СЁРЬЯГÖД

Кöть и шуöны, что сьöкыт удж бöрсянь бура узьöтö, а, тыдалö, не пыр жö. Алина вон кыдз лунтыр менöвтiс, а оныс дук абу. Ланьтыштас минута-мöд кежö и бöр саймö. А сентябрьскöй ойес, асьныт тöдат, мый кузяöсь да кытшöм пемытöсь, и нiйö джендöтны стрась сьöкыт. Вот и куйлö Алина барöтöм синнэзöн да ыш лолалö. А сьöлöмыс пессьö, мыйкö видзчисьö бытшöмö, гажаö, лов пöдтанаö.

Да кöть бы тулысöн эта висяныс кутчисис, кыдз добрöй отирлöн овлывлö, а то сьöд кадö — арöн. Не весь сiйö жöникыс, видно, мöдöра кучикöн шуö — сэтшöм и эм, сё не отир моз сылöн шогмö. Вон мöйму, кöр колхозын эз вöв вердчан, Алиналöн мöссэс эзö умöльтчö, а содтiсö йöв, и мортыслö сетiсö орден. Вот тэ и кутчы сыкöт!

Эшö одзжык, кöр Алиналö тырис двадцать год, сiйö корасисö кык зонка — да эд дзик картинкаэз! — но нывка некöда сайö эз мун. И мый видзчисис — ачыс оз тöд. А мöд годас петiс тридцатьгодся сайö. Мöдöра дак мöдöра и эм!

Куйлö Алина, вынсьöтчö ланьтны, а оныс матö оз сибав. А кöр абу он, юрö сякöйыс и пырö...

Квать год ни Степаныскöт олö. Алина. Олö не кöдзыта, а ыркыта. Степан радейтö сiйö, быдöс сы сьöртi керö, быдöс сылö босьтö, мый корас, нем оз жалейт. А том инькалö мыйкö оз тырмы,

«Мый, мый тэныт оз тырмы? — часто юасьö Степан. — Керку менам — терем, телевизор — меддона, диван — кöть и поперёг водан, и то коккет оз öшöтчö... И пода тырмö, и мотоцикл зыбкаöн. А что челядь абу, дак нытöг эшö буржык. Вон ордчöн чива-люва горзöны, ныкöт, натьтö, аймамыс нерадсявлöны. А тэныт — рай!»

Рай, мый нö не да!

Ох, Степан, Степан! Нем тэ он адззы! Кöть и синнэт пань ыждаöсь, а не сiдз тэ нiйöн видзöтчан, кыдз бы колiс... Кыдзкö тай Алина дынö куимгодся Татьянка, соседскöй нылочка, пырис да акань вайис, и том инька виль сарафан аканьыслö вурис да пасьтöтiс, и ольпась лöсьöтiс, и йöктöтiс аканьсö. Учöт Татьянкалö гажа-гажа вöлi, а инькаытлö эшö гажажык. Но локтiс Степан и тшыкöтiс нылiсь гажсö — вашöтiс Алинаöс лук гряддэз весöтны.

Алина весöтчис, летiс нятшак да поснит ёгтуруннэсö, а ыджыттэсö — йöн да жабрей — колялiс. Колялiс сiйöн, что синнэс эз адззö нiйö. Сы син одзын вöлi Татьянка, вöлi веж юра акань, а пеллес кылiсö учöт кагалiсь лопочитöм: «Ма-ма, вай... Ма-ма, на...» И горалiсö эна сöстöм кыввес, дзик сильканок.

Кöть и деревняын Алина олö, кöть и бур керку сылöн эм, а öтнас, дзик тöлiсь кöдзыт небоын. Эм жöник, но не сэтшöм, кытшöмö колiс — нелюбöй. Фермаын эмöсь сылöн отсасиссез, но бур ёрттэз абу. Вот буди Есенинлöн стиххез, кöдö козьналiсö сылö пионеррез и кöдö Алина сiдз любитö лыддьöтны:

Он радейт тэ менö, он жалейт тэ,

Разь кöть невна абу басöк ме?

Ох, кузь ой тэ, арся ой тэ! Сапемыт сiя, и керкуас, дзик гуын, а Алиналöн син одзас югыт, сылö тыдалö важынкодь ни чулалöм лун, кöр первуись пантасис том трактористкöт. А шогмис эта сэк, кöр воис рудзöг — локтiс вундан кад. Локтiс сiя, виль заботаэз вайöтiс. Колхозын сымда удж лоис, что кöть лун и ой уджав, а быдöс сёравно ни он вермы керны. И звонитöны бригадиррез правленнёö: «Вай, председатель, отсöт, а то пöрöтöм сюыс чужас!», «Адззы, председатель, лён нетшкиссезöс!», «Зябь колö гöрны, председатель, тракторрез оз тырмö!».

Сэтшöм дзирыт кадас и локтöны деревняö городын олiссез. Сэк и пырис гажа горöн Алина деревняö трактор. И вöлi сiя сöстöм да басöк: ачыс оранжевöй, дзик Алина öшын увтiсь ноготок цветтэз, гусеницаэз сереброöн свиттялöны, ыбöс вылас гöрд флажок рисуйтöмась. Сразу тöдчö, что городскöй и не умöлик морт сы вылын пукалö — не дышкуль.

Алина лöсялiс сiя часö как раз гортас и, кыдз кылiс да казялiс тракторсö, петiс гортсис, медбы любуйтчыштны сiйöн. Тракторист сувтöтiс ассис басöк машинасö том инька весьтö, гусьöнжык керис мотор шысö и чеччис.

Медперво Алина казялiс том трактористлiсь русöй кудриэсö, сэсся василёк рöма синнэсö да шыннялан öмсö. Зонка вöлi крепыт и статя. И сöстöм паськöма. Сiя дыркодь видзöтiс Алина вылö, дзик öшис сы одзын баснинас, и вöлись гора голосöн юалiс:

— Висьтав, сьöд сина царевна, кыдз меным бригадирöс адззыны.

— Бригадирöс?

— Да.

— Митрей Мари пиян Сеняöс?

— Если Митрей Мари пиян Сеняыс — бригадир, то сiйö.

— Логсö вуджан да мун вöв карта дынас, сiя сэтчин.

— Спасибо, сьöд сина царевна, — небытика, джын голоснас шуис трактористыс да мигнитiс Алиналö. — Мыля этшöм чачасö некин оз гусяв?

— Не иган сайын пукала, дак, натьтö, сiйöн, царевич, — серöмтчыштiс Алина да кайис горт посöдзас. Но сразу эз пыр, а эшö нёджжöвтiс кудриа зонка вылö. А трактористыс видзöтiс Алина чужöмö.

— Мый сiдз видзöтан, синнэтö эд колян! — шыннялöмöн горöтчис Алина.

— Верма и кольны, — шуис тракторист да сэтчö жö и содтiс:

— Не, ог. Коля кö, дак мöдпырся кыдз тэнö адзза?

— А мыйлö эшö мöдпырся, читкыля юр? — сералö Алина. — Али корасьны мöдан? А Есенин Сергейöс лыддьöтлiн? — юалiс сiя и жагöника, мыдзöм кодь голосöн, но öддьöн ятнöя, выразительнöя, бытьтö ассис шогсö кисьтiс, лыддьöтiс:

Эн вöрöт тэ, мый важын сайкалiс,

Эн саймöт, мый оз тшöкты сьöлöм:

Öддьöн одз олан меным козьналiс

Гажтöм кад, мыдзöм да тöждiсьöм...

— Но и но! — дивуйтчис трактористыс. — Адззисьлытöдз инö! — и кокнита чеччöвтiс гусеница вылö, сэсся пырис кабинаас. И сэк жö моторыс сiдз горöтiс, что Алиналöн сьöлöмыс долыта-долыта чеччöвтыштiс вывлань, и том инька шардiс эта долытсянь. Да сiдз шардiс, что дыр эшö эз вермы вöрзьöтчыны местасис, эз вермы орöтны синнэсö басöк тракторыс бердiсь.

Мыйсянь бы этö?

Ох, сьöлöм, сьöлöм! Ашынас жö Алина тöдiс зонкалiсь нимсö — Серёжа.

Сыбöрын лун-мöд Алина ветлöтiс, кыдз кольмöм, и юрас олiс эта картинаыс, топ басöк вöт. Но сьöрна кольмöмыс петiс, и инька бöра кутчис важмоз уджавны-менöвтны, только горт посöдзас кайтöн эшö неделя пезьдалiс бöб сьöлöмыс, бытьтö эстöн сiйö павкöтлiсö ласков киöн. А чулалiс бы эшö неделя, дак и дугдiс сьöлöмыс нöитчыны, но судьбаыс шуöма мöднёж керны.

Сэсьудерлун, öддьöн шоныт рытö, кöр Алина лöсьöтчис ни фермасис мунны гортас да сувтчыштiс кывзыны туриэзлiсь гажа кривзöм, сы пеллезöдз локтiс тракторлöн негора шы. Ылын шыыс кылiс, но Алина эз вермы сорасьны: эта шыыс сiя, кöдасянь том инькалöн öдззис висьны сьöлöмыс.

«Сiя локтö, колö эстiсь мунны, кежны туй вывсис», — пырис юрас дума, а коккес эз и вöрзьöтчö местасис. И синнэс не туриэсö пондiсö смекайтны, а оранжевöй тракторсö. Но тракторыс некытöн оз тыдав, и шыыс сылöн öдва кылö. Поди, кытчö и мунö, а сiя сулалö эстöн... А сьöлöмыс кылö: татчö! — и видзчисьö.

И быль, чожа мыйись Лöньшор йöрын бöра торзыштiс и лöнис тракторлöн гор. Сiдз шумитö только сiя — городскöйыс: Алина сiйö некинкöт оз сорав, кыдз оз сорав мöдiк поэттэскöт Есенинöс.

Лöньшор йöрын прессуйтöны турунажык идзассэз да кайöтлöны фермаэзö. Сэтчин жö, тыдалö, уджалö и Серёжа. Кык Серёжа öнi олöны сыкöт — поэт да тракторист, кöда чужöмнас мымдакö вачкисьö Есениныс вылö. А кытшöм сылöн душаыс?

Колö бы мунны, а сiя пуксис ворота дорись прясла вылö, судзöтiс йöр коласö сибдöм зöр тылöп и пукалö да жуитö сiйö. А сьöлöмыс полькьялö гажсянь, паськалö долытсянь, сiдз и чеччöвтö, сiдз и лэбзьö бы Лöньшорас.

Мыля сэтшöм бöба вартсян, сьöлöм, мыля?

Бур одзын али умöль одзын?

Оз, оз висьтав сьöлöмным, чöскыт али курыт лоас локтан минутаыс. Сiйöн и потыштлö сiя то чöскыта-чöскыта, то полöмöн, то шог сорöн.

Локтан минутаыс сiйöн и бур, сiйöн и дона, что сiя тöдтöм, таинственнöй.

Оранжевöй трактор мыччисис ферма мысок вылö, сiя кыскис идзасовöй тюккез, и кыскис фермаланьö. «А ме нятьöсь халата», — кватитчис Алина да котöртiс керкуас. Сэтчин сiя чöвтiс халатсö, кольччис гöрдвевья кофтаöн. Миссьöтiс и назёмöсь сапоггесö, ва киöн чышкис юбка вылiсь турун ёг.

Тракторыс локтiс ферма дынö и сувтчис ворота одзас. Алина петiс керкусис, уськöтчис осьтны ворота, но трактористыс одзалiс сiйö.

— О-о! Этшöмсö размöд осьтлан и лоан инвалидöн, — шуис зонка, кöр ванйöвтiс кыскасян воротасö.

— Мужиккезныт, кыдз ме видзöта, только бражничайтöны, и воротасö нылö некöр лэбтыны. Не сiдз я, менам царевна?

— Эмöсь сэтшöммес, зонка. А вот тэ коддес абу, — шуис Алина и сьöкыта ловзисис.

— Дак босьтö менö... Только ме туйö кинöскö сетö жö.

— Ме бы тэ понда кык мужикöс сетi, да не менам воляыс!

— Ого! А кинöс жö бы ме туйö сетiн?

— Ассим да эшö сылiсь дружоксö.

— Эн и жалейт бы?

— Джын воть бы эг.

— А сыбöрын менö ны моз жö вузалiн бы?

— Тэнö? Ме бы тэнö тöдан кыдз...

— Ог тöд. Кыдз ноко?

Алина öнöдз оз тöд, кытшöм кульпиян сiйö кватитiс местасис да чывйöтiс тракторист дынö. Зонка эз ешты и вежöртны, мый сiя лоö, и сулалiс, дзик кын курöг, киэсö öшöтöмöн, а сiйö зэлыта-зэлыта жмитiс морос бердас Алина...

Дыр я сiдз чулалiс, Алина оз тöд. А вежöртчис сiя гора шутньöвтöмсянь: идзас додь вылас сулалiс да рызйис-сералiс Никитка, Степанлöн дружок.

Ашынас жö, кыдз и колiс видзчисьны, эта йылiсь тöдiс ни Степан. Сёр рытöн, кöр Алина водiс жöникыс бокö, Степан кыдзкö гажöн, бытьтö бытшöм юöр йылiсь, юалiс:

— Эта быль али весись быздöны?

Иньыс эз понды пыксьыны, эз понды бöбöтчыны, а честнöя висьталiс, что отирыс озö весь быздö. Висьталiс, но эз понды не правдайтчыны, не кеймисьны. Морт сiя не сэтшöм, медбы кинкö одзын пидзöс вылö сувтны. Раз бöжыт лякöсь, дак нем ни сайлавны.

Дыр видзчисис Алина, мый мыччас жöникыс — кулак али курыт кыв, но Степан не эз шыась, не эз вöрзьöтчы, бытьтö кулiс.

Сiдз чулалiс минута, кык... дас минута — шы абу! И сэк вöлись и кырöтiс инькатö — öдззис горзыны, но тожö гусьöн, никсытöг и вирскытöг. Сiя горзiс зубытсянь, кöдö керис сы сьöлöмлö Степанлöн чöлöмыс. Эзжык бы вöв зубыт, ежели вачкис жöникыс нето ругайтiс леш-вош.

Да, шы эз сет сiя ойö Степан.

И ашынас чöлiс, и куимöт лунас. И талун эз на шыасьлы, и вот часöт саркйö-узьö да, натьтö, оз и вöтась иньыс йылiсь.

Ох, олан, олан!

И мый öнi керны?

Кытöн тэнат, пемыт ой, туйет, кытчö нiя нуöтöны?

Чу, трактор шы кылö. Кин жö этö мунö? Тöн Косьдор ыб пондöтiсö гöрны, дак сэтчö я мый я кинкö мунö?

А трактор шыыс сё горажык, ятнöйжык, басöкжык. И вдруг — ыркйыштiс-горöтiс сiдз, что Алиналöн пик мунiс сьöлöмыс.

Сiя этö, сiя!

Алина павтыртiс одеялосö жöникыс вылö, кир-пар пасьтасис-кöмасис и уськöтчис öтöрö — кошшыны ассис сёрьягöдсö.

А ойыс — сапемыт: не звездаэз, не Дзодзогтуй талун абу.

Адззан я, Алина, дона тусёктö?

БИКЕРИСЬ

Рытыс вöлi лöнься-лöнь и öддьöн шоныт, кыдз часто овлö июль шöрын. Марат пемдандорас петалiс Чойва дорö,любуйтчыштiс рытся басöкнас. Сiя ладорын, кытчö час одзтi вöйис шондiыс, кымöрыс вöлi куим рöма: му бердас нюжалiс нятьöсь-гöрд полоса; сы вевдöрын тыдалiс блед-зелёнöй небо; эшö вылынжык вöлi сöстöм-гöрд непаськыт лека.

«Кыдз бы эз тшыксьы погоддяыс, — думайтiс Марат. — Зэрас кö, Ойгортас он пыр машинанас, а колö бетоннöй приставкаэз сувтöтны, опораэс öдва видзсьöны. Лэбтiсяс тöлок — ниль водасö, битöг и ватöг кольччас фермаыс».

Кинлöн мый висьö, сы йылiсь сiя и думайтö. Марат, чочком синкыма детина, уджалö райсетьын монтёрöн и конечно жö прокод тöждö электричество понда. Сылöн участокас прокод порядок вöвлi, а таво ыджыт зэррес кузя эз ешты лöсьöтны ойгортскöй вожсö. Косьтыштiс то, да дыр кежö я? А вот эта ойыс мыччалас...

Югдандорас ни гиль-голь керис керку юрыс, и Марат саймис, пондiс кывзiсьны, мый аркмö öтöрас. А öшыннэзас вартiс вына тöв, кöдасянь зэгалiс керкуыс, мутшкöтiсö стенаэс. Шувка-шовка öдззис вартны тёс — видно, öт конецыс мезмис кöрттув увтiсь, и тöлыс понда лоис бур орсан. Чу, каж-каж чегласисö стын потшшез, вотш пöрис прясла.

— Кылан, хозяин, мый керсьö? — узян голосöн юалiс Маратлöн иньыс да дзурк-вирк керис койка пöввезöн — сьöкыта бергöтчис жöникыс ладорö одзнас.

— Кывнытö кыла, да мый öнi керан? — шыасис паныт Марат. — Петала вот, лöньсьыштас да. — Сiя пуксис, сяткöтыштiс койка весьтiсь выключательöн — биыс эз öзйы. — Но вот и водiс линияным.

Рытвыв öшыннэзас койыштiс зэр. Сiя вачкис сэтшöм вынöн, бытьтö койыштiсö кöньöс понiсь, и öдззис ковйыны-гывьявны öтöрсö! Эта шумыс пöдтiс и тöвлiсь вижгöмсö, и пуэзлiсь шувгöмсö, и тёсыслiсь шовкöтöмсö. И кысянь сiя этшöмыс петiс? Но и керас бöра йöзыслö уджсö!

Чеччыны одзöв эшö, да разь узьöтас сэтшöм шумас? Марат судзöтiс комбинезон, кöдö тöн небöма Зина, иньыс, сельповскöй ларёкись, кытöн вузасьöны донтöмик товаррезöн. Öзтiс керосиновöй лампаок, сувтöтiс комись пызанок вылö. Надз югöр малыштiс Маратлiсь векнитик чужöмсö, яйтöм рожабаннэсö, паськыт синнэсö. Тошсялöм тшöкаыс да кузь юрсиыс пöрисьтiсö сiйö: тöдтöм морт пуктiс бы сылö сорокся не етшажык, кöр мужикытлö вöлись тридцать.

Кыдз крутöя пондöтчис лёк погодаыс, сiдз и лöнис сразу, бытьтö виньдiс, и только размöд эшö гиззьыштiс керку юр кузяс лэчыт перевалка, дзик шыдöс койыштiсö.

Кымöрыс чулалiс, и лоис югыт. Марат бöр кусöтiс лампасö, дзимлялiс сiйö гор увтö и петiс огородечö. Дзар керис — карчйöрыс нач мöдiк, не сылöн дзик. Мый сэтöн и лоöма: ытшкытöм турун, кöда рытнас сулалiс пыш моз, сваль водöм да гартчöм. Не только ситуруныс, но и чорыт заа чышйыв, и катшасин, и кыз кока урбöж — быдöс водöм, ляпкöтчöм му бердас, бытьтö видзок вылас туплясьöм вöв табун. Нёштöмсялöмась и лук гряддэз, и картов: дзик нярьянöн нярьялöмась.

«Тiльöв-керан öнi этшöмсö», — думайтiс Марат ытшкас вылö видзöтiкö. А ытшкыны колö талун нето ашын, медбы эз нёльзьы туруныс.

Тöвныр резьöтöма крыша дорсис тёс и чапкöма сiйö рябина уввез коласö. Ыб ладорсянь пöрöмась кынымкö стын прясла, ляпкöтöмась том пожумок.

Марат учöтсянь велалiс неладносö лöсьöтны сэк жö, кыдз сiйö казялас. Заптiс пыкöттэз и сьöрна лэбталiс пряслаэсö. Мужик сiя, кöть и винерик, проворнöй, и эта уджыс сылö орсöм туйö.

Пожумокыс абу чегöма досповна. Марат и сiйö сувтöтiс кок йылас, кöрталiс шульыштсьöм качсö боновöй гезокöн и пыкöт сувтöтiс — быдмы, учöт, эн кув! Вöлись пырис гортас да висьталiс Зиналö, мый уджалöма ойся погода и мый керис ачыс. А сэсся лэдзчис видзöтны линиялiсь ойгортскöй вожсö.

Кöдö шуис умöльнас, сiя как раз и абу пöрöма: погодалöн кыз нырыс, тыдалö, мунöма бокижык. Зато пöрöмась куим опора трансформатор дынсис и кольччöма битöг Мусюр да бикерисьлöн аслас деревняыс.

Делоыт небытшöм — колö вочны линиясö.

И мунiс Марат бригадир дынö — нем мошкоритчыны сэтöн. Корны кö райсетись, чулалас быдса лун, а то и не öтiк — этö кöть кин сiдз висьталас.

Бригадир сетiс отирсö — битöг öнi оз позь пукавны: йöзыс видзöтöны телепередачаэз, пусьöны-пöжасьöны, песласьöны, шонтöны утютгез, паяльниккез. Варгас Кирил, кöда муас ни видзöтö, и то радиола босьтöм да эшö «электророс» пö мöдö небны. Оз, оз туй öнi некыдз битöг пукавны.

Гортас кайтöн Маратлö висьталiсö, что Чаканын биыс тожö абу: самöй ворота дорас пö куйлöны не öтiк опора. Кыдз нö Маратыс сiйö эз казяв? А ровно бы сiдз ни бытшöма горт мыс вывсяняс видзöтчис.

Чаканлöн аслас трансформатор, и Марат котöртiс сэтчин — колö выключитны пöрöм столба линиясö, медбы умöль дело эз аркмы. Выключитiс, замокалiс будкасö, öшöтiс пöлок: «Ремонт. Бисö не öзтыны» — и мунiс лöсьöтны мусюровскöй линия: сэтчин ферма, сэтчин моторрез уджалöны. А чакановса норовитасö, нылöн некытшöм агрегат абу.

Кузьöсь, öддьöн кузьöсь гожся луннэс, а Марат да сылöн отсалiссес проводдэсö йитiсö, кöр пуксис ни шондiыс: лöсьöтчöмын да кошшисьöмын чулалiс джын луныс, а мöд джыныс казявтöг путшалiс.

Лэдзчис Марат опора вывсис, чапкис-коккезсис «гыжжесö», водыштiс сук турунокö. Мыдзöмась-даки коккес! И косас, кылö, мыйкö лыйыштлö.

— Но, мунам, бикерись, — нуöтчöны колхозниккес. — Али модзöс видзчисян?

— Мунö, мунö, — иньдö нiйö Марат. — Ме эд эшö бисö понда öзтыны

— Но, öзты инö, шоччисян да...

Сьöкыта медбöрья опораыс лэбис, дак эз я коссö вöрзьöт? А кöть и невнаыс эм, дак чулалас, нем оз ло. Буржыка павкывлiс, да оз тай кыв. Этшöм удж бöрсяняс герьясьöны нiя, кöдна сьöкытсис полöны. Сэтшöммес öтпыр ёнжыка кöстасясö, а сэсся быдса год ошшасьöны: «Сiдз трубитi, сiдз трубитi — косö орис и киэзö куш гадь». Абу ни сiя уджалiсь, кинлöн киэс гадьсялöны. Куснясисö бы али уна чассэзöн Маратыс моз öшалiсö столб йылас, дак нюжалiсö бы и быгалiсö, кыдз важ гупер. И чорзисö бы, дзик изолятор. Мый и баитны, абу кокнит монтёрскöй уджыс, но эд сьöкытыс, кыдз баитсьö, дышсö повзьöтö, а чожсö öдззöтö.

«Куйлыны бур, да куйлiсьсö эд оз вердö — гортö жö колö кыссьыны», — тшöктiс лэбтiсьны асьсö Марат и рушки-рашки иньдöтчис деревнялань, кытöн сiйö видзчисисö инь да челядь.

Зина, тожö мыдз видзчисьöмсяняс, панталiс жöниксö öтöрас, лöгöн шыасис:

— Ойбыт тай готов мелитны, ровно луныс оз тырмы. Али принуд вештан? Али мироннэт шуксьöмöн шуксьöны?

— Фермасö да лесопилкасö оз туй сулöтны, Зина, — дорйисис Марат.

— Сiдз, сiдз. Тэ йöзыс понда ойсö он узь... А корасö, дак и медбöрья вешьянтö сетан. Аслат то стыныт лöсьöттöм.

— Ештам, Зина, ештам эшö, — гортас пырикö баитiс Марат.

— Но, но... Чег асьтö йöзыс понда, а аслат доброыт ась травитчö, — ыджыт обида сорöн пеняйтчис иньыс.

— Чöв, эн тöждiсь, Зина, — ласкова корис иньсö Марат. — Асъяпон кера... Кагаыт кыдз? Мыйкö тай урöситчис, шуан, да.

— Серавлö ни, — сё эшö дузгыльöн баитiс Зина, но тöдчис ни, что сiя часöт пондас баитны морт моз.

Öтiк ыбöсöн пырисö керкуö. Марат пöрччасис, миссис, пуксис пызан сайö, кытöн сiйö видзчисис ни Зина да тэчис жöникыс одзö стряпня.

— Лукись пирöггез керлi, мыся, локтан павжнайтны, а тэ и ныртö эн мыччав, — гажöн ни и жалейтöмöн шуис Зина.

— Часöт унажык тöрас, — тыра öмнас боткис жöникыс.

— Дак эд выть колö тöдны, — велöтiс сiйö Зина. — Тэ эд абу верблюд, тэ морт... Зоннэтö кыным лун ни эн адззыв — мунан пемытöн, локтан пемытöн...

Абу любо, кöть сiя и правда, этшöмсö кывзыны, сiйöн Марат перытжыка сёйис да водiс узьны. И тожно пондiс видны асьсö: «Быль эд ме, дзирыт зоб, гожумбыт ог отсав сылö. Учöт кага видзö и öтнас горт гöгöрын быдöс лэбтö. И киносö, натьтö, сойыс ордö оз ветлы видзöтны... Чöв, Зинуш, вот аслыным телевизор босьтам: меным премия кöсйöны, да и шедтöмыс öнi эм. Босьтам — видзöт, мымда колö и кöр колö».

Шондi петандор Марат саймис, чеччис, кышалiс лöз комбинезонсö и лэдзчис Чойва дорö миссьыны. Посок дорас сувтчис, нюжöтчис — коскаэс мутш-мутш вöрзисö, дзик косьмöм нинкöмын шуллез. Мыдзыс сё абу чулалöм, но юр оз вись, оз уöт трансформатор моз, кыдз овлö мукöдпыр етша узьöм бöрын. Но мый, эта и колö мортыслö!

Пуджис соссэсö, гумыштiс содзас сöстöм ва, койыштiс чужöмас да зубыта ниртiс долоннезнас кымöссö, тшöкасö, пельбоккесö, сэсся малыштiс голясö, пеллесö, чышкисьöмöн кайис гортас, посöдзись юис йöв. Марат любитö кöдзыт йöвсö: сэтшöмыс сукжык, чöскытжык, öддьöн пöтöса. И мыдзсö бытшöма вашöтö, бытьтö томтö.

Но вот öнi позьö и уджалыштны.

Öтöрыс ыркыт, кокнита лолассьö. Небытик тöлок ыркöтö чужöм; сiя и орсöтчö рябина листтэскöт, малалö таг кор да дюттьöтö сылiсь йыввесö, кöдна мезмöмась шатиннэс бердiсь. А ирга коласын вермасьöмöн чивзöны тавося воробейез — радöсь, что некин нылö оз мешайт кокавны чöскыт воöм тусёккесö.

Гарйыны столб увтö яма — Марат понда вит минутася удж: сiдз керас — бытьтö öжынöн писькöтас, как раз столбыс ыждочкаö. Велалiс ни, не öтiк сотня нiйö гуддис.

Этö öнi буритны пондiсö, а одзжык эд быдöс зырöн, а тöвнас эшö и черöн да ломöн.

Вот и ямаэс готовöсь, вот и столббес сувтöтöмöсь, потшшез дорöмöсь. Но кöс уввезiсь гöрдззыны стын — манливöй уджыс: стынниккес асланыс местаö зэлыта пуксьöны, сё чер обухöн колö вештавны. Зато некин оз коласöт — не пода, не морт.

Чаканын, чу, кинкö сьывны пондiс. Кин бы этö? А натьтö, строительнöй отрядниккез. Вот оланыс: водöны — сьылöны, чеччöны — сьылöны, уджалöны — тожö öммезнысö оз жалейтö. Неужто оз и мыдзлö? Али только сiйö и керöны — песняэз люлльöтöны? Дак бöра мöс картаыс лэбö жö.

Неылын тасянь Чаканыс, километр, буди, лоас, и сьылöмыс öддьöн ятнöя кылö — сiдз пельö и пуктö:

Кöркö олöмась нёль вон,

Кöркö олöмась нёль вон,

Кöркö олöмась нёль вон,

Пондöмась янсöтчыны...

Конечно, нiя — студенттэс — сьылöны. И бура жö голоссэзныс лöсялöны, дзик артисттэзлöн. Марат тожö пондiс нюжлавны песнясö, но сiя сэтчö мылякö орис и мымдакö нач эз кыв, а вöлись бöра косьöвтiс виль вынöн. Не, этö не отир сьылöны, этö радио горалö: Кудымкар ассис кывзiссесö асывсянь гажöтö. Басöка сьылöны, сьöлöмöдз йиджö сьылöмыс, быдöс вывтыр шонтö. То и дугдiсö ни сьывны, а песняыс Марат пеллезын сё олö. Кытшöм сётаки чудо сiя, песняыс! Кывзöв-керан, и сьöлöмыт гажмас. Да, песняыс ловтö шонтö.

Кык прясла гöрдззис Марат и чапкисис. Мыйкö думно лоис: кытшöм, поди, Кудымкар сы одза пондас сьывны? Эз я кинкö öзты бисö да радиола лэдз? А проводыс эд му вылас куйлö, эшö кинкö кышасяс сэтчö.

Сiя колис оградаас чер, босьтiс инструменттэзöн сумка, петiс улицаö. Сэк жö шовк оссис керку öшын и Зина мыччис öтöрас сынавтöм юрсö. «Но, фазаэс бöра оча павкисö, тыдалö, — думайтыштiс иньыс йылiсь Марат. ― Часöт замыканнё лоас».

— Тэнö разь кидтiсö гортсит? — öдззис видчыны Зина. — Али виль инька адззин?

— Ме Чаканöдз лэдзчыла.

— Лэдзчыв, лэдзчыв, — выргис иньыс. — Сэтчин эмöсь, тырмöны. Нёль рака ни тай олöны, тэ витöт лоан.

— Но мыля тэ сiдз, Зина! — обидитчис жöникыс. — Менам горт эм, инь. Менам кык зон эмöсь. Менö тiян дынö кöрталöмась, кыдз опора бердö провод.

— Кöрталöмась, кыдз шабашниккес кöртавлöны: вöрзьöтас тöлок — и лэбзьö проводыт!

— Тöдан мый, Зина? Ветлы-ко талун культмагö, закажит телевизор, — ылöтiс иньсö Марат.

— А деньгаыт кытöн?

— Лоас... Но, ме котрася.

— Кöть бы сёйыштiн, — небзис сьöлöмыс иньыслöн. — Мунан да öшан бöра.

— Кытчö öша? Ме деревняас ог и пырав. Ыбöссö будкасис осьтыштла и бöр...

Будкаыс вöлi замоктöм, и Маратлöн сразу сьöлöмыс усис: «Сiдз и эм — öзтöмась бисö!» Ванйöвтiс ыбöсоксö, мöртiс синнэсö щитокас, адззö: биыс абу öзтöм. Но кин осьтiс и мыйлö? И бöра сьöлöмсö зэлöтiс, дзик кусакаöн, зубыта чепöльтiс мороспань увтсö.

Замок эз вöв, и Марат пöдныштiс ыбöсоксö да, медбы эз ыжмав челядёк, пробойсö каттис кыз проволокаöн. «Колö баитны отирыскöт, ась оз чувйö трансформаторсö, — думайтö Марат. — А то этшöм кадас виясö кинöскö».

Деревня шöрас уннялiс пон; кытöнкö готсис курöг — видчис сы понда, что хозяйкаыс абу лöсьöтöма кольттялан поз. Чу, кытöнкö торгöны-баитöны отир. Этö, натьтö, инькаэс иньдöтöны пода — чукöртöны нiйö ворота дорö, кытiсь поскотинаö вашöтас пастух.

Марат мунiс видзöтны пöрöм опораэсö — туяс я нiйö сувтöтны али ковсясö вильöсь? Ылiсянь эшö пöрöм столбыс дынсянь казялiс, что ворота дорас, амбаррес увдöрын, чукöртчöмась инькаэз да кынымкö старик. Мый сэтöн керсьö, мыйлö эта одза öксьöма йöзыс? Сувтöмась, керöмась кытш и мыйкö видзöтöны да баитöны негорöн.

Быдкодь дивоыс öнi аркмö, дак быдöс сiйö он вермы видзöтны. Но сёжö Марат сибöтчис морт чукöрыс дынö, нёджжöвтiс кытш пытшкас. Сэтчин, лудовка вылын, куйлiсö кык морт — мужик да инька. Куйлiсö кöрчитчöмöн, но ордчöн и киись киö кутчисьöмöн. Мый эта лоö, электрик эз вежöрт сэтчöдз, кытчöдз эз казяв куйлiссес увтiсь алюминийись провод, кыйöмö, дзик гезок. Бытьтö токöн вачкис Маратлö юр кузяс, сiдз и зэгнитчис быдсöн вывтырнас.

Сотчöмась!

Сотчöмась кык морт!

Киннэз жö нiя? А-а, Вартас Кирил да Мари.

Ась бы синнэз письтiсö, чем адззывны этшöмсö! Марат бöр-бöр керсьыштiс, бергöтчис отирыс дынiсь, шагньöвтiс размöд. «Мый ме кера, мыля пышша, кыдз преступник», — сувтöтiс сiя асьсö да бöр сибöтчис морттэс дынö, юалiс, мый оз ков:

— Мыля нiя сэтöн?

Сiйö лэдзис аслас местö öтiк старуха и пондiс ойзыны:

— Ой, беда, беда! Войнасö быдсöн мунiсö — ловйöн кольччисö, а гортын этатшöм смерть адззисö. Вот эд мый петiс, вот эд! Ой!

Кык морт!

Öтдруг кык морт!

Этшöмсö Марат эз на пантавлы, нельки эз и кывлы.

А мыйлö нiя кутчисьöмась? Али пöрисьувьяныс детсадiсь челядёк моз ветлöтны пондiсö?

Варгас пиян керку дынын уннялiс пон, и эта уннялöмсянь Маратлöн сьöлöмыс чинiс-ыждiс, дзик пизян йöв вылын кень.

— Кöть вевттьыны бы мыйöнкö, — шуис сiя жö старухаыс, кöда ойзiс.

— Амбар посöдзас рогожаэз эмöсь, — висьталiс Мыся Мишка, Кириллöн сосед, Чаканын медпöрись морт. — Мун-ко вай, чапкышт вывтаныс, но асьнысö эн вöрöт. Видзöтас милиция, вöлись и нöбöтам.

— И кытчö тiйö тэрмасит? — причитайтöмöн баитiс старуха, кöда лöсьöтчис сайöвтны кулöммесö, но мунны эз тэрмась. — Пукалiт бы бöр коска выланыт, эд павьялö быдлаöт...

— Кöр эта шогмис? — юалiс Марат.

— Кыдз кöр? Дак вот часöт и шогмис, — висьталiс Мыся Мишка. — Ме крюккез мунi видзöтны, дак сэк нем эз вöв. А бригадирыс петöма гортсис — этö ме бöрсянь ни — и кылас: кинкö няргö. Локтас татчö — эна лöньсьöмась ни. Вöлись кусöтас бисö... Павкас öнi тэныт, бикерись, — кöсйис сiя Маратлö. — Эд пöрöма столбыт, дак мыйлö нö öзтiн битö?

— Ме тöн кусöтлi, Мишка, — гажтöма шуис Марат. — И объявленнё öшöтлi.

— Ачыс эд, тыдалö, öзйис, — лёкöтчис старуха. — Милицияыс локтас, дак путшöтас дзуг суниссö.

— Ме сiдз жö думайта, — согласитчис старухаыскöт Марат. — Правдаыс оз вöй. — И мунiс бригадир ордö: колö юасьны, кыдз сiдз петiс Кирил гозъякöт.

Туйыс эз вöв комока да гöпья, а Марат мунiс и чужьясис, дзик шогалiсь. Мунiс юрсö öшöтöмöн, дзарьясьтöг, а паныт кыссис векнитик улица, нöитчöм да сьöдöтöм, ровно косьмöм изоляционнöй лента. Тальччалiс бы топыта, а муыс кок увтас ветлiс, дзик ва вылын пыж, и йöктiс деревня сайись мысыс. Мунiс и кылiс вывтырнас, кыдз осуждайтöмöн видзöтiсö сы вылö Чаканiсь олiссез, видзöтiсö поннэз, видзöтiсö öшыннэз, видзöтiсö, кажитчис, и пуэс, и проводдэза столббес, и нельки йöррезiсь рыжмöм майöггез.

Беда, беда пырис Чаканö.

Беда павкöтiс и Маратлiсь пельпонсö. Мунiс мужикыт и адззис одзсис Кирил гозъясö, дзик нiя куйлiсö улица шöрас. Кыдз сiя öнi пондас ветлыны эстi? Пыр тöдвылын, пыр кок увтын лоасö, сiдз ны бердö и пондан падмыны.

Кыдз нö тэ сiдз, Марат?

А виноват я бикерисьыс?..

Абу сiя виноват. Вöлi быдöс керöма инструкция сьöртi. А бисö кинкö нарошно öзтiс. Нарошно!

Ох и лёк эта мирыс, лёк!

Чакан деревняö Марат кöркö бисö медодз пыртiс. Отирлö югыт керис, виль олан сетiс, Колö бы сiйö, Маратсö, вон туйö видзны, а сылö то тай мый варганитiсö.

Лёк, лёк мирыс!

Лёк? А тэ? Тэ абу лёк? Тэ добрöй, да? А ноко думайт буржыка да меряйт, мымда керин тэ бурсö, а мымда умöльсö. Тэ сетiн деревняыслö би, а мырддин сылiсь кык лов. Кык лов!

Нет, этö керис не Марат, этö керис мöдiк!

Кин мöдiкыс, кин?

Колö адззыны сiйö, кöда öзтiс. А öзтiсö, тыдалö, ойнас.

Мунö Марат, споритö аскöттяс, думанас кошшö правдасö. А кыв йылас пизьö гажа песня, сiдз сiя и корсьö сьывны:

Кöркö олöмась нёль вон,

Кöркö олöмась нёль вон,

Кöркö...

Тьфу, колö горзыны, а сiя сьылö! И кысянь сы бердö лякасис эта песняжугыс? Мыля сiя оз тарöвтчы Чойкерöс увтас, оз рознитчы сизим ладорö? Мыля сiя оз мун медылiсь вакрамешö, кöр мортыслö не сьылöмви, кöр не гажыс дорöдз? Вон и понжугыс горзö — сьöлöм гудыртö. Не морт эд, зверь сiя, и то мортсö жалейтö. Дугдылiс ни уннявнытö, вижлок, али эз на?

Лэбтiс юрсö Марат и казялiс, что деревня сайö петöма, рас дорас ни сибалö. Вот эд сьöд думаыс кыдз кыскалö, бытьтö кöв йылын новйöтö. Этадз позьö и йирö пырны, самöй ярка пыдöсас, нето юртö колода увтö сюйыштны.

Бертiс, сiя жö туёк кузя пондiс кайны Чаканö. А юрас варкйö-пизьö дума: «Кыдз нö сiдз петiс, а? Эта дырна уджалi, этадз старайтчи — и на-кось! Надейтчисö отирыс ме вылö... Тютя тэ вöлöмыт, Марат, а не опора. А мый эшö Зинаытлö висьталан?»

— Эй, Марат! — сувтöтiс сiйö бригадир, кöда петiс Мыся Мишкаэзiсь и ылiсянь эшö пондiс баитны: — Кыдз инö этчöдз олiмö, зонка, а? Ровно тай юрыт самогонсянь абу кольмöм, а созоррез колялö? Мый лоис?

— Ог на тöд, Николай Иванович... нем ог тöд, — сьöкыт кылöн висьталiс Марат да юалiс: — Трансформаторыс осьта вöлi? Тэ пö тай бисö кусöтöмыт.

— Кин тэсся замокалас, ачыт эн пöднав дак? — кöритöмöн шуис Николай Иванович. — Мöдi эд тöн рытнас будка дынас кежавны, да ылалi. Да разь ештан быдлаö? Не котöрок ме котрасьнытö: мус увтам осколок. А тэ котрась, ассит хозяйствотö дозирайт.

— Ме пöднавлi.

— А кин осьтiс? Висьтав, кин?

— Ме тэнчит мöдi юавны, поди, мыся, адззылiн...

— Тюрьма эта понда, тюрьма лоас! — видчис бригадир. — Кошшы злодейсö, не охота пуксьыны дак.

— Кытiсь кошша?

— Татiсь. Китайись сiя эз лок... Часöт милиция каяс, тэ думайт кытчöдз, бура думайт.

Бригадир мунiс, а Марат öтка майöг моз сулалiс улица шöрас да ниртiс кымöссö тöвзьöм да чорзьöм кинас и решайтiс бригадирлiсь задачасö. Сулалiс вель дыр, пымавтöдз, но путнöйыс юрас нем эз шед. И сэк вежöртiс: öтнат эстöн нем он кер — колö мунны отирыс дынö, юасьны морттэзлiсь.

Чаканын олö öддьöн ассяма отир: ас йывсис некинлö нем оз висьтав, и соседыс йылiсь, пондан кö юасьны, не бур, не умöль кыв оз горöтчы, кöть и быдöс тöдö. Не весь эд, тыдалö, война вылас мужиккес чисто разведкаын вöлöмась, а женскöй увтырыс (нiя тожö татiсь уна ветлöмась) — сё штаббезын да особöй отделлэзын. Вот буди Мыся Мишка эз служит и сыкöт позяс баитны. Вон как раз сiя гортас пырö.

Эз любит Марат ветлöтны йöз керкуэзöт, но правдаыс понда кöть кытчö мунан. И мунiс старикыс дынö, пондöтiс сыкöт басни, да Мишкина одзалiс жöниксö:

— Нем эг адззылö, добрöй морт, и тэ весь кадсö миянкöт эн каттьы. Ми некытчö ог петö, миянö некин оз пыр — воть нем огö кылö. А кöр и висьталасö этадз мый, дак джын пельнат уна я ни вежöртан?

Да, сэтшöммескöт кашасö он пу. Петiс ны ордiсь Марат вычкöп — олö пö, кыдз олiт, суськö быдöс, мый колö и оз ков.

Кытчö эшö мунны?

Рас сайсянь кылiс мотоцикллöн гор. «Милиция, натьтö, локтö, — решитiс бикерись, и сьöлöмыс бöра вöрзис местасис: тöдвылас усисö Кирил да Мари. — Милицияыс кöть бы отсалiс... Да сылö мый — вовлас, видзöтас да и бöр шентас-мунас, а меным, батя, татöн колö овны, асланым отиркöт уджавны. И колö адззыны сiйö, кин бисö öзтiс. Ог адззы — медбöрья мортöн шуасö, ме вылö видзöтны оз пондö».

Не кокнит мортыслö овны, не кокнит! А Маратлö талун мед ни сьöкыт. То тай сувтöтiс сiйö сьöкыт думаыс туй шöрас и некöдöрö оз лэдз. И некин сы дынö оз сибöтчы, некин оз кытсöвт, кыдз одзжык вöвлi, кыдз эшö тöн вöлi. Талун сiя некинлö ни оз ков, кыдз сотчöм предохранитель.

Мотоцикл пырис деревняас, и Марат пеллез дынöдз локтiсö тöдса песнялöн кыввез:

Мало-дело инька босьтам,

Мало-дело инька босьтам...

Да эта и эм эд ойся песняыс!

Бикерись котöрöн чепöссис мотоциклыслö паныт, сувтöтiс сiйö. Лöньсис моз моторлöн горыс, орис песнялöн шыыс. Зелёнöйкодь юрсиа, öддьöн жаритчöм чужöма зонка, кöда пукалiс коляскаас и видзис киас магнитофон, гажöн юалiс:

— Мый, дядюк, песнясö кывзан бы?

— Бур песняокыт, — басни ньылат горöтчис Марат. — Позьö и кывзыштны. Тi кытöн олатö?

— Райын, дядюк, райын, — сё сiдз жö вышитчöмöн лёбис зелёнöй юрсиаыс. — Кывзан бы, дак вовлы, ме верма мыччавны туйсö. Вежöртiн? — и тшöктiс ёртсö: — Дзизъяв, мый дундiн?!

«Но и ась дзизъялöны, — шуис ас пондас Марат, — а ми номерресö гижам да милициялiсь юалам, кытöн нылöн райныс и киннэз нiя сэтшöммес», — и дзар керис бöрсяняныс, кöр нетшкöвтчис одзлань мотоциклыс.

А машинаыс номертöм!

И бöра вöтчис ны сьöрö. Кыдзкö колö тöдны, кин ордын гöститöны эна нильыг морттэс. А что бисö ойнас öзтiсö эна, Марат бура ни тöдiс.

Код зонкаэс кежисö деревня дорись керку дынö, кытöн важын ни оз олö. Кин нiйö сэтчö лэдзис, бригадирыс я мый я? Ны йылiсь, натьтö, тöдö акушерка Зоя: керкуыс сылöн ордчöн неоланыскöт, а морт сiя юасьтöг оз вермы овны. И не татiсь. И честнöй, веськыт: мый эм, дак суськыны оз понды. Али эшö зонкаэскöт пондывны баитны? Нет, коддэскöт горсö он варт. Да и тэрмасьöны кытчöкö, вон и мотоциклнысö туй шöрас кольöмась. Кыдз бы эз пышшö, кырныш чукöр.

Кöд коста Марат бергöтлiс юрас, кыдз кутны хулиганнэсö, зелёнöй юраыс петiс керкусис. Сiя казялiс Маратсö и шутньöвтiс. Посöдзас мыччисис мöдыс, тожö казялiс Маратсö и уськöтчис керкуас бöр — мыйкö вунöтiс, тыдалö, босьтны. Вежöртiс бикерись, что эстöн важничайтны некöр, и уськöтчис зелёнöй юраыс дынö, кöда мый вын куртiс-картiс кокнас, но заводитны мотоциклсö эз вермы. Кутны сiйö колö часöт жö: кыдз заводитас — он судзöт.

Кöр кольччис мотоциклыс дынöдз дас метр ылына, Марат кылiс:

— Эн сибöтчы, дядюк, пиннетö ляза! Вежöртiн?

Но бикерись сибöтчис, сувтiс мотоцикл мöдöрас, висьталiс:

— Бытшöмика кора: мунам правленнёö... Зонкаыс вдруг нюжöтчис мотоцикл вевдöрöттяс и сырйыштiс Маратыс юр кузя, но киыс умöля павкис, и макайтчисьыс ёрзыкнитiс му вылас. Марат чужйис сылö кытчöкö мус увтас, кыскыштiс монтёрскöй пуртсö да пурскис-писькöтiс бöрись колесоэсö. И чепöссис деревня шöрас, кытöн бригаднöй керку, кытöн отирыс. Мыся Мишка весьтын сувтчыштiс, дзар керис бöрас и синнэсö барöтiс: деревня саяс, веськыта рудзöгöттяс, одзасьöмöн, дзик повзьöм баляэз, резiсö-котöртiсö куим морт — кык зонка да нывка, кöдö и видзчисисö, тыдалö, код зонкаэс.

Быдöс вежöртана: нiя мöдöны дзугны ассиныс коктуйнысö, нельки мотоциклсö чапкисö.

Бригаднöй керкуын вöлi уна отир, но талун нiя эз шумитö, эз сералö, а баитiсö негорöн, кыдз овлö горе да беда коста. Бригадир, конечно, важын ни сетiс наряд, но колхозниккез эз тэрмасьö мунны видззез вылö: нiя видзчисисö врачöс да милиционерöс, медбы дзимлявны Кирил гозъяöс да тöдны, мый керас милиция бикериськöт. А сiя то пырис керкуас и здоровайтчытöг уйыштiс пызан дынö да пондiс звонитны милицияö. Дежурнöй шыасис чожа, и Марат висьталiс, кыдз хулиганнэз колисö мотоцикл да пышшисö Чаканiсь. Эта юöрыс, тыдалö, вöрзьöтiс местасис милицейскöй дежурнöйöс, и сiя эшö юасис, кыдз пасьтасьöмась пышшиссес, кытшöм нылöн мотоциклныс, кöдöрö иньдöтчисö.

Отир кывзiсö, дзарьялiсö öтамöд вылö, дивуйтчисö. А Марат полiс видзöтны ны чужöмö, эз лысьт пуксьыны ныкöт ордчöн и сё сулалiс пызан дорас да чышкис пымалöм кинас бусöсьмöм телефонсö, гуддис гыжнас чорзьöм гут шактарресö.

— Этö, натьтö, нiя нетопыррес, кöдна неолан керкуас сувтчылiсö? — юалiс Мыся Мишка да ласкова, кыдз гöсьлö, шуис: — Тэ пуксьы жö, пуксьы, Степанович, шоччöт коккетö, — и вешшыштiс бокö — лöсьöтiс места.

— Нiя и эмöсь, — висьталiс Марат да пуксис мыччалöм местаас. — Кин нiйö сэтчö лэдзис? Эна и öзтöмась ойнас бисö. Жугдöмась замок и öзтöмась.

— Да эд Варгас пияныт как раз и лэдзис, — юöртiс Мишка. — Ме дырни нiя корсисö патераас. Локтiсö, нимöн-айнимöн Кирилсö шуисö. Ми пö инженеррез, ваэз пö меряйтам. И десятка чапкисö. Сэк и шуис Вартас пияныт: «Менам свестялöн эм пустöй керку. Сэтöн арнас картов гарйиссез овлöны. Сэтшöмыс оз лöсяв?» Мöддэт и согласитчисö.

— Адззан, мый петö: ловнысö десятка понда вузалiсö, — горöтчис Мишкалöн моньыс.

— Кöбы тöдiсö, дак и сотёнка бы эз босьтö, — шуис Мишка. — Да эд притчаыс не вöрöт, а йöзöттяс и ветлöтö.

— Бöр бы туйис бергöтны дак... — горöтчис Мишка монь, но старикыс эз сет сылö баитнытö, ачыс висьталiс:

— Не весь нiя свигнитiсö татiсь, не весь. Бöжныс, натьтö, и мöдiлаын лякöсьмöм. Дзурк синаöсь нiя, нетопыррез. Сэтшöммес мортлiсь юрсö мургыльтасö — нем он босьт.

Гажажык лоис Маратлö, дугдiс сылiсь сьöлöмсö бытшкыны — отирыс пондiсö сыкöт не врагкöт моз баитны, эз пондö синнаныс бокö вештыны.

Локтiс газик. Сэтiсь петiс томыник, югыт сина милиционер. Сьöрсьöн-бöрсьöн быдöнныс петiсö бригаднöй керкуись и Мыся Мишка бöрсянь, кöда котöрöн люгис милиционеркöт ордчöн, пондiсö лэдзчыны амбаррез дынö. Ны сьöрö кыссис и Марат. Кыссис и бедуйтiс умöлик морттэз вылö, кöдна понда абу некытшöм закон. Кытöнкö юрпыдöсас, дзик жель, бытшкис-писькöтiс дума: мыйлö эта биыс, мыйлö берся машинаыс, ежели нiя мортыслö керöны быдкодь изъянсö, зубытсö, шогсö, ежели вайöтöны вийсьытöдз? Мыйлö? Ловзьöтны бы вот Кирил гозъясö да юавны нылiсь, мый öнi керны ны вийиськöт — электричествоыскöт, — дак мый бы нiя висьталiсö? А висьталiсö бы, натьтö, сiдз: «Лёкшöрт сiя век кеж — мед и дукыс эз вöв эна кöртовöй веззэзлöн, эна стекляннöй гаддезлöн! Паздыны нiйö — вот мый колö керны!»

Марат сэтчöдз ылалiс думанас, что адззис ни, кыдз Варгас пиян судзöтiс горсайись кöртовöй гормöччан да пондiс сорлавны сiйöн проводдэз, масьтыны лампочкаэз, патроннэз, розеткаэз. Кытшöмкö не морт вын новйöтiс сiйö, дзик том жеребецöс, и сiя некой пору желлис-лэдзис улö быдöс, мый позис. Сюрис клюка увтас радиола — и сiйö изналiс. Казялiс счётчик, горöтiс: «Ак тэ, лешак син! Тэсянь эд керкуас быд покасьыс и пондöтчö!» — и жогйыштiс сы кузя клюканас. Рез-паз мунiс стекло, торрез вылö чеччалiс сьöд коробка, но ачыс сё дзингö, сё вöрöтчö. «Мый, он бы сетчы? Вот ме тэнö этадз...» — сiя мöдiс крюкыштны проводдэсö и мöдöртны нiйö, но — стоп! Куш проводдэс бердö павкöтчыны оз туй!..

Кöбы этшöмыс вöлi Кириллöн юрас, дак талун асывнас изъяныс эз бы вöв. Но эз вермы лоны и сiя, кыдз Марат думайтiс Варгас Кирил йылiсь. Да, эз вермы! Сiя мортыс, кöда лöсьöтчис ни небны «электророс», эз вöв варвар, сiя тöдiс электричествоыслiсь бурсö да вынсö. Электричество — мортлöн медбур ёрт, мугтöм и мыдзтöм отсасись, дак мыйлö нö ёрттэсö паздыны? И Марат чорыта решитiс: «Колö велöтны отирсö дружитны биыскöт».

Деревня дорас Мыся Мишка кольччыштiс милиционерыс дынiсь, кытсöвтiс Маратöс да висьталiс:

— Кылан, Степанович: нiйö нетопырресö быдса неделя ни кошшöны! Сiдз ме и тöдi!

— А тöдiн, дак мыля нö одзжык эн висьтав? — шыасис Мишкалöн моньыс, но Марат соралiс сылiсь баснисö:

— Кутöмась?

Мыся Мишка дивуйтчöмöн горöтчис:

— А мыля озö! Сэк жö и панталöмась, кыдз тай звонитiн.

Маратлöн тöждöмыс эшö вöснямис, эшö кокнитжык лоис сьöлöм вылас. Сiя шы эз сет, только думыш керис: «Эм правдаыс му вылас, только колö кошшыны, кöр сiя абу тэ дын матын. И дорйыны сiйö колö, медбы кытшöмкö неморт эз öмлöсав да эз вожась сы вылö».

Чаканшор сайын öдззис туткыны-орсны горн. Пондöтчис пионерскöй лун. Сiя вöлi сöдз и чöскыт дука — косьман турун дука.

Марат видзöтыштiс часы вылö: öкмыс час. Зина челядьнас, натьтö, лöсьöтчö посадö. Не, оз эшö: сiя видзчисьö жöниксö — эд кöсъясис чожа ветлыны. Кöсъясьнытö кöсъясис, да асылыс вон кытчöдз нюжалiс — лун кузя лоис. Но ась. Ештас эшö и сельмагöдззас ветлыны, и пöттöдз уджавны. Может, и сiя, Маратыс, иньыскöт ветлас: телевизорсö сёравно колö босьтны. А сыбöрын — и песласян машина, и бритчан, и чышкисян.

Дата добавления: 2015-11-16