Поннэс, кыдз и морттэс, овлöны шудаöсь и шудтöмöсь.
Зонка вöлi гажа лайка, быд ладорсянь бур пон, но не шуда, не шудтöм — джын шуда.
Сылö учöтсянь эз лöсяв оланыс. Кöр сылö тырис куим неделя и сiя бура ни пондiс адззыны позсö да сойесö-воннэсö, сiйö кидтiсö мамыс няня дорись. А мамтöм оланыс — лёк олан.
Эта шогмис сiдз.
Сiя куйлiс кынöм вылас да везгис-нимасис. Няняыс шоныт, небытик. Эн дышöтчы вöрöтны кывнат да тырппезнат — и öмат котöртас чöскыт йöв, а тэ сiйö ньылав, ньылав... И кычанок ньылалiс сэтчöдз, кытчöдз эз куньсьö синоккес. Кöр саймис, няняыс öмас эз ни вöв. Поз дынас сулалiсö кык морт: инька, кöда поныслö ваявлiс сёян, да мужик.
Инька висьталiс:
— Таво вит пиян, и витнанныс сьöдöсь. Куимыс кыррез, кыкыс нылочкаэз. Босьт, кытшöм любо, только чочком моросасö эн вöрöт.
Мужик кутлiс öтiкö, мöдiкö, бергöтлiс киас, водтöтлiс нiйö му вылас гатш да видзöтiс, кыдз кычаннэс сувтöны кок йылö — перыта али жагöна, вöлись шуис:
— Сет чочком галстукатö, мöддэс оз колö.
— Сiйö, висьталi, аслым коля. Сылöн моросас чочком крест — шуда пон лоас.
— Мöдiкö колян, вон мымда нiя! Тэныт не вöравны. Инька эз тэрмась сiйö сетны:
— А шудаыс эд донажык.
— Ме содта, содта, мый коран. Тэ эн пов сэтiсь, содта.
— Но, босьт инö, вöравны дак.
И чочком мороса понпиянöс сюйыштiсö сумкаö, сумкасö пуктiсö мотоцикл люлькаö да кытчö и нöбöтiсö.
Сумкаас сылö вöлi пемыт, дзескыт, чорыт. А люлькаыс чеччалiс, пöлiнясис, чуклясис и бура зэгйис да туплялiс понпиянсö. Сылö шумсяняс да зэгйöмсяняс лоис недолыт, и сiя пондiс горзыны — кытсавны мамсö. Мамыс эз лок, и кычанлö лоис эшö гажтöмжык да умöльжык, и сiя пондiс никсыны мый вын. Но и этö никсöмсö сылiсь некин эз кыв.
Недыр мыйись мотоцикл сувтчис, лöньсис. Кычансö сумкасис кыскисö, лэдзисö веж туруна му вылö, и мужик шуис:
— Вася! Лок жö видзöт, кытшöм зверьöс ме вайöтi. Мужикыс дынö котöртiс зоночка, босьтiс киас кычансö, малыштiс сылiсь юрсö. Зоночкалöн киэс небытöсь, ласковöсь — бытьтö кычанлiсь спинасö мамыс кывнас нюлыштiс.
— Кыдз сiйö шуöны?
— Нимсö ачыт кошшан. Лапко, Шарик, Бобик, Сьöдко — вон мымда ниммес!
— Нiя разь ниммез? То ниммес: Джульбарс, Цезарь, Барон, Кайзер...
— Ö-ö, сэтшöммес миянiсьыслö оз лöсялö! Миян — лайка, крестьянскöй пон, а нiя ниммес — царскöйöсь.
Кычаныс пондiс вуктыны, и кыдз только Вася лэдзис сiйö кисис, сэк жö и öсiс.
— Кузь туйыс эд кольмöтiс, тыдалö, — жалейтiс мужик. — Водтöт зонкасö, ась шоччисяс, а сэсся йöлок сет.
Вася чапкыштiс ящикö турунок, ольсыштiс важ нямöт.
— Лок, зонка, узьышт...
Сiдз и пондiсö шуны понсö — Зонка.
Быдмис сiя чожа, и месяц бöртi пондiс лявгыны. А велöтiс этаö — кань, кöдакöт Зонка орсiс бы, а сiя пышшалiс сы дынiсь: кайлывлiс йöр вылö, поленич вылö да сэтчинсянь дразнитчис. Зонка чеччалiс да увтiс, а кань видзöтiс сы вылö вылiсянь да сералiс: «Но, мый, кутiн? Пондыв!.. Öнi лет горштö, лет, абу кö жаль!»
А öтпыр каньыс эз пышшы: сувтiс паныт, кöстiсис коромысла моз, пиннесö мыччис. Зонка тяв да тяв — эн лöгась пö, кань, ме пö орса бы тэкöт. А каньыс — сап сылiсь нырсö гыжжезнас!
— Ник-ник-ник! Эк-эк-эк! — бöрдчис Зонка да юрсö зэгйöмöн дзебсисис позас. Сэтчин дыркодь чышкис лапанас вирöсь нырсö да видiс каньсö: «Бöбöв, бöбöв! Колö разь сыбурнасö — вирöдз?!»
Да разь только каннес öбидитлiсö? И поннэс тожö, и морттэс. И сё нем понда — вот мый умöльыс!
Кыдзкö Васякöт кöджö чериавны мунiсö. Вася юсö нёджжалö — буржык места кошшö, а Зонка нюкайтчö. Эта мымда берся дукыс! Шыр котöртöм — дук кольöм, ыбшар пукалöм — дук кольöм, баля мунöм — бöра дук. А берег дорас, буждöмас, джыдж поззэз, а поззэзас — пияннэз кышöтчöны. Кыдз сэтöн он нюкайтчы, он кывзiсь да он кошшись?
Пантасис кузь паськöма морт. Инька я, мужик я — оз позь тöдны. Киас кузь шать. Рам руч моз сибöтчис, нем эз и шу, а косьöвтiс Зонка спина кузя.
— Мыля вартлан? — горöтчис Вася. — Мый тэныт умöльсö керис?
Морт шуö:
— Мед баляэсö эз вашöтлы.
Кытшöм баляэз? Зонка ны дынö матö эз сибöтчыв!
Эшö бы эз кут öбида, ежели бы Вася вачкис. Зонка сы одзын виноватöй невночка: öтпырись сылiсь виа нянь сёйис, казявтöг, конечно; мöдпырся мöдiс кыскыны банкаись чериок да пöрöтiс банкасö, и банкаыс черинас юö тарöвтчис. И сэк Вася только ыш ловзисис да шуис:
— Ок тэ! Он куж, дак эн бы и кутчы, а корин бы менчим!.. Весь лунсö ю дорас öштiмö!
Да, вöлi берсяыс. Учöтнас да томнас сiйö неетша öбижайтлiсö. Кöркö ыджыт пон — гöрд кымöса, кепись пасьта пеля — пурис... Зонка сыкöт одзасьны кутчис да одзалiс кругсö керны и паныт сылö локтiс. А сiя, вижлок öм, — ам-ам-ам!.. Голясö и коксö курччалiс. Сы понда, что котöртiкас эз вöт. А дыр я бы эта ыждаыслö вöтны? Эн дышöтчы, чеччав да чеччав, только пеллетö шамырт да бöжтö нюжöт, медбы тöлыс етшажык падмöтiс.
Ракаэз вот, чочком бокаэс, тожö... И касьтывны абу охота, но пондiм, дак бöр огö ни керсьö.
Нiя, кык рака, ю сайын олiсö, а сёйны часто вовлывлiсö Зонка дынö. Öддьöн и бöбöсь да хитрöйöсь. Öтыс волькыт гöна, сöстöм, мöдыс нятьöсь и чотö.
Петкöтасö, вöвлi, Зонкалö бекöр сёянöн, пуктасö сы поз дынö. А бöббес сэтöн и эмöсь ни: чеччалöны сы бöж дынын, сёйны оз сетö. Зонка терпитас, терпитас да уськöтчас öтыс вылö, а мöдыс сы коста медыджыт няньторсö гусялас. Пыр и пыр ныкöт шум да гам вöлi. А кыдзкö сэтшöм чöскыт лы гусялiсö! Да не куш лы, а гöч сораö, эшö вильöттöмö. Сэтшöм жаль сiя вöлi, что Зонка нельки горзыштiс гусьöн. Горзыштiс да кöсйисис: «Чöлö, вот быдма, дак бöрдöв-керат менам! Бöжтöг лоатö!»
И вот Зонка быдмис, уравны велалiс, туаннэзöс адззö, тарöс да дозмöрöс лэбтö, кабанöс повзьöтлö. Лайкаыт — лайка и эм, тöдö ассис уджсö. Арбыт и тöвбыт уджалö, радся-рад. Вася да сылöн айыс ошкöны понсö, бура видзöны. И Зонка вунöтiс ракаэслiсь öбидасö.
Но öтпыр гожумнас, кöр Зонка лун-лун весь олiс (вöравны эта кадö оз туй — зверь да пöтка пияннэз быдтöны), Вася нуöтiс нёль кока ёртсö купайтчыны.
Вася дыр тульöтчис ваас, а Зонка уялiс-керис, вуджис юсö да баддяинö пырис. А баддяинас — ракаэзлöн зык.
«Мый нiя сiдз карзöны? Ноко видзöтам».
Котöртiс шум вылас, и сы дынö уськöтчисö кык рака. Сiдз и кокыштöны, сiдз и сапкöны!
«Ррав-ав! — эрзыштiс Зонка ны вылö. — Мый тiянлö месянь колö? Меным разь и пырны оз туй этчö? Ррав-ав!»
Казялiс Зонка: сэтöн, ыджыт бадь вылын, ракаэслöн поз. И эшö казялiс: этö как раз нiя ракаэс, кöдна кöркö чöскыт лысö гусялiсö.
Зонка пырис тшöкжык местаö, кытчö ракаэс оз сибалö, а му вылас — ракапиян! Позсис чеччöвтöма, а бöр лэбтiсьны оз вермы — борддэс вынтöмöсь.
Дак вон мыйсянь шумыс!
И сэтöн Зонкалöн чужис юрас лёк дума: вештiсьны ракаэзкöт. «Ог сёй пияннытö, только асьнытö повзьöтла».
Ракапиян дзебсисьöм ёгас, шы не тöв пукалö. Сiдз аймамыс тшöктöны. Зонка — сы дынö, а сiя шевк-шевк — да бадь вужжез увтiсь осьтаö. Юрсö дзебис, а бöжсö öтöрас колис.
Сы бердö и мöдiс кутчисьлыны зонка, но нырас вачкис нёштöм, дзик помойнöй ямаись, дук.
«Фу-фу! Ме ог вöрöт тэнö, лякöсь бöрöс!»
А ракаэс гайзöны — пеллез дурмöны!
Зонка петiс баддяинсис. Ракаэс уськöтчисö сы вылö. Öнi нiя вöлiсö нёльöн ни и эшö лöгжыкöсь.
— Ррав-ав! — повзьöтлö нiйö Зонка. — Ррав! Ракаэс сiдз и зангöны нырнаныс, вачкöны борднаныс. «Дугдö, бöбöввез! Ме тiянöс ог вöрöт, гортö ни муна. И тiйö мунö».
Зонка пöльтыштiс ю дорö, буз-баз уськöтчис ваас да пондiс уйны горт ладорас. Но эз ешты и шöрöдззас локны, кыдз спинасö кокыштiс рака. Сэсся мöдiк, куимöт. А нёльöтыс татшкис нырсö поныс синö. Зонкалö синас пым сидзис, сiя зубытсяняс кавнитiс. Этö кылiс Вася, котöртiс поныс дынö горöтлöмöн:
— Кыш, разбойниккез! Кыша!
Зонка петiс васис, треситчис, пондiс чышкыны лапанас кокыштöм синсö. Вася пешлiс сылiсь синсö, шуис:
— Эн горзы, Зонка. Бугыльтö абу кыскöмась. Веськалас синыт...
Веськалiс, но сiйöн синнас Зонка дугдiс адззыны.
Дата добавления: 2015-11-16; просмотров: 44 | Нарушение авторских прав
| <== предыдущая страница | | | следующая страница ==> |
| Кытшöм морт, сэтшöм и сер | | | МЕДБÖРЬЯ ТУЙ |