Виль нянь-сов

Максим Пахомович Няшин пукалiс правленнёын öтнас. Пукалiс пызан сайын и видзöтiс газета. А сэтöн вöлi гижöма «Виль кад» колхоз йылiсь, гижöма Тамонскöй участок йылiсь и казьтöма сылöн нимыс. Максим Пахомович некöр эз адззывлы ассис нимсö не газетаись, не боевöй листокись. А одзжык эд сiя керлiс ассис делосö не умöльжыка, нежели öнi. Кöркö велöтчис техникумын, невна колхозын уджалiс. Сыбöрын воюйтiс. А разь фронт вылас етшажык вынсö пуктiс? Да только я вынсö? И тшыгьялiс, и вирсö кисьтiс, но орденнэз сетiсö, а сы подвиггез йылiсь некытöн эз гижö. И правильнöя керисö. Быдöнныс сiдз пессисö ― и тылын, и фронт вылын, — а вермисö разь быдöнныс йылiсь гижны?..

А öнi вот любуйтчы: Тамонскöй производственнöй участок — маяк, и юралö сiйöн — Няшин. Тамон таво медодз севнас петiс, да и машинаэс быдöс дзоньöсь — öтiк эз жугав. Осяэз петалiсö одз и тшöкöсь, топ зу; анькытш му важын ни зелёнöйсялiс; кукуруза öтдруг петалiс, дзик пыжьян йыввез мусис мыччисисö да пондiсö нюжöтчыны шондiлань. И свёкла ыб веж видзö, син гажöтö.

А колхознöй председатель Мосов видчö: крутöя пö тэ, Няшин, босьтан и он кывзы миянöс, пöриссесö. А вот газета ошкö. Кин прав, кин виноват? Может, и быль колiс перво бытшöмика юасьны-висьтасьны правленнёын да вöлись и кöсйыны отирыслö дополнительнöй оплатасö? Может, и колiс, но Мосов сёровно бы эз согласитчы сыкöт, шуис бы аснырöн да и быдöс.

Эх, не кокнитö тöбалiн додьтö, Пахомыч! Верман я тэ сiйö кыскыны сэтчинöдз, кытчöдз колö? А но кö колян сiйö туй шöрас, орас мылаыт? А, поди, одзжык сiйö кольны, мед сэтшöмыс эз пет? Вот как раз талун бюро вылас и висьтавны веськыта: сiдз и сiдз пö, дона ёрттэз, коммунист Няшин, кöда служитiс армияын 25 год и нёль тöв да гожум порох чадын олiс да Берлин босьтiс, часöт повзис колхознöй уджись. Верман тэ, гвардеец, висьтавны этадз? Бергöтчас я кылыт? Тöн тай Устя баб велöтö вöлi:

— Мун, кага, бöр, кысянь локтiн, да сёй сэтчин лямоннэтö апельсиннэзнат. Татöн гöг вöрзьöттöдз пессян, а бур ойлунсö он адззыв. Тэнö сiя, предыс, казявтöг ньылыштас. Нiя бухгалтерыскöт вина чурскöны, а сола тшак туяс тiян кодьöммесö сёйöны...

Эх, Устя баб! Öддьöнöв ни тэ, тыдалö, пöрисьмöмыт, он вежöрт, что Няшинсö пуляыс эз босьт, а пиньöн сiйö он ни курччöвт. Да и не сэтшöм жö сiя, Мосовыс, кыдз тэ думайтан!

Няшин нырышсис гырдззаэз вылас, кутiс киэзнас юрсö. Шочыник, но кузь сьöд пилиммес ыскöвтiсö юрпыдöс вывсис, öшöтчисö увлань да кушöтiсö лысöм юр шöрсö. Асывся шондiлöн югöррес небытика павкöтчисö воманас, долыта шонтiсö. Этасянь Няшин кунис синнэсö и син одзас лоис неважся картина — апрельскöй рыт. Правленнёын, эта жö местаын, сэк пукалiс Мосов, председатель Мосов. Ыджыт юра, кыдз и Максим Пахомович, но сук юрсиа да вöснит тырпа. А вöснит тырпаыс да шпын юрсиаыс — лёк морт. Няшин только ештiс здоровайтчыны, кыдз Мосов сувтöтiс сы вылö тув синнэсö, нёджжöвтiс статя военнöй морт вылö, юалiс:

— Тэ ме дынöдз?

— Баитыштны бы колö... Позьö?

— Кылыт эм, дак баит, — тшöктiс Мосов. — Тэ районiсь али ылiсьжык? Натьтö, вöв колö?

— Оз. Ме вот мый йылiсь... Тамонын некытшöм порядок абу. Колö сев кежö лöсьöтчыны, тулысыс то завор понас ни, вот-вот чикисьсö путшöтас.

― А кин тэ сэтшöмыс, что Тамон понда тöждiсян?

— Няшин ме, армияись петi да горт ладорö шоччисьыштны локтi, — висьталiс Максим Пахомович.

— Вина кузя пыркнитiсö? — дöвгис председатель. — Уджалö жö миян сэтшöмыс — Мишка Живов. Кресталöмась бöрсö да чужйöмась...

— А весь тi сiдзи ме йылiсь. Честнöя служитi. Дзорми сэтчин. И ачым петi, — гажтöма шуис Няшин.

— Но, но! Öбидитчис ни! Висьтав нö, мый умöльсö казялiн, — тшöктiс председатель.

— Сев кежö, мыся, оз лöсьöтчö. Гöр-пиня чисто киссьöма, кöдзыс провериттöм, кöр колö видзны «готовность номер один».

— Ми пыр готовöсь, Няшин, — дугдöтiс Максим Пахомовичсö председатель. — Шуасö меным: пет, Мосов, кöдзны — ашын жö пета. И нем эстöн кулитны колхозсö. А сiя, верма висьтавны, не кытшöмкö «Стальнöй вöв» кодьöм, кöдалöн мöссэс пö усялöны ни. Знамя мöйму сетлiсö. Йöв понда.

— Мöс картаэз назёмöн тырöмась, удобреннё лымöн сорласьöм, — висьталiс Няшин, — а подкормка оз керö.

— Ми асьным тöдамö, кöр и мый керны, — баитiс одзлань Мосов. — Мыйкö, поди, и вунöтiмö, не сiдз керим, но сiя пустяк. Главнöйыс миян — пода, и колхоз пессьö сы понда, мед унажык сетны государстволö йöв да яй. Деньга миянлö колö керны. А деньгаыс унажык локтö яйсянь, йöвсянь. А деньга эм — тэ бур морт. Тэ он тöд миянлiсь хозяйствосö, а шуан...

— Хозяйствонытö ме ог тöд, этö сiдз, — шуö Няшин. — Но задачасö деревнялiсь тöда. Медбы керны унажык яй да йöв, колö и нянь, и картов, и кукуруза. Ме прокод следита, кыдз уджалöны колхоззэс.

— Газет сьöртi следитан, адзза. Загладалiсь баснисö кывлiн, натьтö... Лыддьöтiн кык статейка — и «тöда»! А уджас, оланас мöднёж петö. Вон, адззан ыбсö? Волькыт сiя, дзик пызандöра ольсассьöм. Пондыв мунны сы кузя — джöмдан нето сибдан кытчöкö. Неволькыт сiя.

— А тэ кок увтат видзöт.

— А кыдзи некöр нёджжасьнытö?

— Сэк эн и мун... Да и мыйлö меным энö притчаэсö? Тi висьталö меным, кöр Тамонас ветлатö? Отирыс корöны, норасьöны, что умöль...

— Натьтö, Мишка Живов лёкöтчис? Адззöмат кинлö веритны, — серöмтчис Мосов. — Кывзыны неохота.

— Ме сэк районö муна.

— Волькыт туй, служивöй! — горöтчис Мосов, сыныштiс чуннезнас, кыдз куранöн, шпын юрсисö, пуктiс шапка да петiс öтöрö.

Вот сiдз и петiс сэк Максим Пахомовичлöн. Председатель эз кывзы сылiсь баснисö. Сы моз петiс, что виноватöсь только колхозниккез. Нiя пö дышкучиккез и только лёкöтчыны и кужöны.

Гортас Няшинлö вöлi нем керны, и сiя ашынас жö мунiс районö. Туй вöлi тшыксьöма ни, машинаэз эз ветлö, и Максим Пахомович сюрис парткомас только рытнас. Секретарь Расов (Няшин сiйö тöдiс учöтсянь, велöтчис сыкöт техникумын) кывзiс сiйö и мыйкö гижис блокнотö. Сыбöрын юалiс:

— А тэ, Максим Пахомович, мый пондан керны öнi?

— Весь, конечно, ог понды овны. Ме оружейник и, натьтö, заводö муна.

— Нянь да йöв тожö оружие. Эн я бы кутчы этö оружиесö керны? — шуис секретарь. — Давай баитам кыдз коммунист коммунисткöт. Тэ эд не только оружейник, а эшö и агроном... Вот, шуан, умöля Тамонын олöны, что председатель оз куж руководитны, а мийö, шуан, сiйö ошкамö. Сiдз, пожалуй, и аркмö... Кöр «Виль кад» учöтик вöлi — кык деревня только, — сэтчин отирыс сьылiсö да олiсö. А мыля? Мосовлöн сэк быдсöн син одзас вöлi, кыдз аслас огородечын. А часöт вон кытшöм колхозыс — лунтырöн он вермы подöн кытшöвтны. Вот и оз сибав öнi Мосовлöн киыс быдлаö. А техникаыс кытшöм öнi! Арттöг тожö он кутчы сы бердö... Да и председателлес пöрисьöсь, вежны нiйö некинöн. Мунiс том отир армияö — гиж, что сiя не колхозник. Дак вот, Максим Пахомович, кольччы колхозас. Председательöн лоан. Ме тöда, кытшöм тэ мортыс: айыт сьöрья жö. Тэ верман уджавны.

— Председательöн!.. — серöмтчис Няшин. — Кöть бы участокас шуин.

— Лöсялö и сiдз. Вот и примит Тамонсö.

Няшин чеччис, пондiс öвтны киэзнас, пыксьыны эта уджись, ыстiсьны сы вылö, что кöсйисьöма ни пö мунны заводö и что сiйö, тöдтöм мортöс, оз пондö кывзыны колхозниккес.

— Вот адззан, кытшöм бур руководителлесö кошшыны, — серöмтчис Расов. — Этö не армия тэныт — сетiн приказ и быдöс... Ме тэныт, Максим Пахомович, прикажитны ог вермы, только кыдз коммунистöс кора: думайт, кытöн тэ коланжык...

Няшин петiс парткомись гажтöм. Коридорöт мунiкö чужьясис, бытьтö нöбöтiс сьöкыт ноша. Лэдзчис посöдзсис, öзтiс папироса и горшöн пондiс ньылавны табак тшынсö. Мыйкö керис сiя неладно, арттöг керис. Былись эд петö сiдз: мыччавны чуньöн пöрöм йöр вылö вермö быдыс, а тупкавны осьтасö, йöрсö лöсьöтны — некинлö. И бöра жö: мыля сiя, а не мöдiк должен лоны заведующöйнас? Сiя эд не колхозник, и не сылöн дело няньсö быдтыны. Эмöсь жö тай агрономмез, кöдна ем-сунисöн торгуйтöны. Не, тырмас сысянь. Сiя быдсöн, мый колiс, сетiс Родиналö, а öнi позьö и шоччисьны. Некин оз шу, что весь нянь сёйö — заробитiс, поди. Честнöя, аслас киэзöн, аслас вынöн заробитiс.

Посöдзын лабич вылын пукалiсö кык морт. Няшин сибöтчис ны дынö, сувтчис неылö. Öтсö сiя сразу тöдiс: эта вöлi кöркöся торговöй Митрейко, богатöй морт, кыдз шувлiсö сiйö деревняын. Сiя куритiс и висьтасис сiдз збоя, что тошыс зэгалiс.

— Вот ежели бы öнi шуисö менö богатöйнас — шы бы эг сет, — койис старик. — Гортын менам тырдоз: виль керку капки-сувтöтi, мöс видза, поснит подаыс — дюжина юр. И няньöн нiйö верда, чиг няньöн. А машинаэс — и вурсян, и песласян, и мотоцикла эм, да не кык колесоа, а зыбкаöн. И зонö, и моньö гöняйтöны сiйöн. Аслам вит гоз сапог-пими. А сэки ачым токо сапогсö новйи, да и то праздник коста.

— Мый и баитны, — нюжлалiс кыввесö мöдыс, — овны öнi туйö. Шуисö бы меным часöт: кув, Гавра, райö тэнö пыртамö, — ме бы откажитчи. Тöда: татöн райыс лоас... Вот бы токо внучеккезöс быдтыны.

Няшин öнi и мöдсö тöдiс: сiя «Виль кадiсь» пöрись колхозник.

Митрейко вешшыштiс сы дынö матöжык да вашкис:

— А тэ, кывзы, веритан сыö, коммунизмаас?

— Верита. Агитпунктö часто пыравла, а сэтчин умнöй морттэз висьтасьöны...

— Агитпунктö... Вот кулас öтiк морт да и каяс раяс. Не сразу раяс, а, кыдз шуöны... приёмнöяс бытьтö перво-ту. А сэтöн öшынок сэтшöм эм, кыдз тай кассаын. Видзöтö эта öшынокöт раяс и адззö: отир дзоридза видз вылын нежитчöны, ягöд сёйöны да ма лакöны, песняэз сьылöны. Вот кытöн, думайтö, оланыс. Некытшöм забота абу, нем понда сьöлöм оз потлась... Но, пырас сэтчин, раяс-ту, а сiйö кватитасö да дзирыт жаровняö, кыдз тупöсьöс — шляп! Жаритасö, жаритасö, кыскасö сэтiсь да юкмöсö — буз! Кыскасö сэтiсь да из шедтыны сувтöтасö. «Мый сэтшöмыс эта? — думайтö грешнöй. — Эг я ме ыбöссö сорав? Поди, адас инми да?» Юасьö, а сылö: «Не, эн сорась». «Дак мыля нö ме öшынокас мöдiкö адззылi?» «А сiя, шуöны, не рай, а токо агитпункт». — И öдззис серавны да тошнас треситны.

Мöд старикыс шуис:

— Сказкаыс сёжö сказка, а оланыс — олан. Вот босьт миянлiсь колхозсö...

— А мый, тiян коммунизма ни сэтчин? — юалö Митрейко. — Ошшасьöны тай начальниккезныт, что быдöс нылöн эм, а видзöтан кö — отирыс сё тшыгьялöны. И пышшöны колхозсис.

— Ö-ö, Митрей, не сiдз тэ баитан, — шуö Гавра. — Кöдна мывкыднаныс некодяöсь, дак мунöны. А мукöдыс и локтöны. Городiсь локтöны. Вот ме, Митрей, ачым адззылi, кыдз Няшин Пахомлöн зоныс колхозас локтiс. Мывкыда морт, крепыт юра. Поди, генералöдз бы лэбис сэтчин, а вот локтiс.

Максим Пахомович кывзiс, кывзiс, бергöтчис стариккес дынiсь да тэрмасьöмöн бöр пырис парткомас, бытьтö мыйкö вунöтчис сэтчин.

Эта лунсянь, кыдз шуис Няшин, сiя кышалiс участковöй завлiсь «сийöс», кöда мукöдпырсяс и зэлöтлiс, и дойдiс, но гатш эз кыскы. И виль нянь-сов Тамонын эз вöв курыт.

Парткомсянь локтiкö Максим Пахомович кежис Кöчкокö, кытöн олiс Миша Живов, сылöн неважся однополчанин. Деревняын сылö мыччалiсö виль керку, и Няшин кайис крут поспу кузя, осьтiс посöдз ыбöс, казялiс хозяинсö, кöда лöсьöтчис кытчöкö мунны: пыркöтiс пиджак.

— Живов, здорово! — гажöн шыасис локтiсьыс. — Ö-ö, да тэ, тыдалö, кодышкодь?

— Сiдз точно, — чатыртчыштiс Миша и лэбтыштiс кисö пель дынас. Лöз йöрнöс пырйöт бура тöдчисö кыз, чорыт кисойес, паськыт да вылын моросыс.

— Уна юин?

— Куим стопка, ёрт майор! — резьöтiс-висьталiс Миша.

— Ме локтi баитыштны тэкöт кыдз бур тöдсакöт, а тэныт, адзза, некöр, — шуис Няшин.

— Мыля некöр? — дивуйтчис Миша. — Как раз öнi. Пырам.

— А кöр инö юнытö пондан? — чикыртыштiс синнэсö Няшин. — Кольччан эд пируйтöмнат, сiдз и видзöт — штраф пуктасö.

Миша вежöртiс, что Няшин сералö, но кымöртчис, лоис серьёзной.

— Да мый нö сэсся керны, ёрт майор?

— Ме не майор — Максим Пахомович.

— Но ась... Тамонö тай, участокö ветлi, удж кори, а завыс своякыслö посадö тшöктö пес кыскыны. А тракторыс некодя, и севыс то ворота одзат ни.

— Но и мый?

— Ог мун, мыся, ог понды тракторсö вийны.

— А сiя мый?

— Сет, шуö, трактортö механиклö да мун шатлась... Тэ пö кöть и танкист, и тракторист, а несознательнöй морт. Машина, шуö, весь сулöтам, а сiя пö вермис бы ыджыт доход керны колхозыслö, матынсьöтны коммунизмсö. Тожö политик! А меным мый? И муна. Паспорт эм и киэз эз на косьмö — не одзöсасьны.

Няшин ветлöтiс порогсянь комöдз, курччалiс тырппесö да чöлiс... Вот эд кыдз аркмö: Живовöс, неважся танкистöс, кöда пиньöн и кырымöн кутчисьö удж бердö, вöтлöны колхозiсь. Вот кыдзи порой ми керамö, тэрмасьöмöн да думайттöг. Кытöн бы позис и пöрччавны чуть жулöтöм гöрöдсö, дак нет — колö керавны сiйö, орöтны да совсем чапкыны, но только не гуддисьны, не öштыны кык-куим минута. И этадз порой овлö сэк, кöр гöрöдыс — мортлöн заветнöй дума, мортлöн судьба.

Куим год чулалiс, кыдз сверхсрочник Живовöс нем понда öбидитiс öтiк морт — старшина, и сiя петiс армияись. А сылöн эд киэс золотöйöсь и юрыс мывкыда — конструкторскöй бюро...

Кöчкокись Максим Пахомович мунiс вöлись рытъявнас, а правленнёö локтiс би шедтан кадö. Сэтчин тöдiсö ни, что Няшин корсьöма колхозö и не кытчö-нибудь, а Тамонö — медумöль участокö. Конечно, тамонса асьнысö эз лыддьö умöль отирöн. Нiя тöдiсö поговорка: кытшöм хозяин, сэтшöм и хозяйство. Этö Мосов лыддис тамонсасö дышкучиккезöн. Мосов, кöр правленнёö пырис Няшин, лапкöтыштiс сылiсь пельпонсö кыдз важся тöдсалiсь, шуис:

— Но вот: мый кошшин — адззин. Öнi давай пудж соссэтö. Ашын заседаннё, утвердитам, коли район тшöктö. Отсöт тэныт оз ков, ачыт, шуан, быдöс тöдан и адззан быдöс.

Лабичын, стуллэз вылын и нельки джоджын пукалiсö мужиккез, мукöдыс куритiсö, кывзiсö Мосовлiсь этö баснисö да видзöтiсö шинеля морт вылö, гогинялiсö и бергöтлiсö юррезнаныс. Может, сэтöн вöлiсö и тамонса, кöднакöт Няшинлö мунны öтiк туйöт, мунны тшöтш, ордчöн, овны ныкöт öтiк думаэзöн да заботаэзöн. А нiя, пукалiссес, натьтö, думайтöны: а дыр я видзсяс виль завыс миянын? Сьöдракаэзкöт öтдруг локтiс и, может, ныкöт жö и мунас тшöтш? Мосов, тöдчö, этö и видзчисьö. Сылö оз колö, тыдалö, сэтшöммес, кöдна мыйкö вермасö паныт висьтавны, а то и велöтны сiйö пондасö. Сылö сьöлöмви пö, кыдз кывсис, сэтшöм отир, кинiсь, кыдз уль нянись, позьö и гöглян керны, и сэтшöм сухарь косьтыны, что мöдiк морт и пиннесö чеглалас. Да-а, Мосов оз понды отсавны виль завыслö.

Шыасис том детина, кöда пукалiс пызан сайын да береститiс киас кытшöмкö туссез: нето анькытш, нето вика.

— Андрей Петрович, — бергöтчис сiя Мосовлань, — мыйлö сiдз мортыскöт баитны? Сiя виль олiсь миян и, конечно, отсавны колö. И отсаламö, нем сiйöн мортсö йöртны.

Мосов кешитчöмöнмоз юалiс:

— Поди, школа осьтамö, пондамö велöтны, кыдз вöв доддявны? И кин пондас велöтны — тэ? Поди, ачыт тöн вöлись велалiн да?

— Коммунисттэз отсаласö и мийö, комсомолыс! — висьталiс том мортыс и сибöтчис Няшин дынö. — Ме секретарьöн комсомолас, Ванин Гришаöн шуöны. Талун собраннё миян. Позьö кольччыны, кывзыштны. Сiя отсалас тiянлö.

— Спасибо, Гриша. Ме локта... Вот сiдз сiйö панталiсö колхозас.

Ыджыт стариннöй часы, кöда öшалiс Максим Пахомович юр вевдöрын, пондiс триньгыны, орöтiс мортлiсь думасö, и Няшин чеччис, веськöтiс коссö да долыта нюжöтчис. Часы вартiс сизимись. Отир, натьтö, вöлись чеччöны, а сiя джын час ни пукалö правленнёын и видзчисьö районiсь начальствоöс. А сiя, начальствоыс, может, тожö сё узьö. Да и кытчö тэрмасьны — бюро пондöтчöмöдз эшö быдса час! Баитiсö эд гортас: эн тэрмась пö, а сiя сёйтöг мунiс. Не ветлыны я ыб вылö, видзöтны, кыдз уджалö Гриша Ванин? Ештiс я сiя кукурузасö пинялыштны?

Няшин кизялiс мундир киззесö, пуктiс военнöй фуражкасö юр вылас да мöдiс ни петны öтöрö, но пондiс звонитны телефон. Максим Пахомович босьтiс трубкасö, юалiс, кинöс колö. Звонитiс Тамонiсь пастух, корис председательöс, и кöр тöдiс Няшинöс, пондiс норасьны бригадир вылö. Тöн рытнас Максим Пахомович тшöктiс лэдзны колхознöй мöссэсö öзим вылö, висьталiс эта йылiсь бригадирлö, а сiя талун вашöтöма пастуххесö. Жаль, конечно, сылö эттшöм бытшöм сюсö травитны, кöть и тöдö ни, что этасянь пользаыс колхозыслö унажык лоас, нежели сiя няньсянь, кöдö арнас сетiс бы эта öзимыс.

— Ноко, кор бригадирсö, — тшöктiс Няшин. Бригадир, тыдалö, сэтöн и вöлöма: трубкаын пондiс кывны сылöн мыкталöм. Няшин эз радейт этö бригадирсö. И не сы понда, что сiя умöля кутчис удж бердö, а сiйöн, что мортыт ачыс эз адззы уджсис главнöйсö, сылö сё ковлiс мыччавны чуньöн и вот этадз жö, кыдз и öнi, кыкпöв баитны öтiк дело йывсис.

— Тэ, Полин, мыля паджан, а? Кин, шуан, тшöктiс? Да участокись совет тшöктiс, ачыт эд вöлiн сэтöн... Джын гектар, шуан? Двести юрыслö — гектарджын? Етша! Содты эшö гектар! А? Йöлыс содö ни, дак оз ков вердны? Не, Полин, öддьöнжык колö вердны. Лэдз часöт жö, — висьталiс Няшин да пуктiс трубкасö. Эта коста öшын увтö сувтчис газик. Сэтiсь петiсö Расов, райисполкомись председатель да эшö кынымкö морт и, негорöн сёрнитiкö, пырисö правленнёö.

Расов, кыдз только пырис да здоровайтчис, шуис: — Вот эта и эм Няшиныс, кöда вылö бедуйтö Мосов.

Максим Пахомовичкöт пондiсö здоровайтчыны да тöдсасьны, а сiя сулалiс дзик сьöвталöм. Мыйкö лоис сылö шог кодь, кöр кылiс Расовлiсь кыввесö. «Натьтö, пывсьöтасö-даки öтi-мöдi понда, — думайтыштiс сiя, но сразу жö энö думаэсö дзескöтiс мöдiк: а мый понда? Разь сiя мыйкö умöльö керис?»

Расов пондiс юасьны, мый öнi керсьö Тамонын, кыскалöны я назём, кыдз быдмö свёкла, кукуруза, уна я содiс йöв эна луннэзö. Максим Пахомович висьтасис дженыта öтiк-кык кылöн быд вопрос вылö, но кужöмöн, деловöя. А часы бöра пондiс вартны-звонитны сiдз жö нюжвыла да дыша, кыдз час бöртi.

— Пондöтамö, натьтö, — шуис секретарь. — Тыдалö, быдöнныс ни öксисö. Сетамö кыв Няшинлö, кывзамö, кыдз сiя руководитö участокöн.

И сэк вöлись Няшин казялiс, что отирыс керкутыр ни. Ештöма локны и Мосов, и парторг Корина, и сельсоветiсь председатель.

— Ме ог понды висьтасьны, кыдз мийö лöсьöтчимö сев кежö, — пондöтiс Няшин. — Сэтöн öтiк маета вöлi...

— А ме думайта, сэтöн и эм главнöйыс, — костiалiс сiйö Расов. — Тэ уж давай одзсяняс кут висьтасьнытö.

Максим Пахомович чöлыштiс невна и пондöтiс сысянь, кыдз сылöтiкас ни Миша Живов öктывлiс механизаторрезöс да велöтiс нiйö уджавны асмознас: гöрны-кöдзны — лун и ой, но бура видзöтны техника сьöрын и удж качество сьöрын. Сiя жö, Мишаыс, аскадö вайис горючöй да мавтас, сев вотöдз видзöтiс не только быд тракторсö, но и быд пинясö, быд катоксö. И конечно, ежели бы эта эз вöв, то удж паджсис бы первöйся жö луннэзас: кык трактор вöлi лöсьöтöмась, кыдз баитсьö, тяп-ляп. Öтiк трактор сётаки жугавлiс, и Миша Живов да Гриша Ванин петкöтлiсö ыб вылас комбайн.

— А тi юалö сылiсь, уна я пользаыс лоис этасянь? — вдруг юалiс Мосов. — Кык лун кöдзисö — покрышка изводалiсö, цеппез орлалiсö... Видзöтам, мыйöн пондасö вундыны.

— Нiя не виноватöсь, — видзис ответ Няшин. — Правленнёлö колiс видзöтны, кыдз тöвйисö машинаэс.

— А висьтав-ко, Няшин, — юалiс райисполкомись председатель, — мыля сiдз петö: Тамонын отир уджалiсö ой и лун, и подкормка керисö, и назём петкöтiсö, а мöд участоккезас токо луншöрнас петавлiсö и сё öнöдз кöдзöны?

— Сразу сiйö он и висьтав... Да и позьö разь быдöс висьтавны? Севыс кыдз фронт жö, он вермы одзлань тöдны, кыдз и мый пансяс. Главнöйыс — не öшны, кöр планыт сьöртi оз лöсяв... И эшö вот мый ми керим. Участковöй совет колхозниккеслö, кöдна уджалiсö ыбын, пондас вежтыны унажыкöн. Механизаторрезлö ми сетам, кин заслужитас, премия техника берегитöм понда. Дополнительнöй оплата босьтасö кин дозирайтö и кукуруза, и свёкла, и картов. Сэсся челядь сад осьтiмö, концерттэз да лекцияэз вöлiсö. Только правленнёыс эттшöмсö оз ошкы.

Мосов вештасис местаас, пукалiс дзик ёссез вылын, нюжлалiс, ровно высьтiс, тшöкасö. Тöдчис, что Няшинлöн басниыс не сы сьöртi, и сiя орöтчис висьтавны мыйкö, öмйыны тамонскöй завсö.

— А мый шуас Мосов? — юалiс вдруг Расов. Мосов чепöссис местасис, пöрччалiс пиджак киззесö да нюжöтiс кисö Няшинлань, бытьтö мöдiс кутны сiйö моросöттяс.

— Кöсйынытö кöсйин дополнительнöйсö, да мыйöн пондан вежтiсьны? Деньга етша, няньсö, кöда эз на быдмы, травитамö ни.

— Дак эд правленнёыс и рекомендуйтiс, — эз вермы видзсьыны да поперегалiс Мосовсö Няшин. — И эшö: миян хозрасчёт эд.

— Правленнё мöдiк цифраэз сетлiс, учöтжыкöсь, — эз сетчы Мосов. — А техника понда, ме шуа, весь дополнительнöй оплатасö сетат. Сiйö берегитны и сiдз колö... И правленнё оз утвердит сiйö. Менам баитсис.

Няшин лöсьöтчис висьтавны паныт, уськöтлiс тöдвылас факттэз, цифраэз. Кыдз и прокод, часöт вöлi сiя спокойнöй, только кöсича вывсис жилаэс орсiсö öддьöнжык, пöльтчывлiсö частожыка, кыдз бытьтö ны пырйöт мунiсö нiя цифраэс да факттэс, кöднö сiя лöсьöтчис висьтавны часöт асьсö дорйöм понда. Но сэсся Няшинлö эз ковсьы баитны: сылiсь думаэсö быдсöн висьталiс парторг Корина.

Расов да мöдiккез, кöдна локтiсö районiсь, кывзiсö Коринаöс, юасисö мöдпöв, висьтавлiсö, кыдз буржыка керны, бöра юасисö.

Няшин тожö бура кывзiс и прокод, кöр касьтывлiсö сылiсь нимсö, сё öддьöнжык адззис, что сiя, отставнöй гвардеец, Тамонын жугдiс важся порядоксö, кöда понда öтiккез сiйö ошкöны, мöдiккез — синöн оз адззö. Но сiя нем сэтшöмсö эз кер. Осьтiс челядь ясли? Дак сiйö важын ни колiс керны. Тамонын лоис клуб, а клубын кино да спектакллез? Дак сiдз и колö, быдлаын нiя эмöсь. Отсалiс отирыслö буржыка асьнысö, ассиныс кужöмнысö да выннысö тöдны? Дак этö сылö колiс керны кыдз коммунистлö.

Вот эта понда сiйö ошкöны, эта понда жö и видöны. Да киннэз видöны? Нiя, кин тöння лунöн олö, кинлö уджыс — ош.

Няшин эз тöд, мый аркмö сы сьöлöмын: кытшöмкö гаж, дзик дурман, бöбтiс юрсö. Сылö вдруг охота лоис, кыдз вöвлi кöркö, челядь кад коста, чеччöвтны местасис, котöртны веськыта ыббез кузя Тамонö, мöдiк бригадаэзö, висьтасьны Миша Живовлö, Гриша Ванинлö, что парткомлöн бюро ошкис нылiсь уджсö, ошкис быдöс вильсö, мый лоис Тамонын, висьтавны нылö, что быдöс лоас керöма сiдз, кыдз решитiс участокись совет, кыдз тшöктö керны совесть. А нылöн — Няшинлöн, Живовлöн, Ванинлöн да эшö уна мöдiккезлöн — закон сэтшöм: кыдз тшöктö совесть, сiдз и лоас керöма.

Дата добавления: 2015-11-16