КЫДЗ ШЫННЯЛÖ АПОСТОЛ 2 страница

— Бедаö шедi. Сэтшöм лёк бедаö — садь абу. И висьталiс подробнöя быдöс, мый сыкöт лоис.

— Кула, натьтö, — помалiс сiя рассказсö.

Юрий Андреевич кывзiс-керис, юрнас гогинялiс, сэсся висьталiс, что кайскöй волокын эз на кывсьывлы, медбы морт кулiс киласянь. Нельки научнöй книгаэзын сэтшöм делоэз йылiсь эз на гижлö.

— Кула, пожалуй, — ульсалöм нырнас вишкикö, кöстiс ассис Егор. — И кыдз сiя шогмыны вермис, нем ог вежöрт, кöть юрöс орöт. Эшö неважын ошöс вийны чуть я не куш киöн ветлi — и нем, лöсялiс, а сэтöн кытшöмкö срам бадь нин нырыштiс — кöть тэ мый. Греххез, греххез. Беда, батя.

Кытчöдз Кушман Егор ружтiс да ойзiс, хозяин лöсьöтiс сёйыштны: адззис залавкаись чорзьöм няньтор, пыртiс гряд вылiсь свежöй лук. Погребын лым вылын сулалiс кöньöсок. Юрий Андреевич судзöтiс сэтiсь лягуша кодь нильыг огурец и тожö вайис пызан вылö. А сэсся и четушка вина торс сувтöтiс.

— Тырмас тэныт горзыны да норасьны, — бурöтiс сiя гöсьсö. — Вот вешшы пызан дорас, пешлы менчим нянь-совсö.

— Эх, олан, олан, — сё эшö дзуртiс Егор.

Хозяин бульöтiс-кисьтiс винажугсö ыджыт алюминиевöй кружкаö. Кушман Егор дзурснитiс невночка, солиднöя кряк-кряк керис, пондiс мурскыны лук да огурец. Няньторсö тожö курччöвтiс. Сiя чожа гажмис, шынньöвтiс:

— И абу гажтöм хозяйкаыттöг? — юалiс перыта. — Адзза, кöс нянь вылын олан, нельки квасинаыт абу. И кыдз сiя, инькаыт?

— Да сё эшö некыдз, дядя, — паныт горöтчис хозяин и тожö шынньöвтiс. — Сёжö воть ог вежöрт: раз петiс кила, то колiс бы тэныт котöртны тожö районнöй больницаö, а тэ мыйлöкö Учöт Дзимбырö пыркнитöмат, вит верста ылынаö бокö инмöмат. Мыйкö не сiдз шогмö.

Егорлöн чожа дульсмисö синнэс. Нiйöн мигайтiкö, сiя подробнöя юöртiс, кыдз этö сiдз аркмис, эта коста нельки нач вунöтiс, мый закажитiс горба старухаыс — не лёбны святöй богородицалöн лик йылiсь. Быдöс, мый тöдiс Кушман Егор, висьталiс племянникыслö. И святöй ликыс йылiсь тожö. Юрий Андреевич дивуйтчöмöн видзöтiс сы вылö, кывзiс и чукралiс кымöс кучиксö.

— Сiдз, сiдз... Значит, святöй лик мыччисьöма-петöма, сiдз шуана, новоявленнöй богородица. Нёльдас год эз вöв и бöра петöм? Но, висьтась, дядя, висьтась, ме кывза.

— Куим полтинник мырддисö и тойлалiсö порог сайö. Вот локтас отец Мисаил — норася. Поди, прокленитас кыкнансö.

— Ачыс отец Мисаил?

— А кыдз инö? Кöсйисьöма пö обедня служитны. Святöй ликсö эд святитны колö. Поптöг сэтöн некыдз оз туй.

Нет, мый бы эн шу, а интереснöй делоэз шогмöны. Важын ни сэтшöмыс эз кывсьывлы, медбы шогалiсь морт котöртiс не больницаö, а пелитчис старушкаэз дынö. Важын ни новоявленнöйез йылiсь некытшöм басни эз вöвлы. А сэтöн мый инö шогмö?

— Тэ, дядя, серьёзнöя быдöс этö баитан или шутитан?

— Кытшöм шутка? Кила жö петiс! Öнджа...

— Но-но! А еныс сэтöн — кыдз? Тэ веритан сылö?

— Да мый тэныт висьтавны, — мыкталöмöн шуис Егор. — Мукöдпырся пернапасавла кымöсöс. Привычка. Томсянь юрбитны велöтiсö да. А мый баитны вера йылiсь... Кин сiйö тöдö, эм ен-батюшкоыс али абу. Вот и пернапасасьла асыввезнас да мый да. Абу эд сьöкыт. Да и умöльыс этасянь нем оз аркмы. А сэтöн сэтшöм бедаö укнитi. Не только енлö, а и сотаналö веритны пондан. Думайтышт ачыт: вон кытшöм оланыс локтiс, сьыв да ов, а меным — могилаö. Тьфу, тьфу. Бр-р!

— А еныс, еныс сэтöн мыйлö?

Нем сэсся эз горöтчы Кушман Егор. Сiя только мигайтiс гöрдöтöм синнэзнас, видзöтiс кытчöкö бокö и дугдывтöг нюжлалiс голясö, дзик джагöтiс сiйö йöрнöс сикöджыс.

— Вод и шоччисьышт невна. А ашын югдандорас иньдöтчы больницаö, сэтчин быдöс и арталасö, живо-два веськöтасö, — ольпасьö гöсьсö водтöтiкö лöгöн моз баитiс агроном. — Видзöтан, неделя бöртi йöктыны пондан. А талуння случай йылiсь некинлö эн тронгы — смехö тэнö отирыс воштас. Позоритчан век кежö аслат килаöн.

Минута бöртi Кушман Егор, бытьтö нем эз и вöвлы, онмöссис. А Юрий Андреевич кутiс юрсö кыкнан кинас, пондiс думайтны. Мый жö эта шогмö сэтшöмыс? Кытшöмкö старушкаэз муись я мый я гарйöмась святöй лик, обедня кежö лöсьöтчöны. Поп Мисаил пö кöсйисьöма. Сiйö и видзöт, сельсоветын вичку осьтасö, а сiя, том грамотей и активист, и тöдны нем оз тöд. Бытшöм делоэз! Да эна старухажуггес сэтшöмö мыйкö арталасö, что кувтöдз он вунöт, быдöс чочком свет кузя позоритасö. Мый нылiсь босьтан.

А мый керны?

Том вöлi Юрий Андреевич, дзирыт. Сiя часöт жö мöдiс мунны Эринья Потаповна ордö, конфискуйтны ликсö и строгöя предупредитны, медбы дугдiс соровтны да гудыртны васö. Но думайтыштiс-керис и öвтыштiс киöн — оз лöсяв. Эринья Потаповна да Куть-Кутиха, пожалуй, синöн кваркыш оз керö, а сiдз жö, кыдз и Кушман Егорöс, тойлаласö ыбöс сайö, да эшö кипятокöн заваритасö, вот тэныт и лоас пресвятöй богородица. Религия — этö важын ни быдыс тöдö — дело öддьöн деликатнöй. И петö — медбы кутчисьны старушкаэзкöт, колö перво думайтыштны, кыдз да мый керны, кöть невна советуйтчыны пöрисьжыккескöт.

— Ашын, ашын и кутчисям эта важнöй удж бердö, — горöтчис Юрий Андреевич. — Талун сёр ни, эшö шардöтан отирсö ой кежас.

Сылiсь кыввесö, конечно, некин ни эз кыв. Кушман Егор четушкаыс бöрын узис, кыдз вийöм, карöтiс нырнас сiдз, что керку стенаэс дрöбалiсö.

Шоныт дзимбыровскöй рыт быдöнлiсь гажöтiс сьöлöммез. Магазин дынын койис тыр народ — висьтасьöны, сур пö вайöмась, клубын мыччалiсö кино — Фантомаслiсь, фантастическöй мортлiсь, подвиггез. Деревня сайын, неыджыт кыдзовöй расок дынын, кылiс гармоння шы. Сэтчин колхознöй шофёр Сенька Никонов орсiс частушкаэз, нывкаэз басöка сьылiсö. Деревняас мукöд мудьöттэз вылын пукалiсö старичоккез, куритiсö трубочкаэз, мирнöя сёрнитiсö ойся он одзын. Видззез ладорсянь пöльтiс ульсöтöн: сэтчин путриктiс туман.

И вдруг совсем видзчисьтöг эта туманiсь, Ыджыт Дзимбыр ладорсянь, пеллез кузя сöтiс эстраднöй музыка, сэтшöм боёк и гора, что перво уналö кажитчис, бытьтö видззес весьтын потiс небоыс, пондöтчис вöвлытöм гымалöм. Кытшöмкö лёк зверь моз сэтчин нярзiсö контрабаслöн струнаэз, дзик пурт увтын порсь, виксiс скрипка, мымда вын брякöтiс барабан — бум-бум-бум... Быдöс эна шыэс каттисисö арттöм тшакыльö, ыджыт ванырöн уськöтчисö деревняыс вылö, сiйö и видзöт — пöдтасö.

— Но и но! — гудыртчис Юрий Андреевич, кöда пукалiс аслас посöдзын медвевдöрись поспу вылын. — Да этö жö ачыс Григорий Ильич лэбзьö. Эт, кытшöм чёрт!

Григорий Ильич Черепанлö таво тулыснас, кöр сылö тырис пятьдесят год, земляккез козьналiсö öддьöн гажа машинка — транзистор. Может, нем бы эз и козьналö, да гундыровса, кöдна памятнöй рыт бöрын сё эшö адззисö пель сайез, мыччалiсö инициатива: колö пö бур мортлö мыйкö козьнавны. И земляккез согласитчисö, козьналiсö этö машинкасö. Но и мый, козьналiсö и козьналiсö. Машинка дак машинка. Вöлi сiя сэтшöм жö, кытшöмöсь овлöны быдöс транзисторрес: скромнöя висьтасис медбöрья событиеэз йылiсь, потшшуйтiс хозяинсö бытшöм музыкаöн, беседаэзöн, быдкодь интереснöй рассказзэзöн. Мый эшö колö? Но Григорий Черепан этöн кольччис мылякö недовольнöй и решитiс невна мöдкодьсьöтны öння радиотехникалiсь чудосö. И мöдкодьсьöтiс эд! Гöняйтiс мотоциклöн городö, друггес отсöтöн небöма сэтчин кытшöмкö сложнöй приставка да вына динамик и быдöс этö хозяйствосö аслас киöн йитiс транзисторкöт. И радуйтчы! Кöть приёмникыс лоис невна сьöкытöв и öштiс фабричнöй щегольскöй видсö, зато кытшöм гора лоис! Нырыштан чуньöн кнопка вылö, дак музыкасянь говкыс быдöс Кайскöй волок пасьта волнаэзöн ветлö, сiдз и кажитчö, бытьтö вековöй пожуммез да кöззэз муöдз и копрасьöны, дзик ураганнöй тöв нёкралö нiйö. Вот этö штука!

— Мыйлö тэ изводалiн сэтшöм бытшöм шарман? — юасьöны мукöдпырся соседдэз. — Видзöт жö, кытшöм зверь сiя лоис, истово лешак рявзö.

— А кыдз тi думайтат: ошшесö повзьöтлыны колö? — шутитöмöн отвечайтö нылö сельсоветчик. — Кöиннэзöс тожö. Эд нысянь, ёрдöммезсянь, спокой абу, кöть öтöрö эн и пет.

Колö сёжö висьтавны, что Григорий Черепан — мортыс вежöра, лэдзлö ассис адскöй машинасö не öддьöн часто, только медторжественнöй минутаэзö. Объявитас, шуам, начальство бур удж понда благодарность — не грех сэк и джаз кывзыштны, ась отирыс тöдö, что морт сьöлöмын гажыс ключöн пизьö.

— Интересно, кытшöм причина увья сiя талун иерихонскöй трубасö лэдзис? — вийис юрсö агроном. — Поди, иньыс сразу кык кага чужтiс? Тожö эд важын дженыт кока ветлöтö.

Юрий Андреевич пукалiс поспу вылас, а музыка эта кадö сё сибалiс и сибалiс. Вот лысöй Чöвпан дынын уннялiс-керис, вот логыс таланьын ни рявзö, и — стоп машина! Адскöй орган вдруг виньдiс, тупкалiс адсö. Этö лоö, что Григорий Черепан пырис деревняö и, медбы не лöгöтны соседдэсö, нырыштiс колана кнопка вылö. Лöнь öтмöдöрын лоис — пеллезлö зубыт.

Юрий Андреевич сэк жö чеччöвтiс посöдзись, чепöссис Григорий Ильич керкулань. «Ужо баитышта сыкöт», — решитiс сiя.

— Поздравляйта тэнö, дона другиньöй! — панталiс сiйö председатель. — Быдöс дзирыт сьöлöмсянь поздравляйта!

— Спасибо, Григорий Ильич, спасибо! — председательыс моз жö жагöна отвечайтiс агроном. — Только кытшöм подвиггезöн? Ме скромнöй морт, нем сэтшöмсö...

— Да премия жö сетiсö миян сельсоветлö, Юрий Андреевич!

Григорий Черепан, этатшöм ошнямыр, радувьяс сывьялiс агрономсö, жмитiс сiдз, что мортыслöн коскаэс только мутш-мутш керисö, сэсся сöтiс ки долоньнас ёртыслö пельпон кузя:

— И не учöт премия, пятьсот руб!

— Сумма!

— Эшö бы! Эд кыдз ми уджалiм тавося первöй кварталын? Сiдз гымöтiм-дорим, что неболö жар вöлi.

Сiя не тэрмасьöмöн кыскис кармансис дженытик трубочка, зарядитiс сiйö махоркаöн, но öзтыны табаксö, тыдалö, вунöтiс, броткис одзлань:

— Депутаттэз миян дзирыта кутчисисö удж бердö, сёрнитiсö народыскöт — и вот, пожалуйста!

Сэсся öзтiс сёдаки трубочкасö, тупкис сiйöн öмсö и пыртiс ассис коляскаа мотоциклсö оградаö. Эта бöрын гыжтöтiс пельпон вылiсь транзистор, бергöтлöв-керис сiдз и этадз и казявтöг я мый я нырыштiс кытшöмкö кнопкаок. Машинка сэк жö шыасис ыджыт зыкöн, дзик вирдалан да гымалан кымöр потiс — бум-м!

— Тырмас тэныт, лешаччöй мыгöр! — транзисторысся горöнжык рявкнитiс осьта öшынöт Черепанлöн иньыс.

— Виноват! — перыта горöтчис Григорий Ильич и выключитiс ассис «зверьсö».

Сiя виноватöя шынньöвтiс, тальччалiс кокись кок вылö. Юрий Андреевич эта кадö и юöртiс таинственнöя:

— А миян деревняын, Григорий Ильич, виль юöррез эмöсь.

— Но-о!

— Быль! Петырлун панытö обедня пö лоас. Висьтасьöны, ачыс поп Мисаил кöсйисьöма.

— Хо! Этö кытшöм могöн? Кин сiйö корис? Юрий Андреевич висьталiс быдöс, мый тöдiс. Ачыс эта коста гусьöник дзарьялiс председатель чужöмö, старайтчис вежöртны, кыдз Черепаныс панталö сылiсь юöрсö. Григорий Ильич панталiс сiйö ас мознас, совсем не сiдз, кыдз видзчисис агроном. «Лешаччöй мыгöр» пуктiс сьöкыт кисö агрономлö пельпон вылö, сэсся ош моз сöтiс долоньнас спина кузя, öдззис рыгзьыны:

— Хо-хо-хо! Вот жö вежмасьöны, чертовкаэз! И кыдз тэ думайтан, локтас оз поповскöй обедняыс вылö отирыс?

— Кин сiйö тöдö.

— Нет, дона другиньöй. Некин оз лок! — чорыта шуис председатель. — Да, некин оз лок. Ме этö тэныт веськыта висьтала. Думайтышт ачыт: кин öнi пондас обедняэз панны, кöр сенокос пондöтчö? Йöзыс миян сёдаки сознательнöй. Вот премия сетiсö...

— Премия, конечно, сiя лöсялана штукаыс.

— Нельки öддьöн лöсялана. И примитiмö талун исполком вылын зэв бур решеннё: премияыс öт джын вылö небны телевизор, сувтöтны сiйö миян Учöт Дзимбырö, клубö, а мöд джынсö юкавны активисттэз коласын. Висьтала ме тэныт, Юрий Андреевич, шумыс исполком вылас вöлi! Кöть пеллез идзасöн тупкав. Ыджытдзимбыровчиыс горöтлöны: «Телевизор сувтöтны миян клубö!», а гундыровчи рявзöны: «Нет, телевизор миянлö ёнжыка колö!» Только невна эз тышкасьö. Но ме и решитi ас мознам: «Сувтöтам этö штукасö Учöт Дзимбырö — и точка!»

Григорий Ильич довольнöя пильснитiс, кыскис аслас паськыт моросö крепыт махорочнöй тшын, лэдзис сiйö бöр и öмöт, и нырпыссэзöт и бöра öдззис сярзьыны:

— Вот кутчам овнытö! Быдса суткиэзöн шоччисьтöг пондам видзöтны телевизор. Сувтöтам Лысöй Чöвпан вылö триста нето пятьсот метра сувда столб, арталам антенна — и видзöт Москва. Ме, кыдз пöрись радист, лоа прорабöн, руководитны ачым кутча мачтасö строитны. Эх, овнытö пондамö!

Юрий Андреевич гыжьялiс юрбöрсö. Быль учёнöйез баитöны, бытьтö морт вермас бöбмыны не только горесянь, но и радмöмсянь, — думыш керис сiя. Но горöн эта йылiсь шы эз сет. Сылö неохота вöлi öштыны дона кадсö, важын ни петiс он. И юалiс:

— А мыйнö обеднянас?

— Кышасис тэ бердö кытшöмкö обедня, — серöмтчис председатель. — Старухаэз сы понда и олöны светас, медбы еныскöт сёрнитны. Эта делоын нiя тöдöны толксö, кужöны боньгыныт. И шуа ме тэныт: эн тöждiсь! Чожа, мыся, сувтöтам клубö телевизор. Быдöс народыс чепöссяс видзöтны передачаэз. Нельки Куть-Кутиха да чуньтöм Эринья локтасö. Эшö, пожалуй, медодз локтасö. Отец Мисаил и кольччас öтнас. Да и оз сiя лысьт локны обедняэз вылö, оз. Мый сiя, бöбöв я мый я?

«Чудак Григорий Ильич — или кыдз сiйö шуны?» — гажтöма думайтыштiс агроном.

Курыт табак тшынсö ньылалiкö, Григорий Ильич перыта бергöтчис Лысöй Чöвпанлань, корис дынас Юрий Андреевичöс:

— Кывзы-ко, мыля бы миянлö не писькöтны этö фундаментальнöй керöссö? Мыля бы, шуам, не гарйыны туннель?

— Туннель? Этö мыйлö жö?

— А вердчансö заптыны колö? Колö! Вот и гарьям эта керöс пытшкö туннель, стенаэсö штукатуритам бетонöн, да и пондамö тэчны сэтчö силос, сенаж!

— Былись эд! — только и вермис горöтчыны Юрий Андреевич. — Вот эта мöдiк басни! Ха-ха...

Кин бы эз кеж Учöт Дзимбырö гожумнас, обязательно кыкнан киöн боккес кузя сöтас: господи, вот тай благодатьыс кытöн! И быль, басöк вöлi деревняыс. Быд керку дынын сулалiсö вековöй кыдззез, тополлез да липаэз, паськыта быдмисö льöмпуэз да рябинаэз, мукöд карчйöрын небоöдз нюжалöмась кедррез. Дзарнитан деревняыс вылö Лысöй Чöвпан вывсянь — и сьöлöмыт пот мунас. Не деревня, а быльнöй райскöй сад, быд пельöсокыс и керкуокыс зеленьö вöйöма.

И отирыс Учöт Дзимбырын асланыс олан вылö оз ни норасьö. Медбöрья годдэзö делоэс нылöн артасьны пондiсö. Вöввезöн — этö быдыс тöдö — важынкодь ни оз гöрö, а сё быдкодь тракторрезöн — колеснöйезöн, гусеничнöйезöн. А няньсö дзимлялöны комбайннэзöн. Кытшöмкö чарлаэз да косаэз йылiсь öння том йöзыс нельки эз и кывлы, нiйö эз и адззылö. Тöдчöмöн томмис да басöкжык лоис и ачыс деревняыс. Дженыт кадö, кыдз зэр бöрын тшаккез, мыччисисö уна виль керкуэз, кытчö бы эн дзарнит — басöк виль воротаэз, палисадниккез, шифернöй керку юррез.

Колö висьтавны, и Эринья Потаповна важын ни бы олiс виль керкуын, красуйтчис бы шоныт да югыт горницаын, если бы эз усь юр вылö окаяннöй беда. Сылöн Макарушкоыс морт вöлi вына да уджалiсь, быд берсяыс сы киись петiс. Ов бы да ов чочком светас, а вот шогмас жö... Кыдзкö öтпырись бöрйис сiя свободнöй лун и мунiс вöрö заптыны виль керку увтö керрез. Мунiс сiя одз асывнас, мöдiс бертны эшö югыт коста, а эз берт. Рыт сибалiс — абу, вот и ой ни сулалö öтöрас — абу Макар. Эринья Потаповналöн сьöлöмыс местасис вöрзис, доймыны пондiс. Чепöссис старуха деревняö, сувтöтiс йöзсö кок йылö:

— Öшис Макар!

Мыдзöсь вöлiсö дзимбыровса, быдыслöн он петiс, да керны вöлi нем — мунiсö вöрö, Макарлöн делянкаö. Ветлöтыштiсö-керисö невночка и инмисö бедолага вылö: Макар куйлiс кыз пожум увтын, вöлi сайкалöм ни. Опытнöй мужиккез керисö вывод: пожумыс, кöдö Макар пилитöма дынöдззас, усикас чайдöма, пондöма пöрны не сiя ладорö, кöдöрö старайтчис иньдöтны Макарыс, а нач мöдланьö, бокö; Макарыс, тыдалö, мöдöма мый бы эз вöв, а кыскыны дона пиласö, медбы пуыс эз жамнит сiйö, вот и абу ештöма чеччöвтны пуыс дынсянь ылöжык, а поди, падмис кокора бердö, усис и вот на тэныт — пожумыс нырыштöма сiйö, ляпкöтöм.

— Господи! Мый понда сiйö, беднöйкаöс! — öдззис герьявны Эринья Потаповна и усис кок йылiсь, давай вартчыны му вылас. — Господи!

Не öтiк лун горзiс Макариха, некин бурöтны эз вермы.

Дзебисö колхозниккез Макарсö, казьтыштiсö, кыдз тшöктö обычай, добрöй кыввезöн да и рознитчисö горттэзö. А Эринья Потаповна ветлöтiс, дзик кольмöм, юасис быдöнлiсь:

— Мый понда сiйö господьыс? Эттшöм мужик вöлi!

— Еныс сэтöн мыйлö? — пондылiсö баитны соседдэз.

Нем бытшöмыс эз аркмы. Эринья Потаповна бытьтö öштiс мывкыдсö. И кин тöдö, кытчöдз бы локтiс сiя, кöбы эз пыр эта кадö Куть-Кутиха. Пырис, дыркодь юрбитiс енполка одзын, висьталiс дженытика:

— Оз ков енсö лöгöтны.

Пуксис лабичö, святöй ликыс дынö матöжык, ордчöн соседкасö пуксьöтiс, кутчис шушкыны небыта, ласковöя:

— Быдöнным ми еныс кипод увтын ветлöтам, быдöнным ми сылöн раббез. И оз ков, матуш, этадз-ту шогсьыны, колö вичкуö ветлыны. Сэтчин ен-батюшкоыс и шонтас сьöлöмтö. Вот и ме сiдз, сьöлöмшöриньöй, ассим гореöс горюйтi-кери. Сэтшöм горе, матуш, сэтшöм лёк горе горюйтi-и...

Куть-Кутиха быль баитiс. И сылö неетша усис шогсö панявны. Пöрисьжык зоныс шедiс вийны война вылын, учöтжыксö сьöкыта ранитiсö. Бертiс сiя гортö чуть ловья. Куть-Кутиха веськöтiс, кыдз кужис, сувтöтiс кок йылö, гöтралiс. Бур инькаыс лöсялiс, вына да уджалiсь морт. Хозяйство нiя кыкöн некой пору лэбтiсö-камгисö, виль керкуок ленточнöй фундамент вылö сувтöтiсö. Овны да овны бы нылö, добро содтыны, а бöра жö мый петiс? Вöйисö кыкнанныс Вильва юö, босьтiс господьыс кипод увтас вöр кылöтiкö, торксисö öтiк часö, колисö пöрись мамыс киö Параська нима нылочкаöс.

— Сiдз, видно, Христосыс шуис, — ыш ловзисис Куть-Кутиха. — Колисö менö öтнамöс, колисö. Кыдз и овнытö понда.

— Ох, горе, горе...

— Котрась вичкуас, матуш. Кокнямас сьöлöм вылат, ас сьöртi тöда. Баитiс сэтчин кыдзкö батюшкоыс: господьыс, шуö, кинöс пондас радейтны, дак сылö испытаннё перво керö, шог да курыт синва иньдö. А вöлисьте и ыджыт счастье да гаж козьналас. Тэ терпитышт невночкасö, эн лöгöт сiйö, господьсö.

Невночка лöнис, кажитчö, Эринья Потаповна, вичкуö котрасис. Ылынöв городöдззас, сто верстася унажык лыддьöны, но подöн ветлiс. Кöр бертiс гортас да шоччöтыштiс ловсö, висьталiс Куть-Кутихалö, что и былись, некö, кокнитжык сылö лоис.

— А сёдаки некыдз вежöртны ог вермы, — содтiс Макариха. — Мый понда сiйö енiньöйыс накажитiс? Эттшöм мужик вöлi. Пыр и пыр Христоссö почитайтiс.

— Бытшöм вöлi мужик, радейтiс енсö, мича сьöлöм, — согласитчис Куть-Кутиха. — Меным мылякö ой и лун кажитчис: вичкуок йылiсь сiя йöзас басни пондöтас. Быдлаын старайтчöны вичкуэсö осьтны, а миян мый?

— Мöдiс, матуш, баснисö пондöтны, мöдiс, — юöртiс соседкаыс. — Да адззан, мый петiс? Ох, ох...

Тöлыс таво вöлi лöг — ыджыт мороззэза да падера. Логыс сайись нюрын чуть да бöра уннялiсö ашнöй тшыг кöиннэз. Нiя смелöя атакуйтлiсö Учöт Дзимбырсö и поснитик тороккез вылö нетшкисö-вотiсö поннэзöс, ньылалiсö нiйö курччавтöг, гöнсорöн. А нач ни вельмöммес пыравлiсö картаэзö да гиддэзö, джагйисö кин пинь увтö шедас. Эринья Потаповна ёна кынмалiс аслас сiсьмöм керкуокын, дыр шогалiс и, гор вылын куйлiкö, кöиннэзлiсь кузь песнясö кывзiкö, сьöкыта ойзiс да ружтiс. Опонько, айыс кодь жö уджалiсь да кывзiсь зон, чуть я не быд лун лонтлiс баня, Куть-Кутиха вöвлытöм жарын пöвсалiс соседкасö коросьöн. Святöй молитваэзöн, вужжезiсь да туруннэзiсь керöм настойкаэзöн, лекарствоэзöн вöтлiс соседкаыс моросiсь шогöтсö.

Старайтчис Куть-Кутиха, конечно, не весь, юрас важын ни дума вöлi. Сiя, лукавöй старуха, ештiс ни казявны, что Макарихалöн зоныс, Опонькоыс, медбöрья кадö тöдчöмöн быдмыштiс, лоис ладнöй мортöн. Мывкыднас лöнь, колхозын уджалö бура, умöля сы йылiсь некин оз горöтчы. Да сэтшöм куканись еныс отсöтöн самöй раз шöрт печкыны, кузь гез кыйны да гардны. А вдруг кулас Макариха? Видзан разь сэк Опонькосö Учöт Дзимбырын? Пондыв. Ыскöвтас городö — и курччав гырдззаэтö.

Быдöс вын колö пуктыны, медбы Опонько эз нильды гортсис. Вот эшö!

Этадз думайтiкö Куть-Кутиха старайтчис мымда прок. Сiя бура тöдiс, что молитваэз отсалöны не быдпырся, и нельки городö гöняйтiс, кытшöмкö дона да бур лекарствоэз вайис сэтчинiсь. И веськöтiс эд соседкасö, сувтöтiс кок йылö. Ловзис Эринья Потаповна, тулыс гöгöрас нач крепамис и давай жö бöра Христосыс одзын копырасьны, эшö ёнжыка пондiс юрбитны да молитваэз нюжлавны. Куть-Кутихалö ыджыт спасибо висьталiс отсöт понда.

— Не меным спасибосö баит, Христоссö эн вунöт, — скромничайтiс лукавöй старуха.

— Слава сылö, батюшколö, ловья кольччи.

— Ми эшö чатрасьыштамö тэкöт, мыччалыштамö асьнымöс. Эд тэныт, матуш, эшö и семьдесятыс абу. Да и меным восемьдесятöдззас эшö овны да овны. Эта разь годдэз? Ми тэкöт, горадзуль, эшö и свадьба вылын йöктыштам: тэнат жöник, а менам — невеста!

— Быль эд! — шынньöвтiс Макариха.

Эта лунсянь и пондöтчис! Лякасисö öтамöд бердö соседкаэз — немöн он калькöт. Действуйтiс Куть-Кутиха кужöмöн: невночкаöн ошкис внучатка Параськаöс, кöр усьлiс случай — казьмöтлiс сылiсь нимсö. И сiдз — тёп да тёп, бытьтö ва воттез уськöтлiс. Гусьöник, тэрмасьтöг... Сетiс тöдны Эринья Потаповналö, что öння кадö, кöр том отирыс син одзын пондiс тшыксьыны, Параськася буржык невестаöс пондыв кошшынытö. Нет, батя, Опоньколö Параськася буржыксö не адззыны, чередь мыйкö шогмас.

Тёп да тёп, тёп да тёп... И пондiс артасьны делоыс. Мукöдпырся и петавлiсö кымöра луннэз, шогмывлiсö гигинь-гогиннез, но дошлöй Куть-Кутиха кужöмöн и энергичнöя талис нiйö кок увтын, ен отсöтöн вашöтлiс сьöд кымöрресö внучаткаыс юр весьтiсь.

Кыдзкö пыравлiс Эринья Потаповна ордö важнöй гöсь — ачыс колхознöй председатель Пётр Парамонович, ыбöссянь висьталiс могсö:

— Радуйтчы, Эринья Потаповна!

— Ох, ох, батюшко!

— Быль баита. Примитiм ми правленнёын бур решеннё: строитны виль карта, кытöн пондамö видзны куканнез. И участоксö бöрйимö öддьöн удачнöйö — тэнчит лог сайтö. Местаыс эстöн кöс, поскотина лог дорас бытшöм, ваыс ордчöн.

— А менчим избушкаöс? Господи!

— А тэнчит избушкатö, Эринья Потаповна, ми решитiм разьны. Деньга сы понда, мымда колö, конечно, вештамö, кöть базарнöй лунö сылö доныс — чегöм грош.

— А овнытö меным кытöн?

— А овны тэ Опонькоыткöт пондан Ыджыт Дзимбырын. Сетам тiянлö виль квартира, бытьтö райö поздiсян.

Шыннявны öдззис Эринья Потаповна, радмис, тыдалö, председательлöн добрöй кыввезсянь. Но веськыт ответсö колхознöй руководительлö эз сет, решитiс невночка думайтыштны, баитыштны бур отиркöт. И баитыштiс. Кывзiс сiйö Куть-Кутиха, паныт перво и кывджын эз горöтчы. Сэсся внучаткаыс вылö этадз гажтöма дзарнитiс, юрбöрсö гыжьялыштiс. «Лэбзяс Опонько Ыджыт Дзимбырö, а сэтчин стыдтöм нывкаэз, сякöй невестажугыс — кöть пруд прудит». Думайтыштiс сiдз сьöкыта-сьöкыта, бöра дзар керис Параська вылö, сэсся Макариха вылö да кы-ы-ыдз сöтас кокнас джодж кузя!

— А еныс йылiсь думайтыштiн?! — уськöтчис соседкаыс вылö. — Енсö бöра вунöтiн, тöрмöм пыркöтчан?

Пуксьöтiс Эринья Потаповнаöс бокас лабич вылö, давай тотьны:

— Думайтiс тэнат Макарушкоыт виль керку строитны — господьыс сюйыштiс сiйö пожум увтö: эн лолав! Думайтiн тэ мöйму шоныт керкуок йылiсь — тöвбыт и нюжласин гор вылын, примитiн адскöй мукаэз. Эг бы лöсяв ме тэкöт ордчöн, дак кулiн бы тэ, сэк жö и нюжöтiн бы коккетö. Ме, ме петкöтi тэнö быдкодь грехсис! А сэтчин мый, Ыджыт Дзимбырас? Безбожниккез только олöны. И видзчисьö сэтчин тэнö, арттöмöс, виль адскöй мука, вöвлытöм шог. Кылö сьöлöмö: кытшöмкö мог увья оз лэдз Христосыс разьны керкутö...

— Ох, енiньöй-батюшко! — пондiс киöн и кокöн вартчыны Эринья Потаповна. — Мый меным керны? Кыдз сэсся овнытö?

Дата добавления: 2015-11-16