|
Читайте также: |
Олiс-вöлiс Канин Шура. Чужöмыс — кузьмöса виа шаньга, бура жаритöм. Юрсиыс руд, небытик. Сэтчö содтö: векнитик синнэз, кузь ныр да шыннялан öм, и петiс басöк портрет.
Эшö висьтала: велöтчö бура, но отличникöн эз вöв.
Книгаэз лыддьöтны оз тэрмась (ме сiйö эта понда немымда ог ошкы).
Радейтö кывзыны сказкаэз (эта понда ме сiйö ёна ошка!).
Карманас часто новйöтö мел, медбы серöтны аслас рисуноккезöн деревняись стыннэз, гид стенаэз да пес полениччез (сэтшöмыс меным оз жö гленитчы, да ме шы ни ог сет).
Оз радейт овны лагеррезын, но таво гожумнас аймамыс сiйö сё жö сетiсö лагерьö. А Канин Шура асныравны оз куж и мунiс. Мунiс чöлöмöн, кыдз унажыксö сiя и олö.
Дак вот öтпыр, кöр лагеряс вöлi шоччисян час и быдöнныс узисö, а Канин Шураöс эз узьöт, сiя гусьöник петiс одеяло увтiсь, пасьтыштiс трико да дыркодь видзöтiс öшын сайö. И чöлiс, конечно.
Луныс вöлi гудыра, дзик онзыля кага, и öтöрас нем гажаыс эз вöв. А чöлiсьытлöн сьöлöмыс кошшис гаж.
«Вот чериавны бы, — думайтö сiя. — Талун, натьтö, ёкышшез кокалöны. Да кин лэдзас? Э-эх, гортö бы öнi!.. А рисуйтны — бумага бырсис...»
Син вылас усис батарея сайись картон. Мый сiя сэтчин? Может, картина?
Кыскис, видзöтiс: гижтöм, сöстöм.
Киэс асьныс адззисö карандашшез, пондiсö кырлавны картонкасö.
Мый кырлалöны?
Канин Шура некöр одзлань эз думайт, мый сы карандаш увтiсь петас. Рисуйтлiс сiйö, мый некöр оз овлы. Мöс сылöн новйö шапка-папаха, пон сылöн дзодзог кока да сорса, а курöг — тоша и тошсö голя бердас каттьöм.
Öтпыр кырöвтiс, мöдпыр, мыйкö гöгрöстiс — шогмис юрок то ли каньлöн, то ли сюзьлöн: гöгрöса чужöм, гöгрöса синнэз, дженытик пеллез. То эттшöм:
Сэсся карандашыс керис ныр. Не мортлiсь, не каньлiсь. Дженытикö, грання бокаö, йылаö.
Эшö кырöв, эшö — и шогмисö сюроккез. Том козалöн кодьöсь. И юрыс лоис то кытшöм:
Одзлань эта юр бердö лöсьöтiс вывтыр, рисуйтiс шульга кисö да коксö, и карандаш йылыс чегис. А картон вылас аркмис пöв киа-кока инвалид:
Канин Шура мортыс бур сьöлöма и, кöр сiя пантавлiс öтiк кока инвалидöс, сылö сэтшöм жаль вöвлi мортыс, что кöбы позис, дак ассис коксö сетiс (недыр кежö, конечно).
И зоночка эз понды кыскыны кадсö, а тэрмасис одзлань рисуйтны — инвалидсö веськöтны.
А йывдöмыс кольччöма öтiк лöз карандаш, и веськыт кисö да коксö лöзнас и керис.
Кöть и шуа ме ки, а сiя петiс не ки, не лапа, а мыйкö борд кодь, только йылыс вачкисис кань кок вылö.
Коккес петiсö аканьлöн кодьöсь, нельки волькыт чаркиаöсь, но öтыс сьöд, а мöдыс лöз.
Вожа бöжыс шогмис дзик чикисьлöн, да лöз жö.
И гажтöмтчись художниклöн то мый петiс: Видзöтiс Канин Шура аслас удж вылö да серöмтчис:
— Этö кытшöм нö Чикаляка петiс? Вот смехыс! Мöдiс чапкыны картонкасö койка увтö, да син вылас усис ножнич.
А ножничыс мый понда?
Конечно, вундасьны!
Чавс-чавс, жич-жич — и картон бердсис рисунокыс мезмис да усис джоджö, а джоджсяняс чеччöвтiс пызан вылö.
Канин Шура шай-пай лоис: чорыт да сайкыт картоныс ловзис!
Али кинкö мöдiк чеччалö? Дзик тай морток — чатыра, чож.
Вывтас свиттьöвтö — то ли зверь гöн, то ли кай гöн.
Сулалö зоночка, дзик майöг, оз и вöрзьöтчы, синöн кваркыш оз кер, думайтö, мый эта сэтшöмыс лоö. И адззö: эта сылöн уджыс, сылöн. А грання нырокыс кокыштiс чегöм карандаш йывсö, сэсся — чышкисян резинка да кокалiс нянёк.
— Тэ... тэ картоновöй, да? — юалiс Канин Шура джын голоснас, медбы эз саймö ёрттэс.
— Ки-ки-ка! — серöмтчис виль герой. — Вунöтiн разь, мыйись керин?.. Картонiсь ме, картонiсь! Ме — Чикаляка!
— Эн авзы! — шушкö Канин Шура. Ачыс юрсö жугдö-думайтö, мый öнi керны сылö эта аканькöт.
А Чикаляка чеччалö, видзöтчö, тöдсасьö виль оланкöт.
«Может, бöр картонас сюйыштны? — думайтö зоночка. — Али кинлöкö мыччавны да вöлись?»
— Вай сёйны, папа! — дзугис мортыслiсь думаэсö картоновöй аканьыс.
— Тэ тшыг?
— Тшыг, тшыг, — катша моз китшкыштiс Чикаляка да чавкан моз чавöстiс: — Ачыт адззан, нач тшыг!
— Чшшш! Эн чавзы, — шушкö Канин Шура, тумбочкаын кошшисикö. — На сёй! — пуктiс пызан вылö пряник. — Только эн шумит. А сэсся... сэсся мунам.
Кокасьö Чикаляка, а Канин Шура лöсьöтчö сiйö кутны, медбы бöр пуксьöтны картонкаас.
— Кытчö мунам? — дугдiс кокасьны Чикаляка. — Сiя кутiс пряниксö конувтас да чеччöвтiс койка юр вылö, горöтiс повзьöм голосокöн: — Ме некытчö ог мун, папа! Меным татöн гажа! Гажа и бур!
— Чшшш, — бöра öлiс сiйö Канин Шура. — Адззан, узьöны?
Но эта чишкайтöмыс вöлöма сёр ни: сiя койка вылiсь, кытöн шумитiс Чикаляка, лэбтiсис зоночка, пондiс тульны синнэсö.
Канин Шура кватитiс Чикалякасö голяöттяс, пондылiс сюйыштны картон пытшкас, но ловья аканьыт лоöма паськытжык, некыдз оз тöр, и дзебис сiйö тумбочкаö. Саймöм зоночка лöгöн юалiс:
— Бöра он узь, Канин?.. Кинкöт нö борскан?
Этö саймис Олег, кыз юра да дженыт кока зон. Сiйö нимнас етша шуисö, сё Лег-лег да Лег-лег. Мöдыс велалiс эта дынö, бытьтö сiдз и колö.
— Ме эг борскы, — суськисис Канин Шура. — Тэ, натьтö, вöтасин.
Но сэтчö тумбочкаас лэбис шум: мыйкö гольöтiс, тринöтiс, ёркöтiс, а сыбöрын пондiс чирзыны кага голосöн.
— Осьт буди, папа! Он осьт — быдöс жугда! Тумбочкатö пöрöта.
«Дак вон тэ кытшöм! — шуис аслыс Канин Шура и чорыта ни решитiс кутны чирзiсьсö да кыдзкö пелитны картон пытшкас. — Чöв, аканёк, тэ менам лöньсян...»
Лег-лег петыштiс одеяло увтсис, ванйöвтiс тумбочка ыбöсоксö, и сы кöмтöм коккез вылö тушмыль усис Чикаляка. Зоночка кок нырнас лэбзьöтiс сiйö вывлань, мöдыс онняюрöн усис öшын дорись койка вылö, грання нырокнас да сюррезнас люкалiс зоночкалiсь чангыля ныр да паськыт кымöс.
— Мый шупкасят? — лöгасис зоночкаыс да сап кутiс Чикалякасö коккезöттяс.
— Этö не ме шупкася! Лэдз менö! — кеймисьö Чикаляка. — Менö чапкисö!.. Эк, зубыт, зубыт!.. Ой, отир, коккез чеглалöны!
Шумсяняс саймисö и мöддэс, чеччалiсö койкаэз вылiсь, ыксöны, видчöны, юасьöны:
— Дугдö, будичи!
— Кин горзö?
— Кок пятанам кыдз уда — дугдан öмтö косявны!
Этö грöзитчö удны сiя, кöдакöт аканьыс люкасис, кöда киын öнi пессис Чикаляка. Эз уд, а шентiс Чикалякалö ыбöс дорас:
— Мун сэтчин горштö лет!
Видчöны, шумитöны, ваксьöны, а сы коста.
Дата добавления: 2015-11-16; просмотров: 50 | Нарушение авторских прав
| <== предыдущая страница | | | следующая страница ==> |
| НИМЛУН КЕЖÖ ТОРТ | | | Чикаляка паськöтö ассис олан |