Кузь верстаэз и бабка степанида

Шондi эшö нежитчис кытöнкö вöр пыдöсын, видззез весьтын путриктiс туман, а Степанко вöлi ни кок йылын. Саймис сiя талун не ачыс: сiйö саймöтiс Сергей Платонович.

— Дырöв узян, мужик! Öнi самöй раз муннытö: ыркыт, лöдззез оз на курччасьö, — баитiс сiя. — Кыв менам чорыт. Кыдз висьталi, сiдз и кера. Чапкам телегатö керöс саяс.

Сiя доддялiс пара вöв, рявкнитiс ош моз и пуксис телегаö. Вöввез вöлiсö тожö моритöмöсь, но местасянь босьтiсö дружнöй шаг, шакардаöн петiсö ыджыт туй вылö. Степанко нуöтiс Сырчикöс поводöт. Сiя, кöть и шоччисис вель дыр, öдва вöрöтiс коккесö.

Керöс вöлi крут и öддьöн кузь. Сергей Платонович зэгйис вожжи, тэрмöтiс вöввесö. Кык мерин, горбыльтчöмöн, жагöник кайисö и кайисö вывлань, кыскисö сьöкыт телега. Степанко дзарьялiс öтмöдöрö и бöра думайтiс, что Сырчиклö некöр бы вöлi не кайöтны грузсö. Кытшöм бур, что пантасис добрöй морткöт, кытшöм бур, что отсалöны Степанколö.

Кöр телега вöлi самöй керöс йылас, Сергей Платонович висьталiс:

— Но вот и быдöс. А тэ тöждiсин. Тöждiсьны, зонка, оз ков. Тэ видзсьы матынжык йöз дынын. Йöзыс отсалас. А часöт доддяв воронкотö да шыбыльт. Кытчöдз ыркыт, Белоев сайöдз мунан. Сэтчин шоччöтан вöвтö и рыт гöгöрас лоан Кудымкарын. Вот сiдз, а часöт — адззисьлытöдз. Бöр мунтöн кежав.

Степанко висьталiс добрöй мортлö быдöс понда ыджыт спасибо. И нiя янсöтчисö.

Туй эстöн вöлi волькыт, лэдзчис мыс увтö. Сырчик жагöник буткöтiс коккезöн, дзуртiс телега. Степанко пöрччалiс нинкöммез, чапкис öн увтö. И вдруг сiя казялiс öн увтсис кытшöмкö кöзичка. Кысь сiя? Судзöтiс Степанко кöзичкасö, пöрччалiс дрöжитана киэзöн, а сэтöн пöжалöм картовкаэз, рисьтупöссез, джын ярушник нянь. Ух тэ! Кысянь эта доброыс?

Степанко перво нельки повзис: «Эг я гусяв узьтöнням кинлiськö?» Но кöзичка пыдöсiсь кыскис учöтик чышьянок, и быдöс лоис вежöртана. Чышьянок пельöсын вöлi вышивайтöма кыв: «Маруська». Мыйкö дзирыт да бытшöм муныштiс Степанко сьöлöмöт, пыкнитiс быдöс чужöм, коккез пиньöвтчисö. И эшö ёнжыка öшис сiя, кöр кöзичкасис жö кыскис школьнöй тетрадись нетшкöвтöм листок. Листок вылын вöлi гижöма басöк почеркöн: «Степанко, бöбöв! Мыля мунiн председателькöт, а не мекöт? Ме бы тэнö ырöшöн гöститöтi и шаньгаэзöн. Бöр мунтöн обязательно кежав. Ме ола самöй туй дорас. Маруся».

Вот тэныт и на!

Кутчись эта Марусякöт, дак сэсся, пожалуй, и мамтö вунöтан. Вот шпингалет! Но и павкас сылö мамыссянь, кöр казялас öшöм добросö...

Степанко дыр думайтiс, кытчö сылö воштыны чышьяноксö, мый керны записканас. Нiя мылякö сотiсö киэз, и охота вöлi чожжык чапкыны кусттэз сайö канаваö, но керны сiдз эз вермы — вöлi мыйкö жаль — и тэрмасьöмöн сюйыштiс нiйö аслас вешьян карманö.

Син одзын перво кöвьясис туман. Сэсся жагöник петiс тумансис Марусялöн мича чужöмыс, шынньöвтiс Степанколö хитрöя и задорнöя, макнитiс кинас.

«А мый, если былись кежавны бöр мунтöн?» — мелькнитiс юрын. Но зонка сэк жö вашöтiс этö думасö дыв. Оз лöсяв. Эх, кöбы буржык паськöм, кöбы кöть базарскöй йöрнöс-вешьян! Сэк бы позис. Но Степанколöн паськöмокыс вöлi куш дöмас, и мунны сэтшöм мöдöтчанöн гöститны тöдтöм басöк нывка дынö, конечно, öтiк позор.

Эх, кöбы не война!

Степанко пыдына ыш ловзисис, чеччöвтiс канава сайö, подöн ветлöтан туёк вылö, быд вынiсь шовкнитiс плетьöн. Зонка мöдiс повзьöтны Сырчикöс, но вöв и пельöн эз вöрзьöт. Вöв эз думайт содтыны оськöввез, мунiс паддялöмöн и, кöть туй лэдзчис мысок увтö, сiя чуть да и бöра сувтчывлiс шоччисьны.

Верстаэз, верстаэз... Кытшöм нiя кузьöсь! Локтан öтiк верстовöй столб дынö, дзарнитан цифра вылö, лыддян-керан, а Кудымкарöдз сё эшö ылын.

Верстаэз, верстаэз... öтiк, кык, куим...

Быд верстовöй столб бöрын пантасьöны учöтик столбоккез. Быд столбок вылын тöдчöны тожö цифраэз. Мунан öтiк дынсянь мöдiк дынöдз — бöра сто метр кольччис бöрö.

Рознитчис ыббез весьтiсь туман, калькалiс пу йыввез бердiсь шондi, туй дорись расокын öдззисö чивзыны беззаботнöй каёккез. Пондöтчис виль лун. Кынымöт ни эта луныс, кыдз Степанко петiс туяс? Нёльöт я мый я?

Усис тöдвылö пöрись почтальон, горе и радость новйöтiсь. Кытöн сiя öнi? Сетiс я Пиля моньлö страшнöй письмосö? Если сетiс, то Пиля моньлöн сё эшö синваэс, натьтö, эзö косьмö. Горе, горе...

Усис тöдвылö Першин Иван — бур пöрись морт. Кыдз ни сiя кадсö чулöтö? Поди, бöра кинöскö вердö аслас добрöй капустаöн и радуйтчö быдöс сьöлöмсянь. Интересно, кватитчис эз сылöн старухаыс, что жöникыс чинтiс невна запассö? Если кватитчис, то павкис, натьтö, Иванушколö. Жаль...

А кытöн часöт добрöй вöралiсь Васей Петрович? Поди, узьö эшö больничнöй койка вылын, веськöтö мороссö? Кöть бы веськалiс старичок. Бур сiя мортыс, öддьöн добрöй. И ранитöм солдатыс тожö бытшöм. Натьтö, локтiс ни гортас, панталiс ассис хозяйкасö да челядьсö. Вот, натьтö, радуйтчисö...

Да, уна коми му вылын бытшöм отирыс. Вот и эта Маруська... Эх!

Степанко кыскис карманiсь запискасö, лыддьöтiс öтпыр, мöдöтпыр, бöра мыйкö дзирыт да бытшöм муныштiс моросöт. Жаль, сюрас нывкалö мамыссянь, кöр тöдас, кытчö нылыс воштiс добросö. А поди, оз вартлы? Кин тöдö...

Верстаэз, верстаэз... Кузьöсь нiя, сьöкытöсь. Вöвлöн быдöс вывтырыс вевттисис быгöн, спина весьтас кöвьясьö пар. Сё жагöнжык и жагöнжык вöрöтö коккезöн Сырчик, юрсö öшöтiс чуть я не муöдз, мунö шатласьöмöн, кыдз код мужик: пöльтыштас вынажык тöв — пöрöтас. Степанко локтiс сы дынö, волькöтыштiс боксö. Ки долонь сiдз и сибдiс гöнас, лякасис, дзик клейö. Вöв дынын лэбалiсö гырись лöдззез, кытшöмкö нахальнöй гуттэз, сiдз и норовитiсö мöртчыны вöв кучикö, чупкыны сылiсь медбöрья вир.

— Сырчик, Сырчик! Эн чинт оськöвветö, — баитiс Степанко. — Чожа посад. Чожа ме юска тэнö и пондам сёйны.

И, медбы кöть невна содтiс вöлыс оськöввесö, зоночка бöра шовкнитiс плетьöн, шутньöвтiс горöн. Но вöв бытьтö нем эз и кыв, эз трекнит юрöн, эз вöрзьöт пельöн. Мöднёж, сiя пондiс оськавны эшö жагöнжыка, и, боксянь видзöттöн, эз позь вежöртны, мунö я сiя или жöдзö местаас.

Öтiк лягаö лэдзчикö Сырчик джöмдiс и шогмис сiя, мый эта вöвкöт эз шогмывлы некöр: усьлiс пидзöссэз вылö, кыдз баитöны мужиккез — сетiс туйыслö поклон. Степанколöн сiдз и ёкнитiс сьöлöмыс. Зонка думайтiс, что Сырчик вот-вот совсем усяс и сэсся оз ни вермы чеччыны. Но вöв перыта чеччöвтiс бöр, невна шатласис öтмöдöрö, дзик кольмöм, и жагöник пондiс шагнявны одзлань. Сiя öктiс медбöрья выноксö, трекнитiс ыджыт юрнас, кыдзкö нёштöма кöрчитчис и лягаыс пыдöссянь мяркнитiс телегасö, пондiс кайны вывлань. Сiя кайис сувтчывтöг, дзик тöдiс, что если сувтчас кöть секунда кежö, то сэсся не вöрзьöтны лоас местаись телегасö.

— Сырчик, чожа посад лоас. Сырчик! Кай! — горöтiс Степанко. Кытöн сiя, посадыс? Кыным верста эшö кольччис? Степанко этö и ачыс эз тöд.

Но вот керöсок кольччис бöрö, телега бöра ёркйис ровнöй местаöт. И Сырчик бöра джöмдiс, виноватöя вöрзьöтiс пеллезöн, сэсся сувтiс и öдззис пыдына поиктыны. Степанко перво думайтiс, что вöв сувтчис öтöрасьны. Но чулалiс минута, сэсся мöдiк, чулалiс дас минута, а сiя сё сулалiс, бытьтö кынмöм. «А поди, супоньыс пöрччасис?» Кöр туйын пöрччасьлiс супонь нето аркмывлiс мöдiк кытшöмкö изъян, Сырчик прокод сувтчывлiс. Сiя вöлi умнöй вöв, сiя бура тöдiс, что пöрччасьöм супоньöн мунны оз туй, и видзчисьлiс, кöр хозяиныс лöсьöтас-арталас быдöс. Но часöт нем сэтшöмыс эз аркмы, супонь и чересседельник вöлiсö дрын-дрын домалöмась, а вöв сулалiс.

Степанко локтiс сы дынö, лöсьöтiс шлея, кöда вöлi невна лэдзчисьöма öт бокас, сюйыштiс кисö сийöс коласö, малалiс вöвлiсь пельпоннэсö. Зонка кылiс, кыдз вöвлöн вартчис сьöлöмыс — бут, бут, бут! — кылiс, кыдз вöрис каждöй жила и мускул, и вежöртiс, что Сырчик сэсся не отсасись. Öнi сiйö кöть вий, а оз вöрзьы местасис, кытчöдз он шоччöт и он верд пöттöдз бур турунöн.

Весь баитiс добрöй морт косогорскöй председатель, что Степанко ыркытнас некой пору муныштас Белоев сайöдз. Весь баитiс сiя, что рытнас Степанко лоас Кудымкарын. Нет, не адззывны, тыдалö, талун Кудымкарсö. Кин сылö эстöн отсалас?

Шондi, эн кой ассит югöрретö, саясь кымöррез сайö!

Дугды, эн сьыв гора песнятö, ыбшар!

Югыт и гажа вöлi паськыт мирыс, вольнöя ымралiс* кокнитик тöлок, пежьялiсö ыб вылын осяэз, турунын чирскисö кöбывкаэз, ас моз славитiсö гожумся олан. Небоын, самöй юр весьтын, шумитiс ыбшар. Сiя тюрликайтiс öтiк местаын, дугдывтöг койис му вылö серебрянöй шыэз. А Степанко, кöда одзжык быдса чассэзöн вермывлiс кывзыны ыбшарсö, видзöтны, кыдз сiя дюттясьö небоын, конецтöм лöз океанын, часöт сулалiс сувтöм вöв дынын и эз кыв нем. Сiя думайтiс, мый керны одзлань, кыдз мунны Кудымкарöдз да сетны грузсö Заготзерноö. Сiя думайтiс дыр, но юр уджалiс умöля и бурыс, конечно, нем эз сод.

Эх, мыйлö сiя вöрзис эта сьöкыт туйö сувтöм вöлöн! Мыйлö сiйö иньдiс председатель?

Кытöн часöт Митюбаран? Поди, важын локтiс Кудымкарö, сетiс ни анькытшсö приёмщиклö и часöт узьö кытöнкö ыркытiнын. Сылö и дело абу Степанко дынöдз. Но, ужо, пантасяс, неморт. Степанко висьталас сылö öтiк кыв, сэтшöм кыв, кöдасянь Митюбаранлöн синнэс кылаласö. И эшö сьöвзяс сылö стыдтöм рожаас — вот тэныт, срамник! Примит, мый заслужитiн. Разь позьö ёртöс кольны туйын, а?

Пантасяс кö Митюбаран талун, Степанко мырддяс сылiсь Лысанкосö, доддялас аслас телегаö и ветлас Кудымкарöдз. А Митюбаран ась пукалö эстöн туй дорас, дозирайтö Сырчикöс. Да, Степанко сiдз и керас, кöр Митюбаран шедас сылö паныт. А вдруг сiя орддис ни Степанкоöс и часöт пöльтö гортö кытöнкö Юрла дынын? Эта вермас лоны. Узис талун Степанкоыс Косогор дынын öддьöн крепыта. Митюбаран эта коста вермис орддьыны сiйö, мунны казявтöг. Если сiдз, то делоыс нач ни умöль. Сэтшöм умöль — нем вылö оз туй.

Мый сёдаки керны? Может, юскыны Сырчикöс и лэдзны туй дорас? Позяс и клевер невна летны. Вон сiя, совсем неылын лöзöтö.

Кокнитика орсöмöн лэбзис телега весьтöт кытшöмкö учöтик каёк, тыдалö, мöдiс пуксьыны мешöккез вылö и невна кокасьны, но казялiс Степанкоöс и чуйнитiс небоö. Сьöкыта борддэзöн öвтiкö лэбзис матi пöрись кыз рака, пуксис телеграфнöй столб вылö, шовкнитiс борддэзнас и давай карзыны: кар, кар! «У, лёквир, тэнö только и корисö!» — лöгасис Степанко и свистнитiс ракалö галяöн. Нёштöм кай усьыштiс перво улö, сэсся дыша лэбзис мöдiк столб вылö, тыдалö, думайтiс: лоас пир, эта вöлок чожа пезьдас ни...

Сырчик, умнöй вöв, тыдалö, вежöртiс ракалiсь думаэсö: швычнитiс бöжöн, буткис кокнас — ме эшö ловья! Степанко трекнитiс вожжиöн, öвтыштiс плетьöн. И — о чудо! — Сырчик вöрзис. Шоччöтыштiс ловсö, поиктыштiс невна — и вöрзис! Неохота, видно, медбы нёштöм рака гарйис синнэсö, кокалiс яйсö.

Сiдз я не я вöлi делоыс, а верста мымда Сырчик оськалiс ровнöя, сувтчывтöг. Дзарнитiс Степанко одзас, а посадыс сэтöн и эм. Кык километр лоас, не унажык. Вон гажöтчö сiя ю дорын, нежитчö саддэз коласын. Ылiсянь тöдчö — богатöй посадыс кöркö вöлöма: керкуэз басöкöсь, ыджытöсь, краситöм крышаэз свиттялöны, вичку, тыдалö, эм — колокольняыс саддэзся вылынжык, гöрд краскаöн краситöм, и тожö пежьялö шондi югöррез увтын.

Поди, и öнi, эна сьöкыт военнöй годдэзö, олö Белоевыс богата? Вермас эд сiдз лоны: кöркö, урожайнöй годдэзö, нянь быдмис уна, колхозниккез видзисö сiйö назапас, а кыдз пондöтчис войнаыс, нiя няньсö пондiсö сёйны берегитöмöн, экономнöя, и тырмöтчисö öнöдз, эта сьöкыт гожумöдз. Лобанын кынымкö семья öнöдз важ нянь сёйöны, некытшöм тшыг нужда эшö эз адззылö. А татöн, поди, не кынымкö семья, а быдöс колхозыс сiдз олö. Ох-хо, чочком светас мыйыс, поди, абу...

Тэрмасис Белоев посадö Сырчик, кытшöмкö вын кыскис сiйö одзлань. Тэрмасис посадö Степанко. Тöдiс: олö сэтöн отир. Кыдз-некыдз, а отирыс дынын кокнитжык лоас. Кинкö сетас совет, кинкö мыччалас-висьталас, мый керны одзлань, видзöтан — быдöс бура да бытшöма петас. И Степанко невна ловзис эна думаэзсянь, нельки радъявны пондiс. И не только радъявны, а нельки бöбалöм могись дзарнитiс бöрлань, грöзитiс кулакнас небоö: «Эн карзы, пöрись рака, эн косяв вижлоктö: ми эшö ловьяöсь!»

Но весь öддьöнсö радъялiс. Кöр телега ёркйöмöн муныштiс пос кузя да ровняйтчис первöй керкукöт, Сырчик бöра сетiс туйыслö поклон, лажмыта копыртчис и сувтiс. И сэк Степанко пеллезö пырисö тöдса шыэз: йирк-йирк... гырк-гырк... Керкуас кинкö масьтiс гырын пистик нето пикан. Мöдiк керкуын семдалöмöн горзiс кага, куимöтын женскöй голос нёштöма ыждалiс кинкö вылын, корис отсöт.

Горе, горе...

Быдлаын öткодь оланыс.

Вон мунö посад шöрöт пöриськодь ни инька, видзö киас кöзичка. Сэтöн кöть кин вежöртас — мунö инькаыс колхознöй складö нето правленнёö корны пизёк. Инькалö паныт котöртöны кык нылочка да зоночка. Нiя вöлöмась ни складас, а кöзичкаэзныс пустöйöсь, абу сетöмась пизёксö. Öнi челядьлöн öтiк туй — мунны нюрö пиканавны.

Вот сiя керкуись, кытöн горзiс кагаыс, петiс кöсыник старичок, сулалыштiс-керис ворота дынын, кисö кымöс вылö пуктöмöн видзöтыштiс шондi вылö, сэсся иньдöтчис Степанколань.

— Городö я мый я мунан, стрижпиян? — юалiс зонкалiсь. — Э-э, да вöлыт тай чукнас мусö гарйö. Сувтöма, некö?

Степанко шы эз сет. Мый сэтöн баитны, кöр быдöс сiдз вежöртана? Старик тожö эз понды сэсся юасьны, шы сеттöг гöгöртiс вöвсö, лапкöтыштiс сылiсь коскаа спинасö, волькöтыштiс бурсисö и мыйлокö, кыдз цыган нето меновщик, дзарнитiс вöвлö öмас, сэсся синнэзас.

— Сувтöма вöлыт, нач сувтöма. Вон и тырпыс öшöтчöм, и синнэс везöн тырöмась. А сьöлöмыс сiдз буткöтö, бытьтö наковальня кузя молот. Ох-хо, беда. Не мунны сылö Кудымкарöдз, не мунны, — нюжвыла баитiс старикыс и сё жалейтöмöн видзöтiс Сырчик вылö.

— Мый жö керны меным, дедiньöй? Эд казённöйö грузсö кыска...

— А кин шуö — не казённöйö? Конечно, казённöйö. Война, зонка. Нем он кер. Сё колö уджавны. А сувтöм вöлöн ылö я мунан? Беда.

Локтiс подвода дынö Степанко годдэзся и сы кодь жö чочком юрсиа, виньöрик зонка, гöгöртiс Сырчикöс, сэсся тэчис киэсö бöрас и шуис, кыдз ыджыт морт:

— Вына вöлöма мериныс: моросыс паськыт. И корпаыс тожö.

— Вына вöлöма, — согласитчис старикыс. — Шоччöтны сiйö неделя мымда, вердны буржыка, дак уджалас эшö. Тэ, детина, юскы, пожалуй. Шоччöт.

— А грузсö кытчö вошта? Эд сiя фронтлö колö...

Старик гыжьялыштiс юрбöрсö, шуис нето аслыс, нето Степанколö:

— Керны мыйкö колас. Тэ пыралiн бы начальствоыс дынö. Висьталiн бы: сiдз и сiдз... ужо... Э-э, да вон и ачыс начальствоыс локтö. Степанида Петровна, эй, кежав ноко!

Дзарнитiс Степанко «начальствоыс» вылö — и сьöлöмыс пикнитiс: телега дынö локтiс сiя грознöй старухаыс, кöда Юрлинскöй могильникын öтiк минутаö керис Степанкоöс православнöйöн. Старуха талун кышалöма вывтас паськыт подула сарафан, юр вылас пуктöма гöрд косинка и лоöма дзик томжык, нежели тöн, кöр сы юр вылын вöлi кокошник, а вывтас сьöд шабур. Степанида Петровна казялiс Степанкоöс и тожö дивуйтчыштiс.

— А-а, этö тэ, басурманин! Сiдзкö, бöра пантасим. Вот уж былись дзескыт миянлö мирыс, некыдз янсöтчыны ог вермö. А ме адззылi тэнö ойнас Косогор дынiсь. Бура тэ узин, истово садьтöм. Мыся, бур эшö, что бандиттэз абу, а то чапкисö бы тэнö телегасит Да и нöбöтiсö анькытштö. Нем бы эн и кыв. Код я мый я вöлiн?

Степанко сiдз и барöтiс синнэсö:

— Ко-од? Да тэ мый, баба?

— Ладно, ладно! Кылi ни: пируйтöмась пö бура Косогорас. Ох-хо... И кыдз этö коктöм шарлатаныслö быдöс лöсялö, мыля сiйö сельсоветö оз корлö? А ме святöй делоöн, касьтiсьны ветлi, дак сразу — сельсоветö. Стыдитöв керис бöра предушкоыс, стенгазетас мöдö лэдзны...

— Стенгазетаö? — дивуйтчис старичокыс.

— А кытчö нö сэсся? Тэ, шуö, активистка, бригадирöн уджалан, а касьтiсьтöн ветлöтан. Но, мыся, ветлöта и ветлöта, коккезö аслам. Двадцать верста сэтчинöдз, да сымда жö бöр — эка беда! Зато жöникöс касьтылi, сьöлöмö бурмис... Ме жö православнöй, касьтiсьтöг некыдз оз позь.

Старуха-бригадир öвтыштiс кинас, дзик висьталiс: но пö тiянöс, вакрамешö! — и юалiс Степанколiсь:

— Досповна сувтiс вöлыт?

— Досповна. Паддявны пондiс.

— Пожалуй, сувтас. Этшöм жар погоддяыс. Туйыс сьöкыт. Если старикыс да зонкаыс первöй делоöн видзöтiсö вöвсö, то

Степанида Петровна перво гöгöртiс телегасö. Сiя ыджыт кирзовöй сапоггезöн чужьялiс колесоэз, пешлiс дроггез да радз, нельки передок увтö дзарнитiс.

— Кин тiян кузнецныт? — юалiс Степанколiсь. — Неужто ачыс телегаэсö керö?

— Ачыс, конечно, — шуис Степанко. — Бур миян кузнецыс, дед Миков. Любöй машина лöсьöтö, часттез ачыс дорö.

— Видзöт жö, видзöт жö! А миян — стыд и срам, öтiк кузнец абу. Телегаэз быдöс разьсисö, колесоэс киссисö — вочны некинлö, ковсис городö кыскыны. А кöр сэтчин лöсьöтасö? Ох-хо...

Сэсся дыр лöгöнмоз видзöтiс старикыс вылö, гогинялiс юрöн:

— Стыдыт эм тэнат, Евсеюшко, али абу? Мыля öнöдз гортын шатласян? Мый ме тэныт керны тшöктi? Вунöтiн? Крут Лог сайын йöр киссьöма, вочны, мыся, колö.

— Муна ни, муна, Степанидушка. Кöть косö висьö, а сёравно муна, — шуис старикыс.

— Кос висьö! Веритас кинкö. Давай шагом марш!

Евсей шы сеттöг мунiс телега дынiсь. Но старуха минута бöртi сетiс виль приказ:

— Берт! Берт, мыся, бöр! Виль дума юрам пырис.

Старичок мугтöг бертiс грознöй начальство дынö, босьтiс юр вылiсь шапка.

— Мый сэтшöмыс?

— Ашын ытшкисьны колö петны, а мыйöн петан? Косилканым виль, а ыджыт колесоыс потöма. Удерлун эшö юöртiсö: керöмась пö городас артельын виль колесо. А мыйöн сiйö ваян? Телегаэзным абу, дровниöн эд он мун. Тэ давай-ко, Евсеюшко, юскы эта басурманинлiсь вöвсö да лэдз лог дорас йирсьыны, клевер невна ытшкы. Вежöртiн я мый я? Да чожжык, чожжык! Эка тэ кытшöм. Да дозирайт вöвсö лог дорас. Мыйись-мый — тэ отвечайтан. Да йöрсö воч, эн куйлы сэтчин кынöм вылат. Ох-хо-хо...

— Есть! — бодрöя шуис Евсей. — Вöввесö ме öддьöн радейта. Быдöс кера, мый колö. Перво меринсö шоччöта, вöлись невна юктала сола ваöн, медбы аппетит вöлi, вöлись и йирсьыны лэдза. И клевероксö ытшка.

Кöд коста Степанко да старикыс юскисö вöвсö, старуха сёрнитiс чочком юрсиа зонкаыскöт.

— А тэ, пиня кыр, мыля весь шатласян? Мый, некытшöм удж абу, а?

— Да тэ вунöтiн я мый я, бабу? Ме жö сельсоветын ойбыт дежуритi. Ачыт тшöктiн.

— Но и мый, что дежуритiн? Ойнас дежуритiн, скамья вылын узин, а луннас уджавны колö. Ноко босьт сермöттэз и котöрт поскотинаö, вайöт вöвветö татчö. Кыскан зонкаыскöт анькытшсö городас. Кык кöч, позьö шуны, кутамö: анькытш лоас кыскöм и колесосö бöр локтöн ваятö. Да эшö потребсоюзö пырав, кор председательыслiсь литовкаэз. Ась кыкдас литовка сетö. Да сiдз и висьтав лысöй шарлатанлö: Степанида тётка иньдiс. Оз кö сет, шовкöта лысöй юрсö.

— Бабу, да ме жö ойбыт эг узь, он петö...

— Он петö? Значит, сiдз: ась кинкö уджалö, а ме вода узьны. Да стыдыт эм тэнат, абу? Айыт война вылын куимöт год бандиттэзкöт воюйтö, вир ассис кисьтö, поди, неделяöн ончир оз керлы, а тэ мый? Тэ, Опонась, босьт часöт жö сермöттэз и кер, мый тшöктi. А пондан кö пиньгисьны, лэдза вешьяноктö да ог и видзöт, что тэныт четырнадцать год тырис, — вирöдз пöвсала.

— Но, инмис бöра аслас молитва вылö, — бобгыштiс Опонась и, медбы не кывны, мый шуас эшö старухаыс, чожжык котöртiс сермöттэзла.

Пöрись Евсей чапкис аслас оградаö сийöс, седёлка и нуöтiс Сырчикöс кытчöкö Крут Лог дорö. Степанко гажтöма кольлалiс сiйö, мыйлöкö куньлiс синнэсö. Жаль вöлi янсöтчыны другыскöт, да мый керан. Старуха эта коста чуньнас чувйис анькытш мешöккез, хозяйскöя лöсьöтiс брезент, кöда вöлi невна лэдзчисьöма радз увтö, юалiс Степанколiсь:

— Эн вöрöт анькытшсö? То-то жö! Эн лысьт вöрзьöтны öтiк тусь. Сiя воиннэзлö колö. Лок инö пыралам миянö. Гöститöта кöть шöмйöлöн. Кынöмыт, небось, бöра шутнялö? Ох-хо-хо...

Дата добавления: 2015-11-16