КЫДЗ ШЫННЯЛÖ АПОСТОЛ 6 страница

Виктор Никифорович бöр сувтöтiс Николай Чудотворецсö джаджок вылö, локтiс топ Гырдзза-Аршин дынö, сьöкыт кисö пуктiс сы винерик пельпон вылö, висьталiс:

— Кошшы! Кошшы и адззы, дона тэ ёрт менам Гаврила Фокич! Кошшы и адззы. Торговöй отир тöдiсö святöй ликкезас толк. И тэнат иньыт, колö думайтны, дзебис тэ шогья не простöй пöвтор, а натьтö, öддьöн дона лик нöбöтiс кытчöкö. Кошшы и адззы!

— Быдöс мусö буравита-гарья! — чорыта и торжественнöя горöтчис Гырдзза-Аршин и мöдiс часöт жö чеччöвтны креслосис, котöртны шакардаöн гортö, медбы талун жö кутчисьны удж бердö: петны карчйöрö и пондыны мöдравны му, адззыны ликсö, кöдö коллективизация коста иньыс гусялiс гортiсь. Но музейнöй директор сё жö ештiс кутны сiйö полаöттяс, горöтчыны кынымкö кыв.

— А тiян часовняöн медбöрья кадö öддьöн интересуйтчö миян поп отец Мисаил. Неважын пыравлiс татчö, юасис, абу я миян фонддэзын кытшöм-нибудь реестр нето опись, кытöн бы вöлi гижöма: кытшöм имущество, кытшöм угодниккез да святöйез сулалiсö часовняаныт иконостас вылын.

— Вот тай эшö... А мыйлö сылö?

— Мыйкö кошшö. Кытшöмкö след вылö, поди, инмис. Висьталi тай, мыся, стариннöй шедевррез сьöрын не только научнöй работниккез вöтлiсьöны. Сiдзкö, тэ, дона дружок, эн ло осьта öма ракаöн, хе-хе. Чожа менам сотрудниккез бертасö öтiк походiсь, и ме нiйö сэк жö иньда тiян ладорö. А кытчöдз уджав öтнат. Ме ёна верита, что если пондан вöрöтчыны шупытжыка, пондан кошшыны шедеврресö буржыка, ой и лун, то тэ адззан уна донася-дона произведеннёэз. Эд кайскöй муыс öддьöн стариннöй му. Эта му вылын важын мыйыс только эз и вöв.

— Сёравно гарья и лэбта мусис мый-нибудь. Сёравно адзза сiйö угодниксö! Лолöс пукта, но адзза! — горöтчис Гырдзза-Аршин.

Вот эд кыдз позьö öзтыны мортлiсь сьöлöмсö.

Музейись Гырдзза-Аршин петiс, кöр шондiыс öшалiс ни почти юр весьтын. Сiя вöлi деловитöй, öддьöн довольнöй аснас. Шутка могись и пыравлiс эта учрежденнёö, а видзöт, кытшöм бытшöм басни артасьлiс директорыскöт.

Обедайтны вöлi эшö одзöв, и Гырдзза-Аршин решитiс дзарнитны городскöй базарö. Джын час мымда ветлöтыштiс сiя ряддэз коласöт, ыджыт интересöн наблюдайтiс торговкаэз сьöрын, кöдна вузалiсö горожаналö зелёнöй луктурун, шöмкор, мöймуся картов, кушман да хрен. Не сiдз и уна вöлi базарын отирыс, а зык сулалiс славнöй: торговкаэс пурсисö öтамöдкöт, босьтасиссез тожö эз чöлö — ванзiсö, видчисö, штурмуйтiсö шалманнэз да ларёккез. Гырдзза-Аршин тожö пешлiс гöрд винажуг, кöдö вайöма татчö Кавказiсь сьöд тоша оборотистöй горец. Кынымкö гульк только и юис, а сьöласис вель дыр.

— Не сiйöн торгуйтан, джигит, — висьталiс сiя торгашыслö. — Срамöн торгуйтан. Миян деревняын инькаэз квасина крепытжыкö да чöскытжыкö керöны. А тэнат — чёрт тöдö, мый сэтшöмыс: то ли уксуснöй кислота, то ли эшö кытшöмкö яд. Тьфу, тьфу! Кишкаэз мöдралö, трижды-трою!

«Джигитлö» эттшöм кыввес, конечно, эз гленитчö, и сiя страшнöя вöрöтыштiс уссэзнас.

Обедайтiс Гырдзза-Аршин как раз сiя столовöйын, кытöн уджалiс сылöн землячкаыс, покойнöй Чомор Иванлöн Фаина нима нылыс. И сыкöт, Фаинаыскöт, тожö вöлi интереснöй дружескöй беседа.

— Опонькоыс кодь зонкасö öння кадö не уна панталан. Любöй нывка сы сайö киöн-кокöн чепöссяс, нельки и думайтны оз понды, — помалiс сiя беседасö.

— Ог и тöд, мый тэныт висьтавны, деду, — гöрдöтiс нывкаыс. — Опоньсö ме тöда, конечно. Бытшöм вöлi зоночка, лöнь да уважительнöй... Да кинöн сiя лоис? Пыравлiс кыдзкö ме дынö Людка-почтальонка, менам подружкаö. Баитыштiс Опонькоыс йылiсь...

— Людка вöлi? Но и мый?

— Висьтасис сiя, дедушко, бытьтö Опонькоыс... Ог и тöд, кыдз шунытö... Вичкуö пö бытьтö юрбитны ветлывлö.

— Вичкуö?

— Но! Пыри, шуö, Эринья Потаповна ордö, пенсия вайи. А сэтöн... А сэтöн, висьтасис меным Людкаыс, сэтшöм дело: мамыс иньдö зонсö вичкуö, медбы еныслö копырасьны да счастье аслыс корны. И Опонькоыс, шуö, согласитчис ветлыны, нельки кывджын паныт абу горöтчöм. Эта мый нö сэтшöмыс шогмö?

Старик кывзiс нывкасö внимательнöя, öтпыр эз öмав, сэсся хитрöя шынньöвтiс:

— Вöлi сэтшöм делоыс, Фаинушка, вöлi. Локтiс кыдзкö Опонькоыс ме дынö, чуть оз горзы: мамö, шуö, вичкуö силком иньдö, сякöй страшнöй караэзöн повзьöтлö, ог кö понды юрбитны еныслö. Мый керны? И быль, мый сэтöн добрöй мортлö керны? Думайтiмö ми, Фаинушка, сiдз и этадз, думайтiмö, кытчöдз юррезным эз кольмö, да и решитiмö старушкасö öтлаын еныскöт лешки-вошки бöбöтны. И бöбöтiм! Опонькоыс быдса лун карöтiс-узис менам лежанка вылын, сэсся эшö ойсö валяйтчис сэтöн, а мöд лунас, павжун кадö, иньдöтчис гортас, бытьтö вичкуись бертiс. Ме аслам хозяйственнöй запасiсь кык вöснитик масiсь сюйыштi карманас: нöбöт, мыся, гортат и висьтав мамытлö, что вичкуас небин. Кыдз ми старухасö вурыштiм, а? Хех-хех... А тэ: «Вичкуö котрасьö!» Да сьöлалiс сiя попыс юр вылö!

— Колö жö! — жмитыштiс пельпоннэзнас Фаина. И эз позь вежöртны: гленитчис сылö нылöн подвигыс или нач эз гленитчы. Сiя малалiс кымöссö, курччалiс увдöрись тырпсö и минута сьöрна чöлiс:

— Меным öддьöн сьöкыт овлö татöн, деда, öддьöн сьöкыт! — дыр мыйись горöтчис сiя. — Неважын лыддьöтi öтiк книгаись, бытьтö эм сэтшöм страшнöй шогöт: морт кулавлытöдз гажтöмтчö чужанiныс понда. Тыдалö, менö вийö как раз эта шогöтыс. Веритан я, дедушко, мукöд пырся сэтшöм умöль лоас, сэтшöм умöль, — кöть вакрамешö мун. Ветлöта городскöй улицаöт, а некинöс ог адззы, некинöс ог кыв, бытьтö пемыт вöрöт муна, сэтшöм гажтöм да сьöкыт меным. Вот сiдз бы и паськöтi борддэзöс, да и лэбзи гортö. Сизим год ни татöн ола, а некыдз волоксö вунöтны ог вермы.

— Сизим год ни? Эт-та, кыдз сiя, кадыс, котöртö да лэбзьö. А эд кажитчö, быдöс только тöн вöлi. Тэ мый жö, нельки и бабтö дзебны эн вовлы?

— Перво мöдi жö ветлыны, а сэсся öвтыштi киöн. Усис быдöс тöдвылö и эг мун. Бур эта или умöль, а вот сiдз петiс.

Кöр Фаиналöн кулiсö айыс да мамыс, сiя невна олiс бабыскöт, пöрись ни старушкакöт, кöда öткöн джендöтiс вексö деревня дорись избушкаын. Старуха вöлi почти досповна ни ылöстöмсялöм, вежöртiс нач етша, только сiйö и керис, что асывсянь рытöдз сулалiс пидзöссэс вылын енполка одзын. Но и ладно, мед бы юрбитiс, кöть быдса суткиэзöн, но сiя, бöбмöм, тшöктiс орöттöг юрбитны и внучаткаыслö, тшöктiс новйыны перна. Фаина, конечно, эз сiйö кывзы, пондiс пиньгисьны и, вежöртана, вöлi сэк жö накажитöма кулавлытöдз.

Уна и синва кисьтiс бабыс дынын олiкö Фаина и эшö бы неетша кисьтiс, но добрöй отир советуйтiсö сылö мунны детдомö, и нылочка согласитчис.

— Ох, кыдз сiя кешитчис ме вылын, кыдз кешитчис, — касьтывлiс талун сьöкыт луннэсö Фаина. — Тшыгйöн менö видзис, чикиссезöт кыскалiс. Öтпыр перна гайтанöн чуть эз джагöт. У-ух... И эг вермы ме ветлыны гортö, кöр дзебисö сiйö.

— Да но сiйö, чоморöс! — дзирыта горöтчис Гырдзза-Аршин.

Сiя вежöртiс, что Фаиналö сьöкыт вöлi касьтывлыны гажтöм луннэсö, и кужöмöн кежöтiс баснисö шутка вылö:

— Оланыс сiя сэтшöм. Сложнöй штука, хех-хех... А ноко висьтав меным пель одзам, кин тэнö вердыштлiс сiя кадö, а?

— Мый тэ, дедушко! Оз ков эта йылiсь! — сразу ловзис Фаина. Сiя эз вермы терпитны, топнитiс кокнас, гажöна серöмтчис: — Опонько! Сiя öддьöн славнöй зонка вöлi. Быд рыт пöжалöм картов вайлiс меным. Сэтшöм чöскытöсь нiя вöлiсö — кувтöдз ог вунöт. Нельки öнi сё эшö усьöны тöдвылö и быдпырся охота сёйны пöжалöм картовсö.

— Опонько — замечательнöй детина. И гиж талун жö заявленнё, медбы уволитiсö. Лун-мöд бöртi локтамö кыкöн. Видзчись!

Стариклö охота вöлi чожажык иньдöтчыны гортас, медбы и минута не ештыны весь, а часöт жö петны карчйöрö, кутчыны гарйыны му, кошшыны стариннöй святöй ликкез. Но сiя думайтыштiс-керис и решитiс эшö кежавны öтiк земляк дынö — Василий Голован дынö, кöда городас уджалiс милиционерöн. И Василийыс дынiсь Гырдзза-Аршин петiс шыннялöмöн, вöлi довольнöй аснас. Куим квартал мымда оськалiс милицейскöй участок дынсянь старичок, тэрмасис, а ачыс сё шыннялiс и нельки сералiс. Тыдалö, и Голованыскöт интереснöй басни вöлi.

Кынымкö лун и ой Гырдзза-Аршин мöдралiс ассис карчйöрсö, шоччисьтöг гарйис му. Уджалiс сiя вын жалейттöг, часто вунöтлiс водны узьны, пуксьыны пызан сайö курччöвтны нянь торок, паньыштны похлёбка. Перво сiя мöдралiс мусö кöртзырöн, сэсся адззис штык кодь лöчыт проволока тор, крепытö, пружинистöйö. Эта предметöн Гырдзза-Аршин сантиметр бöрын сантиметр пышналiс гарйöм мусö. Кöр быдöс гряддэз, бороздаэз да просошинаэз вöлiсö исследуйтöмöсь, старичок пондiс гуддисьны важ гунаын, киссьöм-разьсьöм купеческöй керку джоджулын. Сэсся öвин увтын. Куштанöн да сьöкыт ломöн сiя лун-мöд масьтiс мусö баня передникын да полок увтын, амбаррезын да сарайезын. Быд местö дзарнитiс Гырдзза-Аршин, быд осьтаö сюйлiс нырсö, кытчö сiя только тöрис.

И быдöс весь!

Нельки öтiк сiсь пöв тор эз гарйышт Гырдзза-Аршин. Нельки öтiк сiмöм перна эз адззы сiя.

Мукöдпырся старичок мыдзлiс садь быртöдз, кулавлытöдз. Сэтшöм кадö сiя пуксьывлiс шоччöтны ловсö и, деревенскöй могильниклань дзарьялiкö, пондöтлiс дзирыт басни аслас покойнöй инькöт:

— Дона сьöлöмгаж тэ менам, Ираида Даниловна! Мича чужöмбана и небыт сьöлöма тэ менам инька-иньöчка! Да кытчö жö тэ, кытчö тэ дзебин, родимöй, святöй угодниксö? Эд сiдз сiя меным часöт колö, эд вот кыдз колö!

Нет, нем бурыс эз сод. Покойнöй Ираида Даниловна, кöда ловьянас юр висянöдз радейтiс гажа мывкыда жöниксö, öнi эз и шыась небытик ласковöй голоснас, нельки кывджын эз горöтчы паныт.

Сэтшöм неудачаэзсянь, добровольнöй каторжнöй уджсянь и тшыгйöн олöмсянь старик, кажитчö, вот-вот нюжöтас ассис бедь коккесö. И кин тöдö, поди и кулiс бы, кыссис бы матöжык Ираида Даниловнаыс дынö, да важнöй делоэз и сякöй заботаэз мездiсö сiйö смертьыс киэзiсь, сувтöтiсö кок йылö.

Öтпыр одз асылö, кöр Гырдзза-Аршин ойся сьöкыт удж бöрын — ойнас сiя стальнöй проволока торöн бытшкалiс мусö часовня джоджулын — вöлi почти садьтöм, пукалiс лабич вылын дзик тувдöм, сы ордö пырис Опонько.

— Мый тэкöт, дед? Тэ шогалан я мый я? — повзьыштiс сiя, кöр дзар керис старикыс вылö.

Гырдзза-Аршин пукалiс лабичын, юрсö кыскöм пельпоннэзö, синнэсö куньöм. Сiя öдва лолалiс.

— А? Мый? Кин сэтöн ловья морт ветлöтö? Этö не ли Опонько? Но и кыдз нiя, делоэт?

— Дык! Умöльöсь менам делоэзö! — веськыта висьталiс Опонько. Сiя пуксис ордчöн старичокыскöт, содтiс: — Беда, кытшöм умöльöсь. Висьталiс часöт мамö, медбы корасьны, значит, мунны. Параськаöс тшöктö корасьны!

— Вот чёрт табун, трижды-трою! — лöгасис мыдз пенсионер. — Да мый жö эта сэтшöмыс? Опонько, прокурат! Вартлы менö, лысöй кöинöс, джагöт! Эд ме, Опонько, öнджа... Нач вунöтi тэ йылiсь. Виноват. Виноват, ме тэ одзын!

Жагöник öзйис Гырдзза-Аршин, киэзöн öвтiс, котрасис пельöсiсь пельöсö. Сэсся лöгувьяс юис быдса жбан шöма квасина-сюромка и только сыбöрын шуис:

— Лöсьöтчы городö! Висьтав мамытлö, что корöны тэнö передовиккезлöн окружнöй слёт вылö. Котöрт гортат, мöдöтчышт кöть невночка, буржык да сöстöмжык йöрнöс пасьтав — и шагом марш! Но, мый сулалан? Лэбзьы гортат ракета моз, марш!

Опонько пондылiс вöлi пыксьыны. Сiя некыдз эз вежöрт сэтшöм крутöй чукыллесö и мыйкö пондывлiс бобгыны ныр увтас, но Гырдзза-Аршин примитiс ни чорыт решеннё, эз и думайт керсьыны бöр, силком тойлалiс Опоньöс гортас пасьтавны вывтас кодяжык паськöм. Ачыс тожö öзйис: чожжык миссьöтiс нятьöсь киэсö да чужöмсö чöскыт дука матегöн, пасьталiс сöстöм выввежöт, сыналiс тошсö. Зеркало одзын сулалiкö, сiя осудитiс асьсö, гогинялыштiс юрнас:

— Кытчöдз жö тэ локтöмыт, пöрись балда! Тьфу... Кöть часöт жö пуовöй мундир закажит.

И сэтöн жö, зеркалоыс дынын, примитiс чорыт решеннё: мусö сэсся не гарйыны, не асныравны и весь не чепсасьны, а öктыны терпеннё да кошшыны святöй ликкесö отир отсöтöн.

— Понда ветлöтны деревняэзöт, каждöй керкуö пыравла, а мусö гарйыны — ась чомор гарйö, вакрамешö сiйö. Мый эн пукты — сiйö эн и кошшы!

Джын час бöртi локтiс Опонько. Кокас сылöн вöлiсö бытшöма чиститöм-зыртöм сапоггез, вывтас сниток эшö вильöсь штанi да вельветовöй куртка. Зонка мыйиськö стыдитчис, видзöтiс полöмöн, синнэсö бокö дзебöмöн. Сылö, тыдалö, кажитчис, бытьтö мунö керны кытшöмкö позорнöй дело. Но старик вöлi довольнöй сыöн, кыдз кужис, сiдз и ошкис.

— Тэ, Опонько, гöна капуста, жöникыс — первöй сорт. Симпатяга тэ, Опонько, кытшöмö чочком светыс эз адззыв. А мый главнöйыс — вына тэ, ён. Фаина тэ сайö — и киöн, и кокöн. Вот адззылан — сiдз и лякасяс, калькöтны он вермы. Тöда ни ме этö делосö, — баитiс сiя деревняыс сайын туйвежын, кытöн видзчисисö попутнöй машина.

Кöр сувтiс попутнöй грузовик, нiя чожжык кайисö кузовö, поздiсисö кытшöмкö мешöккез вылö и вöрзисö туйö. Первöй верстаэз вылын Гырдзза-Аршинлöн и öмыс эз пöднассьывлы. Старик подробнöя юöртiс, кыдз славнöя любитiс сiйö купеческöй ныв, окасьтöг овны эз вермы. Вот и красуйтчисö кыкöн светас сорок годся дыржык, некытшöм беда эз тöдö. Но чожа сылöн кылыс пондiс гардчыны. Старик нюжвыла и не öддьöн ятнöя горöтчис эшö кынымкö фраза и кыдзкö казявтöг лöнис. Нёджжöвтiс сы вылö Опонько и пельпоннэсö жмитыштiс: Гырдзза-Аршин öшöтöма юрсö морос вылö, узис ныргорöн. «Шогалö, тыдалö, беднöйка», — решитiс Опонько и водтöтiс дедсö мешöккез коласö, медбы эз тарав кузовсис.

Мыдз вöлi Гырдзза-Аршин, эд быдса суткиэзöн сiя керис сьöкыт, веськыта шуны, каторжнöй удж и часöт саймывтöг узис ровно сто километр. Бура сiя узис, крепыта, нельки эз и саймывлы, кöть туйыс вöлi гöппеза, и быд нырокын машина чеччалiс, кыдз повзьöм ош. Саймис сiя только сэк, кöр машинаыс сибалiс ни город дынö. Гудыра синнэзöн нёджжöвтiс öтмöдöрö, дыр дивуйтчис да зыртiс кымöссö, горöтчис:

— Колö жö, а? Город ни тыдалö. А ме вöтаси, бытьтö гор вылын узя. Мый тэ, Опонько, верман висьтавны паныт меным?

— Ныргорöн узин тэ, вон тош вылат нельки дуль петöма.

Старичок виноватöя шынньöвтiс, кыдз кага, чышкис тошсö да сыналiс кыдз колö.

— Бур меным, Опонько, лоис, дзик баняын пывси. Вот часöт ми дзарнитам галантерейнöй магазинö, видзöтам-керам, мыйöн бурнас сэтöн вузасьöны, и столовöйö пырамö.

— Может, öтнат тэ, деда, столовöяс пыралан? Ме бы ветлöтыштi кытiкö öтнам, — мыкталiс Опонько. — Пырав, дед, öтнат...

— Кыдз этö позьö öтнамлö столовöйö пырны, — дивуйтчис Гырдзза-Аршин, — Стыд и срам лоас. Быд курöжокыс пондас миян вылын серавны. Тэ давай-ко, Опонько, ло ухарьöн, геройöн, немись эн пов. Кылiн, поди: смелостьыс городдэз босьтö. Тэ уськöт тöдвылö, кыдз пöжалöм картовöн кöркö вердлiн, сэк сразу гажажык лоас.

Опонько чышкис сапоггез вылiсь бус, пыркöтiс курткасö, пишкис нырнас. Гажтöмтчис: оз мун, натьтö, сы сайö Фаина, весь этö делосö пондöтiс дедушко Гаврила Фокич, весь...

— Поди, юöртны сылö, деда, что оланыс миян артасьны пондiс, кокнямис? Колхозын öнi уджавны дивья — быдöс керöны машинаэз, тракторрез. Пода видзам уна, деньга эм...

Гырдзза-Аршин юрбöрсö гыжьялыштiс, думайтыштiс невночка и горöтчис:

— Лöсялас кö сэтшöм басни, дак позяс и ошшасьыштны сымда-мымдасö. Только, думайта, не эстöн главнöйыс. Мый, сiя машинаэз я мый я эз адззыв? Не тракторрез сылö, Опонько, колöны, а добрöй морт. И босьтны, Опонько, нывкасö колö дзирыт ласковöй кылöн, радейтöмöн. Тэ мыччав сылö асьтö, кыдз колö, быд ладорсянь. Эд тэ жö öддьöн славнöй детина. Мед сiя сразу казялö этö.

Но вот и локтiсö городö, чожажык пырисö галантерейнöй магазинö. Гырдзза-Аршин, кыдз кöркöся торгаш, кужöмöн донтiс товаррез, бöрйис басöкö, чим гöрдö, косинка, неöддьöн дона духиэз, тшöктiс быдöс этö каттьыны бумагаö и кöртыштны голубöй лентаöн.

— Козинтöг невеста дынö мунны — сымдасö, Опонько, и порсь оз кер, — висьталiс сiя, кöр петiсö öтöрö.

Опонько шы эз сет. Кыным матöжык сибалiсö нiя столовöй дынö, сыным сё частожык и частожык сiя кöчок моз дзарьялiс öтöрö-мöдöрö, сё горöнжык вирскис нырнас, дзик насмока казявтöг кутчисис. Гырдзза-Аршин полiс, медбы жöникыс эз мавт кокпятаэсö, и кутiс сiйö оча ки да эшö гыжжесö мöртiс Опоньколö куртка сосас.

— Опонько, тэ öнджа... Чатырöнжыка видз юртö. Тэ, гöна капуста, молодецöн ло, удав мортöн. Нывкаэс, зонка, тюфяккесö оз эд радейтö. Вежöртiн менö?

Столовöйын нырö вачкис уна чöскыт дукöн, кухнясянь сiдз и вайöтiс блиннэзöн, пельняннезöн да эшö быд берсянас, мыйсянь чепöссис дуль. Гырдзза-Аршин чикыртiс синнэсö, дзик кань, кöдалiсь гильöтыштiсö пельсайсö, паськыта шынньöвтыштiс. Куим суткися каторжнöй уджыс бöрсянь старик тыр моросöн лолалiс чöскыт стряпня дук и сылöн чожа мыйись пондiс бергавны юрыс, быдöс вывтырсö сывьялiс мыйкö кокнитик-кокнитик, дзик спина саяс быдмисö борддэз и сiя ангел моз öдззис лэбзьыны-уявны гожся шоныт да ласковöй руöттяс.

Гöрдöтыштöм, öддьöн мича чужöмбана нылiньöй, кöда вöлi лымся чочкомжык курточкаа да сэтшöм жö чочком колпака, раздача сайсянь сэк жö казялiс пыриссесö, син одзын повзьыштiс и паймис. Сiя эз вермы öшшыны местаас, котöрöн мунiс кухняö. Опонько сё жö ештiс казявны, кыдз нывкаыслöн чужöмыс пыкнитiс биöн, синкыммес кынымиськö мигнитiсö. Ачыс сiя тожö нач паймис, öшис, коккес лоисö ватнöйöсь, сьöлöмыс пот мунiс и быдöс мороссö нюлыштiс би öгыр, адззывлытöм жар. «Басöк лоöма... Оз сiя мун...» — вöрзьöтiс юрвемсö дума. И если бы Гырдзза-Аршин эз видз сiйö конувтöт, добрöй молодечыс, нем и баитны, чепöссис бы котöртны, кыдз шардöм.

— Адззылiн? — шынньöвтiс сылö старичок и лукавöя мигнитiс: — Вот, батя, кытшöм нывкаэз овлöны светас. Царевна! Тэ давай эн пов!

Опонько видзсис, кажитчö, дугдiс повны.

Гырдзза-Аршин кылiс сьöлöмнас, что сiйö видзчисьö чöскыт обед, нюлiс тырппесö.

И сибалiс вöлись сiя минутаыс, кöр Фаина, сё эшö паймöмкодь и гöрдöтыштöм, стыдитчöмöн петiс кухняись, сувтiс раздача сайö и чиннöя копыртчис гöссеслö:

— Здравствуйте, дона земляккез!

— Здравствуй, сьöлöмшöриньöй, здравствуй, мича нылiньöй! — кокнита сярзис Гырдзза-Аршин, öшöтiс Фаиналö шикарнöй поклон. — Вот и локтiмö ми. Шентiмö бокö быдöс важнöй делоэзнымöс и локтiмö шакардаöн.

Фаина ыджыт любопытствоöн нёджжöвтiс Опоньколань, эз понды сайлавны дивуйтчöмсö, шуис гажöна:

— Ой, Опонько, кыдз тэ быдмöмат! А кытшöм лоöмат!

— Быдмыштiс миян Опонько, быдмыштiс, — сэк жö шыасис Гырдзза-Аршин. — И сэтшöм сiя вына да прока лоис — асьсö кайскöй лешаксö öт кинас вермас. Веритан я тэ, мича нылiньöй, кытшöм случай вöлi. Кыдзкö колхознöй пороз Буян ыжмавны пондiс — челядьлö öтöрö петны оз сет, иньпöлöслö тожö. Сэк и корисö Опонькоöс, тшöктiсö сылö велöтыштны бöб скöтинасö, мыччавны сылö пуж. И мый тэ думайтан? Мыччалiс эд! Кутiс Буянöс бöжöттяс и давай жö öвтны воздухын. Öвтiс, öвтiс да сэсся кы-ыдз свистнитас сiйö, видзöт — ылöстöм пороз, дзик ракета, лэбзис, сэк жö вожасис Лысöй Чöвпанлöн йыв вылö! Вот сiя кытшöм, миян Опоньконым.

— И-ой, Опонь, кыдз жö тэ этö вермин? — сералöмöн горöтчис Фаина. — Порозöс, керöс вылö чапкин?

Опонько, асьныт вежöртатö, шы эз сет. Сiя только шыннялiс стыдитчöмöн да видзöтiс джоджö. Отсалiс сылö Гырдзза-Аршин. Сiя виш-виш керис нырнас, юалiс:

— И мый жö миян талун пöжасьö да пусьö горас. мöднёж шуны — плита вылас? Мыйöн тэ миянöс гöститöтан, горадзуль?

Фаина висьталiс, что талун пуисö свежöй капустаись борщ, стряпайтiсö миллионся унажык пельняннез, паровöй котлетаэз кайскöй соусын да эшö блинчиккез да уна мый мöдiкö.

— Бур! — ошкис сiйö Гырдзза-Аршин. — Лöсялö! Пуксьы, Опонько, пызан сайö, ужо чöскöтамö öммез.

Пуксисö пызан сайö, чожажык босьтiсö киö паннез. Народыс столовöяс эта часö вöлi етша, и Гырдзза-Аршин решитiс весь кадсö не öштыны:

— А славнöй жö зоночка вöлöма миян Опоньконым, веськыта шуны — мировöй зонка. Видзöт-ко, мый сылö юрас пырöма...

Старичок не тэрмасьöмöн гуддисьыштiс пиас и кыскис бумагаö каттьöм добросö, матö вайöтiс ныр увтас, кунис синнэсö и нюкайтiс:

— Вот козин тэныт вайöма, примит-ко, матуш!

— Деду, да мый тi эшö! Вот жö... Да кыдз жö сiдз?

— Примит, примит. Ачыс мöдiс сетны, да адззан, кыдз петiс... Менö корис. Ачым ог, шуö, лысьт. Стеснительнöй сiя мортыс, висьтала ме тэныт, уж сэтшöм стеснительнöй. Не мöдiккез кодь сiя, не супоней кытшöмкö или, шуам, нахал. Только вот...

— Мый эшö, деда? Поди, вина юö? — козинсö киö босьтiкö, повзьöмöн моз юалiс Фаина.

— Мый тэ, мый тэ? Кыдз тэ верман сiдз думайтны? — пым борщ панялiкö перыта горöтчис Гырдзза-Аршин. — Да этатшöм морт пондас разь срам винасö юны? И капля некöр öмö оз босьт. Только вот...

— Да мый эшö, деда?

— Чöв, эн юась. Вот кывзы-ко, пель одзат висьтала. Тэ, Опонько, сёй, эн кывзы миянöс.

Старик судзöтчис öмнас нывкалöн пель дынöдз, но горöтчис не гусьöн, а сiдз, что и глухöй бы кылiс:

— Öддьöнöв радейтö тэнö. А этö... Хех-хех-хех!

Фаина бöра сiдз и öзйыштiс. Гырдзза-Аршин кольччис довольнöйся-довольнöй и тшыг пон моз уськöтчис сёяныс вылö, горша да чöскыта панялiс дзирыт борщ, сёйис котлетаэз, ошкис Фаиналiсь соуссö, кöда, сы кыввез сьöртi, вöлi мася куимись кöражык.

— Этатшöм соусöн, — бобгис сiя, — пипуовöй пильнöй чаг казявтöг ньылалан. Диво кутö, кыдз позьö керны сэтшöм соус. Только вот...

— Мый бöра, деда?

— Котлетаэс, думайта ме, öнджа... невна солаöлöсь талун петöмась. Конечно, этö и вежöртана. Радейтiсь нывкалöн быдпырся сёяныс солаöв аркмö. Хех-хех-хех!

— Висьталан тэ тожö! — досповна ни öшис да паймис Фаина. Сiя эз вермы видзсьыны, ачыс эз казяв, кыдз чувйыштiс стариклö бокас. — Кытшöм тэ... чужöмöс кулян.

Гырдзза-Аршин, кажитчö, öвсис, эз ни понды згальничайтны. Пым яя борщ да котлетаэз бöрын сiя кутчисис блиннэз бердö, юис чай. Сэсся чышкис тырппесö бумажнöй салфеткаöн да малалыштiс тошсö, дзирыта благодаритiс землячкасö нянь-сов понда, шуис сiйö поварскöй делоись волшебницаöн и вдруг горöтчис:

— Склероз я мый я пондöтчö, трижды-трою! Эд нач и нач вунöтi... Миян том агроном Юрий Андреевич Кушманов, кöда вот-вот лоас айöн, заказ меным сетiс: мый бы эз вöв, а вайны городсис кагаоклö приданöй. А ме и вунöтi. Ужо, горадзуллез, тi пукалыштö öтнаныт, а ме котрасьышта магазиннэзöт, кошша приданöйсö. Ме шупыта...

Опонько и думайтыштны нем эз ешты, только öмсö осьтiс. Мый нö эстöн сэтшöмыс шогмö? Дзугсис я мый я дедушко Фокич, видзöт, кыдз бöбöтiс-вурис. Висьталiс, что öтлаын лоасö... Вот и верит эта бöрын йöзыслö!

А Фаина, кажитчö, радмис. Сiя шынньöвтiс и пондöтiс:

— Кытшöм сэтчин, миян волокын, погоддяыс öнi сулалö? Сё зэрö, поди? — юалiс сiя.

Опонько, тыдалö, вежöртiс, что Фаина сё сэтшöм жö, кытшöм вöлi одзжык, кöр велöтчис Учöт-Дзимбырас: простöй и вежöра нылочка, мый сыись повны да стесняйтчыны? Повны совсем немись. И тöждiсьны, сiдзкö, тожö нач немись. И зонка эз понды тöждiсьнытö. Сiя смелöя бытшкис вилкаöн чöскыт блин, горöтчис солиднöя:

— Погоддя öнi бытшöм сулалö. Сев бöрын невночка зэрис, бура мусö кöтöтiс, а часöт шоныт лоис, кöс. Осяэз басöка петалiсö.

Вот кыным кыв шоччисьтöг вермис висьтавны Опонько! А эд мукöдыс думайтiс ни, что сiя пентюх, кытшöмö светыс эз адззыв, что сiя кынмöм курöжок и сiдз одзлань. Не, Опонько не пентюх и не кынмöм курöг, сiя эшö мыччалас асьсö.

Дата добавления: 2015-11-16