Ouml;грав, öграв!

Ойбыт укöтiс бöбмöм тöв: уннялiс, горзiс, сьылiс да чапкасис пашмöм голиэзöн, кöдна гер öшалiсö пöрись кöз вылын.

Эта кöзыс красуйтчис-быдмис вöр дорас, вöлi учöтжык мöддэсся, зэв лапыт да вапсыра увья. Дед Митроклöн балаганыс сы увтын олiс топ гуня пола увтын. Öддьöн кужöмöн панöм-керöм, сiя вöлi шоныт и прокод кöс. Кöть кыдз виззяс-зэрас и сырлёль öшöтчасö сук уввес, шуч вамасö да дугдасö видзны зэрсö, а старик позö ваыс оз сидз: балаган вевттьöма дуб банöн.

Вот и таой зэрыс чеччöвтöмöн вартiс кöз кузяс да гыма-йирка етшасисö кымöррез, а Митроклö балаганын вöлi сiдз жö бур, кыдз гортас гор вылын.

Югдандорас кымöррес рознитчисö и только рытвылас чели-пели öшалiсö кынымкö торок. Вынтöмсялöм тöв мыйкö шушкис пöрись кöзлö, бытьтö каитчис, мыля бöбувьяс öддьöн пиньлалiс сiйö, вöрзьöтiс вужжесö. Паныт мыйкö шувгис и пöрись кöз, натьтö, норасис, а может, и лёкöтчис аслас сьöкыт судьба вылö.

Кин и оз вежöрт тöвлiсь да пуэзлiсь шушкöмсö, а пöрись мортлö сiя вежöртана. Эд кыным ни гожум старик чулöтö татöн, палёжас! Сыкöт часто сёрнитö-баитö кеньжак, куруöн орсöны тарпияннэз, синмасьö да дразнитчö сюзь, кыр асыввезнас орсö побудка. Мый и баитны, паськыта тöдöны старикöс раменнёись олiссез. Нельки ёж вовлiсьö сыкöт.

Сiдз Митрок думайтiс нитшись керöм перина вылын куйлiкö. Чеччыны эз тэрмась талун: ойсö узис умöля. Умöля сысянь, что лёк погоддя тожö маитö сылiсь пöрись коскаэсö, кöть и Митрок йöз одзын асьсö видзö эшö чатырöн. Ох, годдэз, годдэз! Мыйсö тiйö эд мыччалö миян векын. А восемьдесят год овны — не ма лакны. Только созлöй морт, созлöй крестьянин эна годдэзö вермö уджавны. Öтöрын кылiс тырган шы, старик вöрзьöтчис местаас.

— Саймöтö ни бöра, тюня-параня, — серöмтчис старик да чеччис ольпасись, пондiс тэрмасьны. Конечно, Митрок важын ни бы чеччис, да нарочно видзчисис, кöр локтас кырыс. А кыр сё вартö нырнас, вöрсö чанöтö.

Старик лэбтiс скöвер — пырейись гöрдззöм ыбöс вевт — и петiс балагансис. Паныт койыштiс шондi югöр, гусялiс синнэсö. Митрок кишупнас адззис лабичок, пуксис. Шондi дзик руша коросьöн малыштiс куш юрвомансö, югöррес сидзисö гöрд йöрнöс да суконнöй вешьян пыр, шонтiсö вöйöм мороссö да ёсьмöм пидзöссэсö.

Долыт, гажа. Пукав бы да пукав этадз, шонтiсь, вишкы табак, но Митроклö колö видзöтны ассис хозяйствосö, тöдны, быдöс я ладно, эз я ыжмав ойнас лёк тöлыс.

Старик резыштiс чужöмас чуманокись ва да бадьöгасис-мунiс мош карö, кыдз шуис сiя пасекасö.

Мачуркаэз сулалiсö ота кушинын лёдзöн-лёдзöн и аркмöтiсö учöтик городок. Сэтöн вöлiсö нёль уличка. Быд уличкалöн аслас ним: Кипряжник, Кöчвоняин,

Ключьюр, Сьöлавидз. Сiдз нiйö шуис Митроклöн внучек Минька.

Митрок ылiсянь казялiс, что тöвчик гудралöма-даки öтiк уличкаын.

— Ок тэ, тюня-параня, — пондiс клопöтны боккесö мошвидзись. — Пукалан, лёгостай, тоштö косьтан, а сiя то мый пансьö: мачуркаыс пöрöма! — и öдззис ляшмасьны-котрасьны, лöсьöтны одззася порядоксö.

Эта удж сайись старикöс застанитiс павжун. Позис бы и сёйыштны, да внучекыс сё абу. А öтнаслöн кынöмыс оз симав.

Миня тöн эшö мунiс гортас лукла да кушманла. Эта карчыс Митроклö медбур сёян. Иньдöтас старухаыс берсясö: и кольттез, и рисьтупöссез, и шаньгаэз — старик перво-медперво кушман пестерсис кыскö. Кыскас, тёритас сiйö, маöн сорлалас да няньöн тюкö-курмалö. Тюкö, ошкö ассис стряпнясö, Миняöс велöтö:

— Ме моз, тюня-параня, сёй — сто год олан. Миня сералö:

— Маыс и öтнас чöскыт. Ме кушсö сёя.

— Сiя-ту сiдз, — соглашайтчö старик, — да кушмантöг абужык пользительнöй. Кушманыс, сiя... Вот босьтам кöрт. Дорöт сэтiсь чер — ныж петас. А содтышт кöртас углярод...

— Углерод, деда. Бöра не сiдз шуин.

— Но ась углерод... Нето этiйö... кыдз сiйö, тюня-параня...

— Хром, — адззö Миня колана кывсö, кöдö не öтпырись ни кывлiс дедыссянь.

—...содтасö сэтчö хром — бритваэз керöны. Сiдз и кушманыс. Углярод туйö мортыслö. Коскаэтö чорзьöтö, яйтö суктö. Ме моз сёй — сто год олан и кушык-кашык он кер.

— Нечöскыт кушманыс, деда, — бöра шуас Миня.

— Мый тэ и баитан, — дивуйтчö дед. — Ма сорнас и отопка ньылыштан, он казяв!

Старик видзчисис-керис зонкасö, сiя эз лок, и мунiс куртны.

Умöль кайис таво туруныс, шоч да дженыт, но Митроклöн куим кос ни öксис. Керны эшö сымда жö, и Серанькаыс тöвсö бöбöтас. Мошвидзись эз мöд таво турунавны, да старухаыслö эз лысьт поперечитны. Сыкöт унасö он вермась. Сьöкыт характера инька. Ог, шуö, мöс родсö орöтö и быдöс. Йöвтöг пö ме и годсö ог ов. А юав тэ сылiсь, уна я йöвсö сёйö. Стакан етш луннас юас дак ладно. Остаткисö внучеккеслö новйö, рись тупöссезöн джын деревнясö потшшуйтö. Вельмöма, мый и шуны. Нывканас лöнься-лöнь вöлi, лишньöй кыв эз висьтав, а петiс жöник саяс — кузь пиня пила кодь лоис и нырсö клюкаöн он судзöт. Неöтпыр жöникыс юрси бердö кутчылiс. Правда, вöлi мый понда: мошвидзись часто маöн потшшуйтлiс инькаэсö. И, конечно... Да кыдз тэ он нетшкöвт ягöд тусьсö, кöр сiя ачыс öмö готов пырны? Вöвлi грехыс. Митрок ачыс винитчис сыбöрын. Но юрсиыс разь виноват? Поди, сысянь и кушмис юрыс. Видзöт, тошсö эз вöрöт, дак сё зу кодь тшöк.

Да, характер... А мöдкодьыс Митроклö бöра оз ков. Кытшöм сiя хозяйка, кöдалöн öмас ва кынмöма? Асныртöм инькаыт дзик дуб нянь. Семьяат инькаыс, батя, мош матка туйö. Сы гöгöр и ройыс каттисьö...

Старик аскöттяс сёрнитiкö лёдзалыштiс ытшкöмсö да чукöртiс зород бокас. Локтас Миня, тальны пондас зородсö, а Митрок лэбтас турунсö.

Лун вöлi мича, шондi ма сотьöн öшалiс юр весьтын, и Митрок тöдiс, что зэр оз костiав сылiсь уджсö. А кыдзи сiдз, то позьö и шоччисьыштны. Пуксис сiя чирйисян турун вылö, бокö чапкис аскатайтöм шляпасö. Воск рöма юрыс свиттьöвтiс склянка моз и вöлi ва. Старик кыскис йи сайись чышкöток, малыштiс сiйöн юр вывсис ньылöм дзуллесö. Сэсся шовкнитiс-осьтiс табакерка, судзöтiс чепöльнас табак, пешалiс нырпыссэзас и лöсьöтчис чöскыта несйыны, да эз ешты: кылiс горöтлöм шы.

— Минькаыс кылö локтiс, — шуис старик. — Пажнайтамö öнi.

Деревича кока Миня тшакыльöн тарöвтчис балаган дынсянь и мыйкö чирзiс. А мый — старик эз вежöрт.

— Öка ванзö, бытьтö öшöм, — эз ошкы внучексö дед.

— Морт, мыся, кулöма, морт, — юöртiс зонка, кöр ышки-пойки сувтчис зород бокö. Дзöдзыв кодь лэчыт синоккезас тöдчис повзьöм.

— Кытшöм морт, кытöн? — том прытьöн лэбтiсис старик. — Морт моз висьтав, эн тараторит.

— Этчинка, Турпан лог дорас. Пу увтö шедöма.

— Ок, тюня-параня! Кыдз нö сiя? — досадуйтiс Митрок. — Беда.

Зонка тэрмöтiс дедсö, кыскис сiйö киöттяс, и старик проворнöя иньдöтчис логланьö, нельки вунöтiс босьтны шляпасö. Мунiсö туйтöг, веськыта мырьяинöт. Одзаныс пöлiнясисö кык вуджöр — сажень да аршин. Миня косöйöн видзöтлiс пиньласись вуджöр вылас и берегитчис, мед не тальччыны сы вылö. Бедаыс, натьтö, сiя и эм, вуджöрыс. Прокод тэ сьöрын ветлöтö. Сiйö и видзöт, мед эз кутчы тэ бердö. Луннас даки тыдалö, а вот ойнас...

Митрок думайтiс тожö бедаыс йылiсь. Только мöднёж. Сiйö, бедасö, ордйыны позьö, ежели синтö да пельтö лэчыта видзны, тöдны, мый керсьö одзат и бöрат.

— Кытöн? — юалiс дед.

— Чегöм пусö адззан? Сы увтын.

Старик дзар керис йывтöм ньыв вылö, и быдöс вежöртана лоис. Морт мунiс эта пу бокöт, тöвнырöн нетшкöвтiс сiсь пулiсь йывсö, чегöтiс да брякнитiс улö, кольмöтiс мунiсьсö. Трагедия. Ежели бы сэк локны, может и мездiн бы мортсö смертьыс налькись. А öнi нем ни он кер. Только юöртан гортас, мед дзебисö.

Но морт эшö лолалiс и бледöтöм тырппес мыйкö шамйисö. Может, кыдз часто овлö эттшöм кадö, детина мöдiс горöтчыны меддженыт и меддона кыв — мам? А поди кытсалiс, ежели гöтыра, инькасö, мöдiс сетны сылö медбöрья наказ, мöдiс тшöктыны берегитны челядьсö да не вунöтны пöрись аймамсö.

Деда-внучека чапкисö бокö пу йывсö. Му вылас, кытöн неважын старик ытшкис турун, куйлiс дженытик плаща да кузь сапога тöдтöм мужик. Кин сiя: пастух, нефтеразведчик, ягöдалiсь? Кин бы эз вöв, а морт. Колö мырддьыны сiйö смертьыс киись.

— Видзöт, деда, компас, — шуис Миня. Но дед эз кывзы сiйö.

— Ваок да ма вай... Тöвчикöн!

Митрок сувтiс пидзöс вылас, лэбтiс мортлiсь шапкатöм юрсö. Юрсиыс ва, коколясьöм, дзугсьöма. Кымöс дынас чунь кузя чочком визь — рана. Чегöм улöн зыртыштöма, кульыштöма кучиксö, и юрчашкаыс тыдалö.

«Вон сiя кöда», — казялiс старик вирöсь увсö. Ранаыс косьмöма ни, но Митрок сётаки кöртыштiс сiйö чышкöтокнас. Атшалöм Миня вайис ма туисок да чуманокöн ва. Этö туисоксö мошвидзись тыртiс майскöй взяткаöн и öнöдз эз на осьтлы. Лекарство туйö видзис, меддона гöссез понда берегитiс. Старик дрöжитан киэзнас содтiс чуманокас ма, сетiс дозсö Минялö:

— Кисьт öмас. Да эн пöдты.

Садьтöм морт бытьтö кылiс энö кыввесö и ачыс осьтiс öмсö. Юис горша, дзик баня бöрсянь, но кыдз видзчисисö деда-внучека, эз шыась. И синнэсö эз осьт.

— Врачöс колö, — шушкыштiс Миня.

Митрок чöлiс. Чöлiс да думайтiс. Врачöс... Кысь тэ сiйö часöт ваян? Медматiсь деревняöдз дас верста, а районöдз нёль сыным. Миня самокатсö гортас кольöма. Подöн мунны — ойыс вöтас. И мортыс сымдасö чередь терпитас. Кöть бы председательыс легковушканас кайис. Кöсйисис эд талун да...

— Чу, машина локтö, — висьталiс Миня. — Кылан, деда?

Турпан лог сайын былись кылiс кытшöмкö шум, и сылöн горыс быд секундаöн содiс. Деда-внучека радмисö, да недыр кежö. Вежöртiсö, что эта самолёт, что сiя немöн оз отсав нылö, и öшöтiсö юррезнысö.

— Ок, тюня-параня, — чидiс дед. — Котöрт-ко, Минька, Карин мысö. Может, лесникыс туруналö эшö. Вöлöн коран. Кыдзи абу — деревняö пöльт, бригадирыслö висьтав, ась машина иньдас.

Миня ньöвьёсьöн уськöтчис логас. А небоöт уйис вертолёт. Лэбзис сiя жагöна и лажмыта, ровно смекайтiс кинöскö вöр колассис.

— Вертолёт, деда, вертолёт! — Миня горöтiс дедыслö лог сайсянь. — Пожарник! Макайт, деда, сiя пуксяс!

— Лок бöр, — корис Митрок зонкасö. И кöр Миня вуджис логсö, сетiс сылö вывсис чöвтöм йöрнöссö.

— Макайт, поди казялас.

Но вертолёт сярзис-лэбзис одзлань. Лётчик эз казяв улiсь морттэсö. Деда-внучека бöра жöв керсисö.

— Пожарник, шуан? — юалiс старик. — Пожарник... А ноко котöрт балаганас, спичкаэз босьт и... öзты зородсö.

Зонка эз верит аслас пеллезлö.

— Мы-ый? — юалiс сiя. Дед топнитiс кокнас, горöтiс лöгöн:

— Но, кинлö шуöны?! Öтмöдöрсянь öзты! Вертолёт öшис ни син одзись, кöр вывланьö лэбтiсис перво сьöд тшын, сыбöрын гöрдöтiс зород и нетшкöвтчисö неболань сажённöй бикыввез. Руас пондiс кöвьясьны сотчöм дук, Митрок босьтiс уськöтöм йöрнöссö, бадьöгасис-мунiс пылайтан зородлань. Мунiс и лёка серöм пыр бобгис ныр увтас:

— Бертан, тюня-параня, бертан! Тэ он вермы не бертны. Тэнат должностьыт сэтшöм — пожарник. Сотчы, турунöй, öграв, öграв!

И былись, кыдз только Митрок сибöтчис биöн кутöм зород дынö, вертолёт бöра мыччисис. Старик адззис куран, кышалiс сы бердö йöрнöссö и, дзик флагöн, пондiс öвтны сiйöн юр вевдöрас.

Вертолёт лажмöтчис улöжык, кытшöвтiс шутём вевдöрöт и пуксис Турпан лог дорас. Старик да зонка котöртiсö паныт лётчиклö.

— Кин öзтiс? — лöгöн юалiс лётчик, билань мунiкö.

— Морт доймис, — шуис Митрок. — Кулöмви ни.

Лётчик сувтчис, и Миня висьталiс:

— Операция колö керны...

Лётчик рамжыка ни нёджжöвтiс Миня вылö, йöрнöстöм старик вылö, кöда пельпон вылас знамя моз видзис курансö, юалiс:

— Кытöн сiя?

— Вон тайка, — мыччалiс кинас зонка. — А туруныс асланым, дядя лётчик. Некин сы понда оз вид, — и гажтöма видзöтiс дедыс чужöмö, кöдалö, натьтö, дöнзяс-даки Маля бабсянь.

Доймöм морт сё сiдз жö куйлiс гатш и перыта чашыктiс. Чужöмыс вöлi блед, öтрöма чышкöтокыскöт; син увттэс польдчöмась, лöзöтöмась, дзик покойниклöн.

— Ноко, нöбöтам, — командуйтiс лётчик и лэбтiс мортсö конувттэзöттяс. Деда-внучека кутiсö коккесö. Садьтöм морт небурика ружтыштiс и чуть вöрзьöтiс синкыммезнас. Кабинаись петiс мöдiк лётчик да отсалiс пыртны доймöм мортсö. Ыбöсок пöднассис, и ыджыт сярканыс öдззис куртны-сынны пым русö. Деда-внучека вешшисö бокö, вертолёт лэбтiсис и юрсигусьöн ыскöвтiс вöр сайö.

Старик дыркодь видзöтiс сылань, кытчö лэбзис вертолётыс да вöлись юалiс:

— Кушмансö вайин, Минька?

— Эт кузяö кайöтi, — паськöтыштiс киэсö зоночка.

— Давай ужнайтны пондамö, — шуис Митрок и малыштiс внучекыслiсь быгалöм руд юроксö. — Ок, тюня-параня...

МОРТ ЧУЖИС

Зоя, менам сойö, год-мöд ни олö вöр посёлокын, и кыдз пантасямö, прокод видчö, мыля ме ог вовлы сы ордö гöститны. И медбы мыччавны сылö, что ме важмоз радейта сойöс, босьтi отпуск да и локтi Ташеняс, ны посёлокö. Зоя панталiс менö бура: эз сет и öм осьтны, сразу пуксьöтiс пызан сайö. Сёянсö ваялiс сымда, что некытчö вöлi и пань пуктыны, и ме сiйö эг пукты сэтчöдз, кытчöдз ыджыт бекöрын вöлi нöкьяйöв.

— Давай сёй пöттöдз, — шуис Зоя, — а ме ветла Туськасö кошшыны. — И колис менö öтнамöс. Ме паняси да жугдi юрöс: кин сiя Туськаыс? Поди, нылок ни сойöлöн эм? Али Зоя сiдз жöниксö шуö? Кытсалöны жö мукöд инькаэс ассиныс мужиккезнысö нежнöя, ласкова, кыдз понпиянокöс — Тюлька, Гунька, Путька... И менчим хозяйкаö вежис нёштöм нимöс öння вылö, и лои ме не Семён, а Сюська. Öддьöн небыт, лирическöй ним! Ме сёйи пöттöдз, кыдз тшöктiс сойö, да петi öтöрас. Зоя пырис вороткаö. Сы сьöрö вöтчис дзуток.

— Сеня, — казялiс менö Зоя. — Орсышт Туськаыскöт, а ме шоныт ва петкöта. Миссьöтны колö нятьöсь кульсö. Туплясьöма бöра кыдз Шöма Панько. Менам смех петiс эта сравненнё вылö и юалi:

— Кин сiя сэтшöмыс?

— Шöма Панькоыс? Сосед миян, то эта керкуись. Кыдз юас, сiдз и нятьö водö. Эта сы сьöрья жö, — мыччалiс сойö порсёкыс вылö. — Сылiсь и неби.

Сойö сулалiс уличлань бöрöн и эз казяв, кыдз миян весьтö сувтчис код морт. Сы вылын вöлi гöрд майка, лöз галифе, а коккесö сюйöма венскöй подбора котiэзö. Öт конувтас видзис бутылка вина, а мöдас — то ли небöм, то ли вузавны мöдö — кырныш кодь сьöд курöгöс.

— Кин, шуан, Зоя? — лöгöн юалiс сiя и зыртыштiс оча пинь, бытьтö стекло пазöтiс. Зоя чывкнитiс-бергöтчис сыланьö, мыйкö дырна сулалiс шы не тöв, сэсся нето повзьöм, нето радмöм голосöн нюжöтiс:

— А-а, Панько...

Котiа детина мöдпöв юалiс:

— Дак мый тэ висьталiн?

— А мый кылiн, сiйö и висьталi, — öзйыштiс Зоя. — Любо дак кывзы, эшö висьтала: Шöма Панько моз, мыся, дзутыс туплясьöма. Вежöртiн?

Панько (а эта вöлöма как раз сiя) только öмсö осьтiс да киэсö паськöтiс, ровно мöдiс кыйны миянöс стын сайсяняс. Бутылка буткисис-пуксис му вылас, курöг ляпкöтчис стын бердас.

Зоя пырис керкуас, а мийö сулалiм кодыскöт оча син, нёджжалiм öтамöднымöс. Сiя видзöтiс, кыдз люкасись пороз, кымöс увтсяняс, и поиктiс, дзик баля.

Ме сiйö тöдi. Сылiсь гудыра синнэсö, студень рöма чужöмсö и лöз печата гöрд нырсö эз позь вунöтны. Мийö сыкöт пантасьлiм тöвнас городын. Панько сэк сулалiс колхознöй рынокын и быдыслö вöзйис басöка серöтöм вуруновöй испоткаэз.

— Мыля вузалан? — юалi ме.

— Öштаси, — шуис сiя. — Кöшельöс кытшöмкö öнджа кыскис. Билет вылö кык руб колö.

Кинкö сетiс сылö пятак, кинкö полтина, эшö мымдакö сетiсö, но испоткаэсö некин эз босьт.

Мужик радувьяс вунöтiс и спасибосö висьтавны, котöртiс рынок оградасис да пырис матiсьжык магазинö.

Может, и сiя менö тöдiс талун, но только, кыдз и ме, нем эз шу.

— Кор хозяйкасö, — тшöктiс вдруг Панько и чужйис курöгсö. Повзьöтöм хохлатка готсьöмöн репис-поперегалiс улицасö да стын вевдöрöт пырис огородечö. Курöг готсьöм вылö петiс сойöлöн соседкаыс, тыдалö, Паньколöн иньыс, видзöтiс миян вылö.

— Кытсав Зойкасö! — бöра горöтiс Панько, лэбтiс уськöтöм бутылкасö и шагньöвтiс вороткалань.

Ме повзьыштi — тышкасьны, мыся, кутчас — и кытсöвтi сойöс. Сойö петкöтiс тазöн ва.

— Кылан, Зойка, — шуис Панько, — öнi жö извинитчы!

— Фу, вöлi нужда! — нюмыртiс сойö тырпоккесö. — Ог и думайт!

Дело гардчис, вермис лоны скандал. И медбы эз пет сэтшöмыс, ме чорыта висьталi:

— Извинитчы, Зоя, мортыс одзын!

А Зоя чатыртiс юрсö, тэчис киэсö бокас и бöра шляпкис-висьталiс:

— Сылiсь, кöда порссеслö примерсö мыччалö, корны извиненнё? Смех кутö...

— Дак сiдз?! — рякöстiс Панько и нетшкöвтiс вороткасö. Калич потiс, торрес лыйисö бокö. Ме кватитi сойöлiсь кисö — пышшам, мыся, — но сiя только серöмтчис ме вылö.

— Панько, смерттöм душа! — пондiс горöтлыны Зоялöн соседкаыс. — Тэ бöбмин я мый я, али бöра код?

Панько бергöтчис эта шы вылö и öдззис сярзьыны:

— Мари, тэ кылан? Панькосö мортöн оз лыддьö! Панько пö порсь, Панько пö скöтинася умöльжык! Тэ кылан, инька?

— Кыла, кыла, — сибöтчис сы дынö иньыс. — Лок гортö. Колö лöсьöтчыны туйö. Сэтчин, виль местас, поди, пöран мортас.

— Мы-ый?! — зыкнитiс жöникыс. — Тэ моз петö — ме тожö не морт?

Мари шы эз сет. Сiя копыртчыштiс, кыскис юрсö пельпоннэзас да вешшис бокö. Ме вежöртi, что сiя Паньколö поперёк горöтчыны оз лысьт.

А Зоя тэчис киэсö кадж вылас и сё сiдз жö лёка шыннялiс. Ох, и Зоя!

— Эн пов, Мари, ог вартлы, — дыр мыйись висьталiс Панько. — И некытчö ог мун татiсь.

— Кыдз он мун, Панько? — повзис Мари. — Подъёмнöйез босьтiн, вузасимö... Эн ышты абусö.

— Тэ кылiн, Мари: ог мун. Вайöт порсёксö бöр. Öнi лоис кад дивуйтчыны Зоялö.

— Этö кыдз жö вежöртны — порсёксö бöр? — юалiс сiя. — Кулöмсö могиласис оз чеччöтлö. Да и мыйöн вежтiсян?

— Не тэнат бедаыс, — орöтiс Панько. — А извинитчыны тэныт, Зойка, ковсяс. Ме — морт! Мунам, Мари!

И мунiсö.

— Морт!.. — нерис сiйö Зоя. — Рытöдззас, кытчöдз магазиныс оз оссьы. А сюрас юрат, дак...

Ме грöзитi Зояыслö кулакнам, тшöктi чöвны, а сiя сералiс и горöтлiс Паньколö бöрсяняс:

— Смекайтлы, кытöн пыдынжык гöпыс!

Эна кыввес дзик заваритiсö Панькосö. Сiя пöв кок вылас бергöтчис миянланьö. Чужöмыс вöлi сэтшöм, кöда нем оз кöсйы бурсö. Ме сылi местаам.

— Пыдынжыксö, шуан? — юалiс сiя улица шöрсянь. — То видзöт, — и триньгис бутылканас чöвпан ыжда из кузя. Посудаыс рез-паз паськалiс, вина гывьялiс галялiсь буса вевдöрсö.

Панько пырис гортас, а инькаыс вельдыр сулалiс посуда торрез весьтын: нето жалейтiс весись чапкöм деньгасö, нето думайтiс, мый одзын жугöтiс жöникыс бутылкасö, кöда понда одзжык ловсö готов вöлi пуктыны. Панько эз радейт сiдз ассис зонсö, кыдз винасö, и на тэныт!

Мари öктiс посуда торресö юбка подулас и нöбöтiс гортас. Мийö сойöкöт ниртiмö Туськалiсь боккесö быгья ваöн. Сiя виксiс-чижьялiс кыдз пурт увтын. Зоя видчис, миссьöтiс чожа, но умöля, дзик не ассис. А кöр ме лэдзи Туськасö и сiя петiс осьтöн кольöм вороткаö да тупыльтчис нятя канаваö, сойö серöмтчис:

— Кöсъясис код мужик сэсся не юны... Видзöт, мый керö.

Зоя тэ, Зоя! Кин тэныт сэтшöм лёк кывсö öшöтiс? Важын я шум-гамыс тэ кузя вöлi, а тэ бöра скöтинасö морт вывтi пуктан? Но и морт! Ме гöститны локтi, шоччисьны, госок öктыны и вот на-ко! Первöйся лунсянь содомö сюри. Не, сойиньöй, ме тэныт не гöсь сэсся. Ашын жö лямпаэзöс мавта.

Ме шатласи рытöдззас вöркерас кузя, невна öктыштi озъягöд, купайтчи плотина увдöрись вабергачын. Шондi пуксяндорас бертi сойö ордö. Сэтчö локтiс Валентин, Зоялöн жöникыс, и нуöтiс менö миритчыны Шöма Панькокöт. Сойö откажитчис мунны, и мийö иньдöтчим кыкöн. Валентин баитiс, что Панько мунас татiсь и, конечно, юны оз чапкы: вина гагыс пö сылöн мусас пукалö. И öнi пö, натьтö, öксисö сы ордö Голюк Öндрей да сылöн ёрттэс и лоасö радöсь, кöр Валентин сувтöтас ны одзö ассис бутылкаэсö.

Панькоöс мийö застанитiмö ёрттэзтöг и садьöн. Сiя кыскалiс ящиккезö да мешöккезö тэчöм багажсö; иньыс вочис кеписсез да кывзiс Паньколiсь прибауткаэз; старуха-мам сулалiс пидзöс вылас киот одзын и енлö тэчис земнöй поклоннэз сы понда, что сiя кылiс пöрись мортлiсь кеймисян кыввесö и сетiс зоныслö морт вежöрсö.

Мийö Валентинкöт урсалiмö быдса час, но винасö, кöдö вайимö сьöраным, бöр нöбöтiмö гортö. Миритчöмись нем эз пет.

Ашынас ме прощайтчи Валентин гозъякöт да бертi гортö.

* * *

Виль год панытö ме вились сюри Ташеньö. Посёлокö локтi сёрöн ни. Школа да лесопункт контора весьтын бипурöн öгралiсö ыджыт звездаэз, öтi-мöдiлаын, пемытiнас, шовкöтiсö флаггез. Клубын вынтiсьöмöн орсiс музыка.

Ташень панталiс виль год, кольлалiс важсö.

Ылöстöм погоддя сiдз падеритiс, что тыртiс быдöс туйесö, йöртiс не только машинаэз, но и вöввесö. Ме öдва-öдва кысси магазин дынöдз и пукси поспу вылас, мед шоччöтыштны тувдöм коккезöс, и сразу жö, тыдалö, пондi сунасьны. Сэк жö локтiс вöт, но сiйö дзугис кытшöмкö морт, кöда треситiс менö пельпонöттям. Ме лэбтi юрöс: одзам сулалiс кузь пальтоа мужик. Сос вылас, гырдзза вевдöрас, вöлi кышалöма гöрд кöртöт — дружинник, тыдалö.

— Öтöрас, ёртöй, оз ков узьны, — велöтiс сiя. — Верман кынмавны, а то и век кежö ланьтны.

Сiя юасяс, кытiсь ме и кытчö видза туй, да отсалiс меным лэбтiсьны и мыччалiс туй контораö: сэтчин пö и узьны позяс.

— Менам сой татöн олö, — висьталi ме.

— Кин?

— Зоя Понорова.

— А-а, дак тэ ― Семён Васильевич? Видзöт-ко, эг и тöд эд!.. А ме Шöма Панько кöркö вöвлi... Но, виль годöн нö, ёртöй! — гажöна горöтчис Панько и крепыта шамыртiс менчим киöс. Сiя сулалiс кеписьтöг, но киэс вöлiсö сэтшöм шонытöсь, бытьтö нiйö часöт только кыскöма дзирыт ваись, и ме эг тэрмась лэдзны аслам гöжöм кырымись сылiсь пым чуннесö: радейта жмитны бур мортлiсь кисö. А что ме одзын сулалiс бур морт, эз вöв некытшöм сомненнё: öткö, отсалö тöдтöм мортлö, мöдкö, — дружинник, куимöткö... «А может, не сiдз да?» — вдруг пырис юрам мöдiк дума, и ме лэдзи кырымсим пым чуннесö. Панько дзик вежöртiс, мый ме думайта сы йылiсь, надза рочалыштiс пельняннез сёйны да вискыртiс лымöн пырзьöтöм туй кузя клубланьö.

Ме ляшмасьöмöн кысси сойö ордöдз и первöйся жö брага кружка бöрсянь юалi:

— Но мый, сойö: ковсис сёдаки извинитчыны Панькоыс одзын?

— Эз ковсьы, — шуис Зоя.

— Кыдз сiдз! Разь Панькоыс сё винаыскöт тöдчö?

— Юнытö дугдiс, но, ме шуа, не сысянь, что кыв сетiс не юны, — юöртiс сiя и висьтасис то мый.

Мунас Панько кыдзкö тшакьявны Сёй керöсö. А сэтчин эм пыдын яма. Эта яма йылiсь Ташеньын висьтасьлiсö сякöйсö, но некин эз тöд, мыйсянь сiя аркмис, öтiккез шуисö, что сiйö гарйöма чарньöв: сöтöма гымалiкö керöсас и писькöтöма мусö сьöлöмöсöдззас. Мöдiккез баитöны, что сiйö отир гарйöмась, чудскöй клад кошшöмась. А куимöттэз этö ямасö шуöны вöрисьыс гуöн. Панько кывлöма жö сы йылiсь, но абу на адззывлöм и, кöр инмöма сы дынö тшакьялiкас, мöдöма видзöтны да и берездасьöма сэтчин. А ямаыс сажень сизим пыдына и крут дора, петны оз туй. Горöтлас голосыс быртöдз, некин оз лок, да и лöньсяс.

Вот сэк и пырас юрас берсяыс, пондас Панько жалейтны, мыля сiя одзжык олiс ылöстöма, весись чапкасис оланöн сетöм кадöн, сотiс ассис вынсö, здоровьесö, пöрисьтiс мамсö, иньсö.

Думайтiс Панько, что сылöн кузь эшö векыс — сорок год вöлись олö — и ештас керыштны ассис уджсö, и пируйтöм понда кадыс тырмас. А видзöт, кыдз петö... Тöн тай небис и пондöтiс лыддьöтны книга — первöйö школа кончитöм бöрын — и то, может, весь небис.

Чулалас ой, пондöтчас мöдiк лун, а тшакьялiсьыс абу. Но, раз морт öшис, кошшыны кутчасö. Джын Ташеньыс вöрас мунас. Куимöт лунас кинкö корзина вылас петас да вöлись и кыскасö Панькосö чуть ловьяöс.

И вежöртас Панько: ежели йöзыс сы понда бурö керöны, дак мыля сiя пондас нылö паныт мунны, тшыкöтны нылiсь олансö, гажсö дзугны? Вот и дугдас юны.

Сiдз сойö шуö.

Может, и забыль сiдз. Но кыдз бы эз вöв, а дугдiс — вот мый главнöйыс.

Ме тшöктi сойöс вайны серебрянöй кружкаок, кöдаись миян увтырын ювлöны только «каша» коста, и тыртi сiйö винаöн...

ДЯВПУ

Сiя мортыс, кöда йылiсь ме мöда висьтасьны, абу ни, но отирас öнöдз олö сылöн говкыс. Олö сiя кöть и не сiдз паськыта, но джын районыс сы йылiсь тöдö. А ежели сiдз, то позьö шуны, что сiя эз вöв учöт морт, а сэтшöм мортыс йылiсь колö тöдны быдыслö. Да только я сэтшöмыс йылiсь? Меным охота тöдны каждöйыс йылiсь: и сы йылiсь, кöда беддясьöмöн кыссьö менам öшын увтöт, и сы йылiсь, кöда туй вылас, самöй бусас, керöма йöроккез да пöв кок вылас чеччалö Европасянь сразу Америкаöдз, и сы йылiсь, кöда неважын лоис Геройöн, и сы йылiсь, кöда тöн петiс тюрьмаись. Охота сiйöн, мыля быд мортыс — ассяма торья мир, ыджыт мир.

Дак вот, олiс Öгап Онтон, вöр сторож.

Сыкöт ме пантаси гожся кадö.

Вöлi эшö одз асыв, и вöрыс бытьтö вöлись саймöма да нюжласьö сьöкыт он бöрсянь: то ньыв вöрзьöтас ёся йывнас, то кöз макнитас öшöтчöм улöн, то паськыт кыдз павкнитчас личыт чикиссезнас.

Ме мунi лöня, жагвыв, медбы не мешайтны вöрись олiссезлö. Но менö сёравно кылiсö и пышшисö менам туй вылiсь бабыввез, шыррез, дзöдзыввез, лöга пышкайтiс ордан.

Вöрыс эстöн том да шоч, эмöсь уна важ керассэз. Эна кушиннэзын и быдмö озъягöдыс, кöда понда ме чеччи талун одзжык да лунтыр кежö коли буса городсö.

Мöйму эна местаэзiсь уна и ягöд ваялi. Лог дорын эм гривка, дак сэтöн сымда ягöдыс, что туруныс гöрдвевья тыдалö. Колö бы лоны и таво — цветитiс шоныт кадö, а ой тöв сэтчö оз сюр и эз вермы тшыкöтны цветсö.

Расокись расокö, кушинiсь кушинö — и вот ме матын ни сiя гривка дын. Вдруг кыла кытшöмкö шовкöтöм. Сiдз борддэзöн вартсьöны тышкасись петуххез. Поди, петуххез тышкасьöны? Колö видзöтны, может, и матö сибöтасö... Кысся гусясьöмöн, дзик гырскöтчись шыр дынö кань. А шовкöтöмыс лöнис. Неужто кылiсö да пышшисö? Да не, шоччисьöны, натьтö. Сувтi и ме. Кывлi жö вöралiссеслiсь: кöр кайыс чöлö, и тэ чöв.

Чулалiс минута-мöд, а виль шовкöтöмыс эз кыв. Конечно, повзьöтi и сулавны нем. Мунi одзлань, видзок дорö петыштi. Видзокыс йöрйöма лажмытик-лажмытик йöрокöн. Да йöр я эта? Öддьöнжыксö вачкисьö дöмöт вылö: керöма лыссэзiсь и колялöма колассэз, кытшöмöсь дöмöтын колялöны мордаэз понда. Мыйлö бы этö? Поди, челядь орсiсö? Вон и песок резöмась.

Сай дорсис, йöр колассис, адззи руд кайöс. Натьтö, кайварыш, сэтшöм сераэс нiя. Но мыля сiя сэтöн валяйтчö? Может, сiя и тышкасис кинкöткö, а не вöрпетуххез? Кин тöдö.

Босьтi кайсö, мыся, гортö лэдзчöта да борддэсö стена вылö паськöта, бытьтö вöралiсь жö. Пуктi корзинаöс, босьтыштi бы кайсö, а сiя эз босьтсьы, кытчöкö кышасьöма. Видзöтi бытшöмика, вежöртi: петляö сюрöма, как раз юрнас. Сiдзкö, эта варышыс и шовкöтiс, эшö неважын сiя вöлi ловья.

Лоис быдöс вежöртана: и лысовöй йöрданыс, и колассэс сылöн, и коялöм песокыс. Кинкö эстöн кыйсьö си дзуггезöн. Сиыс неöтпöвса, путшкöм, и петляэс ёнöсь, крепытöсь.

Мездöтi кайсö, босьтi корзинаöс да сулала тыра киэзнам, кыдз базарын инька, думайта, мый керны кайнас: кольны этчö — руч гусялас; босьтны сьöрö — новйöтчыны ог любит. Ладно, мыся, ме сiйö шор дорас, кöдзытiнас, дзеба, а сыбöрын босьта, öкта ягöдсö да. Только невна и муныштi — морт пантасис. Сiя вöлi старик ни, но эшö крепыт высина и гöрд чужöма; пасьтасьöма öннямоз: сапога, плаща, шляпаа. Сивьяс öшалiс пестер, а коскас летъялiс чер — меным тыдалiс оропыс.

Старик весöтiс нырсö, лöсьöтыштiс шляпасö и сувтчис неылö ме дынсянь. Сэк вöлись казялi, что мортыт не сымда гöрд чужöма, мымда гöрд гöна: важын ни бритчытöм, дженытик, но сук тошокыс вевттьöма чисто рожабаннэсö.

— Дак яёк, шуан, заптам? — рам голосöн юалiс сiя.

— Тэ кин йылiсь, дед, баитан?

— Тэ йылiсь, начальник! Тэнö только яйнас адзза. А законсö тöдан?

— Кытшöм яй? Кытшöм закон?

— Кöр вештан штрафсö, дак пондан тöдны, — сё сiдз жö рамыника да нюжвыла баитiс старикыс.

— Мый понда, дед, штрафсö?

— Тарыс понда, кöдö киат видзан.

— Эта разь тар?

— Не, не тар — рака сiя! — шынньöвтiс старикыс да дивуйтчöмöн горöтчис: — Но арти-ис! Видзöт-ко, сiя оз и тöд, кинöс кыйö! Чöв, пондан тöдны, кульыштасö тридцаткасö дак.

Адзза, сiя серьёзнöя баитö, и ме лöгöнмоз ни юалi:

— Кин тэ сэтшöмыс, что штрафуйтан бы?

— Ме эта вöрын кöзяин. И охотничöй инспектор.

— А тöдан я, кöзяин и инспектор, кин ме?

— Тöда: таркыйись, — спокойнöя висьталiс старик.

— Ме эг кый сiйö, а адззи кулöмöн. Ме корреспондент, вот видзöт, — мыччи сылö ассим удостовереннё. Сiя босьтiс, дыркодь лыддьöтiс, мый сэтчö гижöма, шуис:

— Не только тэ коддес, ёрт Туганов, а и ыджытжыккес шыралöны. Неважын öтiк следователь шедлiс. Тожö перво чирзiс, чуть синнэзам эз сьöлав, а сыбöрын вежöртчис. Тожно и керсим... На сёртоктö.

— Ах, вон кыдз! Может, и месянь мыйкö видзчисян? Нем оз пет!

Шупки таржугсö сы коккез увтö, босьтi удостовереннёöс да мунi эта лёк морт дынсянь. А сiя сiдз жö спокойнöя, кыдз и одзжык, кольлалiс менö рам басниокöн:

— А тэ эн тэрмась, начальник, эн тэрмась. Думайтышт перво, а ме видзчися невнасö. Кыдзи ковсяс — хуторас локтан. Но ежели тово... кутчан мекöт вермасьны, дак сiдз верма шонтны — нельки иньытлö жарöв лоас. Кылан, Туганов?

Ме не только шыасьны — и бöрам эг дзарнит. Вунöтi и ягöдыс йылiсь, и гажа вöрыс йылiсь, и туйыс йылiсь — мунi кытчö инми. Мунi да видi охотинспекциясö, кöдалö служитö эта гудыра сьöлöма мортыс, видi сiйö кокнит ума следовательсö, кöда вузалöма совестьсö да небöма лöнь олан. Конечно жö, колас гижны статья, кытöн лоас висьталöма быдсöн эта нёштöм история йылiсь да нiя нечöскыт дука отир йылiсь, киннэз тшыкöтöны сöстöм русö, кöдöн лолалöны честнöй отир.

Понуль увтiсь быркнитiс-лэбтiсис ыджыт кай, тыдалö, сьöла, да уйыштiс пуэс коласö. Ме дзарнитi, сувтчи. Мылякö думайтi, что менö повзьöтiс старикыс. Гöгöр нёджжаси — абу некин. Видзöтi часы вылö — дасöт час ни. Эта старик кузя быдса час öштi. А мымда бы сы коста ягöдсö öктi!

Лог дорись гривка вылас эг мун — сэтчин вермис бöра пантасьны старикыс. Петi куреньö. Кöть и не öддьöн ягöда местаыс, а öктiсьны позьö. Да вот мыйкö öктiссис дышöла, чожа мыдзи. Этö, öткö, жарсяняс, мöдкö, старикыс повзьöтлöмсянь. Умöль сiя морт. И сюйыштiс жö сiйö вöрисьыс менам туй вылö! Мöдi эд важ туй кузяс пырны, да мылякö инми виль вылöттяс. Конечно, нем умöльсö меным сiя оз кер, но сёжö... Кывсяс начальстволö, гуддисьны пондасö, кыдз да мыля сюри вöрас, кöр колiс меным талун Гайнаын лоны. Вермасö зарплатаись кольны, а деньгаыс не сiдз кыза шедö. Костюм понда джынсö вöлись вештi, а иньö важын ни холодильник корö. А ежели штрафуйтасö кыдз браконьерöс? Тарнас эд менö кутiсö. Может, былись сiя, вöр лешакыс, сэтшöм.

Думайтi-кери и локтi думанам сэтчöдз, что колö адззывны Öгап Онтонсö. Да, колö. И ме мунi Кыквöрколасö, кытöн сулалiс öтка важ керку, ровно видз дорö ендöм öтка турунъюр.

Онтон менö панталiс посöдзас. Панталiс кыдз важся тöдсаöс, пыртiс керкуас. Ме пондылi пыксьыны, эг мöд пырны, но сiя корис, и колiс пырны.

— Бур басниыс овлö только пызан сайын, — баитiс сiя пырикас, — а гуй вылас только поннэз баитчöны. Тэ учёнöй морт и начальник. А начальниксö колö дзоньтыны. Радейта начальствосö, кыдз айöс.

Öгап пиян удiс меным кöдзыт ырöш. Юи. Ырöшыс чöскыт: абу шöма, абу курыт тагья, но майöлыс кылiс. Видно, не сэтшöм старикыт, кыдз ме сы йылiсь думайтi. Умöль мортыс гортас эз бы, натьтö, пырт, эз бы понды юктасьны.

Пондöтi басни:

— Дак вот... ог тöд, кыдз величайтöны тэнö... локтi.

— Величайт менö Онтон Провичöн. Но чöв, некöр эшö. Вот гуö пырала да вöлись.

Мунiс сiя, колис. менö туис дорас.

Онтон керкусянь, видзöт кöть кытшöм öшынö, тыдалö сё вöр, вöр да вöр. Ойланьсяняс вöрыс локтöма карта бердöдз; рытвыв ладорас нюжöтчöма непаськыт лог, и вöрыс пондöтчö сы сайсянь. Мöд боккезас вöрыс ылынжык: керку дынсяняс мунö ыджыт кушин. Эта кушиныс — и ыб, и видз, и огородеч. Сэтöн быдмö зöр, клеверсора тимофеевка, картов, капуста да мöдiк посни карч.

— Тайга, гöгöр тайга, — висьталi ме хозяиныслö, кöр сiя пырис. Онтон юалiс:

— Кытöн сiя, тайгаыс?

— А то тай — öшын увтат.

Хозяин рыз-рыз серöмтчис да висьталiс:

— Эта, Туганов, тайгаыслöн только кевья. Вон сэтчин бытшöммес эмöсь пу-мöд, — сiя мыччалiс рытланяс, — эта расын — нöш немись керны, а лог дорас öтiк рос шать быдмö.

— Сётаки вöр...

— Вöрыс Нырыбын — вот кытöн. Пыран вöрас — шондiыс оз тыдав.

— Тэ олiн сэтчин?

— Не олi, а видзисö. Иган сайын.

— Мый понда?

— Медбы эг вомдзась. Дона товарсö эд берегитöны öддьöнжык, куим пöдан сайö дзимлялöны, — серьёзнöя висьталiс Онтон. — Но, любуйтчышт эшö тайганат, а ме муна кöчöс высьтышта, тожно и баитам.

Бöра кольччи öтнам, бöра нёджжала öтöрсö. Любо видзöтны: гöгöр зелень — син шоччисьö. Эстöн не город, кытöн сулалöны öткодь виль керкуэз, дзик коробкаэз, и синлö нем бердö кышасьны. Эстöн — природа, и видзöт сiйö кöть неделя, синбур немымда сысянь оз мыдз, а только югмö.

Дбруньгыштiс дбруньгаг да люкалiс öшынсö, берездасис улö. Мыля сiя люкасис? Видно, жугалiс беднöйкалöн локаторыс, и сiя öнi лэбалö, кыдз синтöм. Пиньöвтас öнi юрсö, сiдз и тöд... Уна, батя, ловья душаыслö быдкодь йöрыс, быдкодь дöмöтыс гöрдззöм! Вот люкасян этадз — и мургыльтан сивилёнтö. Али налькö шедан.

Дбруньгагыс абу усьöма. Сiя ештiс, видно, кутчисьны стена бердö и öнi мунö стекло кузяс. А меным кажитчö, что этö броддьö-мунö ыб кузяс ыджыт зверь. Вот сiя поперегалiс кушинсö, лэбтiсис вöр вевдöрас, пондiс кыссьыны пу йыввес кузя. Лöзöв-сьöд, сiя свиттялiс шондi югöр увтас дона из рöмöн и вöлi öддьöн ыджыт да страшнöй, ровно кытшöмкö фантастическöй чудовище. Брр! Ме куни синнэзöс... А кöр осьтi, гагыс туйö казялi мортöс — сiя вöлi пестрединнöй йöрнöса, ременя, идзасовöй шляпаа, донтöмик вешьяна, но дона туфлиа, кытшöмöсь новйöны кыз кармана отир. Кисой вылас сылöн öшалiс зелёнöй вельветовöй пиджак да веж зонтик. Быльнöй али ме кодь жö гöсь? Может... не, эта абу следователь.

Вот сiя пырис керкуö, öшöтiс порогувтас, кузь пуовöй тув вылö, пиджаксö, зонтсö и шляпасö, сыналыштiс юрсö да басöка гöгрöстöм тошоксö, вöлись здоровайтчис мекöт, босьтiс пызан вывсис туиссö и пондiс горша юны. Юис, чышьянокöн лапкöтыштiс öм гöгöрсö, кымöссö, пельбоккесö, голясö.

— Кружка юа, кык кружка ньылöм кисьта, — некыз, но гора голосöн висьталiс локтiсьыс да сэк жö юалiс: — Кытöн Онтоныс?

— Кытчöкö петыштiс тай.

— А-а. Но, локтас инö... Тэ кин сылö лоан?

— Просто тöдса.

— Городiсь?

— Сэтчинiсь.

— Кытöн уджалан?

— Журналист. Неважын локтi, институт бöрсянь.

— А ме скоморох. Кывлiн, поди, кыдз сьылöны; «Скоморох ходил по улице» — дак сiйö ме йылiсь, сiдз кыдз театрас ог ни уджав. А шуöны менö Радомир Изотович Шулетов. Онтоныс менам ёрт. Пуд сов сыкöт сёйим, да эшö уна дубöн, совтöг, вердiсö.

Эг вежöрт, юася:

— Этö кöр сiдз? Фронт вылын, натьтö?

— Да... Нырыбскöй направленнёын. — гажöн шуис Шулетов и чöвтiс йöрнöссö — кольччис öтiк майкаöн.

— Нырыбскöй? — дивуйтчыштi ме. — Этö...

— Этö Кама дорын сэтшöмыс, мöдiк фронт. Чуть эг кув сэтчин. Онтоныс смертьсис мездiс. Уважайт сiйö — добрöй морт старикыт. Вон видзöт, кытшöм пукалö — дзик министр, — Шулетов мыччалiс пызан весьтiсь стена вылö, кытöн öшалiс неыджыт портрет, мöдöтöм узöра чышкöтö. Портретыс басöк, рисуйтöма югыт рöма краскаэзöн. Но не алöй йöрнöсыс, не ыджыт зелёнöй картузыс, не паськыт пöт чужöмыс вöрзьöтiс менчим сьöлöмöс, а сылöн ёся синнэс: нiя вöлiсö горшöсь, пöттöмöсь, ныын югьялiс йыа югöр...

— Сэтшöммес етша ни кольччисö. Позьö висьтавны — феномен. Сiдз эд? — ошкö Онтонсö артист.

— Ме умöля сiйö тöда.

— Ö-ö, кыдз но этö сiдз! Сiя — спартанец, сiя — öння Христос! Сiйö быдöс районыс тöдö, а тэ, газетчик, он тöд!

— Да кыдзкö тай эг инмы одзжык пантасьны, — извиняйтчöмöн бобошита ме. — И наградаэз сылöн эмöсь?

— Эмöсь, дона, эмöсь. Одзсяняс и бöрсяняс лякисö... Охота тöдны, кыдз сiя олансö ассис олiс, дак кывзы, — шуис Шулетов и сэк жö пондöтiс кузь басни.

Ме öнi вунöтчи ни öтi-мöдi эта висьтасьöмись, да сiя абу беда: вунöтсьö сэтшöмыс, кöда мортыслö оз ков, кöда оз отсав миянлö немöн. Да и кöдö тöда, ог понды быдöс висьтасьны — немлö. Былись, мыйлö тiянлö тöдны сы томся кад йылiсь, сы семья йылiсь? Мый сэтiсь содас, ежели ме висьтала, что витгодся Онтонкаöс чапкисö аймамыс, кöр пондiсö пышшыны Колчаккöт? Разь мыйкö эм интереснöйыс сэтöн, что Öгап пиянöс быдтас монашка, а сыбöрын гöтралас сиротакöт? Ме тöда, Онтон эта бöрсянь эшö размöд гöтрасьлiс, но иннес сы ордын эз видзсьö — видно, женскöйыслö сы керкуын не горт. Меддырсö олiс Олёшовна, Онтоныс кодь жö кыз да гöрд инька, но сэк Öгап пияныс гортас эз вöв — пукалiс. И вель дыр пукалiс — сы коста и войнаыс чулалiс. Кöть и висьталас кин сы йылiсь: «Сякöйсö адззылiс, грешнöй, — и тюрьмасö, и войнасö» — эд веритö эталö: адззылöма сiя только öтсö. Может, сiя «öтыс» и не кокнитжык мöдысся вöлi, но сёжö... Дак колö я сэтшöмсö тöдны? Ме думайтa, немлö миянлö гуддисьны важ оланас. Миянлö колöжык тöдны сы медбöрья олан йылiсь, сы йылiсь, мый пизис сы моросын да пусис сы дзормöм юрын сiя гожумö, кöр ме тöдсаси сыкöт.

Вот пырис Онтон. Киас видзис бутыль, каттьыштöм вывтсис чöвтöм йöрнöсас. Ежели бы не гöна чужöмыс да кымöс вывсис пыдын чукыррес, сетiн бы сылö сорок год, а не шестьдесят: жаритчöм моросыс заслонка пасьта да мылькйöн кайöм, кынöмыс сельница кодь, но оз öшав лёк яйöн, кисойес пöльтчöмась, дзик кыз быгрöтчаннэз.

— Отелло, чистöй Отелло! — горöтчыштiс Шулетов и шовкнитiс кывнас. — Но и Онтонко — сё томмö!

— Тело? Телоö эм, — шынньöвтiс сылö паныт хозяиныс да жагвыв сувтöтiс бутыльсö (ме вежöртi, мый сэтöн — самогон) пызан сайись лабичö, пондiс пасьтавны йöрнöссö. — И пиннезö эшö эмöсь, и кудриэз эмöсь, и быдöс эм! А быдöс эм — пöрисьмыны немлö... Но, здорово нö, Шулетко, здорово, вонöй! — Онтон перво зэгнитiс гöсьыслiсь кисö, сэсся зэлöтiс сылiсь юрсö морос бердас, гыпкис-вачкис кулакнас спина кузяс. — А тэ, Шулет, пöрисьмöмыт, кöть и кокнита олан.

— Тэ мыйкö соралан, Онтонко: ме — кокнита сёя, а ола — сьöкыта. Игнассьыны мöдö занавесö, — отвечайтiс гöсьыс да пуксис лабичö.

— Но, эн и баит тэ сiйö, — шуö Онтон. — Гöтрасьны тэныт колö, Шулет, гöтрасьны!

— Пустöй басни! — ыш ловзисис Шулетов. — Мöдiкöс сэтшöмсö, кыдз покойница Лидица вöлi, он ни пантав.

— Сэтшöмыс абу, а буржыкыс эм.

Артист нем эз висьтав, только бöра сьöкыта ловзисис да юалiс:

— А кыдз дявпуыт? Кынöмыс эз на пот?

— Но, сiя потас, дак и меным колö потны эд!

Ме нем эг вежöрт ны басниись и юалi, кытшöм сэтшöм дявпу нылöн эм. Онтон висьталiс:

— Кила менам вöлi, и сiйö колдун лэдзис да кöрталiс кöзок бердö, мекöт öтiк годся бердö. Сiя öнi менам орт. Кераласö сiйö — и ме лёкшöрта.

Шулетов горöтчис:

— Тэ, хозяин, вунöтiн бур правило: перво верд гöсьтö, сэсся юктав, а вöлись сказка висьтав.

Онтон осьтiс öшын, вöйыш керис öтöрас, горöтiс:

— Тэ мый сы дырнасö, Оньки? Эн я онмöссьы? Паныт сылö некин эз шыась, но сэк жö дзуркнитiс

посöдз, и керкуö кыш-паш пырыштiс лапыт мыгöра инька — гöгрöса чужöма, паськыт ныра и векнитик, дзик пурт йылöн чиркнитöм-поткöтыштöм, синока. Сiя вöлi веж кофтаа, уна клинья сьöд юбкаа, гöрд чышьяна, но кöмтöм.

— Здравствуй, Анисья Петровна, — порог дорын панталiс сiйö Шулетов да босьтiс сы киись пöв-поднос, кöда вылын сулалiсö кык бекöр, куйлiсö пуовöй паннез, пурт, симöтовöй совдоз, кык ярушник.

— Локтан здоров, — шуис хозяйка. — Ачым бы эд верми...

— Мый вайин? — юалiс жöникыс.

— Мый тшöктiн — кушман да сола тшак.

— Яйсö эшö вай.

— Эз на пусьы да.

— Кöдзытсö перво, а пымсö сыбöрын.

Öнись бöр петiс öтöрö, а мийö пуксим пызан сайö. Онтон шöралiс нянь, сэсся стаканö кисьтiс самогон, горöтчис:

— Талун виль кöчöс высьтi, дак ог тöд, сук я.

— Мед йöла вöлi, а сукыс оз ков. Да эз тэчкась бы, — шуис Шулетов.

— Йöла. И рам, — ошшасис хозяиныс. — Öтiк студент керис... Стрась ни чожа пизьö, öддьöн и бур... Но, пешлышта инö. — Пöрöтiс быдöс, пуктiс стакансö, тюкöтыштiс чуньнас кавтыкас и паньыштiс кушман. — Ай да виль кöч! Бу-ур! — Малалыштiс кынöмсö, чапкис öмас тшак тор, вились тыртiс стакансö самогонöн да удiс дона гöсьыслö.

— Юам Войпельыс понда, кöда иньдалö миянлö йöла кöччесö, — висьталiс Шулетов да воть-мöд вотьыштiс стакансис пызан вылас. — Юышт миянкöт и тэ, добрöй коми ен.

Шулетовлö тожö гленитчис винаыс. А меным — эз: дука и пагыра.

Öнись вайис пуовöй тарелка, сэтöн вöлi кöдзыт яй. Вöлi уна и быдöс чиг, видно, мöсовöй. Пöжассьöм чöскыта, но кöсöв и джагыт.

— Мöсöс я мый я начкылiт? — юалi ме.

— Босьтiм, Туганов, босьтiм, — шуис Онтон.

— Вöрисьыслiсь öтiк öшка небимö, — серöмтчис Шулетов. — Чур, некытöн не лёбны!

— Тэныт бы, Шулетко, тожö колiс чöвны, да ладно, — висьталiс Онтон. — Тугановыслöн бöжыс тожö лякöсь.

Хозяйка вайис жаровня, кöдаын пышкайтiс госа яй. Яйсис кайис сэтшöм чöскыт дук, что менам мороспань увтам пондiс сöскыны, кыдз тшыгсянь.

— Дак ыжмавлан жö, журналист? — юалiс Шулетов менчим, но ме туйö ответитiс Онтон:

— Талун тарöн шедiс.

— Дак сiя былись тар вöлi али тэ сё ме вылын сералан? — юалi ме.

— Вот сылö и баит! — горöтыштiс Онтон. — Быль эд, тыдалö, тiян кодьöмыслö что руч, что кöч — сё öткодь!

— Но, бöра и сё öткодь, — öбидитчыштiс моз Шулетов. — Кор юан, колö буржыка сёйны, сэк кылыт оз понды шыблявны.

— Кыдзкö татöн художник олiс... Эта сылöн уджыс, — Онтон чеччылiс да лöсьöтыштiс чышкöтсö, кöда унаöв сайöвтiс портретсö — Колö бы, шуö, мöсöс рисуйтны... Сэк мöс да и пороз видзи. Но рисуйт, мыся, охота кö, менам мöсокö уна йöла, бытшöм... Вот сэсся корö дынас, висьтав пö, кыдз рисуйтöмыс петiс. Адзза: басöка керöма — дзик кöр сулалö, только сюррес вожтöмöсь. А улын гижöма: «Уна йöла мöс». Мый, мыся, сэтчö гижин? Мыля мый пö — мöс. Да сiя, мыся, пороз эд! Ха-ха-ха! Сiдз жö и Тугановыт: варыш пö, деда, шедöма... То сiя варышыт — сёй! Сэтшöм варыштö городат пукавтöн некöр он адззыв.

Ме пельдöтi ыджыт тор, сёйи. Кöть и шуöны тар яйыс курöглöн кодь, а не сiдз — сiя чорытжык и турун дука.

— Дак тэ быль ме вылö думайтан, Онтон Прович? — пондöтi ме басниöс, медбы чожжыка мездöтчыны эта керкуись.

Онтон жунгыльтiс жаритöм тарыслiсь голясö, пондiс вильöтны сiйö. Госыс вотялiс пызан вылас, котöртiс чуннес кузя, лякалiс гöрд тошокас, а сiя янсöтлiс сюрги бöрсянь сюрги, чöскыта чупкис-нималiс нiйö и чапкалiс пызан увтö — каньлö.

— Ме тай тэнö панталi кайнас, — висьталiс Онтон. — А начальство меным сiдз шуис: кинöс кутан пö, гиж акт да вай миян дынö.

— Тэ эд адззан, ме абу вöралiсь и некöр сэтшöм делоыс бердö ог кутчы. Да и тöда: гожумнас оз туй вöравны.

— Оз туй, а кыйсьöны.

— Чапкы сiйö баснисö, Онтонко, — советуйтiс Шулепов. — Быдöнным мийö морттэз — и сiя, и тэ, и ме и — быдöннымлöн и пиннез эмöсь, и кынöм, и горш. Нельки миян виль ёртнымлöн.

— Мый и баитны — эмöсь, — висьталiс Онтон. — Но и законнэз эмöсь... Радейта закон, радейта порядок. Повзьöтлыны эд колö жö.

— А не тэнат я, Онтон Прович, нiя кыйсяннэт? — эг понды сэсся чуклясьны ме. — Кин, поди, чужöйыс тэнат ныр увтö керас.

— Может, менам, может, и не, а яйсö ме сёя, — чарöтiс-висьталiс Онтон да чайдöтiс тар коксö.

— Дак кыдз инö сiдз, — дивуйтчи ме, — йöзсö штрафуйтан, а ачыт кыйсян?

— Йöз — этö йöз, а ме — этö ачым, — коскасö вильöтiкö мурзис Онтон. — Ме — кöзяин, меным — туйö. А йöзыс — эн пыр!

— Ме ог вежöрт: сторож, инспектор и — браконьер?

— Кöр ме пишальтöг — сторож, кыдз пишаль киам босьтi — вöралiсь. Пантасяс зверь — ог понды думайтны, туйö оз.

— Но законыс, кöда йылiсь баитан тэ, законыс! — пизя ме.

— А мый законыс? — спокойнöя баитö Онтон.— Кин кöзяин, сылöн и закон. Вот сiдз ме вежöрта олансö. Кин ылöжык судзöтчас, сылö унажык шедас. Али не сiдз?

— Браво, Онтонко, браво! — öзйыштiс Шулетов и шовкöтыштiс чунь йыввезнас долонь пыдöсас. — Но и Отелло! Театрö бы тэнö али сельсоветö... Ноко сунгам эшö öтiкöн.

— Сiйö позьö, — гаж кылöн горöтчис Онтон. — Вон эшö мымда! — Кисьтiс, юис джынсö, мöд джынсö сетiс ёртыслö. — А сельсоветат менö гезöн он кыскы. Висьтала, ог суськы: сельсоветыт менам то кытöн пукалö,— Онтон нюжöтiс кисö, тюкöтыштiс чуньнас кырым пыдöсас и шамыртiс чуннесö. — Не-э, меным эстöн бур. Эсся меным нем оз ков. Ме кодь оланыс татöн некинлöн абу. Яйöн — горшви пöт, тöв и гожум свежöйö сёя... Менчим полöны, менö кывзöны.

— Мöс колö тэныт видзны, — шуис Шулетов.

— Да мыйлö сiйö меным, Шулет? — дивуйтчöмöн юалiс хозяин и горöн серöмтчис. — Меным масö и висö вайöны. Вöв — колö. И видза вöвсö. Эшö поннэзöс видза.

— Ö-ö, мый поныссянь! — макнитiс чочком кинас Шулетов. — А вöлi бы мöс — рытнас парнöй йöлок, асывнас — кöдзытö али кефир.

— О господи! Да мыйлö сiя меным? Сысянь только гыркын кизьöртчö!.. Рытнас ме буржыка кöч йöвсö радейта, а асывнас — тшак ва да капуста росол, — шуис Онтон да пондiс кексыны-серавны гора голосöн. Сылö отсыштiс и Шулетов. А ме панялi кушмансö да думайтi, быль я Öгап Онтоныс сэтшöм али тешитчö? Али былись адззис сiйö, мый кошшис не öтiк год — и öнi быдсöн ни довольнöй?

— Меным сэсся буржыкыс нем оз ков, — эшö öтпырись висьталiс Онтон. — Ме не Пронь зять — вежöрта олансö. Сiя городö мунiс овны, хе-хе-хе. Ась олö, ась. Иньыс тай пышшöма ни — вердны сiйö оз вермы, поди, али эшö мыйкö. А ме дынö асьныс локтöны.

Эз вöв ме сьöртi эта басниыс, но коддэскöт эг понды кутчисьны, а чеччи пызан сайись да висьталi спасибо. Не хозяиныс, не сылöн бытшöм ёртыс эз пондö менö видзны — нiя öнi быдсöн юрнаныс вöйисö кольöм годдэзö, кöдна йылiсь, кыдз ме висьталi одзжык, ог понды касьтывны.

Мöдпырся Öгап Онтон ордö ме инми сiя жö годö арнас, тшакьялiкö.

Вöлi шоныт лун, кытшöмöсь етша овлöны октябрь шöрын. Менам пондiс косьмыны горшö, и тöдвылам усис вöр коласiсь керку, сылöн хозяиныс да сэтчинiсь чöскыт ырöшыс. «Не ветлыны я?» — думыш кери мe, но сразу жö öлi ачымöс: оз ков. Öткö, сэтчинöдз ылынöв, мöдкö, позяс сюрны бöра вина дорö да кывзыны Онтонлiсь ошшасьöмсö. Но юöм йылiсь думасö некыдз эг вермы кидтыны юрсим. А мортыс ме сэтшöм: ежели ог кер сiйö, мый ветлö юрам, то некытшöм мöдiк удж оз ни пет. Умöль привычка, колö висьтавны.

А сiя, Онтоныс, матын вöлöма. Только öтiк расок и вуджи, кыдз пондiс кывны керасьöм. Конечно, этö сiя уджалö, мöдiк оз лысьт сэтчö пырны.

Петi керасьöм вылас — быль сiя, черпуэз лöсьöтö: шапкатöм, лöз йöрнöса, гöрд рожабана, пöттöм сина. Мыся, натьтö, вунöтiс ни менö, а сораси: кыдз казялiс, сiдз и тöдiс.

— А, Туганов! Бöра тарресö кыян?

— Да тэнчит и лöдззесö он кый!

— Чужöйыс — оз, а ёрт понда и иньöс ог жалейт. — Онтон тяк мöртiс черсö мырас, кöда вылын лöсйисис, пуксис кыз чурка вылö, тшöктiс: — Висьтав инö, мый колö. Керку колö тшупны? Тшупам... На-ко юышт, — сiя мыччис туис.

— Менам квартира эм, — шуи ме да пондi юны.

— Казённöйыс — казённöй, а аслат, кöть и умöлик, сё ни аслат. Кöр нем абу аслат, дак тэ морт и не морт, вот кыдз эта руыс: и эм сiя, да некин оз адззы. А ежели тэнат построй эм — тэ кöзяин, тэ — морт. Эшö Владимир Ильичыс висьталöма: пролетарьятыс должен кöзяинöн лоны и зэлыта видзны кöзяйствосö.

— Да не совсем сiдз, Онтон Прович... Спасибо ырöшыт понда, босьт-ко туиссö.

Онтон сувтöтiс туиссö мыр бокас, висьталiс:

— Мыля не сiдз? Томöв тэ эшö, олансö не сiдз вежöртан. А ме быдöс сiйö пешлi аслам киэзöн, аслам кучикöн, аслам мусöн... Дак мый, поди, яй колö?

— Нем оз ков. Ме тшакьявны локтi да вай, мыся, кежала пöрись мортыс дын, сёрнитышта сыкöт. Кыдз ни овлан?

— Ола, ен эз мыжйы. И сёян, и юан эм, и деньга пиялö. Быдöс эм, быдöс тырмö... Хе-хе, вовлiс сiя студентыс, кöда винзаводсö керис, дак ме сылiсь вильö кори. Öнi, мыся, порозöс кер. Ась сылöн гыркас горок лоас, ась гöгсис винаыс виялö... Кöсъясис. Тэ пырав, Туганов, мöд кресенняас. Шулеткоыс мöдiс жö локны.

— Спасибо, может, и инмыла. А кыдз инькаыт — оз шогась?

— Каньлö да инькалö мый лоас? Быд асыв тай вöттэз висьтасьö бы, да ме ог кывзы сылiсь. Умöльöсь, шуö, вöтасьö, менö берегитчыны тшöктö.

— Мый думайтö, сiйö и вöтасьö...

— Вот, вот, сiя и эм... Ме кыдзкö тожö стрась забавнöйö вöтаси. Марпушыс, первöй иньö, уськöтчис. Öк и басöк, ёрдöм, вöлi. Вöснитик — шуль кодь, — да чорыт яя. И раяс сэтшöмсö пондан касьтывлыны... Вöтаси: бытьтö зöр сыкöт вартамö. А зöрыс паськыт розъя, кузь туся. Ме и шуа: «Ножö и шогмöма, прокод брага пондам юны». А Марпушыс сералö: «Норовит, эн на ю — эта эд не сю». Ме пидзöсви пыри ворохас, содззезнам гумыштi сюсö, а сэтöн куш ёг — тöрича, кульзöр, йöн юр. Мöдiклаись босьтi — зöр киль. Чужйи ворохас — öтiк бус лэбис. Марпушыс видзöтö эта бус пырйöт да сералö, дразнитö менö: «Но, брагаыт чöскыт, Онтон? Чöскыт, дак ю öтнат, некинлö эн сет». «Лöгаси, зонка, кватитi торта да öбыртi сылö. А сiя öвтыштiс кинас, и тортаыс клёнгис юр кузям. Да сiдз клёнгис — горöтi зубытсяняс. И сайми... Юрö — дзик чирöй, вöрзьöтны оз туй, а кöсичаэзам дзик нöшöн вартöны — ёт, ёт, ёт! Куйлi, куйлi — лöньсьыштiс зубытыс. Куталi юр гöгöрöс — дзонь, некытi абу потöм и некытшöм швав абу. А думайтi ни, мыся, вачкис, поди, кинкö.

— Но, кин жö гортат вачкас.

— Видз вылын сэтшöмсö вöтаси. И некыдз, срам, юрсим оз пет, часöт сё син одзам вежмасьö.

— Городас кинокомедия мыччалöны, ветлы да видзöт — и сразу вунöтчан.

— Ог радейт ме киноэтö. Кöркö весь мыччавлiсö, и то эг пыравлы. Синнэз дурмöны. — Онтон босьтiс туиссö, сорлалiс ырöшсö туиснас, шовкнитiс-осьтiс вевтсö, юис. Вевталiс нетопыта — ырöшыс сук майöла, вермас лыйны — и бöра сувтöтiс мыр бокас. — Тшактö адззин жö?

— Эм тшакыс, да ме не быдöс öкта — кыз рыжиксö только, а сiя мыйкö абу öддьöн.

— Шутёммез вылас пет, том пожумья дорас сiя быдмö. Бабапель и ельдöг пантасьö. Миян вит бочка ни солалiс да пуд-мöд косьтiс.

— Кытчö сымдасö?

— Райпо босьтö.

— И черпутö сэтчин жö?

— Сэтчин. И рос, и зыр, и нитш, и корось, и пес — быдöс нылö.

— Вештöны бура?

— Эз бы вештö — эг бы ньывсьы эстöн... Но, чагйисьны бöра колас, — шуис Онтон да лэбтiсис кокнита, чукöртiс сапогнас чаг ёгсö. Сiя пондiс лöсйисьны, а ме иньдöтчи шутёммеслань.

Дата добавления: 2015-11-16