СОЛДАТТЭЗ ЛОАСÖ ПÖТÖСЬ

Паськыт миян роднöй пермяцкöй му. Уна сы вылын деревняэз да посаддэз, доль и поперёк кыссьöны туйез. И быд деревняись да посадiсь уна туйез кузя тавося сьöкыт военнöй тулысö мунiсö обоззэз, öтка подводаэз. Быд телегаын вöлi срочнöй груз: коми-пермяккез иньдiсö фронтлö нянь.

Сё одзлань и одзлань мунiс аслас туй кузя Степанко. Сiя мунiс и радуйтчис: анькытш лоас кыскöма аскадö, воиннэз лоасö пöтöсь. Отсалiс сылö белоевскöй бригадир, православнöй морт Степанида Петровна, сетiс пара вöв. Нiя вöлiсö тожö моритöмöсь, но сев бöрын шоччисьöмась нёль лун ни и часöт, медбы позьöтны коккезнысö, мунiсö бодрöя, орсiсö пеллезöн и Степанколiсь сьöкыт телегасö кыскисö кыкöн нем туйö.

Сьöрсьöн-бöрсьöн кольччисö бöрö верстаэз, кольччисö расоккез, керöссэз, деревняэз. Мукöд деревняэз дынiсь ыббез вылын уджалiсö инькаэз да стариккез: нiя рознитiсö назём и гöрисö пар. «Натьтö, и Лобанын гöрöны ни» — думайтiс Степанко и сьöлöмнас лэбзис гортö. Охота вöлi чожжык мунны тожö ыб вылö, шулявны му. Колö думайтны, председатель сетас сылö мöдiк вöв, кытчöдз Сырчик оз öкты вынсö. Сувтöм вöлöн уна я гöран... Натьтö, сылö, кин петас гöрны, председатель сразу сетас пизь. Эд пикан вылын тожö унасö он гöр. Пизь, натьтö, кольччис шогдiовöй. Если содтыны сэтчö невна гырын масьтöм анькытш гöридз да пиканiсь пизёк, то бытшöм кöрышшез петасö. Санко да Симка крöшитасö кöрышшесö йöлö и лоасö пöтöсь.

Пиня кыр Опонась дыр пукалiс шы сеттöг, тыдалö, лöгалiс Степанко вылö, мыля сы увья ковсис мунны туйö, сэсся водiс мешöккез вылö кыминь и сразу онмöссис. Сылöн былись петöма оныс, сельсоветын дежуриттöн абу удайтчöма узьны. Степанко дзарьялiс öтмöдöрö, любуйтчис гажа местаэзöн, часто шовкöтiс плетьöн. Вöввез ровнöй местаöт чепöссьывлiсö рöктыны, а керöссэз увтö лэдзчикö котöртiсö рысь.

Вöлi луншöр кад, и туй вылын бöра пондiсö пантасьлыны ранитöм солдаттэз, кöдна вöрзьöмась талун Кудымкарсянь. Пантасисö простöн мунiсь подводаэз: ямщиккез ештöмась ни сетны няньсö Заготзерноö, öнi тэрмасисö гортö. Почти быд телегаын пукалiсö кык-куим ранитöм воин, куритiсö махорка, сёрнитiсö öтамöд коласын. Пантасис веж погоннэза военнöй начальник, кытчöкö мунiс верзьöмöн, гöнитiс сточма. Кыным матынжык вöлi город, сыным частожык пантасис быдкодь йöз. Только Митюбаран эз пантась, дзик öшис. И вот, кöр подвода кайис крут керöс вылö, Степанко одзсис казялiс ыджыт водонапорнöй башня, кытшöмкö кирпичнöй труба, казялiс чочком стенаа строеннёэз. Неылын вöлi Кудымкар. Степанко чувйыштiс Опонасьлö бокас, саймöтiс сiйö.

— Тэ мый? — юалiс зоночка, синнэсö туликö.

— Город, — юöртiс Степанко. — Давай ямщичайт. Ме эд первуись татöн, ог тöд, кытöн Заготзерноыс.

Степанко думайтiс, что Опонась пондас пиньгисьны, мыля костiалiсö онсö, но сiя чöскыта узьöм бöрын шынньöвтiс, видчыны эз и мöд.

— Вот вöлись юрö кокнямис, а асывнас дзик куд вöлi, — шуис сiя.

— А мый нö бригадирыт шуö: лабичын пö узин? — юалiс Степанко.

— Узян сэтчин! Ойбыт председательыс уджалiс, ойбыт менö то öтiклаö, то мöдiклаö иньдалiс. Городiсь нёлись звонитiсö, подводаэз корöны станцияö ветлыны. Быдса эшелон пö сэтчин раненöйезöн локтöма, быдöннысö колö госпитальö кыскыны. Сэтчö жö пар тшöктöны гöрны. Узян, пожалуй, сэтöн...

Кöр нiя пырисö городö, первöйыс, мый усис синмö, вöлiсö военнöйез. Быд улицаын пантасисö солдаттэз, басöк погона офицеррез. Главнöй улицаöт мунiс кузь колонна: тöнняся колхозниккез да рабочöйез оськалiсö кытчöкö подöн, быдыс нöбöтiс спина сайын котомка — сидор. Колонна одзын маршируйтiс офицер. Кин тöдö, поди, и нiя колхозниккес, кöдна тöн отсалiсö Степанколö Юрла сайын, оськалiсö сэтöн жö, лöсьöтчисö мунны война вылö.

Городскöй садын орсiс музыка, басöка сьылiсö нывкаэз.

— Концерт сэтчин мыччалöны мобилизованнöйеслö, — юöртiс Опонась. — Пыралам кывзыны?

— Мый тэ, мый тэ! Колö чожжык Заготзерноö, — шуис Степанко.

Но мунны чожжыка некыдз эз позь. Только ештiс саясьны колоннаыс, а главнöй улицаö öтiк переулокись петiс мöдiк колонна, сэсся кыссис кузь обоз. Телегаэзын пукалiсö бöра мобилизованнöйез, жöниккезнысö кольлалiсö инькаэз. Ямщиккез горöтлiсö вöввез вылын, инькаэз сыркьялiсö, сулалiс вöвлытöм шум. Иньва пос дынын аркмöма затор и ковсис дыр сулавны, видзчисьны, кöр обозыс вöрзяс одзлань.

— Вот эта вын мунö! — дивуйтчис Степанко. — Вот эта армия!

— Чожа Гитлерлö капут лоас, — горöтчис Опонась. — Чожа чулалас войнаыс.

Заготзерно дынын сулалiсö няньöн подводаэз. Неылiсь Степанко казялiс автомашинаэз. Быд машина кузовын вöлi грузитöма нянь. Мешöккез, мешöккез... Мымда нiйö тэчöмась машинаэс вылö...

Военнöй паськöма шофёррез сулалiсö кабинаэз дынын, тыдалö, видзчисисö команда вöрзьыны туйö — станцияö. Кытöнкö орсiс баян, кылiс военнöй песня:

Вставай, страна огромная,

Вставай на смертный бой...

Степанко думайтiс, что татöн сiйö пондасö видзны öддьöн дыр. Кыдз бы эшö узьны эз ковсьы. Подводаэс сулалiсö уна, кöр сымдасö ректасö? Но эз ешты сiя пырны контораö, кыдз ыджыт мыгöра инька, кöда мыйöнкö вачкисис Степанида Петровна вылö, сувтöтiс Степанкоöс порог дынын.

— Мый кыскин? — юалiс сiя.

— Анькытш.

— Тьфу! А мыля сёрмин? Лобановскöй я мый я?

— Лобановскöй.

Степанко висьталiс, мыля сiя сёрмис, инька сьöласис, гогинялiс юрöн. Сэсся корис дынас кытшöмкö инвалидöс, сетiс приказ:

— Öшлы, Павел Фёдорович, грузсö. Да чожжыка! Медбöрья машина анькытшнас грузитам.

Павел Фёдорович, горбыля кöсыник мужичок, увья клюка вылö нырыштсьöмöн, петiс öтöрö, тшöктiс Степанколö локны вессэз дынö. Вöлi мужикыс мыдз, тыдалö, абу узьöма не öтiк сутки ни: синнэс гöрдöсь, рожабаннэс шойöтöмöсь, кажитчö, тойышт сiйö — и усяс кок йылiсь. Но уджалiс проворнöя. Отсалiс Степанколö чапкавны вессэз вылö сьöкыт мешöккез, шупыта тэчис гириэз, корис накладнöй.

— Бур, лöсялö, — шуис сiя. — Öтiк грамм абу чинöма. Степанко радуйтчис. Вот и керöма дело! Боевöй заданнё тыртöма. Öнi позьö иньдöтчыны гортö. Ох и гажтöмтчисö ни, натьтö, Санко да Симка. Натьтö, и мамыс тöждiсьö, поди, думайтö: кытöн часöт Степанко, быдöс я ладно?

Быдöс я ладно? Конечно, ладно.

Павел Фёдорович пуксис гижны квитанция. Сiя кыскис ни карандаш, лöсьöтiс копирка, эшö öтпырись дзарнитiс накладнöйö, кöдö вайис Степанко. И вдруг весовщик подозрительнöя нёджжöвтiс Степанколö синнэзас, сэсся мешöккез вылö, чапкис карандашсö.

— Дак тэ лобановскöй? Сулав, сулав... Э-э, сулав-ко, зонка... Уна сёйин анькытшсö?

Степанколöн чужöмыс сiдз и пыкнитiс биöн, ачыс пондiс дрöжитны, паныт эз письты висьтавны нем.

— Сiдз, сiдз, зонка! Ах тэ супоней!

Эна кыввезöн весовщик чеччöвтiс пызан сайись, кромликайтöмöн мунiс кытчöкö. Чожа сiя локтiс томыник нывкакöт. Нывка видзис киас кузь щуп, кöдöн чувйöны мешöккез, кöр босьтöны анализ вылö проба. Нывка тожö подозрительнöя видзöтыштiс Степанко синнэзö и, кöр весовщик сувтöтiс мешöккесö, перыта босьтiс быд мешöкись проба. Сiя мунiс лабораторияö, а кöсыник мужичок пешлiс анькытшсö пиннезнас, босьтлiс тыр кырым, кисьтлiс киись киö, дырöн видзöтiс каждöй тусёксö. Степанко эз тöд, мый и думайтны.

— Ме, дядя, эг вöрöт öтiк тусёк, — шуис сiя.

— Ладно, ладно, часöт пондам тöдны. Если вöрöтiн — тюрьма, если эн — значит, молодец. Локтiс тöн рытнас тiянiсь öтiк яймек, дак тожö перво шуис: öтiк грамм эг вöрзьöт, а кöр керим анализ...

— Кин сiя? Митюбаран?

— Митькаöн, ровно бы, шуöны. Босьтöм, лёквир, джын пуд мымда анькытшсö, мешöккезас кисьтöма ва и думайтö — сiдз сiя и колö. Польдöм анькытшыс, весыс нельки унажык лоöма, нежели одзжык. Но менö он бöбöт. Кутiм, лешакпиянöс.

Степанко сьöкыта пуксис вес вылö, öшöтiс юрсö. Вот мый сэтöн вöлöма! Сы увья, баран увья, и Степанко вылö подозреннё. А мый, если анализыс петас неладно? Эд нылочкаыс, натьтö, эшö неопытнöй лаборант, вермас мыйкö соравны... Эх, баран, баран... Поткöтны бы юртö.

— Кытöн сiя öнi? — юалiс весовщиклiсь.

— А косьтö анькытшсö. Вон сэтчин, склад саяс.

Кынымкö минута бöртi вессэз дынö котöрöн локтiс ыджыт мыгöра инькаыс, уськöтчис весовщик вылö:

— Тэ мый гуддисян? Мыля машинаэсö сулöтан?

— Чöв, Анна Ивановна. Зонкаыс лобановскöй. Поди... Анализ тшöктi керны.

Инька вачкис долоньнас каджыс кузя, нем эз шу паныт. Сiя вöлi лöг, и Степанко полiс, что дöнзяс, пожалуй. Но локтiс нылочкаыс, тшöктiс грузитны мешöккесö машина вылö.

— Бур анькытшыс, стандартнöй, — шуис сiя.

Степанко пельпон вылiсь таралiс сьöкыт из. «Спасибо тэныт, нылiньöй...» Сiя проворнöя кöрталiс мешöккесö и, кöр весовщик сетiс квитанция, лöсьöтчис чожжык ворота сайö. Но ыджыт инькаыс жмитiс сылiсь кисö, дзирыта шуис:

— Молодец, зонка. Спасибо, аскадö ештiн. Анькытшыс талун жö лоас станцияын. Бур, что эн вöрöт грузсö. Казённöйö вöрöтны, зонка, нем оз ков.

— Молодец, — шуис и весовщикыс. — Эн лöгав ме вылö. Нем, батя, он кер. Служба сэтшöм. А мый, Анна Ивановна, поди, сетны сылö кöть кило нянь? Тшыг, тыдалö, мортыс, а бöр мунны кузь туйыс — сто верста....

— Ась инö пыралö контораас. Сетам, ужо, килосö.

Степанко сьöлöмын аркмисö песняэз. Сiя эз тöд, мый горöтчыны.

Вессэз дынö бöрöн петитчис машина. Грузчиккез — раз, раз! — чапкалiсö Степанколiсь мешöккесö кузовö, и машина петiс туй вылö. Чулалас кынымкö час, и машинаэз лоасö станцияын. Сэтчин няньсö тэчасö вагоннэзö и — ту-ту! — кыскасö фронт вылö. Солдаттэз лоасö пöтöсь.

А ыджыт склад сайын, ыркытiнын, пукалiс Митюбаран. Шадраа чужöмыс вевттисьöма бусöн да саöн, синнэс дзуз видзисö, югьялiсö недобрöя, юрси тылöппес лэдзчисьöмась кымöс вылö, лякасьöмась ньылöмöсь яй кучик бердö. Сы одзын вöлi ольсалöм öн. Öн вылын косьмис анькытш. Неылын йирсис Лысанко.

Кöр Степанко петыштiс пельöс сайсянь, Митюбаран лэбтiс юрсö и сразу жö лэдзис бöр. Эта юрын вöлiсö гажтöм думаэз, кöдна из моз нырыштiсö пельпоннэз.

— Тюрьма меным öнi, — гажтöма ыш ловзисис Митюбаран. — Шедi, тыдалö. Кынымись ни туяс ветлi, сё ладно вöлi и вот... Кин думайтiс, что кладовщикыс сэтшöм? Вирьюись сiя...

— Но-но, тэ гусьöнжык! Ачыт виноват. Мыля менö колин, а? Митюбаран шы эз сет. Степанколö жаль вöлi сiйö, да мыйöн отсалан? Война. Шутитны сэтшöм делоöн оз туй.

Сiя петкöтiс вöввесö ворота сайö, сэсся пыралiс контораö, получитiс джын буханка нянь и пуктiс косогорскöй Маруся кöзичаö. Ого, видзöт мымда доброыс! Эд и Марусялiсь козинсö сiя эз на вöрöт. Öнi некытшöм беда оз ло.

Опонась сулалiс туй вылас, видзöтiс машинаэзлань.

— Няньыс, няньыс мымда! — дивуйтчис сiя. — Вот бы сетны сiйö колхозниккезлö — быдса год кежö бы тырмис.

Машинаэз вылын нянь вöлi былись уна. Сiйö быдтiсö колхозниккез, сетiсö государстволö, кöть асьныс вöлiсö тшыгöсь. А мöднёж некыдз оз позь. Кытöнкö куимöт год ни öгралiс война, киссис отирлöн вир. Кытöнкö солдаттэз мунiсö атакаö, чирзiсö ура, репöтiсö роднöй странаись враггезöс. Колхознöй нянь колiс солдаттэзлö.

Контораись петiс чочком погоннэза офицер, посöдзсянь сетiс команда:

— По машина-ам! Живо!

Джын песня вылын виньдiс баян, öдззисö гурöтны моторрез, тыртiсö öтöрсö зыкöн. Офицер-интендат мунiс колонна одзö, пырис кабинаö. Машинаэз вöрзисö: перво одзисьыс, сэсся мöдiк, куимöт, нёльöт... дасöт...

— Счастливöй туй тiянлö! — горöтiс Опонась.

— Солдаттэз лоасö пöтöсь, — шуис Степанко и перыта пуксис телегаö.

1967 г.

Дата добавления: 2015-11-16