Медбöрья туй

Луныс пондöтчис шонытöв, пöжö, и пода йöрын не кукань, не баля оз тыдав: быдöнныс сайöвтчöмась шор дорись расокö. И только öтнас Лысанко абу дзебсисьöм. Сiя сулалö дзирыт шондi увтын да узьö сувтсöн. Куньöм синнэз дорын шуксьöны гуттэз да мошкаэз, дзугсьöм да чирйиссьöм бурси вылас пукалö юрсигусь — тожö, тыдалö, ланьтöм.

Лысанко — пöрись вöв, мерин. Кыным сылö год, некин оз тöд, а почтальонша Луша шуö, что вöлыслö таво тырис двадцать, и сiя лоис пенсионер — дугдiсö уджöтны.

Луша быдса год баитiс Лысанколö:

— Вот чапкися почтальонсис, Лысанко, и тэнö шоччисьны иньдöта. Сiдз и лоас. Тэ некинлö, месся, он ни ков.

Чинiсö тулысся ваэз, зелёнöйсялiсö видззез да ыббез, и öтiк рытö, кöр юскис да сыналiс вöвсö, Луша висьталiс:

— Но, Лысанко, миян тэкöт уджассис. Спасибо тэныт — эта мымда отсалiн меным и йöзыслö! — и чуп окалiс чуксö. — Давай шоччись. — И чöвтiс сермöтсö да лапкöтыштiс голясö.

Кöркö Лысанко вöлi руд гöна, öнi дзормис и лоис сивöй, только бурсиыс да бöжыс рудöсь. А кымöс вывсис чёлкаыс нач чочком. Эта чёлкасянь нырпыссэз коласöдз кыссьö долонь пасьта розовöй визь — лыска, и, кöр видзöтан ылiсянь вöлыслö паныт, юрыс кажитчö кыкторья,

Öнi Лысанко сынавтöм, каджыс да лядьвейес рукйöсьöсь да бусаöсь, кузь бöж бердас лякасьöмась шышыбар юррез. Кузь кока да ыджыт тушаа, öнi мерин лоöма нёштöм, сулалiкас вачкисьö ыджыт нярьян вылö — сэтшöм жö пельöса бöра, шегья кока, а юрыс голя бердас öшалö, дзик поткöтчан нöш. Гыжжес потласьöмась, öтiк бердын сё эшö видзсьö подков торок.

Узьö Лысанко и вöтасьö...

Сiя том, сылö тырис куим год. Коккес кузьöсь, юрыс чатыра, тушаыс вöснит, дзик нин шуль. Сы бокись йöрданын олö сы кодь жö визыв Чинька — рыжöй кöбылка, и нiя часто орслöны кыкöн.

Вот конюх лэдзис нiйö, чаннесö, юны. Нiя ивзöмöн гöгöртiсö картасö да чеччалiсö шор дорö, чурс-чурс керисö юкмöсiсь, пырснитiсö, сувтiсö паныт, пондiсö орсны-курччасьны. Карта пельöсын мороз шовкöтö, а нылö шоныт. Кюнюх корö пырны картаö, а нiя лэбтiсö бöжжез да уськöтчисö пода йöрö. Пöльтöны-гöнитöны туйтöг, кок увтаныс лымыс падерöн гардсьö. Öтiк минутаöн гöгöртiсö йöрсö, кайисö яг вылö да эшö сэтчин нöитöв-керисö лымсö.

Орсiсö сэтчöдз, кытчöдз эз усь тöдвыланыс гырись туся зöр, кöда сэтшöм чöскыта пазалö пиннез коласын. И быль, кöр пырисö асланыс йöрданнэзö, öррезын зарниöн куйлiс зöр.

Конюх пöдналiс йöрдан ыбöссэсö да висьталiс:

— Госыт тай пизьö, Лысанко, голяыт сийöс корö! Ужо... Час бöртi Лысанкоöс сермöталiсö. Сермöтыс чорыт, нёштöм дука, но этасянь Лысанко эз пессьы, только небурика чушьялiс. Сэсся сiйö петкöтiсö öтöрö да нуöтiсö карта бöрö, видззез ладорö.

Кутiс полöм: мый сыкöт мöдöны керны? Этасянь небурика зэгалiсö пидзöссэс, дзöрисö пеллес, и сiя бöра шочыника да негорöн чушьялiс.

Карта бöрын сулалiс додя вöв — кыз кынöма, öдва оглобляэс коласö тöрöм. Гöныс Лысанколань жö, только нятьöсь коколя, боккезас — назём кень. Сiя дзар керис Лысанко ладорö, сьöкыта ловзисис да öшöтiс юрсö, дзик висьтавны мöдiс: «Шедiн, зонка! Öнi вывтат вожасясö нето сийöсаласö».

Сэк жö Лысанко юр вылö пондiсö кышавны сийöс. Сылö эта эз гленитчы, сiя пондiс чепсасьны, летсьыны, но сылiсь малыштiсö розовöй нырсö, лапкöтiсö небыт голясö, яя пельпонсö, шуисö вежöраöн, и сiя бöра сетчис.

Додя вöв эшö гажтöмжыка видзöтiс Лысанко вылö, бытьтö висьтавны мöдiс: «Но, зонка, öнi дзескыт йöрас дбрунь-дбрунь зэлöтасö».

Сiдз и петiс: сюйыштiсö оглобляэз коласö, доддялiсö, вожжиалiсö, öмас кöрт татшкисö да пондiсö вашöтны. А сийöсыс пельпонсö дойдö, седёлкаыс спинасö нырыштö, подпругаыс кынöмсö зэлöтö! Мунöм дорöдз я сэтöн?

Öшис Лысанко, оз тöд кöдöрö керсьыны, кытчö оськöвтны. Конюх сiйö сермöтöт кыскö, мöдiк — вожжиöн трекйö, öмсö косявны готов. Лысанко бöр-бöр керсис, а бöрсяняс плетьöн косьöвтiсö да нёштöм голосöн ыкöстiсö. Лядьвеяс сэтшöм зубыт сидзис, что Лысанко нельки пуксьыштiс, но сэсся ивöстiс, ордчис бöрись коккес вылö да бокöн-бокöн котöртiс пода йöрö, кытi неважын чылiс Чинькакöт.

Лымыс пидзöсви, и Лысанколö колö мунны чеччалöмöн. А чеччавны мешайтiс сийöс, чресседельник, додьыс, и сiя чожа пымалiс да мыдзис, но сувтны эз и думайт. Кытшöмкö местаын кокыс павкис ыджыт кöчкаö, Лысанко чужйисис да чеччöвтiс бокö. Додьыс пöлiньтчис, и мортыс нильдiс додьсис, вожжиыс сы киись мезмис, и додя чань öтнас гöгöртiс пода йöрсö да тур-тар пырис осьтöм воротаа вöв картаö...

Сэксянь Лысанко лоис ветлан вöв. Уна год сьöрна гöрис, вöр петкöтiс, жнейка кыскалiс, вартан машина бергöтiс. Уна морт сiйö видзис: пöрисьыс и томыс, лöгыс и рамыс. Кöда бур кылöн сыкöт баитiс да сола нянь мыччалiс, кöда шатьöн боксö кулис, а кöда и кынöмас чужьявлiс, плетьöн кымöссö сырйис.

Бöбавлiс жö томувьяс: и домйылiсь гожумнас орöтчывлiс да вöррезöт гуляйтiс, и йöр потш чапкывлiс да сюö пыравлiс. Но медбы вывтсис мортöс уськöтны, кинöскö курччöвтны нето зурзьыны — сэтшöмыс эз вöв. И пизь мешöк эз косявлы, кöр мельницасянь бертлiсö, морт дынiсь додьöн эз пышшав. «Тпру» да «ны» бура вежöртiс — кыкись эз ков шувлыны. И бороздаись эз петав, эз чуклясь, и туй вылын додь эз пöрöтлы.

Кыдзкö гöрикö улык чегöтiс, дак гöрисьыс ачыс виноватöй. Гöрыс кытчöкö кышасис, а сiя гöрсö оз шедты, ныксö бöбись. Лысанко вöрзьöтыштiс гöрсö: видзöт пö, ныксiсь, мый лоис, а мöдыт — шатьöн швыч да швыч! Лысанко нетшкöвтчис, и улыкыс — тресь!.. А сэсся Лысанколö жö павкис.

Мöдпырся сiя жö гöрисьыс Лысанколö кок кузяс клячöн сöтiс да пидзöс шегсö сiдз дойдiс, что беднöй вöв неделя чотiс. Вачкöм местас коушка шогмис и öнöдз тöдчö... Умöль морт, ылöстöм!

Да, Лысанко дыр уджалiс, уна уджалiс. А кыдз пöрисьмис, кокнитжык додь кышалiсö: тöвнас — кошовка, гожумнас — таратайка. И кык «отпуск» сетiсö: тулыснас, ыджыт ваэс коста, и арнас, кöр юыс эз на кынмы, и Луша баб почтасö новйöтiс подöн...

Натьтö, эшö бы мыйкö вöтасис нето тöдвылас уськöтiс, да сы кадж вылö чуйк пуксис чавкан, и Лысанко осьтiс синнэсö.

Сiя мöдiс ни бöжнас швычкыны, но чавкан как раз пондiс гуддисьны вöв гöнын, а вöвлö этасянь öддьöн долыт, и сiя бöра кунис синнэсö. Чавкан öктiс линяйтан гöнсö öмтыр — дзик дзормöм уссэза лоис — да лэбзис. Лысанко дженыта оськöвтiс одзись коккезнас да мöдiс нюжöтчыны, но косыс мыйкö зубыт лоис, и сiя только юрнас зэгöтыштiс да бöра важмоз енöвтчис.

«Годдэз, годдэз! Ок-ко-ко!»

Одзжык эта кадö почтальон Луша да Лысанко вовлывлiсö ю дорö. Тöвнас кошова нырын вöвлi ведра, и старуха гумыштлiс юкмöсiсь ва да юктавлiс вöвсö. Гожумöн Луша личöтлiс чресседельник, и Лысанко ювлiс юсис. Сыбöрын сiя час дырна сулавлiс почта сайись забор дорын да марскис-сёйис турун. Тöв и гожум — кошоваын али таратайкаын — куйлiс Дзимко, сьöд пон...

Чу, увтöны поннэз. Поди, Луша почтаö мунö? Сiйö эд поннэс пыр панталöны и кольлалöны.

Лысанко жагвыв иньдöтчис деревняö. Мунiс дюттясьöмöн, быд оськöлöн дюттясис и юрыс, а кузь бöжыс чышкис пидзöссэсö.

Почта кыскавны вöлi бур. Удж абу сьöкыт, тэрмасьны эз тшöктывлö, эз вартлö. Луша и кылöн эз дойд, не только вачкыны. Да и мый понда виднытö? Лысанко туйсö да уджсö тöдiс сiдз жö бура, кыдз ассис йöрдансö.

Лысанко локтiс ю дорöдз, пырис ваас, чурс-чурс юыштiс да лэбтiс юрсö. Гырись воттез тёпöтöмöн усялiсö тырппез бердiсь. Тöдвылас усис, кыдз öтпыр эстi уйис ыждöм ваöт. Сэк сiя том вöлi, вына и немись эз пов. Конечно, ачыс эз бы уськöтчы юас, кöр сэтi и вöрыс кывтö, дзик пос, и тэ вылын морт пукалö. А тшöктiс ваас пырны нывка. Сiя тожö немись эз пов, отчаяннöй вöлi, дзик солдат. Не только ваö, но и биö пырис бы, ежели ковсис.

Öддьöн я, не я нывкаыслö мöдöрас вуджны колiс, но сiя пуксис Лысанко вылö и вашöтiс сiйö юас, и эз понды видзчисьны, кöр шочамасö кывтан керрес. Ны дынöдз Лысанко уйис кокнита. Сэсся пуктiс юрсö дорись кер вылас, мый вын коккезнас сынö, а керыс мöдiккезö пыкöтасьö, мöдiккес — куимöттэзö. Вешты-ко сымдасö мороснат, кöр коккет некытчö оз павкö!

Нывкаыс Лысанко юр вевдöрöт нюжласьö, керресö одзсис вешталö, а визыв ваыс вöвсö кылöтö сё улöжык и улöжык. И вот керрес эз лоö, но эз ло и лажмыт берегыс. Петны оз туй, и ковсис уйны эшö не öтiк сотня метр. Да кöть сiя бур, что ва ньылат.

Петiс Лысанко юсис, дзик вашыр — и пеллес ваöсь. Сулалö, поиктö, дзик пöдöм баля, коккес мыдзöмсяняс дрöжитöны...

Важсö касьтылöмсянь Лысанколöн нельки увдöрись тырпыс öшöтчöма. Сiя шлёп-шлёп пöдналiс öмсö, вуджис ю мöдöрас да кайис почта дынö, кытöн öнi сулавлö мöдiк вöв, а таратайкаись турунсö козаэзсянь дозоритö не Дзимко.

Почта дынын некин эз вöв. И заборись воротка игана, сы одзын кузь бедь сулалö. А забор бокас лудовкаыс сэтшöм зелёнöй, что Лысанколöн öмыс ачыс кыссис сы дынö. Турунокыс вöлöма небыт и чöскыт. И Лысанко вельдыр сэтöн йирсис, может, сы дырна, кыдз и одзжык, почта видзчисьтöн.

Эссянь, кöр Луша босьтлiс почтасö, Лысанко рыпкöмöн мунлiс магазин дынöдз. Сэтöн сулавлiс сэтчöдз, кытчöдз почтальонка оз вердышт сiйö нянёкöн. Рудзöговöйöн, чöскыт дукаöн. Перво, конечно, нянёкыс дöнзьö Дзимколö, кöда Лушалö паныт котöртö, сылiсь кисö нюлö, кивыльтö бöжнас — нелюбо и видзöтны. А кыдз бы Лысанко сiдз жö керис? Сiя эз думайтлы сымдасö. Сiя, кöр кылас Лушалiсь кок шысö, только юрсö бергöтас сылань да рып-рып керас...

Талун магазин дынас Лысанко тожö сувтчыштiс. Сы вылö кинкö горöтiс:

— Тэ мый татiсь кошшан, сырса?

Лысанко эта вылö бöжнас öвтыштiс. Сiя оз любит, кöр сы вылö горöтлöны. Мыйлö весись öм летны, ежели тэнö некин оз вöрöт?

А мöдiк, пöрись мужик, шуис:

— А-а, да сосед тай менам локтöма. — Сiя чепöльтiс буханка пельöс да мыччис вöлыслö. — Мый, старик, важ туйыт усис тöдвылат?

Голосыс тöдса, и Лысанко чурдöтiс пеллесö, бергöтчис мужикыслань да босьтiс сы долонь вылiсь коркасö тырппезнас, пондiс туплявны öмас.

— О-о, да тэ тай нач пиньтöм! — жалейтö мужикыс. — Умöль делоыт, Лысанко! Менам юрпиннезö киссисö жö, дак тöда сiйö бедасö... Лок вуджам гортланьö.

Бур, кöр эмöсь ёрттэз да тöдсаэз!

И Лысанко мунiс эта мужик сьöрö. Только мужикыс кежис подöн ветлан посок дорö, а Лысанко улöжык лэдзчис, кытi одзжык вуджис.

Горт ладорас, кыдз велалiс уна год сьöрна, медодз кежалiс веськытланьö. Сэтчин ордчöн сулалöны кык керку. Öтыс учöт да важ, оградатöм. Сы дынöдз Луша шоча вовлiс, и Лысанко öнi эз мун, а сувтчис мöдыс одзö, кöда краситöм лöзöн, а керку бокас ограда.

Только ештiс сувтчыны — бокас кучкис ыджыт мяч. Сiйö вына кокöн иньдöтiс том морт. Лысанко швычкис аслас бок кузя бöжнас да тэрмасьöмöн иньдöтчис шöрись улицалань.

«Ылöжык, ылöжык эта абызсянь! Ештасö и клячавны — мый сэтшöммеслiсь босьтан?»

Эта деревняыс учöт, нiя Лушакöт сiйö кытшöвтлiсö джын часöн. И Лысанко талун сы дырна жö ветлöтiс, быд керку одзын сулавлiс öтiк минутаöн — сымда ковсьывлiс почтальонлö, медбы пуктыны почтовöй ящикö нето сюйыштны кытшöмкö коласокö газета, письмо, журнал. Дыржык олыштiс басöк посöдза керку весьтын. Öткö, сiйöн, что эстöн Луша сiдзжö дыржыкöн баитлiс стариккöт, кöдö шувлiс сватöн. Старикыс дженыт кока, кыз кынöма, а чужöмыс ведра пыдöс пасьта. И сэтшöм жö волькыт, сiдз жö свиттялö. Мöдкö, дыржык сулыштiс сiйöн, что пантасис тöдса понкöт, кöда тöвнас эта местын Лысанко син одзын ыжмалiс. Не кытшöмкö понжуг, а бытшöм чочком пон. Сiя некöр эз вувт Лысанкоöс, эз повзьöтлы луннас туй кузя мунiсьöс. Да и эз бы ыжмав, кöбы Лушакöт ветлöтiс Дзимко, а сiя сэк эз вöв.

Луша пуктiс газетасö ящикö, и Лысанко мöдiс ни мунны одзлань, но оградаись петiс дженыт кока старикыс да пондöтiс басни:

— Лукерья, ашын нимлун мöда порйöтны, дак тэ пырав миянö.

— Но, спасибо. Буди почтаыс сёрöн локтас.

— Кöть и сёрмыштан, сёравно пырав. А мöд деревняас Степанлö юöр видз: корис, шу, воныт семьянат.

Баитöны, а этö кадö чочком пон лют-лют локтiс Лысанко одзö, кивыль керис бöжнас, бытьтö здоровайтчис, и мунiс кошовка дынас. Лысанко видзöтыштiс бöрланяс и казялiс: поныс нуöтö колбаса. Да не торок, а ыджытö, топ пес чурка!

А сват да сваття борскöны и нем оз адззö, мый керсьö ны гöгöрын. Но вот Луша локтiс кошова дынö, и Лысанко вöрзьöтчис мунны.

— Мак, а колбасаыс... Кытöн колбасаыс? — казялiс Луша. ― Тпру, Лысанко!

Луша босьтiс сумкасö, кöда пытшкись вöлi мыччисьöма одзжык розовöй яя колбаса.

— Мый лоис, сваття?

— Öштаси эд, сват! Али грабитiсö?

— Мый тэ, мый тэ! Пенсия деньгатö, поди?

Сэтöн Луша казялiс, кытшöм чöскыта обедайтö сватыслöн поныс да мыччалiс чуньнас:

— Видзöт жö, кыдз путшкö! Сватыслöн синнэс кымöс вылас кайисö:

— Ой-ёй-ёй! Вот понжуг, вот лёк горш!.. Но, вешта, сваття, вешта колбасаыт понда.

— Эн тöжды, сват. Сiдз и колö!

— Колбасаыслö? Да не сiдз жö, натьтö.

— Ме Тупöсь монь йылiсь баита. Силöй тай сумкасö кошоваам сюйыштiс. Шуи эд: пенсияэз, мыся, сетала, колбасанат ог понды пырны-петны... А некин, шуö, оз вöрöт, ась куйлö додят... Сiдз и колö сылö, мöдпырись оз понды кышавны. И мöдiккез дугдасö... Но, адззисьлытöдз, сват! Ны, Лысанко!

Да, этö быдöс Лысанко кылiс и адззылiс.

А талун ветлöтö öтнас, кыдз вольнöй цыган. Да этасянь сылö етша гажыс. Сылö колö удж, да оз сетö. Неужто сiя некинлö ни оз ков?

Иньдöтчис мöд деревняас, но сэтöн сiйö панталiс мужик, сiя видзис киас гезiсь керöм аркан,

— Эй, колбаса! — горöтiс мужикыс. — Лок ме дынö чожажык! Ме тэнö кöр ни кошша!

Лысанко обидитчис жö невна, что аслас нимöн эз шуö, но сувтiс да пеллезнас орсö.

Колö, колö на сiя отирыслö!

Может, бöра почта кыскавны? Эта бур!

Мужик арканалiс Лысанкосö да нуöтiс сьöрас.

Джын час бöртi эта жö туй кузя сiйö бöр кыскис машина, кöдалöн ыбöс вылас тöдчис чочкомöн гижöм кыв: «Мясокомбинат».

Чочком пон казялiс Лысанкосö и котöртiс машинаыс сьöрсянь ю дорöдз. Машина пырис ваас, а пон пуксис берег вылас да унньöвтiс: «Кытчö-ö? Кытчö кыска-а-ат?»

Лысанко бергöтiс юрсö гортланяс, рып-рып шыасис чочком поныслö да швыч вачкис кузь бöжнас вылын борт кузяс.

КУЖИС КЕРНЫ (1992)

(Видзöт и одзза вариант)

Арся мича лунö мийö Володя зонöкöт ветлiм тшакьявны. Косьтан тшак миянлö эз ков, и мийö эг копрасьö не маслянкалö, не гöрд юра тшаклö, кöда вöлi сымда — кöть зырöн тэч дозат, а мунiм сэтчин, кытöн йылöны ягрыжыккез, ельдöггез, ниндуллез — солалан тшак.

Ар-художник вöлi сибавлöма ни аслас краскаэзöн быд листа пу дынö, и öнi вöрыс сулалö гöрдвевья паськöма да веж серреза.

Дыркодь кытшлалiм шор дорись вöрсö, буракодь мыдзим да пуксим шоччисьны паськыт видз дорö. Сьöраным нянься да совся нем эз вöв, а кынöм öддьöн ни везгис-сималiс, и мийö öктiм кöс улоккез, медбы керны биок да пöжавны вöснит юра синявкаэз.

Öзта ме бисö, а зонö чувйыштiс бокам да чепöльнас жмитiс öмсö — чöв пö, эн шумит! — и мыччалiс чуньнас турун зородок вылö, кöда сулалiс кыкдас метр ылына ме дынсянь.

Веськöтчи, видзöта зород вылö, но нем интереснöйсö ог адззы. Зород — кыдз зород; — кык стожар, вевдöрас турун шаттез, бокас — пыкöттэз.

Володя вашкö пель одзам:

— Зород вылас кöч пукалö.

— Мы-ый? — дивуйтчи ме да пондi видзöтны зорöнжык. Казялi мыйкö рудö, шуи: — Тупка шырöс сёйö, тыдалö.

Сэтчö вирдыштiсö-петiсö вöрсис кык пон и ме бердöт топ уськöтчисö зородланяс, гöгöртiсö сiйö да нюжöтчисö-сувтiсö миян доззэз бокö кыввезнысö мыччöмöн.

— Мый вöджжат, шардöммез?! — горöтыштi ме поннэс вылö, и нiя нюкайтчöмöн котöртiсö сэтчин, кысянь локтiсö.

Вот нiя эз пондö тыдавны, и ме иньдöтчи зородок дынас... И сэк жö сы вылiсь кульк-мельк тупыльтчис кöч. Сiя чеччöвтiс не мелань, и ме эг адззыв, кужис я сувтны коккес вылö али миткисис спина вылас, но адззылi, кыдз пырис видз сайись расö. И кажитчис меным, что öтiк кокнас чотö.

Может, сiйöн и дзебсисьлiс, что эз надейтчы дойман кок вылас?

А мый: бедаыс быдлаö велöтас!

Дата добавления: 2015-11-16