Кучиковöй вичку. Чугуйлöн бекöр. Адззисьлытöдз, Синяшор, адззисьлытöдз, Лапья!

Лунджын мийö Семёнкöт ветлöтiм Шонытмысöт да Чугуйкарöт. Семён перво дыр видзöтiс кöвдöм кодь гöгрöса мысок, кöда куйлiс кык кырас коласын, самöй крутик весьтас, сэсся вуджöтiс менö кырас саяс — Панвидзö. Вöлись висьталiс:

― Вот эстöн нылöн сулалiс вичку. — Висьталiс сiдз, бытьтö утлянно тöдiс, что сэтöн сулалiс вылын колокольняа, кыдз миян посадын, кирпичнöй керку. ― Эстiсь и пондам кошшыны золотöй шодзсö, а не Чугуйкарсис.

Но кошшыны бöра эз понды, а кутчис керны майöжоккез. Сiя орлалiс кöс потшоккез да кыз уввез, а ме йывдi нiйö.

Панвидзыс абу ыджыт ― кык огородеч пасьта шутёмок. Ровнöй сiя, волькыт, только шöрыс лэбтiсьыштöма вылынжыка, бытьтö кыминьтöмась сэтчö ыджытся-ыджыт тарелка. Вот сiйö и меряйтiм мийö доль и поперёк да вартiм сэтчö сорок мымда майöжок - керим квадраттэз. Быдöс этö Семён рисуйтiс бумага вылö и быд квадратö гижис номер.

Сымда и удж вöлi эта лунö.

Ашынас ме эг вермы локны Панвидзас, и Семён уджалiс öтнас, а эг вермы локны вот мыля.

Чача (сiдз шуисö кузь кока мöсöс) дойдöма вöрасö и эз сетчы высьтыны. Егор арканалiс сiйö, домалiс пу бердö, мед эз ветлöт высьтiкас. Но Чача бергалiс да тэчкасис. Сэк Егор сьöвталiс: сылiсь бöрись коккесö. Öнi мöсыс кöть и жöдзис, да дугдiс тэчкасьны, зато бöжнас виззис, дзик плетьöн.

Егор сулалiс Чача одзын, ласкайтiс сiйö, а ме кутi бöжсö да видза сiйö и видзöта, кыдз чижгö подойницаас йöлыс, кывза ведралiсь горалöмсö. Чача летö кöрталöм коккесö, мездöтö бы нiйö, но оз вермы. Вдруг орис сьöвтöтыс, и мöсжуг зурзис кокнас ведрасö. Ме только кылi, кыдз мезмис кисим мöс бöжыс, а синнэзам пым сидзис, бытьтö койыштiсö чужöмам дзирыт ва.

Садяси ме Титовна видчöмсянь.

— Пöрись да том öтiк умаöсь, — выргис сiя. — Думайтны жö эд колiс, что гезокыс вöснит!

— Да-а, челядьлiсь уджсö керимö, — согласитчис Егор. — Виль эд, видзöт, а орис, жысь...

Öм пытшкам вöлi курыт и сола, кылö дубалöма, веськыт синö эз оссьы, но ме висьталi:

— Нем оз ло, Титовна, абу ни зубыт. И Егорыс не виноват. Не сiя эд, а то эта вöрмöсыс зурзис.

— Кöр тiян зубытыс овлö, — сё бобошитiс Титовна. — Кыдз синат али кöсичаат эз инмы! Пиннетö эз кисьт?

Пешлi чуньнам пиннезöс, висьталi:

— Дзоньöсь. Только кыв йылöс курччöвтсьöма.

— Веськалас армияöдззас, — висьталiс Егор да лякöтiс поткöтöм синкымам кытшöмкö листок. — Мун узьышт öнi.

Мöдi недыр узьышты, а сайми рытъявнас ни. Кылö веськалöма, но синö сё вöлi пыкöса. Егор миссьöтiс синöс кытшöмкö настойöн да бöра лякöтiс турун лист.

Пемдандорас Лапьяö локтiс Семён. Сiя вöлi мыдзöм да кымöра чужöма. Тöдчис, что ёна уджалöма, но весь.

— Нем, видно, абу, Семён? — медодз юалi ме.

— Копейка адззи, да сiя не чудскöй, а царскöй.

— Кытшöм местаись? — юалiс Егор.

— Панвидзсис. Мысок тай сетчин эм.

— А-а, сэтчин вексö стречалун порйöтлöмась. Вот и öштiс, натьтö, кинкö... бабö висьтасьлiс, бытьтö чуддэс чомор сэтчö чукöртлöмась.

— Мый сiя — чоморыс? — юалiс Семён.

— Праздник сэтшöм вöвлöма. Керасö пö ыджыт бипур и ножö сы гöгöр чеччавны, ножö вежмасьны. Кин пö ошö мöдöтчас, кин вöрканьö, кин юр вылас олень сюррез кышалас.

— Сiдз ме и думайтi! — гажмис Семён. — Петö, Петя, что как раз инмим клад вылас.

— Мыля нö сэсся нем эн адззы, инмин дак? — юалi ме.

— Чужöй пуктöмсö эд он босьт сразу. Зыр пыдына вöлись гарйи, а чудскöй слойыс, тыдалö, пыдынжыка куйлö.

— Абу сэтöн кладыс, — висьталiс Егор. — Весь мырсян.

— Овлö, Егор, что адззасö кытшöмкö сынантор нето пурт йыв, но сiя донажык золотося лыддиссьö. Сы сьöртi позьö тöдны, кин сэтöн олiс миян вотöдз и кыдз олiс да мый керис.

— Сiйö даки охота тöднытö, — висьталiс Егор...

Что чужöй пуктöмсö чожа он босьт — этö ме вежöртi дасöт лунас, кöр вöлi гарйöма ни Панвидзсис быдöс мысокыс. Ме бы, натьтö, важын ни коли этö ёрдöм чудскöй местасö, но Семён менö каждöй лун вердiс яйöн да юкталiс чöскыт чайöн. И только бöбöв вермис мунны сахара чай дынсис. Но и, конечно, надейтчи адззыны золотöй джексö. Только сiя, джекыс, тыдалö эз тэрмась пантасьны миянлö, кöть и кырас дорас миян лэбис ни турунъюр ыжда пöимсора му куча. И не просто комока му, а пожналöм, дзик пизь.

Эшö унажык му да ежа валяйтчис ордчöн. А золотöй джек туйö Семён керкуын куйлiсö кык нето куим десяток чудскöй чача — кöртторрез, доноккез, жугалöм гырнич, шеггез.

Мысокыс туйö аркмис гöп, и нем ни сэсся лоис гарйыны — увтас куйлiс вöрöттöм му. Но Семён сё чувйис гöп дорресö кузь пыжьянöн, сё мыйкö кошшис. А ме пожналi медбöрья му чукöрок да думайтi аслам несчастнöй судьба йылiсь, сы йылiсь, что некыдз эз пантась кладыс. И вдруг кыла:

— Адззи, Петька! Вичкусö адззи! Вай зырресö!

— Мый, кирпиччез петiсö? — вайи зырресö да юалi ме.

— Кытшöм кирпиччез?

— Вичку тай, шуин...

— Чуддэслöн вичкуыс не кирпичнöй и не пуовöй, а тiян Лапья кодь нето просто видзок. Видз ку — вежöртiн?

— А колокольняыс кытöн? А еннэс?

— Сэк эз звонитлö, и колокольняыс эз ков. А еннэс... И пу, и шондi, и ош — сё нылö ен вöлi. Сёрöнжык, правда, енсö чуркаись нето кряжись болбанитлiсö. Сувтöтасö сэтшöмсö, дзик огородечö бабашорика, а сы одзö кучиккез чапкалöны, сёян вайöны. И сiя местаыс пан видзöн шусис. Пан — этö чудскöй

поп нето князь. Вот и петö — поплöн или князьлöн видз. А эстöн как раз кучиккез кылöны. Давай уджавны.

Чапким ежасö бокö. Пуовöй зыроккезöн пондiм мусö гарйыны. Былись петiс гöн. Весöтiм киэзнаным, небытик росöн чышким, Но кучикыс чисто сiсьмöм, киын эз öшшы. Семён чертитiс пыжьяннас, кытi колö гарйыны. Ме пондi кульны ежасö, а сiя бöра мыйкö гижис да рисуйтiс тетрадяс.

Зырö павкис кöртторö, и чапки зырöс да босьтi пуовöй лопатка и кори Семёнсö — сэтшöм миян закон.

Гуддим четверть пыдына — зелёнöй му комок петiс. Видзöтiс сiйö комоксö Семён, пуктiс бокö, висьталiс:

— Медь эстöн эм.

Эшö невна гарйыштi — бедь конец, тожö зелёнöй, мыччисис.

— То сiя, Гавкаыслöн бедьыс, — радöн юöртi ме да мöдi кыскыны, но Семён вашöтiс менö и ачыс пондiс гарйыны. Муыс эстöн эз и вöв — куш пöим, гöрдкодь-лöз, и Семён чожа бедь боксö метрся пыдынжыка гарйис. Ямасис лэбтöм пöимсö ме бöра лэдзи пож пырйöт, адззи содз мымда шомсялöм коскаэз да пиннез, осьтаа изторрез.

— Видзöт кытшöм бедьыс, — корис менö Семён. — Бронзовöй коколюка.

Семён бöра пондiс гижны да рисуйтны, а ме нёджжалi бедьсö.

Ямаас онняюрöн и косöйöн сулалiс бедь. Сiя вачкисис коктöм солдат бедь вылö, кöдö ме адззылi городiсь, только оропыс кызжык да неволькыт.

— Кромöй сiйöн беддясис, натьтö, — шуи ме.

— Э-э, не! — эз согласитчы мекöт Семён. — Княжескöй эта бедьыс... Ноко кыскам. — Сiя сувтiс пидзöс вылас, тарскöтыштiс лопатканас бедьсö и жагöник, дзик стекляннöйö, лэбтiс вылö. Ямаас муыс буждiс и мыйкö сятнитiс. Семён дзар керис ямаас, кватитiс менö пельпонöттям и шуч повзьöм голосöн, гусьöн-гусьöн шуис:

— Тэ видзöт... тэ видзöт, мый сэтчин, — и чапкис кисис бедьсö да нюжöтчис кынöм вылас. — Клад! Настоящöй клад! — чирзiс сiя и перыта-перыта куртiс киэзнас мусö. Ме водi сы бокö да казялi ямасис бекöр, кöда сулалiс дорыш вылас моз.

Семён кыскис сiйö, нöбöтiс пож дынас, пöрöтiс пожас бекöрсис пöимсö. Шондi югöррез увтын свиттьöвтiсö серебрянöй деньгаэз, чунькытш, ыджыт кольцоэз, дзик телега обруччез, учöтик акань и эшö кытшöмкö чудскöй чачаэз.

Кöр Семён кисточкаöн весöтiс бекöрсö, доррезсис казялiмö рисунок. Öтланяс рисуйтöмöсь морттэз. Нiя кытчöкö котöртöны; кианыс беддез, ньöввез, копьёэз. Мöд бокас — сюра пороззэз, а пыдöсас — листтэза улок.

— Восточнöй серебро, ― висьталiс Семён. — А кытiсь, интересно, бедьыс? Эн казяв, кытшöм оропыс? Вöрмöслöн юр. Сiйö, пожалуй, чуддэс асьныс керисö... А висьтав, Петька, мыля бедьыс онняюрöн куйлö, а бекöрыс чуть не кыминь?

— Ог тöд...

— А ме тöда. Вот кыдз сiя вöлi. Киньöш уськöтчис карас, лэбтiсис шум. Чугуйыс, а может, и мöдiк кинкö, вежöртiс, что спасеннё абу врагыссянь, и кватитiс этö бедьсö, серебрянöй бекöрсö да пондiс пышшыны. Сэсся казялiс, что оз позь пышшыны, решитiс дзебны быдöс этö. Кытчö дзебны? Син вылас усис костёрыс. Сэтчö! Некин оз думайт бисис кошшыны. А пöимыс сэтöн вон чуть я не метр кыза. Гарйис гормöччанöн яма, шупкис сэтчö бекöрсö, сыбöрын бедьсö, тыртiс умöлика, а вевдöрас пессэз чапкис. Ачыс пышшис нето бöр карас кайис да пондiс тышкасьны. Вот кыдз сiя аркмис.

— А мыля бöр эз кыскав сэтiсь?

— Сiя, кöда дзебис, вийны шедiс. А мöдiккес эз тöдö эта йылiсь. Может, и мöднёж вöлi... Чудитiсö чуддэс, а öнi вот и жугды юртö ― кыдз да мый вöлi.

— Кытчö тэ энö воштан?

— Университетö сета. Талун жö гижа сэтчин письмо. Видзöтан кö, ачыс профессорыс локтас. Эта öддьöн дона кладыс. Учёнöйез понда дона.

Мийö только пуксим павжнайтны, кыдз Шонытмысын кинкö пондiс уксыны. Горöтлiс вöснитик голос, и кытсалiс, некö, менö.

― Шыасьны али оз ков? ― юалi ме Семёнлiсь.

— Мыля оз ков, раз тэнö корöны, — висьталiс Семён. Шутём вывсянь öнi лэбзис Панвидзö ятнöй голосок:

— Петя-а-а! Ау-у-у!

— Öгö-öй! — шыаси ме. — Мый колö?

Некин паныт эз шыась, и ме эшö размöд горöтi. Сэк Чугуйкар дорö петiс Зойка да пондiс макайтны чочком чышьянöн.

— Синяшорись кам! — горöтiс сiя. — Мийö мунам тэнат княжествоö и корам тэнö сьöраным, — сералöмöн баитiс Зойка. — Каретаыс сулалö туй вылас.

— Мыйлö менö? — юалi ме.

— Мöссэсö гортö пондам лэдзчöтны!

— Давай мун, — тшöктiс Семён, и ме пондi жагвыв кöмасьны. Зойка сё сулалiс кырас саяс да тэрмöтiс менö. А меным мылякö вдруг гажтöмкодь лоис сысянь, что талун ковсяс прощайтчыны Синяшоркöт, Лапьякöт, Гыркалог дорись видзкöт. И недолыт лоис, что Зойкалö кöсйи ёжöс, а кутны эг вермы. Но да ась: одзаным эшö уна гожуммес локтöны...

Шоч кыввез:

* Висьт — рассказ

* Вöрдас ― думайтас, мечтайтас.

* Йöйк ― говк.

* Лязгай — кизерик каша, кисель. Эстöн — сёян.

* Парка ― кучиковöй пась.

* Пугыр ― мысок.

* Саридз — море

* Сьöд низь ― соболь.

* Сюрс ― уна, тысяча.

Дата добавления: 2015-11-16