель, чöскöтам öммез. Ме, ужо, маокöн тэнö гöститöта, зонка. Тэ кöр-нибудь сёйлiн настоящöй ма?

Степанко сёйлiс, конечно. Кöркö, эшö война вотöдз, Степанколöн мамыс часто ваявлiс аслас любимöй зонлö этö чöскытторсö. Видз вылын ытшкисьтöн мамлöн коса часто инмывлiс мапозö. Инька öктывлiс масö паськыт турун лист вылö и рытнас ваявлiс зоныслö. И Степанко сёйлiс сiйö, нювлiс аслас кылöн быдöс листсö.

Да, Степанко сёйлiс масö. Но эта вöлi сiдз важын, что зонка, конечно, вунöтiс ни чöскытторыслiсь кöрсö. И пешлыны масö öнi вöлi öддьöн охота. Но Степанко висьталiс:

— Мый тэ, мый тэ, деда! Ма меным оз ков. Ме здоров, и меным, деда, оз ков некытшöм ма. Тэ эн вöрöт сiйö кытчöдз, нöбöт Юрлаöдз. Сiя пригодитчас.

Медбы вунöтны эта ма йылiсь, Степанко пондiс юасьны. Сiя юалiс, например, кыдз шуöны стариклiсь юрлинскöй дружоксö, мыля сiя öнi не война вылын, а уджалö пекарняын.

— А-а, тэ вон мый, — горöтчис старик. — Сiдз... Шуöны сiйö, батя, Сидöр Петраöн. Кöсыник сэтшöм мужичок, чужöмыс — кыдз кокорка. И война вылö эзö босьтö. Сылöн шульга кокыс бöрö видзöтö, чангыльтöм. Ош монлалiс детинасö. Кыдз эта вöлi? А вот сейчас висьтала... Мунi ме, детина, öтпыр Таволжанскöй кулигаö вöравны. Делоыс сёр арöн вöлi, лым ни усис, и мороз неыджыт шовкöтiс. Öнi вöралiсьлö как раз уррезöс печикавны: кучишокыс сылöн воис, гöныс сук да небытик, первöй сортöн мунас... Локтi ме вöрас, павьяла, дас-мöд урöс вийи некой пору. И вдруг адзза: öтiк кöзлöн качыс быдöс шулялöм-гыжьялöм. Сразу вежöртi: топтыгин ветлöтöма. Сiя, таёжнöй хозяиныс, берлогаö водтöн прокод пуэз гыжьялö, приметаэз тэчö и мöдiк ошлö юöртö — ветлöт ылiжык, эстöн владеннёыс менам.

Чепöсси ме öтiклаö, сыбöрын мöдiклаö, то выскыр увтö дзарнита, то колода увтö. Понокö тожö нюкайтчö, никсö страшнöя, а загривокас гöныс сiдз и сувтiс, лэбтiсис, кыдз щетина. Но, думайта, матын кытöнкö топтыгиныс узьö. И быль! Адзза: тöвныр увтын стогодся кöз пöрöма, вужжес павтыртöмась мусö. Локтi сы дынö, а выскыр увтiсь парок петöма, вежöтöма лымыс. Ош узьö! Конечно, сьöлöмö менам ёна пессис, корис öнi жö вийны михайлосö. Но дробöн сiйö он вий. А менам, кыдз нарошно, пуляöн öтiк патрон абу. Ковсис öвтыштны киöн. Кытсöвтi ме понöс и мунi гортö.

И колiс жö меным ошшасьны! Öтiклö юöртi, мöдiклö: инми, мыся, берлога вылö. И Сидöр пияныслö тожö висьталi. А сiя, Петраыс, пишальöн мукöдпырся бöбавлiс, уррезöс да сьöлаэзöс вийлiс. И вот решитöма слава аслыс судзöтны — вийны ошсö. Не ме пö лоа, если ог пöрöт сiйö, — шуöма иньыслö. И мунöм эд менам следдэз кузя вöрас. Сiя жö рытö и мунöма, кöр ме ошшаси да боньги кузь кывнам.

Локтiс ойнас иньыс миянö, сыркьялö-горзö, кеймисьö меным: Васеюшко, сьöлöмшöриньöй, сёяс сiйö, ылöстöмöс, ошыс, сiдз и тöд — сёяс! Отсав, мезды бедасис. Но ме и ачым вежöртi: нёштöм дело вермас петны. Ошкöт шутитны оз туй, сiйö кужöмöн колö босьтны. И вот кватитi чожжык пишальöс, аскерöм пуляöн зарядитi, дас кыным патрон назапас босьтi. И котöрта. Кытчö павкö кокö, а кытчö и оз, сыбурна тэрмася. Вына ме сэк вöлi, чож. И ештi как раз аскадö...

Котелокын, кöдö Степанко сувтöтiс костёр öгырас, пондiс шваркйыны-пизьны ва, и Васей Петрович кыскис котомкасис бöра учöтик кöзичкасö, кружкаын кöтöтiс крахмал и керис кисель. Степанко старайтчис не видзöтны котелокыс вылö, не мыччавны, что кисельыс и сылö гленитчö. Но Васей Петрович ачыс кисьтiс сёянсö кружкаö, нюжöтiс Степанколö:

— Давай-ко юышт пымсö. Вын содас. Ме, детина, только кисель вылас и ола. Крахмалас пö сахар я мый я эм. Отсалö.

Пöрись вöралiсь эз вунöт и туисыс йылiсь. Кыскис сiйö тожö, осьтiс, панёкöн сорлалыштiс масö.

— На-ко, зонöй, чöскöт öмтö. Эн откажитчы: унасö ог сет. Панёк только.

Степанко пондылiс пыксьыны, но старик шынньöвтiс добрöя-добрöя, сэтшöм басöка да почтительнöя, что откажитчыны некыдз эз позь, и зонка казявтöг босьтiс паньсö Васей киись.

Ма вöлi, конечно, ма. Настоящöй — чöскыт дука, кöра, сiдз и сылiс öмын. И кисель вöлi тожö туяна.

Степанколö быдöс эта локтiс сьöлöмöдз, мыйкö пым да кокнитик вöрзьöтiс быдöс вывтырсö, тыртiс мороссö ыджыт и дзирыт чувствоöн. Охота вöлi висьтавны пöрись мортлö мыйкö бытшöмö-бытшöмö, да мый висьталан, кöр сэтшöм бытшöмсö висьтавны оз тырмö кыввез?

— И мый жö одзлань вöлi? — юалiс сiя.

— Да мый вермас лоны? Локтi ме выскырыс дынö, сэтöн как раз сiя шогмö, мый должен шогмыны. Сидöр пияныс ош увтын куйлö, а топтыгин мургылялö сылiсь коскаэсö. Но, метитчи ме буржыка да кыдз кропки-лыйи, ошыс рявкнитiс и пöрис сразу. Локтi ме ны дынö, а Петрасö и тöдны оз позь. Ош косялöма быдöс чужöмсö, юр кучиксö летыштöм, коксö чангыльтöм. Мда. Ош, батя, ош и эм, ого!

Но да ладно. Мавтi ме Петралiсь быдöс ранаэсö ошыс госöн, лэбтi сiйö киам да кыдз учöтик кагаöс нöбöтi гортö. Сэсся больницаö. Джын год куйлiс сэтчин и веськалöма, слава богу, öнi Юрлаас сторожöн уджалö, пекарняö примитöмась. Ужо, кежалам сы ордö, видзöтам, кыдз да мый. Кывсьö, бура пö олö. Поди, отсалас няньторöн. Кыдз не кыдз — крестник...

Степанко нем эз шу. Сiя только думайтiс, что морт, кöдö кыскисö смерть лапаэзiсь, должен, конечно, мыйкö керны бурö, медбы благодаритны ассис спасительсö. И эшö сiя думайтiс, что кыкöн мунны ойся кадö ыджыт туй вылöт унаись гажажык, нежели öткöн. Эх, мыля сiйö колис Митюбаран?

Дата добавления: 2015-11-16