Гожся асыв. Шоныт, лöнь погоддя.
Ме сулала вöр дорын, лапья кöз увтын, и кывза кайезлiсь «концерт». Сьылiссес оз тыдалö, но ме тöда, что нiя ордчöн, ме бокись ляга йылас, кытöн быдмöны руд кача дуббез — сiдз миянын шуöны ловпуэз, а ны увтын — бражник, осока, сьöктантурун. Нiя, сьылiссес, и то сэтöн, вылынжык местаас, томыник кыдззаинас да пипуаинас.
Шондi жалейттöг кисьтö ассис шонытсö. Вöр лолалö сöдз рунас да кывзö, кыдз сы гöгöрын, сы пытшкын мыйкö шушкö, китшкö, чивзö, больгö, шутнялö. А ме одзын, кушинок вылас, видзöтчöны озъягöдлöн чочком цветоккез, бабапельлöн веж юррез, руд вевдöра канькоккез, татарниклöн абу на оссьöм зуоккез.
Гöгöр кöвьясьö чöскыт дук, кöда сорлассьöм мöдiкöн — сир дукöн. Чöскыт дукыс кыскö дынас мошшезöс да зiэзöс, и нылöн дзингöмыс дурмöтö пеллез. Дзоридз вылiсь дзоридз вылö чеччалöны-лэбалöны бабыввез — чочкомöсь да вежöсь.
Коккез бокам, кайтшöтшкöра да кöчвоня нитш вылöт, сьöд гезöн кыссьö-шуксьö кöдзывлöн лёдз.
Кытöнкö Кува ю ладорын то и дело кылö нюжвыв «кук-ку!». Сылö паныт, дзик ошшасьöм могись — мийö пö тожö кужам шумитны! — вдруг кылас говка «трррр!».
Паськыт вöрас оланыс, гажа, гора!
Ме мунi тырган шы вылö, и косьмöм ньыв вылiсь казялi ыджыт, сера кырöс. Сэк жö кылiс «ки-ик, ки-ик!», и дюттясьöмöн, бытьтö сiйö чапкалiс то вывлань, то увлань вына тöв, локтiс мöдiк кыр да татшкисис-пуксис улöжык. Одззаыс шевкнитiс борддэзнас да лэдзчисис сысся улöжык и пуксис гарйыны пондöтöм гöпок весьтö, пондiс вартны нырнас. Улö усялiсö гöрдöтöм чагоккез: ньывлöн шöрыс вöлöма лян, и кыр кокнита пельдöтлiс нiйö пуыс бердiсь.
Кырыс уджалiс недыр: уськöтчис гатшмоз увланьö и пырис вöрас. Сы местаö сувтiс мöдыс, пондiс гарйисьны. Но вачкис нырнас только кыкись и чылыштiс мöдланяс, бытьтö видзöтiс, эз я письты шучкöп ньылыс, и тожö лэбзис.
Локтiс сера мороса каёккезлöн чукöрок. Нiя негорöн чивзiсö да мыйкö кошшисисö турунас и кусттэзас.
Кöр он видзöтчы да он кывзiсь, сэк вöрыс кажитчö пустöйöн. А кыдз буржыка осьтан синнэтö да пеллетö, мыйсö только он казяв, мый он кыв!
То кинкö пикöстiс, то порсь моз роксыштiс. А, чу, кытöнкö катша китшкыштiс, да дзик полöмöн. Мыля сылöн сэтшöм гусь шыыс?
Адззи катшасö. Но сiя мöдiк кай — тоторкатша. Абужык чочком бока и учöтжык миян катшася.
Эг казяв, кöр локтiс кыр да бöра кутчис аслас удж бердö.
Ньыв, веськыт да кузь, горалiс, кыдз пустöй кöньöс, кöр кырыс вартiс сы бок кузя нырнас. Сера каёккес койыштiсö-лэбзисö кушинас, — тыдалö, нылö эз гленитчы гора ныра соседныс.
Кокора увтiсь, кöда куйлiс кушин дорас, петiс лöз пичик, пуксис пес поленич вылö да пондiс видчыны: «Пи-чик! Чик-чак!» Эта дырни ачыс дюттясис вöснитик коккез вылас да трекйис кузь бöжнас. Кыр лöгöн дзарнитiс пичик вылö: эн пиксы пö, эн мешайт меным, уджалiсь кайлö. А пичик котöртыштас öтлань, трек-трек керас бöжнас, котöртас мöдланьö и бöра — трек-трек бöжнас да голоснас — чик-чак!
Мый сiя чепсасьö? Оз гленитчы кырыслöн кокасьöмыс али тоторкатшаыслöн китшкöмыс?
Кин сiйö тöдас! Нiя, вöрын олiссес, олöны асланыс законнэз сьöртi, и мортыслö нiйö сьöкыт вежöртны...
Коли кайесö, вöрзьöтчи мунны. И эта секундаö кылi тоторкатшалiсь горажык да гажажык шы и сувтчи. Видзöта: поленич дынсянь öтланьö лэбзис кыр, а мöдланьö — тоторкатша.
А кытöн пичикыс? Мунi пес поленич дынö, адзза: пичик вöрöтчытöг, паськöтöм борддэзöн куйлö поленич вылын.
Мый лоис? Неужто кинкö вачкис? Не кырыс я? Может, тоторкатшаыс?
— Но лёк ныррез! — видча ме ас гöгöрам смекайтчикö.
Тоторкатша некытöн оз тыдав, а кыр ветлöтö ньыв кузя да видзöтлö мелань. Может, мöдö висьтавны, медбы ме эг сюйлы нырöс, кытчö оз ков! То и повзьöтчö: чеччöвтiс вылöжык и мыйкö бердö сiдз вачкис нырнас, что аслас «тррр»-öн вевттис вöрлiсь быдöс шыэсö.
Жаль вöлi меным пичиксö, но мый сэтöн керан?
Но сё жö — кöда этö керис? Вермис я орöтны олансö кайлiсь вöр дозирайтiсьыс, «пу докторыс»? Сэтшöмсö эг кывлы и эг адззывлы. А мöдыс — вермис?
Гортын босьтi орнитологгезлiсь* книгаэз, адззи кыр йылiсь висьтассэз. Ныын гижöны, что кыр — абу пу доктор. Сiя гаггесö кыскалö косьмöм нето косьмыны ни пондöтöм пуэзiсь.
Тöдi и сiйö, мый мöдi: кырыс — лöг кай, и лöгувьяс вермö вийны ассяс учöтжыкöс.
А тоторкатша?
Сiя вöлöма эшö лёкжык: кайпоззэзiсь жугдалö кольттез, вийлö кайпияннэзöс, а кöр и кайезлiсь орлалö юррез да сёйö юрвем. Эта кузя тоторкатшасö мукöд муэзын шуöны разбойникöн и палачöн.
Петö, что умöль уджсö вермис керны öтыс и мöдыс.
Вöрлöн сэтшöм закон: кин вынажык, сылöн и воля.
*Орнитолог — учёнöй, кöда тöдмалö кайезлiсь олöм.
Дата добавления: 2015-11-16; просмотров: 52 | Нарушение авторских прав
| <== предыдущая страница | | | следующая страница ==> |
| МЕДБÖРЬЯ ТУЙ | | | ОРСÖТЧИСЬ ОШ |