Лоас и миян праздник

Юрла сайын чуть да бöра пантасьлiсö ранитöм солдаттэз. Нiя, кöдна эз вермö оськавны асьныс, пукалiсö телегаэзын, куритiсö махорка. Здоровöй кокаэз шагнялiсö подöн, сёрнитiсö öтамöд коласын, натьтö, висьтасисö фронтовöй олан йылiсь, касьтывлiсö бойезын керöм подвиггез. Почти быд солдатлöн морос вылын свиттялiсö орденнэз, жольöтiсö, медаллез.

И быдпырся, кöр туй вылын мыччисьлiс солдат, Степанколöн дрöгнитлiс сьöлöмыс: «А вдруг айö?» Конечно, надея вöлi учöт, но мыйыс оз овлы? Эд вермисö айсö ранитны бойын, стрöйдыны. Сiя куйлiс, может, госпитальын, а часöт лэдзисö гортö, и вот сiя локтö.

Конечно, госпитальсянь сiя гижис бы письмо, юöртiс бы, кыдз да мый. Но сёравно, кöть письмоэс быдса год ни эз вöлö, Степанко надейтчис мыйкö вылö, дырöн видзöтлiс быд солдат чужöмö:

«А вдруг?»

Но сэтшöм делоыс вермис бы лоны только чудоöн, а чудоэс — этö Степанко тöдiс ни — светас озö овлö.

Туйлöн кыкнан ладорын ольсассисö колхознöй ыббез. Неыджыт мыс покаттэз вылын лöзöтiс рудзöг, каттисис ни трубкаö. Ордчöн рудзöга ыбкöт вöлiсö осяэз. Том колхозник радуйтчис быдöс сьöлöмнас: бытшöм вöлi тулысыс, и осяэс петöмась бытшöмöсь, син гажöтöны. Если оз ло засуха, то и таво быдмас добрöй урожай.

Ыббез ладорö пöльтыштiс вольнöй тöлок, вöрзьöтiс быдмассэсö, и ыббес вылöт паськалiсö нежнöй переливвез, воздухыс тырис ароматöн, быдкодь цветтэзiсь да турунiсь настойкаöн. Ыббез вылö видзöттöн ванйöв оссис сьöлöм.

А туй вöлi сьöкыт, неровнöй. Он ешты кайны öтiк керöс вылö, видзöтан, бöра пантасьö ни сэтшöм жö керöс. Быд керöс вылö кайтöн Сырчиклöн бырö садьыс, и сiя сувтчö шоччисьны. И мымда бы тэ сiйö эн повзьöтлы плетьöн, мымда бы эн горöтлы, Сырчик оз и вöрзьöт пельöн, трек оз кер. Зоночка ачыс кутчисьлiс телега бердö, пыкис сiйö мымда вын, кисьтiс ньылöм, а уна я толкыс?

Öтiк сэтшöм керöс дынын, кöр Степанколöн петiсö ни синваэз, сiйö вöтiс подвода. Телегаын пукалiсö нёль мужик и инька-ямщик. Сэтöн жö тыдалiсö ыджыт котомаэз. Степанко вежöртiс: мужиккес мунöны армияö.

— Мый, сувтiс вöлыт, землячок? — юалiс пöриськодь ни мужик и чеччöвтiс телегасис. — Кудымкарö я мый я?

— Кудымкарö. Куимöт сутки кысся.

— Ай-яй-яй! Беда тай. Ноко, челядь, отсалам я мый я? Казённöй дело керö зонкаыс. Тожö, позьö шуны, воюйтö. Эхма...

Мужиккез лэдзчисö телегаись, лякасисö Степанко телега бердö.

— Э-эй, милай, давай, давай!

— Ноко эшö öтпырись! Но, но!

Муркнитiсö-рявкнитiсö вöв вылö, шутньöвтiсö горöн, Сырчик горбыльтчис, нёльнан кокöн пыксис и вöрзис. Мужиккез пыкöтасисö, дружнöя тойыштiсö телегасö. Сы колесоэз увтын сьöкыта няжöтiс галька.

— Но, но, лешак! Но, но!

— Эшö невночка! Давай-й!

Джын верста вöлi керöс йылöдз, и мужиккез сё рявзiсö-горöтлiсö, кайöтiсö телегасö, позьö шуны, асланыс киын. Степанко дивуйтчис: вот эта вын! И кытшöм дружнöйöсь! Да-а, сет нылö киö пишаль да висьтав: «Пазды!» — нiя повтöг уськöтчасö бойö, пизьдасö любöй врагöс. И кытшöмкö виль ыджыт чувство пырис сьöлöмö, шонтiс быдöс морос.

И сэтöн усис тöдвылö Митюбаран. Паразит сiя, а не морт. Колис зонкасö öтнасö туй вылын, мунiс, кырныш, буржык вöлöн. Но, ужо, сiя эшö пантасяс Степанкокöт. Степанко эшö висьталас сылö кыв, позоритас быдöс деревня одзын.

Керöс йылын мужиккез лапкöтыштiсö Степанколiсь виньöрик пельпонсö, желайтiсö бур туй и пуксисö асланыс телегаö. Степанко дзирыта желайтiс нылö счастье да военнöй удача, и бöра мыйкö дзирыт да бур муныштiс сы сьöлöмöт, öзтыштiс вир. Зонка казялiс, что и сылö охота мунны öтлаын эна дружнöй мужиккезкöт, босьтны киö пишаль и пизьдыны врагöс.

Телега ёркйöмöн лэдзчис керöс вывсянь, туй пырис вöрö. Шондi койыштiс медбöрья югöррез, öзтiс басöк гöрд рöмöн пу йыввез. Вöрись петiсö кузь вуджöррез, поперегалiсö туйсö, телеграфнöй столббез вылын норöн и нюжвыла сьылiсö проводдэз.

Вöлi ыркыткодь, логгезiсь пöльтiс ульсöт и лöсьöтчис петны туман. Степанкоöс нырыштiс он и, кин тöдö, поди, онмöссис бы, если бы эз казяв ранитöм солдатöс. Солдат пукалiс туй дорын и неыджыт костёр весьтын пуис кытшöмкö сёян нето пизьöтiс чай.

Вöлi сiя эшö не öддьöн пöрись, паськыт пельпоннэза и вылын мороса, ныр увтас сьöд видзисö усоккез. Солдат морос вылын свиттялiсö медаль и гвардейскöй значок. Кöр подвода ровняйтчис сыкöт, солдат паськыта шынньöвтiс и гажöна горöтчис:

— Шоччöт меринтö, мужичок! Висьтась, кыдз ни овсьö? Степанколö и аслыс важын охота вöлi баитны боевöй солдаткöт, юавны, кытöн сiя вöлi и мый адззылiс, эз я кытöнкö фронтовöй туй вылын пантав айсö. Но пондöтны баснисö сiя эз куж, мылякö вöлi нелöсьыт, а сэтöн видзöт мый — солдат ачыс сiйö корö дынас.

— Туйö мунан?

— Туйö, дядя. Анькытш воиннэзлö кыска.

— Анькытш? Эта ладнöй делоыс. А вöлокыт сувтöм, тыдалö?

— Мыдзис ёна. Тулысбыт бороздаын, öтiк лун эз шоччись. А сэтöн вдруг туйö эшö иньдiсö.

— Сiдз. Дöнзьö öнi и мортлö, и вöвлö. Сьöкыт оланыс. Но чожа миян армия мургыльтас Гитлерлiсь бандасö, нырыштас кок увтö, Вот сэк и ловзисяс йöзыс. Тэ мый, тожö гöрин ни?

— Тулысбыт гöри. Четырнадцать гектар шулялi. Сiйöн и сувтiс.

— О-о, да тэ тай настоящöй герой. О-о!

Степанколö охота вöлi висьтавны, кыдз сiя пемытсянь пемытöдз уджалiс ыбын, кыдз порой симавлiс кынöмыс, кыдз пыктывлiсö коккес — нельки эзö тöрö нинкöммез, мыля кынмавлiс тöвнас вöрын уджавтöн, но висьтавны этö эз понды. Мыйлö? Эшö пондас думайтны — ошшасьö детинаыс. Ошшасись отирсö не öддьöн радейтöны. Буржык лоас, если солдат висьтасяс, кыдз воюйтiс, мый понда сылö сетiсö медальсö. Натьтö, подвиг понда. Кыдз не кыдз, а медаль — боевöй награда. Не каждöйлö сiйö сетöны. Смелöй, тыдалö, вöлöма мортыс, поди, не öтпыр атакаö ветлiс? Вот бы юавны...

Кöд коста Степанко кежис бокö, личöтiс чересседельник да лэдзис Сырчикöс йирсьыны, солдат кыскис биись котелоксö, лöсьöтчис юны чай. Уджалiс сiя öт кинас ― мöдыс вöлi домалöма бинтöн и öшалiс, кыдз плеть.

— Пуксьы, дружок, ордчöн, чаёк пешлы, — рочалiс сiя Степанкоöс.

Зонка, конечно, пуксис. Солдатскöй чай юны кинлö не охота?

— Сiдзкö, сьöкыта овсьö гортын? Эхма. А ме эшö китöг кольччи. Кыдз уджавны? Эд ме, зонка, колхозын плотникöн уджалi. А часöт мый?

— Сьöкыт, конечно. Мортлö колöны кык ки, — мудрöй старичок моз баитiс Степанко. — Но олöны тай и китöг. Локтiс миян таво öтiк мужик. Кыкнан коксö ранитöмась, да эшö кынöмас пуля инмöма, дак уджалö. Сiя, дядя, тулысбыт кöдзыс сю кыскалiс, а öнi пар лöсьöтчö гöрны.

— Мда, дöнзьö эта войнасянь. Неетша ни вийисö-калечитiсö. Но, ужо, чожа ни овсяс Гитлерыслö. Вежсяс сэк оланыс. Лоас и миян улицаын праздник.

Солдат кыскис котомкаись нянь, кынымкö сахартор, кисьтiс чöскыт дука чай. Перво аслас кружкаö, сэсся Степанколö котелокас.

— Давай ю, чöскöт öмтö. Деревняын, натьтö, и сахарыс öнi абу? Сахар! Няньыс бы вöлi, а то сахар. Степанко вунöтiс ни сылiсь кöрсö.

— Абу, конечно.

Чай вöлi дзирыт, сiдз и сотыштiс быдöс морос, тырп доррез. Степанко юис учöтик гульккезöн и гусьöник видзöтлiс солдат медаль вылö. Интересно, мый понда сiйö сетiсö? Колö бы юавны, да кыдз? Оз лöсяв сразу-ту.

— Важын ни ранитiсö?

— Эшö тöвнас. Мунiм ми атакаö, посад босьтiмö. Но и вот павкис меным. Öтiк пуля пельпонöттям шучкöп мунöма, мöдiк моросам сöтiс. Но и уси ме, öштi садьöс. Сайми медсанбатын, а доктор юрнас качайтö. «Здоровöй тэ, мужик, видзöт, ловзин. А ме думайтi...» Пуля жугдöма пельпон коскаöс, а мöдыс чуть я не сьöлöм бердöт мунöма. Джын год госпитальын валяйтчи.

— Медальсö госпиталяс и сетiсö ни?

— Не, мый тэ! Этö одзжык. Вöлi öтiк дело. И смех и грех! Кыдз усяс тöдвылö — серавны охота.

— Вот кыдз!

— Мда. Вöлi эта делоыс эшö мöйму гожумнас. Сулалiс миян ротаным öтiк рас дынын, оборонаын. Сулалам лун, сулалам мöдiкö. Кыдз только мыччисям окоппезiсь, немец сiдз и шырзьö пулемёттэзiсь. Сэсся, видзöтам, атакаö фашисттэз лэбтiсисö. Но ми нiйö панталiм тожö пулемёттэзöн. Немеццез кинитчисö бöр, водiсö. Чожа мыйись — виль атака. Ми бöра автоматтэзiсь да пулемёттэзiсь шырзям. Сэк и кватитчис командирным — патроннэз бырсьöны. Корис öтiк солдатöс: «Давай чожжык патроннэзла!» Вон, шуö, вöр дорас миян боевöй пунктыс. Солдат, вежöртана, котöртiс. Чулалiс джын час, видзчисям сiйö. Кытöн, мый керö? Абу и абу. Сэк командир иньдiс мöдiк солдатöс. Бöра видзчисям. И сiя эз лок. А немец вот-вот бöра лэбтiсяс атакаö, бöра пондас пелитчыны. А патроннэз нач ни етша. Мый керны? Сэк командир локтiс ме дынö, сетiс строгöй приказ:

— Часöт жö мун сэтчин. Тöд, мый лоис, и патроннэз вай!

— Есть! — шуи ме и чепöсси котöртны.

Локтi ме вöр дынö, пыри кусттэз коласö. Сэсся визир вылö петi. Котöрта сы кузя, тэрмася. Юрам öтiк дума: «Колö чожжык, немеццез вот-вот атакаö уськöтчасö». И сэтöн казялi: кык солдат неылын ордчöн валяйтчöны, вийöмöсь. И сразу — стоп! Вежöртi ме — неладно делоыс. Мыля öтiк местаын кыкнанныс куйлöны, эд вöрзисö туяс не öтдруг? «Снайпер!» — мелькнитiс юрам.

Мöдi ме бöр бертны, висьтавны командирлö, кытшöм делоыс аркмö. Но бертны патроннэзтöг некыдз оз позь — приказ вöлi строгöй. Мый бы эз вöв, а колö адззыны снайперсö, уничтожитны гадöс. И вот кысся визирыс дорöт, нёджжася öтмöдöрö. Сэсся сибöтчи вийöммес дынöдз, бöра пу сайö чеччöвтi. И как раз эта секундаö шлыч только лыйис снайперыс. Но сёрöнöв — ме пу саяс ни вöлi.

Сулала сэтöн, нёджжася. И казялi эд! Одзам сто метр ылынаын кöз вöрзьыштiс. Ах тэ, мыся, гад, вот тэ кытöн! Миян тылö, ёрдöм, пырöма, честнöй йöзöс печикалö. Ужо!

Сэк жö мöдi шырзьыштны кöз кузяс автоматiсь, но ылынöв вöлi, не судзöтны врагсö. И чужис дума: кытшöвтны сiйö да локны матöжык бöрсяняс. Сiдз и кери. Пыри тшöк кöзъяö, кокчуннез вылын вешша одзлань, пола, медбы кок увтын кöс ув эз ризьнит. И вот локтi ыджыт кöзыс дынö. А сiя, немецыс, му вылö ни лэдзчöма, мöдiк кöз дынö мунö. Стоп, мыся, сулавны невночка колö, не повзьöтны гадöс. Сэк и ловйöн позяс кутны! И кöр немецыс локтiс мöд кöз дынас, ме чеччöвтi куст сайсянь, сöтi сылö лёнас прикладöн, мырдди винтовкасö. Немец и пикнитны эз ешты, кыдз ме кыски сапогсим пурт да швач орöтi сылiсь брючнöй ременьсö. Öнi он пышшы! Пондан котöртны, дак ылö я мунан, кöр вешьяныт пондас усьны?

Немец, кöр садясис невна, пондiс горöтлыны: «Гитлер — капут, Гитлер — капут!» Но ладно, мыся, капут дак капут. Видз вешьянтö да оськав одзам, а то и тэныт часöт жö капут кера. И вот мунö одзам фашист, здоровöй, дзик верблюд, юрсиыс гöрд кыдз шондi. Ме бöрсяняс муна, тэрмöта сiйö: «Шнель!»

Локтiм боепитаннё пунктö, висьталi ме, кыдз да мый, кора патроннэз. Сетiсö меным кык ящик. Нöбöт, шуöны, а фрицсö ми иньдамö штабö. Нет, мыся, давайте эшö куим ящик. «Кыдз тэ сымдасö нöбöтан?» — юалiсö менчим. «А вот сiдз!»

Кык ящиксö домалi ме ременьöн, кышалi немецлö пельпон вылö. Öтiк ящик сетi сылö киас, кык ящик ачым босьтi. И вот мунамö. Öт кинас немец вешьянсö видзö, мöдас цинковöй ящик. Смех менö кутö, ваксьыны охота. Немец, дзик вьючнöй животнöй, уджалö меным. Ах, славнöй дело.

Локтiм ми окоппез дынö. Сералöны боеццез, шыннялöны, а командир меным спасибо висьталiс и тшöктiс фашистсö штабö иньдыны. И вот медаль сетiсö...

Солдат волькöтыштiс наградасö долоньнас, шынньöвтiс паськыта. Степанко видзöтiс сылö чужöмас сотчан синоккезöн, тожö шыннялiс.

— А страшнöй сiя вöлi, немецыс? — юалiс сiя.

— Здоровöй вöлi лешачина, да мый сыись повнытö? Немец, кöр тэ сыись он пов, ачыс тэись, кыдз биись, полö. Сэтшöм сылöн паршивöй натура. Öнi, кöр Сталинградын вурисö нiйö, сё частожык сьылöны карачун, чирзöны «Гитлер — капут!» И чожа ни локтас лун, кöр медбöрья гадлiсь пиньöвтасö юрсö. Сiдз сiя и лоас, зонка. А кыдз нö сэсся?

Степанко тöдiс этö. Чожа медбöрья фашист лоас нырыштöм, чожа чулалас война. Сэк и айыс гортö локтас. Поди, тожö не öтiк медаль сылö сетiсö, поди, тожö не öтiк немецöс ловйöн кутiс.

Мöдiс Степанко юавны, эз я солдатыс пантав война вылас сылiсь айсö, да эз ни понды. Тöдiс зонка, что кузя нюжалö фронтыс, уна сэтчин солдаттэс. Кысь тэ каждöйсö панталан?

А кытшöм вöлi охота кывны айыс йылiсь добрöй юöр!

А кытшöм вöлi охота пантавны сiйö!

Но да ладно — лоас и миян улицаын праздник. Чожа лоас победа.

«ОРС — И БАСНИ АБУ!»

Быд коми морт, кöть грамотнöй сiя или неграмотнöй, тöдö öтiк аслас поэтлiсь сэтшöм строкаэз:

Тыри-ёр, тыри-ёр, Эм деревня Косогор...

Тöдiс энö строчкаэсö и Степанко. Но одзжык пыр мылякö думайтлiс, что поэт гижис просто сiдз: пырис мыйкö юрас — и гижис.

А талун, кöр петiс Юрлинскöй волокись, сiя казялiс: быль эм сэтшöм деревня — Косогор, кыдз туйдорся столб вылын гижöма. Деревня саяс керöс эм. И тожö, натьтö, Косогорöн шусьö.

Дзарнитiс Степанко эта керöс вылö улiсянь — и сьöлöмыс ёткöп мунiс. Крут керöсыс, кузь. Кыдз сы вылö каян? Сырчик и ровнöй туй кузя öдва коккесö вешталö, а сэтöн Косогор, страшнöй керöс.

Шондi важын койыштiс медбöрья югöррез, водiс шоччисьны. Но öтöрын вöлi югыт: небоын бöра дюттясис тöлiсь, öшалiс самöй керöс йыв вылын, и Степанколö кажитчис: мезмас сiя аслас местаись и тарöвтчас крут керöсыс кузя улö, зонка коккез дынö.

Неылын туй дынсянь, деревняыс конецын, ыджыт пожум увтын сералiсö нывкаэз, сэтöн жö кылiс гармоння шы. Степанко кывзiс гармоннясö, старайтчис вежöртны, мый сiя орсö, но вежöртны нем эз позь: гармонист вöлi пельтöм я мый я, сы киын баян лэдзалiс только кижган шыэз. Пики-вики, пики-вики-на, вики, пики-вики-дбрунь — вот и быдöс мелодия. Но нывкаэз сёравно мыйкö сьылiсö, сералiсö.

Кöр Сырчик ровняйтчис пожумыскöт, сразу жö кортöг сувтчис. Сiя чуть я не муöдз öшöтiс юрсö, нельки эз и дзарнит керöсыслань. Мый видзöтны сы вылö, кöр тöдан, что сёравно не кайны?

Да, не кайны. Кöть и етша талун мунiс Сырчик, а пымалiс сiдз, что кыз вежкодь быг вевттис сылiсь боккесö, кынöмсö, мороссö. Вöв мыдзис. И не мунны тожö оз туй. Если сiдз мунны и одзлань, то Кудымкарö локтан только недель бöртi, öштан уна золотöй луннэз, как раз сiйö кадсö, кöр колö гöрны пар. А кыдз мунан чожжыка? Кыдз кайны эта ёрдöм Косогор вылö? И мыйлö природа чужтiс сэтшöм керöссэсö, и мыйлö колö кайны сьöкыт грузöн сэтшöм быд керöс вылö, кöр унаись буржык бы вöлi сьöкыт грузнас лэдзчыны улö?

Может, бöра вöтасö армияö мунiсь колхозниккез, отсаласö Степанколö? Может, кинкö пантасяс добрöй морт, отсалас бур советöн?

Но ыджыт туй вöлi пустöй. Не одзын, не бöрын некин эз тыдав. Только пожумыс увтын гырскис-пилитiс баян, кажитчö, мöдiс пöрöтны пусö. Пики-вики, пики-вики-на...

Дугды, эн жевгы, гармоння!

Саясь кымöррез сайö, тöлiсь, эн югьяв небоас: Степанколö гажтöм!

Тарöвтчы, ёрдöм керöс, вакрамешö, мун тартарыö, вöй муас!..

Сьöкыт мортлö, кöр сiя öткöн мунö туйö сувтöм вöлöн. Не одзлань, не бöрлань. Кöть вод да кув.

А нывкаэзлö вöлi гажа. Нiя сьылiсö кытшöмкö песня, кивзiсö. И Степанколö лоис охота босьтны плеть, локны ны дынö да быд вынiсь пöвсавны спинаэзнысö вирöдз: эд вежмасьö, лёквиррез, эд сьылö, кöр мортлöн горесянь потласьö сьöлöм и охота горзыны.

И сэтöн вдруг сылö усис тöдвылас, кыдз сiя и ачыс орслiс гармонняöн, этшöм жö тöлiся рыттэзö гажöтлiс лобановскöй нывкаэзöс, дырöн эз сетлы узьны пöрись йöзлö. Кöр эта вöлi? Ох, важын ни, öддьöн важын. Но быдöс бурыс да гажаыс, быдöс сiя, мый вöлi война вотöдз, сiдз и пыкнитiс-öзйис сьöлöмын, сiдз и тыртыштiс быдöс морос. А мый, если мунны гажöтчиссес дынö, босьтны киö гармоння да и орсны, кыдз вöвлi одзжык? Талун эд семик, а семик рытö томмес вексö гажöтчöны.

Дак мунны али не мунны?

Эх, кöть мый ло! Йöз дын гажажык...

Степанко кежöтiс вöвсö канава сайö, юскис, лэдзис Сырчикöс йирсьыны, сюйыштiс плетьсö брезент увтö. «Локта и рявкнита горöн: здорово, ягöдтуссез! Сiдз и шуа веськыта: давайте öтлаын гажöтчыны!» — решитiс Степанко. Только тöдiс — оз сылöн сiдз шогмы, полiсь сiя мортыс, стеснительнöй. Но да ладно, видзöтам, мый петас...

Киэсö бöрö тэчöмöн, пöлiнясьöмöн, кыдз беззаботнöй ухарь, Степанко оськалiс пожум дынö. Кöр сiя сибöтчис матöжык, то казялiс: нывкаэз гажöтчöны не öтнаныс. Кыз колода вылын, самöй пожум увтас, пукалiсö кынымкö зоночка, кынымкö пöрись ни инька и векнитик, важын ни бриттöм чужöма мужичок, öт кокас сылöн вöлi ыджыт нинкöм, мöдас — путор. Пукалiс сэтöн и гöгрöса чужöма, вышивайтöм кофтаа нылочка и видзис киас баян. Нёль нето вит кыным нывка, öтамöд бердö кутчисьöмöн, ветлiсö кругöн и сьылiсö кузь коми песня:

Зон-зон, коми ныввез, Зон-зон, мича ныввез, Кынмалöма...

Нылочка-гармонист первöй казялiс локтiсьсö, сэк жö дугдiс орсны, горöтчис силькан кодь голосöн:

— Ой, нылiньöйез, видзöтö: эшö кавалер!

— Чур, чур, менам сiя! — шыасис мöдiк нывка.

Степанко кылiс, кыдз дзирыт вир чепöссис перво öт рожабанас, сыбöрын и мöдас. Охота вöлi бергöтчыны бöр и котöртны аслас телега дынö, но вöлi сёр ни. Нылочкаэз, дзик нiя некöр абу адззылöмась зонкаöс, ыджыт любопытствоöн видзöтiсö сы вылö, а пуовöй кока мужикыс вешшис невна бокö и тшöктiс пуксьыны ордчöн.

— Кытiсь тэ и кытчö мунан, роч акань? — юалiс сiя. — Кыдз тэнö шуöны, жöник?

Кöть вöлi нелöсьыт, но Степанко пуксис ордчöн, сьöрсьöн-бöрсьöн висьталiс, кин сiя и кытiсь, медбöрын юöртiс, что кыскö военнöй груз и — вот беда! — сувтiс вöлыс, а сэтöн, кыдз нарошно, ыджыт керöс, кöдö, конечно, не кайны вöлыслö.

— Пожалуй, не кайны, — согласитчис мужикыс. — Шучкöп ни ёрдöм миян керöсным, прокленитöм нач. Одзжык, кöр эшö ветлiсö машинаэз, дак чуть да бöра кывсис: шофёр берездасьöма, авария керöма. А öнi ямщиккез маитчöны, вöввезлiсь медбöрья жилаэз орöтöны. Да, сувтöм вöлöн сы вылö не кайны.

Мужичок, тыдалö, талун тожö вöлöма семик вылын, юыштöм тагья ырöш, а поди, и аскур пешлiс: баитiс сiя орöттöг, кокнита. Кöть Степанко эз и кор, а морт юöртiс:

— А менö шуисö татöн одзжык Коктöм Сергаöн, а öнi — Сергей Платоновичöн. Да. Этö сiйöн, мыля ме татöн часöт председатель. А одзжык рядовöй вöлi. Вот эд кыдз, батя, вермас шогмыны. А? И вот, зонка, талун ми празднуйтны öдззим. Хи-хи... тöвбыт шоччисьтöг уджалiм: то вöрын, то станцияö сю кыскалiмö. А сэсся — сев. Бöра ой и лун — кöть и узьны эн водлы. Но, слава богу, чулöтiм севсö аскадö, талун картов садитсис. И вот решитiм невна шоччисьыштны. Сетiм йöзыслö невна пизёк, куканьöс начкылiм — и праздник. Шоччисьыштны тожö колö.

Степанко согласитчис. Шоччисьны, конечно, колö. Сэсся юöртiс, что и нiя севсö чулöтiсö аскадö, аскадö садитiсö картов, что öзиммез и осяэз таво бытшöмöсь, и если оз ло засуха или эшö кытшöм беда, то нянь должен быдмыны. Только вот сiя умöль: Сырчик сувтiс, öдва кок йылын öшшö, а эд кытшöм вöлi вына да чож. Ого! Степанколöн айыс öтiк лунöн Кудымкарсянь гортöдз вовлöм. А часöт сувтiс. А одзын эшö Косогор.

Сергей Платонович гогинялiс юрöн, но эз горöтчы: «Отсалам». Сiя эз горöтчы этö, кöть Степанко нарошно пондöтiс сувтöм вöв йылiсь баснисö. Председатель мыйкö думайтiс. А нывкаэз бöра нюжöтiсö сiйö песнясö, кöдö эз ештö кончитны одзжык. Гармоння бöра лэдзис аслас мехись «пики-вики-на», ружтiс гажтöма.

— Вот сiдз, зонка, и олам. Праздник лöсьöтiм, а гармонист абу. Кылан, кыдз орсö? Ох-хо-хо... И смех и грех, öтiк гармонист деревняаным эз кольччы. А гармонисттöг кытшöм праздник? Нельки и пизьыс оз отсав...

— Гармоннятöг некыдз оз позь. Ме вот сё жалейта, мыля баян сьöрам эг босьт. Кöр пукалан телегаын да орсан баянöн, сэк и мыдз вöв йöктöмöн мунö.

Энö кыввесö Степанко висьталiс не ассис, сiдз баитлiс кöркö сылöн айыс — тожö неумöль гармоньщик. Да, не ассис кыввесö висьталiс Степанко, а инмис самöй точкаö. Сергей Платонович сiдз и сувтöтiс зонка вылö синнэсö, а пуовöй кокыс кынымиськö бут-бут керис му кузя.

— Дак тэ гармоньщик?! Ах тэ, роч акань! Ах тэ, икота! Дак мый нö сразу эн висьтав? Да тэ жö... Ох! Маруська, эй, малинтусь! Маруська, мыся! Дугды ни пилитны арттöмсö. Вай, ноко, гармоннятö! Неыджыт мыгöра, вöснитик и лапытик нылочка сетiс гармоннясö председательыслö, стыдитчöмöн шынньöвтiс Степанколö.

— Тэ кужан орсны? — юалiс силькан голоснас.

Зонка эз ешты шуны нем: председатель сюйыштiс ни сы киö гармоння.

— Давай, орс! Орс, сотана, гажöт нывкаэсö!

«Эх, кытшöм тэ, — думайтыштiс Степанко. — Ноко видзöтам, мый тэ одзлань висьталан».

— Кытшöм орсöм, кöр вöлö сувтiс? Бедаö шедi да...

— Орс — и басни абу! — рявкнитiс председатель. — Тэ эшö мый? «Вöв сувтiс, вöв сувтiс!» Кинлöн сiя вöлыс? Колхознöй. Кинлö няньсö кыскан? Солдаттэзлö. Кöбы аслыт — дак мöдiк вопрос. А то военнöй дело керан, государственнöйö. Неужто ог отсалö? Отсалам. Тэ только орс. Чарöт сiдз, ась говкыс веськыта Гитлерлö пеляс пуктö. Ась, сотана, тöдö, кыдз ми гажöтчам. Сiя, пон гöн, думайтö, что нырыштiс миянöс. Кыдз бы не сiдз! Орс — и басни абу. Гажöт нывкаэсö. Нiя, дружок, кöр гажöтчасö, дак буржыка уджалöны. Вежöртiн? Политическöй делоыс...

Степанко босьтiс гармоння, перво полöмöн моз, мед не срамитчыны, пешлiс бассэз, юрсö мех весьтö пöлiньтöмöн, кывзiс быдöс голоссэз. Баян вöлi важ ни, прокод олöм постояннöй хозяинтöг, мехыс быдöс шоркйиссьöм, но голоссэс абу дзугсьöмась, орсны сiйöн позис. Председатель, инькаэс, быдöс зонкаэс и нывкаэс видзöтiсö Степанко вылö, дзик колдун вылö, ыджыт надеяöн вöджжисö сы чуннез сьöрын. И только сэк, кöр том гармонист быд вынiсь нюжöтiс мехсö и сыись пондiс визывтны тöдса, быдöнлö роднöй мелодия, нывкаэс кокнита ловзисисö. Гармоння дзик сьылiс:

Кытчö тiйö мунатö,

Мыля миянöс колятö?

Кыдз ми пондам овнытö,

Ойлунсö чулöтнытö?

Степанколö вöлi гажа, и сiя орсiс гажа песня.

Гажа песнясянь быдöнлö гажа... Орс, баян, сьылöт Косогорись отирöс...

И не только нывкаэз, а и нiя пöриськодь ни инькаэс, кöдна öнöдз пукалiсö юррез öшöтöмöн, вдруг кыдзкö трекнитiсö пельпоннэзöн, лэбтiсö юррез, кокнита ловзисисö. Нiя öтiк öмись нюжöтiсö песнясö, и туманöн вевттьöм видззез весьтöт, деревня сайись вöрöт пондiсö уйны басöк шыэз. Нiя вольнöй каёккезöн лэбзисö крут керöсланьö, падмывлiсö сы бердö и гажöна локтiсö бöр пожум увтö, öтлаасисö виль шыэзкöт и гардсисö тшакыльö. Председательöс пöдтiсö дивуйтчöмöн, гажöтчöм и эшö кытшöмкö невежöртана чувствоэз, и сiя дугдывтöг öт кинас клопöтiс Степанко пельпон кузя, а мöднас аслас пидзöс кузя, и сё ошкис гармонистöс:

— От, сотана, от, роч акань! Орс, зонка, орс. Ась ёрдöм Гитлер, юртöм пон, виньдас и нюжалас, кыдз упадь!

И Степанко орсiс. Сiя орсiс öтiк мелодия, сэсся мöдiкö. Нывкаэз басöка сьылiсö, а сiя, кöдö шуисö Маруськаöн, орöттöг видзöтiс то орсiсьыс чужöмö, то сы чуннез вылö, кöдна сiдз и йöктiсö-чеччалiсö клавишшез кузя. Сы видзöтöмсянь Степанколö вöлi недолыт, и сiя пиньöвтiс юрсö мехыс весьтö, кунис синнэсö. А чуннес сё чеччалiсö и чеччалiсö, быдöс деревня тырис зыкöн. Кытöнкö дзуркнитiс ворота, йиркнитiс кинлöнкö керку ыбöс. Быд керкуись петiсö старухаэз да стариккез, локтiсö пожум дынö.

Этшöм гажа — кыдз не петны!

Локтiс, бедь вылö нырыштсьöмöн, öддьöн ни пöрись старуха, пелитчис йöзыс коласö, юалiс тэрмасьöмöн:

— Кин, кин орсö? О господи, не Иванушкоö ли бертiс? Сiя, сьöлöмшöриньöй, только этадз-ту орслiс. О господи, господи! Сiдзкö, сораси ме?

— Сорасин, бабушка, сорасин, — висьталiс председатель. — Этö лобановскöй зимогор мунö туйö. Степанöн шуöны.

Старуха совсем не аскадö пернапасалiс перво ассис кымöссö, сэсся благословитiс Степанкоöс и чуть я не чибу-чаньöн бöр мунiс гортас.

Степанко бöра кунис синнэсö, пöлiньтiс юрсö и пондöтiс виль мелодия. И бöра гармоння дзик сьылiс:

Расцветали яблони и груши,

Поплыли туманы над рекой.

Выходила на берег Катюша,

На высокий берег, на крутой...

Эта песняыс вöлi быдöнлö сьöлöмви, сiйö тöдiс быдыс, и быдыс сьылiс нюжвыла, задушевнöя, кыдз и колiс сьывны этö песнясö. И мылякö уналöн мезмис моросiсь ыш ловзисьöм, мукöдлöн петiсö синваэз. Кин тöдö, поди, этö песнясö сьывтöн ныввезлö усис тöдвылö, кыдз нiя петавлiсö зонкаэзкöт берег дорö, гажöтчисö-кольласисö, сетiсö зонкаэзлö клятва пыр и пыр любитны дзирыта, некöр не вунöтны... Кин тöдö... Натьтö, сiдз сiя и вöлi. Кытöн öнi эна зонкаэс, кыдз нылö овсьö? Ловьяöсь я нiя?

А Степанко сё орсiс и орсiс. Сiя важын ни эз босьтлы киö гармоннясö, ёна гажтöмтчис сытöг и öнi орсiс мыдзтöг, ыджыт желаннёöн. И кöр песняыс сьывсис и зонка осьтiс синнэсö, сiя вдруг казялiс, что Маруська видзöтö сы вылö кытшöмкö страннöя югьялан синнэзöн. Сразу жö, кöр казялiс, что Степанко осьтiс синнэз, Маруся бергöтчыштiс бокö, öшöтыштiс чочком чышьяна юрсö. Степанко сiдз и пыкнитiс быдöс и чожжык кунис бöр синнэсö. И только ештiс пондöтны виль мотив, сiя бöра пондiс чувствуйтны, что нылочка нет-нет да дзарьялö сылань полöмöн, стыдитчöмöн и страннöя.

Сэтшöм синнэз Степанколань дзарьялiсö первуись, и сылö вöлi öддьöн не ас сьöртi.

Ойшöр кадöдз жаритiс-орсiс Степанко, ойшöр кадöдз гажöтчисö-сьылiсö нывкаэз, деревня сайись вöрын и Косогор дынын ветлiс говк, тарласисö öтмöдöрö гора шыэз. И только сэк, кöр деревняын пондiсö китсасьны петуххез, председатель висьталiс горöн:

— Шабаш! Гажöтчим невна — и тырмас. Ашын уджавны колö.

Нывкаэз сiдз и паймыштiсö, öтамöдöс одзалöмöн пондiсö кеймисьны председательлö:

— Сергей Платонович! Да тэ мый!

— Сергей Платонович! Ми жö эг на и йöктö...

— А, лешак тiянкöт! Йöктö кöть асылöдз, изö кульпизьсö. Степанко, орс, сотана, йöктöт нывкаэсö.

— Степанко, орс, — шуис и Маруська. — Мыйкö кокнитö-кокнитö...

«Но если тэ коран, то ковсяс орсны, — думайтыштiс Степанко. — Только мый? Кытшöмö сэтшöмö кокнитö?»

Олiс кöркö Лобанын интереснöй мужик. Будденнезö сiя ой и лун вурис отирлö пассез, дубитiс кучиккез да талис ной, а быд праздник коста садь быртöдз ювлiс вина и сьывлiс прокод öтiк частушка:

Лешачика тэ, проклённöй тэ мужик, Коксö лэбтöм да по улице бежит.

И быдпырся эна кыввез бöрын сiя вылына лэбтылiс öт коксö и лöсьöтчывлiс котöртны деревняыс шöрöт и быдпырся, конечно, усьлiс нятьö нето лымö, кытöн и узьлiс асъяпонöдз чöскыт онöн. Саймöтны и лэбтыны сiйö эз вермы некин: весыс мужиклöн вöлi кыкьямыс пуд. Не орсны я сылiсь песнясö? Как раз йöктöтны позьö, камаринскöй вылö лöсялö.

Степанко нюжöтiс мех, рявкнитiсö базаннэз. Нывкаэз петiсö кругö и ножö изны кульпизьсö! Нiя бергалiсö, öксьывлiсö кытшö, «масьтiсö тусь», сьылiсö частушкаэз. И кыным чожажык орсiс баян, сыным ёнжыка кышöтiсö нинкöммез, буткöтiсö каблуккез. А Маруська пуктiс киэсö кадж вылас да сiдз и чылiс, кыдз ур, Степанко одзöт, шыннялiс счастливöя, загадочнöя. Эз вермы öшшыны местаас председатель, тожö петiс кругö, шовкнитiс оча ки долонь и давай гарйыны мусö пуовöй кокнас, öтiк кыз нывка сэтчöдз ылалiс, что öдззис йöктыны зонка моз присядкаöн, но, конечно, нем эз пет: юбка подулыс вöлi векнитöв, коккес гардчисö и, киэсö рака борддэз моз паськöтöмöн, нывка брякнитчис шульга бок вылас.

— Во, правильно, Öксинь! — шуис председатель. — Öнi чеччы да эшö веськыт бок вылат камгись!

Шуткаэз, смех. Сiйöн сорöн и янсöтчисö косогорскöй нывкаэз горттэзö, баитiсö Степанколö спасибо, корисö кежавны эшö. Маруська, кöр локтiс босьтны баянсö, шуис ыш ловзисьöмöн:

— Кыдз тэ орсан, Степанко, ой!

Эта коста сiя сэтшöм лажмыта мышкыртчис Степанко весьтö, что нельки павкöтчис чышьян увтiсь петöм юрси тылöппезöн зонкаыс чужöмö.

Председатель дзирыта жмитiс Степанколiсь кисö, висьталiс тожö спасибо и рочалiс гортас панявны шыд да сёйны тупöссез. Степанко, конечно, эз откажитчы. И кынымкö минута бöртi зонка пукалiс ни пызан сайын ордчöн председателькöт, панялiс яя шыд, не тэрмасьöмöн, кыдз и колö быд гöсьлö, сёйис небытик тупöссез, юис йöв.

— Бура тэ орсан, öддьöн бура, — баитiс хозяин. — Локтiн бы миян колхозö овнытö, а? Ме бы тэныт, зонка, медкокнитö уджсö сетi, вердны бы пондiм медбура.

— Не, эта оз лöсяв, — веськыта шуис Степанко. — Кыдз позьö гортiсь мунны?

И сылö усис тöдвылас мамыс, усисö воныс да сойыс. Мый нiя часöт керöны, кыдз ни олöны? Эх, жаль, ылынöсь часöт Санко да Симка. Вот бы пуксьöтны нiйö эта пызан сайö, вот бы гардiсö тупöссесö!

Дата добавления: 2015-11-16