Оз вермы шондiыс кусны

Баллада

Кулöма, шуöны, Ленин — локтöма лёк юöр...

Öтöрын январь ыждалö, мороз поткöтлö, чу, керку угöввез. А керкуын шоныт да лöнь.

Жöв керсьöм, шытöг пукалö Олёна, öшöм да повзьöм.

Кулöма, шуöны, Ленин, кусöма югыт би... Да вермас я сэтшöмыс лоны? Вермас ли шондiыс кусны?

Пукалö старуха, тöждiсьö, а тöдвылас басни бергалö, сы йылiсь басни, кыдз внучекыс Ленинкöт мöйму адззисьлöма. Мунас Онтошко Москваö да и панталас сэтчин Владимир Ильичöс.

— Кöдзыт погоддяыс, тöла — ар ни эд сэки вöлi, — висьтасьö Онтошко баблö. — А гуняыс сылöн вöсниткодь, и кепкаыс абу шоныт.

— А кеписсес, кеписсес кöть эмöсь жö? — тöждö Олёна баб.

— Ровно бы эмöсь кеписсес... Ме сё чужöмсö видзöтi, медбы век не вунöтчыны сiйö.

— А голяыс абу жö куш? Эд оз туй кынмавнытö сылö! Шогавны кö пондас, дак кин нö миян понда тöждас? Мымдакö чöлö Онтошко: а каттьöм я голяыс вöлi?

— Куш сылöн голяыс, баба.

— Чышьян кöть бы пуктi, чышьян!

— Шарффез эд новйöны сэтчин, дак абу, тыдалö, сылöн.

Чапкис Олёна печкансö, шöрттэз мичöтöмöсь кошшö.

— Кыя ме сылö шарфоксö — небытö, шонытö, басöкö, — внучеклö бабыс висьталö. — Кыя да ыста Москваö, ась новйö вöлись на здоровье. Чуннес ни чорзьöмась баблöн, синнэс ни ныжмöмась сылöн — жагöна аркмö узöрыс. Жагöна аркмö, да бура: вöррез, и видззез, и ыббез — тöдчöны эта узöрын; тыэз, и юэз, и шоррез — орсöны эта узöрын; шондiлöн зарни югöррез — дзардöны эта узöрын; Пармалöн гажа оланiсь — кыйöма эта узöрыс.

Кыйис Олёна баб шарфсö, кыкпöв сöдз ваын миссьöтiс, кыкпöв ключ ваын гывьялiс, косьтiс-шурöтiс кöс руын. Орсö, пежьялö узöрыс, шондi югöр увтын дзардö, дзик и дзик бисерöн кыйöм.

Отир видзöтö, дивуйтчö:

— Кин этшöм дивосö керис, кин сiдзи кужис серöтны? Овлöма кöркö пö Насту, öтнас пö этадз серöтлöм, но нывкаыт абу ни ловья. Графлö ковёр öтпыр кыяс, Строганов сiйö козьналас кытшöмкö австрийскöй баронлö, а эта ковёркöт и нывкасö сылö жö сетас.

Паныт шыасис Олёна:

— Ме сiйö кыйи, бур отир. Графлö бы сэтшöмсö эг кер, царьлö бы сэтшöмсö эг кый, а Ленинлö сiйö ме кери. Граф менчим воляöс мырддис, царь менчим счастье гусялiс; Ленин быдöс вились сетiс — и воля, и счастье бергöтiс.

Олёналö шуис отир:

— Быль тэ баитан, Олёна. Иньды тэ шарфтö Москваö, Ленинлö иньды тэ сiйö...

Сёрмис Олёна иньдöтны. Юöр лёкся-лёк одзжык локтiс: кулöма, шуöны, Ленин. Кулöма Ленин? Да не! Оз вермы шондiыс кусны! Оз вермы Лениныс кувны!

Дата добавления: 2015-11-16