Геройсянь козин

Гижа вонöлö фронт вылö гижöт. Гижа жагвыв, медбы не пуксьöтлыны «чераннез»: пероö важ, «ракасялöм», и чернилосö видзö умöля. Гижа поснит букваэзöн, медбы öтiк листбок вылас тöрöтны быдöс, мый мöда висьтавны. Мöдiк бумага абу. Эта листокыс öт ладорсяняс лоас гижöт, а мöдсяняс — куим пельöса конверт да адрес.

Перво юöртi, что гортын быдöс бур (а кöин джагöтiс балянымöс), быдöнным, мыся, здоровöсь (а мамö шогалö), няньöн, мыся, вердöны (а сёям пистик да пикан сора кöвдöммез). А эшö, мыся, меным небисö сандалиэз (эта быль: заготларёкын баля кучик вылö вежимö).

Кыла, кинкö сярöтö öшынас. Видзöтi: военнöй, тшöктö петны.

Пета, ачым думайта: «Может, вонöсянь юöр вайис?» Эз, мöдкодь могöн локтöм:

— Мотоциклöн сибдi юас. А тэрмася Кудымкарö. Лок жö кыскам... Мотоцикл! Ме сiйö эг на адззывлы, и, конечно, мунi.

Сiя сулалiс ю шöрас — куим круга, коляскаа, рульыс — дзик сабанлöн ороппез паськалöмась. Зелёнöй краска вылас шондi югöррез орсöны.

— Пыр машинаыс дынö. Кöр понда газуйтны, тэ бöрсяняс тойышт...

Сiя сапога и пырис пöрччасьтöг. Ме чöвтi сандалиэзöс, пуктi ва дорас, пуджи вешьян коккезöс. Но казялi, что пöрись кöза мелань кыссьö да тырппесö вильöтö. «Сёяс эшö, ог коль», — решитi ме да пыртi сандалиэсö сьöрам и чапки коляскаас.

Солдат заводитiс мотоциклсö. Пидзöсам вачкис ва гы, и ме пондi тойыштны. Рульöттяс татшкис и ачыс, но машина только ыргис да зэгсис, а вöрзьыны эз вермы. Но вот сiя нетшкöвтчис одзлань, и ме шляп водi ваас! Кöдкоста чеччи да чышки синнэзöс, мотоцикл эз ни тыдав, только кылiс сылöн гажа дзизгöмыс.

Петi берегас. Кöза видзöтö ме вылö да дзик сералö.

— Серав, серав, кытчöдз абу сера! — дразнита кöзасö. И сэтчö вежöртi, мый аркмис: сандалиэзö тарöвтчисö Кудымкарö.

Чöвтчи, пидзрала паськöмöс, думайта, кыдз понда правдайтчыны мамö одзын. Лоас, конечно, меным «вежалуныс»! И бöра котрась кöмтöг нето нинкöмöн.

«Мунiс и спасибо эз шу! — видча. — А эшö мотоциклöн гöняйтö! Кысь сiйö öнi кошшыны?»

Кайи гортö, вежи паськöмöс, кутчи письмо бердö. Но юрсим некыдз оз петö сандалиэс. А эшö вонöлö нiйöн ошшаси. Буди, кырöвтны нiйö кыввесö. Дак гижöтö нёштöм лоö. А кыдз кольны — лоö бöбöтчöм... А что «олам бура» — абу бöбöтчöм? Да сэтöн мамö виноватöйыс... Мамö и тшöктiс гижны: ась пö зонкаыс оз тöжды миян понда, ась пö ас йывсис думайтö да врагсö буржыка песö...

Гижöмö дзугсис, и ме чапки ручкаöс. Но эд мамö тшöктiс гижны почтальоныс локтiк кежö, медбы гижöтсö сыкöт посадöдз ыстыны!

Кытчöдз вермаси аскöттям, локтiс Аринка, кöдö деревняас быдöнныс шуöны Лисопеткаöн. Этö сы кузя сiдз, что нывка уджавны ветлö велосипедöн городскöй больницаöдз.

— Васёк, тiянö кин вовлiс талун?

— Опонишна. Куран пинь тшöктiс керны.

— А солдат эз вöв?

— Вöлi жö.

— Дак вот тэныт козин сысянь, — Лисопетка сетiс сандалиэзöс. — Да эшö мöдiк козин, сысянь жö... На-ко. — Нывка пуктiс киам пурток — лöз оропаö, кöстасянаö, кык пуртаö. — А ме думайтi...

— Оз ков думайтны. Сiя — Герой, а Геройес тöдан кытшöмöсь? Вот-вот! Эшö висьталiс, что кöркö пö, может, ештас вовлыны тэ дынö да спасибо висьтавны.

— Ась вовлö...

Лисопетка мунiс, и ме пондi пешлыны, кыдз вундасьöны пурттэс. Нiя кыкнанныс вöлiсö öддьöн лэчытöсь, мый йылiсь гижи и вонöлö.

ВАИСЬ НЫВКА

Ме талун горт олiсь, кага видзись. Асылыс вöлись пондöтчис, и кага эз на саймы. Мамö пöжалiс лук чеплянiсь пирöггез, и ме гарда нiйö да юа пöжöм йöв (кага видзись — йöв кень панялiсь). Öшын сайын сук туман. Сы пырйöт и улица сайись керкуэс öдва тöдчöны. Кажитчö, асылыс югдiс да и падмис, бöр ланьтiс. Но ме син одзын жöдзö ыджыт часылöн веж маятник — тюп да тяп, тюп да тяп. Сiдзкö, кадыс вешшö, только оз тэрмась, нач жагöна, топ мыдзöм дедко. И ме ог тэрмась, чöсмася пызан саяс да видчися, кöр саймас кага.

Пондiс готсьыны курöг — кольть сетiс. Сiйö колö пыртны. Петi оградаö, лöсьöтча кайны гид вылö, кытöн курöггеслöн кольттялан позыс, но сэтчö бут-бат пырис шардöм-повзьöм Пашок, казялiс менö. Мыйкö висьталö бы, да оз инмы, только чуманокöн, кытчö öктылö вуграсян гаггез, öвтчö.

— Тэ мый, Пашок? — Этчин... öнджа...

— Мый этчин? — Сынасьö... öнджаыс...

— Кытшöм эшö öнджа? Висьтав бытшöмик!

— Да веж юраыс... Öмель йирокас. Вöлись арталi:

— Кульпияныс?

— Но-о! Веж юрсиа. Кер вылын пукалö.

— Эн бöбöтчы, Пашок!

Зонкаыт и мыктавны дугдiс, дорйисьö:

— Честнöй пермяцкöй! — горöтiс сiя да чуманока кинас пернапасасис (кöть пионер, а бабыс моз керö). — Локтi, лöсьöтча вуграсьны, а сiя — пуль-поль петiс васис да кер вылас пуксис. Ляч пасьтöм, юрсиыс веж-веж.

Баитiсö, что Öмель йирокын олö кульпиян, кöда мыччасьлö морттэслö умöль одзын. Но сiя минутаö ме умöльыс йылiсь вунöтi, кыдз и кагаыс йылiсь: полöмöс вермис ю шöрись нывкаыс.

Мийö котöртiм деревня увдöрас. Ю весьтас сё эшö öшалiс чочком, но орлассьыны ни пондöм шебрас. Гусясьöмöн, кынöм выланым, кыссим берег дорöдз, вöйсасямö [6] баддес коласöт. И сэтчö чижйöвтiс дзирдалан голос:

— А-а, шедiт, кульбук юррез!

Менам сьöлöмö пик мунiс, а чужöмам дзик койыштiсö дзирыт ваöн, и нач вынтöмсялi.

— Мый нö куйлат? Чеччö! Кöть тöда, кытшöмöсь тiйö!

Ме пукси, видзöт кери: одзам сулалiс кыз кока, чочком юрсиа нывка, пасьтасьöм кокнитик халатö, а пельпон вылас куйлö паськыт да кузь чышкöт.

— Не одзöв я, лякöсь ныррез, пасьтöм нывкаэс вылö видзöтлат? — кöритiс миянöс нывкаыс да мунiс деревняас...

Сыбöрын тöдiм, что «веж юрсиаыс» вöлöма Пашок соседдэзлöн городскöй гöстя, кöда вовлöма миссьыны Öмель йирокö.

МЫЖА

Висьт

Чойдор, кык вöр коласiсь учöтик деревня, лöсьöтчис семик кежö. Семик — ыджыт касьтiсян лун и ыджыт праздник. Чойдорын сiдз и шуöны: «Öбедöдз горзам, öбед бöрын сьылам». Касьтiсян кежö быд керку пуö-пöжö сымда сёян, мымда куим лунöн не сёйны. И быд сёяныс öддьöн пöтöса: госа, виа, яя, кольтя.

Сералöны тай чойдорса ас выланыс, челядь вылö ыстiсикö: «Мам, кöр нö лоас сiя луныс, кöр тай тупöссесö пруддян-сёян да лабич вылас кынöмтö он вермы лэбтыны?»

И быль, эта лунö Чойдорын медодзза сёяныс — тупöссез, шыдöсаöсь и шыдöстöмöсь, но кыкнанныс виаöсь. Сэсся блиннэз, кольтёвöй каша, селянка, пöжалöм кольттез, рисяйöв, нöкьяйöв, пöжöм калиг да сёртни. И, конечно, — черинянь. Лыддиссьö, что черитöм касьтiсяныс — не быдса касьтiсьöм: кулöммес пö медбура вошшöны пым черинянь дорын.

Эттшöм дума сорöн пукалö ю дорын да вуграсьö Лёня Чойдоров, даскыкгодся вежöра зонка. Сiя быдмö öтка пиöн, но аймамыс, надзкодь морттэз, сiйö оз нежитö не оз пежитö, а быдтöны уджалiсьöн, крестьянинöн. Да позьö висьтавны, что зонкасö быдтö бабыс — чорыт мывкыда, сё эшö волькыт чужöма инька, а мамыс да айыс, мöс высьтiсь да тракторист, только пасьтöтöны да кöмöтöны...

Шондi пуксис ни, а сё шоныт, кыдз луннас. Мöдöрас, Лёнялö паныт, сулалö гöрд виззя, бабыс кепись кодь сера, кымöр. Сысянь и юыс сера, бытьтö сы вылö ольсалöмась джодж дöра. Лёня пель дынын норöн няргöны номмез: «Ва-ай! Ва-ай!» Зонка öвтчö кинас, пöлясьö, зэгöтö юрнас да думайтö ыджыт чери йылiсь, кöдаись петас быдса черинянь. А ыджыт чери оз и думайт шедны, нельки учöтыс оз самась. Но зонка веритö, что оз вермы лоны сiдз, медбы семик кежö немымда эз шед. Конечно, ны холодильникын эм ни, но колö бы виль чери. Сiдз бабыс шуис.

Жольнитiс сермöт. Лёня бергöтчис эта шы вылö и казялiс мужикöс: костюма, сапога, юр вылас тюбетейка. «Кытшöмкö роч, не татiсь, — вежöртiс Лёня. — Но мый сiя эстöн керö сермöтнас?» А мужикыт горöтчис комиöн:

— Сет, сет сылö, юиньöй, гырись чери, а не поснитö! — и куимись сьöвзис ваас.

— Ваас оз сьöлалö, — казьмöтiс Лёня.

— А сiдз заговорыс тшöктö. Он сьöлась — и чериыт оз самась. Гагсö тай сьöлалöны жö...

Голосыс рамыник, негора, но невна жеркöтчö, дзик дрöжитыштлö.

— Гагсö колö, сiя — сам...

— Бытьтö яя бутерброд, ну? — серöмтчыштiс мужик и чирöстiс: — Кыскы, мый сунасян! Лёня кылiс жö, кыдз вöрзис вугырыс, и нетшкöвтiс шатьсö асланяс. Сэк жö васис мыччисис ыджыт кельчи, викыль-викыль керис бöжнас да кыш-паш водiс ва дорись эжöрас [7].

— Адззан?! — шуис мужикыс. — Ме тöда, мый колö керны!

— Разь тöдiсь.

— Мымдакö сэтшöм... Чери меным бура шедö, а вот вöввез — озö... Бригадирныт, Роман Кузьмич, шуис: «Мун кут кöть кытшöмö, миян шедöны», а öтiк оз сибöт. Может, отсалан? Томжыкö бы...

— Кутнытö? А... мыйлö сiйö?

— Ме — геолог, Иван Петровичöн шуöны... Вон тай палаткаэзным... Öддьöн колö ветлыны районö... Луннас, ачыт тöдан, некöр...

Вöр дорас былись сулалiсö палаткаэз. Чойдорын баитiсö, что геологгес кошшöны алмаззэз.

— Но, отсала, — Лёня чапкис вугырсö, пуктiс черисö бидонö и кайис вöв йöрас. Нюр ладорас ивзiсö том вöввез, кöднö эз на сийöсавлö. Этö Король нима жеребец вашöтлö нiйö. А матын, ю дорас, йирсисö пöрисьжыккес, ветланнэс. Нiя лун-лун дуга увтын: то назём да торф кыскалöны, то гöрöны. Чойдорын некин весь оз ов — не морт, не вöв.

Лёня босьтiс сермöтсö да лöсьöтчис кутны Сьöлаöс, кöдöн неважын пинялiс горт карчйöрсö, но сылö паныт лэбтiс юрсö Рыпко: сiя сувтöтiс пеллесö, гогинь-гогинь керис юрнас, бытьтö корис: лок кут пö менö, и зонка сермöталiс сiйö. Рыпко том и чож, манитчытöг ветлас районас...

Геолог ровно бы эз на ешты кутны поводсö, а чеччöвтiс ни вöлыс вылö, вожасис, топ циркач, и сэк жö бура вачкис сапога коккезнас Рыпко кынöм кузя, зэлöтiс сермöт кöвсö. Вöлыс зэг-зэг керис юрнас да сувтiс кык кок йылö — мöдiс уськöтны вывсис мортсö.

— Эн нетшкы, сiя оз любит сiйö! — велöтiс Лёня.

Геолог эз усь, и Рыпко сувтiс нёльнан кок вылас да уськöтчис туйланьö, а Лёня оськöвтiс ю ладорö и тальччис тюбетейка вылö. «Эта эд геологыслöн!.. Асъяпон нöбöта». Зонка юрын орсiс музыка, сьöлöм вылас вöлi öтiк гаж.

* * *

Ашынас Лёня узис пöттöдз и саймис ачыс. Дзарнитiс часы вылö — луншöр ни локтö. Пызан вылiсь адззис гижöток, лыддьöтiс: «Сёяныс комас. Ме мунi касьтiсьны. Ештан кö, дак вовлы дедыт шойна дорö... Оля баб».

Дедыс вöлi эшö чорыт высина, чож. Да сiйö «вийис» льöмтой. Куим год ни куйлö Шойнаыб муын.

«Кыдзи зонкаэс мунасö. Позяс и котрасьны, — думайтö Лёня, селянка гардiкö. — Гортын сёравно нем керны... А кöр тюбетейкасö нöбöтны?»

Одзжык Чойдорын семикнас пыр уджавлiсö. Но вот пондiс бригадиравны Роман Кузьмич, «афганец», и семик лоис шоччисян лунöн. Кöр абу зэр, чойдорса асывсянь жö гамазöн, кыдз удж вылö, мунöны касьтiсьны Шойнаыбö.

Лёня сёйис, кыдз велалöм, перыта, чурснитiс сурок да котöртiс кошшыны ёрттэсö, кöднакöт мöдiс ветлыны геологгез дынö. А сылö паныт — верзьöма вöла Роман Кузьмич: йöрнöстöм, фуражкатöм, но сапога. Кузь юрсиыс да тошыс коласiсь пеллес оз тыдалö.

— Кытчö катыльтан, Лёнька?

— Васей Ваньö.

— Ойнас кытöн чериалiн? Не пода йöрын?

— Сэтчин, Курья дорас.

— Эн я адззыв, кин Рыпкоöс кутiс?

— Адззылi: геолог.

— Кузь тоша?

— Абу, нач тоштöм.

— Аха... Но лый одзлань, — тшöктiс Роман Кузьмич да бергöтiс вöвсö видз ладорö, кытöн, вöр дорас ни, тыдалiсö палаткаэз.

Бригадирлöн юасьöмыс дзугис Лёнялiсь одззася думаэсö: «Мыля нö сiя оз тöд, кытшöм геологыс? Эз я менö бöбöт вöв корисьыс? — и сэк жö лöньсьöтiс асьсö: — Да эз жö. Роман Кузьмичлiсь вермис корны öтiк, а мунны мöдiк... Но мыля вöлыс сё абу? Мöдiс ойкöлöн бергöтчыны...»

Васей Вань посöдзын, пöжан шондi увтын, сунасис Öгра баб. Вывтас халат, чышьян, кокас пимиэз, но абу и жаралöм. Сылö, шуöны, чожа сто год тырас. Кöть и адззö умöля, а кылö бура.

— Тэ öтнат, баб?

— Öтнам, кага... Да то беда лоис: вöв öшис... Эттшöм кодя вöлi!

«Мый сiя ыштö [8], — падмис Лёня. — Не я Рыпкоыс йылiсь? Но эд сы йылiсь сiя эз вермы кывны!»

Öграöс шуöны тöдiсьöн, полöны сыись. Лёня эз веритлы, а öнi думаыс торьяссис. Былись разь старухаыт сымда тöдö?

— Сет жö, кага, кытшöмкö бедь...

«Но,тöдiсь! — видчыштiс ас пондасис Лёня. — Вöв пö гусялiсö, беда лоис... Кыдзкö тай асьтö, рукляöс, абу гусялöмась!..»

Посöдз дынсис Лёня адззис увья ньöр, чегöтiс йывсö да сюйыштiс Öгра киö.

— На-ко, только абу волькыт.

— Олас, олас... Сiйöн не быгрöтчыны и не панясьны.

Жар, пöжö. «Муна кöть шор дорын миссьышта...» — решитiс Лёня. Но и миссьыны оз ешты: улица шöрас петiс Роман Кузьмич, корис зонкасö дынас.

— Жуль сiя вöлöма, не геолог, — юöртiс бригадир. — Мыля тэ меным тöн эн висьтав, а? Да öнi мый ни керан?..

* * *

Рытнас Лёня ордö локтiс милиционер. Сiя кузь кока да ыджыт юра, кöда вылын чатырöн пукалö форменнöй фуражка. Пырис керкуас да сэк жö и шуис кыз голосöн:

— Но, Лёнёк-чанёк, висьтась, ноко, кыдз Рыпкотö вузалiн.

Вежöртiс Лёня, что эстöн чуклясьны оз ни туй, и нем эз суськы. Нельки тюбетейкасö сетiс. Милиционер сiйö видзöтiс бансянь и мöдöрсянь да нюкайтiс дорсö.

— Вöвсö нуöтiс не цыган, абу сылöн дукыс.

— Ме и шуа: комиöн боньгис.

— Эмöсь, и комиöн тöдöны.

Эта коста пырис Оля баб, казялiс кортöм гöсьсö и повзьöм голосöн юалiс:

— Мый керис нечулимыс?

Милиционер лöньсьöтiс старухасö:

— Нем эз кер. Сiя адззылöм, кыдз вöв гусялöмась. Вот и юаси... Но, шоччисьö, ме мунi.

Лёня мöдiс петны милиционерыс сьöрö, да сувтöтiс бабыс:

— Висьтась, кыдз вöлi.

Бабыс одзын Лёня сiдзжö эз чуклясь. Старуха кывзiс шытöг, сыбöрын шуис:

— Эз ков тэныт кутны. Колiс конюх дынö иньдöтны. Лёнялöн мезмис лöгыс:

— Эз ков, эз ков!.. Кысь ме тöдi, что сiя гусялö? Эд бригадирсö нимнас шуис! Ме местын и тэ бы кутiн...

— Ме? Эшö мый висьталан?

Лёня нем эз висьтав, петiс öтöрö, пуксис лабичокö, кöда сулалiс чом öшын увтын. Кöть Лёня и лöгасис, но бабыскöт видчыны некöр эз кутчыв и эз лöгавлы. Разь невночка дузыштас, кыдз öнi. Зонка вежöртiс ни, что эз ков вöвсö кутны, да эд керöмсö он бергöт. Вот эшö мый айыс висьталас, кöр тöдас, мый шогмис. «Велосипед öнi оз босьтö, этö сiдз, — тöждö Лёня. — И бура керасö — ачым эд виноват... А ежели... — зонка юрö пырис страшнöй дума, — ежели вöлыс понда тшöктасö вештыны? Сэки мый?»

Мöйму Чойдорын вöйис мöс, дак сы понда пастух карманiсь вöлi кыскöмась кык тысяча руб. Лёня нельки чужтiс юрас картина, кыдз Роман Кузьмич да председатель судзлалöны айыс карманiсь эшö виль, нöитчытöм сторублёвкаэз... Айыс мотопила оз вермы босьтны, а сэтчö эшö зоныс кульö. Да, сорасис Лёня: абу колöм тöдтöмыскöт кутчыны... Да сорасис я? Сiя гортын и школаын пыр кылiс öтiкö: колö отсасьны, быдлаын лоны бур мортöн. И сiя пыр керис, кыдз велöтiсö. И эстöн сiдз жö. И петö, что не пыр овлö бур сылö, кöда йöзыслö бурсö керö.

Ох, олан, олан! Сьöкыт тэнö вежöртны! Мортыс мöдiс керны, кыдз буржык, а петö, что отсалiс гусясьны.

* * *

Чулалiсö лун бöрсянь лун, а вöв сiдз и эз адззись. Талун Лёня нельки ойнас саймылiс и дыр эз вермы онмöссьыны, мый сыкöт некöр эз вовлы. И сё кошшис ладсö, мыля петiс нёштöм отсöт. И адззис: эттшöмыс гардсис семик кузя, а висьтавны кö веськыта — Оля баб кузя. Кöбы сiя эз тшöкты чериавны, Рыпко вöлi бы гортын. Эд чериыс и важыс тырмис бы, а сылö тэ вильö вай!

Онтöм ой бöрын и луныс вöлi сьöкыт, зонка эз тöд, кытчö воштiсьны. Этö казялiс бабыс, пуксьöтiс внучоксö бокас, пондöтiс валькыта:

— Адзза ме, Лёнюк, шог тэныт. Но тэ весь асьтö маитан: эстöн тэнат мыжыт абу.

— Кытшöм эшö мыж?

— Тэ эстöн абу виноватöй. Тэ вылын грехыс абу, и сьöкыт думанат асьтö эн кольмöт. Мыжаыс сiя, кöда тэнö, бур сьöлöмасö, бöбöтiс. «А былись эд сiдз!» — согласитчис думанас Лёня.

— Колö накажитны мыжасö, кыдз законнэз тшöктöны,— одзлань керис ассис делосö Оля баб, — и сэк тэнат шогыт ямас. Тэ вежöртан менö, Лёнюк?

— Кыдз этö ямас?

Валькыта — ласкова, небытика.

— Оз ло, öшас.

И этакöт Лёня согласитчис: «Во, накажитны!.. Но кыдз накажитан сiйö, кöда абу?» Бабыс бытьтö кылiс внучокыслiсь думасö да горöтчис:

— Ме кужа, кыдз накажитны. Öгра велöтiс... Дак керам, кага?

Зонка эз жö верит, что мыжа мортсö позьö астöгьяс накажитны, но эз кутчы бабыскöт вермасьны. Эз верит, но мöдiс тöдны, кыдз сiя керсьö, и зэгнитiс юрнас.

Баб петалiс öтöрö да пыртiс турун тылöппез. Нiя вöлiсö нач нярöсь — не шепок, не розок, и баб кокнита кöсталiс нiйö кузьмöса кокольö, йиöтiс сунисöн; спичкаэзiсь керис кикок — шогмис акань. Аканьсö водтöтiс порог вылö, вашкöмöн висьталiс: «Эта — вöв гусялiсь. Мед сiйö мыжьяс кымöр, мед сiя чалöстас лёк висянсянь. Тьпу, тьпу, тьпу!»

Лёня понда эта вöлi мыйкö орсан кодь, и сылö лоис гажажык, сiя нельки шынньöвтыштiс да юалiс:

— А мыля куимись сьöлыштiн? Ме тай гаг вылö öтпыр сьöлышта, и чериыс кутö...

— Сiдз колö. Öтпырисьсö кымöрас, может, оз и кылö...

— А кыдз этö — чалöстны?

— Оча кок вачкыны.

— Мыйлö?

— Но тэ кытшöм ылöстöм, Лёнька! — зэлытжыка ни висьталiс бабыс да петтöнняс ни шуис: — Мед чезнитас, чорзяс.

Сэтшöм умöль кыввесö зонка бабыссянь эз видзчись. Позьö я сiдз? Накажитны — этö разь лоö вийны?

«Колö мöднёж кыдзкö накажитны, — думайтö Лёня, бабыс сьöрö петiкö». А бабыс ештöма ни босьтны зыр да мыйкö гуддисьö стын дорын.

— Мый керан, баб?

— Аканьсö дзеба. Ась сiсьмас сэтöн.

— Оз ков, ме бöр кыска!

— Эн вельмы! Кыскан — аслыт нето меным умöль лоас. Кинлö сiя колö? Öтiк инька вöлi бöр керсьöма, дак лямпа ныр моз кöстiсьöма... Мун миссьы, да сёйны пондам.

Повзис — эз повзьы Лёня, но овсис.

* * *

Чулалiс гожум. Сiя, кажитчис, кузь кока вöв моз бусйис-гöнитiс. Челядь бöра котöртiсö школаö. Нылöн лудiсö ни киэз: корсисö гижсьыны, рисуйтчыны, решайтны задачаэз. Быдöнныс видзчисисö пантавны мыйкö вильö, тöдтöмö, мый ыждöтö оланiсь отсö, гажöтö да бурмöтö сьöлöм. Чойдорö арыс пырис кöсöн да шонытöн, топ гожумыс бертiс. И öтiк кресенняö Лёнялöн классыс мунiс Кудымкарö. Туйыс вöлi кузь, но сiя некинöс эз повзьöт: колö адззывны виль местаэз, мöдiк отирöс, карлiсь мичсö да ыждаö. Кар — сiя кар и эм, а не Коса ю дорись дзиб.

Кудымкарын Лёня эз на вöвлы, и сылö кажитчис, что мöдiк странаö сюрис: быдлаын уна этажа керкуэз, театррез, магазиннэз, гостиницаэз, ыджыт колокольняа вичку; гöгöр асфальта туйез, кöдна кузя орöттöг мунö-локтö, дзик кöдзыввез, берся машинаыс, кöднö, медбы не дзугны öтамöдлiсь туйсö, кадiсь кадö сувтöтлö гöрд би.

Зонка нёджжалiс карсö паськыт да пöттöм синöн. И мый кылiс да адззылiс, быдöс куртiс-картiс ас пытшкас, аслас юрö.

Музей бöрсянь челядь мунiсö паркö, кытöн вöлiсö и пыжжез-дюттяннэз, и карусель, и берся орсаныс. Мымда колö дюттясь, ыслась, орс. Только деньга перво вешты.

Паркас Лёня и кылiс сёрни, кöдалöн шыэс вöлiсö дзик тöдсаöсь. Сiя сувтчис. Кывзöв-керис. Сёрнитiсö бедя мужик да инька. Мужик норасис аслас олан вылö:

— Лёк висян кöстö, кок садь абу. Этадз кö лоас и одзлань — оча кок вачкан...

Медбöрья кыввес косьöвтiсö Лёня пеллез кузя. И сiя уськöтiс тöдвылас бабыслiсь ёрдчöмсö, а öтдруг сыкöт и сiйö, кытöн кывлiс бедя мужиклiсь голоссö — Рыпкоöс кутiкö.

«Этö сiя, сiя, — тöдiс Лёня да нарошно мунiс баитiссес бокöт öтпыр да и мöдöтпыр. Отирыс шентö-ветлöтö öтöрö-мöдöрö, и повны сэтiсь, что зонкасö тöдас бедя мужикыс, нем. Видзöтiс буражыка и вежöртiс досповна — сiя: сöчöн кодь гöгрöса чужöма, кузь ныра, сьöд юрсиа. И голосыс немымда абу вежсьöм — жеркöтчö, небурика дрöжитö.

Медодз Лёня юрö пырис, что колö юöртны милицияö. Но кытöн сiя? Пондас кошшисьны, а сы коста бедя мужикыс мунас гортас. А ёрттэс кин кытöн и эм.

Кытчöдз думайтiс, кыдз эстöн керсьыны, бедя морт вöрзис мунны. Но позис я шуны сылiсь ляшмасьöмсö мунöмöн? Сiя öдва вешталiс коккесö, ачыс пöлiнясис, топ утка. Коккес шоркöтöмöн кыскассисö асфальт кузяс, чуклясисö. Кöбы не бедьыс, дак и оськöвтны эз вермы бы.

Жаль лоис Лёнялö калекаыс, и сiя иньдöтчис кошшыны ёрттэсö.

* * *

Гортаныс нiя бертiсö пемдан дорас. Лёня котöртiс дзебöм акань дынö, думайтiс-керис да кыскис, путшöтiс ситецторсö. Туруныс абу на сiсьмöм, но бура тöрмöм, йикисялöм, спичкаэс сьöдöтöмась.

Сэтчö петiс керкусис бабыс — тыдалö, кылiс, что Лёня локтiс карсянь, и Лёня нöбöтiс да пуктiс аканьсö бабыс коккез одзö:

— На вот, любуйтчы!

— Ой, арттöм зонка! — пондiс видчыны бабыс, но не лöгöн, а рам кыввезöн. — Бöра тай бур сьöлöмокыт пондiс вермавны. И вражинаыслö бурö керан бы, а ас йывсит он и думайт...

— Сiя öдва коккесö вешталö!

— Вот и бур! Тэ эд шуин: колö пö накажитны...

— А öнi — ог! Кер сiдз, медбы веськалiс.

— Керöмыт ни тай, — Оля баб чужйис кок нырнас аканьсö да невна чöлыштiс, бытьтö шоччисис баитöмсяняс, да вотшкис-висьталiс: — А вöлыс адззисис...

— Рыпкоыс?.. Кин адззис?

— Ачыс кысянькö локтöм. Ён эд лоöм!

— Уррра-а! — Лёня чеччöвтiс вывлань, кыдз повзьöм кöч, да чепöссис пода йöрлань. Оля баб серöм сорöн горöтчис ас пондас:

— Тыдалö, эд окасьны мöдö Рыпкоыскöт...

Чойдор весьтö жагвыв, полöмöн, лэбтiсис гöрдкодь тöлiсь. Кытöнкö ляв-ляв шыасис понок. Оля баб картаын китсöвтiс том петушок. Пода йöрын ивзiсö да буткöтiсö-чеччалiсö чаннез. Роман Кузьмич карчйöрын тура-тара кисьтiсö пöввез кузя картов, жольк керисö ведра вугöн...

Арся кузь рыт пырис аслас оланö кыдз дженытöв лунлöн аскодь бöж.

ОРСАНТОРРЕЗ

ПЫТШКÖС:

Пöжавтöм нянь < Коми-пермяцкöй национальнöй драмматургия. Öтiк акта пьесаэз. К., 1990

А вöлi сiдз < Коми-пермяцкöй национальнöй драмматургия. Öтiк акта пьесаэз. К., 1990

Аренда Ваня < Коми-пермяцкöй национальнöй драмматургия. Öтiк акта пьесаэз. К., 1990

Анягур, Анягур… < Коми-пермяцкöй национальнöй драмматургия. Уна акта пьесаэз. К., 1993

Кудым ош йылiсь висьт (Коми-пермяккез эпос сьöртi балет понда кык тора либретто) < Иньва. К., 1992

Дата добавления: 2015-11-16