КЫДЗ ШЫННЯЛÖ АПОСТОЛ 9 страница

Машина, аслас быд кöртокöн жольöтiкö, перыта нетшкöвтчис одзлань, öшынок стекло сайын чожа мелькайтiсö туйдорся кусттэз да учöтик кöзоккез. Пассажир гусьöник дзарьялiс Юрий Андреевичлань, тыдалö, старайтчис вежöртны, кинкöт сiя пантасис, эта коста лукавöя шыннялыштiс, синнэзас «орсiсö» беспияноккез. Юрий Андреевичлö вöлi недолыткодь, но тожö чуть да бöра видзöтлiс пассажирлань, ачыс эз и тöд мый сэтöн керны, мый думайтны. Талун, кöр чужис зон, пантасьны эта морткöт некытшöм охота эз вöв. Талун колiс бы сьывны песняэз, гажöтчыны да йöктыны, нето чатрасьны соседдэз одзын, быднёж шутитны. А сэтöн...

Тьфу! Бур настроеннёыс бытьтö эз и вöвлы.

Вот жö петас оказия. Колiс жö тоша лешаклö петны туй дорас как раз сэк, кöр лэбзис сэтi Юрий Андреевич. Эшö эз тырмывлы, медбы сiя, колхознöй агроном, ыслöтiс машинаын этатшöм стыдтöммесö, ачыс вайöтiс нiйö деревняö соровтны нятьсö да гудыртны васö...

А мый керны? Сувтöтны часöт жö машинасö да сетны пассажирлö лёнас? Да эшö сьöвзьыны стыдтöм синнэзас, тошас? Ровно бы оз лöсяв сiдз-ту. Видно, перво-наперво ковсяс чöвтны сы вылiсь маскарадсö дзарнитны сылöн тош сайö. Поди, ачыс вежöртас, что бурыс сiйö деревняас нем оз видзчись, лоасö только неприятносттез.

Юрий Андреевич чикыртiс синнэз, зэгнитiс юрнас: ужо керам мый-нибудь. Пондöтам басни, öзтам спор и кутчам воззьыны сiйö мымда вын. Сiя менам чочком светыслö не рад лоас. Весь я мый я сымда антирелигиознöй книгаэсö лыддьöтiмö? Быдса библиотека, пожалуй, если не унажык!

— А тэнат талун ыджыт гаж сьöлöм вылат, — решительнöя бергöтчис Юрий Андреевичлань да небытика горöтчис пассажирыс. — Сiдз, дона юноша?

— Колö жö! — дивуйтчис Юрий Андреевич. — Вот эшö кыдз вермас шогмыны! Менам моросын былись поздiсьö талун вöвлытöм гаж. Да, да! Адззывлытöм гаж! Зон менам талун чужис. Кыдз тэ тöдiн?

— А синнэт сьöртi, зону. Нiя — душалöн зеркало. «Лешак тэ!» — думанас паныт горöтчис Юрий Андреевич.

Кытшöмкö чувствоöн, кватьöтöн я мый я, сiя вдруг вежöртiс, что эта морткöт серьёзнöй баснисö арталан чередь. Не сэтшöм сiя дурак, медбы любöйкöт и каждöйкöт пондöтны антирелигиознöй тема вылö спор.

Сiдзкö, гыжтöтны сы вылiсь маскарадсö да пиззьыны-пöжны сiйö, чувйыны невна боккесö да гильöтыштны конувтсö ковсяс конкретнöй факттэзöн, нiя сведеннёэзöн, кöднöн Юрий Андреевичлö удайтчис богатсявны.

Эта, пожалуй, идея. Паныт висьтавны тоша дядьлö лоас нач нем. Сымда и кольччас сылö — кывзыны да кöрчитчыны, кыдз кöрчитчö калитöм сковорода вылын госа ёдi.

Кöр Юрий Андреевич думыш-керис этадз, сы синнэзын югйöвтiсö бöб биоккез, сьöлöмыс бöра пикнитiс, дзик сiя зоночкалöн, кöда недырик думайтöм бöрын решитiс пырны йöз карчйöрö.

Важ ни, быдöс разьсьöм-киссьöм грузовик öдва-öдва кайис керöс вылö, моторыс дугдывтöг кашляйтiс да несйис, сы пытшкын шестерняэз да подшипниккез дзуртiсö, жольöтiсö, кузовын пельöсiсь пельöсö ыджыт шумöн тарласис ведра. Кабина тырис выхлопнöй газзэзöн да бензин дукöн. Видзчисьтöм пассажир сё эшö паськыта шыннялiс тошас, интересöн видзöтiс одзлань. А Юрий Андреевич нёштöм кыввезöн видiс асьсö: вунöтiс посадас содтыны радиаторö ва и вот любуйтчы — радиаторыс, кыдз самовар, öдззис пизьны.

Тоша дядь тöдчöмöн паймыштiс, но шыннявны эз дугды.

— Тыдалö, локтiмö? — горöтчис сiя.

— Локтам, эн пов.

Кыкнанныс петiсö кабинаись, пуксисö туй бокас. Юрий Андреевич кыскис куртка карманiсь нöитчöм сигаретаэз, керис куритны. Черикыйись паськыт синнэзöн видзöтiс öтмöдöрö, любуйтчис ылiсь уваллэзöн, кöдна вылын сьöд видзис паськыт вöр, любуйтчис ю сайись тайгаöн да сы весьтiсь маросаöн-тшынокöн. Сiя, тыдалö, кужис донтны природасö, орöттöг нёджжасис и нёджжасис, нельки вунöтiс, кажитчö, Юрий Андреевич йылiсь. Но вот бöра перыта бергöтчис сыланьö, юалiс гажöна:

— Сiдз! Значит, дзимбыровскöй тэ, зону? И кин сэтчин аймамыт? Ловьяöсь я нiя? Ме, колö тэныт висьтавны, уна дзимбыровчиöс тöда.

Юрий Андреевич деревенскöй простачок моз осьтiс öмсö, висьталiс пиньласьтöг:

— Старичоккес менам, и айö и мамö, здоровöсь кытчöдз. Только олöны нiя не Учöт Дзимбырас. Сiдз, тöдан я, шогмис, что ыскöвтiсö райцентрö, сэтчин и олöны.

— Сьöкыт годдэзö, натьтö, нильдiсö?

— Сьöкыт годдэзö.

— А тэ? Ме мöдi юавны, тэ керин асмознат, эн вöтчы ны сьöрö?

— Не совсем сiдз. Ми эг пондö лöсявны мöдiк дело увья...

Тоша пассажир вöлöма öддьöн любопытнöйöн, вöлöм баитiсь мортöн. Паськыт тошыс сайын сiя чувствуйтiс, тыдалö, асьсö öддьöн бура, поди, думайтiс: мöдöтчи ме черикыйись паськöмöн, часöт чередь менö кин-нибудь тöдас... Сiдз, видно, думайтiс сiя. Вот и решитiс «велöтны» невночка олансö, бытшöмика тöдны, кинöс мый гильöтö. А поди, характернас да мывкыднас любопытнöй вöлi — кин тöдö. Сiя тэрмасис тöдны, кытшöм сэтшöм важнöй причина вермис янсöтны аймамöс зонныскöт. Кöр пассажир кылiс Юрий Андреевичлiсь ответсö, сiя перыта лэбтыштiс юрсö, кажитчö, нельки дрöгнитiс, горöтчис дивуйтчöмöн:

— Вот кыдз! Сiдзкö, религиознöй почва вылын эта аркмис? Сiдз, сiдз...

Паськыт тошас хитрöя шыннялiкö, пассажир дöвкнитiс Юрий Андреевичлö юрнас, дзик висьталiс: кывза ме тэнö, давай висьтась, кыдз да мый шогмис, мыйöн эд лöсялö.

— Да, религия сэтöн виноват. Вот кывзы-ко. Кöр висьталi нылö, мыся, думайта гöтрасьны, аймамö и согласитчисö сразу: важын кад, гöтрась. Только вот мый, зонöй. Ковсяс эд вичкуö ветлыны, веничайтчыны. Венечтöг, батя, некыдз оз туй. Но ме и висьталi сразу, мыся, кöть юр орöтö, а вичкуас ог мун. Мый ме сэтчинiсь; эг адззыв. Сэк и горöтчисö айö да мамö öтiк öмись: «Он мун вичкуö, дак и благословеннё огö сетö. Сэк и тарöвтчы гортiсь. Асныра зоныс миянлö оз ков». Но, сiдз дак сiдз, мыся. Дыр том увьям думайтны эг понды, пелитi чожжык шапкаöс юр вылö, да и — шагом марш! — ёркнитi ыбöсöн, лэбзи невестаö ордö. Сiя, малинтусь, кыкнан лапанас примитiс. Вот и олам янын аймамкöт.

— Сiдз! Былись, тэрмасьöмат тэ, зону, том увьят. Небытшöма тiян петöма, не солиднöя. Поди, öнi, кöр чужис зоныт, проститасö пöрись гозъя, миритчасö?

— И думайтны нем! Талун, вот только часöт неважын, пыравлi ны ордö. Бöра виль дело: пыртны тшöктöны кагаоксö.

— Енiньöй тэ менам! Этта кытшöмöсь. Только сiдз ме висьталi бы: но и мый сэтöн сэтшöмыс? Медбы вöлiсö тiян коласын мир да соглассё, позис бы и этö... Некытшöм грех бы эз ло... Позис бы и пыртны. Кылi ме, öнi кагаоккесö пыртöны заочнöя, вичкуас нiйö позьö и не вайöтлыны.

— Оз лöсяв! Да мыйлö пыртнытö? Уна отир тöдö, что миян поп, отец Мисаил, ловкöй морт, и öддьöн нельки знаменитöй. Кузь век пö Москваын сылöн приходыс вöлöма, но миянлö сёравно оз лöсяв. Да, оз лöсяв. Но сiйö вакрамешö.

Юрий Андреевич медбöрьяись тыр морос кыскис противнöй табак тшынсö, сэсся быд вынiсь свиснитiс окуроксö канава сiйö да эшö сьöвзис сылö бöрсяняс. Пöв синнас сiя гусьöник нёджжöвтiс пассажирыслань. Охота вöлi тöдны, кыдз сiя примитiс горöтчöм кыввесö, поди, лöгасис, дузгыльтчис? Но пондыв тöднытö, кöр быдöс чужöмсö вевттьöма тош, тырппес тожö оз и тыдалö, а синнэс чикыртöмöсь и видзöтöны кытчöкö ылö-ылö, горизонтыс сайö.

— Вот сiдз и оламö. Отец Мисаил оз лöсяв миянлö, — мöдпöв горöтчис Юрий Андреевич. — Баитöны миянын мукöдпырся пöриссес, бытьтö эта попыс и ачыс оз верит еныслö. Вот кывзы-ко...

— Мый? Мый тэ горöтчин, юноша? Отец Мисаил — и вдруг оз верит енлö? Вермас разь сiдз лоны? Некöр сiдз оз вермы лоны!

«Э-э, сiдзкö, вöрзьöтiсö тэнö кыввезö! Голосыт сьöртi кылö — вöрзьöтiсö. Дак кывзы жö, мый ме одзлань висьтала...» — думыш керис Юрий Андреевич и öдззис сярзьыны одзлань:

— Отир быдлаын баитö, что оз верит попыс еныслö. Да и мый сiя, дурак я мый я кытшöмкö? Нето пöрись нетопыр? Эд сiя поп — образованнöй морт, кытшöмкö академия по кончитöма и, конечно, миянся буржыка тöдö, что еныс абу и некöр эз и вöвлы. Олö миян деревняын öтiк старичок, интереснöй сэтшöм дед, дак сiя веськыта сiдз и боньгö быдлаын, бытьтö отец Мисаил совсем и не поп, а жулик!

— Мый?!

— Жулик. Да сэтшöм жулик, кытшöмыс чочком светас абу и вöвлöма, — спокойнöя висьталiс Юрий Андреевич, кöть бура адззис, кыдз пондiс волнуйтчыны пассажирыс, кыдз дрöгнитiсö и перыта кайисö вывлань сылöн синкыммес, да и ачыс öдва вермис видзсьыны местаас, чуть только эз чеччöвт кок йылö. — Сiя, отец Мисаилыс, öтпыр матын ни вöлöма тюремнöй решёткаыс дынын, невна абу шедöм чорыт скамьяыс вылö. Эшö сэк, кöр Москваас олöм. Вот кывзы-ко... Сiя, кöть и поп, а иностраннöй туристтэзлö святöй угодниккесö вузавлöма гусьöнсорöн. Хе-хе, валютаöн кармансö тыртöма. Вот тэныт и поп. И сэтшöмыс дынö мунны веничайтчыны? Кыскыны сы дынö кагаокöс пыртны да мый да?

— Кынöм висьны пондiс! — лöгöн моз горöтчис пассажир. Сiя старайтчис сайöвтны синнэсö, не видзöтны агрономыс вылö, ёна паймыштiс. — Мыйсö только он кыв, кöр петан туйö. И кысь тэ сымда срамсö отец Мисаилыс йылiсь öктiн? Быдса кондуит... Интересно меным лоис, öддьöн интересно. И мый жö эшö отирыс каттьö эта поп йылiсь?

— А-а, интересно, сiдзкö! — серöмтчис аскежас агроном. — Но дак мый жö, кывзы сэк. Поди, бурмас сьöлöмыт!

— А мый нылö каттьынытö? Сэтöн и каттьыны нем оз ков. Висьталi ни тай, мыся, отец Мисаил не дурак, сiя кужö пемыт йöзсö велöтны. Сылö бы только кармансö тыртны, а сэсся кöть потоп, кöть и туруныс бы век эз быдмы. И олö жö пö эта жулик. Висьтасьöны отирыс, деньгасö пö оз ни тöд кытчö воштыны. «Волга» неважын небöма, квартираас пö сылöн быд комнатаын кык телевизор сулалö: öтыс обыкновеннöй, а мöдыс цветнöй. А горбыля старушкаэз, кöдна вот-вот куласö, кыссьöны вичкуас, нöбöтöны жаднöй поплö медбöрья полтинниккез, десяткаэз, пятёркаэз... Эх, отир, отир!

Эстöн тоша дядь эз ни вермы терпитны. Сiя бöбись чеччöвтiс кок йылö, барöтiс синнэсö, шамыртiс тошсö кырымас. Медбы кöть невночка лöньны, сiя пöрччалiс плащ киззесö, павтыртiс пиджак пола и кытiськö кыскис виззя чышьянок, крепыта чышкис сiйöн сивисö да кымöссö, сэсся нюмыртiс тырппесö и дзебис бöр чышьяноксö штанi карманас. Пассажир öддьöн нервничайтiс. Юрий Андреевичлö лоис нельки не ас сьöртi. Сiя нельки жалейтыштiс пассажирсö, видiс асьсö ошнямырöн и лешак пиянöн. Öддьöнöв тоша мортсö пыркöтiс, оз лöсяв сiдз-ту. Колiс бы кокнитжыка кыдзкö. Тыдалö, колö не сайласьны сэсся. Колö веськыта бы... Пассажир дыркодь сулалiс чöлöмöн, сэсся вдруг перыта лэбтiс юрсö, öвтыштiс сiйöн öтöрö-мöдöрö и, бытьтö нем эз и вöвлы, висьталiс важнöя, увереннöя:

— Арттöм басни быдöс эта. Ересь!

— Мый — ересь?

— Быдöс, мый тэ лёбин попыс йылiсь. И мыйсö только оз каттьö отирыс, кöр кернытö нем. Юасö асывсянь коддзытöдз и давай жö лёбны поп йылiсь, бытьтö сiдз сiя и колö. Дикость — сэсся нем. И эшö вот мый... Да, а кысь тiян старичоклö кывсис, бытьтö поп Мисаил святöй угодниккезöн вузасьöма? Кыдз этö вежöртны? Мый, Московскöй и Всея Руси патриарх письмо сылö гижис?

— Да мый жö тэ?! Делоыс сэтöн, тöдан я, нач не сiдз аркмис, кыдз тэ думайтан? Патриарх! Да пондас разь сiя сякöйыслö письмоэз гижны? Сiя, миян старичокыс, важын ни дружитö городскöй краеведческöй музейись сотрудниккезкöт. Вот музейнöй работниккес и висьтасьöмась, кытшöм сэтшöм валютаöн тыртöма кармансö Мисаилушкоыс. А музейнöй работниккезлö эта йылiсь висьтасьöма кытшöмкö Иван Петрович Подгорин; московскöй учёнöй-искусствовед. Подгориныс бура пö тöдö стариннöй живопись. И сувтлöма сiя попыслöн туй вылö, разоблачитöма...

— Ересь! ересь! — öмалiс Юрий Андреевичöс пассажирыс. — Кывзыны неохота! И — тырмас эта йылiсь! Тожö адззимö, мый йылiсь туйын баитны. И не кад я вöрзьыны миянлö туйö? Радиаторыс, кыдз ме думайта, сайкалiс ни? Эх, мымда кадсö ме тэкöт öштi. Мунi бы подöн, дак важын ни бы вöлi Кöчкокас.

Нем сiя абу вежöртöма! И колö я одзлань орсны комедиясö?

Виль сигарета кыскикö, Юрий Андреевич öддьöн внимательнöя видзöтыштiс пассажирыс вылö, гогинь-гогинь керис юрнас, сэсся малыштiс чужöмсö ки долоньнас и шуис шынньöв сорöн:

— Пожалуй, кад ни вöрзьыны. Радиатор, конечно, ештiс сайкавны. Веськыта шуны, басниыс миян эз шогмы. Этö, ме думайта, сiйöн, мыля эг тöдсасьö тэкöт. Баитам быд берсяыс йылiсь, а öтамöднымöс огö тöдö. Не дело, батя, сiдз-ту. Давай тöдсасямö я мый я... Эд тэ — отец Мисаил?

— Мый?!

— Ме тэнö, отче, сразу тöдi!

— Кыдз?! Однако...

— Однако ме вöвлi тiян вичкуын. Неöтпыр ни вöлi и адззылi тэнö амвон вылiсь. Значит, Кöчкок деревняö мунамö? Мöдан пантасьлыны прихожанакöт, невночка гудыртны васö?

Поп меряйтiс Юрий Андреевичöс лöг дзарнитöмöн, сысйöвтiс пиннес пыр:

— Прихожанакöт ме пантасьла только вичкуын. А часöт тэрмася Вильва ю дорö чериок кыйны. Думайтан, поппес только сiйö и керöны, что кадитöны ладанöн вичку да пантасьлöны старушкаэзкöт? Не, нiя и природа вылö петавлöны.

Юрий Андреевич перыт оськöввезöн мунiс машина дынö. Сылö усис тöдвылас первенец-зоныс, дыр видзöтiс районнöй посадлань, паськыта шынньöвтiс: быдмы чожжыка, дона пи! Чожа ме вайöта тэнö гортö и киам нöбöтла ыб вылö, мыччала сэтчин, кыдз быдмö нянь.

Дыр Юрий Андреевич сулалiс да видзöтiс районнöй посадыс ладорö, сё шыннялiс и шыннялiс. Отец Мисаил эта кадö нюлiс тырппесö, крепыта зыртiс кымöссö и старайтчис вежöртны, мый жö сэтшöмыс шогмис? Мыля сiя, опытнöй морт, кöда светас олiкö ештiс адззывны быд берсясö ни, сiдз ылöстöма шедiс капканö? Кытшöмкö зырымöсь бедь, веж гöна типок ловкöя, кыдз фокусник, бöбöтiс сiйö, чöвтiс быдöс паськöмоксö, лэдзис вешьянсö и петшöровöй коросьöн пöльтiс да пöльтiс, вурис сiдз — кувтöдз он вунöт.

Зубыт! Обида кутö! А кин виноват?

Да ачыс, ачыс! Радмис, кыдз нимасись кагаок, мыля пуксьöтiсö кабинаö, сякöй осторожность йылiсь вунöтiс, сийöс пасьта öмсö осьтiс, кузь кывсö пельпон вылö чапкис — давай юасьны да лёбны арттöмсö. Идиот!

Но кин вермис тöдны, кин вермис думайтны, что эта лешаччöй волокын первöй жö морт, кинкöт пантасяс, тöдас сiйö? Чёрт, чёрт! Эх, кöбы эз вöв законыс, кöда оз сет поппезлö чулöтны деревняэзын проповеддесö! Позис бы овны и Кайскöй волокын. Сьылiс песняэз, чанöтiс сьöд вöрсö, дугдывтöг йöктiс бы попаддяыскöт полька-бабочка!

Усис тöдвылö православнöй христианка Кутихина. Лöгувьяс чуть аннэсö нёштöм выныс эз пиньöвт. Сiсьмöм колода! Важ нярьян! Иньдывлiс жö, иньдывлiс сы дынö вернöй мортöс, медбы аслыс не рискуйтны, дак на тэныт — абу сетöма чудотворнöйсö, öдззöма паськöтлыны öмсö... Ведьма! Вот и ковсис аслыс петны туйö, рискуйтны, позоритчыны сякöй чоморыс одзын. Эх!

Да, иньдылiс отец Мисаил ассис вернöй сторожöс, Чарым Петрухаöс, Учöт Дзимбырö, тшöктiс бытшöмика нёджжасьны да юасьны, буржыка видзöтны обстановкасö, бöбöтны Куть-Кутихалiсь новоявленнöйсö, керны быдöс шумтöг, шито-крыто. А мый петiс! Куим чунись комбинация петiс. Тьфу!

А сёдаки колö я сы бурна волнуйтчыны? Шогмис мыйкö öддьöн страшнöй, нач невеськöтана история? Катастрофа?

Да не жö, не!

Конечно — сiя поп. И репутацияыс сылöн, веськыта висьтавны, важын ни тшыкöтöма, первосортнöйöн некыдз он шу. Но эд сiя, отец Мисаил, талун мунö только чериавны, сэсся нем сылö оз ков. Мый, поплö оз туй и чериавны?

А поди, бергöтны сёдаки оглобляэсö, нильдыны бöр гортö, кытчöдз не сёр? Висьтавны эта разбойниклö, что сьöлöмын чуткыны мыйкö пондiс, да и мавтны кок пятаэз? Гортас эта том антихрист, конечно, ванзыны пондас. Эшö бы — ловья попöс адззылiс! И ловзяс сэтöн губерния: «Миян ладорö локтöма отец Мисаил. Ровно бы чериавны лöсьöтчöма. Сто верста ылынаö мунöма ёкышшез кыйны. Хех-хех... А ноко, челядь, эд лэдзö сiйö син вылiсь, вöджжö лун и ой, наблюдайтö!» Натьтö, сiдз быдöс и лоас. И, пожалуй, немлö рискуйтны, колö öвтыштны святöй угодникыс вылö киöн — тарöвтчы вакрамешö!

Но эд нiя, святöй угодниккес, быдöс приметаэз сьöртi, стариннöйöсь, ны коласын, натьтö, сёравно пантасяс сэтшöм, что сразу богатсявны верман... Ух, тэ!

Нем страшнöйыс абу! Повны нач немись!

Оглобляэз бергöтны одзöв!

Эх, если бы не сiя законыс! Но да ладно. Эшö видзöтыштам, кин кинöс. Эшö видзöтам. Мый весь нервничайтны?

Колö мунны одзлань. Раз петiн туйö, то колö мунны одзлань. Эта разбойниклöн киссьöм кабинаö сiя, конечно, сэсся оз ни пуксьы, иньдöтчас подöн. Локтас жагöник Кöчкок нима деревняокöдз, шоччисяс сэтöн, берег дорын вуграсьыштас ойшöрöдз, сэсся веськыта нюрöт, кырасöт... локтас Эринья Потаповналöн гидокöдз...

Отец Мисаил быд вын паськöтiс пельпоннэсö, волькöтыштiс читкыля тошсö и юасьтöг-висьтасьтöг петiс туйö.

Кышöтiс брезентовöй плащ, чорыта няжöтiсö сьöкыт сапоггез увтын гырись песок да галька. Дзарнитiс Юрий Андреевич отец Мисаиллöн спина вылö, синнэсö куньлiс да бöр осьтлiс — сыбурна дивуйтчис.

— Подöн я мый я, отец Мисаил?

Поп и джын кыв эз горöтчы паныт, нельки эз и видзöтышт бöрас. Юрий Андреевич, конечно, эз обидитчы: вольнöйлö — воля, оськав подöн, öддьöн гленитчö дак, сёравно ылö он мун. И вдруг öдззис ваксьыны, кынöмсö кыкнан киöн кутiс:

— Сулав, отец Мисаил! Сувтчыв кöть минута кежö. Адззан, делоыс кытшöм...

Поп сувтчис, юалiс строгöя, лöгöн:

— Ну? Мый эшö?

— А рюкзактö? А спиннингтö? Вунöтiн эд!

Бöра — мöс вöра! Да мый ни талун сыкöт? Дзик медбöрья дурак, смешитö и смешитö отирсö. Канальство!

Зэгнитiс отец Мисаил юрнас, дзик онсö вашöтiс, нёштöм кыввезöн маттисьыштiс аскежас, да кернытö нем, ковсис бертны машина дынö.

— Бöбми талун шондiыс увтын, — миритчöмöн горöтчис сiя и стыдитчöмöн шыннялыштiс тошас.

— Быд берсяыс вермас шогмыны, — тожö миритчöмöн паныт шыасис агроном.

Поп нарочно я мый я нёджжöвтiс сы вылö пустöй синнэзöн, дыр вöрöтiс вартчöм тырппезнас, жöдзис кокись кок вылö, сэсся горöтчис бедуйтöмöн, Юрий Андреевичсö осудитöмöн:

— Тэ öддьöн лöг морт вöлöмат. Сэтшöм счастливöй, зон талун чужöма, а нятьöсь кыввез коялан öтмöдöрö. Да мый öтмöдöрö — веськыта синнэзö, веськыта душаö сьöлалан нiйö: «Отец Мисаил оз верит енлö... Отец Мисаил жулик...» Деликатностьыт чепöль мымда абу. Да и кытiсь сылö лонытö... Ми эд Кайскöй волокын...

— Вот-вот, сiдз сiя и эм — Кайскöй волокын. И эта волокын народ коласын важын ни поговорка олö: «Кортöм гöсь, кыдз йикиа тупöсь». Неужто, эн кывлы?

Не охота вöлi отец Мисаиллö споритны эта лöг детинакöт, да эз вермы видзсьыны, горöтчис бöра бедуйтöмöн:

— Не тiян ордö жö локтi гöститнытö, а ю дынö. Мый, жаль я мый я чериыс?

— Кытшöм ни сэтöн чери! — серöмтчис Юрий Андреевич. — Ме эд бура тöда, кытчö и кытшöм могöн тэ, отче, тэрмасян. Да и быдöн этö тöдö. Сiя старичокыс, кöда музейщиккезкöт дружитö, быдöс ни кылöма. Видзчисьöны тэнö талун, ёна видзчисьöны. Соровтöны кашасö старушкаэз. Эд чудотворнöй угодникöс адззöмась. Кыдз сiйö святöй ваокöн не гывьявны, не бöбöтны йöзыслiсь юррез? А мый, если чудотворнöйсö, этö новоявленнöйсö, рисуйтiс знаменитöй мастер? Этö жö валюта! Эд сiйö любöй иностраннöй турист кисорöн нетшкöвтас.

— Тэ — чомор!

— А тэ? Иньдöтчöмат чериавны, а святöй книгаас дзарнитны вунöтöмат. Кытшöм часöт чери кыян, кöр Вильваöт уйö свальнöй вöр?

— Мый?!

Этö кодя беседасö не аскадö орöтiс страшнöй зык. Ыджыт шум видзчисьтöг косьöвтiс воздухсö медматiсь мыс увтын, керöс сайын, да сэтшöм горöн косьöвтiс, что отец Мисаил повзьöмыс увья тупкалiс пеллесö ки долоннезöн, рявкнитiс дрöжитана голосöн:

— Дьявольщина! Мый эта сэтшöмыс?!

— Эн пов, отец Мисаил! — тожö öддьöн горöн чирöстiс Юрий Андреевич. — Страшнöйыс нем абу. Этö öтiк счастливöй морт посадö мыйлöкö гöнитö.

Зыкыс сё содiс и содiс, кылiс сё матынжык и матынжык. И вот мыс вылас перыта мыччисис коляскаа мотоцикл. Григорий Черепан, кöр казялiс туй вылiсь машинасö да сы дынiсь морттэсö, сэк жö нырыштiс кытшöмкö кнопкаок и пöдтiс музыкасö. Бöбмöм чёртöн локтiс сiя грузовикыс дынö, сувтöтiс мотоциклсö. Поп осьта öмöн видзöтiс сы вылö, неöтпыр думанас пернапасалiс кымöссö, лыддьöтiс неöтiк молитва.

Григорий Черепан сибöтчис агроном дынö, крепыта жмитiс да треситiс сылiсь кисö:

— Поздравляйта, дона сосед, сьöлöмсянь поздравляйта!

Сэсся бергöтчис тöдтöм дядьлань, тожö жмитiс кисö:

— И тэнö поздравляйта, паськыт тош!

— А менö-ту мыйöн? — дивуйтчöмöн юалiс отец Мисаил. Сiя сё эшö видзöтiс эта крепыт корпöса гажа морт вылö повзьöм синнэзöн, сё эшö лыддьöтiс аскежас молитваэз.

— Да удача жö, удача уськöтчис миян киэзö! Часöт только районiсь öтiк тöдса начальник, öддьöн бытшöм и добрöй морт, юöртiс, что судзöтöма миян понда кабель. Кабельыстöг телевизионнöй антеннасö эд он артав. Вот лöсялiс дак лöсялiс миянлö! Часöт гымгамö-лэбтамö Чöвпан мыс вылö гигантскöй мачта, арталамö антеннасö. И суткиэзöн, кузь неделяэзöн пондамö видзöтны телевизор. Московскöй передачаэз!

Агроном мыйкö шушкыштiс сылö пель одзас, но председатель и синöн кваркыш эз кер, эшö горöнжыка баитiс одзлань:

— Сэтшöм мачта ми сувтöтамö Лысöй Чöвпан вылö, ух! И мый эшö ми керамö? Ми мöдöтам этö гигантскöй мачтасö быдкодь цвета электрическöй гирляндаэзöн. Вот кытшöм эффектыс лоас! А самöй йылас, мачтаыс конецö, ми монтируйтам вынася-вына прожекторрез. И лоас сэк миян сельсоветын ойезнас сэтшöм жö югыт, кыдз и шондiа лунö. Вот и дивуйтчы часöт: эд югыт чассэс содасö сэк суткиас кыкись, вот эд мый! А кин жö оз тöд: кыным югытжык да гажажык öтöрын, сыным чожжыка быдмö ыббезын нянь, пода кыкись унажык содтö привессэз, нельки курöжоккез буржыка кольттялöны! И турун буржыка быдмö...

Поп сулалiс вöрöтчытöг, ылöстöма шыннялiс, видно, нем эз вежöрт. А Юрий Андреевич пиннес пыр содтiс Черепаныс кыввез дынö:

— И пуэз тожö.

— Быль! И пуэз пондасö чожжык быдмыны. И тöдан эшö мый, Юрий Андреевич? Тöн лыддьöтi ме öтiк газетаись заметка. Висьтала сразу — öддьöн интереснöй заметка! Öтiк миян дошлöй учёнöй год-мöд наблюдайтöма и керöма логическöй вывод, что бур классическöй музыка отсалö быдтыны нянь. Кыным унажык горалö ыббез весьтын музыкаыс, сыным богатжык лоö урожай: нельки лупатöг позьö казявны, кыдз син одзын тырсялöны шеппес. И думайтыштi ме: а мый, если ми мачта-ретранслятор вылö эшö öшöтамö вына репродукторрез?

— Ладно, öшöтам! — öмалiс сiйö Юрий Андреевич. — А часöт лэдзчы небосис миян грешнöй му вылö. Давай-ко тöдсась мортыскöт. Эта отец Мисаил.

Григорий Черепан сразу жö курччöвтiс кывсö и паськыта осьтiс öмсö. Не öтiк минута сьöрна сiя, öмыс, вöлi осьта. Вöлись только Черепан вежöртiс, что этадз керны небытшöм и тупкалiс сiйö трубочкаöн. Чожа öтлаын тшынкöт öтöрö петiсö кыввез:

— Кыдз отец Мисаил?! Мыля отец Мисаил?

— Просто отец Мисаил да и только. Мый сэтöн сэтшöмыс? Вон сорасьöма невночка: локтöма миянö чериавны, а сы йылiсь, что Вильваыс öнi йывсяняс устьеöдз пруддьöма вöрöн, вунöтöма. Пуксьöт-ко мортсö коляскаат да кыскы бöр посадöдз, автобуснöй остановка дынöдз. Сiдз, отец Мисаил?

Поп öшöмöн моз видзöтыштiс перво председательыс вылö, сэсся Юрий Андреевич вылö, мыйкö дырна думайтiс да вöрöтiс тырппезöн. Мый йылiсь думайтiс сiя? Кин тöдö. Поди, святöй угодниккез йылiсь, а поди Куть-Кутиха йылiсь, кöдö видiс ведьмаöн да ылöстöм бондяöн, квашняöн. Кыдз бы эз вöв, а чожа мыйись сiя гажтöма шынньöвтiс, серöмтчис:

Дата добавления: 2015-11-16