КАНЬЫС ВИСЬТАЛÖ ГÖСЬÖС

Улита талун места аслыс оз адззы: мыйкö сьöлöмсö бытшкö да зубыта сöскö. Бур одзын я эта?

Ветлöтö сiя жырись жырö (жыррес нёля, не сiдз, кыдз деревняись керкуын, кытшöмын вексö олiс Улита) и нем бердö оз кутчы. Да и висьтавны кö веськыта — кернытö нем: не хозяйство, не пода абу.

Мый одзын бы этатшöм висяныс?

Неужто тэ, гаж олан, мöдан кольны этö керкусö?

Чидiс-керис Улита да лöньсис: эд семьдесят пять öтiлунö тырис, и сьöлöмыс, конечно, пöрисьмис — вот сiйöн и висьö быд абутöмсянь. А эшö и важ гортыс понда гажтöмтчö — оз вермы велавны виль местаыс дын, кöть быдса год ни чулöтiс эта вöр посёлокын. Да и кыдз тэ вунöтан, кöр сэтчин зон олö и эшö кык внучек эмöсь — Валерколöн, татiсь хозяинлöн, воннэз.

Вайöтiсö старухасö кагавидзисьö, а кагасö садикö сетiсö и только кресенняэзö гортö вайöтлöны. Мöдiс ни бöр гортас мунны, но Валерко эз лэдз. Тэ, шуö, баб, Онтошкаыс туйö миянöс дозирайт, мийö, шуö, асьным эшö учöтöсь. И быль, дзик челядь том гозъяыс: то нянь вунöтасö босьтны, то ва кöмкöтнысö оз косьтö. А кыдзкö тай лымнас пондöмась чапкасьны да Квасновлiсь öшын жугдöмась. И ыджыт шумöдз вайöтiс орсöмыс — ассиныс öшыннэзнысö лэдзисö да быдкодь угрозаэз кöсйисö, но кыдзкö чулалiс жö тай.

Кымöрыс пыр повзьöтчö, да не пыр жö изъянсö керö.

Талун Валерко оз уджав и, дзик школьник, кватитiс фотоаппарат да мунiс вöрö. Кöть бы инö пишальöн ветлöтiс да кöр кöчöс, кöр тарöс вайис, а то мыррез да кыррез снимайтö. Этö пö Онтошкаыс понда колö.

Мунiс Валерко öбед гöгöр и сё абу, а луныс эд рытсялö ни.

Кокнитöв жö умыс зонкаытлöн, кöть сiйö и бур шофёрöн лыддьöны, кöть и медаль мöйму сетiсö сылö. Сэтшöмöсь и эмöсь Кисоеввес — и Валерколöн айыс сэтшöм вöлi, и Созон дедыс, покойнöй, мöдкодь эз вöв.

Пукалö Улита небыт диван вылын — сьöлöмыс ланьтöтö да бöрйö, мый тöдвылас усяс. Вот нимлун кежас Дина, Валерколöн иньыс, гöрд кофта босьтöма. Сорок руб сетöма — эта Улиталöн кык месяцся пенсия. А мыйлö бы сы донасö? Конечно, бытшöм сiя, гöрдыс Улиталö бура лöсялö. Пасьтавлiс ни, зеркало одзын бергалыштiс, любуйтчыштiс аснас: дзик городскöй! Сылöн сьöд вира чужöмыс гöрдсяняс югмö, мичамö, и чукыррес озжык тöдчö, а шег кодь паськыт нырыс дзик векнямö...

Öшын увтас кылiс машина шы. «Валеркоыс локтiс, — думайтыштiс Улита да чеччис диван вывсис и руш-раш мунiс öшын дынö. — Колö ужин лöсьöтны».

Дöраöн вевттьöм машинаись петiс сьöд пасёка, руд шаля инька. Эта вöлi Дина.

Машинаыс чывкнитiс-мунiс одзлань, а Дина шув-пав пырис гортас, кир-пар чöвтiс пасёксö, вежис коксис пимиэсö. Вывтас сылöн кольччис шоныт голубöй олимпийка, кöда öддьöн лöсялö сы чочком синбан дынö, дженыта шырöм руд юрсиыс дынö.

— Валеркоыс гортын, баб? — юалiс Дина.

— Абу.

— Кытчö мунiс?

— Снимайтчыны тай вöрö кайис. Тэ дын эз кежав?

— Эз, — дженыта висьталiс Дина да пуксис диван вылас. — Но и мыдзи талун! Пу жö, баб, пельняннез меным... А Валеркосö ачым верда, кöр локтас.

— Кытöн инö сiдз мыдзин? — пельняннез пыртiкö юасьö бабыс. — Разь не контораат пукалiн?

— Вöркерассэз леспромхозыслiсь видзöтiм... А лымыс косви ни вöрас. Эз вöв, эз вöв да февраль вылас вöлись тыртны мöдö.

— А вексö эд сiдзи овлö...

Дина куим год ни уджалö лесничествоын лесничöйöн. Улита тöдö, что внучаткаыс öддьöн радейтö ассис уджсö, что сылöн и контораас, и вöрас, и питомникас — быдлаын порядок. «Тури кодь сiя миян, — сералö бабыс, — коккес кузьöсь, голяыс кузь, сiйöн и быдлаö ештö да гöгöр адззö. Да и то — томыслö уджыс — праздник».

Да, удж радейтiсьыслö уджыс — праздник. А праздникыс — ыджыт гаж.

Дина — öддьöн визыв морт, сiя ветлöтö котöрöн да чатырöн. Том хозяйкаыс Улиталö быдсöн гленитчö: и баснинас, и киподнас, и мывкыднас. Этасянь и кольччис Улита татчö, этасянь и отсалö быднёж внучаткаыслö, велöтö олансö тöдмавны, отирсö. И ачыс сысянь унаö велöтчö. А что мукöдпыр томмеслöн челядь мывкыдныс петавлö, дак годiсь-мöдiсь сiя чулалас.

Газовöй плита нылöн бур, и ваыс пизис чожа. Улита пуктiс сэтчö пöвсалöм луковка, лэдзалiс пельняннесö да солыштiс васö — пельнянь яйыс вöлi дубöв. Думайтыштiс да эшö содтiс солоксö и гусьöник серöмтчыштiс. А серöмтчыштiс сысянь, что усис тöдвылас кенакыс, воныслöн иньыс... Медодзза луннэзас кенакыс нем эз кужлы стряпайтны: мамыслöн вöлi öтка ныв и удж бердас öддьöнсö абу велöтöмась. Дак вот, пöжас кенакыс ырöш, лöсьöтчö сысъявны сiйö и юасьö: «Мый жö, Улита, кык налевка токо совсö ырöшас пуктi, дак тырмас, оз?» А Улита сылö: «Ырöшсö разь солалöны!»

Повзяс кенакыс, боккесö пондас вурны да кривзыны: «Ой-ой! Мый ме кери, мый кери! Вияс öнi йöзайö!» Улита öлö сiйö: «Оз вий. Тэныт сiя йöз ай, а меным — роднöй. Ме отсала. Только брагасö курытжыкö кер, майöвсö эн жалейт».

Керас кенакыс ырöшсö, шöммöтны горвыв сёрдö лэбтас. Ашынас осьтас вевтсö — выныс нырвуж пиньöвтö. Бур шогмöма, быгыс сильöтö-орсö, ловзьöмöн-ловзьö. Может, и чулалас, оз казяв старикыт. «Ноко, Улита, юктав тятьöс, — ичмонь мыччис кунгантыр шоныт ырöш, и Улита нöбöтiс айыслö. Ньылыштiс размöд старик, юалiс: «Эта нö мый сэтшöмыс?» Улита нывканас боёк кыла вöвлi, эз öшлы баснинас: «Сiя кыргызскöй брага, ая. Ю на здоровье».

Айыс желльыштас кунгансö кок увтас, чепöссяс гор вылö, пешлас кринкасис — сола! Лэдзчас, сийöс тув вылiсь босьтас чересседельник, юалас: «Кин добросö тшыкöтiс? Тэ, ичмонька?» «Ме ырöшсö кери, — босьтас винасö ас вылас Улита. — Этшöмыс пö, ая, юр öддьöнжык гажöтö...» «Тэ керин, кокольöсь сюзь?!» — гымыштас-горöтас старик да кыдз пöвсыштас да пöвсыштас нылыслö! Ойнитас Улита, синнэсö кутас — видзчисьö эшö. Абу сылö зубыт: дубас увтас ноёвöй нямöт пуктöма. Но айыс оз сэсся вачкы, только висьталас: «Жоргы сiйö ачыт, а меным мед вöлi мый ыб вылö босьтны». И ковсяс Улиталö одзöсасьны мунны...

Былись эд сiдз: кужтöг и ырöшсö он соровт. Не уджыс дона, дона — кужöмыс.

Сёян пусис, Улита лöсьöтiс сёйны, корис Динасö пызан сайö, а ачыс петiс магазинö чайла.

Öтöрас шонытжык лоöма, лымыс дугдöма дзуркöтны, небзьöма да вазьöма. Кымöрыс гудыра, только места-мöдлаын тыдалö сöстöм небо — дзик голубöй дöмассэз тэчöмöсь — да гöрд видзö рытвыв ладор, кытчö неважын пуксис шондi.

Луныс сё эшö олiс аслас оланöн: öтмöдöрö ветлöтiсö отир, кивзiсö-горöтлiсö челядь, вынсьöтчöмöн чанöтiс öтöрсö бензопила, но этаын мыйкö вöлi мöдiк ни, не лунся олан.

Кытöнкö ылын-ылын, Гачега ты дорын, уджалiс трактор: то ыр горöтас вöр пасьтас, то лöньсьыштас, то порсь моз рок-рок шыасяс. Этö вöркерасын. Луннэс эшö абу кузьöсь, и вöрзаптiссес пемытöдз уджалöны: сё тэрмасьöны планнысö одзжык тыртны, праздник кежö унажык вöр пöрöтны. А праздникыс, кыдз газетаэз да радио висьтасьöны, ыджыт, вöвлытöм — Коми муыслöн локтö нимлун.

Магазинын отирыс етша, и Улита вит минутаöн керис быдöс, мый мöдiс. А öтöрас сы коста биэз öзтöмась. Лесопункт контора одзын быдкодь рöма лампочкаэз сотчöны, а посöдз юр вылас — гöрд звезда.

Клуб вевдöрын орсö би югöр — то кусыштас, то öзйыштас; то алöй биöн, то вежкодьöн пыкнитас, а гижöмыс пыр öтiк кольччö: «Дзоридзась, Парма!»

Челядь сад вылын, кытöн Онтошкаыс олö, вон кытшöм кимöсь керöмась — кöч йöктö! Колö жö сымдасö думайтны!

А мый? Виль олан — виль сьылан-орсан. Вексö сiдз вöвлi.

Кор Улита пырис гортас, Дина сё эшö сёйис. Кытöнкö сiя стрась боёк вöлi, а пызан саяс немымда эз тэрмась: сёйикас и газета лыддьöтас, и книга бердö кутчылас, и зоныслiсь рисуноккез видзöтас.

Пым пельняннес бöрсянь Диналöн чужöмыс жаралöм, тырппес гöрдöтöмась, но лöз синнэс гудыраöсь, мыдзöсь, тöждiсянаöсь.

— Валеркоыс некытöн оз тыдав? — юалiс Дина бабыслiсь.

— Эг адззыв, кага, — ответитiс бабыс. — Тэ пöттöдз сёй, лунтыр эд тшыгйöн олiн. А ме сы коста чай пизьöта, да туруннэз сорöн.

Чайсö Дина бабысся не етшажык радейтлiс, сiйöн и гажöн паныт шыасис:

— Васö шорсис кайöтам, сiя чöскытжык чаяс. — Дина чеччис пызан сайись, пондiс пасьтасьны. — Ме лэдзчыла, тэ туруннэтö кошшы...

Öтiк ыбöсöн и петiсö: öтыс — вала, мöдыс — туруннэзла.

Старуха эз на ешты пыртны туруннэсö, а внучаткаыс бöр ни кайис: юкмöсыс пö кертöм, а черсö юкмöс дорсис кинкö босьтöма.

Öтмöдöрö котрасьтöн Диналöн чулалiс джын час, и чайсö юны охотаныс кыкнанныслöн öшис.

Улита миссьöтiс бекöрпань, петкöтiс нятьöсь ваэсö. Öтöрас дзирс пемыт лоöма, кöть синмö чурскы, А Валерко сё абу. Сiйöн и пырис чожжык Улита да тшöктiс:

— Ветлы жö, кага, посёлокас. Эз я кытчöкö кежышт да енды? Мöд Кисоеввеслöн гöссез вöлiсö, дак, поди, инмис сэтчин.

Керкуас шоныт, лöнь, и Дина падмöтчö петны кöдзытiнас. Но бабыс тшöктö, сiдзкö, колö ветлыны. И тöдö, что жöникыс кодззытöдз оз ю и оз усь некытчö, но етша разь мый вермас петны. Натьтö, кинкö ордын пукалö да доминоöн шовкйö-орсö нето, кыдз бабыс шуö, кывсö кöвдалö. А Валерко, кöр юыштас, вермö баитны и мöдiккезöс велöтны, кыдз колö закон сьöртi уджавны. Эта мунö сэксянь, кöр сiйö месткомö бöрйисö. Да и сэксянь я? Дина сiйö этшöмöн ни, пожалуй, панталiс, а пантасисö нiя кыкьямысöт классын. Зонка сiя вöлi визыв да басниа. И басöк, ежели не видзöтны бабыслöн кодь жö шмака ныр вылас. Диналö сэк Валерко эз гленитчы как раз нырыс кузя. Эз эшö тöдлы, что нёштöм нырыс не жельнöг — оз бытшкась. Да мый мийö томувьяным сэтiсь вежöртам?

Восьмилетка кончитöм бöрсянь Дина дыр эз пантавлы Валеркоöс — вит год мымда. Зонка мöдiс пырны радиотехникумö, но конкурс сьöртi эз сюр и мунiс шофёрскöй курссэз вылö, кöдна бöрсянь мымдакö слесаритiс, и босьтiсö армияö. Кык год бöртi локтiс гортас, кутчылiс «шоферитны» колхозын, да бур машина вылас эз инмы и чапкис горт ладорсö да леспромхозö мунiс. Татöн и видзчисьöма сiйö югыт счастьеыс — и виль машина, и шоныт горт, и быд ладорсянь бытшöм нывка: сэк кежö Дина ештiс ни лоны вöр специалистöн и «Тёща» спектакльын орсны не öтiк роль.

Сiя жö годö Валерко да Дина öтлаасисö да пондiсö мечтайтны Онтошка йылiсь. Точнöйжыка кö шуны, сы йылiсь прокод мечтайтiс Дина, а Валерколöн юрас прокод турторöтiс коляскаа мотоцикл. А сэсся вдруг мотоциклыс эз понды ковны, охота лоис босьтны «Жигули».

Мöд Кисоеввес ордын вöлi быдса праздник, но жöниксö Дина сэтчинiсь эз адззы. Пöрись Кисоев висьталiс, что Валеркосö рытъявнас адззылöмась Гачега ты дорись пармаын.

Мыйкö сьöкыта бергöтчис Диналöн сьöлöмас, лоис недолыт: эз я сiя öш вöрас?

Динаöс пондылiсö вердны-юктавны, но сiя мездöтчис хозяиннэс киись и кыт котöртöмöн, кыт шагöн иньдöтчис гортас.

Мый öнi керны? Кошшыны?

Но сэк колö корны отирöс, колö корны машина.

А мыля бы сiя, кöда быдмис вöрас, кöда олiс этöн вöрнас — öшис? Ась и етша сюрлiс Валерко эта вöрö, да сёравно вöвлi. А эшö — Гачега ты дорöттяс ой и лун ветлöны машинаэз — петкöтöны посёлок увтö вöр — нiя öшнытö оз сетö.

Да, Валерколö öшны некыдз оз позь

Горт дынас Диналö пантасис Фиска, нывкася подружка, öнi — леспромхозiсь бухгалтер.

— Тэ мый улицаэсö меряйтан, лесничöй?! — чавзö Фиска.

— Жöникöс смекайта, — висьталiс Дина. — Вöрö мунiс да сё абу, тыдалö, ош ордö инмис.

— Не öтнас жö эд?

— Öтнас, натьтö.

— Кваснов пö тай кайöма жö — йöзыс адззылöмась.

— Эн баит, Фиска! — повзис Дина. — Нiя эд лöгöсь...

Лöгöсь не лöгöсь, а ёрттэзöн нiйö он шу. Сэсьудерлун тай стекложуг понда чуть эз гыжьясьö. Но, жугдiс Валерко Квасновлiсь öшын, дак эд казявтöг! И лöсьöтны кöсйисис — только сельпо магазинöдз, деревняöдз, петавны колiс, медбы стекло небны. А Квасновыс Валерко ордö локтiс и давай ванзыны, дзик бöбöв: «Часöт жö воч нето ассит пазда!» Валерко öлiс сiйö: «Дугды выступайтны, дядя, татöн абу театр...» Мöдыт — эшö öддьöнжык горшсö летны, и Валерко тойлалiс керкусис кортöм гöсьсö да пöднасис гортас. Кваснов лöгувьяс да кодувьяс клячалiс верандасис öшынсö.

Лöгыс эд оз верит немлö и некинöс оз кывзы.

Вöлi ны коласын и ыджытжык шум — оча морос сувтлiсö, кöр Валерко мешайтiс Квасновлö босьтны шедтытöм премия.

Мый тай и керöмась контораас — годовöй премияэсö быдöнныслö öтмоз гижöмась, кöр неöтмоз уджалiсö: Валерко да мöдiккес петкöтiсö дас тысячаöн, а Кваснов — унаöн етшажык. А эта сылöн шогмис аслас дыш кузя, аслас недозорство кузя.

Сэк нiя петкöтлiсö вöрсö Гачега мыс вылiсь. Сулалiс тöвся чорыт туй, и шофёррез тэрмасисö, ой и лун, позьö шуны, уджалiсö. И Кваснов спокойсö эз сетлы аслыс, нельки кык туяс куим рейсöн луннас керлiс. Но и вашöтлiс ассис мазсö — дзик шардöм, кыдз öтпыр шуис механик. А дозирайтны некöр вöлi. И öтпырись эта понда машинаыс сыкöт вештiсис: мезмис одзись колесоыс — одзисьыс, кöда вевдöрöт сизимись луннас пуксис да чеччис! — и тыра машина берездасис тракт сайö. Кваснов лöсьöтiс жугалöм машинасö кык неделяся дыржык, а сы туйö плансö тыртiсö мöдiккез. Как раз эта йылiсь Валерко и казьмöтiс профсоюзнöй собраннё вылын.

А часöт быдöс эта пизис Дина юрын, и инькаыт тэрмасис Кваснов ордö, медбы тöдны, быль я сiя мунiс вöрö. Öддьöн охота вöлi пантавны Квасновсö гортсис, но нылöн некин эз вöв. Дина кежалiс соседдэзас и тöдiс вильтор: Гачега ты дорись вöркерасö мунöмась слесаррез лöсьöтны жугалöм погрузчик.

Дина бертiс гортас. Бабыс сiйö панталiс öтöрас — керкуас пукавтöнняс мылаыс бырöма ни.

— Мый нö кывсьö? — нора голосöн юалiс старуха.

— Вöрас эм машина. Валеркоыс, натьтö, сiйöн и локтас... Пырам кино видзöтны, талун бöра Штирлицыс йылiсь лоас.

— Чожа ни разь? А ме тай инö вöлись камин лонтi. Но, ештас эшö, уна эг сюй.

Нiя не тэрмасьöмöн пырисö гортаныс, чöвтчисö гузи-мези, включитiсö электросамовар да пуксисö кухняас, учöтик пызанок сайö, ужнайтны. Сёйнытö, колö висьтавны, эз и сёйö, пожалуй, а чайсö юисö дыр. Радейтöны нiя чайсö дзирытö, сука пöжöм туруннэзöн — уразнöйöн, лапкорöн, пыштурунöн. И сухаррезöн, кöдна понда няньсö Улита пöжавлiс ачыс и пуктывлiс сэтчö сметана, кольть, мята, сахартор, — сiдз ювлывлöмась кöркö Улиталöн дед-бабыс, сiдз жö керö и сiя.

— Баб, а тэ ёна радейтлiн жöниктö? — вдруг юалiс Дина.

Улита перво эз и вежöрт, мый сысянь видзчисьö внучаткаыс, а кыдз вежöртiс, спокойнöя шуис:

— Радейтi, кага. И пыр берегитi — шогасис öддьöн. И менö сiя прокод жалейтiс.

— И зонканас радейтiн?

Вырснитiс Улита пым чайсö, пуктiс чашкасö пызан пылас, норовитöв-керис да шуис:

— Зонканас ме сiйö эг тöдлы.

— Нач эн тöдлы?

— Не гортiсь сiя вöлi да, эг... Кöр корасьны локтiсö, вöлисьтен и адззылi.

— И сразу гленитчис?

— Да разь адззылi ме сiйö? И юрöс эг лысьт лэбтыны... Эг и тöд, что быгалöм юрсиа сiя, дзик лымкай.

— А кыдз первöй луннэсö олiт?

— Пыр синва кисьтi. Кузьой мукöдпырас горза, сэтшöм эд забедно вöвлi.

— Мыля сiдз, баб?

— Дак сiдз, кага, инмис... — старуха ветлiс камин дынö, кöртовöй клюкаöн сорлалiс горсис пессэсö, бöр пуксис пызан дынас. — Война костас эд Созоныс менö босьтiс, гражданскöйнас эшö. Как раз гöрддэс бöр керсисö, чочкоммес локтiсö... Корöмась Созонсö волостнöйö — сэк сельсоветыс туйö волостнöй вöлi — и котома тшöктöмась тэчны. Айыс и барöтас вöлисьтен синнэсö: работникöс пö тай менчим босьтöны, а ме мый нö думайта! Кин нö пö вартны пондас, кин гöрны, кин куреньын уджавны! И курни-верни свадьба чукöртас. Брагаэзнысö тай ладом абу ештöмась шöммöтны — сiдз тэрмасьöмась... — Улита рып-рып шынньöвтыштiс, мöдпöв кöрталiс юр вывсис чышьянсö. — Рытъявнас шарк пырис миянö Созоныслöн мамыс и шуö: «Ашын венеч дорö мунны». Шай-пай лоимö: кыдз сiдз, мыля? Эд козинным не быдöс керöм! Эд не öнi, а масленичанас шуисö гöтравнытö! А сiдзи пö вот путшалiс миян понда кадыс — видзчисьны нач некöр... И миянлö бöр-ту оз ни туй керсьыны, кикутöм вöлi ни... Но, кори ме нывкаэсö, ойкöв пукалiмö да йиэз кыйимö, йöрнöс-вешьян вуримö, кепись-чулки гöрдззимö. Ашынас чикисьöс путшöтiсö, баняын пывсьöтiсö да и вичкуö с богом! Сизим доддьöн вичкуас кайим. Миянöс пара вöлöн кыскисö. Сильканыс, шыргуныс сымда — вöр дорыс чаналö!.. Нывкаэс чавйöны-сьылöны, а ме синва кисьта. Ачым ог тöд — мыля. Созоныс, дзик лагун, пукалö да шöммö — умöль дума сiйö нырыштö: «Вот талун гöтрася, а ашын, может, солдатö босьтасö. Олас я метöг иньö, кинлö сiя дöнзяс?» Оз и видзöт меланьö. Кылiс, тыдалö, сьöлöмыс беднöйкалöн. А сьöлöмыт эд не пель, чуньнат он тупкав.

— Мый кылiс, баб?

Абу кокнит старухаытлö важсö перкйыны, но внучаткаыс корö, и сiя оз пыксьы.

— Кылiс — свадьбасö дзугасö.

— Дзугисö разь?

— Костiалiсö. Только локтiм вичкусис да пызан сайö пуксим — гыма-гама солдат пырис, бокас шашка öшалö. «Эстöн, — шуö, — Созон Кисоев олö? Давай лöсьöтчы, Кудымкарö мунам». Лöньсис керкуыс, ровно покойник дырни. Ме эг и вежöрт сразу, мый эта лоö. Видзöта солдатыс вылö, а сiя öт кинас уссэсö волькöтö, а мöднас шашка пуртöссö видзö. Созоныс чеччыны мöдiс, но вежайыс эз лэдз: ме пö перво ачым солдатыскöт баита... Ой, лучше не висьтасьны! — Улита чышкыштiс чышкöтокö, кöда öшалiс ордча тув вылын, кымöссö, синнэсö, сьöкыта ловзисис.

— Висьтась, баб, висьтась, — корис Дина и шкафись вайис шоколаднöй конфеткаэз, кöднö öддьöн любитö Улита.

— Мый тэкöт керан, — эшö öтпыр сьöкыта ловзисис старуха, пöвсалiс конфеткасö, курччöвтiс, — висьтася ужо... Дак вот, вежайыс кеймисис солдатыслö, и сiя асылöдз кольччис. Сюйыштiсö миянöс джоджулö узьны, а солдатыс кыдз швапкисьöма джоджув ыбöс вылас, сiдз и ойбыт сэтöн пукалöма: мед пö эз жö пышшы некрутыс. Асывнас — лöз югдö вöлi — миянöс янсöтiсö. Лэбзис ме дынiсь, кыдз арся листок...

Улита мыйкö эшö мöдiс висьтавны, но тöдвылас усис лонтiсян горыс, и сiя пондiс судзлавны гор пыдöссис орласьöм торресö, лэбтавны кыз öгыр увтiсь говняэсö да чукöртны нiйö ыбöсок дынö. Чужöмыс гöрдöтiс, жаралiс; тшöкаыс, пельбоккес, нырборддэс, синувттэс — быдöс вевттисис поснитик-поснитик, емйыв ыждочка, ньылöм вотёккезöн, кöдна горби югöр увтас пежьялiсö сiдз жö, кыдз мича асылö турун вылын кокнит лысва.

Нето жарсяняс, нето важ кадсö касьтылöмсянь руд синоккес небзисö, югмыштiсö, но ныын тöдчис тöждiсьöм, ныын эз вöв некытшöм гаж, некытшöм орсöм, некытшöм шынньöв.

Дина жалейтiс бабсö и завидуйтiс сылö: сымда интереснöйыс вöлöма сы оланын! И видзчисьтöм корасьöм, и дзугöм свадьба, и солдаткалöн уна годся вернöй видзчисьöм, и курыт синваэз, кöдна, поди, тэрмöтiсö велавны овны да радейтны отирöс, вынсьöтiсö, чорзьöтiсö мортлiсь воля да вера...

Пондöтчис кино, и нiя öзтiсö телевизор. Улиталöн ольпасьыс эта жырын и вöлi, и сiя куньыртчыштiс аслас койка вылö, Дина валькыта пöрöтчис диван шöрас.

Этö киносö нiя видзöтлiсö ни, и часöт некöда бытшöмика эз следитö сы сьöрын, мый керсис экран вылын. Диналöн юрас бергалiс лунся уджыс, тöдвылас олiс леспромхозiсь отиркöт видчöм. Сiя видчöм-етшасьöмыс уна годся ни, а районiсь начальство нем оз кер, медбы сiйö честнöя дугдöтны. А дело ыджыт, принципиальнöй — кыдз буржыка керавны вöрсö, берегитны быд пусö, етшажык изводавны поснитсö.

Куим месяц чулалiс сэксянь, кыдз Дина леспромхозлö сетiс делянка. Сетiс тöвбыт кежö, а вöрзаптiссезлö сiя тырмис только тöв шöрöдз. А мыля? А сiйöн, что директор тшöктöма керавны только буржык вöрсö и кöсжык местаэзсис — эд премия колö шедтыны! — и то сортi-костi босьтiсö. И мымда том вöрсö кажйисö, мымда пипу да кыдз чапкисö!

Виль вöрсö Дина леспромхозыслö эз сет — нем нылö нырьясьны, ась бöрьясö кольöмсис, ась морт моз уджаласö. Сiя гижис акт и керис сэтшöм вывод: вöрсö тшыкöтöм понда колö судитны. Да — виноватöйесö судитны! Мöйму лесничество ыстiс акттэсö районнöй госконтрольö, а таво иньдöтiс прокуратураö — сэсся нем керны. Этадз сiйö тшöктö керны комсомолкалöн долг, этадз тшöктö — специалистлöн принцип.

Керкуас лоис öддьöн шоныт, Динаöс пондiс сунöтны, а недыр мыйись сылöн юрыс тушмыль усис диван бöр вылас, и киноись басникöт сорлассис чöскыта пишкöм. Улита перво мöдiс саймöтны внучаткасö, но сэсся жалейтiс: ась пö шоччисьыштас невночкасö, а сэтчö пö, поди, и Валеркоыс локтас.

Камин ештiс, и Улита жагвыв, мед не лэбтыны шум, тэчис юшкаэсö да водiс бöр. Дыркодь сiя эз сетчы оныслö, да сё жö онзыльтчисö да вугмисö синнэс, а сэсся и куньсисö. Мыйкö дырна сiя эшö кылiс телевизорсис баснисö, олiс киносис морттэскöт, но вот Штирлицсö вежис солдат, кöда кöркö нуöтiс сылiсь Созонсö. Сiйö солдатсö сайöвтiс Созонлöн айыс — куд кодь шапкаа, вевттьöм пася, чочком пимиа кузь старик. «Монюшко, монюшко! — кытсасьö сiя öтöрсяняс. — Осьт-ко меным ыбöссö, осьт! Уна и ягöд вая тэныт...» Улита кöмтöг, пасьтöг уськöтчис öтöрö, осьтiс посöдз ыбöссö. Йöзайыс куйлö кыминь, сылöн мышкас ыджыт пестер, а пестерас вевдöрöдз тэчöм лöзöв-гöрд малина. «Мый нö лоис, старик, мыля усин? — юалö Улита. — Вай-ко ме тэнö чеччöта». «Тэ менö эн вöрöт, монюшко, мун Валертö лэбты». «А кытöн сiя?» «Этчин тай». «Кытöн этчин?». «Кысянь туйыс пондöтчö больничаö да миличаö».

Саймис Улита да сiдз повзис вöтсис — чуть сьöлöмыс эз пот: «Вот эд, вот эд, сёравно зонкаыскöт умöль шогмис!»

Диван вылын пуксöн узьö Дина. Узьö сьöкыта, кыз онöн и, натьтö, тожö вöтасьö нёштöм вöттэз. И телевизорыс сё бобошитö. Колö бы кусöтны, да Улита оз лысьт — вачкас токöн. Мöдiс саймöтны внучаткасö, а сэтчö сiя ачыс саймис и сэк жö юалiс:

— Сё эд абу?

— Абу, кага.

— Мыйкö дыр ни тай... Ноко ме гаражас лэдзчыла.

— Лэдзчыв, лэдзчыв, только телевизортö кусöт. Бöра пондiс висьны Улиталöн сьöлöмыс — чушкö и чушкö, дзик тырсялöм чирöй. Эта, конечно, не бур одзын. Ой, не бур одзын!

Кыдз только Дина мунiс, старуха сэк жö судзöтiс джаджокись лекарствоэз и юис сразу кык таблетка да пондiс дзимлясьны чай юöм бöрсяняс. А юрас мый и керсьö — öтлаö каттисис важыс и вильыс, бурыс и умöльыс, сорлассис быдöс, опсис уль комокö — дор не шöр он адззы. Этасянь и юрыс сьöкыт лоис, пондiс боклань вермавны. Вот вöлисьтен и ов! Ежели былись мыйкö умöль аркмис — не овны сэсся старухалö, Созоныс сьöрö — уль муö ковсяс кыссьыны.

Ох, счастье, счастье! Мыля нö тэ мунiн Кисоеввес ордiсь?.

А каньыс висьталö гöсьöс. Пуксис джодж шöрас, ыбöсланяс бергöтчис да ножö миссьыны, ножö сера кымöссö чышкыны!

Казялiс сiйö Улита и радсяняс колбасатор Серкоыслö чапкис.

Бытшöм примета каньыслöн миссьöмыс, кöр хозяиныс гортас абу, кöр сiйö семьяыс видзчисьö: бертас бурöн-здоровöн!

А мый сэсся колö?

Каньыс ньылыштiс колбасаторсö и бöра пондiс миссьыны.

— Миссьы, малин, миссьы, — ласкова, кыдз баитлö Онтошкакöт, висьталiс Улита каньыслö и кокнита ловзисис. И сьöлöмыс дугдiсжык висьны, и юрыс ровно бы эз понды вермавны.

Но недыр старухалöн долытыс видзсис. Локтiс Дина и эшö курытжык юöр вайис: ремонтнöй машинаыс бертöма ни, а слесаррес некинöс абу адззылöмась.

— Мый нö керны öнi? — Дина чöвтчытöг пуксис диван вылö. — Эд öшис сiя.

Улита, кöть и гыркыс сылöн нёштöма бергöтчис, ассис некодьсялöмсö эз мыччав.

— Öшнытö эз öш, — шуис сiя. — Одзза туй кузяс бöр петас.

— Пурга лэбтiсьöма öнi, — казьмöтiс Дина. — Туйсö тыртö.

Кöк моз кöкыштiс звонок. Дина уйыштiс ыбöсас, тiр-тор котöртiс посöдзöт. Сы бöрсянь уськöтчис и бабыс, нёджжöвтiс ыбöс сайö.

Не, не сiя локтiс, кöдö видзчисисö: старуха Лукашовна пырис аслас могöн. Эмöсь пö сылöн гöссез, дак абу тырмöма вина, и мортыт одзöсасьö бы. Улиталöн сiя доброыс оз быравлы, а эмнас сiя некинöс оз йöрт, и öтiк дозок сетiс Лукашовналö. А Лукашовна, кöр тöдiс, что Валерко öнöдз гортас абу, эшö öтiк юöр содтiс:

— Адззылi, кывзы, — бырзис-баитiс сiя, — кыдз Валерконыт бöрсянь мунiс Кваснов, Лямпаэзöн, черöн. Петiс, кывзы, гортсис, ыскöвтiс шор дорас. И аллё — Валеркоыс туй кузя! Аслам синнэзöн адззылi.

— Код вöлi? — юалiс бледöтöм Дина.

— Код не код, кывзы, а градус сора.

Улиталöн досповна кизертчис кынöмас, и сiя петiс туалетö. Лукашовна мунiс гöссес дынö. А мый Диналö керны? Кöдöрö уськöтчыны, мый бердö кутчыны? Пуксис диван вылö, жмитiс киэзнас юрсö, ведь дыр пукалiс чöлöмöн и сё думайтiс, думайтiс, думайтiс. Но вот сiя чеччис, комод вылiсь босьтiс фонарик. Бабыслö, кöда пантасис посöдзас, висьталiс:

— Муна Аркадий Кузьмич дынö... Кошшыны колö, баба.

— Мун, кага, мун...

Ойся посёлок орсiс уна рöма биöн, и лажмыт югöрыс то югмылiс, то лöзöтлiс, то гöрдöтлiс. Эта югöр увтö кöдзис поснит, небыт лымсö ладтöм пурга, и тöв падмöтiс мунiсь мортöс — то одзсяняс пыкöталас, то боксянь тойыштас, то бöрсянь отсыштас да сiдз, что чуть ныр вылö оз уськöт. Сералö мортыс вылын, изгаляйтчö, китöм-коктöм!

Но Диналöн лöгыс петö не умöль погоддя вылö, а Кваснов вылö. «Этö сiя, сiя!.. Черсö юкмöс дорсис сiя босьтiс! Сiя, умöль морт, сiя! Нарошно босьтiс, медбы... Уфф! — Дина сiдз пымалiс, бытьтö сiйö пасёкнас гор вылö лэбтылiсö. — Ежели сiя... ежели мыйкö керис — юрсö поткöта, горшсö пиннезнам орöта...»

Эта думаöн Дина кежис аслас улицаись, мунiс Квасноввез ордö, котöрöн кайис дзуртан посöдзö, пырис керкуö. Кöть и порогувтас да ыджыт жырас сотчöны биэз, а некин оз тыдав: конечно, узьöны ни.

Горöнжык, медбы кылiсö, Дина юалiс:

— Хозяиныс гортын?

Саймис Квасновлöн иньыс, кык кага а инька, лöгöн резьöтiс:

— Кинöс ойнас кöспельыс новйöтö?

— Кытöн жöникыт?

— Ме сы сьöрын ог вöтлiсь и ог тöд, кытöн гöняйтö.

— Рытнас гортын вöлi?

— Эз.

Быдöс вежöртана, сэсся нем и юасьны. Дина чепöссис öтöрö и котöртiс вывланьö, керöсок йылас, кытöн сулалiсö басöка серöтöм виль керкуэз — сэтчин и олiс Аркадий Кузьмич, лесопунктiсь начальник.

Вöлi пыд ой, и унажык керкуэзас биэс эзö ни сотчö. Пемыт вöлi и начальник öшыннэзын, но Дина адззис тамбур ыбöс бокись звоноклiсь кнопка, нырыштiс сiйö кепися кинас.

Аркадий Кузьмич, ыджыт юра и кузь чужöма мужик, осьтiс ыбöссö, корис локтiсьсö керкуас. Ойезнас сiйö саймöтлöны часто, мужикыт велалöм ни эта дынö и некöр оз видчы, некин вылö оз лöгав.

— Кывза, Дина Ивановна, — дженыта висьталiс сiя, кöр нiя сувтчисö порог дорö.

— Валерконым öшис. Мунiс вöрö и эз берт.

— Öтнас?

— Сьöрсяняс мунöма Кваснов... черöн, — Дина сэсся эз вермы спокойнöя баитны, сылöн петiсö синваэс и нюмыртчис öмыс.

— Дугды, Дина Ивановна, — сiдз жö дженыта öлiс Аркадий Кузьмич да пондiс звонитны гаражö. Сторож шыасис чожа, бытьтö важын ни видзчисис этö звоноксö, и начальник тшöктiс вайöтны гаражас шофёрöс, кöда кыскалö отирсö уджавны. Эта бöрын небыта висьталiс:

— Чапкы, Дина Ивановна, юрсит умöль думаэтö. Квасновыс абу эд бандит. Часöт саймöтам опричниккезöс, и нiя вайöтасö тэнчит Валеркотö гортат.

Опричниккез... Мöдiлаын Дина сё ни мыйкö бы висьталiс эта кылок понда, а часöт шы эз сет. Кысь, поди, старикыт тöдас, мый сэтшöм опричник. Кылöм тай, что сiдз кинкö шуöма дружинниккезöс, и абу вунöтöма.

Аркадий Кузьмич пасьтасис-кöмасис не тэрмасьöмöн, но чожа, и нiя шытöг лэдзчисö гаражö. Эссянь начальник звонитiс увдöрись складö, кытчö петкöтöны вöрсö, юалiс, быдöс я машинаэс вовлiсö керрезнас, эз я вöв ныкöт Кисоев Валерко.

Локтiс шофёр, и Аркадий Кузьмич висьталiс, мый колö керны. Баитiсö-керисö и решитiсö сiдз: лэбтыны дружинниккезöс, босьтны сьöрö лямпаэз и Гачега ты весьтöдз пырны вездеходöн, а сэссянь кошшыны Кисоевлiсь лыжа туйсö.

Кыдз бы эз корсьы Дина, мужиккес вöрас сiйö эз босьтö: кошшисьны ойся вöрын не инькалöн удж.

И вот сiя бöра пукалö бабыскöт шоныт жырын да кывзö важ олан йылiсь висьтасьöм. Кывзö, конечно, умöля, сортi-костi. Думанас сiя сэтчин, кытöн Валеркоыс — Гачега ты сайись вöрын. Нiя местаэс сылö тöдсаöсь, инмылiс сэтчин не öтпыр (нылöн сiя шусьö тринадцатöй кварталöн). Сы ладорын унажыкыс кöс мыссэз, тырöмöсь кöзъя вöрöн — пармаэз. Вöрыс эстöн гырись, тшöк да ён — конда пуа. Этчö етша отирыс павкö, и «вöр йöзыс» — зверь да пöтка — татöн повтöм. Удерво, кыдз усис лымыс, нiя местаэзiсь лэбтiсö пияна ошöс, кöда арсяняс косялiс кык мöсöс. Быдса табуннэзöн сэтчин олöны вöрмöссэз. Мöйшорын, кöда котöртö Гачега тыас, поздiсьöны бобррез.

Эм тринадцатöй кварталас кык лог колас — тшöк тэлляин. Сы пытшкын пемыт да лöнь, кыдз сёртни гуын. Тэлляинас, натьтö, и куйлö Валеркоыс. Куйлö садьтöм, вöрзьöтчыны оз вермы, а только нёштöма ружтö. И кытсалö иньсö да зонсö. Куйлö кыминь, шапкаыс юр вывсис усьöма... Сiйö кольмöтiс Кваснов: гусясьöмöн локтiс бöрсяняс и вачкис чер тышнас. Ачыс пышшис, дзик ыжмалöм кань — эз лысьт локны гортас. И вачкис сы понда, мыля Валерко висьталiс правдасö, мыччалiс туй, кытi колö мунны честнöй мортлö. Али сё вештiсьö жугдöм öшыныс понда?

Динаöс дума вайöтiс сэтчöдз, что баснисö нач ни эз кывзы, и бабыс, кöр казялiс внучаткаыслiсь тувдöм синнэсö, уськöтчис лекарство дынö — неладно эд мортыскöт лоö!

— На жö, кага, ю этö, — сiя вайис да сетiс Диналö руд таблетка. — Ме öнтай кыдз юи, дак сразу дугдiс сьöлöмöс нимавны.

— Мый эта, баб?

— Сьöлöм висянiсь сiя, — бабыс мыччис ваок. — Меным кыдзкö тай сетлiсö... Ю давай, сьöкыт думасö вашöтас.

— Тэ этö жö юин? И сьöлöмыт дугдiс висьны?

— Этö, кага. И дугдiс.

— Сiя эд касторка, — серöмтчис Дина, — кöдö Онтошкаыслö сетлiсö.

Вöлись вежöртiс Улита, мый сiйö вашöтлiс öтöрö керкуö.

Пöрисьыслöн и не сэтшöм петö — мый сысянь коран?

Быдöс асъяойсö öтöрö-керкуö ветлiс и Дина. Сiя котрасис и контораö да звонитiс больницаö, медбы тöдны, эз я вайöтö ны дын Кисоевöс. Мöдiк кадö Дина и картаö повлiс петны, а талун павьялiс посёлокöттяс, дзик онтöм, и некинлiсь эз пов — не поннэзлiсь, не кöиннэзлiсь, не бöб йöзлiсь. Сiя кыкись сибöтчывлiс Квасноввез керку дынö, но нылöн биыс эз вöв, и пырны эз лысьт.

А кынымись вöлi гаражын — и лыддьыны оз позь. И кöр бы эз лок, пöрись сторож прокод зiлис öтiкö:

— Весь тöждiсян, Ивановна: Валеркоыт не лёль, асьсö öбидитны оз лэдз. Вот адззылан! Öнi нiя гортö ни локтöны.

Этшöм басни бöрсянь Дина тэрмасьлiс посёлок сайö и дырöн видзöтлiс сэтчин, кысянь колö локны дружинниккезлö. Öтпыр сiя кылiс дзик морт голос — сибдöмö, бырöмö, кытшöм овлö дыр горöтлöм бöрсянь. Инька уськöтчис эта голос вылö и вель дыр уксiс, но паныт сылö быднёжöн нёштöмасис пурга — сьылiс, сералiс, горзiс. Горзiс и Дина, сыркьялiс сэтчöдз, кытчöдз садьыс эз быр. Вöлись пöлiнясьöмöн да чужьясьöмöн, дзик висян кока морт, сiя кыссис гортöдззас, кыминь уйыштiс диван вылö да сэтчö и онмöссис. Бабыс только юрнас гогинь-гогинь керис да бöра кыскис джаджоксис лекарствоа дозоксö...

Гореыс не чер, а мортыслiсь вужсö орöтö.

Öшын увтас чушйöвтiс автомобиль, горöн гымгис-пöднассис кабина ыбöс. Улиталöн пот мунiс сьöлöмыс: ловьяöс вайöтöны али...

Мöдiс чеччыны и эз вермы лэбтiсьны, ровно лядьвейес лякасьöмась сьöкыт стул бердас. Пондылiс кытсöвтны внучаткасö — голосыс эз лöсяв. А локтiссес, кылö, осьтiсö ни посöдз ыбöссö (Дина, тыдалö, абу игнасьлöма), и йöй пурга сiйö желльыштiс керку стена бердö. Этасянь саймис Дина, пуксис, повзьöм синнэзöн нёджжöвтiс ас гöгöрас, чеччöвтiс кок йылас. Оссис керку ыбöс, и Дина эшö мöд жырсяняс казялiс, кыдз порогсö пöв кок вылас вожмöвтiс Валерко, кöдö кыкнан ладорсянь видзисö зонкаэз. Дина уськöтчис жöникыс дынö, бокö вештiс öт зонкасö да кутiс кисойöттяс Валеркосö. Сiдз нiя локтiсö ыджыт жырöдз, жагвыв лэдзисö доймöм кока мортсö диван шöрас. Дина чöвтiс жöникыс юр вылiсь сöнöгсялöм шапкасö, кокнитика малыштiс юр гöгöрсö — абу доймöм.

Эм, эм Диналöн счастьеыс!

— Ме бы юа, — не аслас кодь, дзик кынмалöм, голосöн корис Валерко.

Вöлись часöт, кöр кылiс внучокыслiсь шысö, Улиталöн лоис голосыс и садьыс, чулалiс повзьöмыс да öшöмыс. Сiя чеччис койка вывсис, кокнита мунiс самовар дынö.

Дина дзарнитiс Валерко синнэзö, гажтöма юалiс:

— Кыдз нö тэ этö?..

— Авария кери, — виноватöя горöтчис жöникыс. — Логö ыскöвтi, а сэтöн колода вöлöма. Пиньöвтi кокöс. И кынми бы, ежели не Кваснов.

Улита удiс чай — крепытö, мята сорöн, кытшöмö нiя юисö Динакöт рытнас.

— Но, дак ми мунiм, — шуис шофёр. — А фельдшерыс часöт локтас, сы дын Аркадий Кузьмич кежис.

— Норовитö, кагаэз, — кватитчис Улита, — ме кöть юктышта тiянöс.

— Видз праздникöдззас, — посöдзсяняс ни шуис кöдакö.

Осьта ыбöсöт кылiс, кыдз öтöрас люлльöтiс-орсiс падерыс. Эта орсöмын кылiс кытшöмкö öддьöн тöдса йöктöтан мелодия, кöда сьöртi Дина йöктывлiс техникумын велöтчикö.

— Кынöмыт эд чисто сималiс, Валер, — тöждiс Улита пельняннез пырттöн. — Но терпитышт невнушки, часöт верда...

Тöдчис, что öнi старухалöн некытi эз вись — не юрыс, не кынöмыс, не сьöлöмыс: сiя котрасис, дзик сорокгодся инька.

Сiдз сiя и, тыдалö, эм: гаж оланö сюран — шогтö вунöтан.

Дата добавления: 2015-11-16