(дзар кер: Тырдоз)
Пöрись Микаш талун кыскис станцияись не товар, а отирöс — ранитöм солдаттэзöс госпитальö.
Рыпкö-гöнитö Рыжко, кокнита ыскöвтö додь волькыт туй кузя, южöтö полоззэзнас.
Охота тöдны стариклö, кытöн воюйтiсö эна нёль мортыс, кöдна пукалöны сыкöт. Может, как раз сэтчин, кытöн сылöн медбöрья зоныс? Может, нiя мыйкö кылiсö сы йылiсь, а то и тöдöны сiйö?
Оз юась ямщик: небытшöм вöрöтны энö мыдзöм да стрöйдöм отирсö, небытшöм дзугны нылiсь думаэз.
— Дедусь, а дедусь, — шыасьö усiа солдат, кöда пукалö додь нырас. — Висьтав-ко, кытчö мийö мунамö?
— Кыдз кытчö? — дивуйтчö Микаш. — Кудымкарö, зонö, Кудымкарö.
— Мый сiя Кудымкарыс — город али посад?
— Город сiя, медыджытыс миян, столица я мый я, али эшö кыдз.
— Кытшöм столица, дедусь?
— Но, округаным-ту. Коми округ миян.
— А-а! — мыйкö усьö тöдвылас солдатлö. — И котöртö сы дынöт Иньва ю — ыджыт да стрась басöк?
— Но-о, — то ли дивуйтчö Микаш, то ли ответ видзö. — Кывлiн эд, тыдалö, сы йылiсь?
— Ёрт менам Иньва дорсис вöлi. Сэтшöм бытшöм зонка, да абу öнi... Сё гöститны корис война бöрсяняс, пельняннезöн, шуö, верда, ырöшöн юктала... Эх тэ!
Лöньсис солдат, кыскис табак да бумага, юалiс:
— Куритан, дедусь? Сэк жагöнжык лэдз вöвтö, а то киськассяс табакыс.
Ямщик лэдзис Рыжкосö шагöн, керис чигарка. Кöть и важынкодь ни эз куритлы старик, а охота лоис пешлыштны солдатскöй табаксö. Солдат перво öзтiс Микашлiсь чигаркасö, сэсся ассис, но сетiс ёртыслö: сiя пукалiс бинтуйтöм киэза.
— Воюйтi ме брянскöй вöррезын, партизанскöй отрядын. Разведчик и подрывник ме. И Катшаыс — сiдз ме шуи ассим ёртöс — тожö разведчик и подрывник. А мыля Катша, дак сiдз сiя серавлiс, катша моз — гажöн, боёка. И этö кывсö ачыс велöтiс менö шуны. Велалi ме, кöть перво кыв эз бергöтчыв, падмывлiс...
Мунiм мийö сыкöт öтiк арся ойö разведкаö. Кыдз и колö, колим документтэз, босьтiм автоматтэз и мунiм. Патроннэз эз тырмö сэк, и сьöраным сетiсö етша. И кыдз нарочно, пантасим карателлезкöт. А петiс сiдз. Мийö только вуджим кöрттуй да расокöт иньдöтчим посадланьö. Вöлi свищень, и мийö эг кылö, что локтö поезд. Сiя туй кузя немецыс шоча ойнас ветлывлiс — полiс партизаннэзлiсь. А сэтöн поезд. Сiдзкö, важнöй груз кыскö. И вдруг — взрыв. Сыбöрсянь мöдiк, куимöт — этö, тыдалö, потласисö бомбаэз. Кытчö нiйö кыскисö — ог тöд. Уськöтчим му вылас, видзчисям, кöр лöньсяс шумыс, думайтам, мый сэтöн керны. «Мунам, Лёнька, одзлань, а то эшö сюрам налькö», — баитö Катша. Но, чеччим, мунам асланым туй кузя. А сэтöн автоматтэз сярзьыны пондiсö, орöтiсö туйнымöс. Мийö — бокö. Джын километр мымда котöртiм — бöра очередь бöрсянь очередь, бокöттяным пуляэс лэбзисö... Кежим шульгаланясжык и инмим морт вылö: сапыртöм-кутöм морос одзас кыдзок и сулалö. Этö сiя, думайта, кинöс кошшöны. А Катша сы дын ни.
Вöрзьöтiм мортсö — тушмыль усис. Водтöтiм гатш — оз вöрöтчы. Кыски ме сы вылiсь автоматсö, мыся, пригодитчас — öтiк патрон абу. Катша шушкö: «Кулöм... Мый керны?» Пышшыны, мыся, сэсся нем керны. Кошшис сiя карманнэсö, документтэз босьтiс. А немецыт ракета бöрсянь ракета лэдзö — дзик тöлiся ойö лоис югыт. И öтмöдöрсянь лыйсьöны. Мунны некытчö...
Пуктi ме автоматсö вийöмыс морос вылö, и уськöтчим сылань, кытöн дугдiсö лыйсьыны. Юрам дума: адззасö сiйö мортсö и дугдасö кошшисьны. А мийö асылöдззас мунам сэтiсь. Но судьбаным мöдöрö керис: эг вермö петны эта свинцовöй кытшись.
Дак вот, вуджим кытшöмкö шорок да каям мысок вылö. — Хальт! — лявнитiс кыз голос веськыт боканым, совсем ордчöн. Кыдз иззэз, усим турунас, а миян вевдöрöт койыштiсö пуляэз. Кывзiсим, кытöн немецыс, — нем оз кыв, только свищень виззьö косьмöм ёгтурунсö. Катша пондiс кыссьыны бöрланьмоз, сьöд видзан кусттэзö. Ме сы бöрсянь. И сэтчö ракета öзйис. Адззам: одзаным немецкöй солдаттэз. Сулалöны, дзик суслоннэз, автоматтэзнысö миянланьö иньдöтöмась. Видно, думайтiсö, что миян оружие абу. А Катша кыдз шырзьыштас нiйö!
Кöр кусiс ракета, ми чеччöвтiм шор саяс. Бöра öзйис ракета, и кинкö горöтiс одзаным:
— Рус, сдавай... шнель!
— На, гадина, босьт! — Катша лэдзис очередь.
— Рус, стоййать! — кылi ме бöрсяням и бергöтчи эта шы вылö. И сэк жö Катша шуö:
— Лэдз, ась матöжык локтöны, и вöлись вур! Нiя оз лысьтö лыйны мед ассиныс не павкöтны.
Адзза ме, что каюк лоö, и шуа:
— Катша, чапкы документтэсö, сюйышт нятяс. А сiя паныт:
— Чеччы, Лёнька, мунам одзлань. Кувны, дак сувтсöн, морт моз! Лэбтiсис сiя, чеччи и ме, ордчöн сувтi. И сэтчö нiя ракетницаэзiсь миян кузя! Öтмöдöрсянь. Пышкайтöны, котрасьöны, кыдз ловьяöсь, сотчöны турунас ракетаэс. Öтiк инмис Катшалö чужöмас, палитiс синнэсö. Джöмдiс ёртö, усис. И уськöтчисö сэк миян вылö, дзик кырныш табун. Но ештiм сётаки простайтны автоматтэзнымöс. Катша нельки автоматнас öтiклiсь кымöссö поткöтiс...
Ох-хо-хо! Талисö-даки сэтöн миянöс. Ог тöд, кыдз и нуöтiсö комендатураö...
Садяси ме, может, ашынас, а то и сёрöнжык — конюшняын валяйтча. Катша пукалö ни, одзжык садясьöм...
— Сёровно виясö, — шуö сiя. — Дак давай, Лёнька, донöнжык ловнымöс пуктам. И нем ог висьталö. Вот сiдз.
Нуöтiсö менö кык ки коласын керкуö — школа, видно, вöлöма сэтöн. Катша ачыс мунiс. Офицер пукалö пызан сайын, да полицай — гöрд рожа — сулалö. Лявгö мыйкö офицер, гöрд книжкаöн öвтчыштлö. Полицай юалö менчим:
— Тэ, скотина, Поповский?
— Не, — шуа ме.
— А кöдалöн эта штукаыс? — и мыччалö книжка вылö.
— Менам, — шуö Катша: вежöртiс, что сы дынiсь адззисö. Полицай мыйкö висьталiс офицерлö и мыччалiс Катша вылö.
— Иуде? — мурзьыштiс офицер.
— Найн, русише, — шуö Катша.
— О-о, Пóпофф! Этó рус монахен! Этó коммунист! Хе-хе-хе, — кавгыштiс офицер и шупкис Катшалö чужöмас партбилетсö. Катша только синнэсö куньыштiс, а партбилет усис джоджас.
— Я, их бин коммунист, — шуис Катша и мышкыртчис мыйлöкö, видно, мöдiс лэбтыны билетсö, да киэс эд домалöмöсь. Офицер кватитiс пызан вылiсь пистолет и гымгис-лыйис сы юр вевдöрö. Эз на ешты лэбтiсьны солдат, а офицер чирзiс ни:
— Куда партизан?! Отвечайт!
— Быдлаын, — шуö Катша. — И оз ков нiйö кошшыны — асьныс локтасö... Лöсьöтö чожжык гроббез аслыныт.
Полицай чочкоммис чужöм вылас и мыйкö висьталiс офицерыслö. Катша шынньöвтiсмоз меным: эн пов пö — смерться умöльжыкыс нем оз ло — сiдз сiя одзжык баитлiс. А офицер, пистолетнас орсöмöн, сё пукалiс важ местас да чикралiс синнэсö. Сэсся чеччис, чужйис стул кузя и, Катшаö метитчöмöн, жагöника пондiс сибöтчыны сы дынö..
Веськöтчис ёртö, юрсö вылынжыка лэбтiс. Сы вылö видзöттöн и ме чатыртчыштi, мöдi сувтны ордчöн сыкöт, но тойыштiсö прикладöн.
— Куда, партизан?! — чирöстöмöн юалiс офицер и пондiс бöра баитны ас мознас. Полицай висьталiс, что офицер лыддяс куимöдз, и ежели эта еврейыс оз висьтав партизаннэз йылiсь — вияс сiйö.
— Айн, — офицер керис öтiк шаг аслас жертва дынö, — цвай... И Катша чужйис сылö кынöм увтас, но сэк жö укнитiс лыйöм. Усис, кыккусiнь кöстiсьöмöн, офицер, а сы вылö — Катша.
Мый сэсся вöлi — ог тöд, бöра садьтöг лои. А садяси вöлись асланым лагерьын: сiя рытö, кöр вийисö менчим ёртöс, партизаннэз босьтiсö сiйö посадсö. Дзебисö Коля Четинöс, Иньва дорись том мортöс, гажа мысок вылö, мича юок дорö.
Эз вöв сылöн партбилетыс, но кулiс коммунистöн.
Кыдз только веськала, ветла Катша деревняö и пукта земнöй поклон мамлö, кöда быдтiс сэтшöм зонсö. И верит, дедусь: кытчöдз эмöсь миян сэтшöм морттэс — матушка Русь оз сетчы некытшöм Гитлерлö...
Дата добавления: 2015-11-16; просмотров: 36 | Нарушение авторских прав
| <== предыдущая страница | | | следующая страница ==> |
| БОНДЯЛÖН ШОГÖТ | | | СОЛДАТ БЕРТIС |