КÖТЬ КИН ВЫЛÖ ДУМАЙТ

Вöрöтыштны веммезöн, думайтны сы йылiсь, кыдз разоблачитны кабан вийисьсö, кыдз не сетны Кузьма Кузьмичлö керны нёштöм дело, — позис бы, вежöртана, эстöн жö, навес увтас, öтöрын воздухыс бур, навес увтын ыркыт — думайт да думайт, мымда колö. Медбы юрыт уджалiс буржыка, медбы вемыт эз дышмы — колö пыр и пыр думайтны. И быдлаын: öтöрын и керкуын, туйын и гортын, шалашын и навес увтын. Но Макся мылякö решитiс, что председатель кабинетын, сiдз шуана, официальнöй обстановкаын, думайтны лоас буржык. И сiя пырис кабинетö. Сэтöн сё эшö кöвьясис сьöкыт одеколон дук, и Макся ванйöв осьтiс öшыннэз. И вöлись только пуксис пызан сайö, пыдын да небыт креслоö.

Эстöн Макся гырдззаэсö нырыштiс пызаныс вылö, сьöкыт юрсö пуктiс кыкнан киас и пондiс думайтны, вöрöтны веммезöн, развивайтны умственнöй способносттез.

И сiдз, Чукашор сайын, Ошпозъяинын, неылын поскотина дынын, кытöн визывтö кöдзыт и сöстöм таёжнöй шорок, талун кытшöмкö умöлик морт, супоней, вийöма дикöй кабанöс. Дикöй кабаннэс татöн пантасьлöны шоча, нiя асланыс делоэзöн локтöны Ошпозъяинö ылiсь — удмуртскöй нето вятскöй вöррезiсь. Медбы богатжык лоис миян вöр, медбы животнöй мирыс содiс виль видöн, гöссесö колö берегитны, нылö колö отсавны. А татöн мый шогмö? Татöн кинкö вийöма кабанöс. Кин сiйö вийис? Кинлöн, кытшöм тшыг мортлöн лэбтiсис ки вийны гöсьöс?

Вот эта задача дак задача! Лесник, кыдз висьтасьö Гришка, винитö пастухöс, Миколь Сеняöс. Но эд быдöн тöдö — Миколь Сеня сэтшöм морт, кöда аслас вуджöрись полö. Оз пизь эта мортын настоящöй оланыс, и ыджыт зверь вылö аслас векын сiя некöр абу ветлывлöма, только кöччезöс да сьöлаэзöс и жогйöма. Мунны умöлик берданкаöн вöрö дикöй кабан вылö, кöда аслас клыккезöн и ошöс пö вермö рез-паз керны, Сеня, конечно, эз бы лысьт. Басни абу! И пастух эта гардсьöм тшакылись мезмö, кольччö бокö.

Кин жö сэк лыйис? Гришка баитö, что зверьсö пöрöтiс ачыс Кузьма Кузьмичыс. Пöрöтiс, медбы повзьöтны айсö и вöлись мырддьыны колхознöй турун. Сьöкыта тожö веритсьö. Мый, лесниклö оз тырмы вöрын туруныс? Босьт любöй буржык участок да ытшкы кöть дас тонна. Кин тэныт эстöн, Ошпозъяинас, паныт кыв шуас? Тэ лесник, тэ и хозяин. Да и мыйлö сылö лишньöй туруныс? Мöссэсö видзны быдса табун сёравно оз понды — закон сiйö керны оз сет. Конечно, Морошка грива — культурнöй поскотина, сэтчин не öтiк год сьöрна ни колхоз кöдзлö клеверсорöн тимофеевка, и туруныс медбöрья годдэзö, висьтасьöны колхозниккез, быдмö добрöй, поди, стоись буржык сiя турунся, кöда быдмö нюрын — сiмöм осока да ядовитöй кöкан. Но сёравно оз веритсьы, медбы лесник пондiс вийны дикöй кабанöс эта могöн. Эд Кузьмичыс сы понда и деньга получайтö, что охраняйтö природа, сылöн и должностьыс сэтшöм, медбы не сетны браконьеррезлö бöбавны вöрас. А асывнас талун мый баитiс? Как раз эта йылiсь и баитiс. И вермас я вот сiдз, нем пондаись, пöрöтны кабанöс? Öдва ли. Вон и сельсоветiсь председательöс пишались бöбалöмись кидтiс. Дугдiс мужикыт вöрын гожумнас лыйсьыны.

Вот чёрт! Кин эстöн виноватыс, кин?

Кöть кин вылö думайт!

Неужто тöдтöм зверьсö лысьтiс жогнитны Исай Сергеевич? Висьтав этö веретинсалö, дак вель дыр сераласö тэ вылын. Те-те! Исай Сергеевич, кöть и быдмис Веретяын, опытнöй вöралiссез коласын, но быдöн тöдö: кытчöдз эз пантасьлы ошыскöт, пишаль киö некöр эз босьтлы, вöралöмöн эз интересуйтчы. А сыбöрын, кыдз небис двустволкасö — год ни чулалiс сэксянь, — ыджыт зверь вылö эз на ветлы. Только ракаэзöс да малиновкаэзöс и пезьдöтлiс. Петушоккесö эстöн и касьтывны оз ков. Нiйö и слепöй вияс.

Вермис сiя, неопытнöй лыйсись, сельсоветiсь руководитель, мунны вöрö дикöй кабан вылö? Вöлi бы ылöстöм, дак вермис бы, пожалуй. Но Исай Сергеевичöс ылöстöмнас некин эз на шу. Кöр лыйлiс петушоккесö, сэк весёлöй згальникöн шуисö, а ылöстöмöн эзö. И мыля кабансö должен вийны непременно Исай Сергеевич? Веретинскöй сельсоветын почти каждöй мужиклöн эм аслас пишаль. И быд хозяиныс вöрö ветлывлö. Дак неужто быдöнöс позяс шуны браконьерöн? Оз лöсяв сiдз-ту.

Сьöкыт вöлöм, сьöкыт Шерлок Холмслöн шапкаыс. Сiйö и видзöт, нырыштас черепнöй коробка, ляпкöтас веммез. И лоас сэк юрын чёрт тöдö мый, кытшöмкö каша. Точнöйжыка шуны — нем оз ло. Кольччас только пустöй места. Идиотöн сэк лоан, вежöмöн.

Макся чеччис пызан сайись, киэсö пуктiс бöрас и жагöник, кöстiсьöмöн, бытьтö висис косыс, пондiс ветлöтны пельöсiсь пельöсö. Ветлöтiс сiя дыр. И, кыдз настоящöй детектив, сё думайтiс, думайтiс. Сэсся локтiс öшын дынö, ёна дивуйтчис: мамук тэ менам, мамукиньöй! — Исай Сергеевич шагнялö. Ловья мортсö тай быль некöр и касьтывны оз туй!

Оськалiс Исай Сергеевич Веретяö юокыс ладорсянь, тыдалö, ва сайись вöрö ветлöма. Оськалiс жагöник, кромликтiс тöдчöмöн ёнжыка, нежели одзжык — мыдзöма, «вочöм» коксö му кузя кыскö. Мунас-керас дас кыным шаг, нырыштсяс увья бедь вылö, шоччисьыштас и бöра кыссьö одзлань. Да, мыдзöма. Видно, Пуртымöдз, дас верста ылынаö, ветлiс. Пельпон сайын пустöй рюкзак только, сэсся нем абу — вöрас, адззан, пишальтöг ветлöма. Марья не весь чижьялiс тöн, мырддьöма сётаки двустволкасö. А Исай Сергеевич, конечно жö, босьтiс бы сiйö сьöрас, эз бы мун пишальтöг, кöр ошлö паныт шедлiс. Этö вежöртны колö. Максялö нельки не ас сьöртi лоис — умöля думайтiс морт йылiсь. Позьö разь... Этадз и айтö верман дзугсьöм тшакыляс сюйыштны. Тожö эд чуланын пишальжуг сылöн öшалö.

Нет, не артавны Максялö тшакыльсö. Етша эшö каша сёйис, медбы тöдны, кин эта историяын прав, а кин виноват. Кин вийис кабансö? Пондыв тöд! Ковсяс милицияö юöртны, мед сэтчин жугдöны юррезнысö. Эта нылöн делоыс. И Макся сэк жö нюмыртчис, юрсö пельпоннэзö кыскис. Милицияö? Тожö оз лöсяв. Колö эшö невночка вöрöтыштны веммезöн. Оз вермы лоны, медбы асьным эг вермö артавны делосö. Весь я мый я детективнöй книгаэсö, поди, миллионся унажык ни лыддьöтiс? А кинокартинаэсö эта тема вылö кынымö видзöтiс? Электронно-вычислительнöй машина оз вермы лыддьыны!

«Ветла Гришкакöт Чукашор сайö. Сэтчин, натьтö, мый-нибудь пырас юрö».

Исай Сергеевич эта коста ровняйтчис магазинкöт, дзарнитiс осьта ыбöсö.

— Привет, Марфа!

— Бур рыт, Исай! Тэ кысянь сiдз?

— Вöрö ветлi. Покоссэз нёджжалi. Мöдiк делоэз... Исай Сергеевич куртка соснас чышкис кымöс вылiсь ньылöм воттез, дыша дзарьялiс öтмöдöрö, сельсовет öшыннэзö видзöтiс. Сэсся эшö мыйкö шуис сойыслö, баитiс не öддьöн горöн, и Макся кылiс не быдöс, мый висьтасис Марфалö Исай Сергеевичыс. Кыв-мöд сётаки локтiсö сылöн кузь пеллезöдз: «Харьюззэз, шуö... кый пö нимлун кежö...» Кытшöм харьюззэз? Кин шуис? Э-э, Исай Сергеевичыс тай чериавны ветлöма! Интересно, кытöн хариуссэсö лэбталiс-джагйис? Вот бы тöдны? Но ладно, ладно. Ассис чериа местасö миянсянь оз сайöвт — сёравно вöджжам. А кытшöм хитрöй! Пастуххез дынö, шуö, ветла. Ачыс, видзöт, чериавны чепöссьöм. А эшö, шуö, пукав сельсоветас, эн вежмась. Хитрöй!

Марфа Сергеевна примитiс неважын «кольцевöй завоз» сьöртi колана товаррез и часöт лöсьöтчис торгуйтны. Эна страднöй луннэзö сiя осьтлiс магазинсö только одз асывнас да сёрöн рытнас, кöр отирыс вöлi гортын.

— Поди, горшыт косьмö? Лок — гöститöта. Босьтi гортiсь сьöрам туисок кöдзыт ырöш, — юöртiс Марфа воныслö.

Сiя петкöтiс магазинiсь туис, Исай Сергеевич кутiс, дорсö вайöтiс тырппес дынöдз. И давай юны. Гульк, гульк! Дыр юис, дзик кузь туй бöрын пымалöм вöв. Мыдзöма луннас морт, ёна косьмöма горшыс.

— Спасибо, Марфа, пöтi!

— Да тэ ю, мый сiдз?

— Спасибо, тырмас.

Макся эшö недырик сулалыштiс öшын дынын, вöлись пуксис креслоö. Мöдiс эшö думайтыштны, вöрöтны буржыка веммезöн, но эз ни удайтчы. Исай Сергеевич кузь туй бöрсянь эз мун гортас кöть невна шоччисьыштны, а пырис сельсоветö. Пырис и нюмыртчис: ныр кузя бытьтö нöшöн сöтiс крепыт одеколон дук.

— Кыдз луныс чулалiс, Максим Максимыч?

— Умöля! — öвтыштiс кинас Макся. — Сiдз и висьтала веськыта: лун чулалiс öддьöн умöля! Гажтöмыссянь чуть коккез эг нюжöт. Эд мый шогмö, Исай Сергеевич? Пуксьöтiн тэ менö эта зверь дынö, эта телефон дынö, и пукав лунтыр, бытьтö понок домйылын. Нельки öтöрö свежöй воздухöн лолалыштны петны оз туй. Сэтшöм олансянь бöбмыны позьö. Сэтшöм менам оланö, что и враглö ог желайт!

— Районiсь эз звонитö? — öмалiс сiйö Исай Сергеевич.

— А мый нылö не звонитнытö? Эд делоэз... Райисполкомö йöв да кольть заптöм сьöртi сводкаэз корöны. Юалiсö сiдзжö, кыным первоклассник таво пондасö велöтчыны миян сельсоветын. Тшöктiсö звонитны, кöр локтан.

— И быдöс?

— Пыравлiс неважын татiсь бригадир, тэнö юалiс. Кытöн, шуö, председатель? Но ме и висьталi, мыся, мунiс аслас председательскöй делоэзöн.

— Сiдз и эз висьтав, мый сылö колö?

— Кытшöм сылö толк мекöт унасö лёбны? Ме эд пон кулись и мöдöра кучик! А эшö лесник вовлiс.

Макся чеччис председательлöн местаись, дзарнитiс öшынö. А Исай Сергеевич, аслас креслоö пуксикö, пондiс чожа öзтыны папироса.

— Тожö эз висьтав, мый сылö колö?

— Лесникыс? Нем эз висьтав. Юалiс тэнö и мунiс бöр. Эта эд эшö асывнас вöлi, тэ только ештiн петны сельсоветсис, а сiя сэтöн и эм. А неважын Миколь Сенялöн зоныс, Гришкаыс, вöлi. Тожö тэ дынöдз сылöн кытшöмкö ыджыт мог. Важнöй и срочнöй делоöн, шуö, локтi.

— Мый сэтшöмыс? Кытшöм эшö важнöй делоэз?

— А пон тöдас нiйö, — дыша и лöгöнмоз шыасис Макся. — Бобгис мыйкö ныр увтас, бытьтö бы ошöс я мый я вöрас вийöмась. Или кытшöмкö кабанöс... Эг вежöрт ме нем... Кузьма Кузьмич пö мылякö öбидитöм Миколь Сенясö, пишаль пö мырддьöма... И эшö: колхознöй поскотина вылö кисö лесникыс лэбтöма... Сеня и сетöм загонсö, повзьöма да. Ытшкы пö турунсö, мымда колö... Пон тöдö, мый нылöн сэтчин шогмис.

— Мыля мырддьöм пишальсö? Неужто тэ эн юав? А мыйлö сылö загон? Аслас участок эм.

— Ог ме любит, Исай Сергеевич, ныр сюйны сэтчö, кытчö оз тöр. Не менам эта делоыс — гуддисьны сякöй историяын. Мортыс ме учöтик, да и пон кулись...

— Но, тырмас, — лöгасис Исай Сергеевич. — Чёрт тöдö, мый татöн шогмö. Некытшöм арт абу.

Эз гленитчö сылö Максялöн кыввес, охота вöлi вурыштны зонкасö бытшöмжык фразаöн, но öвтыштiс кинас: Чомор дак Чомор и эм, мый сысянь босьтан. Сiя перыта, дрöжитана киэзöн, öзтiс кусöм папиросасö, тыр морос жаднöя кыскис курыт тшын. И мыйлöкö недыр кежö куньлiс синнэсö, вевттьылiс нiйö кинас. Видно, табак тшыныс курöтiс синнэсö, пемдöтiс нiйö. А поди, тожö юрсö вийö, думайтö мыйкö. Важын казялiс Макся, что председатель нервничайтö, видзö асьсö неспокойнöя. Мыля бы? Поди, э-э... Да оз вермы лоны. Оз, оз! Пишальыстöг?

Макся видiс асьсö нятьöсь дзутöн, жалейтыштiс председательсö: мыдзöма вöрас, вот и лöг. А кытöн сылöн чериыс? Рюкзак, ылiсянь казялан, нач пустöй... Вöрас я мый я колис? Мыйлö? И Макся вдруг вежöртiс: весь öштiс лунсö Исай Сергеевич, öтiк чериокöс эз вермы кыйны. Вот и лöгалö... Кин сылö баитiс, бытьтö шорокын хариуссэс эмöсь?..

— Кытöн сiя öнi? — вдруг юалiс Исай Сергеевич и кыскис öмсис папиросасö. — Бöр мунiс вöрö?

— Кин? Гришкаыс? Да гортас, натьтö. А поди, и мунiс ни Чукашор сайö. Ог ме вермы висьтавны, — дзугсьöмöн-мыкталöмöн баитiс Макся и эз понды сэсся кыскыны кадсö, юалiс председательлiсь, оз я туй сылö, бедолагалö, мунны гортö. Эд сiдз сiя мыдзис, сiдз мыдзис. Юр висьö, спина коска вот-вот чегас...

— Котöрт! — лöгöнмоз шуис председатель и кыскис портсигарись виль папироса, кöть важыс сё эшö чадитiс öмас.

«Мый сiдз нервничайтö? — думайтiс бöра Макся. — Кытшöм ном сiйö курччöвтiс?»

Сiя тэрмасьöмöн петiс сельсоветсис, гыма-йирка лэдзчис поспуэз кузя и ньöвьёсьöн котöртiс деревня шöрöт. Эз чулав, натьтö, и минута, а тэрмöтiс ни Гришкаöс:

— Давай-ко вöрöтчы, котöртам поскотина вылас. Сэтчин вöлись и баитчам, мый керны! Зверьыс йылiсь некинлö эн лёб?

— Вот эшö! Кин туйö тэ менö лыддян?

Гриша лöсьöтчис чожа. И нiя петiсö öтöрö. Деревня сё эшö вöлi пустöй. Öтнас Митипериха важмоз пукалiс поспу вылын, думайтiс ассис кузь думасö. Макся, кöр казялiс сiйö, öдззис шыннявны быдöс паськыт чужöмнас, пильснитiс гусьöн и юöртiс Гришкалö:

— Бабöс менчим видзчисьö. Мунiс сiя вöрö тшакьявны, кöть почти нем ни оз адззы. А Митипериха караулитö, кöр бабö бертас. Нiя, веритан я, каждöй рыт миян боковöй комнатаас, гор сайын, енлö юрбитöны. Смех петö видзöтны: сувтасö пидзöссэз вылö и брякöтöны кымöссэзнаныс джодж кузя. Юрбитöны. А кинлö юрбитöны, кинлö кеймисьöны? Меным!

— Тэныт?! Кыдз?

— А вот сiдз и юрбитöны. Святöй угодниксö, ликсö, ме важын ни кыдз босьтi джаджок вывсис, а сы местö сувтöтi ассим пояснöй портрет. И ладно, тэчöны бабусяэз меным поклоннэз, батюшкоöн шуöны, Христосöн.

Хо-хо! Пхе!

— Но колö жö! — сьöлöмсянь дивуйтчис Гришка. — И мыйöн эта чулалас, ежели казяласö аймамыт?

— Вот мый ог тöд, сiйö ог тöд. Сё жö сюраыс менам баксö, что умöльыс нем оз ло. Шынньöвтасö айö да мамö и висьталасö: эта гажа юрбитан пельöс понда öтiк чёртыс — золотоöн краситöм святöй лик али Максялöн понпутша циферблат, кöда важын ни кирпич видзчисьö. Быдöс öткодь!

Серьёзнöй детина эта Макся али балаганнöй Петрован? Згальник сiя. Вот кин!

Дата добавления: 2015-11-16