|
Читайте также: |
Сiя кыша-паша шыркнитiс осьта ыбöсöт, сувтчыштiс да видзöтчис.
Коридорыс паськыт да кузь, и кузь, и кузь!
Кöдöрö жö пышшыны?
Кежис шульгалань.
Мыля шульгаланяс? Сiя ачыс эз тöд, мыля. Может, сiйöн, что шульга кокыс веськытысся чожжык. Сiя эд одзжык чужис. Может, шульга бордыс сьöкытжык и вермалö мöдсö — тожö эд одзжык шогмис.
А может, сьöлöмыс öддьöнжык шульгаланяс кыскö.
Öтiк кылöн шуны — шульгач.
Котöртiс, котöртiс шульгаланяс — осьта ыбöс адззис. Пырис сэтчö. А сэтöн нечöскыт дук. И лöнь, кыдз тумбочкаын (кöр сэтчин Чикаляка моз некин оз ыждав). Тыдалö, и эстöн лöнь час.
Али некин эта жырын оз ов? Койкаэз абу, челядь абу.
О-о, да сэтöн быдса сад: фикуссэз, кактуссэз, кыдзок, алоэ. А садас — клеткаэз. Клеткаэзас некин абу — и гут оз дзингы.
Но, чу:
— Бурр лун! Бурр лун, бурр лун! Бöббöв! Кин сiдз баитö, Чикаляка эз казяв, но шыасис:
— Ме не бабыв.
— Бöббöв! Бöббöв! — ятнöйжыка ни висьталiсö вылiсянь, и гöсьыс казялiс: öтiк клеткаын дюттянок вылын пукалö чукыля ныра, гöрд-веж гöна кай.
— И не бöбöв ме, — висьталiс Чикаляка. — Ме — Чикаляка.
— Кин, кин? — юалiс мöдiк клеткаись каёк. — Эг адззывлы и эг кывлы сэтшöмсö. Вот ме кö-рым-кай, и менö кöть кин тöдö.
— Ме — Попа, — шуис чукыля ныраыс, — и менö кöть кин тöдö. А тэнö ог тöдö, огö.
— Кыдз этö огö? — кинкö шыасис улiсь клеткаын. Сiя не Чикаляка, а чавкан. Эд кывзö сiйö, бöбöтчисьсö. Этö ме, ёж, висьталi.
Чикалякасö сэтшöм öбида кутiс, мыля сылö оз веритö, и сiя петiс джодж шöрас, паськöтiс борддэсö-киэсö, мыччис одзлань шульга коксö, зэгнитiс сюра юрокнас да юалiс:
— Чавканыс эттшöм, да? Чавканыс — лöз борда, грання нырока, да? И сюррез эмöсь, да?.. Осьтö буржыка синнэзнытö и казялат, что ме не чавкан, а Чикаляка! Сiя бергалiс джодж шöрас, мыччалiс асьсö быд ладорсянь: одзсянь и бöрсянь, коксянь басöк сюрокöдз.
И кöрымкай шуис:
— Эта не чавкан. Попа шуис:
— Эта Чикаляка.
А ёж мöднёж висьталiс:
— Кöть и Чикаляка, а сёравно чавкан. Колö жö асныравны сымдасö, а?
Чикаляка öддьöн-öддьöн лöгасис: кыдз эшö вежöртöтны ёжсö? Сiя строк-строк чеччöвтiс ёж дынö, лöг пырйöттяс юалiс:
— Ноко висьтав меным, емöсь спина, чавканыс борд увтас мыйкö новйöтö, оз?
— Борд увтас? — ёж кунис синнэсö, медбы буржыка думайтны. А кöр осьтiс, висьталiс:
— Эг адззывлы.
— Кысь адззылан, кöр сiя нем оз новйöт? А менам — видзöт! — и Чикаляка шульга конувтсис веськыт борднас кыскис пряник. — Адззылiн, емöсь спина? Дак вот, мöдпырись эн шу менö чавканöн!
Ёжлö воштiсьны некытчö. Сiя тюр-тюр котрасис öтлань да мöдлань и висьталiс:
— Тэ — Чикаляка.
А юрас видзис: «Сёравно чавкан!»
Радувьяс, что öнi сiйö дугдiсö соравны чавканкöт, сюрока гöсь торйöтiс пряниксö (сiя вöлöма öддьöн небыт) нёль торйö и потшшуйтiс быдöннысö. Мöдiс и ачыс сёйыштны, да бöрас кылiс виль голос:
— Ноко и ме видзöта гöсьнымöс. Мыччась-ко! Голосыс кыз, сёрниыс не тэрмасян.
«Эта пöрись дедко, натьтö», — думайтiс Чикаляка да бергöтчис баитiсьыс ладорö: джоджись клеткаын вöрöтчис черепаха, но эз позь вежöртны, кöдöрö сiя мунö — сэтшöм жаг кока.
Гöсь мыччасис и черепахалö, а сiя висьталiс: — Чавкансö ме тöда. Кöр менö луд вылö лэдзлiсö, сiя менчим юрöс кокыштiс. А эттшöмсö первуись адззыла. Эта Чикаляка.
Сiйö пряник тороксö, кöдö кольлiс аслыс, Чикаляка сетiс черепахалö. Спасибо туйö черепаха шуис:
— Мекöт ордчöн некин оз ов, а клеткаыс бур. Пыр сэтчö.
— Эн пыр! — кинкö панöвтiс Чикалякасö. — Эн! Черепахаыс бöбöтчö! Клеткаас овны только сылö бур: лунтырöн öтпыр гöгöртас сiйö, дак бытьтö Перемöдз ветлiс. А тэныт колö вöр, кытöн уна голи, тшак, ягöд. И сöстöм ру... Ой, кöр ме татiсь мезма, кöр? Вöр менам вöриньöй, кöр нö ме тэнö адззыла?
Сiдз баитiс ур. Норöн, горзöм сорöн.
И медбы не кисьтны синва, чеччöвтiс поспуа колесо вылö и öдззис котöртны — только гöрд бöжыс, дзик тöв вылын, павьялö.
— Нем тэ он авйы, ур! Дук ылöстöм, — рамыника тэчö кыввесö черепаха. — Мунан кö вöрас, тэнö лыясö нето туан öмö шедан... — А Чикалякалö шуис: — Ме пряниксö ог вермы сёйны — пиннезö абу. Кöбы йöла каша! — и бöр мыччис пряниксö. — Сёй ачыт. Да тöд... сiя бур, что потшуйтчан, но умöль, что вунöтан ас йывсит. Пондан кö сiдз керны, дак коккетö чожа нюжöтан. Кывзы менö, пöрисьсö — ме уна ни берсясö адззылi-кылi.
И Чикаляка сёйис пряниксö. И пöт лоис.
А кöр тэ пöт, тэныт сэк гажа. А ежели гажа, дак колö керны сiдз, медбы мöдiккезлö гажтöм эз вöв.
Чакаляка эз пыр клеткаас, а матöжык сибöтчис ур дынö, юалiс:
— Тэныт клеткаас дзескыт?
— Дзескыт и гажтöм.
— А вöрын — гажа?
— О-о! Вöрся гажажыкыс нем абу!
— Дак мун вöрö! — висьталiс Чикаляка да кайис лисничок вылö и осьтiс клетка ыбöсоксö,
А сыбöрын — кöрымкайлiсь, попугайлiсь, черепахалiсь. — Мунö гажöтчö! Кöрымкай да попугай пырк петiсö форточкаöт, ур уськöтчис коридорö, а черепаха местасис эз вöрзьы.
Чикаляка дивуйтчö:
— Тэ мыля эстiсь он мун? Черепаха шуö:
— Менам коккезöн оз пышшалö. Да и татöн эд вердöны, юкталöны. И шоныт, и абу жар. Мый эшö пöрисьыслö колö? Ов да ов! А тэныт, томыслö, колö öтöрсö видзöтны да юрат олан ум тэчны.
Баитöны черепаха да Чикаляка, а эта коста...
Дата добавления: 2015-11-16; просмотров: 59 | Нарушение авторских прав
| <== предыдущая страница | | | следующая страница ==> |
| Мый вермö аркмыны, кöр мортлöн öшас он | | | Лэбис ыджыт тыри-ёр |