ОШ МУЛЬÖС

Юрлаö нiя локтiсö как раз сiя кадö, кöр мича небоын чавкнитiс-мыччисис югыт шондi и, кыдз добрöй волшебник, тыр кырымöн койыштiс паськыт му вылас дзирыт кузь югöррез. Паськыт му шынньöвтiс, лоис дзик эшö отажык, ловзисис тыр моросöн и саймис. Саймисö учöтик каёккез, пондöтiсö туй дорись расокын асывся концерт. Саймис тöлок, пыркнитiс-мунiс пуэз коласöт, вöрзьöтiс öтдруг тысяча нежнöй листок и öдззис висьтасьны, мый сiя адззылiс тöлiся ойö му вывсис. Листтэс дрöжитiсö, шовкöтiсö гусьöн и шыннялiсö.

Быд турун лист вылын шыннялiсö шучтыдалана лысва воттез.

Шыннялiсö рöма цветтэз.

Шыннялiс добрöй вöралiсь Васей Петрович.

Юрлаын лонтiсисö горрез. Быд трубаись петiс тшын, кайис небоö. Кöр тöлок пöльтiс посад ладорсянь, нырö вачкис сотчöм симöт дук да эшö мыйкö öддьöн тöдса, гортся, кокнитик да чöскыт кöра.

Степанко чикыртiс синнэсö: сы нырö тöлок вдруг вайöтiс свежöй пöжалöм нянь дук. Неылын вöлi пекарня, и кöть кин бы юасьтöг висьталiс, что пекарняас только неважын пöжалöмась чöскыт рудзöговöй нянь. Жаритчöм коркаа буханкаэз öнi, колö думайтны, сайкалiсö джаджжез вылын и лэдзисö сэтшöм чöскыт дук, кöда кольмöтö тшыг мортлiсь юрсö.

Кöркö Степанколöн мамыс тожö пöжавлiс бур рудзöговöй нянь. И быдпырся, кöр чöвпаннэсö нянь зырöн кыскавлiс горись, керку тырлiс чöскыт нянь дукöн. Эта дукыс кöвьясис комын, пöлатьын, быд пельöсын, пырис нырпыссэзö, кильöтiс сэтчин. А кöр керкуас вöвлi сылö дзескыт, свежöй нянь дук петавлiс öтöрö, кöвьясис керку труба весьтын, быд öшын увтын, и сэк, конечно, быдöн, кин оськавлiс ны керку дынöт, пондылiс тöдны, что хозяйка кыскалöма горись добрöй чöвпаннэз.

Энö чöвпаннэсö мам басöка тэчлiс залавка вылö, вевттьывлiс кузь дöра отöн, медбы невна небзисö. Степанко радейтiс сёйны пым нянь. Чегас чöвпан дорсö, кисьтас кружкаö кöдзыт йöв и сёйö. Жаритчöм нянь корка чöскыта кажöтыштлö пиннез увтын, ачыс няньыс сотö аннэз, и, кöр эта коста вырснитан кружкаись йöв, öмын быдöс мыйкö дзик сылыштас. И вöвлi сэтшöм бур.

И часöт, кöр Степанко кылiс свежöй нянь дуксö, кöр сылö усис тöдвылас одззася бур оланыс, öмын казявтöг пондiс öксьыны дуль.

Вот бы судзöтны кöть джын буханка...

Кöть бы джыныслiсь джынсö...

И мылякö думайтсис, что Сидöр Петра, кöдö добрöй вöралiсь Васей мездöма смерть лапаэзiсь, первöй делоöн, кöр пырасö сы ордö, гöститöтас Степанкоöс да ассис спасительсö именно пым няньöн. Кин тöдö, поди, и йöлок сетас.

Посадын то öтiклаын, то мöдiклаын баксiсö мöссэз, мексiсö козаэз. То эстöн, то сэтчин кылiс инькаэзлöн сёрнитöм, жолькöтiсö ведраэз, дзуртiсö мавттöм дзиррез вылын воротаэз.

Быд трубаись тшакыллезöн петiс тшын. Керкуэзын лонтiсисö горрез, и, натьтö, быд горын мыйкö пусис да жаритчис.

И эта вöлi бур.

...Сидöр Петралöн керкуыс сулалiс посад конецын, ыджыт туй дорын. Керкуок — не бур не умöль — видзöтчö туй вылас кык учöтик öшынöн. Керкулöн сайись стена бокö шляпкисьöма карта, кытшöмкö учöтик гуок. Кыдз и колö добрöй хозяинлö, оградасö Петра вевттьöма тёсöн, жын-жын игналöма воротаöн.

Керку трубаись тожö петiс тшынок.

«Натьтö, эз на ешты пöжавны няньсö, — думыш керис Степанко, кöр нiя сибалiсö оградаыс дынö. И сэк жö панöвтiс асьсö: — Мыйлö сылö няньсö пöжавны? Морт уджалö пекарняын, готовöй нянь, поди, сетöны...»

Мый бы эз вöв, а нiя йиркöтчисö и пырисö керкуö.

Одзын пырис Васей Петрович. Сiя первöй делоöн босьтiс юр вылiсь колпак, сэсся пернапасалiс кымöссö лик* одзын и только вöлись висьталiс хозяинлö: «Здорово, земляк». Степанко юрбитны эз куж, эз куж пернапасавны кымöссö. Но тожö босьтiс юр вылiсь кепкасö и тожö, кыдз ыджыт морт, солиднöя здоровайтчис хозяиныскöт, кöда пукалiс пызан дынын и мыйкö вырскис-панялiс бекöрись.

Керкуын кöвьясис пуöм картошка дук, нырö вачкис пöжшöм öвчинаöн, шöма капустаöн.

Сидöр Петра лэбтiс бекöр весьтiсь юрсö, бобгыштiс: «Здорово олатö». Эта кадö Степанко ештiс казявны сылiсь чужöмсö. Но и чужöм вöлi эта мортлöн! Пантасян пемытiнын, дак ловзян и öштан садьтö. Нёштöм вöлi сылöн чужöмыс, ой кытшöм нёштöм. Топтыгин, тыдалö, быд вынiсь заваритöма Петралö пельбокас, начöдз пиньöвтöма мортлiсь ансö, быдöс тшöкасö вештöма бокö, и öнi Петралöн öмыс вöлi кытöнкö шульга пель дынас. Эта öмын сяр видзисö вежöтöм пиннез. Нiя мыччисьöмась öмсис, сiдз кыдз ош косьöвтöма гыжнас увдöрись тырпсö, а вевдöрисьсö павтыртöма чуть я не нырсорöн.

Эшö сэк, кöр Петралöн юрыс вöлi бекöр весьтас, зонка казялiс, что юрсиыс сы вылын быдмö кöчоккезöн: öтiклаын эмöсь тылöппез, а мöдiклаын — кушиннэз, нем абу быдмöма. Не сьöкыт вöлi вежöртны: эна кушиннэзын кöркö вöлöма короста, сэтчö павклöмась ошлöн гыжжез.

Нёштöм вöлi Петралöн чужöмыс. И баитiс сiя öддьöн нёштöма, перво эз и позь вежöртны, мый сiя шуис. И некыдз эз позь тöдны, рад сiя аслас кортöм гöссезлö али совсем не рад.

Но вот сiя чеччис пызан сайись, кромликтöмöн локтiс Васей дынö, жмитiс сылiсь кисö и ныр пырйöттяс бобгыштiс:

— Бу-бу-бу... Кыдз ни олан, земляк?

Васей шынньöвтiс, долоньнас нуöтiс бриттöм чужöмыс кузя, шуис гажöна:

— Ола тай кытчöдз. Нянь эм, дак бур, а абу дак и сысся буржык. Меным уна я колö? Ням-ням кера и пöт.

Эта кадö комись петiс кирзовöй сапоггеза кузь дубаса инька, здоровайтчис Васейкöт, тшöктiс пуксьыны лабичö. Инька босьтiс пызан вылiсь бекöрсö и чуйнитiс бöр занавеска сайö. Степанко мылякö думайтiс, что инькаыс часöт жö ваяс пызан вылö шыд и рочалас сёйны. Но хозяйка сэсся эз мыччась. Сiя ёркöтiс комас ухватöн, бекöррезöн и мыйкö чижа-важа пöжалiс горби одзын. Комись не тэрмасьöмöн кывтiс чöскыт ру, жагöник вашöтiс керкуись капуста шöмсö да öвчина дуксö.

Медбы öмыс видзöтiс морт вылö веськыта, Петра пиньöвтiс невна юрсö, дыр буравитiс Васейöс учöтик синоккезöн и шуис не тэрмасьöмöн:

— Бу-бу-бу... Кыдз тэ умöльтчöмыт, земляк. Кучик да коскаэз... Пожалуй, не олiсь ни тэ му вылас. Бу-бу-бу... А вдруг кулан?

— Ме — кула? Да тэ мый? Ме эшö двадцать верста подöн шагнялi — и нем!

— Кулан, пожалуй, — эз сетчы Петра. — Ёна ни косьмöмыт. Вон и чужöмыт быдсöн шойöтöма*. Эх, олан, олан. А эд вермин бы тэ здоровöн лоны. И капитал бы вермин öктыны. Кылi, бöра пö курöггесö смешитöмыт. Колхозлö пö ассит бур картов сетöмыт, а босьтöмыт кынö. Ох, патриёт, ох, пролетар... А вермин бы тэ картовсö вузавны. Деньга бы вöлi.

— Мыйлö сiя меным, деньгаыс?

— Бу-бу-бу... Тэныт и деньга оз ков? Пролетар... Вексö тэ, Васей, чудитiн, вексö ассит добро тöвныр вылöт лэдзин. Вот и локтöмыт — не син не бан. Тэ давай, мужик, öвсьы. Öнi быдыс аслас кынöм йылiсь думайтö, быдыс шонытжык места кошшö.

Хозяинлöн, тыдалö, мыдзис изводалöм öмыс, и сiя кынымкö минута пукалiс чöлöмöн. Васей дыр кашляйтiс, а кöр бырсис кашельыс, шынньöвтiс:

— Велöт, земляк, кыдз овнытö. Ачыт тöдан, умокö менам дук абу. Кывсьö, тэ справнöя пö олан, вот и пыри юасьны, кыдз да кытчö...

— А мый, ен отсöтöн лöсялö оланö. И добрöй мортлö мыля не отсавны, мыля не велöтны? Вот кывзы-ко. Мун öнi жö гортö и сiя картов понда, кöдö сетöмыт колхозыслö, кор сюок, а лучше пизь.

Если пуд сетасö, сразу богатöйöн лоан. Кыдз? А вот сiдз. Вай пизьсö миянö. Хозяйкаö менам стрась кыдз велалiс пирöжоккез стряпайтны. Кылан, кыдз колдуйтö? Но дак вот. Быд лун сiя пондас пирöжоккез пöжавны, а ми нiйö — базарö. Базарын öнi чуньпон ыжда пирöжок руб сулалö. Вежöртiн?

— Кыдз не вежöртны, не кагаок жö.

— Вот-вот. Бу-бу... Пуд пизись петасö тысяча пирöжок. Конечно, капуста, колас. Но ме сiйö сета. Тысяча пирöжок — тысяча руб. А если, шуам, городö кыскыны, то кык нето куим тысяча получитам. Джынсö тэныт, мöдсö — меным.

Степанко важын казялiс, что Васейöс пöдтö смех, синнэзас сiдз и чеччалiсö кульпияноккез, но старик видзсис, эз понды ваксьыны. Мöднёж, сiя керис вид, что кывзö хозяинсö öддьöн внимательнöя.

— Куим тысяча! — дивуйтчис сiя. — Эка, кытшöм богатство! Ме век сымда деньгасö эг адззыв. Мый, если пöжавны пирöжоккесö не капустаовöйöсь, а, шуам, яёвöйöсь?

— Куим руб öтiк сэтшöм пирöжокыс сулалö. Локтiсö мöйму татчö Ленинградiсь эвакуированнöйез, дак нiя и вит рубöн сетавлiсö. Только кысь öнi яйсö?

— Хо, дак ме жö вöралiсь, — öддьöн серьёзнöя шуис Васей. — Ме верма и лосьöс пöрöтны. Тэ, кылан, вöлi мекöт таво апрель конецас öтiк случай. Ужо, висьтала быдöс сьöрсьöн-бöрсьöн. Куйла, значит, öтпыр гор вылын, моросöс шонта, а сэтчö вдруг председательным пырö. Тэ вот мый, шуö, Васей, чожа сев пондöтчас, а народсö вердны немöн — öтiк нянёк. Вот и сетiсö, шуö, районын разрешеннё — вийны лосьöс. Давай-ко, шуö, котрась Таволжанскöй дзибас, сэтчин лоссез пö олöны. Пöрöт öтiкö-кыкö. Но ме и мунi. Тшöктöны, дак кытчö нö воштiсян? Быдса лун ветлöтi вöрöт, гöгралi сiйö. А вöлi чарöм ни, лямпаэзтöг ветлöтi ме. И лоссесö чарöм коста вийны öддьöн кокнит. Дойдö чорыт лым коркаыс нылiсь коккезнысö. И мый тэ думайтан? Казялi эд öтiк лосьлiсь следсö.

— Но! бу-бу...

— Быль, казялi. Но, думайта, лоас пожива, лоас яй.

— Но и кыдз? Вийин? — эз вермы спокойнöя кывзыны Сидöр Петра.

— Кытшöм тэ чож! Эг вермы пöрöтны. Вöтi ме лосьсö, видзöта, а сiя мампöв. И учöтик куканёк сы дынын бергалö. Видзöтi-кери: басöк куканёкыс, порозок чужöма. Но ме и öвтыштi кинам: быдмы арöдззас, порозей. Арнас кыя тэнö...

— Арна-ас? Ох! Да арöдззас, может, войнаыс чулалас! Курччав сэк гырдззаэтö. Ох!

Сидöр Петралöн перво ляснитiсö пиннес, сэсся кыдзкö öддьöн нёштöма пильтыртчис чужöмыс, кöрчитчис, кыдз жаритчöм чуман. Сылö эз тырмы воздух, моросас мыйкö пондiс бульöтны, и морт не öтiк минута только осьтлiс и осьтлiс аннэсö.

Васей Петрович чувйыштiс Степанколö бокас, гусьöн шынньöвтiс.

Кöр хозяинöс невна дугдiс маитны дикöй выныс, сiя видiс пöрись вöралiсьöс ылöстöм лешакöн, сэсся кутiс киэзнас юрсö и бобгис чуть я не синвасорöн:

— Лосьöс не вийны! Да кыдз жö сiдз? Эд лосьыс — яй. Эд сы понда мильон позис курыштны. Вот пролетар... Вот патриёт...

— Сулав, сулав, земляк, — öлiс сiйö вöралiсь. — Кытчö тэрмасьны? Эшö пöрöтам, эшö курыштам миллионсö. Джынсö тэныт, мöдсö — меным. Тэ вот мый... Э-э, кыдз бы тэныт шуны... Ми эд, земляк, могöн моз пырим. Вон зоночкаыс Кудымкарö мунö, анькытш фронтлö кыскö. И тшыг сiя, кынöмыс сималö... Оз я тэнат няньтор адззись?

— Няньтор? Бу-бу-бу... Да тэ мый, öнджа? Эд няньсö ме ачым джын год ни ог сёй. Öтiк крöшки. Эд ме получайта не нянь, а пизь. А пизьсис ми керам пирöжоккез... Эх, да кыдз тэ он вежöрт! Быд пирöжок — руб. Кин сэтöн няньсö сёяс? Да ме джын год ни öтiк картов вылын ола. И, видзöт, ловья. Зато деньгаыс...

— Тыр мешöк ни? — юалiс Васей.

— А мый?

— Шыррез сёясö. Миян деревняын Кила Егор диво вöлi öктöма деньгасö, видзöм кытöнкö джоджулын, дак сылiсь быдöс шыррез тыткöмась.

— Быдöс? Эх, морт! Зараза сiя, а не морт. Лучше бы меным сетiс деньгасö. Ох, ох, пролетаррез. Да тэ, зырымöсь бедь, вузав меным кило-мöд анькытштö. Ме тэныт деньга сета, а деньга вылас пирöжоккез менчим небан. Вежöртiн?

— Вежöртi, — шуис Степанко и чеччис местасис.

— Сiдзкö, вузалан?

— Даром сета.

Васей Петрович сiдз и пырснитiс-серöмтчис, а хозяинлöн эшö ёнжыка пиньöвтчис öмыс и бöра ляснитiсö пиннез, кыдз кöинлöн, Степанко пелитiс юр вылас кепка и — не спасибо, не прощай — петiс öтöрö. То ли дука керкуас пукалöмсянь, то ли öтöрсис сöстöм воздухсö моросö кыскöмсянь сылöн пондiс бергавны юр, гудыртчис сьöлöм. Кöр Васей Петрович петiс öтöрас, зонка сулалiс, кыдз тувдöм. Чужöмыс вöлi блед, бытьтö бумага лист.

А öтöрын вöлi гожся асыв, мича да гора. Быдлаын готсисö курöггез, китсасисö петуххез, мексiсö кöзаэз.

А небоын шыннялiс шондi, кыдз добрöй волшебник, койис му вылö золотöй кузь югöррез. И некытшöм дело сылö эз вöв, что чочком светын öгралiс страшнöй война, киссис отирлöн вир, что Степанколöн сималiс кынöм. Шондi керис ассис уджсö и вöлi довольнöй.

Пöрись, дрöжитана киэзöн Васей Петрович волькöтыштiс зонкалiсь виньöрик пельпонсö, шуис серöм пыр:

— Адззылiн, кытшöм купец вылö инмим? Ах каналья! Кыдз сiя миянöс гöститöтiс! Некöр не вунöтны. Ох-хо. Но да ладно. Тэ öддьöнсö эн тöждiсь. Тэ, дружок, эн на вунöт, мый висьталiс Першин Иваныс? Семик кежö пö старухаö лöсьöтчис. Талун, зонка, семик, касьтiсян лун. Талун быдöн, кинлö охота касьтiсьны, кайö могильникö, сьöрö босьтö стряпня. И кöть невночка, да сетö быд мортыс стряпнясö сылö, кинлöн сималö кынöм. Кылан, кыдз быд керкуись стряпня дукыс петö?

Юрлаын лонтiсисö горрез. Быд горын мыйкö пусис и жаритчис, Öтöрын кöвьясис чöскыт дук.

Сидöр Петралöн тожö лонтiсис гор. И öтлаын чöскыт дуккöт сы керку öшыннэзiсь петiсö шыэз:

— Бу-бу-бу... Вот пролетаррез, вот патриёттэз! Нянь корны пырöмась. Да öштöм тай Васейыс стыдсö. Поди, шуö: мездi ме Петрасö ош лапаэзiсь, дак кувтöдз сiя няньöн пондас вердны. Хо! Да эд сы местын любöй бы менö мездiс. Сы местын и ме бы сiдз кери. А кыдз нö сэсся? Сiдз и колö, эм совестьыс дак.

Васей пидзыртiс кулаксö, öвтыштiс сiйöн.

— У-у, паразит! Эшö совесть йылiсь баитö, варыш! Эшö недовольнöй кольччöм, ош мульöс...

Сiя сьöвзис кок увтас и иньдöтчис больницалань. Степанко повзьöтiс Сырчикöс плетьöн.

Дата добавления: 2015-11-16