|
Читайте также: |
ПОВЕСТЬ
Вöлi эта тысяча девятьсот тридцать первöй годö. Миян округын, кыдз и быдöс странаын, организуйтчисö колхоззэз. Чужисö нiя сьöкыта, быд деревняын сулалiс вöвлытöм зык: лёкгоршöн ванзiсö кулаккез, эз сетчö нылö бедняккез. А инькаэз йылiсь и баитны нем: собраннёэз вылын пеллез дурмöтöны, кöть тупкав нiйö нитшöн. Сьöкыт вöлi кадыс. И опаснöй. Пемыт
вöррезын-волоккезын мыччисисö бандиттэз, быдкодь пышшалiсь йöз. Лöгöсь и мустöмöсь вöлiсö нiя, кöинся пиняжыкöсь. Шедас сэтшöммеслö сельскöй активист, дак бурсö эн ни видзчись: пышналасö штыккезöн, кок увтын няж-няж керасö, роднöй мамыт оз тöд.
Эта годся сентябрь дасöт лунö Косинскöй районiсь чекистлö, Борис Тимофеевич Боталовлö, сетiсö шоччисян лун. Вöлi Боталовыс татöн ОГПУ-лöн окружнöй отделiсь уполномоченнöйöн. Гожумбыт гöняйтiс сiя районöт, кежавлiс почти быд деревняö да хуторö, мукöдпырся суткиэзöн эз и чеччывлы седлоись. Бандиттэз сьöрын вöтлiсикö, чекист, кыдз сiя шутитлiс, унаись оча чук пантасьлiс косаа старухаыскöт, ёна мыдзис. И вот вöлись выходнöй. Чулöтны кö сiйö умöн да толкöн, то позяс бурмöтыштны сьöлöмтö. Öтöрын öгралö ар. Этö лоö, что вöрын шуксьöмöн-шуксьö быдкодь пöтка, юэз да тыэз весьтöт утугаöн лэбалöны госа уткаэз...
Ашын лоас праздник!
Да тöдан разь, мый тэнö одзат видзчисьö? Некöр он тöд. Ашынас, кöр Борис Тимофеевич саймис да осьтiс синнэсö, чуть весьö эз пöр: комнатаын вöлi югыт ни, ходиккез мыччалiсö дасöт час. Дырöв, дырöв узис, торкис шондi петандор кадсö, кöр вöрын саймö да лэбалö пöткаыс, кöр нюрын да тыэз весьтын орсö и уткаыс, и куликыс. А часöт мый? Часöт нiя мыдзисö ни, пöттöдз сёйисö ассиныс няньнысö и пуксисö шоччисьны, дзебсисисö сiдз — сизим понöн он адззы. Гажтöм лоис, сьöлöм дзугыльтчис. — Надежда, мыля эн саймöт?
Иньыс, югыт чужöма и лöсьыт мыгöра ичмонь, дзöрис горби одзын, мыйкö пуис да жаритiс. Сiя лукавöй синöн мыччалiс порог дынiсь пельöслань, кытöн пуовöй кровать вылын ныргорöн узисö зоннэс — нёльгодся Славка да öтiкгодся Колька — шушкыштiс тырппезнас:
— Чöв, саймöтан эд. Крепыта тэ узин, дзик вийöм. Ме, Боря, и думыш кери: сэтшöм чöскыт оныс дасiсь донажык быдöс уткаэзся да дозмöррезся.
— Думыш кери! Велалöма бöбöтчыны, — нелöгöн бобгыштiс Борис Тимофеевич. — Бур отирыс пöттöдз вöралiсö, паздiсö тарресö да сьöлаэсö, мымда колö, часöт бертöны гортö. А сэтöн...
Миссис том чекист кöдзыт ваöн, пасьтасис и кинас макнитiс: паникуйтны одзöв. Не только дозмöрöн и сьöлаöн мортыс пöт. Арся вöрöттяс ветлöтыштан-гуляйтыштан, дак казявтöг вунöтан печальтö, заботаэтö. Видзöтан, и сьöлöмыт веськалас, быдöс мыдзыт чулалас. Да и госа пöткаыс только разь шондi петан дорын лэбалö?
Тöждiсьны кытчöдз одзöв. Шоччисян луныс только пондöтчö, выходнöйыс эшö одзын. «Вот часöт жö муна вöрö, пемытжык дзибö...»
Иньыс вайис пызан вылö нянь, жаритöм чериöн сковорода и чайник. Горöдзлань мунiкö, гусьöник юöртiс:
— А тэнö старичок видзчисьö. Удерлун вовлiс, тöн тожö. И вот талун бöра чуть я не ойшöрсянь юасьö.
— Старичок? Кин сiя? Кытöн?
— Да öтöрас. Кори керкуö, дак киöн-кокöн пыксьö. Мудьöт вылын, шуö, видзчися. Да тэ тöдан сiйö. Этö пастух, кöда косинсалiсь частнöй собственностьсö дозирайтö.
Сельскöй пастухöс, дедушко Пеклисöс, Борис Тимофеевич и былись тöдiс. Нiя часто пантасьлiсö посадас, пантасьлiсö и вöрын, кушиннэз вылын, логгезын да яггезын, кытöн старик вердлiс ассис пöтлытöм табунсö. Эта вöлi винерик бобыль — горттöм кöк, любитiс сёрнитыштны да юасьны-висьтасьны. Но не аслас делоэзö нырсö некöр эз сюйлы, начальство син одзö эз пелитчы. Кытшöм жö сэтшöм дело вайöтiс сiйö татчö эта одза?
Борис Тимофеевич чапкис пельпоннэс вылö важ куртка и нетэрмасьöмöн петiс посöдзö. И быль! Пукалö мудьöт вылын пастух Пеклис, юрсö öшöтöм морос вылас, кыдзкö нёштöма кöстiсьöма кык кусiнь, тыдалö, онмöссьöма. Пасьтасьöма старичок не сiдз ни умöля: пельпон вылас домассэзтöм шоныт зипун, кокас дьöгöдьöн мавтöм сапоггез, юр вылас пелитöма гыновöй колпак-шляпа. Пастух — мортыс мирскöй. И олö сiя мирскöй довольствие вылын: хозяйкаэз и вердöны, и пасьтöтöны, и, кöр колас, ласковöй кылöн шонтöны.
Борис Тимофеевич шумöн лэдзчис посöдзись. Пастух сэк жö осьтiс синнэсö, трекнитiс пельпоннэзöн и перыта сувтiс кок йылö. Чекист бытшöмика нёджжöвтiс сылö чужöмас и эз вермы видзсьыны, шынньöвтiс: но и дед! Чужöмыс бердö, тыдалö, бритваыс некöр абу павклöма, и öнi пашмöм да гынмöм тошыс вевттьöма рожабаннэсö, нырувтсö да тшöкасö сiдз, только лöзöтöм ныр йылыс и тыдалö. Не чужöм, а чорзьöм осокаись турунъюр.
— Сунасьыштiн невночка? — серöм пыр юалiс чекист. — Ойнас гуляйтыштiн, поди да? Тi эд, пастуххез, народ сэтшöм...
Дед Пеклис эз примит шуткасö. Сiя мыдза öвтыштiс кинас, пашмöм юрсö кыскис пельпоннэзö.
— Эн осудит, Борис Тимофеевич. Эг бы понды манитны тэнö, да нужда нырыштö. Сэтшöм беда вöтiс — кöть вод да кув.
— Висьтась, висьтась, деда. Ме кывза.
— Беда, мыся, вöтiс. Кöть кытчö воштiсь. Вовлiс удерлун ме дынö несчастнöй сойö, деревнясянь вовлiс. Конец, шуö, локтö семьяöлö. Тшыгьялö ачыс, тшыгьялöны челядёккес. Смерть. Пыктöмась ни быдöнныс. А эд нёля челядьыс, нёля...
— Сулав, старик. Смерть, шуан, локтiс. Мыля? Не колхозын я мый я сойыт?
Старик эз понды кыскыны кадсö, висьталiс веськыта:
— Сыын и делоыс. Эз гижö колхозас. Тэтöг пö ештiсямö. Жöникыс сылöн бандиттэз дынö чуйнитiс, Курай дынö.
Борис Тимофеевич тöдчöмöн паймыштiс. Сiя юалiс перыта:
— Кин жöникыс?
— Сабан Прокоп. Сiдз сiйö отирас тöдöны. А фамиллёыс — Митюков.
— Сабан Прокоп? Сулав, сулав... Этö сiя, кöда колхознöй дворись вöв гусялiс и Усольеын цыганнэзлö вина вылö вузалiс? Сiя эд кытöнкö Денина дынын олiс?
— Сiдз быдöс и эм. Поди, важын ни чезнитiс-торксис, а сойöлö сы увья олан абу. И челядьыслö тожö. Только петасö деревняас, сiдз и кокöны нiйö: «Пизьдö бандит пияннэсö, вартлö беддезöн!» Денинаын зонка табуныс стрась кытшöм бöб да тышкасись. И сойöс, мыся, колхозас эз примитö: кыдз кужан, сiдз и ов. А челядёккес? Айныс греххез понда нiя разь ответчиккез? Вот и локтi тэ дынö, добрöй ёрт. Отсав, верман дак!
— Умöль делоыт, — согласитчис Борис Тимофеевич. — И не сразу арталан дзиктассьöм гöрöдтö. Шуан, сойыт тэнат — бандитлöн, Митюков Прокоплöн, инь? А шуöны сiйö кыдз?
― Матрёна Архиповнаöн. А фамиллёыс Митюкова жö бöра и эм. Да тэ гижин бы, а то вунöтан эд...
― Ладно, керамö мый-нибудь. Поди, и арталамö делосö.
Нет, мый бы эн шу, а олан — сiя олан и эм. Сетас мукöдпырся задача — дзик юрвоман кузя зорöн сöтас. И быль эд: юрвердiсьыс — бандит, вирьюись, честнöй йöзлö овны оз сет. А семьяыс сылöн честнöй йöзлiсь отсöт корö...
Борис Тимофеевич синнэсö кунис, бобгыштiс аскöттяс:
— Чёрт тöдö, мый шогмö... Арттöм пасма кытшöмкö...
Сiя думайттöн кайис посöдзö, сэсся бергöтчис и дзарнитiс пемыт кöзъяинлань, кытöн кылiс пишаллезiсь лыйсьöм: вöралiссез лыйлiсö сьöлаэзöс да таррезöс. Гажтöм вöлi, да мый керан? Только и бурöтiс асьсö, что вöр — сiя некытчö оз воштiсь. Колö перво крепыт гöрöдсö орöтны. Ветлыны я мый я дружоккез дынö, баитыштны-юасьны, кыдз да мый керны?
Сiя вежöртiс, что оз кö öнi жö артав пастухлiсь делосö — то душевнöй спокой не адззывны. Важын казялiс: ветлöтö кö ордчöн кöть öтiк несчастнöй, то и сылö, чекистлö, счастьеыс тожö абу.
— Вай меным, Надежда, амуницияöс, вежа вывтöс, — шуис сiя, кöр пырис керкуас. — Вöрас талун ась мöдiккез шоччисьöны. Эх!
— Пуксьы да сёй. Быдöс готов.
Эз и ешты Борис Тимофеевич пызан сайö пуксьыны да вилка киас босьтны, кыдз ёркнитiс кинкö ыбöсö. Не ас кадö гöсь локтö, да кернытö мый? Хозяин вештiс одзсис тарелка, дзарнитiс иньыс вылö, ыкöстiс горöн:
— Пыр! Ыбöсыс осьта!
Гыма-ёрка пырис гöсь, сетiс гажöна копыр перво хозяйкалö, сэсся и Борис Тимофеевичлö:
— Нянь-сов тiянлö, бур аппетит, кыдз шуöны.
— Лок пуксьы, сёй миянкöт, Николай Васильевич. Николай Васильевич Чугайнов, тридцать год гöгöрся детина, неважын ветлiс Кудымкарö, сэтчин утвердитiсö сiйö Косинскöй район пасьта ВКП(б) окружкомлöн контрольнöй комиссияись уполномоченнöйöн. Олiс сiя Косаын Боталоввескöт ордчöн, вöлi бытшöм соседöн.
— Кыдз выходнöйыт пондöтчö? — юалiс Борис Тимофеевич.
Николай Васильевич только кинас макнитiс:
— Выходнöй менам — тю-тю! Джын час эз на чулав, кыдз корлiс райкомö ачыс первöйыс, тшöктiс талун жö иньдöтчыны деревняэзö. Заданнё сетiс чорытö: öктыны материаллэз бюро кежö. Мöдöны обсудитны вопрос, кыдз колхоззэз да единоличниккез сетöны государстволö нянь. И вот эшö тэ дынö репöтiс: висьтав, шуö, Боталовлö, ась часöт жö котöртö райкомö.
— Миян жö баня талун! — эз вермы видзсьыны Надя. — А рытнас мöдiм клубö ветлыны. Сьывны талун сэтчин лöсьöтчöны, йöктыны.
— Чöв, Надежда, — öмалiс сiйö жöникыс. — И баняын пывсям, и клубын гажöтчыштам. Ме эшö орса аслам знаменитöй ливенкаöн, гажöтышта йöзсö.
— Да мый ни сэтöн... Первуись я мый я. Райкомись первöй секретарь дынын, Егор Кузьмич
Густоев дынын, Борис Тимофеевич Боталов пукалiс нач недыр. Вöлi секретарьыс пöриськодь ни, мыдзсянь гудыра синнэза. Сiя кужис донтны кадсö, уна баитны эз понды.
— Обстановкаыс, ёрт Боталов, крутöя вежсис. Тэ эн лöгав, что дзуги выходнöйтö. Звонитiсö Кудымкарсянь: локтö миян районö спецпереселенеццезöн обоз. Этö партиясö тшöктöны иньдыны Усть-Кокольö. А посёлокыс, кыдз ачыт тöдан, абу на досповна строитöм, примитны йöзсö оз вермы. Локтöны юöррез, что прораб сэтчин безобразничайтö: юö, пырö государственнöй карманö. Заданнё тэныт, Борис Тимофеевич, вот кытшöм: талун жö гöнит Усть-Кокольö. Видзöт быдöс аслат синöн, примит строгöй мераэз. Посёлокыс не талун, дак ашын должен лоны готовöйöн примитны переселенеццесö.
— Вежöртi, — чорыта шуис Боталов.
Егор Кузьмич петiс пызан сайись, киэсö пуктiс спина сайö, недыр ветлöтiс горбыльтчöмöн пельöсiсь пельöсöдз, баитiс:
— Этö эшö не быдöс. Да, этö эшö не быдöс. Вот кывзы-ко. Асывнас одз юöртiсö соседньöй Кочёвскöй райкомись: петöма вöрись и локтöма милицияö винитчыны кытшöмкö Рисков. Вöлöма сiя сэтчинiсь главнöй бандитлöн, Гришка Распутинлöн, отсасисьöн. И юöртöма эта Рисковыс, что Гришка Распутин и миян главнöй бандит лöсьöтчöны öтлаавны шайкаэзнысö, керны öтiк ыджыт банда. Если удайтчас нылö öтлаасьны, то вермасö эшö куртны-вартны, ыджыт беда вермасö керны.
— Миян задача, — бöра чорыта горöтчис Борис Тимофеевич, — дзугны бандиттэзлiсь планнэсö. Ми паздам нiйö чожжыка, ог кö сетö öтлаасьны.
— Вот сыын делоыс и эм. Перво öт шайкасö паздыны, сэсся мöдсö. Кыкнансö торйöн. Только вот мый... Кыдз бы миянлö тöдны, кöр бандиттэс мöдöны пантасьны, кытöн? Сiя, Рисковыс, нем абу вермöма висьтавны.
— Усть-Коколяс мунтöн пондывла этö тöдны. Ужо, пондывла. Ветлöтö сэтчин, Чураковскöй деревняэзöт, бандиттэс поззэзöт, öтiк тöдса...
— Давай пондывлы. Желайта удача. Секретарь жмитiс чекистлiсь кисö, кольлалiс порог дынöдз.
Посадiсь петiсö павжун бöрын. Семьдесят километр мымда вöлi Усть-Кокольöдз, виль вöрся посёлокöдз. Туйыс не дженыт, монласян-керан седлоын — садь бырас. Туяс вöрзикö, баитчисö сувтчытöг гöнитны сорок верста гöгöр — Денина деревняöдз и сэтчин узьны. Денинаын олiсö Николай Васильевич Чугайновлöн аймамыс, ны ордын и узясö, а ашын ни вöлись мунасö Усть-Кокольöдз.
Коса посад сайын местаэс равниннöйöсь, кöсöсь, но пантасьлöны и нюррез да лягаэз. Зэррез коста сэтшöм сiсь местаэзын нять быльчикайтö адззывлытöм, вöвлö кынöмöдз, — кажитчö, оз позь мунны не подöн не верзьöмöн, наказаннё да и только. Но гожумыс таво сулалiс жар, кöс. Быльчикайтан нюррес косьмисö, нятьыс пöртчис горподö, туйыс волькамис, дзик пызандöра лоис. Вöввез гöнитiсö кокнита.
Пондöтчис уральскöй ар. Бöб тöлок ой и лун летiс листа пуэзлiсь гожся паськöм. Пипуэз, кыдзоккез, нинпуэз сулалiсö кельдöтöмöсь ни, гажтöмöсь. Гажтöм эта кадö овлö и сьöлöм вылын. Впечатлительнöй мортлö кажитчö, бытьтö тöлокыс летö не пуэзлiсь листтэсö, а нетшкö мороссит тороккез, зубыта гыжьясьö сэтчин. Но вöлi мыйкö и бур, мыйкö шоныткодь да син гажöтана кöвьясис öтöрас, воздухас: туй дорын öгралiсö рябинаэз, оранжевöй биöн сотчисö нылöн гырись роззэз, вöлiсö дзик орсöтчан бипуррез. Кок увтын кышöтiс кöс лист, чужöм бердö лякасисö вöснитик-вöснитик чераньвезоккез — сулалiс, кыдз баитöны Косаас, баба гожум. Природа лöсьöтчис тöвся покой кежö, сунасис.
Верзьöмаэз мунiсö ордчöн, оча вöв, сёрнитiсö нетэрмасьöмöн. Борис Тимофеевич баитiс, бытьтö норасис:
— Иньö баня лонтiс ни, натьтö. Сiдз вöлi охота, уж сiдз охота пöвсалыштны быдöс вывтырöс коросьöн. Беда...
— Вот локтам Денинаöдз, жарöтам баня, — шыасис Чугайнов. — Пöвсалам и спина, и боккез. Баняыс миян сэтшöм жар, что не быдыс öдсö терпитас.
— Нет, баня йылiсь талун вунöтны ковсяс. Делоэс, вонö, сэтшöмöсь. Мда... А эшö клубын рытнас «пукалыштны» мöдiмö. Песняэз сьывны, йöктыны, орсны-гажöтчыны. Бöра жö нем эз пет. Иньö гажтöмтчö, зоноккезö тожö. Ачым ме таво гожумбыт киам гармоння эг босьтлы, сё седлоын да седлоын. Бусöн ни тырис, натьтö, менам знаменитöй ливенкаö...
Борис Тимофеевич öддьöн любитiс музыка. И музыкант сiя вöлi кöть кытчö: öтмоз бытшöма орсiс и гитараöн, и балалайкаöн, и гармонняöн. Сылöн дружок Никита Попов, кöдакöт öтлаын вöтлiсисö бандиттэз сьöрын, часто баитлiс:
— Не враггез сьöрын бы гöняйтны тэныт, а столицаын концерттэз сувтöтны.
— Ештам и концерттэз сувтöтны. Вот кутам медбöрья бандитöс и пондамö йöзсö музыкаöн гажöтны, — öддьöн серьёзнöя горöтчис Боталов.
А клубнöй гармонняыс и быль вöлi знаменитöй, памятнöй. Николай Васильевич тöдiс сылiсь историясö. Да только разь сiя — быдсöн посадыс тöдiс. Эшö сэк, кöр Борис Тимофеевич эз на уджав Косаас (одззуну делоыс вöлi), Куран шайкаись бандиттэз грабитiсö Левичи деревня сайись леснöй посёлокись магазин. Мый буржыкыс вöлi, сiйö и куртiсö-гардiсö, тэчисö котомкаэзö: вина, нянь, сэсся казялiсö полка вылiсь кык гармоння-ливенка, и нiйö тожö кватитiсö сьöраныс. Бандиттэз, этö кöть кин шуас, любитöны гажöтчыны, винатöг да музыкатöг вöрас нылö олан не олан. Только нем талун эз пет. Абу нiя тöдöмась, что милиционер Никита Попов эна луннэзö олiс посёлокас, организуйтiс специальнöй отряд, кöда отсасис чекисттэзлö пессьыны бандиттэскöт. Этö отрядсö и иньдöтiс том милиционер разбойниккес сьöрö, кöр кылiс, что нiя петкöтiсö магазин. Ачыс тожö мунiс.
Бандиттэз чожа вежöртiсö, что делоыс аркмö неладно, чепöссисö кин кытчö. Бригадмилеццез лыйсисö бöраныс, вашöтiсö кортöм гöссесö неыджыт юок пöлöн нюрлань, меднёштöм местаö, зыбунö. Медбы не шедны налькö и не пуктыны сэтöн юр, пышшалiссез чуклясьöмöн котöртiсö сувтчывтöг, чапкалiсö быдöс грабитöмсö и крутöя кежисö пожума яглань. Милиционер Попов вöтчис кузь кока, крепыт высина мужик сьöрын. Том, вына детина котöртiс, кыдз лось, мелькайтiс пуэз коласын, тэлляинын. Но и сiя, тыдалö, пондiс пöдны: юок дынö сибалiкö, чапкис конувтсис гармоння, няньöн котомка — и уськöтчис баддез коласö, саясис. Милиционер кынымиськö лыйис наганiсь, да весь: детина ештiс пырны чашьяö, пышшис. Попов вежöртiс: разбойниксö часöт он ни кут. И первöй делоöн лэбтiс кусттэз коласiсь гармоннясö да сэтöн жö, юокыс дорын, мымда вын нюжöтiс ливенкалiсь малиновöй мехсö. Сiя орсiс и сьылiс:
Эх, бандит-паразит,
Мый чатрасян тэ?
ГПУ-ыскöт
Ох, пантасян эд!
Öксисö бригадмилеццес берег дорас, лыддисö трофейез. И ёна дивуйтчисö: бандиттэс чапкöмась почти быдöс, мый петкöтiсö магазинсис. Только öтiклö, кинлöкö öддьöнöв ни ловкöйлö да выналö, удайтчöма нуöтны берлогаöдз мöд ливенкасö. А кусттэз коласiсь адззöмсö Попов нöбöтiс Косаö, небис и часто гажöтлiс нывкаэзöс да зонкаэзöс, велöтiс нiйö сьывны, танцуйтны. Кöр Борис Тимофеевич локтiс татчö уджавны чекистöн, мукöдпырся тожö орслiс эта гармонняöн.
Мöйму тулыснас, кöр пондöтчис сев, чекистöс иньдiсö уполномоченнöйöн Чураковскöй да Чазёвскöй сельсоветтэзiсь деревняэзö. Сэтчин организуйтчисö колхоззэз, и нылö колiс отсавны чулöтны севсö бытшöмика, ковсис отсöт и единоличниккезлö. И эшö колiс примитны мераэз, медбы бандиттэз, кöдна медöддьöн пурсисö да бöбалiсö эна сельсоветтэзын, эз вермö дзугны честнöй отирлiсь удж. Борис Тимофеевич квартируйтiс Чураки деревняын. Тасянь сiя быд лун гöняйтiс сельсоветöттяс, тыртiс заданнёсö.
Чураки дынсянь неылын поздiсис хуторок Тылавыл. Öтпыр эта хутор дынöт гöнитiкö, уполномоченнöй ёна паймыштiс, пеллесö, кыдз баитсьö, муöдз öшöтiс: сiя вдруг кылiс, кыдз кинкö öддьöн кужöмöн, öддьöн басöка серöтiс-орсiс гармонняöн косинскöй «страданнёэз», орсiс сэтшöм кокнита и гажöна — кöть часöт жö пондöт хоровод, пет кругö йöктыны. Кытшöм гармонняöн орсöны? Тальянкаöн? Не тальянкалöн голосыс. Эх тэ, да эта жö ливенка! Конечно, сiя. Öт кытшöмöсь шыэс! Сöстöмöсь, ятнöйöсь, дзик сильканоккез тинькöны. Чекист вежöртiс: кинкö орсiс как раз сiя ливенкаöн, кöдö пышшöтiсö поселковöй магазинсис.
Вöлi рытся час. Вöр шöрись хуторын лонтiсисö баняэз. Лог весьтын кöвьясис корось дука курыт тшын. Лонтiсис баня и сiя керку сайын, кöдаын орсiсö гармоннянас. Боталов шынньöвтiс: тойöсь ракаö пöртчöма бандит-музыкант, вашöтöмась сiйö насекомöйес вöрсис баняын пывсьыны. Не пустöй киэзöн локтöма супоней, ливенка гортас вайöм. Вот и гажöтö часöт иньсö, ошшасьö сы одзын.
Чекист эз понды öштыны кадсö. Сiя юасис-баитiс колана отиркöт, рытнас жö чукöртiс надёжнöй бригадмилеццезöс. Ны отсöтöн и кутiс музыкантсö, кöр сiя нежитчис полок вылын. Кутiс и первöй делоöн конфискуйтiс гармоннясö, минута бöртi чарöтiс ни частушка. Бандитлö, ыджыт мыгöра, читкыля тошока детиналö, орсöмыс ёна эз гленитчы. Сiя гырчикалiс пиннезöн, шучкöп пышналiс чекистлö кöин синнэзöн.
Эта ливенка йылiсь и мунiс талун Боталов да Чугайнов коласын басниыс.
...Борис Тимофеевич орсыштiс воздухын нагайкаöн, лэдзис бура вердöм вöвсö сточма: сибалiс рыт, а Денина деревняöдз вöлi эшö ылынкодь, ковсис тэрмасьны. Гöнитiсö сувтчывтöг дас километр гöгöр, чöлiсö.
Войвыл деревня дынын колхозниккез öктiсö суслоннэз, кыскалiсö кольтаэсö межа дорö, тэчисö шором. Кык мужик сулалiсö потш вылын, кöда вöлi öшöтöма стожаррез вылö, боёка куталiсö кольтаэсö, орöттöг тэчисö и тэчисö ряд бöрын ряд. Шором ыждiс син одзын, но прока мужиккез вöлiсö недовольнöйöсь, тэрмöтiсö кольта кыскалiссесö:
— Шупытжыка, шупытжыка вöрöтчö. Ой сибалö. Борис Тимофеевич и Николай Васильевич, кöр ровняйтчисö ныкöт, сувтöтiсö вöввезнысö, здоровайтчисö.
— Артассис уджныт? — юалiс Боталов.
— Артассис мало-дело, — шыасис паныт пашмöм тоша старичок. — Старайтчö отирыс, пемытсянь пемытöдз уджалам ыбын.
Шором дынö кольтаэсö кыскалiсö дортöм дровниэзын да аскерöм телегаэзын. Но и телегаэз вöлiсö! Дроггез, подушкаэз, оссез, колесоэз — быдöс пуовöйöсь, öтiк кöрттув абу. Быд торокöн телегаэз дзуртiсö да виксiсö, оссез чадитiсö.
— Эх, и техника тiян. Быльнöй телегаэс абу я мый я? — юалiс серöм сорöн Борис Тимофеевич.
— Нач етша. Государстволö нянь кыскалöны кодяжыккес вылын.
— Сiдз... Беднöя, беднöя эшö оламö. Но делоэс артассьöны. Газетаэз лыддьöтатö? Вот-вот... Ныын гижöны, что пондiс уджавны Сталинградскöй тракторнöй завод. Деревня понда машинаэсö керöны и Запорожьеын, Ростовын, мöдiк городдэзын. Странаын организуйтсьöны машинно-тракторнöй станцияэз. Ныын, юöртiсö газетаэс, пятьдесят тысяча тракторся унажык ни. Чулалас невна кад, и миян ыббез вылын пондасö гургыны стальнöй вöввез.
— Тракторыс, кывсьö, бытшöм машина. Но миянлö перво-наперво бы телегаэсö да кöртовöй плуггез тырмöмви судзöтны...
— Лоасö и плуггез и телегаэз, — горöтчис Борис Тимофеевич. — Кудымкарын неважын оссис специальнöй артель. Сэтшöм жö артель оссис Усольеын. Тiян аскерöм нярьяннэзлö локтö конец.
— Бур бы вöлi.
Чекист трекнитiс поводöн, веськöтiс вöвсö ыджыт туйлань.
Сувтчытöг гöнитiсö одзлань. Боталов думайтiс главнöй косинскöй бандит Курай — Иван Васильевич Федосеев йылiсь. Сылöн айыс вöлi татöн медбогатöй мортöн, кулакöн, быдтiс не только нянь, но и торгуйтiс подаöн: донтöма небас крестьяналiсь мöссэз да пороззэз, куимись донöнжык вузалас нiйö Усольеын. Оборотистöй вöлi мужик, кужис барышавны да чупкыны соседдэзлiсь вирсö. И зоныс сэтшöм жö быдмис. Курай дыркодь велöтчис Косаын, вöлi грамотнöйöн. Революция бöрын мымдакö уджалiс волисполкомын военнöй учёт сьöртi делопроизводительöн. Но нечестнöя уджалiс, чожа вашöтiсö волисполкомсис должностнöй преступленнёэз понда. Асныра и бöб, Курай пондiс гусявны да бокö вузавны мужиккезлiсь вöввез, чожа шедiс капканö, лöсялiс тюрьмаö. Год-мöд пукалiс сэтчин, а кöр петiс, посадын организуйтчис ни колхоз, айсö раскулачитiсö и иньдöтiсö кытчöкö ылöжык, медбы эз мешайтчы кок увтын. Курай гырчикалiс пиннезöн, ёрдiс колхозсö. Сiя решитiс вештiсьны айыс понда, мырддьöм доброныс понда: öтлаын иньыскöт кöин моз чепöссис вöрö, чожа чукöртiс банда и вот не öтiк год ни терроризируйтiс соседдэсö, грабитiс магазиннэз да складдэз, издевайтчис советскöй активисттэз вылын, не öтiкöс ни вийис пельöс сайсянь. Лёк да мустöм мортöн мыччалiс асьсö и иньыс. Сiя жалейттöг, дзик понпияннэзöс, чапкис ассис челядьсö, нельки синва воть эз уськöт. Вежöртана: бандитлöн и сьöлöмыс бандитскöй. Вот и Сабан Прокоп тожö...
Усис Прокопыс тöдвылö, и Борис Тимофеевич юалiс:
— Кытöн олiс Митюков? Сабан Прокоп?
— Эта понъюрыс? Неылын миян дынсянь олiс, Кöчыб деревушка сайын, нюр дорас, — шыасис паныт Николай Васильевич.
— Ковсяс кежавны. Дело эм.
Туй дорись ыббез вылын уджалiсö колхозниккез, сэтчин дзуртiсö пуовöй телегаэз, фырскайтiсö-несйисö вöввез. Быд ладорсянь нырö вачкис öвин дука тшынöн, кöс сюöн да идзасöн. Колхозниккез дзимлялiсö нянь, чулöтiсö медодзза артельнöй страда.
Кöчыб деревня дынын сулалiс идзасöн вевттьöм гуна. Сыын сярöтiс киöн бергöтлан вартан машина, шумитiс сортировка. Воротаись сьöрсьöн-бöрсьöн петiсö кынымкö подвода, телегаэзын вöлiсö сюöн мешöккез. Навес увтын орсiс гармоння, пöдöмöн аркмöтiс частушечнöй мотив.
— Гöрд обоз готовитöны, — юöртiс Николай Васильевич. — Кежалам?
— Колö кежавны, — шыасис паныт чекист. — Интересно сёдаки.
Нiя локтiсö гуна дынö, чеччисö вöввез вылiсь. Двадцать год гöгöрся чочком юрсиа детина-гармонист пукалiс мешöк вылын, нюжлалiс гармоння мехсö. Сiя мöдöтчöма дзик праздник кежö: кокас виль сапоггез, вывтас суконнöй шабур. А шабур увтас, видзöт жö тэ, йöрнöсыс кытшöм! Куш басöк узöр, подулас петуххез серöтöмöсь. Бытшöм йöрнöс. Кöр Боталов да Чугайнов локтiсö мешöккес дынö, детина дугдiс орсны, чеччис мешöк вылiсь. Боталов горöн здоровайтчис мужиккезкöт да инькаэзкöт, кöдна тöлöтiсö сюсö да куралiсö мешöккезö. Уджалiссез веськöтiсö спинаэз, сiдз жö горöн да гажöна приветствуйтiсö локтiссесö. Чекист нёджжöвтiс гунасö омöн, сэсся сю чукöрись босьтiс тыр кырым рудзöг, пешлiс пиннес коласын.
— Бытшöм нянь, — горöтчис сiя. Кöр чапкис кырымсис сю туссесö бöр, юалiс: — И кыдз уджассьö öтлаын-ту? Кокнитжык эд?
— Гажöна, гажöна мунö делоным, — чекистлiсь кисö жмитiкö, шыасисö мужиккес. — Джын тысяча пуд готовитiмö ни талун государстволö. Позис бы, конечно, и унажык, да техниканым слабöй, вартан машинаыс нач проктöм, учöтöв. И телегаэз оз тырмö.
— Урожай бытшöм?
— Ошшасьнытö сiя и немöн бы, пожалуй. Засуха дзугис.
— Да, жарöв вöлi гожумыс, — согласитчис Боталов.
Сiя баитiс мужиккескöт, а ачыс чуть да и бöра пöвсиннас дзарнитлiс гармонистлань, шыннялыштлiс öдва тöдчана шынньöлöн. Чекист эз вермы терпитны, локтiс детинаыс дынö:
— Туяна, туяна йöрнöсыт. Ачыт, поди, серöтiн?
Öддьöн басöк!
— Г-гы! Невестаö козьналiс тай! — паныт серöмтчис чочком юр.
— Вежöртi. Радейтö, сiдзкö...
Колхозниккез шынньöвтiсö тожö, инькаэз горöн серöмтчисö.
— Бодритö, бодритö миян Иван, — юöртiс кинкö. — Кыдз жö, армияö лöсьöтчö да. И гармоннясö сьöрас босьтны мöдö, тортапель.
Борис Тимофеевич только кинас овтыштас:
— Важ ни чачаыс. Ась нöбöтö, абу жаль.
Но Иванлiсь гармоннясö сё жö корис, öддьöн ни охота лоис орсыштны. Сiя öтмöдöрсянь сiдз и этадз видзöтiс инструментсö, бергöтлiс одз да бöр, сэсся кышалiс ременьсö пельпон сайö и сразу жö нюжöтiс мехсö, чуннезнас вевдöрсянь улöдз нуöтыштiс кнопкаэз кузя. Пики-вик, пики-вик, — шыасис пöрисьмöм гармоння, норасьöмöн лэдзис малиновöй шыэз. Чекист кутiс тöдса мотив, öдззис сьывны:
Эх, яблочко, басöк каджиньöй,
Ми колхозын öнi олам гажöна!..
Боёка шумитiс гармоння, тэрмасьöмöн баитiс колана музыкальнöй фразаэз. Борис Тимофеевич орсiс сiдз, что асьсö вунöтiс, нюжлалiс мехсö жалейттöг, важ тальянка ружтiс и кашляйтiс. Вот бырас беднöйлöн медбöрья вынокыс, оз вермы терпитны нагрузкасö и потас, дзик поль. Но орсiс гармоння, эз кытчöдз пот. Гунаись петiсö быдкодь шыа переливвез, лэбзисö пемыт вöрлань, нюрлань, сэтчин гартчисö кусттэз да понуллез коласö и вöлись жагöник кусiсö. Навес увтас быдöс ловзис, пондiс ымьявны. Стенаэз и столббез, кажитчö, вöрзисö местаэзiсь, седлоалöм вöввез дугаöн кöстiсö голяэз, вöрöтiсö коккезöн, вот-вот пондасö йöктыны. Борис Тимофеевич сё орсiс и сьылiс частушкаэз местнöй темаэз вылö и, медперво, конечно, бандит-паразит йылiсь, кöда сёравно кöр-нибудь пантасяс ГПУ-кöт. Дас кыным частушка сьылiс сiя, бурмöтiс сьöлöмсö. Сэсся сетiс гармоннясö бöр хозяинлö:
— Давай орс. Пуксьы одзись подвода вылö и чарöт.
Денина деревня, куимдас керку мымда, сулалö керöс покат вылын. Керкуэс жмитчöны öтамöд бердö, жöв керсьöмась ыджыт туйыслöн кыкнан ладорын. Медбöрья сьöкыт годдэзö пöрисьмöма Денина, важмöм и сiсьмöм.
Кöр Борис Тимофеевич да Николай Васильевич локтiсö татчö, öтöрын сулалiс ни ульсöта арся рыт. Лысваын кöтасьöм пемытыс гусясьöмöн, дзик кортöм гöсь, петiс вöрись, кайис логгезiсь, кушинын öктiс вынсö и, вöлись повтöг ни, тэрмасьöмöн уськöтчис деревняыс вылö, шебралiс сiйö. Небоын не тöлiсь, не звездаэз — свальнöй сьöд шаль. Верзьöмаэз кежисö вевдöрись проулокö, сувтчисö важ ни керку дынö. И сэк жö шумтöг оссис ворота, öтöрö петiс старик. Сiя видзис киас кыдзовöй крепыт бедь. Кöр тöдiс гöссесö, старик уськöтiс бедьсö, паськöтiс киэз:
— Шнять-перешнять! Вот дак гöссез!
Шумöн здоровайтчисö-керисö, старик ванйöвтiс ворота, пыртiс вöввесö оградаö.
— Как раз аскадö ештiтö, — баитiс сёрниа хозяин. — Тöн рытъявнас ни уськöтi вель басöк тарöс. Ме эд охранникöн часöт уджала, сё ыбын да ыбын, вöр доррезöт жöрта. Вот и вöралыштла мукöдпырся. Уськöтi, мыся, госа тарокöс. Талун асывсянь курзö сiя горын, гырничын.
Кытчöдз сувтöтiсö вöввесö конюшняö да ветлiсö колхознöй дворö турунла да зöрла, öтöрын пемдiс досповна. Колхозниккез локтiсö ыббез вывсянь. Дугдiсö дзуртны телегаэз, лöньсисö ракаэз. Природа жагöник онмöссис.
Керкуас пызан вылын сотчис жугалöм стеклоа керосиновöй лампа. Горбыля старуха копыртчис Борис Тимофеевичлö и зоныслö, шысеттöг ольсалiс пызандöра, сувтöтiс пызаныс шöрö тарöн гырничсö, шöралiс чöвпан.
— Виль урожайись, — висьталiс старик важнöя. Вöлi сiя кöс высина, векнитик кузьмöса чужöма. Пызан сайын гöссезкöт баитiкö, чуть да бöра малалыштлiс дженытик тошок.
— Вот ми часöт и чöсмасьыштам виль няньнас, — шынньöв сорöн шуис Борис Тимофеевич. — И тарсö вильöтам.
Сёйисö и баитiсö. Нiя баитiсö талуння делоэз йылiсь, олан йылiсь. Старик висьтасис, что народ уджалö öт пемытсянь мöд пемытöдз, чожа велалiс öтласа удж дынö и пондiс лыддьыны колхозын асьсö настоящöй хозяинöн. Но овлöны кытчöдз и быдкодь казуссэз. Вон Левонтий Васька, годдэза ни мужик, быд асылö мунö коннöй дворö, медбы ас синöн дзарнитны, здоров я сылöн Рыжухаыс, пöттöдз я вердöм. Ыш лолалö быдпырся, жалейтö кöбыласö...
— Лöсялас и эта, велалас Василий, — горöтчис Борис Тимофеевич. — Конечно, не чожа. Эд вöлi Рыжухаыс юрвердiсьöн, да эшö кытшöмöн! Быдöс сы вылын видзсис. Васькасö позьö вежöртны. Сьöкыт сылö, но лöсялас.
— Сабан Прокоп, висьтасьöны, тожö быд асылö коннöй дворö котрасьöма, окалöм пö ассис вöвсö тырппезас. А сыбöрын нуöтöма цыганнэзлö, — не öддьöн гажöна шуис Николай Васильевич. — Кыдз бы и эта...
— Васькасö, батя, Прокопыскöт ордчöн он сувтöт. Васька — серьёзнöй мужик, — öмалiс зонсö хозяин. — Сабаныс самодур вöлi, асныр. Юрас кытшöмкö шестерня эз тырмы.
— Кулакöн, поди, вöлi? — юалiс Боталов.
— Кытшöм кулак! Айыс коновалитiс, справнöя олiс. А кöр кулiс, зоныс и пондiс кытсасьны: ме да ме. Поперёшнöй вöлi мужичок. Чожа лэдзис айыслiсь хозяйствосö чуннес пыр, беднöйсялiс кушöдз. А ванзыны эз дугды, сё лыддис асьсö медумнöйöн. Сэтшöм, прости господи, страм мужик. И гусялiс колхознöй животинаöс, сетöм вина вылö. Да и ладно бы! Светас олiкö мыйыс оз овлы. Пукалыштiс-керис бы год-мöдсö тюрьмаын, сэсся, видзöтан, и бертiс бы гортö. Дак нет жö, Курай дынö, кырнышпиян, чепöссьöма, разбойникöн лоис...
— Кывсьö, семьяыс öддьöн пö тшыгьялö?
— Кыдз оз тшыгьяв. Челядьыс нёля. Вердны колö. Пöрисьжыккес, пожалуй, и уджавны ни вермисö бы, а учöтжыккес... Умöльöсь Матрёналöн делоэс. Народ сiйö синöн оз адззы: бандитлöн инь. Вот и сьылö кöин песнясö беднöй морт. Кöть и не виноват немымда.
— А челядьыс разь виноватöсь? — шыасис старуха.
— Челядь, конечно, не виноватöсь, — висьталiс Борис Тимофеевич. — Челядь не виноватöсь. И отсавны ковсяс эта несчастнöй семьялö. Ковсяс керны сiдз, медбы олiс эта семьяыс мöдiк местаын, татöн олан сылö оз ло. Вот баитышта ужо Усть-Коколь посёлокись коменданткöт, висьтала, мед примитö Матрёнасö сторожихаöн я мый я. Нето кухняö посуда миськавны. Пöрисьжык челядьсö ковсяс сетны кытчöкö велöтчыны. А поснитжыккесö, если мамыс оз сувт паныт, сетам детдомö.
— Эта вöлi бы дело, — согласитчис пöрись хозяин. — А то беда.
Кöр петiсö пызан сайись, Борис Тимофеевич висьталiс Николай Васильевичлö:
— Асывнас одзжык ветлы Матрёнаыс ордö, видзöт быдöс ас синöн. И юав, кыдз да мый детдомнас. Вежöртiн?
— Вежöртi, конечно. Только Матрёнаыс мекöт чередь пондас баитны. Полö сiя быд торсис. А ме «начальник» эшö. Нем оз пет.
Борис Тимофеевич думайтiс-керис, сэсся горöтчис:
— Сэк мун мамыткöт. Нiя, инькаэс, вежöртасö öтамöдöс. И эшö вот мый: зöрсö, кöдö вайим вöввеслö, нöбöт Матрёнаыслö. Мыйись-мый, дак висьтав, что ме тшöктi.
— Сiдз и керам. Только кыдз бы Сабаныскöт не пантасьны. Локтамö хуторас, а сiя миянöс пельöс сайсянь картечöн... Чекист мигнитiс хитрöя, шушкыштiс:
— Од пантасьö. Талун звонитi Усольеö, сэтчин сетiсö справка: Прокоп Митюков эшö тулыснас шедöма чекисттэзлöн мушка вылö. Уролка ю сайын вöлöма делоыс.
Хозяин эта кадö пукалiс порог дынын. Сiя керис кыз чигарка и аппетитöн папкис-куритiс крепыт махорка. Сылö, тыдалö, охота вöлi эшö баитыштны и юалiс гöсьыслiсь:
— Висьтасьöны, бöра пö бандитöс кыйöмась. Ветлiс удерлун Данько кумö посадö. Нуöтiсö, шуö, бандитöс главнöй улицаöт. Поди, асьсö ни, Курайсö, сермöталiтö?
Борис Тимофеевич дыша шынньöвтiс тырп доррезнас, ки долоньöн волькöтiс небытик юрсисö.
— Кутiм öтiкö, кыйим. Но кытчöдз не асьсö, оборотеньсö. Рядовöйöс арканалiм, веськыта шуны, бордтöм ракапиянöс. И висьтасьнытö нем.
— А тэ сёдаки висьтась. Охота кывзыны, кыдз делоыс вöлi.
Удерлун верзьöма милиционер Никита Попов забыль вашöтiс Косаись главнöй улицаöт вожжиöн каттьöм бандитöс. Вöлi сiя нятьöсь, гынмöм тоша, пасьталöма быдöс гусялöмö, йöз пельпон вылiсь. Кöть и кöрталöмöсь вöлiсö киэс, кöть и резiс нинкöммезнас нятьсö милиционер вöвлöн ныр увтын, а сёравно полöм петiс пантасьны сыкöт синнэзöн: кöин оськалiс, а не морт, бöбмöм зверь вылö вачкисис. А эд удерлун, кöр Борис Тимофеевич да Никита Попов кутiсö сiйö, бандит киэзын вöлi зарядитöм пишаль...
Висьтасьны бандиттэзкöт пессьöм йылiсь Борис Тимофеевич эз радейт, лыддис, что ошшасьнытö эшö нач немöн: шедiсö кытчöдз только дбруньгаггез, учöтик серöввез. Курай — эта бöбмöм чёрт — сувтöтöм нальккесö кужöмöн орддьывлiс боки, вöлi удачливöй и нильыг, кыдз налим. Эз бы понды чекист висьтасьны и медбöрья случай йылiсь, да хозяин öзйис сыбурна, что кывджын паныт эз терпит — висьтась да и точка. Сiйö колiс уважитны, и чекист, кöть и не öддьöн подробнöя, висьталiс, кыдз вöлi делоыс.
— Кутiм ми сiйö Пыдосово деревняын, кытчö эта раскулачитöм лёквир петöма разбойничайтны луншöр кадö. Пыдосово, ачыт тöдан, деревня сулалö вöр шöрын, сiя учöтик, луннас только стариккез да челядь гортын. А остальнöйес, конечно, ыбын. Вот и вельмöма бандюга, некинiсь оз пов, мый колö, сiйö и гардö. Деревенскöй инькаэз син одзын öзтöма сизим промежока шором, öтiклiсь мырддьöм виöн гырнич, мöдiклiсь нянь. Адззö, народ полö сыись, эшö ёнжыка вельмöм — пырöма картаö баляöс джагöтны. И джагöтiс бы. И мунiс бы спокойнöя аслас берлогаö, поди, эшö и вийис бы кинöскö. Но ми Никита Поповкöт Чазёва дынсянь неылын вöлiмö, Бачмановаын. Казялiмö вöрись тшынсö и сэк жö чеччöвтiм вöввез вылö. И ештiм аскадö. Адззам, народ шумитö, инькаэз и челядь горзöны, зык сулалö, пель шы оз кыв. Эшö бы! Пишаля бандит деревняын, лöг, ульöн сёяс. Ми Поповкöт гусьöник пырим картаас, сетiм команда: «Пет, чапкы пишальтö!» А сiя, лешакыт, дзебсисьöм гидокö, баляыс дынö, ыжмалö. Кöр сетiм командасö, вор ванйöвтiс гид ыбöссö, пишаль дуло öтöрас мыччис: «Пышшö быдöнныт, а то лыйла!» Инькаэз котöртiсö кинлö кытчö туй, мужиккез, кöда ештöмась ни локны ыбись, тожö падмисö. Ме сэк и мигнитi Никиталö, мыччалi фуражкаö вылö. Никита гогинялыштiс юрнас: вежöртi пö. И тэрмасьöмöн судзöтiс слега коласiсь кузь оропа вилаок, сiйö, кöдöн кольтаэз шором вылö мыччалöны, босьтiс öтiк мужичок юр вылiсь шапка, кышалiс вила вож вылö и давай жагöник вештыны стена пöлöн гидыс ыбöслань.
Медбы дзугны разбойниксö артсис, бöбöтны сiйö, ме горöтi мый вын: «Чеччöвт гидас, Никита, нырышт гадöс! — «Полöм петö, — шыасис паныт Никитаыс. — Вдруг лыяс...» — «Чеччöвт, мыся! — горöтi сылö вились. — Кинiсь полан? Эх, тэ!» — «Вот сейчас... Нырышта ужо!» Горöтлам этадз öтамöдлö, бытьтö пиньгисям. А Никитаыс сё вештö и вештö шапкасö. И вöлись — раз! — вайöтiс ыбöсыс весьтö. Бандит сэк жö бузгис-лыйис пишались, шапкаыс лэбзис вила вылiсь. А ме готов ни вöлi, эг понды öштыны кадсö — чеччöвтi гидас, сэк жö нырыштi лёквирöс.
— Видзöт тэ, батя. А эн пов? А вдруг бы сiя пуртöн...
— Эз бы ешты. Миян быдöс вöлi лыддьöм. Да и думайтнытö некöр вöлi. Сэтшöм кадö, тöдан, колö действуйтны решительнöя.
Борис Тимофеевич öвтыштiс кинас, лöнис. И вдруг совсем видзчисьтöг юалiс:
— Вурун вартiсьöс, пими катайтiсьöс адззывны меным колö. Сiйö убогöй старичоксö, кыдз сiйö... Васька Митрей я мый я? Тiян ладорын öнi эз мыччась? Эз ветлöт?
— Ветлöтiс, ветлöтiс! — öддьöн радöна юöртiс хозяин. — Неугомоннöй сэтшöм пöрись морт. Мымда вöлi деревняын вуруныс, быдöс вартiс, пимиэз кинлö колiс — катайтiс. Пыравлiс и миянö. Баитiмö сыкöт диво. Часöт тöдвылам: ме юалi, мыся, он и пов бандиттэзсис, öтнат ветлöтан? А сiя только кинас öвтö: «Нылöн асланыс заботаэз, менам тожö аслам. Да и Курайыс важся тöдса. Эшö айыслö, пуксибскöй богатиналö, пимиэз катайтлi да ной зипуннэз вылö тальлi. Порой быдса месяццезöн сы ордын овлi. Зоночкаыслö, öння Курайлö, сказкаэз висьтасьлi. Мый понда сылö менö вöрöтны?»
— Кöдöрлань тасянь иньдöтчис? — юалiс чекист.
— Старичокыс? Да Гришкина ладорö лöсьöтчö вöлi. Самöй зiпозас мунiс. Öтнас и ветлöтö, кöть нем оз адззы.
Борис Тимофеевич тöдчöмöн кымöртчис, нельки ловзисис ыш.
— Ылöкодь нильдöма кустарь. Да нем он кер. Ковсяс и меным ветлыны. Пимиэз инькаö тöв кежас катайтны тшöктö.
Хозяин чигаркасö уськöтiс, сiдз и тувдiс осьта öма.
— Сы ылынаö ойшöрнас? Да эн баит жö сымдасö! Николай Васильевич тожö горöтчис мудрöя:
— Ойыс пемыт, арся. Вöлi бы лун... Бандиттэз жö сэтчин.
— Колö мунны, — öмалiс сiйö чекист. Чугайнов вежöртiс: не пимиэс ёртыслö колöны, а мыйкö мöдiк. И кывджын сэсся эз горöтчы паныт.
Борис Тимофеевич тэрмасис. Аслас шинель туйö вылас пелитiс хозяинлiсь брезентовöй плащ, юр вылö пуктiс важ шапка. И петiс. Хозяин дзарнитiс öшынö. Öтöрын вöлi дзирс пемыт, кöть синмö рос мöрт. Борис Тимофеевич бытьтö эз и вöвлы, сразу вöйис сатанинскöй пемытас, сылiс сыын.
— Отчаяннöй мужик, — öшын дынiсь мунiкö, шуис старик.
— Сэтшöм сылöн удж. Пурт дорыш вылöт ветлöтö. Чекист! — негорöн шыасис зоныс.
Ашынас югдандорыс вöлi гудыра, кöдзыт ульсöта и кытшöмкö дзик паймöм. И настроеннё тожö вöлi гудыра, сьöкыт. Старик Чугайнов кольлалiс старухасö да зонсö одз, кöр вöлi эшö нач пемыт, но узьны сэсся эз ни вод. Картаын сiя сёдiс подаöс, сэсся пыртлiс пес, кайöтiс тыр кöньöс ва, юкталiс гöссезлiсь вöввез. Кöр пондiс лöз югдыны, старик сё частожык и частожык дзарьялiс ыджыт туйлань, кывзiсис: оз я лок отчаяннöй морт Борис Тимофеевич? Нет, ыджыт туй вöлi пустöй, сы ладорын некытшöм шыэз эз кылö, чекист некытöн оз тыдав.
Вöлi öкмысöт час, кöр бертiсö старуха да зоныс. И нiя полöмöн нёджжöвтiсö öтамöд вылö: «Господи, эз я шогмы кытшöмкö беда... Да мый вермас шогмыны? Борис Тимофеевич сэтшöм делоэзын морт опытнöй...»
А сiя сё абу и абу. Тревога ыждiс, сотiс мороссэз, нельки завтрак йылiсь куимнанныс вунöтiсö. Но быдöс чулалiс öтiк секундаö — этö сэк, кöр посöдзын кылiсö увереннöй да боёк кок шыэз, а сэсся дзуркнитiс-оссис ыбöс.
— Вот и ме.
— Вöлись-ту. А ми эстöн...
Вöлi сiя куш нять, вамöма шучкöп — натьтö, инмывлiс зыбунö. Но видзсис бодрöя, шыннялiс добрöй шынньöлöн, синнэс гажöна югьялiсö. Сiдзкö, быдöс бур да ладно: пантасьлiс вурун вартiськöт, а поди, и дружоккезкöт, керис сiйö, мый колiс.
Борис Тимофеевич чöвтiс нятьöсь паськöмсö, посöдзын бытшöмика миссьöтiс сапоггез, миссис и ачыс, пасьталiс быдöс кöсö.
— Петкöт вöввесö, Николай Васильевич. Кадыс оз видзчись — одиннадцатöй час ни. Посёлокö вот-вот локтасö переселенеццез. Кыдз бы не сёрмыны, — шуис ёртыслö.
Тэрмасьöмöн сёйыштiсö пуöм картов да кольттез, пöттöдз юисö шöма квасина, висьталiсö хозяинлö да хозяйкалö спасибо и петiсö. Öтöрас вöлi кöдзыткодь, ыжмалiс ой тöв. Сук туман кöвьясис ыббез да видззез весьтын, путриктiс логгезын, öшалiс расоккезiсь пуэз коласын. Деревня сайын шором вылын китшкисö катшаэз, мöдiк шором вылын лёкгоршöн карзiс пöрись рака. Луныс пондöтчис кымöра, природа вöлi дзик нырыштöм сьöкыт ульсöтнас, дзик маитчис курыт онзыльöн.
Öдва ештiсö петны деревняыс сайö, Борис Тимофеевич дзарнитiс ёртыслань:
— Давай висьтась, кыдз да мый. Ветлiн?
— Конечно. Зöр сiя миянсянь примитiс синвасорöн, копырасис муöдз. Колö висьтавны, кинкö небыт сьöлöма морт вайöма ни сылö быдса тöвбöр рудзöг, гор вылö кисьтöма косьтыны. Керкуын гыр сулалö. И сёдаки нужда, ой, кытшöм нужда! Челядёккез, бытьтö тшыг кöинпияноккез — быдöнныс умöльтчöмась, бледöтöмась, а паськöмокнысö кöть чöрс вылын тресит. Мамö вайис нылö чöвпан нянь, дак минута-мöд кежö эз тырмы, няж-няж только керисö...
— Детдом йылiсь басни вöлi?
— А кыдз жö. Кывзiс менö Матрёна, синваэз сэк жö петiсö. Но нем эз висьтав. Ме тшöктi сылö лун куим бöртi локны учöтжыккескöт посадö. Согласитчас кö сетны нiйö детдомö.
Борис Тимофеевич повзьöтiс вöвсö нагайкаöн, лэдзис сiйö скач. Бура шоччисьöм вöв сiдз и нетшкöвтчис одзлань, чатыртiс юрсö. Кольччисö бöрö туй дорись кыдзоккез, мелькайтiсö телеграфнöй столббез. Джын час мымда пöльтiсö-мунiсö шысеттöг, тэрмасисö посёлокö. Пантасис сьöд ваа шорок. Юкталiсö сэтöн вöввезнысö, шоччöтыштiсö лов и бöра лэбзисö одзлань.
— Чуракас сувтчыламö, огö? — юалiс Николай Васильевич.
Чекист кинас öвтыштiс:
— Пожалуй, оз ков. Посадас менам уна тöдсаэз, дружоккез. Пондасö юасьны-висьтасьны, неетша кадсö öштамö. Ужо сувтчыламö бöр гортö локтiкö, видзöтам, кыдз мунöны делоэс, ваям бюро вылö колана материал. Сэк ме и баитышта земляккезкöт, челядь кадся дружоккезкöт.
Чужанiн! Челядь кад!
Пятнадцать годся унажык ни чулалiс сэксянь, кöр Боталов мунiс Чуракись, кытöн чужис да зонкаалiс, а вот видзöт тэ — некыдз оз вермы вунöтны челядь кадсö, сё бытьтö син одзын: велöтчö местнöй школаын, аслас ай дынын, гожуммезöн котрасьö вöрö тшакьявны да ягöдавны, тöвнас ысласьö керöс вывсянь лямпаэзöн, гöняйтö расöт, повзьöтлö кöчоккезöс да таррезöс...
Мыйыс только эз вöвлы!
Тöдвылö усьöны кузь рыттэз. Керку, кытöн квартируйтö учитель Тимофей Порфирьевич, бура лонтöма, сэтöн жар. Кузь лабичын пукалöны мужиккез-соседдэз, баитöны олан йылiсь, асланыс вековечнöй нужда-печаль йылiсь. Гожумыс вöлi зэра, кöдзыт, нянь быдмис умöлик, виль годöдз оз тырмы. Кыдз овны? Ковсяс бöра нюжöтöм киöн мунны местнöй кулаккез дынö, корны отсöт, пырны кабалаö, кутчисьны строшнöявны нянь кусöк понда. Шамыртiсö мироеддэз асланыс кулакö мужицкöй счастьесö, нырыштiсö беднöйесö — зника абу, кöть вод да кув.
— Чожа оланыс вежсяс, — не öддьöн горöн и не öддьöн увереннöя баитö Борислöн айыс. — Чожа Россияын лоас революция. Сiя аслас тöвнырöн нöбöтас вакрамешö быдöс вирьюиссесö, кулаккесö. Хозяинöн лоас сiя, кин уджалö — отир.
— Не адззывны ни миянлö югыт олансö, — гогинялöны юррезöн мужиккез. — Мöд светас, буди. А этаын нужда миянлö деддэзсянь дöнзис. Вынаöсь мироеддэз, вынаöсь. И царь-батюшко ны дор сулалö. И еныс пö тожö.
— И царьсö революцияыс бордпавйöн шупкас-нöбöтас, — баитö учитель.
Усьö и усьö быд берсяыс тöдвылö. Кыным матынжык Чураки, сыным, кажитчö, матынжык и челядь кад. Усис тöдвылö и школьнöй сторож, дзор старичок, кöда важын эз кыв шульга пельнас. Кыдз сiйö шуисö? Дедко Проняöн я мый я? Ну да, Проняöн шуисö. Старичок дружитiс учитель зонкöт, часто висьтасьлiс:
— Вот сiя, значит, Бориска, кыдз делоыс вöлi. Олi ме томнам кулак ордын строкын. Нянь торок понда уджалi сылö ой и лун: пода вердi, кöдзи да гöри. Нянь кусöк понда, значит, Бориска...
— Сэсся нем эз и сетлö, дедко?
— Хе-хе... Сетлiсö, зону. Да эшö кыдз. Öтiк хозяин, кöр не сы сьöртi мый керан, дак сразу кулакöн лёнö сетас, мöдiк корпаыт кузя бедьöн заваритас. Вöлi и куимöт — этö ачыс Жила Митя. Дак сылöн привычка бöра вöлi сё пельбокö да пельбокö чажгыны. Вöвлi, локтас тэ одзö да кы-ыдз косьöвтас пельбокö, дак тэнат пельын кык неделя мымда джынняннэз тронгöны, быдкодь гармоння-музыка орсö. Öтпырся сiдз сiя пельö кузя сöтiс-öбыртiс, что ме и глухöйсялi вокорень, виявны пельö пондiс. Вот сiдз, Бориска.
— Быдма, дак Митька Жиласö бедьöн вартла, — баитö свиттялана синнэза зоночка. — Ме сылö вештiся тэ понда.
— Хе-хе... Ладно, ладно, юрвердiсь. Быдмы-ко чожжыка.
Усьö и усьö быд берсяыс тöдвылö.
Вöвлi, уроккез бöрсянь мунасö челядёккез вöрö, öктöны тшак да ягöд, сёр рытöдз уксöны да аксöны. Кöр сибалас рытыс, гортö мунны оз тэрмасьö: жарöтасö ыджытжык кöз увтö костёр-бипур, пуксясö биыс гöгöр, пондöны сказкаэз висьтасьны, лешаклöн берся «удж» йылiсь лёбны.
Бур вöвлi ойся вöрын костёр дынын...
— Висьтасьöны, Чураковскöй школа бöрын тэ пö Чердыньын велöтчöмат? — вдруг юалiс Николай Васильевич.
Саймыштiс моз Борис Тимофеевич, пельпоннэс дрöгнитiсö.
— Велöтчи. Реальнöй училищеын. Сэтчин и революциясö панталi, и гражданскöй войнасö. Эг ме ешты досповна велöтчыны, Колчак дзугис. Босьтiсö городсö чочкоммес девятнадцатöй годö, сразу жö кутiсö менö: кинкö керöм донос, что пöрисьжык вонö революция бöрын вöлi Косаас военнöй комиссарöн, а айö да сойö сочувствуйтiсö большевиккезлö. Ачым ме сэк вöлi «Интернационал молодёжи» организацияись членöн. Вот и гленитчи ме чочкоммеслö. «Коммунистö велöтчин, нятьöсь ныр? — юалöны гаддэс. — Сiдз, сiдз. Видзчись ассит часто, öшöтам онняюрöн пипу ув вылö...» И йöртiсö чижовкаö. Но мыйкö эз лöсяв нылöн, эзö öшöтö. Нёль сутки вердi лудыккезöс и лэдзисö бöр, только расписка корисö, что некытчö ог мун. Да ме эг ни понды видзчисьны «ассим чассö», кöр бöра арестуйтасö и öшöтасö онняюрöн: добрöй отир отсöтöн пышши Чердыньсис Юсьвинскöй волостись Савино деревняö, кытöн сэк олiс мамö. Джын год бöртi гижси комсомолö, велöтчи Кудымкарын мöдöдз ступеня школаын. А сыбöрын уджалi комсомол райкомын, гижси партияö. И бöра велöтчи. Öнi велöтчи ни Верхне-Камскöй совпартшколаын. Кöр кончитi сiйö, уджалi пропагандистöн, руководитi политграмота сьöртi народнöй школаöн. А сэсся... А сэсся 1925 годся ноябрьын менö босьтiсö армияö. Нёль год служитi, вöлi Грузияын заставаись начальникöн. А армияыс бöрсянь, кыдз адззан, чекистöн лои.
Чужанiн, чужанiн... Челядь кад...
Баитiкö эз и казялö, кыдз локтiсö Чуракöдз. Усть-Кокольöдз тасянь абу ни ылын, дас кыным километр лоас, не унажык.
Кыдз и баитчисö, посадас нiя эз сувтчылö. Да и пустöйöсь вöлiсö Чураклöн улицаэс: гыриссес да прокаэс часöт, конечно, уджалiсö ыбын, дзимлялiсö урожай. Только школа дынын гайзiсö челядь, Сэтчин вöлi, тыдалö, ыджыт перемена, и челядь воюйтiсö öтамöд коласын — вöлiсö «чочкоммез» и «гöрддэз». Борис Тимофеевич кывзiсьыштiс-керис, мый нiя чирзöны, шынньöвтiс: быдмö виль отир, и овны пондасö нiя виль кадö. Вот и сылöн зоночкаэс быдмöны тожö. Интересно бы вöлi тöдны, мый нiя часöт керöны? Славик, натьтö, бöра ёрттэскöт му вылiсь кöс листтэз öктö...
Посадас мöд конецын нiя вöтiсö подвода. Кык мужик пукалiсö телегаын мешöккез вылын. Мешöккезас вöлi пизь.
— Мельницасянь, некö, локтатö? — юалiс Боталов.
— Мельницасянь. Вот кыскамö пизь. Виль урожайись. Оссьöны миян Киеваным столовöй да пекарня. Вот и лоас, мыйись няньсö пöжавны.
— Добрöй час!
Чураки сайын туйыс вöлi волькыт. Вöввез котöртiсö чожа, орсiсö пеллезöн. Верзьöмаэз дженыт кадö колисö бöрö вит километр мымда. Нiя шупыта кайисö керöсö, лэдзчывлiсö логгезö, дзарьясисö. Природа радуйтiс син. Туй дорись вöроккезын öгралiсö-сотчисö арся биöн ыджыт и паськыт рябинаэз, ны весьтын утугаöн лэбалiсö каёккез, кöдна лöсьöтчисö шоныт муэзö. Руын дыша лэбалiсö вежöтöм листтэз. Нiя кышöтiсö канаваэзын, кок увтын.
Сё частожык и частожык пантасьлiсö кушиннэз, мырьяиннэз. Ны вылын сулалiсö кузь полениччез. Быд поленичсянь нырö вачкис öддьöн крепыт сир дукöн. Бур пес заптöмась отирыс тöв кежö. Эта пес сьöртi и слепöй бы висьталiс, что матын деревня, öтiк мысок вылö кайтöн туйыс крутöя кежис шульгалань, вöрыс тöдчöмöн югмис, и недыр мыйись син одзын оссис паськыткодь ыб. Ыб шöрас, нач неылын, сулалiс киссьöм-разьсьöм деревня. Эта и вöлi Киев.
— Сетöмась жö ним деревняыслö, — серöмтчис Николай Васильевич.
— Сетöмась тай, — шуис чекист, кöда гöнитiс ордчöн.
Деревня дынын, рытвыв ладорас, тыдалiсö учöтик расоккез. Вöлiсö и ыббез, кöдна вылын сяр сулалiсö суслоннэз. Колхозниккез вундiсö да тэчисö шороммез. То этчин, то сэтчин кайисö тшыноккез: сотчисö костёррез. Ныын деревенскöй челядь, натьтö, пöжалiсö чöскыт картов. Деревня увтын сулалiсö идзасöн вевттьöм гунаэз. Öтiк гунаын, кöда вöлi матынжык туй дорас, тшупалiс öвин, сярöтiс-гольöтiс вартан машина «Очёрка».
А ачыс деревняыс вöлi нач пустöй. Луныс сулалiс гудыра, и этасянь я мый я Киевын эз китсасьö петуххез, эз лявгö поннэз, öшыннэз увтын эз орсö челядёккез. Медодзза керку дынын Николай Васильевич лэдзчис вöв вылiсь, осьтiс завор. Борис Тимофеевич эта кадö видзöтiс гуналань, мыйкö думайтiс. Кöр Чугайнов бöр пуксис вöв вылö, сiя вдруг тревогаöн шушкыштiс ёртыслö:
— Видзöт жö, кытшöм мужиккез шатласьöны. Киннэз? Öтiкыс не Ярашко ли?
Деревня шöрöт увлань лэдзчисö кык мужик. Нiя видзчисьтöг петiсö важ лажмытик керку пельöс сайсянь, мунiсö нетэрмасьöмöн. Борис Тимофеевич мöртiс синнэсö ны спинаэзö, старайтчис мыйкö уськöтны тöдвылö, чукралiс кымöс кучиксö. Мужиккез и забыль вöлiсö подозрительнöйöсь. Чекист сувтiс стременаэз вылö, дивуйтчис:
— Ярашко и эм! — шушкыштiс сiя. — Видзöт, шатласьö, бытьтö не сылöн и дело, киэзöн öвтö. Вот стыдтöмыт.
Герасим Степанович Федосеевöс, кöдö шуисö просто Ярашкоöн, Боталовыс тöдiс бура. Сiя вöлi чураковскöй, кöркö быдмисö ордчöн. И сэк ни Ярашко вöлi знаменитöйöн — стыдитчытöг гусялiс быдöс, мый куйлiс матынжык. Перво сiя гусявлiс ёрттэслiсь дадёккез, лямпаэз... Сэсся велалiс пышшöтлыны соседдэслiсь чересседельниккез-тягаэз, седёлкаэз, буржык да басöкжык сермöттэз, черрез. А кöр быдмис ыджытжык, дак нач вельмис: то баля кинлiськö вöрокын начкылас, то кукань. Мукöдпырся эта ашнöй гырк жугдывлiс амбар ыбöссэз вылiсь замоккез и гусявлiс пизь. Мужиккез неöтпырись кутлiсö сiйö поличнöйöн, часто вартлiсö кулавлытöдз, унаись ни ордлыэсö чеглавлiсö, но быдпырись Ярашко ловзьывлiс и пондывлiс гусясьны эшö нахальнöйжыка. Сiдз сiя и чулöтiс кадсö: то Коса посадын, арестанскöй керкуын-чижовкаын, то Усольеын — тюрьмаын. А кöр вöрын пондiсö гуляйтны бандиттэз, Ярашко сэк жö чепöссис ны дынö...
Боталов тöдiс и мöд мужиксö. Эта вöлi спецпереселенец Медведев, кöда неважын пышшис арестантскöй керкуись. Бöбöтöма кыдзкö милиционер-сторожöс и вот на тэныт! — луншöрнас шатласьö Киевын.
— Вот жö лёквиррез, вот жö паразиттэз! — лöгалiс Николай Васильевич. — Мунöны кык разбойник деревня шöрöт и кöть бы мый! Тыдалö, пишаллезтöг ветлöтöны?
— Быль эд, абу пишаллезныс, — горöтчис паныт Боталов. — Ужо, часöт жö кутам кыкнансö.
Эта кадö Ярашко и Медведев öтдруг дзарнитiсö бöрлань и, кыдз казялiсö верзьöмаэзöс, чуть только эз пуксьö местааныс, кынымкö секунда сулалiсö, дзик тувдöмöсь. Но чожа садясисö, öвтыштiсö киэзöн и мымда прок уськöтчисö котöртны улицаыс шöрöт. Котöртiсö сiдз, что кажитчис: вот-вот петасö асланыс кучикись нето берездасясö. И эшö одззася ёнжыка öвтiсö киэзöн, дзик борддэзöн. Чекист бöра думыш керис: «Öружиетöг петöмась вöрсис, простöсь киэзныс...» Бандиттэз эта кадö ровняйтчисö меддорись керкукöт, полöмöн дзарнитiсö бöрö и вотьыштiсö-пырисö керку посöдзас. Борис Тимофеевич сöтiс вöвсö нагайкаöн, шакардаöн лэбзьыштiс посöдз дынас, чеччöвтiс седлоись, кыскис кобураись наган. «Кутамö ловйöн», — мелькнитiс дума.
Дата добавления: 2015-11-16; просмотров: 65 | Нарушение авторских прав
| <== предыдущая страница | | | следующая страница ==> |
| КЫДЗ ШЫННЯЛÖ АПОСТОЛ 12 страница | | | МÖДÖРА КУЧИК |