КЫДЗ ШЫННЯЛÖ АПОСТОЛ 5 страница

Кöр шондiыс сёдаки таралiс Лысöй керöс сайö, ыб вывсянь локтiс Опонько. Жиля-жоля чапкис посöдзас сай пельöсö сьöкыт кöрттэз, комбинезон чöвтiс. Опонько пар öнi гöрö, локтö гортö сёрöн, лякöсь да нятьöсь, бытьтö шучкöп ни боссьöма солярканас да быдкодь маслонас. Но шыннялö гажöна. Талун öдва ештiс вуджны порогсö, горöтчис ошшасьöмöн:

— Двадцать гектар мымда гöримö Трофим дядькöт. Норма да джын керим.

— Вот кыдз! — радуйтчис пöрись мам. — Ужо, часöт вот чукöрта мыйкö пызан вылö.

— Ешта сёйнытö. Петавла перво пес поткöтышта.

Лöнь да спокойнöй быдмис Опонько. Мамкöт некöр эз и думайт пиньгисьны, местнöй восьмилетка кончитiс не умöль отметкаэзöн. Добрöй отир отсöтöн велалiс вочны плуггез, регулируйтны пиняэз, быдкодь сеялкаэз. Вермö и тракторöн рулитны, бытшöм механизаторöн лоис. Уджалiсь сiя мортыс, хозяйственнöй. А вот агроном Юрий Андреевич Кушманов лöгöнкодь дзарьялö зонкаыс вылö, сы бöрын, кыдз вовлiс детинаыс ордö дядьыс, Кушман Егорыс, — кажитчö, оз и лэдз том механизатор вылiсь синсö. Мамыс ой и лун енлö юрбитö, ачыс лöнь кытшöмкö, сё чöлö и чöлö, лишньöй кыв оз горöтчы. Поди, тожö важын ни Христосыс кипод увтö шедiс? Кыдзкö локтiс агрономыс ыбö, быдöс видзöтiс-керис, дыркодь дзарьялiс Опоньколань, вöлись и горöтчис:

— Дзик не ловья тэ, зонка. Оз сотчы тэын настоящöй биыс. Унаись ни ме думайтi, мыля этö тэ комсомолö он пыр? Клубись тэнö нето библиотекаись тожö эшö öтпыр эг адззыв.

— Дык! — паныт шыасис Опонько, лэдзис юрсö морос вылö и давай видзöтны муö. Сэсся нем эз висьтав.

Сувтiс сэк Опонько дор тракторист Трофим Зобнин, мужик серьёзнöй и рассудительнöй.

— Опонькоись бур морт петас, сэтшöм детинасö öння кадö кошшы, кöть биöн, не уна панталан. Характерыс, веськыта кö шуны, сiя и быль — небытöв, öмас сё эшö каша пусьö, некыдз пусьынытö оз вермы досповна. Но эд пусяс жö кöркö, быдöс лöсялас. Да и мыйлö жö варнакöн лоны или, шуам, уна лёбисьöн? Мыйлö лоны сылö бöбöн? Нет, Опонько добрöй мужик. Сенька Никонов вылö оз вачкись, не бузотёр и не пустöй бочка.

«Лучше бы сiя и бöбалыштiс невночкасö», — думайтыштiс ас кежас агроном. А то — «небытöв характерыс». Сэтшöммес и котöртöны вичкуö енсянь совет корны. Нет, Опонькоöс некыдз оз позь шуны öння кадся геройöн!

Юрий Андреевич керис öддьöн бура, что думайтiс аскежас, эз понды тронгыны горöн. А то вермис бы, пожалуй, öбидитны зонкасö. «Не öння кадся герой!» А мыйöн не öння кадся? Зонка кыдз зонка.

Вот петiс сiя öтöрö, босьтiс киö колун да час гöгöр жольдiс да жольдiс кыдзовöй пес, джын машина етш поткöтiс. А сыбöрын чер обукöн сöтiс керку стенаэз кузя, быд кероксö пешлiс, гöгöртiс гортсö, быд пазö черсö мöртлiс и юрнас гогинялыштiс: сiсьмöм керкуыс.

— Натьтö, киссяс не талун, дак ашын, — висьталiс мамыслö. — Шучкöп ни бусö пöрöм быд керыс. Но да ладно, мам! Талун председатель менö ачыс правленнёö корлiс, серьёзнöй басни вöлi.

— Этö эшö мый сэтшöмыс? — повзис Эринья Потаповна.

— Ыджыт Дзимбырö тшöктö овнытö мунны. Виль квартира кöсйö сетны. Асьныт, шуö, и бöрйö усадьбасö, босьтö, кытшöм медбура гленитчас.

— Этö эшö мый сэтшöмыс? — бöра юалiс Эринья Потаповна. — Бöра сiя миян бердö кутчисьö? Да ме жö сылö чорыта висьталi! Вот жö разбойник!

Опонько, пызанланьö дзарьялiкö, висьталiс, кыдз вермис:

— Миян керку местö кирпичнöй завод сувтöтны мöдöны. Ме шуöмöн, колö согласитчыны. Адззан, нем вылö ни оз туй керкуным, нельки и вочны сiйö оз ни позь.

— Некöр эталö не лоны, Опонько. Кытöн олi кузь векöс, сэтöн и кула! — висьталiс Эринья Потаповна. Висьталiс чорыта, сэсся кöс кулакнас пызан кузя сöтiс, дзик сэтчö кöрттув вартiс. Опонько нельки синнэсö барöтiс: кыдз этö мамыс ассис выгодасö-споринасö оз вежöрт, виль керкусянь киöн-кокöн пыксьö? Некин и некöр этö курччöвтны оз вермы. Нёштöм делоыс петö. Эринья Потаповна чöлöмöн вайис пызан вылö сёян. Сы синнэз одзын, бытьтö туманiсь, жагвыв петiс ни Куть-Кутиха, дзик турун юр локтiс сё матöжык и матöжык, грöзитiс чуньнас: «Следитö тэ сьöрын Христосыс, следитö!» И быль следитö, тыдалö! Вон и сьöлöм вылын сэтшöм сьöкыт лоис! Ох, ох...

— Председатель сiдз и шуис: колхоз отсалас виль керку сувтöтны, если тiянлö готовöй квартира оз гленитчы, — дзирыта одзлань баитiс Опонько. — Вöр сетасö, нельки и деньга оз босьтö. Тшупсьыны тожö отсаласö, а сэсся...

Пöрись мам бытьтö эз и кыв, сё думайтiс и думайтiс ассис кузь думасö. Но чожа мыйись трекнитiс пельпоннэзнас, горöтчис зонсö осудитöмöн:

— Быдмин тэ ыджыт да вына, а юрыт — пустöй гырнич. Умыт сэтöн и чепöль мымда оз адззись. И мыля менö господь наказывайтö, мыля öтiк зонлö унажык ум эз сет? Да тöдан я тэ, мый лоö сэтшöмыс — виль керку тшупны? Эд быд керсö колö сорокись бокись бок вылö бергöтны, сорокись лэбтыштны сiйö да сэсся бöр лэдзны. И черöн öвтчынытö колö, а не паньöн пызан сайын, черöн, мыся...

— Соседдэз отсаласö.

— Соседдэслö сёян-юан сувтöтны колö. Эд модаыс öнi кытшöм? Локтас кытшöм-нибудь зимогор, кöрттув стенаö дорас, тэ сувтöт эта понда сылö быдса бутыль вина. Нет уж, зону, давай-ко сiдз и керамö, кыдз öнтай баитiмö. Параська, сiя бытшöм да бур характера нывкаыс. Буржыксö сёравно он адззы. Сылöн керкуыс и счастье миянлö.

— Мам, да кудоба жö сiйö монлалö!

— Эта не тэнат дело! — эз вермы видзсьыны Эринья Потаповна, чирöстiс мымда вын. — Тэ этö кинкöт пиньгисьны кутчин? Мамыткöт? Ах тэ, стыдтöм рожа! Да вот кыдз босьта киам бедь!

Босьтны киас бедьсö сiя эз ешты. Дзуркнитiс-оссис ыбöс и керкуö, кыккусiнь горбыльтчöмöн, ружтöмöн да ойзöмöн, пырис Куть-Кутиха. Сiя юасьтöг-висьтасьтöг шлёпкисис аслас местаö лабичö, öдззис причитайтны:

— Господь тэ, миян батюшко! Греххез миян, греххез!

— Кыдз и овнытö пондамö, — паныт шыасис Эринья Потаповна.

Мый жö керны Опоньколö? Поди, петны öтöрö, локны деревня сайись ыджыт туй дынö, сэсся пуксьыны попутнöй машина вылö да нильдыны, кытчö синнэз видзöтасö? Вон Васька Головин нильдiс жö городö, олö сэтчин! Некытшöм нужда оз тöд. Но сылö мый, Голованыслö? Аймамыс кулiсö, Васька дзебис кыкнаннысö. А сэтöн мам-старуха. Кольны сiйö öтнасö — быдсöн паськыт мир пасьта позор лоас, бур ойлунсö он ни адззыв. Мый жö сэтöн кернытö?

Эта сьöкыт думасянь Опонько сьöвзис канава сайöдз, минута сьöрна гыжьялiс юрбöрсö и вöлись мунiс деревняö, матöжык отир дынö.

Ыджыт деревняын рыттэзнас оланыс ключöн пизьö. Неважын локтiсö гортö поскотина вылiсь мöссэз, часöт деревняыс тырöма парнöй йöв дукöн. Кокнитик тöлок рознитö улица пасьта курыт тшынок: кинкö лонтö гожся кухня дука пипуöн да сира чаггезöн, ужин пуö. Бригадирша Ольга Фомина, тётка кыз да öддьöн гора голоса, куканёкöс картаö бы йöртö, видö сiйö сякöй нёштöм кылöн, а куканёкыс лэбтöма бöжоксö, чеччалö бöбись кузь кокнитик коккес вылын, сiйö и видзöтö, кыдз бы пышшыны дружоккес дынö.

А вот и старичок Гырдзза-Аршин паныт шагнялö, пиджачоксö шубöвтöма, картуз юрбöрас чатыртöма, а конувтас мый эта сэтшöмыс? Кытшöмкö интереснöй предмет нöбöтö — пöвтор не пöвтор, шкатулка не шкатулка.

— Здорово, Опонько! — чирзö дед гажöна. — Мый сiдз юртö öшöтöмат, гöна капуста?

— Мыдзи ыбас, лунтыр эд уджалi.

— Хех-хех-хех! Мыдзи, шуö! А ачыс нывкаэз дынö сiдз и лэбзьö кватьöт скорость вылын. Но и хитрöй шпана!

— Да не нывкаэз дынö ме.

— Тöдам!

Гажа старичок, кöдö няньöн эн верд, а сет пöттöдз баитыштны, сэтöн жö и юöртiс, что кöр сiя вöлi том да басöк, сэк тожö радейтiс нывкаэскöт гартчыны да вежмасьны, и гленитчис нылö, нельки сьöлöмшöрöн мукöд малинтуссес шувлiсö, вежöктiсö öтамöд дынö, а порой и тышкасьлiсö сы понда. Но вот мигнитiс кыдзкö купеческöй нывлö, нем эз думайт — а сiя, купеческöй нылыс, сэк жö рап öшöтчис сиви вылö, кыскис вичкуö веничайтчыны. Вот сiдз.

— И мыйöн ме сiйö öзтi сыбурна — öнöдз загадка, — шынньöвтiс старичок. И сэк жö юалiс: — Сiдзкö, не нывкаэз дынö шыбыльтiн? А кытчö нö сэк?

— Горе менам. Баитыштны бы кинкöткö, — сайласьтöг горöтчис Опонько.

— А мекöт разь оз туй? Мунам жö, дружок, пуксям вон сэтчин колодаыс вылö, баитыштам ужо, кöть асылöдз, ойыс эд асланым.

Пуксисö ордчöн йöр бокö колода вылö. Гырдзза-Аршин сувтöтiс ассис загадочнöй предметсö кок бердас, лöсьöтчис кывзыны Опонькоöс. Зонка перво видзöтiс только муö, кок увтас, мыйкö бобгис ас кежас, нем эз позь вежöртны, но жагöник позьöтiс öмсö и эз ни понды чуклясьны, висьталiс веськыта, кыдз пöрись мамыс сiйö мöдö гöтравны. Старичок сiдз и осьтiс öмсö, давай кывнас шовкöтны.

— Вон сэтöн мы-ый, — шуис думайтöмöн. — Сiдз, сiдз. А мый ме тэныт висьталi, гöна нинкöм? Не просто сiдз, мыся, велалiс тiянö эта бондяыс, эта Куть-Кутихаыс. Эт, мый юрас пырöма лешаччöй кикиморалö. Вот жö, пöрись икота! Абу жö котöртöма кытчöкö мöдiк ладорö, абу кутчисьöма мöдiк бердö, а тэнö, кайскöй куканьöс, лöсьöтчöма арканавны. Но, чомор табун!

— Поди, тарöвтчыны меным, деду, кытчöкö?

— Куть-Кутихаыс увья? — серöмтчис старичок. — Да тэ тай, Опонько, и былись кукань вöлöмат! Кытшöмкö сiсьмыны ни пондöтчöм старуха увья чапкыны роднöй горт? А мамыт йылiсь вунöтiн? Вот эд мыйын делоыс! Нельки и думайтны эн лысьт. Тэ, дружок, лучше ме бердö ёнжыка лякась. Морт ме опытнöй, быд берсясö светас овтöн адззылi. Вежöртiн?

— Может, меным, дед, сельсоветö ветлыны? Нето партийнöй секретарьлö норасьны, быдöс висьтасьны?

Старичок думайтыштiс невночка, чупöтыштiс кöс тырппезнас. Сэсся решительнöя горöтчис:

— Немлö. Öнi быдлаын: и сельсоветын, и правленнёын — важнöй экономическöй вопроссэз решайтöны. А сэтöн кытшöмкö рукйöсь старушкаэз. Ветлi ме неважын правленнёас, баитыштi Пётр Парамоновичыскöт, мыся, досповна ни артсис Куть-Кутиха петiс, неделянас кыкись-куимись вичкуö котрасьö, воспитательнöй удж бы, мыся, сыкöт чулöтыштны колö, дак председательыс веськыта сiдз и шуис: немлö и кадсö пö весь öштыны, мед кöть кытöн шляйтчö, эта сылöн делоыс. Нет, Опонько, правленнё йылiсь весь тэ, пожалуй, думайтан. Шум быдöс сельсовет пасьта лэбтан кытшöмкö бöбмöм старуха увья, тэ вылын жö згальниккез серавны кутчасö. Делоыс тэнат, зонка, деликатнöй и действуйтны колö деликатнöя жö. Ужо ми ас мознаным и арталамö быдöс.

Опонько шы эз сет. Старичок тожö шоччöтiс кывсö да тырппесö, кымöссö картузöн чышкис. И вдруг öдззис тронгыны виль вынöн, перыта и дзирыта:

— А гöтрасьны тэныт колö! Этö — непременно, öнi жö. Медбы миян обществоыс и синöн кваркыш эз ешты керны.

— Параськаöс я мый я босьтнытö?

— Шыть! Босьтны тэныт, Опонько, нывкасö колö смелöйö, городскöйö.

— Кысь сэтшöмсö? Туй вылын оз валяйтчö.

Эна кыввезсянь старичоклöн смехыс пондiс петны. Сiя лукавöя чикыртiс синнэсö, Опонькоöс пельпоннэс кузя сöтiс:

— Кукань тэ! «Кысь сэтшöмсö»! Эттшöм славнöй детина и вдруг... Адззам! Тшöкты делосö меным керны — быдöс артала. Оча ки? Олö городас менам öтiк тöдса невеста. Висьтала ме тэныт — вот эта нывка. Настоящöй солдат, а не нывка. Нельки и не солдат, а сержант-прапорщик! Ачыс сiя миян ладорись, кулiсö, адззан я, аймамыс, детдомын сiя быдмис. И бур быдöс, ладно. Часöт городас и уджалö, столовöйын. Не öтпыр ни меным баитiс: гортö, шуö, кыскö, гажтöм öддьöн городас.

Опонько жмитыштiс пельпоннэзöн, видзöтiс кытчöкö бокö. Старичоклöн, тыдалö, öзйис ни сьöлöмыс, эз вермы и минута пукалыштны чöлöмöн:

— Натьтö, эн эшö вунöт тэ, Опонько, Чомор Иванöс, кöда Гундырын олiс? Дак вот сылöн нывкаыс и эм. Фаинаöн шуöны...

Сэтöн Опонько нельки кок йылö чеччöвтiс. Чомор Иванöс сiя, конечно, тöдiс. Бура тöдiс и сылiсь нывсö, Фаинасö. Ыджыт Дзимбырын школаын велöтчикö пукалiсö öтiк парта сайын, кытчöдз нывкалöн аймамыс вöлiсö ловьяöсь и Фаинасö эз иньдö городскöй детдомö. Боёк вöлi нылочка, смелöй. Быд зонкасö кипод увтас видзис, обидаэз нысянь эз терпит, чуть мый — сiдз и сöтö кулакöн, нето мыйöн шедас сiйöн и öбыртас. А Опонькоöс, колö висьтавны, некöр и чальöн эз вöрзьöт. Этö, конечно, сiйöн, мыля и ачыс Фаинасö тожö чальнас некöр эз вöрзьöтлы. Кытчö ни сэтöн. А эшö случай вöлi...

— Оз сiя мун ме сайö.

— Кыдз сiдз оз мун? Мыля оз мун?

— Сiя сэтшöм... Характерыс ой-ёй...

— А тэ? Тожö эд сюра-пеля. Эд главнöйыс мый, Опонько? Зонкаыс тэ вына, кыдз лешакпиян, виднöй.

Нем сэсся эз висьтав Опонько, дзик стыдувьяс кывсö ньылыштiс. Гырдзза-Аршин керис вывод, что зонкаыс сыкöт согласитчис, и юöртiс, что сiя ашын жö ветлас городö, быдöс сэтчин арталас, кыдз колö.

— Меным сёравно ветлынытö ковсяс. Вот, адззан, кытшöм молодецöс судзöтi? Музейö нöбöтны тэрмася. Корöны начальниккес.

Старичок босьтiс таинственнöй предметсö, мыччалiс Опоньколö.

— Святöй лик? — дивуйтчис Опонько.

— Сiя. Ме думайта, не простöй угодник, а уникальнöй. Кöть быдöс светсö гöгöрт, а сэтшöмсö сэсся чередь панталан. Уникальнöй! Видзöт жö, кытшöм сiя важнöй да кодя, дзик ловья детина дзарьясьö. Пельпон вылас, адззан, кытшöмкö бур матерьеись, парчаись я мый я, кокнитик шабурок кышöма, тошсö сыналöм. Эт, кытшöм бес, щёголь-моголь. Бытьтö праздникö лöсьöтчöма нето инькаэз дынö маласьны мунö. Козьналiс сiйö меным старуха Миколика. На, шуö, нöбöт, колö дак. А Куть-Кутихаыс? Ах сiя, кайскöй варыш, трижды-трою! Ах, ёрдöм бондя...

Гырдзза-Аршин вдруг перыта лэбтiс юрсö, кывзiсьыштiс-керис.

— Опонько, гöна капуста тэ! Нем разь он кыв, а? Эд магазиныс дынын кытшöмкö событие пондöтчö. Кылан — шумитöны, зык сулалö...

Магазиныс дынын и былись кылiс вöвлытöм зык. Сэтчин öвтчисö киэзöн инькаэз, горöн чирзiсö. Гырдзза-Аршин чожа босьтiс угодниксö конувтас, мымда прок чепöссис магазиныслань, йöз дынö. Опонько вöтчис сы сьöрö.

А сэтчин сэтшöм картина! Дас кыным инька тойлалöмась Экся соседкалiсь ылöстöмсялöм зонсö, Петрухасö, пельöсö, чирзöны лöга, вот-вот синнэсö гарьясö.

— Вийны сiйö, паразитöс, колö! — рявзiсö инькаэс. — Öшöтны онняюрöн! Мургыльтны юрсö, кыдз понлiсь — сымда и дело.

— Сьöвзьö, инькаэз, сылö стыдтöм рожаас, — ускайтiс лöг инькаэсö пöрись Экся. — Кык курöжокöс талун джагöтöма, выродок! Локтi ыб вывсянь гортö, а курöжоккес абуöсь ни!..

Петруха вöлi код, нятьöсь и пашмöм юра. Сiя дорйисис отчаяннöя: мурзис, кыдз лöгöтöм ош, чужьясис коккезнас, матькисис. Но вот котöрöн локтiс кысянькö Юрий Андреевич Кушманов, локтiсö сельсоветiсь председатель Григорий Ильич Черепан да мöдiк мужиккез. Нiя шы сеттöг пелитчисö инькаэс коласö Петруха дынö, кутiсö кодульсö сикöджöттяс.

— Маминьöй! Простит менö! Эн сет вартлыныт! — уннялiс Петруха. Сiя, тыдалö, думайтiс, что мужиккес öдззасö сiйö гындыны.

Экся локтiс сы дынö бöрсяняс, дыр метитчис да кы-ыдз öбыртас кирзовöй сапогнас öтiк местаö!

— Вот тэныт благословеннёыс, понгöн! — шуис сiя радуйтчöмöн. — Отир, вашöтö сiйö син одзись дыв! Медбы и духыс сылöн, проклённöйлöн, матын эз вöв. Вашöтö сiйö вакрамешö!

Мужиккез кокнит сьöлöмöн тыртiсö сылiсь приказаннёсö: кутiсö Петрухаöс киöт-кокöт и бордпавйöн кыскисö деревня сайö, туйвеж дынö, кытöн отирыс видзчисьлiсö попутнöй транспорт.

— Тарöвтчы, дружок, да сэсся эн ни мыччись деревняаным!

— Тожö адззöма мода — курöггезöс джагйыны!

— Милицияö бы сiйö иньдöтны, — важнöя шуис Григорий Черепан. — Мыччавны бы сылö жарсö. А то нач попыскöт вельмöмась.

Инькаэз сё эшö горöтлiсö, видчисö. Экся горöтiс синвасорöн. Гырдзза-Аршин вирснитiс нырнас, пуктiс черта:

— Вот эд винажугыс кытчöдз вайöтö. А эд кытшöмкö нечистöй делоöн вовлiс. Куть-Кутихакöт вежмасис. Да!

Одз асывнас Гырдзза-Аршин попутнöй машина вылын ыскöвтiс городö. Сэтчин сiя первöй делоöн пырис краеведческöй музейö, чожа сетiс ассис симпатичнöй святöйсö эта учрежденнёись директорлö, Виктор Никифорович Старожиловлö, öддьöн бытшöм и добродушнöй мортлö, кöда ныр вылын красуйтчисö сьöкыт стеклоа ыджыт очкиэз. Директор дыр бергöтлiс ликсö сiдз и этадз, любуйтчис сiйöн и орсiс, дзик учöтик кагаок чачаöн. Сыбöрын осьтлiс серебритöм оклад, нюкайтiс ликсö и вöлись сувтöтiс аслас кабинетiсь полочка вылö.

— Эта, ме думайта, ачыс Николай Чудотворец, — радöн висьталiс сiя. — И, натьтö, цена сылö абу. Вот локтас Иван Иванович Подгорин, видзöтас экспонатсö öтмöдöрсянь и керас колана вывод-заключеннё. Куимпöвса спасибо тэныт, Гаврила Фокич, гран-мерси, кыдз баитöны француззэз.

— Но и висьталан жö тэ, Виктор Никифорович, хех-хех... — скромничайтiс Гырдзза-Аршин, пыдын креслоö пуксикö. — Да этатшöм щёголлесö ме тiянлö верма быдса додь кыскыны. А мый, ликкес былись öддьöн донаöсь? Поди, и наука нiйöн интересуйтчö?

Виктор Никифорович эшö дыркодь любуйтчис виль экспонатнас, сэсся сьöкыта ветлöтöв-керис пельöсiсь пельöсö, вöлись пелитчис аслас письменнöй пызан сайö, лэбтiс очкиэсö кымöс вылö и только эта бöрын шуис значительнöя:

— Мукöд святöй ликкес, Гаврила Фокич, лыддиссьöны шедевррезöн, нылö некытшöм цена абу. Да-с, некытшöм цена абу. Кыдз изящнöй искусстволöн великöй произведеннё нiя, веськыта висьталам, золотося донажыкöсь. Да-с... Этö ме сiдз баита. Этадз баитö ачыс Иван Петрович Подгорин. Висьтала ме тэныт, Гаврила Фокич, умнöй жö морт эта мортыс, учёнöй, кытшöмö шондiа лунö биöн он адззы, знаменитöй искусствовед. Любöй стариннöй произведеннё, картина, шуам, нето святöй лик, шучкöп адззö. Вовлiс мöйму миян музейö, неетша колдуйтiс татöн.

— Видзöт жö, батя, — дивуйтчис Гырдзза-Аршин. — Дошлöй, видно, мортыс.

— Эшö бы не дошлöй. Шедö сысянь быдкодь шарлатаныслö, кöдна святöй ликкесö товарö пöртiсö, богатсялöны, кыдз чераннез. У-у, сiдз бы и летi-вотi сэтшöммесö. Разоблачайтö сэтшöм вортабунсö Подгориныс. Но не сы йылiсь часöт басниыс. Ми, Гаврила Фокич, сёрнитамö часöт святöй угодниккез йылiсь, стариннöй шедевррез йылiсь. И висьталамö ыджыт спасибо, если адззан да ваян миян учрежденнёö сэтшöм шедеврресö. Этöн тэ керан быдöс человечестволö вöвлытöм услуга.

— Ух тэ, — изiс бöрнас Гырдзза-Аршин пыдын креслоас. — Хех-хех! «Человечестволö вöвлытöм услуга»... Да тэ сэтшöмö висьталан, Виктор Никифорович...

— Ме этö не смехись, а серьёзнöя баита, — шынньыштiс öт тырп дорнас Виктор Никифорович и бöра дыркодь радуйтчана синнэзöн, ыджыт интересöн видзöтiс-керис Николай Чудотворецыс вылö. — Баита ме этö, Гаврила Фокич, öддьöн серьёзнöя. Эшö содта, раз сэтшöм дело: святöй ликкесö кошшöны да öктöны не только простöй йöз, но и знаменитöй учёнöйез, солиднöй научнöй работниккез. Вот кывзы-ко, мый гижöны öтiк бур книгаын...

Виктор Никифорович перыта кыскис пызан ящик, гуддисьыштiс бумагаэз коласын и чожа кыскис неыджыт брошюра, сразу жö адззис колана страница, вылына лэбтiс веськыт кисис ыджыт чуньсö и лэдзис очкиэсö ныр вылас. Сiя ыджыт чувствоöн лыддьöтiс: «Медбы кошшыны стариннöй живописьсö, научнöй сотрудниккез организуйтöны уна сякöй экспедицияэз. Искусствоведдэзлöн да реставраторрезлöн отряддэз ветлöтöны городдэзöт да деревняэзöт, кежавлöны чапкöм ни важ часовняэзö да храммезö, миян Россиялöн медылiсь пельöсоккезö. Мукöдпырся ковсьö подöн мунны не öтiк сотня километр, медбы адззыны след живописнöй реликвиялiсь, кöда йылiсь нiя пондöны тöдны летописнöй источниккез сьöртi. Быд торыс овлö сьöкыт туяс: и радыс и разочарованнё, мукöдпырся научнöй работниккес мыдзöны кулавлытöдз, но быдпырся сьöлöм нылiсь гажöтö результат: человечестволö бöр сетöма древньöй искусстволiсь шедевр...»

— Часöт тэныт вежöртана лоис, мый сэтшöм стариннöй святöй лик? — очкиэсö бöра кымöс вылö лэбтiкö, юалiс музейнöй директор.

Гырдзза-Аршин, кöр кылiс быдöс этö, лоис öддьöн серьёзнöй. Сiя дыр зыртiс ки долоньöн кымöс кучиксö, мыйкö думайтiс, нюлiс тырппесö. Шуис не öддьöн горöн:

— А ме моди аскежам, мыся, ликкесö öктöмыс — этö челядьлöн удж, весись орсöм. Ме, Виктор Никифорович, ог радейт сэтшöм отирсö, кöдна бöбалöм могись чукöртöны да вайöны гортö святöй угодниккесö.

— И ме сiдз думайта, дона тэ ёрт Гаврила Фокич, — дзирыта горöтчис музейнöй руководитель. — Но совсем мöдiк дело, кöр энö угодниккесö чукöртöны да кошшöны научнöй учрежденнёэз, кыдз миян музейным. Нiя дозоритöны народнöй достояннё. Эта öддьöн важнöй удж. Менам сотрудниккез, Гаврила Фокич, шоча и гортын овлöны, сё ветлöтöны ылiсь деревняэзöт, важ починоккезöт, дзарнитöны быд вичкуö и важ часовняö — сё кошшöны народнöй достояннё. И вайисö ни диво сякöй дона угодниксö да произведеннёсö, кöднö важын рисуйтлiсö строгановскöй школаись мастеррез.

Виктор Никифоровичлö, тыдалö, мыйкö усис тöдвылас. Сiя гажöна нёджжöвтiс кабинетсö омöн, синнэс югьялiсö, паськыт чужöмыс везъясис лукавöй шынньöлöн.

— Вайисö менам сотрудниккез кыдзкö öддьöн бытшöм святöйöс, Владимирскöй богоматерьлiсь изображеннё. Радуйтчим-керим быдöнным. И не весь. Кöр пондiмö видзöтны сiйö öтмöдöрсянь, и сiдз и этадз, кöр кульыштiмö окладсö, джоджö трина-брана киссисö... Мый бы тэ вермин думайтны? Кок увтö джоджас киссисö золотушкаэз!..

— Золотушкаэз?!

— Кыдз инö. Настоящöйöсь. Дас золотöй империал усисö, чеканкаыс — николаевскöй. Часöт нiйö асланым фондын видзамö. Охота кö дзар керны, верма и мыччавны.

— Вот тай эшö мый вöлöма! Хех-хех... А ме-ту думайтi, трижды-трою... Ме эд, Виктор Никифорович, коллективизация коста тожö, позьö шуны, геройöн вöлi: не öтiк святöй ликöс, кöднö тестьö, богатöй купец Данило Агапыч, сетлiс меным иньö сьöрын приданöй туйö, сотi горын. А мый, если нiя вöлiсö дона шедевррез и ныын тожö вöлiсö империаллэз?

Виктор Никифорович сiдз и дрöгнитiс быдöс вывтырнас, сiя нельки шоймис, чужöмыс öшöтчис, синнэс люммисö. Сiя гудыртчис, ки долоньнас — чавк! — сöтiс пызан пöв кузя.

— Эз ков сотнытö! Эд святöй лик — не только поповскöй атрибут. Этö искусстволöн произведеннё!

Гырдзза-Аршин виноватöя гогынялыштiс юрöн, пондiс бобгыны, нёштöма видны асьсö:

— Бöб вöлi, Никифорович. Ылöстöм сэк вöлi. Мый сэтöн керан? Да и модаыс нiя годдэзö кытшöм вöлi? Вот и ме тожö. Кыдз часöт тöдвылын: чапкала ликкесö горö, а инькаö, кöркöся купеческöй ныв, боёк сьöлöмшöр, öнi покоенка ни, гормöччанöн пöвсалö горбöс. Пешлiс сiя менчим быд коскаоксö, быд жиласö, а меным кöть бы мый. Сё эшö эг вунöт: öтiк лик сiя сёдаки вермис мырддьыны. Кватитiс, кыдз типокöс варыш, — и аллё! Нöбöтiс кытчöкö.

— Нöбöтiс?

— Нöбöтiс, Виктор Никифорович. А мый, если эта ликыс сё эшö дзонь, видзчисьö миянöс? Менам эд тестьö тысячаэзöн бергöтiс, а поди, и миллионнэзöн. Нэпман вöлi. И золотоыс, нем и шуны, сылöн, натьтö, не етша вöлi. Вот бы адззыны! Эта лоас колхозлö виль скотнöй двор — комплекс. Да и менам соседкалö, Эринья Потаповналö, сэк жö виль керку строитiсö бы.

Виктор Никифорович эз вермы öшшыны местаас. Сiя шупыта чеччöвтiс кок йылö, сьöкыт креслосö кокнас дрингис бокö, петiс пызан сайись. Кыз лысина, ёна öзйöм мороса, сiя öдззис котöрöн ветлöтны кабинетыс дзуртан джодж вылöт, котрасьны пельöсiсь пельöсö, неöтпырись зубыта сöтiс аслас лысöй череп кузя и вдруг тран сувтiс Николай Чудотворец одзö. Видзöтiс святöйыс синнэзö дыр, буравитiс нiйö шучкöп и эз вермы терпитны — босьтiс ликсö кыкнан киас, ёна трекнитiс.

Дата добавления: 2015-11-16