Кöдзыт шор дынын

Вылын-вылын кытöнкö ойся небоас, самöй Ошпозъяин весьтын, уйис нора шыэза шум. Уйис сiя югсянь север ладорö, кöть перво кажитчис, что сулалö öтiк местаын. Макся чатыртiс юрсö и казялiс лöз звездаоккез-биоккез, юöртiс Гришкалö:

— Пассажирскöй, скоростнöй. Натьтö, реактивнöй.

— Каждöй ой öтiк кадö шумитö. Сiя, ме думайта, Перемсянь Сыктывкарö лэбалö. Рейсовöй.

— А интересно эд? Вот ми кынмамö нюр дорын, учöтик шор дынын, а счастливöй йöзыс вон небоын, самолётын. Бура овсьö йöзыслö!

— Завидуйтны нем. Кинлöкö колö и мöссэз дозирайтны.

— Этö сiдз.

Неылын юыс дынсянь ошшасис нёштöм голоснас герскан: дра-дра-дра! Нюрас, асланыс райын, шыасьлiсö лягушкаэз. Природа эз узь.

Макся и Гришка, кöдна лöсьöтiсö Гырка йир дынö, кöдзыт шорокыс дынö, засада, тожö эзö узьö. Медбы не кынмыны, нiя топыта жмитчисö öтамöд бердö, куйлiсö тшöк понулляинын, кывзiсö ойся шыэсö и дугдывтöг видзöтiсö шорокыслань. Синнэзлö зубыт вöлi, сыбурна видзöтiсö. Кöдзыт ульсöт уськöтчис ны вылö öтмöдöрсянь, вевдöрсянь нырыштiс кыкнаннысö сьöкыт туман. Гришкаöс умöля шонтiс брезентовöй гуртоправскöй курткаыс, резиновöй сапоггез вазисö, и зоночка гегдiс. Макся гортас, вöрас лöсьöтчикö, пасьталiс айыслiсь важ фуфайка, ыджыт яловöй сапоггез. Часöт чувствуйтiс асьсö Гришкася буржыка, но тожö никсiс понок моз, кöдö кöдзыт тöвся рытö некыдз эз лэдзö керкуö. Ульсöт кöвьясис вöрас, сысянь и вöлi кöдзыткодь, недолыт. И туман пырис паськöмок увтö, локтiс яйкучик бердöдз, сэтшöм сук — кажитчö, чуннез коласын пешлыны позьö.

«Фу-бу, фу-бу!» — уксiс кытöнкö ыджыт ойся кай тупка.

— Макся, а вдруг некин оз лок, и ми весь эстöн куйламö? — гусьöник юалiс Гришка.

Макся чорыта висьталiс паныт:

— Локтас, Гришка, непременно локтас.

— А если локтас сiя пишальöн? Сэки мый? Эд огö жö ми кутчисьö сыкöт тышкасьны куш киэзöн. И фотографируйтны сiйö пемытiнас оз позь.

— Мый-нибудь керамö. Ми, пожалуй, ог и кутö сiйö. Мыйлö? Менам юрын, Гришка, виль дума чужис: разоблачитны ёрдöмсö колö интереснöйжыка, кыдз гижöны книгаэзын — басöка и эффектнöя, медбы öтпырись сöтны, и сiя, умöлик мортокыс, сразу лэбзис медылiсь пельöсöдз, нокаутö. Тэ эн тöждiсь, Гришка. Ме думайта, сiя локтас миян дынö асъяпон гöгöрас, кöр пуксяс туман и пондас тыдавны буржыка. А час, пожалуй, позяс невночка и сунасьыштны.

Макся кыскис юрсö пыдынжыка фуфайка сикöджö, лöсьöтчис сунасьыштны. А Гришкалöн он немымда эз пет. Сiйö донимайтiсö сякöй думаэз и мылякö полöм петiс вöрас кышöтöмись, быдкодь ойся шыэзiсь. Сылö сё кажитчис, что неылын кинкö ветлöтö, кыскалö турунöт коккесö, кышöтö пу лыссэзöн и кок чуннез вылын жагвыв кыссьö ны дынö. Поди, ош мегырасьö шор дорас? А поди, кöин? Нюрыс ладорын, сынасьтöм понуллез да ыжман кусттэз коласын, тожö кылiс кытшöмкö кышöтöм, кажитчö, сэтчин кинкö размöд сьöкыта ыш ловзисис, ружтыштiс... Может, и былись оша-миша ассис колана час видзчисьö... Кылiс, кöш кымöс, свежöй яй дуксö и, поди, гусясьöмöн вешшö шорыслань.

Оз лöсяв сунасьны ойся вöрын. Ойся вöрын быд берсяыс вермас шогмыны.

Гришка старайтчис не онмöссьыны.

Эз сетö спокой и Максялöн медбöрья кыввес. Кытшöм сэтшöм виль дума пырис сы юрö? Эффектнöя, шуö, колö разоблачитны ворсö, басöка... Кыдз эшö басöка? Макся эм Макся. Сысянь быд торсö позьö видзчисьны. Вот керас мый-нибудь сэтшöмö — век он вунöт. Эшö мöдiк историяö шедан. Öтiк кылöн шуны — Чомор сiя, морт несерьёзнöй, згальник... И только ештiс Гришка сiдз думыш керны, кыдз сразу казялiс: Макся лöсьöтчö ни артавны кытшöмкö «штука». Сiя кыскис юрсö ватниксис, дыркодь видзöтiс шорокыслань, нюлiс тырппесö и гусьöн-норöн, бытьтö гор вылын кань, пондiс аскежас мурзьыны. Гусьöник мурзис, öдва-öдва кылiс, но Гришка пельö ятнöя пырис сiя песняжуглöн мотивыс, кöдö сэтшöм вдохновеннöя Макся талун орсiс сельсоветскöй навес увтын. Конечно, сiдз сiя и эм! Ассис арттöм песнясö мурзис Чомор! А мый, кыдз вот часöт жö пондас öм пасьтас ванзыны-сьывны? Мый сылiсь босьтан.

Эз вермы видзсьыны Гришка, зубыта сюйыштiс кулакöн Максялö бокас.

— Мый. Гришка?

— Тэ жö сьылан? Позьö разь?

— Тьфу ме, понгöн! — öддьöн дивуйтчис Макся. — Былись эд вунöтчи. И вот ылалi.

Зыртiс-керис синнэсö Макся, шуис виноватöя.

— Аркмас жö сэтшöмыс. Лякасис ме бердö мелодия, горалö и горалö, дзингö пеллезын. Но мый тэ сэтöн керан? Как раз сiя кадсянь, кыдз радио пыр сьылiсö песнясö, öшис менам садь. Шумитö музыка моросын, сотö сьöлöм, воля вылö корсьö. Этö, Гришка, кöть кöр сiдз овлö, кöр кылан öддьöн бур музыка-мелодия.

— Тэ эн сьыв эстöн. Оз ков.

Макся согласитчис и кöсйисис не сьывны и не мурзьыны сэсся. Гришка юрöн гогынялыштiс: несерьёзнöй морт, кытшöм сы вылö надея...

А вöрын сё кышöтiсö и кышöтiсö лыссэз. Пуэз сайын кинкö дзик ловья и таинственнöй сьöкыта ружтiс, кадiсь кадö ыш лолалiс. Ыджыт кай тупка шыасьлiс Ректан ладорын, корис аслыс шоныт пась — и сылö, видно, вöлi кöдзыт, лысва кöтöтiс борддэз и гöн, лэбавны сьöкыт, зника абу. Тшöк лыссэз коласын öшалiсö косяссьöм туманлöн тороккез, сэтчин сьöкыта тёпöтiсö гырись ва воттез. Вöрын кöвьясис курыт багульник дук, нырö вачкис сiсьмöм тшакöн, нюр тинаöн.

Жагöника-жагöника сибалiс асыв. Сылiсь локтöмсö первöйезöн казялiсö каёккез. Совсем ордчöн, неыджыт кöзоккез вылын, пондiсö тиньгыны малиновкаэз, чуть ылынжык ас мозöн пиксiсö зорянкаэз. Ловзис вöр, гажажык лоис.

Бöбалöмöн лэбзьыштiс пуэз коласöт чож тöлок, пыркнитiс уввез вылiсь кöдзыт лысва. Поскотина вылын частожык и смевжыка пондiсö броткыны джынняннэз, тиньгыны сильканнэз. Шарик тожö голоссö сетiс, радмис пон, что асыв локтiс, öдззис лявгыны, мöссэзöс саймöтны. Бöбöв сiя, эта Шарик. Вувтыштлö подаыс дынын, а сiйö оз и ылöст, что хозяин Гришка куйлö неылын сы дынсянь, гегдö нюр дорын, ворöс видзчисьö.

— Нет, оз эд лок, лёквир. Кылiс, видно, аслас нюкöн, что сiйö видзчисьöны. Дошлöй сiя, эта лыйсисьыс, öвтыштiс порсь яй вылö кинас, — кынöм вывсянь бок вылö бергöтчикö шушкыштiс Гришка.

— Локтас! Не сэтшöм сiя морт, медбы даровöй яй вылö киöн öвтыштны. Жаднöй морт, Гришка, аслас аймам вылö кинас öвтыштас, а добыча вылö некöр оз. Этö меным эшö дедö баитлiс. Сiдз сiя, натьтö, и эм. Вот часджын бöртi и локтас кин-нибудь. Часöт эн сунась, öшöт пеллетö и кывзiсь.

— Интересно сё жö: кин лыйис?

— Чожа пондам тöдны, — шуис Макся.

Сiя бöра думайтiс Исай Сергеевич йылiсь. Быдöс приметаэз сьöртi, пöрöтiс зверьсö, конечно, сiя. Кöть и локтiс гортö пишальтöг, но эд вермис дзебны сiйö вöрас. Öтiк невежöртана: кыдз лысьтiс Исай Сергеевич, неопытнöй вöралiсь, мунны дикöй кабан вылö, кöда, отир басни сьöртi, опаснöйжык ошся? Кыдз сiя инмис кабаныс вылö? А кыдз лöсялiс сiдз, что морт эз на ешты лыйны, а лесник Кузьма Кузьмич бытьтö сэтöн и вöлöма, сразу петöм вийöм порсьыс дынö?

Кытшöмкö невежöртана гöрöд эстöн. Эстöн не быдöс ладно. Поди, былись лесник да Исай Сергеевич баитчисö вийны кабансö кыкöн? Если сiдз, то и яйысла нiя долженöсь локны кыкöн. Вот лоас дело! Сельсоветiсь председатель да лесник даровöй яй гортаныс кыскöны... Макся спина кузя кöдзыввез утугаöн мунiсö. Бр-р! Шед нылö паныт, пондыв позоритны. Пхе... Ачыт ас вылат не рад лоан. И может, сьöвзьыны эта дело вылö? Кытчöдз не сёр, мунны ылöжык шорок дынiсь? Мый колö, ась сiйö и керöны. Нiя начальниккез...

Чёрт тöдö, мый шогмö чочком светас! Син одзын Миколь Сенялöн чужöмыс мыччисис. Гажтöм вöлi чужöмыс, нач рапмöм. Повзьöма Сеня кулавлытöдз, öдва лолалö.

Колхознöй подалöн привессэз чинöны... А вот лесник Кузьма Кузьмич да Исай Сергеевич радъялöны. Дикöй кабанöс пöрöтiсö. И быдöс артассис сiдз, кыдз колö. Сёй яйсö, госсяв! Этта, кыдз лöсялiс. И баитны нем, позьö овнытö му вылас, кöть лун и ой песняэз чанöт.

Думайтыштiс этадз Макся и чуннесö казявтöг кулакö жмитiс. Нет! Радъявны воррезлö одзöв. Кин бы тэ эн вöв, а если лэбтiн китö народнöй добро вылö — отвечайт закон сьöртi. Вот, вот! Закон сьöртi! И песняэз сьывны тiянлö одзöв.

Минутнöй слабость понда зоночка видiс асьсö тютя-ляпаöн, сьöвзис пиннес пыр и эшö буржыка пондiс видзöтны кöдзыт шорыслань. Гришка тожö орöттöг видзöтiс сэтчин. Кытöн тэ, ашнöй гырк? Локтан али он?

Эта кадö, дзик зонкаэс вылын сералöм могись, шор дорын öдззисö нёштöмасьны лягушкаэз — ква-ква... Гришка думанас лöгöн видiс нiйö гаддэзöн, сьöвзис. Кикимораэз! Макся чувйыштiс сылö бокас, чуньсö тырппез вылö пуктiс:

— Эн лолав, чöв!

Гришка часöт и ачыс вежöртiс: колö чöвны. Шорокыс мöд ладорын подозрительнöя вöрзьыштiсö кöсыник понуллез, ны вывсянь киссис сьöкыт лысва. Кусттэз сайсянь, öтмöдöрö дзарьясьöмöн, жагвыв петiс морт. Туман да лысва вадöмась сiйö, кажитчö, шучкöп. Тасянь перво тöдны сьöкыт вöлi, кин сiя — мужик али инька... Гришкалöн сьöлöмыс сiдз и усьыштiс аслас местаись, горшö тасасис уль комок.

Макся бöра вайöтiс чуньсö öм дорас — эн лолав. Ачыс шыасис гусьöн:

— Видзöт тэ, инька, тыдалö. Лесниклöн мамыс я мый я?

Гришка кыдзкö сразу жö небзис, ловзисис кокнита. Эта бур, что инька: тышкасьны сiя öдва я пелитчас. Ёна радмис и Макся. Уф! Исай Сергеевичлöн и дукыс абу. Öтнас лесникыс горшасьöма. А Исай Сергеевич эстöн немымда абу виноват. Эта бур. Эшö бы! Эд ковсис бы Максялö аслас начальниккöт кутчисьны. Эта, думайтат, öддьöн кокнит? Ого! Пондылö асьныт.

Старуха — эта вöлi былись лесниклöн мамыс — дыр сулалiс шор дорас, нёджжасис öтмöдöрö, кывзiсис. Сiя, кажитчö, нельки вöрöтiс нырпыссэзнас, новйöтiс нырнас то талань, то бöрлань. Умöльсö сiя нем эз казяв и, медбы не öштыны кадсö весь, öдззис уджавны. Сiя кокнита чöвтiс пельпон сайись пестерь, паськыта пернапасасис и, кекеркаöн пукалiкö, кыскис васис медодзза чуман. Гришка сiдз и мöртчис синнэзнас Макся чужöмö: мый видзчисям? Мыля ог кутö? Макся грöзитiс чуньнас — чöв! Кусттэз сайсянь, кужöмöн лöсьöтöм засадасянь, нылö ятнöя тыдалiс, кыдз старушка проворнöя бöрйис яйторрез, чапкалiс нiйö пестерö. Уджалiс сiя бытьтö аслас погребын, деловитöя, спокойнöя. Сiя немись эз пов. Зонкаэз вежöртiсö: старухаыс татöн не первуись ни. Если бы локтiс первуись, дак кыдз бы сэтшöм чожа, йöз отсöттöг, адззис паськыт вöрись колана места? Мый бы эз вöв, а вöрыс — не аслат чулан.

Кокнита пöльтiс асывся тöлок, вашöтiс туман веззэз сё ылöжык и ылöжык нюрö, кусттэз да понуллез сайö. Чожа югдiс. Вöрын эта часö, кажитчö, быд улок вылын дюттясисö каёккез и чивзiсö, мымда прок. Гришка нач бурасис, пондiс любуйтчыны асывся концертöн. Макся нюжöтiс позялöм коккесö, юрсö лэдзис крестöн пуктöм киэз вылö. Старуха, тыдалö, дугдiс интересуйтны сiйö.

Мыля сiя сэтшöм спокойнöй? Мыля сiя оз чеччöвт местаись, оз лок старухаыс дынö и оз кут? Невежöртана делоыс.

Старуха дженыт кадö тэчис яйсö тыр пестерь, сьöкыта сувтiс кок йылö, невна думайтыштiс мыйкö, сэсся лöсьöтiс юр вылас чышьян и вöлись только чапкис пестерьсö пельпон сайö. Сiя тöдчöмöн горбыльтчис сьöкыт ноша увтын, но чожа веськöтiс вывтырсö, буржыка зэлöтiс волыссэз, бöра паськыта пернапасасис и не тэрмасьöмöн иньдöтчис гортас. Зонкаэз эшö дас минута мымда куйлiсö чöлöмöн. Только эта бöрын чеччисö, невна öвтiсö киэзöн, медбы позьöтны нiйö, чеччалыштiсö. — Но вот, Гришка, — шуис Макся негорöн, дзик аскежас. — Быдöс шогмö сiдз, кыдз колö. А старухаыс, ведьмаыс, вына эшö. Адззылiн, кытшöм пестерь тöбалiс, куим пуд мымда нöбöтiс яйсö, если не унажык. Вына, кикимора!

— Мыля ми сiйö эг кутö?

— Мыйлö? Но, кутiмö бы, нуöтiм бы избушкаö. А сэсся? Сiя öдззис бы ванзыны, горзыны пондiс бы. А ми? Но, нуöтiм бы сiйö деревняö, сельсоветö. Вот, шуимö бы сэтчин, ойнас кутiмö вöрын, дикöй кабан яй тэчис пестерас. А сiя, пöрись мыр, конечно, не бöбöв. Сразу бы чирöстiс: «Эг вöрöт ме некытшöм яй! Зонкажуггез асьныс тэчисö пестерам, медбы нятьöн менö резны. Ме тшакьявны, локтi, а нiя, понпияннэз, öшöтчисö пестерö бердö, пöрöтiсö му вылö и тэчисö яйсö...» Может, мыйкö и мöдiкö арталас. Öтiк кылöн... Ми мöднёж керамö. Басöка кутамö. Кыдз книгаэзын гижöны, эффектнöя, шумöн и зыкöн. Ассис сьöкыт ношасö сiя пондас кыскыны, конечно, дыр, туйын пондас шоччисьлыны. Ми кокнита одзалам сiйö, локтам Ректанö. И лöсьöтам дело, медбы пантавны сiйö торжественнöя. Ректановскöй бригадир Спиридон отсалас миянлö. Вот адззылан, лоас комедия. Лесниклö лоас каюк.

Не тэрмасьöмöн нiя петiсö тöдса туёк вылö. Макся баитiс:

— Ме, Гришка, пожалуй, часöт жö и котöрта Ректанас. Пантася сэтчин бригадирыскöт, баитышта. А тэ вот мый кер: мун старухаыс сьöрын, эн öшты сiйö син вылiсь. Тöдан, быд торсö сiя вермас панны. Сiя, кикимора, вермас эд яйнас пестерсö кытчöкö дзебны деревняыс дынö локтiкö, вермас сюйыштны, шуам, выскыр увтö. А гортö локтас сытöг...

— Конечно, верма, — вежöртiс сiйö Гришка. — И пондыв сэк разоблачитны. А луннас, кöр деревняын некин оз ло, сiя ваяс пестерсö гортö, дзебас погребö.

Сюяс лым увтö.

— Быдторыс вермас лоны, Гришка. И вот мый. Ме котöрта часöт деревняас, а тэ мун старухаыс сьöрын, вöджжы сiйö. Только осторожнöя колö... Эн шумит, эн кашляйт. Ло быльнöй разведчикöн.

— Эн велöт, не первуись вöрас.

— И кывзы-ко. Кöр деревняöдз лоас верстася не унажык, тэ одзав старухасö. Одзав бöра жö шумиттöг, коль невна бöрат... Но вöджжы! Син вылын видз. Вежöртiн?

— Эшö бы...

— Кöр сiя пондас петны вöрсис, тэ, если нем сэтшöмыс оз ло, сет меным условнöй сигнал. Котöрт ылöжык сы дынсянь и горöт буржыка, бытьтö куканьöс кошшан: пте, пте, пте... Ме и вежöрта: старуха матын ни. И пантала сiйö бытшöмжыка. Кылö сьöлöмö, комедия лоас. Ух!

Дата добавления: 2015-11-16