КЫДЗ ШЫННЯЛÖ АПОСТОЛ 8 страница

Петiс Юрий Андреевич öтöрö, стыдитыштiс асьсö: «Но, мый, лыддьöтiн лекциятö, торта пель? Эх тэ, апостол!» И сёдаки вöлi довольнöй. Веденькöт историясö сiя, кажитчö, ас местаын казьмöтiс. Мед думайтö Эринья Потаповна, кыдз да мый.

Агроном чикыртiс синнэсö да гажöна шынньöвтiс шондiлö, иньдöтчис гортлань. А сэтöн йöр дынын, сiсьмыны ни пондöтчöм колода вылын, Гырдзза-Аршин пукалö. Старик вöлi гажтöм, пукалiс юрсö öшöтöмöн, быдöс вывтырыс кöрчитчöма, бытьтö воробей январскöй морозсянь öшöтöма борддэсö, вот-вот кынмас.

— Абу менам счастьеö, хех-хех-хех, — сразу жö öдззис сярзьыны пöрись пенсионер, — кыдз только казялiс Юрий Андреевичсö. — Нем эг вермы адззыны. А музейщиккез корöны. Нельки öтiк стариннöй угодникöс некин эз сет.

— Не сэтчинiсь кошшан, старик. Миян ладорын чёрт тöдö мый шогмö, чожа обедня лоас, а тэ, дзор следопыт, нем он и тöд. Кылi ме, Куть-Кутиха да Эринья Потаповна бур угодникöс адззöмась, чудотворнöйö, а тэ котрасян кытöнкö.

Гырдзза-Аршин сiдз и ойнитiс, öгралана синнэзöн мöртöтчис агрономлö чужöмö, коккезнас вöрöтыштiс. Сiя босьтiс юр вывсис картуз, мыйлöкö нёджжöвтiс пытшкас, а сыбöрын кы-ыдз сöтас сiйöн муыс кузя!

— Ох тэ, господи! Трижды-трою!

Юрий Андреевич сэсся вильсö нем эз висьтав, сулалiс да видзöтiс, кыдз пизис «следопытыс». И старичоклö вöлi невежöртана, мыля том агроном эта кадö сэтшöм спокойнöй, оз и думайт тожö пизьны да волнуйтчыны. Эд сэтшöм делоыс — чудотворнöй йылiсь басниыс мунö... Недыр мыйись Юрий Андреевич сёжö горöтчис, что ванзыны святöйыс йылiсь кытчöдз одзöв, колö перво думайтыштны, а только сыбöрын ни...

— Лоа, кыдз могила, вежöрта жö сымдасö... Дак, шуан, батюшко, сэтшöм дело значит... Но висьтась, висьтась, кыдз нiя этö... Неужто быль чудотворнöйö гарйыштöмась? Вот öнджа...

— Гарйыштöмась. Этö быль. И отец Мисаил кöсйисьöма вовлыны, обедня пö мöдö чулöтны.

— Сiдз. Часöт ме вежöрта, мыйлö Куть-Кутихаыс кыкись кольöм неделяö вичкуас котрасис. Быдöс вежöртана лоис. А мый, если эта чудотворнöйыс отец Мисаил кипод увтын ни? Эд сiя, варнак, кошшö быд берсясö. Ачыс музейись директор висьтасис. А Петрухаыс мыйлö вовлiс?

— Ог тöд, ог тöд.

Старичок подробнöя висьталiс, мый сiя тöдiс отец Мисаил йылiсь, сылöн нечистöй делоэз йылiсь, юрнас гогинялыштiс.

— Понда действуйтны, — горöтчис решительнöя. — Понда действуйтны, вöрöтчыны. Ух, тэ!

А кыдз действуйтнытö? Мунны бöра Куть-Кутиха ордö. Вияс, пожалуй, ёрдöм коска. Сöтас юр кузя зорöн. Часöт вежöртана ни, мыйсянь сiя бöбсялiс. Чудотворнöйсö куим замок сайын, натьтö, видзö и сiдз просто некинлö оз сет. Не сэтшöм сiя старухаыс. Натьтö, и попыслö чередь сетас. Вашöтiс жö гортсис Петрухасö, кабак тупкöтöн шуис.

— Пондам действуйтны, Юрий Андреевич, — мöдöтпыр горöтчис Гырдзза-Аршин. — Поп Мисаилöс ми велöтамö дырöн узьлыны, мыччаламö сылö куимпöвса дуля. Ми сiйö позоритамö лешки-вошки, локтас кö деревняаным.

— Пырав рытнас ме дынö. Кыкöн думайтыштам невночка, сувтöтамö, кыдз этö шуöны, оперативнöй план. Задача миян одзын сулалö конкретнöй, сiдз ме думайта. Миянлö колö перво-наперво мездыны Эринья Потаповнаöс Куть-Кутиха гыжжезiсь, сы чераньвезiсь. Сэсся колö адззыны старушкалö виль оланiн, медбы и сiя, кыдз мöдiккез, кöть невночка олiс буржыка, вöлi бы счастливöй. Миянлö öнi жö ковсяс думайтыштны и Опонько йылiсь. Меным сё кажитчö, бытьтö эта детинаыс тожö шедöма ни чераньвезас. И эшö öтiк задача: дзугны отец Мисаиллiсь картiэсö.

— Керам! — чорыта шуис Гырдзза-Аршин. — Быдöс этö ми вермамö артавны. Ме эд тожö кадсö весь ог öшты. Ме думайтыштi ни аслам пöрись юрöн и висьтала тэныт, Юрий Андреевич: чужисö ни öтi-мöдi планнэз. И чудотворнöйсö некинлö ог сет, вот адззылан, менам сiя лоас. Кылö сьöлöмö — лоас пожива.

А кадыс сё котöртiс и котöртiс аслас туёк кузя. Куть-Кутиха да Эринья Потаповна лöсьöтчисö Опоньколöн свадьба кежö, быд лун кыкись-куимись пыравлiсö чуланö, юрбитiсö сэтöн садь быртöдз, кеймисисö господьыслö, медбы отсалiс вайöтны пондöтöм делосö конецöдз. Колхозниккез эна луннэзö кыскалiсö ыббез вылö назём и торф, трактористтэз гöрисö пар.

Гырдзза-Аршин получитiс городiсь виль депеша. Музейнöй директор Виктор Никифорович Старожилов радуйтыштiс старикöс дона да важнöй документöн. Плотнöй казённöй бумага вылын сiя гижис чорыт почеркöн:

«Видз пыр тöдвылат, любезнöй Гаврила Фокич, стариннöй святöй угодниккезлiсь мукöд приметаэсö. Вот нiя:

1. Ковчег. Кöр босьтан киат ликсö, пöвсö, дак обязательно пешлы чуньнат сылiсь дорресö да шöрсö: абу я шöрыс невна гарйöм. Если гарйöма, то эта гарйыштöмыс, öрокыс, и эм ковчег.

2. Поволока. Эта крепыт дöра, кöда клеитöма ковчегас. Чунь увтын сiя тожö кылö.

3. Левкас. Этö алебастрись да клейись сорлалöм масса, кöдö пуктывлiсö поволокаыс вылö. Левкасыс зэв чорыт, вевттьöм позолотаöн, бура полируйтöм. Этасянь сiя волькыт. Стариннöй богомаззэз левкасыс вылö и рисуйтлiсö картинкаэзнысö.

Некöр эн вунöт, Гаврила Фокич, эшö то мый: стариннöй богомаззэс рисуйтлiсö угодниккесö паськыт пöввез вылö и, медбы нiя, пöввес, эз потласьö и эз шыграсьö, сай ладорас обязательно керлiсö быдкодь шпонкаэз, тэчлiсö поперечнöй планкаэз...»

Этö интереснöй документсö старичок лыддьöтiс, натьтö, дас кынымись, велöтiс наизусть. И только эта бöрын, медбы не öштыны, пуктiс бумагасö аслас сундункö, самöй пыдöсас.

— Хех-хех! Планочкаэз, сiдзкö, — сералiс аскежас, кöр документыс вöлi дзебöма. Старик дыркодь маршируйтiс горницаöт, бобгис: — Планочкаэз! Тöдам ми нiйö, тожö адззылiм. Быд крестьянскöй ыбöс вылын сэтшöм планочкаэс эмöсь, и быд кайскöй пермяк нiйö шуö нарвиэзöн. Хе-хе... Адззам стариннöй угодниксö, Виктор Никифорович, сёравно адззам!

И бöра сiя пондiс пизьны, бöра öштiс спокой и он, часто вунöтлiс сёян йылiсь.

Старик мыдзтöг ветлöтiс деревняэзöт да хуторрезöт, корис пöрись отирлiсь быд берсясö. Но, висьталам веськыта, удача эз вöв: Гырдзза-Аршин эз адззы и

Öтiк пöвторок. И сэк сiя решитiс вились ветлыны Куть-Кутиха ордö. Моментсö бöрйис, кажитчö, лöсяланаö: хозяйка асывсянь кучитiс карчйöрын картов, керкуын, сiдзкö, вöлi öтнас Параська. Пырис сы дынö Гырдзза-Аршин, здоровайтчис дзирыта, горадзульöн да царевнаöн нывкасö шуис и пуксис сыкöт ордчöн.

— А ме жöник сайö, деда, муна, — юöртiс Параська.

— Но-о! — дивуйтчис Гырдзза-Аршин, бытьтö кылiс эта йылiсь первуись. — И кин сайö нö?

— А Опонько сайö тай.

— Сiдз. А ме сайö он мун?

— Муна! Пятачок сетан?

— Сета, Параська. Нельки кык пятак сета. И конфетаэз да прениккез быдса фунт тэныт неба. Только вот мый, горадзуль, висьтав меным пель одзам: кытöн бабыт святöй ликсö видзö? Но сiйö, чудотворнöйсö.

Эта вылын ны коласын интереснöй басниыс и орис. Гырдзза-Аршин бöбись чеччöвтiс кок йылö, сразу ньылыштiс кывсö: ыбöс коласiсь сiя казялiс Куть-Кутихаöс, Старуха видзис киас тöдса ни миянлö кыдзовöй зор.

— Тэ бöра татöн? — не öддьöн горöн, но значительнöя юалiс сiя. — Ах тэ, сэрпöсь ныр! Бöра святöй лик тэныт колö? Чудотворецла локтiн? Не-ет, ёрдöм кöин, ловйöн часöт тэнö ме ог лэ-эдз! Часöт жö юртö поткöта!

И, бедьсö лэбтöмöн, сiя иньдöтчис старикыслань.

Стариклöн положеннё вöлi нач критическöй. Гырдзза-Аршин бледöтiс кыдз смерть, сылöн кöстiсисö коккес, пидзöссэз лоисö ватнöйöсь. Но эз öшты юрсö пöрись морт. Ловкöя, бытьтö пружинаэз вылын, чеччöвтiс лабичö. Сэтöн мыччалiс старушкалö ыджыт дуля, чуть öмас сiйö эз тапкы, и вöлись чардбися чожжыка лэбзьыштiс осьта öшынö. Öшын увтас, асьныт вежöртат, сулавны сiя эз понды, а мымда вын чепöссис котöртны. Котöртiс Гырдзза-Аршин перыта. Тöвчик некöр бы эз вöт, дасiсь перытжыка, нёжли сэк, кöр лёбис ылöстöм шырпиянокыс йылiсь, нельки öтпырись бöрас дзар эз кер. И быдöнлö мыччалiс пöрисьыт, что сы коккезын подаграыс эз на вöвлы и, натьтö, некöр оз ло.

Кöр пырис гортас, сiя первöй делоöн надёжнöя крючокасис и только вöлись гогинялыштiс юрнас:

— Два-ноль! Одзын мунö Куть-Кутиха. Вот тэныт и нарви да поволока. Да эшö чорытся-чорыт левкас!

* * *

А кадыс сё чулалiс и чулалiс, котöртiс, пöльтiс сiя, дзик пон одзын кань. То и гожум ни кымöссö мыччö. Не талун, дак ашын сенокос пондöтчас. А быд сенокос пондöтчикö Важ Дзимбырын, унагоддэзся традиция сьöртi, шум сулалö. Сiдз вöлi одззуну, сiдз вöлi мöйму. Сiдз и таво лоис, öксисö бригаднöй контора дынö инькаэз, öдззисö ванзыны. Колö висьтавны, Важ Дзимбырын быд инькаыс сэтшöм гора голоса, что кыка пондасö споритны, дак пельшы оз кыв. А талун дасся унажык чукöртчöмась öтлаö и быдыс öтамöдöс пöдтыны голоснас старайтчö, быдыс мымда прок горöтö-няркнитö. Дзимбыр сайись вöрын говк валлэзöн ветлö, повзьöтлö быдöс зверресö да пöткасö, а деревняас öшын стеклоэс тринньöтöны.

— Бригадир-р-р-шаö-öс! Öнi жö адззö бригадиршаöс! — ванзiсö öтiккез.

— Кытöн сiя, кытöн Фоминаыс? Сiя миянлö колö-ö! — отсалiсö нылö мöдiккез.

— Ооо! Ааа! Ууу!

Мöдiк бы, может, повзис эта шумсянь и пышшис вакрамеш, но не сэтшöм вöлi Ольга Фомина. Голосыс тожö — ой-ой! — берегит пеллетö, кöр ряксö. Тожö эд инькаыт Важ Дзимбырись. Чеччöвтiс Ольга Фомина ольпасись — делоыс одз асылö вöлi — чапкис жöникыс юр вылö кык подушка, медбы пеллес сылöн эз дурмö, и чожжык öтöрö, инькаэс дынö.

— А-а-а!

— О-о-о! — панталiс бригадиршаöс зык.

Фомина локтiс контора дынö, киэсö тэчис кадж вылас, моросас кыскис унажык воздух да кыдз чирöстас-нюжöтас:

— Дугдö-ö!

Дзик плетьöн сöтiс. Но пондыв, дугдöт дзимбыровскöй инькаэзöс, кöдна куим лун лöсьöтчисö эта шум кежö.

— Висьтав миянлö, кöр морттэз моз овны пондамö? Пемытсянь пемытöдз видз вылын уджав, а гортö локтан — бöра колö гор лонтны да похлёбка пуны!

— Важ Гундырын эшö одззуну столовöйсö осьтiсö, а миян öнöдз абу!

— Висьтав, кöр столовöй осьтан?

— Ог сэсся жалайтö горби одзын жöдзны. Мужиккезным узьöны, а ми быд асыв похлёбка увья рожаэз палитамö! Тырмас!

— Тырма-а-ас!

Ольга Фомина кыскис моросас эшö унажык воздух, кыдз кузнечнöй мех, рявкнитiс:

— Дугдö, мыся!

И вермис эд! Кык инька, кöдна матынжык сулалiсö, вирöдз курччöвтiсö тырппезнысö, шатöвтчисö-кусiньтчисö, бытьтö тöвныр увтын вöснитик шатёккез. А остальнöйез вевттисö öммезнысö запон доррезöн да чышьян конеццезöн. Шы не тöв лоис.

— Но мый ванзат? Мый чирзатö? — юалiс Фомина. — Столовöй колö? Конечно, колö! Да кинöс повариханас пуктан? Тэнö, Öгрöпен? Да тэ порссез дынын уджалан, ачыт шуан — кувтöдз фермасис некытчö ог мун...

— Ог!

— Но, дак кинöс нö сэк? Может, тэнö, Марья?

— Нет, ме ытшкисьны понда!

— Сэк тэнö, Паладь?

— Кытшöм меись повариха, кöр аслым похлёбкасö пуны ог куж! Жöникö пыр öмсö нюмралö...

— Вот, вот, сiя и эм! — горöтчис Фаина. — Но дак мый нö сэк?

— Тэ бригадир, тэ и думайт!

— Ог сэсся жалайтö горби одзын жöдзны!

— Тырмас!

— Тырма-ас!

Шум лэбис бöра виль вынöн, сiдз чавкнитiс-öзйис, что нельки Кутю Öльöксаниха, кöда эта кадö ойся молитваэз бöрын пыр узьлiс кыдз вийöм, узьлiс сiдз, что пушкаöн он саймöт, — нельки сiя осьтлiс синнэсö да бергöтчис мöд бок вылас. И кин тöдö, мый дырна бы кыссис эта шумыс, если бы эз лок контора дынö пöрись старичок Гырдзза-Аршин. Öвтыштiс сiя бедьнас, трекнитiс тошокöн:

— Ась менö эта местаын, гырдзза-аршин, öнi жö чарöтö, ог кö отсав тiянлö, инькаэз! Кывзö! Тöн посадын вöлi, столовöйын пукалыштi... Пензия получитi да... Висьтала ме тiянлö — пуöны сэтчин! Шыдсö панявтöн чуть кылöс эг ньылышт. Во! Мун, Ольга, посадас, гусяв столовöйсис шеф-поварсö!

— О-ах! — чирöстiсö инькаэз. — Кыдз этö позьö гусявны!

А бригадирша локтiс ни Гырдзза-Аршин дынö, кутiс сiйö косöттяс да сiдз жмитiс кыз морос бердас, что стариклöн только коскаэс мутш-мутш керисö.

— Дедiньöй, золотöй тэ менам! Вай жö ме тэнö окала, коза тошöс! Эд столовöяс, кытöн тэ пукалöмат, менам öтiк тöдса эм! Быль! Неважын баитiс: нуöт, шуö, менö татiсь аслат деревняö. Стрась, шуö, любита деревняын овны. Кыдз тэ и казьтiн сiйö.

Фомина эшö öтпыр жмитiс стариксö, висьталiс сылö спасибо и тшöктiс колхознöй шофёрлö, Сенька Никоновлö, часöт жö лöсьöтчыны кузь туйö, городö.

Сёрöн рытнас, кöр дзимбыровчи локтiсö гортö удж вывсянь, Василий Голованлöн пустöй керку дынö шакардаöн чывкнитiс колхознöй автомашина. Кабинаись ружтöмöн петiс кыз бригадирша Ольга Фомина, пыркöтiс паськöмок вылiсь бус, веськöтiс коккесö да высинсö кузь туй бöрын. Кузовись кокнита чеччöвтыштiс цветастöй платьеа бытшöм нывка. Сiя паськыта шынньöвтiс, радöна дзар керис öтмöдöрö и горöтчис силькан голосöн:

— Но, вот и бöра гортö локтi.

— Поздравляйта тэнö, Фаинушка! — шуис Ольга Фомина.

Шофёр Сенька Никонов жагöник, öтöрö-мöдöрö пöлiнясьöмöн, ветлöтiс машинаыс гöгöр, керис вид, бытьтö проверяйтö баллоннэз, а ачыс чуть да бöра мöртлiс синнэсö Фаина чужöмö, видзöтiс, кыдз тшыг кань свежöй чери вылö.

Чожа мыйись посöдзö петiс старичок Гырдзза-Аршин, муöдз копыртчис Фаиналö и, коза тошсö малалiкö, горöтчис нюжвыла:

— Здравствуй, Фаинушка, здравствуй, малинтусь! Поздравляйта тэнö праздникöн!

— Спасибо, деду! Ыджыт спасибо, дона морт! Менам эд былись талун праздник, да эшö кытшöм: гортö локтi!

— Сiдз, сiдз, Фаинушка. Лок пыр эта короминаö. Кузь гожся лунсö джендöтöм могись ме öтi-мöдi керыштi сэтöн асмознам. Гор лонтi, медбы олан горт вылö вачкисис, джодж чышки, öшыннэз миссьöтi да мый да.

— Кыдз тэ этö ылöстiн керны? — дивуйтчис Ольга Фомина. — Кин висьталiс?

— Ачым тöда!

Пасьтасьöма талун старичокыс сiдз, бытьтö лöсьöтчöм свадьба кежö: кокас крепыт яловöй сапоггез, кöднö хозяин бытшöмика мавтöма дьöгöдьöн, вешьян коккесö аккуратнöя сюйöма гармонняöн чукралöм голенищеэзö, вывтас пелитöма чочком косоворотка, йиасьöм басöк кисьтиэза пöкрöмöн. Ладнöй вöлi дед, кöть часöт жö купеческöй лабазö сувтöт.

Фаина да Ольга Фомина пыртiсö пустöй керкуас сьöкыт сундук, кöда вöлi дорöма чочком кöртiсь шуллезöн-полоскаэзöн, пыртiсö чемодан. Отсасис нылö и Гырдзза-Аршин — тожö пыртлiс кытшöмкö гырдзиммез, кокнит тюккез, öтi-мöдi мебель. А шофёр Сенька Никонов ружтöмöн пыртiс паськыт и сьöкыт кровать. Зонка вöлi дзик мыйиськö повзьыштöм, синнэс сiдз и чылiсö то кроватьыс вылö, то сылöн хозяйка вылö. Ольга Фомина, конечно, казялiс этö, юалiс строгöя:

— Мый гырнич юрат пырис, арттöм? Тэ видзöтлы менам!

— А ме мый — ме шы эг сет, — шуис Сенька и дзебис синнэсö.

— Вот, вот! Эт, стыдтöмыт!

Посöдз дынö жагвыв öксис народ. Локтiсö том и пöрись, инькаэз и мужиккез. Быдöнныс ыджыт интересöн нёджжалiсö Фаиналань, горöн баитiсö сы йылiсь, быдöнныслö нывкаыс ёна гленитчис, лöсьыт мыгöра, пасьтасьöма скромнöя, но кужöмöн — кöда боксянь эн дзарнит — городскöй дак городскöй и эм.

— Сьöлöмшöриньöй, кыдз тэ локтiн, — радуйтчисö инькаэз. — Поварихатöг миянлö — кöть вод да кув.

Кынымкö лун бöртi Учöт Дзимбырын, неöддьöн ыджыт пустöй керкуын, кöдö колхозниккез некой пору лöсьöтiсö столовöй увтö, Фаина пондöтiс удж: быдöс зыртiс, весöтiс, чышкис да миськалiс. Ольга Фомина кыкись нето куимись гöняйтiс районнöй посадö, потребсоюзiсь судзöтiс колана столовскöй посуда. Местнöй мастеррез керисö пызаннэз, табуреткаэз.

Дзимбыровскöй инькаэз радуйтчисö:

— Ашын пö осьтасö ни столовöйсö, — баитiсö нiя.

— Вот овнытö пондамö! Кыдз баитiсö, сiдз и шогмис.

Асыв. Вöррез сайсянь шондi паськыт кымöссö мыччис, невна думайтыштiс мыйкö, сэсся нёджжöвтiс паськыт мир вылас и давай чикнявны-серавны, шоныт югöррезöн сiйö, мирсö, пöжны. Казялiс шондiыс вöр коласiсь Важ Дзимбыр деревня, мигнитiс пöвсиннас: бытшöм делоыс! Одзжык асыввезнас быд трубаись столббезöн кыз тшын путриктiс-петiс, кайис веськыта небоö да курöтiс шондiлiсь синнэсö, а талун любуйтчы: öтi-öтi павьялöны тшыноккес, воздухас некытшöм дук абу.

Дзимбыровскöй инькаэз одз асывнас высьтiсö мöссэзнысö, вашöтiсö нiйö поскотина вылö и сьöрсьöн-бöрсьöн иньдöтчисö столовöйö. Инькаэз бöрын, киэзнысö каджжез вылö пуктöмöн, важнöя оськалiсö нылöн жöниккез. Мунiсö столовöйö и öтка нывкаэз да зонкаэз, быдöн, кинлöн сималiс кынöм и косьмис горш. Посöдз вылын нiйö, кыдз дона гöссезöс, панталiсö Ольга Фомина да том повариха Фаина:

— Локтö жö, локтö, дона отир, пырö да эд тшвакö! Ольга Фомина висьталiс, что сiя пешлiс ни сёянсö и чуть кывсö эз ньылышт — сэтшöм сiя кöра да чöскыт.

Быдöнныс дружнöя пырисö залö. Инькаэз, бытьтö сiя сiдз и колö, чожжык пуксисö пызаноккез сайö, а жöниккезныс сувтiсö раздача дынö очередьö.

Чожа пондiсö мелькайтны воздухын паннез, торскöтiсö пызаноккез вылын стаканнэз да кружкаэз, праздник пондöтчис. Бур, лöсялö делоыс!

— Шыдыс, висьтала ме тiянлö, царскöй! — гажöна и öддьöн горöн шыасис старичок Гырдзза-Аршин. — Эттшöм шыдсö только ресторанын ме сёйлi. Городын...

— И кашаыс öмын сiдз и сылö, — шыннялiсö да дивуйтчисö инькаэз. — Чудо тай!

— Фаина, горадзуль тэ миян, кытöн сiдз велалiн стряпайтнытö? — быдöннысся öддьöнжык дивуйтчис да юасис Ольга Фоминалöн жöникыс. — Этö жö öм чöскöт, а не гуляш! Ноко содтышт меным, пукты бекöрам эшö пань-мöд!

— Локтö, локтö, мужичоккез, — серöм сорöн баитiс Фаина. — Гуляшыс быдöннытлö тырмас, эд полö. И тi, дона хозяйкаэз, тожö локтö, эд стыдитчö.

Некин эз и думайт стыдитчыны, быдыс смелöя локтiс раздача дынö, корис содтöт, ошкис поварихасö мастерство понда, радуйтчис, öтнас Сенька Никонов скромнöя пукалiс пельöсокын, жагöник гуддисис вилкаöн бекöрас. Дивуйтчис-керис Ольга Фомина, подозрительнöя, синнэсö чикыртöмöн, видзöтыштiс сы вылö и öмсö осьтiс: шофёрлöн веськыт син увтас красуйтчис ки долонь пасьта «фонарь».

Быдöнныс, конечно, сразу жö вежöртiсö, мыйын делоыс, вак-вак серöмтчисö. Ольга Фомина шуис осудитöмöн:

— Баитi ме тэныт, мыся эн мöдрав синнэсö нывкаыс вылö. Эх тэ, торта пель! Ха-ха-ха!

— Лок, лок и тэ, Сеня, — корис зонкасö Фаина. — Ужо, получитан содтöт. Шульга син увтат...

Быдыс бöра öдззисö ваксьыны-серавны. Нельки Эринья Потаповналöн зоныс, Опонькоыс, эз вермы видзсьыны, тожö сералiс, нельки синваэс петiсö.

Кин тöдö, мый дырна бы сэтöн панясисö да сералiсö дзимбыровчи, но вдруг сувтiс кок йылö Гырдзза-Аршин, куимись тарс-тарс керис паньнас пустöй ни бекöр кузя, гажöна и торжественнöя юалiс сельчаналiсь:

— Кывзö менö, отир! Кывзö быдöнныт: кин тöдас загадка, сылö премия. Висьталö меным, мыля талун, этшöм мича гожся лунö, абу миян коласын удав агроном Юрий Андреевич Кушманов? Некин оз тöд, а ме тöда!

— Тöдан, дак и висьтав! Висьтав чожжык, эн кыскы! — сотчан синнэзöн старикыс вылö видзöтiкö, тшöктiс Ольга Фомина.

И Гырдзза-Аршин эз понды кыскыны, висьталiс:

— Талун ойнас Юрий Андреевичыслöн сьöлöмшöрыс чужтöма зонöс, и счастливöй ай шондiыс петандорын колхознöй грузовик вылын лэбзис посадö!

— Зон чужöма?! Ах тэ, батя!

Чукыртiс кымöс кучиксö строгöй бригадирша, шуис думайтöмöн:

— Вот эта праздник дак праздник. Мый бы миянлö артавны талун?

— Быдöнлö сувтöт четушка винаок, — казьмöтiс сылö жöникыс.

Этö казьмöтöм понда сiя получитiс «премия»: Ольга Фомина сiдз дзарнитiс сы синнэзö, что мужикыт юрсö пельпоннэзö кыскис и кывсö сэк жö ньылыштiс.

— Вот мый, — шуис невна думайтыштöм бöрын Ольга Фомина. — Кывзы, Фаина, мый тэ талун павжун кежö мöдан стряпайтны да пуны? Шыд? Ладно, пу. И эшö котлетаэз? Тожö лöсялö, пöжав котлетаэз. Дак тэ, тöдан мый, пöжав нiйö только иньпöлöс понда. А мужиккеслö шыдыс бöрын пызан вылö вай тыр бекöрöн маннöй каша. Ась сёйöны том Кушмановыс понда!

Быдöс бур! Быдöс лöсялiс!

Лымся чочкомжык халата, мича чужöмбана, эшö не сэтшöм пöрись дама веськыта висьталiс:

— Быдöс бур. Кыдз мамыс, сiдз и кагаокыс чувствуйтöны асьнысö нормальнöя. Быдöс бур.

Бур!

Конечно, не öддьöн жö лöсялö, кöр тэнö эз лэдзö палатаö аслат инь да зон дынö, но Юрий Андреевич не сэтшöм ни бöбöв, мед не вежöртны: оз лэдзö — сiдзкö, оз туй. Нем сэтöн и кеймисьны да шумитны.

— Ашын мыччаласö öшынсянь, — висьталiс мича чужöма дамаыс. — Ашын и лок.

— Обязательно! — горöтчис Юрий Андреевич и сетiс чочком халатаыслö быдса ноша сякöй цветтэз, кöднö ачыс öктiс талун туй дорись видз вылiсь.

Юрий Андреевич эшö невночка жöдзис ыбöс дынас, сэсся петiс öтöрö, чикыртiс синнэсö. Быд вын югьялiс асывся июньскöй шондi. Неыджыт скверын каждöй куст вылын дзульзисö каёккез. Том ай сьöлöмын быдöс сiдз и сылiс да дзульзис тожö. Охота вöлi горöтны:

Ме öддьöн счастливöй морт,

Удав морт:

Талун зонка менам чужис,

Дона ёрт!

Но ванзыны больничнöй городокас сiя сёдаки эз понды. Юрий Андреевич кежис хирургическöй отделеннёлань, кытöн веськöтiс киласö дядьыс, Кушман Егорыс. Мый бы сэтчин эз вöв, а колiс дозирайтны старикöс, юавны, кыдз сiя чувствуйтö асьсö. Да бöра нем эз пет: лымся чочкомжык халата том ичмонь юöртiс, что палатаэзöт часöт ветлöтö асывся обходöн главнöй врач и сэтчин кытчöдз некинöс эз лэдзö. Мый жö баитны Кушман Егор йылiсь, то волнуйтчыны да тöждiсьны немымда оз ков: старикöс чожа лэдзасö гортö. И быдöс нiя заводдэз, кöдна лэдзöны народнöй хозяйство понда дубильнöй продукция, вермасö овны спокойнöя: сырьё нылö лоас иньдöма аскадö и сымда, мымда ковсяс.

Сэтшöм юöрöн Юрий Андреевич кольччис довольнöй, чожжык котöртiс аслас грузовик дынö, пырис кабинаö, заводитiс мотор и иньдöтiс машинасö Учöт Дзимбыр ладорö. Посадыс главнöй улицаöт лэбзикö, сiя шыннялiс быдöнлö, кин шедлiс паныт. И быдыс, кин шедлiс паныт, дзарьявлiс сы вылö подозрительнöя, гогинялiс юрöн: луныс только пондöтчö, а руль саяс детинаыс кодыш ни пукалö. Эх, вермас лоны беда!

Бедаыс сёдаки эз ло. Детина лэбзьöмöн гöнитiс-вашöтiс плотина вылöт, паськыта шынньöвтiс зоночкаэзлö, кöдна купайтчисö юокас, шынньöвтiс иннезлö, кöдна гывьялiсö сэтöн жö песлалöм паськöм, а сыбöрын гажöна öвтыштiс юрнас ыджыт тоша дядьлö, кöда öткöн сулалiс лэбтöм киöн туй дорас. Бытшöм, поди, морт сiя, тоша дядьыс, колö босьтны.

Дядька и быль вöлi туяна: ыджыт мыгöра, паськыт пельпона вывтас кышöма кузь брезентовöй плащ, юр вылас пелитöма ёна ни нöитчöм шляпа. А тошыс кытшöм! Сьöдся-сьöд, читкыля, паськыт да кузь. Морт öшöтöма спина саяс рюкзак, сыись тыдалöны спиннинг, сачок. Этта, кытшöм, чериавны городсянь локтöма. Тыдалö, радейтö черивасö панявны.

— Кытчö тiянлö? — юалiс Юрий Андреевич.

— Кöчкокö, дона морт, Кöчкокö!

— А ме Учöт Дзимбырö. Как раз лöсялö. Пуксьы, пыр кабинаас, нуöта туйвежöдз.

«Туяна» дядь паськыта шынньöвтiс читкыля тошас, проворнöя чöвтiс котомкасö, шентыштiс сiйö кузовö, ачыс чожжык пырис кабинаö да пуксис ордчöн Юрий Андреевичкöт. Интереснöй сiя морт: сто верста ылынаö чериавны локтöма, абу и дышыс петöм. А тöдö я, что Вильва юöт öнi орöттöг ой и лун кывтöны кöньöс кыза керрез и, конечно жö, не только щукаöс, но и тувдöм ракöс некин и вöтын оз вермы кыйны. Кин сэтшöмыс?

Дзарнитiс Юрий Андреевич пассажирыс вылö öтпырись, сэсся мöдöтпырись и ачыс оз тöд мыйсянь — сьöлöмыс пик только муныштiс, нельки зубыткодь лоис! Неужто сiя? Да сэтöн и думайтны нем — конечно сiя! Вон, кыдз мöдöтчöма! Ровно бы чериавны тэрмасьö. Ха-ха...

Дата добавления: 2015-11-16