Чукашор сайын

Эта кадö Чукашор сайын, Ошпозъяинын, оланыс чуклясьтöг котöртiс аслас туёк кузя. Öсекöн йöртöм паськыт загонын тронгисö джынняннэз, тиньгисö сильканнэз да сярöтiсö боргунчиккез. Быд джыннянлöн да сильканлöн вöлi аслас голос. Öтiк тронгис кыз голосöн, басöн — бум-бум! Мöдiк не öддьöн кыз голосöн, тенорöн — тран-тран! А куимöтыслöн вöлi не бас и не тенор, а мыйкö нач невежöртана, лэдзлiс кытшöмкö арттöм шыэз: гыж-гыж, гач-гач... Пырас сэтшöмыс пелят, дак сразу вежöртан — бырöма ни джынняныс, потöма.

Быд пу сайын татöн баксöны мöссэз да мöймуся куканнез и почти дугдывлытöг лявгö учöтик понок. Кыдз этö Шариклöн мылаыс тырмö вувтны ой и лун — натьтö, и ачыс вöрисьыс оз тöд. Ойнас Шарик полö ошшезiсь и, медбы не шедны зверрес кок увтö или ны пиннез коласö, видзсьö унажыксö мöссэз дынын, керö вид, бытьтö дозирайтö нiйö; луннас Шарик радуйтчö шондiлö, аслас хозяин Гришкалö, и бöра жö лявгö сiмöм голосöн, никсö и гардсьö кок увтын. Кöть и умöлик понок, а вежöртö — вердöны сiйö бур служба понда.

Ошпозъяинын, паськыт кушин вылын, кöдö сваль вевттьöма томыник пожумьяин, сулалö избушка. Часöт сэтöн лонтiсьö гор, и Гришка, даснёль годся винерик, пашмöм юра зоночка, пуö поклёбка, каша да жаритö сковородаын тшак. Гор дынсянь вачкö чöскыт дукöн, и зоночкалö стрась кыдз охота сёйны. Но одз эшö. Сылöн айыс, Миколь Сеня, важын ни мунiс вочны йöррез, керны виль загон. Тюк да тюк, тюк да тюк — кылö неыджыт шорок дынсянь. Сеня кералö увья кöззэз, ньыввез да понуллез, тэчö нiйö кокораэз да мыррез вылö. Дзарнитан и сразу вежöртан — виль öсек шогмö.

Миколь Сеня — неыджыт мыгöра кöсыник мужичок, чужöмыс — кык чуньöн вевттян! — везъясьöма поснитик-поснитик чукыррезöн, дзик кинкö вöснитик сетка нюжöтöма. Сэтшöм чужöм вылын тош мылякö оз быдмы, öтiк тылöпок öт рожабан вылас, мöдiк — мöд вылас, да эшö тшöка вылас кöч бöж — вот и быдöс. Мыйсянь привлекательнöй эта чужöмыс, дак только, натьтö, сысянь, что синнэс Сенялöн голубöйöсь и, дзик кытшöмкö басöк нывкалöн, пыдöстöмöсь, паськытöсь.

— Природа кужö мукöд вылын шутитны, — сералöны Веретяын.

Висьтасьöны, кöркö томнас Миколь Сеня вöлöм öддьöн боёк да визыв. Кыдз и быд зонка, сiя гожуммезнас петавлöма деревня сайö гуляйтны, орсны да сьывны. Но пондöм шогавны письтиöн, чуть абу кулöм. Сыбöрын мöдiк лёк шогöт кутчисьлöма — и вот на тэныт! — лоис Сеня кытшöмкö узьмöм, осьта öма и öддьöн полiсь. Асьсö дорйыны сiя немымда оз письты, нельки оз и кутчисьлы дорйисьнытö. Мукöд морт, видзöтан, сымда куртас-вартас, сымда гусялас да бöбалас — самöй раз бы решётка сайö! — а, любуйтчы, сякöй помойись и гудыра ваись сöстöм петас. Сеня жö, кöть умöльсö нем оз и кер, а видзчисьтöг бöра шедас виль бедаö. Мöйму Ошпозъяинын сiя казялöма кöз вылiсь стрöйдöм ранитöм сьöлаöс. Абу вермöма терпитны, сöтöм сы кузя шатёкöн, вийöм. Кажитчö, мый сэтöн сэтшöмыс? Вийин, дак жарит да сёй, кинлö кытшöм дело? Но Сеня и сэтöн шедöма. Лесник Кузьма Кузьмич кутöм кöз дынас, мырддьöм сьöласö, штрафуйтöм...

— Да мый жö эта сэтшöмыс? Да кытшöм эта сэтшöм олан? — чирзiс иньыс. — Да не пишались жö тэ каёксö вийин, а шатьöн, шатьöн! Мыля эн дорйись?

— Чöв, Парася. Неморт Кузьмичыс. Мый сыкöт кутчисьны, тожно, — öвтыштiс Сеня кинас и кунис синнэсö, дзик онмöссис.

Парася дыр эшö ванзiс-чижьялiс, видiс жöниксö сяко: и тувдöмöн, и гöжöмöн. А Сеня паныт сэсся и кывджын эз горöтчы.

Сэтшöм «узьмöммесö» деревняын озö вежöртö, нылö сетöны быдкодь обиднöй нимкоддез. Сьöкыта овсьö сэтшöммеслö. А Сенялö и подавно: челядьыс сылöн вон мымда — тыр керку. И поснится-поснит. Куим нылочка эшö школаö оз котрасьö, кык зонок гожумбыт вешьянтöг щеголяйтöны. Öтiк Гришка только и работник — кончитiс таво öтлаын Максякöт восьмилетка и вот отсасьö айыслö.

Ая-зона деньга заробитöны неетша, позис бы овны мукöдся не умöльжыка, да кыдзкö сё сiдз аркмö, что нем нылöн бурыс абу: то Сеня гöститöтас праздник коста даровöй вина радейтiссезöс, то иньыс вдруг небас мыйкö сэтшöмö, кöда, видзöтан, нем вылö оз туй — кöть часöт жö öтöрö петкöт да чапкы понлö бöж увтас. Вот и новйöны ай да зон бöра только сiйö, мый сетiс колхознöй правленнё — гуртоправскöй спецовка.

— Вот! — баитö мукöдпырся зоныслö Сеня. — Вот сiдз, будичи. Кулям унажык бадь нин, дубкорьё, посадö кыскамö. Вöлись и миян деньга лоас. Банкаö сiйö пуктамö, книжка вылö.

Бадь нинсö посадын былись примитöны, сетöны кило понда кык гривенник, и ай да зон мукöдпырся кульöны сiйö. Тырмö татöн баддясникыс, Урва шорок дынын, вон лог саяс, сылö конец не дор абу, да лишньöйсö тожö он эд куль: сотняся унажык бракуйтöм мöс да мöймуся кукань табуннас. Быдöнöс дозирайтны колö. Только кутчисян бадь бердö, а сэтöн кöш кымöса порозей пелитчö ни öсекö, сюррезнас разьö йöрсö, сiдз бы и котöртö вöрö, ош дынö.

Миколь Сеня да Гришка мукöдпырся баитлöны öтамöдкöт и мöдiк важнöй темаэз вылö. Öтпыр котрасис зонкаыс гортас няньла. Кöр локтiс бöр, юöртiс айыслö:

— Веретяын, Дзибалог сайын, виль мöскарта мöдöны строитны. Ыджыт карта пö лоас, комплексöн шуны пондасö.

— Эх нiйö, правленчисö. Кытiсь нö деньгасö виль картаыс вылö? Кывсьö, зарплата пö вештыны немöн. И вдруг — виль карта...

— Адззасö деньгасö. Банк пö одзöсöн сетас. Да и миян привессэз вылö надейтчöны. Туруныс таво быдмис добрöй, привессэс лоасö тожö добрöйöсь. Вузаласö арнас откормочниккесö, вот и деньга.

— Сiдз, буди. Туруныс быль эм. Морошка грива вылын клеверыс моросви ёткöма. Сiдз, буди.

Подасö Сеня радейтö, дозирайтö и вердö откормочниккесö бура. Мöйму гожумнас быд суткиö привессэс содлiсö öтiк кило вылö. Кыдз лун, сiдз быд мöс сетö колхозлö килограмм яй! Сенялö, колö висьтавны, нельки премия сетлiсö. Кыдзкö корисö сiйö пода вöдитiссезлöн районнöй слёт вылö, козьналiсö дона часы; да эд аслат счастьеыт абу, дак мöдiклiсь он одзöст: гортö локтытöн Сеня öштöма часысö...

Луныс талун шондiа, Сеня чувствуйтö асьсö бодрöя, уджалö и уджалö жагöника, пöвсиннас видзöтлö шондiыс вылö: чожа я павжун?

— Тятю-у, тятю-у-у! — чирзö Гришка. — Тшакыс öддьöнöв ни жаритчис. И кашаыс пусис. Тятю-у-у!

Сёйны Миколь Сеня томсянь любитлiс. И часöт эз понды тшвакны да видзчисьны, кöр корасö мöдöтпыр. Эшö öтпырись дзарнитiс шондi вылö, сэсся затшкис черсö мырö, чышкис кымöс вылiсь ньылöм воттез. Избушка дынö шагнялiкö, кежавлiс шорок дорö, миссьöтiс-керис сирасьöм киэсö, малыштiс чужöмсö, сыбöрын кöдзыт ключевöй ваись кыскис ыджыт туис. Сэтöн, туисас, вöлi йöв. «Чöскöта öмöс и гыркöс...» — думыш керис Сеня и гусьöник шынньöвтiс. Сы табунын эм мöсок, кöдö тулыснас бракуйтiсö, мыля вöраыс вöлi косьмöма. Быд бригадаись пастуххез откажитчисö примитны сiйö, думайтiсö — ёна шогалö. А Сеня примитiс, туруннэзiсь да вуджжезiсь аскерöм зелляöн веськöтiс мöсжугсö, и вот, видзöтö, пожалуйста, — тыр туис свежöй йöв павжун кежö эм! Мöсок вöлöма вежöра, пондiс бура сёйны, ыжмавны, чожа вочмис. Миколь Сеня высьтö сiйö чуманö и йöвтöг пызан сайö некöр оз пуксьывлы. Кывсьö, завидуйтöны öнi мукöд пастуххес, да öштöмсö, кыдз баитöны йöзас, бöр он ни бергöт.

— Гришка, ноко вашöт татчö Серанькасö! — тшöктiс Сеня, кöр локтiс избушкаыс дынö. — Высьтамö, будичи. Дак!

Медбы мöсокыслöн вöраыс сэсся некöр ни эз косьмы, Сеня высьтö Серанькасö луннас куимись.

Гришка вайöтiс мöссö, пыралiс избушкаö и петкöтiс ыджыт чуманын руш ва. Сеня пуксис мöс дынö кекеркаöн, миссьöтiс вöрасö, сыбöрын кöсöдз чышкис сiйö плащ поланас и дыр сiдз и этадз массируйтiс чорыт чуннезнас. Мöс деловитöя öвтiс бöжнас, сы уль синнэзын везъясис счастье. Шарик никсiс сэтöн жö, видзöтiс, мый керö пöрись хозяиныс. Кöр йöв вöснитик-вöснитик струйкаöн брызнитiс чуманас, понок эз вермы терпитны и горöн лявгыштiс. Гришка эта коста вундалас нянь, пуктiс пызан шöрö сковорода.

Мирнöй картина!

И как раз эта секундаö неылын избушкаыс дынсянь, самöй дзибас, кинкö кожгис-лыйис пишались. Паськыт-паськыт говк увгöмöн, дзик пурга, ветлiс вöрлöн мöд конецöдз, сэтчин, тыдалö, падмис ыджыт кöз йыввез бердö, бергöтчис бöр и, кöдзыт шорокыс весьтöт дюттясьöмöн, тарöвтчис кытчöкö увланьö, Веретя ладорö. Шарик, кыдз пуля, лэбзис шор саяс. Котöртiкас понок сiдз унньöвтiс, что мöс бöбмис, бакöстiс пороз моз, быд вын сöтiс бöжнас Сеня чужöм кузя, кокнас шентыштiс-тэчкис чумансö и пышшис избушка пельöс сайö. А Шарик чеччöвтiс увья öсек весьтöт, казявтöг пырис вöрас.

— Гришка!

— Мый?

— Лыйсьöны! Бытьтö пушкаись, дак!

— Вöралö кинкö...

— Бöбöв! Не кад öнi вöравнытö. Натьтö, ошöс вийöны. Ноко петкöт пишальöс. Отсала, йöзыслö, бат!

Гришка ньöвьёсьöн петкöтiс важ берданка. Миколь Сеня кватитiс сiйö, уськöтчис тэлляинö. Шарик камгис-вувтiс совсем матын. Бытшкасяна уввез зубыта сöталiсö Сенялö чукыра чужöм кузя, но сiя нем эз кыв. Колода вылöт котöрöн вуджис шор саяс. Шарик вувтiс семдалöмöн, нёштöма никсiс: пурис кинöскö. Полiсь вöлi понжуг, а видзöт, кыдз жаралiс-öзйис, бытьтö сатана сiйö курччöвтiс. Сеня содтiс öдсö, котöртiс веськыта мыррез да колодаэз кузя, джöмдалiс, падмалiс кöчкаэз да мыррез бердö, а то и аслас чукыля коккез бердö. Сiя неöтпырись усьлiс кыминь, чеччöвтлiс кок йылö и бöра котöртiс, котöртiс одзлань. Котöртiкас кыскис затвор, лöсьöтчис лыйны.

Неыджыт кушин вылын сiя поиктыштiс невночка, шоччöтiс лов, кывзiсис. Шарик дугдiс уннявны, но Сеня кылiс сылiсь лöга эрзöмсö. И эшö сiя кылiс: кытöнкö ризьöтiсö кöс уввез, буткöтiсö сьöкыт сапоггез. Кытöнкö, чуть шульгаланьын, котöртiс морт. Сiя, тыдалö, тожö эз бöрйы туйсö, чеччалiс веськыта колодаэз вевдöрöт, тэрмасис зыбуна нюр бокöт.

— Шарик, Шарик!

— Эрр-рр!

Поныс сэтöн и вöлöма, почти ордчöн. Лапыт уввеза понуллез сайын, жельнöг да ыжман кусттэз коласын, Шарик пурис зверьöс. Сеня чепöссис сылань, кынымкö оськöв бöртi тран сувтiс, пондiс вешшыны бöр. Кусттэз сайись сiя казялiс мыйкö вöвлытöмö, как раз сiйö, мый казявны некöр эз думайт. Сеня повзис кулавлытöдз, öштiс кок садьсö, чуть эз усь. Да и юрыс дугдiс уджавны, бытьтö веммес туйö кинкö öддьöн недобрöй тапкис сэтчö, юрас, чорыт нитш. Сiдз чулалiс не öтiк минута. Сенялöн жагвыв оссисö синнэс. И сэк жö казялiс: кусттэз коласын пластöн куйлö совсем не ош, а ыджыт нятьöсь порсь. «Дикöй кабан сiя... тожно!» Пон сё пурис и пурис зверьсö, лакис пым вир, кöда чижйис-петiс ранаись.. Эта вирсянь и бöбмис понжуг, кольмис.

Сеня дыр сулалiс, дзик тувдöм. Сылöн öшöтчисö киэс, кынмисö местаас коккез. А пон сё эрзiс сы одзын, чеччалiс зверь гöгöр. Сеня лэбтiс ассис берданкасö, лöгöн шагньöвтiс Шариклань. Вот кутiс сiя пишальсö, кыдз зорöс, дулоöт, думайтыштiс и вöлись быд вынiсь заваритiс прикладнас поныс зад кузя.

И сэтöн... И сэтöн жö пишальыс кы-ыдз гымнитас-лыяс! Тшынсора би югöр жарöн пöльтыштiс дулосис, секунда кежö пемдöтiс пастухлiсь синнэсö. Пастух чеччöвтiс бокö, пишаль мезмис кисис. Сеня нем эз вермы вежöртны, только малалiс кынöмсö, боккесö, ньылöма юр пыдöссö. Кöр казялiс, что и кынöмыс, и боккес, и юрыс дзоньöсь, сiя осьтiс öмсö, мыйкö бобгыштiс бытьтö бы лыддьöтiс молитва. Ловья! Ёна радуйтчис Миколь Сеня, что кольччис ловья, нёджжöвтiс öтмодöрö добрöй голубöй синнэзöн, дзонь юрнас гогынь-гогынь керис.

Сьывны охота вöлi, йöктыны камаринскöйö, но вдруг кылiс понлiсь никсöм и вились куньлiс синнэсö, дугдiс шыннявны. Дикöй порсь, кабан! Вот куйлö сiя кусттэз коласын; не юрöн, не коккезöн нельки трек оз кер. Вийöм. Кин лыйис? Пондыв-ко, тöд!

Сеня лэбтiс му вылiсь ассис срам пишальсö, лöгувья зубыта чужйис Шариклö бокас. Пон унньöвтiс-викöстiс и чуйнитiс кусттэз коласö. Горöн лыйсьöм бöрсянь вöр сразу жö лöнис, бöра пондiс сунасьны, овны аслас гожся дыш оланöн. Сенялö вдруг öддьöн охота лоис бертны избушкаас, мунны мирнöй пода дынö. Кынымкö секунда кежö пыравлiс юрö дума — вöтны да кутны лыйсисьсö. Но морт эз вермы вöрзьыны местасис, коккез бытьтö каттисисö турунас. Быдöс аслас вывтырöн, быд вемöн и нерваöн пастух вежöртiс, что видзчисьтöг бöра шедiс нёштöм делоö. Кысянь локтiс эта думаыс, сiя, конечно жö, висьтавны эз вермы нем. Но повзис ёна, сьöлöм ёткöпалiс джöмдалöмöн. И доймис сiя, доймис...

— Гришка-а-а! — чирöстiс Сеня вöр пасьта. — Гришка-а! Кытчö тэ воштiсин, кульпиян? Лок ме дын! И вöр пыдöссянь, кажитчö, кинкö шыасис: «О-ок... Шедiн?»

Дата добавления: 2015-11-16