Пашко менам дона

Пашко — дас год гöгöрся, шадраа зоночка, öддьöн удав да мывкыда. Сiя некöр эз видзлы киас винтовка. И пишаль эз босьтлы. А сьöктан да вурун вартан биток эз лэдзлы киись. Пишаль да винтовка керöны лёк, сьöктан да биток — бурö. Сiдз Пашколöн айыс баитлiс. Сiдз и зонка думайтiс. Этö одзжык. А талун Пашколöн мöдiк дума. Винтовка — мортлö отсалiсь. Вöлi бы сылöн винтовка — эз бы пукав гор саяс, кытчö сiйö тшöктiсö дзебсисьны дядя Степан да солдаттэз.

Нiя асьныс сулалöны öшыннэз одзын, видзöтöны öтöрö. Сэтчин — чочкоммез. Вичкуö шедöм морттэз — гöрдöсь. Этадз нiя асьнысö шуöны. Дядя Степан эшö председатель. Пашко тожö гöрд. Сылöн айыс, Швеч Опонь, Гöрд Армияын служитö. Только, шуöны, чочкоммез киö сюрöма.

Öнi Пашко чунь öтнас кольччис. Бабыс кулiс, мамсö кытшöмкö кудоба гробöдз воштöма. И Пашколö, поди, недыр овны. Шедас чочкоммез дынö — виясö. Шедны вермас. Дыр я нiя вичкуас видзсясö? Нянь абу, патроннэз етша. И винтовкаэс не каждöйлöн. А чочкоммезлöн пушка эм. Только оз лыйсьö сiйöн: попыс оз лэдз. Этö гöрд тоша солдат висьталiс. А то бы кыдз бузгисö пушкасис вичкуас!..

— Пашко, пет-ко позсит, — кытсалiс дядя Степан. — Эн кынмы?

— Эг, дядя... Мыччалан öнi?

Дядя Степан малыштiс чунь козонокнас öшöтчöм уссэсö, кыминьтiс кöртовöй öр — купель, пуксис сы вылö.

— Видзöтан бы? Только недыр, — шуис дядя Степан, босьтiс винтовкаись патроннэз да сетiс винтовкасö зонкалö.

Öтöрын вöлi эшö югыт, а вичкуын умöля ни тыдалiс. Зонка полöмöн босьтiс сьöкыт винтовка и чуть эз уськöт кисис. Этö казялiс дядя Степан, шуис:

— Видзны сiйö, Пашко, крепыта колö. Сэки солдат лоан. Врагыс тэись повны пондас.

Зонка зэлöтiс кöдзыт винтовкасö кöсыник чуннезöн, бытьтö лöсьöтчис пидзыртны сiйö, висьталiс:

— То кыдзи, дядя, колö... Ме кужа...

— Сiдз, зонöй, сiдз! Велöтчы, пригодитчас, поди. Вай-ко мыччала, кыдз зарядитны.

Порог увтын кинкö заптiс пес, чеглалiс пöввез, жольöтiс горпöданöн да юшкаэзöн.

Гöрд тоша солдат бöра видiс учöтик мортöс, кöда лöсьöтчис сотны еннэсö.

Видöмыс, тыдалö, эз отсав. Учöтик морт шытöг чагдiс пöвторрез, сюйис горö. Югйöвтiс би, пондiс тачöтны-лонтiсьны гор. Чочком бекöрись пызан вылö кинкö трина-брана кисьтiс деньга. Öтiк пятак усис джоджö, тарöвтчис Пашко нинкöм бокöдз. Одзжык бы зонка босьтiс сiйö, а талун эз. Оз ков, да и некöр: сiя велöтö винтовка.

Учöтик морт локтiс дядя Степан дынö, шуис:

— Быдöс готов, локтö сёйны.

Пашкоöс пуксьöтiсö гор бердö, сетiсö руд тупöсёк да пым ва. Зонка курччöвтiс сразу джын тупöсьсö, вырснитiс васö, тшöк мунiс и дыр кашляйтiс.

— Эн тэрмась, — шуис дядя Степан. — На-ко эшö сухарок. Пашко гырскис сухарьсö, видзöтiс стена вылö рисуйтöм кагаöс. Би югöрсяняс сiя дзик ловья. Только пасьтöм да борда. Диво: морт, а борда. Вот бы сылö, Пашколö, борддэсö. Зонка лэбзис бы Панюкö. Сэтчин Гöрд Армия. Лэбзис бы да висьталiс командирлö: «Дядя Степанöс чочкоммес мöдöны вийны!».

Командир сетiс бы Пашколö вöв, висьталiс: «Нуöт миянöс сэтчин!»

— Ю эшö пымсö, — тшöктiс дядя Степан. — Шонытжык лоас... Туйö эд мунан.

Медодз Пашко казялiс звездаэз. Нiя уна-уна, топ бисер киссьöма небо пасьтас. Дзардöны звездаэс, кисьтöны улö надз югöрнысö, видзöтöны Пашко вылö, бытьтö мöдöны тöдны, мыля зоночка петiс öшынöт. Петiс Пашко, ляпкöтчис чорыт стена бердö. Öтöрас эшö кöдзытжык. И полöм петö. Невночка.

Кинкö лапкöтiс пельпонсö, небурика, ласкова. Этö дядя Степан. Сiя тшöктö мунны. Колö мунны. Повны немись: звездаэс оз висьтасьö, не ловьяöсь. Нiя — кöрттув шляпкаэз, кöднöн дорöма небоыс. Сiдз шуис Петька, поплöн зон. А Петька — грамотнöй морт. Сылöн книгаэз эмöсь. Аслас.

Пашко шымырöн-шымырöн мунiс пуэз коласöт, броддис пыдын лымöт. Ограда шöрас чужйисис, сунки-панки татшкисис столаö. Кöть и рытыс звездаа, а кок увтын нем оз тыдав. Вежöртiс, кытчö чужйисис. Сэтöн могила. Вевдöрас пызанпöв кодь плита. Петька баитлiс, что сы увтын поп куйлö. Пашко кежис веськытланьö. Сэтчин, ограда пельöсас, эм осьта. Луннас сэтöн пулемёт сулалiс, öнi некин абу.

Пашко сибöтчис стын дынö, лöсьöтчис петны, но кылiс кокшы. Нёджжöвтiс коласöт, казялiс мортöс. Сы юр вевдöрын тыдалiс кытшöмкö ёсь. Эта — штык. Жар койыштiс Пашколiсь вывтырсö, пот мунiс сьöлöмыс. Зоночка тöдö, кытшöм дорыша да лэчыт штыкыс. Пурскас сiйöн кынöмат — кыдз порсьöс начкас. А кокшыэс сё матынжык и матынжык. Пашко водiс стын увтiсь стена бердö, куйлö, оз ловзись. Сьöлöмыс токöтö, пессьö, готов мороссис чеччöвтны...

Солдат перыта мунiс стын пöлöн да пырис поп оградаö. Вöлись ловзисис Пашко да лэбтiс юрсö. Öнi как раз...

Дыр котöртiс Пашко, и сувтчис яг понас. Перыта котöртöмсянь зубыт лоис кынöмыс, пыкис мороссö, бокас дзик туввез ордчисö. Юрас шумитiс, пизис, мыдзисö коккез. Пуксьыштiс, туй дорас, нёджжасис. Одзас сулалiс пемыт вöр, лöнь да гажтöм. И только чочком полоса лэдзчис керöс увтö да öшис пуэс коласö — туй кежис бокö. Мичашор сайын, мыс вылас, сулалiс Карван пожум, медыджыт пу эна местаэзын. Сылöн шапкаыс пыкöтасис Кöшö и сьöд видзис вöр вевдöрын. Кöш — этö не ва гумалан посуда, а ойланьын медъюгытöсь сизим звезда. Сiя пöлiньтчöма ни, мöдö ордчыны ороп вылас, öшöтчас оропыс увлань — югдас. Сiдз Пашколöн айыс баитлiс. Вöвлi, гындö тятьыс вурун, керö пимиэз, а Пашко вурун вартö. Боёка горалö струна: дбрунь, дбрунь, дбрунь. Пашко сьылыштлö биток орсöм сьöртi:

Дбрунь, дбрунь, дерева, Кин сiйö керöма? Швеч Опонь керöма Да Пашколö сетöма...

Вартас, вартас Пашко, сьылас, сьылас, да и куньсясö синнэс. А кисис битоксö оз лэдз, и вартан струна сё горалö. Только мöднёж ни сьылö, вöснит голосöн, басöка, дзик пöлян. Но тятьыс эз сетлы досповна кывзыны басöк песнясö. Малыштас пашмöм юрсö, босьтас зонсö киас, лэбтас гöбечö, шуас:

— Кöшыс кыминьтчö ни, пора и миянлö поздiсьны... Пашко пыдынжыка лэдзис шапкасö, сайöвтiс морозсянь пеллесö. Шапка бур, шоныт. Сiйö дядя Степан сетiс. Пашколöн айыс кöркö вурлöма.

Зоночка чеччис — эшö öтпыр видзöтiс посадлань, кошшис синнэзнас вичкусö, но эз адззы сiйö кöдзыт тумансис и, уськöтчис котöртны. Вазьмöм пониток мороз вылас чорзис, полаэс кынмисö. Быд оськöв коста кылiс кур-пар, кур-пар. Кок увтын южöтiс кöс лым, дзуртiсö кын нинкöммез. Эта кузя и эз кыв Пашко, кыдз сiйö вöтiсö доддя вöлöн. Казялiс Пашко бедасö, чепöссис бокö, да сёр ни вöлi.

Кыз голоса морт горöтлiс бöрсяняс.

— Стой! Стой!

Пашко чеччалöмöн котöртiс вöрлань. Эшö кынымкö шаг, и сiйö сайöвтасö пуэз. А сэтчин — спасеннё. Ежели вöтчöны чочкоммез, то нiя вöрас оз пырö, полöны. А гöрддэз, дак... Но коккес мыдзисö, лоисö топ чужöйöсь, каттисисö лымас.

Укнитiс лыйöм, чавк потiс кöдзыт руыс. Дорись кöз вылiсь гыж лэдзчисис лым коколь. Пашко усис, дойдiс тшöкасö. Лэбтiсьны эз ни ешты: кыз голоса морт тшöктiс куйлыны. Мöдiк, жеркöтчан голос юалiс:

— Кин сiя, Миков?

Сiя, кöдö шуисö Миковöн, висьталiс:

— Час тöдам.

Пашколö чужйисö ордлыэз увтö, тшöктiсö чеччыны да лэбтыны киэз. Зоночка сувтiс, бергöтчис туйланьö. Одзас сулалiсö погона морттэз: кык штык метитчисö сы моросö.

«Вот и шедi, — думайтiс Пашко. — Мый öнi лоас?»

Тшöктiсö бергöтчыны, Пашко сувтiс ныланьö бöрöн. Кык ки пондiсö шаритны пониток, вешьян, нямöттэз. Босьтлiсö шапка, мöдралiсö сiйö, бöр пуктiсö юр вылас.

Жеркöтчан голос шуис:

— Эн малась, Миков. Адззан: нищöй. Кытшöм сылöн оружие?.. Варт сивилёнас, мед тöдiс, кыдз шатласьны, и ась мунö.

— Мый нö не да, — шыасис паныт Миков. — Арталö жö курöг юрыт!

— Енсис пов, Миков. Не пон душа эд.

— Но, но! Лёб эшö аслыт! — рякöстiс Миков да зарядалiс винтовкасö.

«Быдöс», — думыш керис Пашко, и тöдвылас бöра усис айыс, дядя Степан, сылöн ёрттэс.

— Кыскамö штабö, — прикажитiс Миков. — Сэтчин тöдасö, мый керны.

Жеркöтчан голоса солдат сувтöтiс Пашкоöс пидзöс вылас додь нырö, тшöктiс видзöтны прокод одзас да висьтасьны, кытчö сiя мунö. Пашко ачыс дивуйтчис, кыдз кокнита кужис бöбöтны нiйö. Сiя — нищöй, ветлöтö кортöн. Рытнас локтiс посадö, а сэтöн лыйсьöны. Зонка повзис и давай пышшыны посадсис. Котомкасö нельки öштiс. А Мичашорас вот вöтiсö...

— Кылан, Миков? — юалiс жеркöтчан голоса солдат. — А тэ шуан разведчик.

Миков чöлiс. Сiя вартiс оча сапог, шонтiс коккесö.

— Сулав, — вдруг горöтiс Миков. — Кöрö, ёрдöм. Колас подöн муныштны.

Мöдыс зэлöтiс вожжиэсö, и вöв дугдiс рыпкыны, а чожа мыйись сувтiс. Миков чеччис, винтовкасö, колис доддяс. Жеркöтчан голоса солдат вашöтiс вöвсö.

Пашколö тожö кöдзыт, и пидзöссэс тувдiсö, но оз туй не пуксьыны, не чеччыны. И бöра усис тöдвылас посадiсь вичку да борда кагаок. И кыным унажык мунiс, сыным öддьöнжык Пашко видiс асьсö, сыным гажтöмжык, сьöкытжык лоис сьöлöм вылас. Чожа югдас, и чочкоммез бöра пондасö лыйлыны вичку кузя, пырны оградаö. А дядя Степанлöн патроннэз совсем етша.

И сэтчö лоис мыйкö невежöртана. Вöв чепöссис бокö. Пашко гатш-гатш таралiс доддяс да ештiс кутчисьны радз бердас. Сэсся бергöтчис кыминь, видзöтiс бöрас. Сажень куим ылына вöтчис Миков да мыйкö горöтлiс. Ылынжык путрайтчис лымас мöдыс. Пашко кималаснас адззис вожжи, зэлöтiс сiйö, медбы сувтöтны вöвсö. Но повзьöм вöв петiс ни туй вылö и öдззис гöнитны эшö öддьöнжык.

Кычан моз тявкнитiс лыйöм. Вöв джöмдiс, усис пидзöс вылас, нёштöма, гöрöвтiс да пöрис бок вылас. Ризьнитiс оглобля, додь пöлiньтчис. Пашко ыскöвтiс лымö. Кымöс кузяс вачкис мыйкö чорыт да усис ордчöн. Малыштiс Пашко этö чорытсö, тöдiс: винтовка! А додь дынö сибöтчис сьöд вуджöр, кылiс сьöкыта чушыктöм. Пашко босьтiс винтовка, пондiс кошшыны затвор. Сэк жö син одзас пыкнитiс би, и сьöрсьöн-бöрсьöн гымгисö кык пишаль. Пашко пельпонö сидзис мыйкö шоныт. Вöтчись солдат усис кыминь. А мöдыс некытöн эз вöв, — тыдалö, бертiс бöр.

Эшö öтпыр вöрзьöтчис вöв, и гöгöр лöньсис, бытьтö пемытыс ньылыштiс быдöс шыэсö, нырыштiс, пöдтiс быдöс ловьясö.

Пашко куйлiс додь бокас, думайтiс и некыдз эз вермы вежöртны мый лоис. А пельпон эшö öддьöнжык зубытсялiс, и вазис пониток сос. Чеччис, пешлiс соссö: сы пытшкын полькьялiс мыйкö небыт. Чöвтiс кеписьсö, трекнитiс кинас. Этасянь косьöвтiс-лыйис конувтас сэтшöм зубыт, что зоночкалöн синваэс петiсö.

Вежöртiс Пашко, мыйсянь зубытыс: сiйö ранитiс солдат. Сылöн, тыдалö, «наган» вöлöма, кыдз и дядя Степанлöн. А усис солдатыс Пашко пулясянь. «Сiдз сылö и колö, — думайтiс Пашко. — Не ме, дак сiя бы менö...»

Вир йиджис йöрнöс увтö, пондiс кынмыны ранитöм киыс, Колö бы сувтöтны вирсö. Тятьыс тöдö сэтшöм молитва, кöдасянь сувтчö вирыс. Пашко эз тöд вир öлан кыввесö. Ковсяс домавны пельпонсö сiдз жö, кыдз тöн дядя Степан каттис солдатлiсь кисö. Пöрччавны нямöт и домавны. Нямöт? А мунны чальподöн? Коктö кынтан. Оз туй сiдз. Вожжинас ковсяс.

Пашко чеччис, жагöника кыссис вöв юр дынöдз. Вожжи конец сюрöма вöв увтас. Мездöтiс чересседельник. Сiя не кучиковöй, небыт. Пуксис вöв туша вылас. Сiя сё эшö шоныт. Умöлика, кыдз вермис, зэлöтiс плащатöй гезокнас понитоксö пельпон бердас, гöрöдалiс конувтас.

Югыт звездаа Кöш сувтiс ни ороп вылас, бытьтö лöсьöтчö кыминьтчыны Карван пожум юр вылö. Пу йыввез сайсянь калитчöм гöглянöн лэбтiсис тöлiсь. Кытöнкö ылын-ылын, ровно му пытшкас, китсöвтiс петух. Тыдалö, не матын эшö Панюкöдз. Колö тэрмасьны. Оз кö ешты Пашко локны асылöдз, умöль лоас. Кыдз сэки пантасяс дядя Степанкöт? Сiя то и шапкасö сетiс, аслас пайöн вердiс...

Чеччис Пашко, иньдöтчис туйö. Мунны сьöкыт, бергалö юрыс. Сэтчö жö бытшкö лопатка увтö, мешайтчö конувтас гöрöд. А мунны колö. Сiя мунас, адззас гöрддэсö. Вот каяс керöсö, а сэтчин кокнитжык лоас шагнявны. Но мыля пöдтö ловсö, мыля жар? Пуксис, судзöтiс кинас лым, сюйыштiс öмас. Ыркытжык и долытжык лоис, öнi — одзлань. То и керöс йылыс локтiс.

Пашко тэрмасьö, но коккес оз кывзö сiйö, пыксьöны. Эшö невна мунiс, лэдзчисис туй вылас, водiс, кватитiс размöд öмнас лымсö. Бöра кокнитжык лоис. Мöдiс чеччыны, да садьыс эз ни тырмы. Вöлись повзис, вынсьöтчöмöн горöтiс:

— Ая-а!

Сибдöм голосыс горалiс умöля, эз паськав вöр кузяс, бытьтö пыкöтасис туйдорись пуэзас, каттисис лымья уввезас, öшис. Эшö мöдiс горöтны и эз вермы. Мыйкö сьöкыт, дзик мешöк пизь, нырыштiс пельпоннэсö. Этасянь лоис шонытжык, дугдiсö пиявны ки чуннес. «Тыдалö, шонтiс», — мелькнитiс дума, и сьöкыт он досповна нырыштiс зоночкалiсь юрсö. А син одзас югьялiс шондi, ласкова шыннялiс Пашколö. Шондi сылö медбур ёрт. Унаись сiя, кыдз роднöй мам, кöда йылiсь часто висьтасьлiс айыс, шонтлiс Пашкоöс гожумöн, косьтылiс сылiсь ва коккез. И часöт йöрнöссö косьтас, и оз понды кынмыны киыс. Бур лоас. Адззан, совсем матö локтiс, малалö сылiсь юрсö да шувлö:

— Роднöй менам... дона менам... Öнi жö шонтам.

Неыджыт отряд петiс Панюкись да иньдöтчис разведкаöн посадлань. Одзас сивöй вöв вылын пукалiс топыт мыгöра морт, мышкас öшалiс дженыт винтовка — карабин. Сы туй кузя лёдзöн, топ дзодзог бöрын пияннэз, кыссьöны сэтшöм жö чочком вöввез, тырöмöсь куржаваöн. Öтiк вöв вылын пукалö пася мужик. Сылöн абу не седло, не винтовка. Ежели командир видзöтiс бы бöрас, то казялiс, кытшöм печаль маитö этö мортсö. Йыжольöн öшöтчöм уссэз да вöйöм синнэз эшö буражык, нежели сьöкыт дума, кымöртiсö сылiсь чужöмсö.

Эта вöлi Швеч Опонь. Сiя тöждiсис аслас зон понда, Пашко понда. Кытöн сiя öнi? Эз я кув тшыгйöн? Надёжнöй морт ордö колис сiйö, да абу вермöм соседыс берегитны зонкасö, лэдзöма гортсис. Пашко, конечно, мунiс кошшыны айсö. А сы вылын чочкоммез тешитчисö, вартлiсö, мыля комбедын вöлi. Пашко, натьтö, Степан ордö вовлiс, юасис сылiсь. Может, сэтчин и кольччис. Степан — бур морт, правдивöй. Сiя Советын председатель, хозяин крестьянскöй му вылас...

Одзись вöв сувтчис. Командир лэбтiс шапка пельсö, кывзiсис.

— Кылат, лыйсьöны? — юалiс сiя, сетiс команда гöнитны. Отряд петiс ыджыт туй вылö, и отир одзö сувтiс сук вöр, каттисьöм тöвся паськöмö. Лöнь вöрас, и быд шыыс ылö кылö. Шовкнитас мороз, поткöтас пулiсь кын боксö, а говкыс паськалö вöр пасьтас. Может, некин оз лыйсьы, а мороз орсö? Командир бöра сувтчис, и öнi быдöнныс ни кылiсö ружьёись лыйöм.

Недыр мыйись отряд кайис мыс вылö, и командир казялiс туй дорсис мортöс. Отряд сувтчис. Кинкö лэбтiс усьöм мортсö, вайис командир дынö.

— Зонка... кынмöма.

Швеч Опонь чеччöвтiс вöв вылiсь, уськöтчис командир дынö. Руд пониток да пистиöн шадритöм чужöм сьöртi тöдiс:

— Пашко, дона менам... Пашко! Кин тэнö сiдз?.. Опонь сюйыштiс кисö зоныс пиö:

— Ловья... роднöй менам...

Чöвтiс пасьсö, каттис сiйöн Пашкосö, босьтiс солдат киись. Солдат шуис:

— Жагвыв, Опонь: ранитöм.

Опонь эз кывзы, жмитiс бердас Пашкосö, ласкова сыкöт сёрнитiс.

Командир эта коста сулалiс вийöм солдат дын, кöда кыминь сунгисьöма туй шöрас, киэсö паськöтöмöн, бытьтö мöдöма курмыштны да лэбтыны туйсö. Веськыт киас сiя видзис неыджыт пистолет.

Мöд солдаттэс юскисö вийöм вöвсö и доддялiсö мöдiкö. Опонь водтöтiс зонсö ольсалöм лыссэз вылö. Пашко осьтiс синнэсö, тöдiс айсö. Гусьöн шуис:

— Дядя Степан вичкуас... Тiянöс видзчисьö... Чочкоммез сэтчин.

Быднёж горалö, гажöтчö Чугай посад, сьылö, сералö, орсö, уксö. Талун Виль год, талун праздник. Только вичку сулалö шуштöм-гажтöм, жугалöм öшына-ыбöса, пöлiньтчöм креста. Код офицер сётаки бузгöм-лыйöм пушка понiсь, абу повзьöма поплiсь. Сотöмась чочкоммес волостнöй керку, кытöн пукалiс Совет. Керкутöг кольччис и дядя Степан, да богаттёыс эд эз нöбöтö сьöраныс постройсö. Торговец пышшис, поп пышшис. Öт керкуас Совет лоис, мöдас — Степан олö. Сыкöт жö Пашко да эшö кык солдат кольччисö. Нiя ранитöмöсь. Кык неделя ни олöны. Бур эстöн, шоныт. Демидыч, отставнöй флотскöй доктор, каждöй лун лечитö нiйö. А Пашко азбука велöтö, школаö лöсьöтчö.

Пукалö Пашко, думайтö, кыдз пондас овны. Асывсянь школаö ветлас, рытнас позяс пимиэз вочны, вурун летны да вартны, трубаэз весöтны. Не, трубаэз öнi некинлiсь весöтны: богаттё пышшисö. И галанкаэз тожö он тэч. Вичкуас, буди. А Пашко кужö и горресö тэчны. Адззывлiс айыслö отсавтöн. А киыс веськалiс ни, одззася крепытжык лоис, кыдз Демидыч шуö. Ö-ö, да нем повны, тшыгйöн оз кув. Смерть киись мезмис, а эта мый!

Öнi бур оланыс лоас, öнi воля. Муыс и ваыс — быдöс сылöн. Пашко — хозяин. Сiдз дядя Степан висьталiс. А дядя Степан — власть. Сiя оз бöбöт.

ПОМЕЧ

Ваня, сьöдыник визыв зонка, олiс неыджыт деревняын. Нылöн керкуыс сулалiс меддорас ни, торйынмоз. А паныт олiс неыджыт, но эшö крепыт керкуокын Öрина баб. Сiя пöрись ни, бедьöн ветлöтö, и некин сылöн абу. Вöлiсö ныв да зон, но öтыс мунiс овны кытчöкö вöррезö ― леспромхозö и сэсся деревняас синсö эз мыччав. Зоныс война вылö мунiс да эз берт сэтчинсянь. И тöдö Öрина баб, что зоныслiсь орöтiс олöмсö лёк пуля, а сё видзчисьö ассис дитясö. Петö старухалö пенсия, и эта деньгаыс тырмö сылö и сёян-юан понда, и паськöм-кöмкöт понда. Ванялöн аймамыс кыдз корисö Öрина бабöс гортаныс овны, дак пöрись мортлö сьöкыт ассис гортсö чапкыны. Только и баитö: чужöяс пö бур оланыс, да сё ни не гортын. Тшöктасö пö тэнö гор вылö кайны, а тэ ыбöс кошшы. И песыс таво Öрина баблöн абу, и вайны ачыс оз вермы, а сё öтнас олö. Заптылiс жö гожумнас мымдакö, но заптöмыс тöв шöрöдз эз тырмы.

Каникуллэз коста Ваня мöдiс отсавны Öрина баблö пес пилитны. Корис ассис ёртсö, Геняöс, а пилитны нем. Сэк вот и пырис нылö юраныс öтiк дума — ваявны Öрина баблö пес.

Чожа Геня кытшöвтiс деревнясö, быдöс зонкаэсö тшöктiс мунны Ваня ордö. Локтiсö, кин черöн, кин пилаöн, кин зырöн. Ваня, кыдз пионерскöй отрядiсь советлöн председатель, висьталiс, что талун пионерскöй помеч — вайны Öрина баблö пес. Решитiсö мунны Шательникö — сiдз шуисö учöтик расок, кöркöся межа, кöдö тулыснас весöтiс трактор, вужжезнас шедталiс быдöс, мый сэтöн быдмис. Ась сэтöн абуöсь гырись пуэз, унажыкыс шать-бадь, зато сiя челядь вын сьöртi, кöс да кокнит. Мед не öштыны кадсö, челядь сэк жö иньдöтчисö Шательникö, кытöн öнi лым увтiсь тыдалiсö только сырсмöм пу йыввез, кöс уввез да чукыля вужжез. Ваня да Геня гöгöртiсö ректассö, бöрйисö волькытжык да нежык тырöм пуэсö, и пондöтчис удж.

Кöть и кöдзыткодь öтöрас и лöг тöлок гусьöник тыртiс туйсö, но челядь лэбталiсö шапка пеллезнысö, а мукöдыс чапкалiсö испоткаэз да пöрччалiсö гуня киззез.

Адззылiс Ванялöн сой Саня, кыдз челядь мунiсö пес заптыны, öктiс нылочкаэсö, и нiя тожö кайисö Шательникö. Но зоночкаэз эз примитö нылочкаэсö: пессö керавны пö не аканнезöн орсны, а тiян киын пö и черыс оз öшшы, да и од вежöртö, кöда пуыс кын, кöда кöс. Нылочкаэз öбидитчисö.

— Пионерскöй помеч, шуат, керöмась, а мийö разь не пионеррез? — баитiсö нiя.

Зоночкаэз эз сетчö:

— Пионеррез тiйö, да только öмнаныт кератö, а киэзныт некытчö оз сибалö.

— Ох тэ, лякöсь ныр, — уськöтчис Митю вылö, медучöт зоночка вылö, Варюша. — Ачыт тай обухнас уввесö кералан, а эшö ошшасян. Вай ноко черсö да видзöт, кыдз колö суййисьны...

Митю нем эз ешты шуны, кыдз Варюша летöвтiс сы киись черсö да пондiс трингыны-керавны уввесö. Черыс вöлi кыз оропа да сьöкыт, но нылочка и сэтшöмнас öддьöн кужöмöн керасис.

— Но, мый, Митю, некытчö миян киэзным оз сибалö? — сералiс Саня. — Ноко висьтав?

Митю только нырнас вирснитiс и нем эз висьтав. Сы туйö ответсö видзис Геня:

— Этö, Саня, не тэ суййин, не тэныт и ошшасьны бы, да ладно, веритам: арталан невночка... Вот мый, помеч дак помеч, мийö доддясям да пондам пессö ваявны, а тiйö давай пилитчö.

Сiдз и керисö. Шательникö кольччисö кватьöн, а кыка мунiсö вöввез корны.

Бригадир думайтiс-керис и сетiс вöввесö.

Öрина баб эз и кыв, кыдз пыртiсö сы оградаö пес, а нылочкаэз чиж-важ орлалыштiсö первöйся вайöмсö да тэчисö поленницаö. Öрина баб петiс посöдзас, пуктiс кисö кымöс вылас и видзöтöв-керис, мый керсьö оградаас. Сулалiс, сулалiс сiдз, хлоп вачкис боккезас да лэдзчисис улö.

— Помечана тай менам эмöсь, а сур-брагаö кертöм, — сералö баб. — Мый инö лоас öнi?

— А вот мый лоас, баб, — шуисö нылочкаэс. — Сувтöтам сэтшöм поленница, что тöвбыт лонтан и бöрат он видзöт!

Öрина баб бергалiс ограда нюрас, дзик öшöм, дивуйтчис и сё бобгис ассис: «Мый инö лоас?» Пöрись мортлöн висис сьöлöмыс вот мыйсянь: раз помеч, то помечанасö колö вердны да юктавны пöттöдз — деревняын сэтшöм закон.

— Тэ, баб, эн тöждiсь, — баитiсö челядь, — миянлö нем оз ков.

Öрина баб бытьтö эз и кыв нылiсь баснисö, юалiс:

— Ноко, кин тiян коласiсь медчожыс? Пыртамö пессö да горсö лонтамö.

Пыртiсö пессö Саня да Варюша. Пыртiсö и бытьтö сибдiсö сэтчин, сэсся эз петö öтöрас. Нылочкаэз кылiсö, кыдз ветлöны керку ыбöсöт, казялiсö, кыдз сiмöм трубаись тшакыльöн пондiс путриктыны-петны тшын. А Öрина баб лэдзчöтiс чомись ведра тыр веж гöгляннэз — кынтöм йöв, пыртiс чочком пизь да быгрöтчаннэз, джоджулiсь петкöтiс кольттезöн туисок.

Чижöтiс, тачкöтiс горын кöс пес, чеччалiсö бичиррез, дзик йöктiсö, бикыввез орöттöг нюлiсö горöмсö, а ыджыт чугунын сылiс йöв. Пуджöм соса Öрина баб тэрмасьöмöн нöитiс кöвдас...

Абу ылын Шательникыс, деревня дынас и эм. А вöввез вынаöсь да чожöсь. Челядь кватись ештiсö гöняйтны песысла. Ваялiсö сымда — оградаас бергöтчыны некытöн. Только вот эз ештö быдöс вайöмсö орлалыштны, пемытыс вöтiс. Да нем он кер: эта кадö, кыдз баитсьö, луныс только чунь кузя эд! Только петас шондi, а рытланьö ни видзöтö.

Пемдiс, и лöньсис оградаас шум-гамыс, дугдiсö горавны пилаэз, эз пондö шовкöтны черрез, кошшыны пес чуркалiсь сьöлöмсö. Сэк и петiс Öрина баб öтöрас да горöтчис:

— Но, пырö, помечана, керкуас, пешлö пöрись баблiсь нянь-совсö.

Дзар керисö челядь öтамöд вылö и пырисö. Саня да Варюша, кыкнанныс чочкомöсь, югыт вираöсь да чангыля нырокаöсь, ветлöны-уялöны, топ уткаэз, комсянь пызан вылö ваялöны ассиныс стряпнянысö. Юр выланыс чочком косинкаэз, одзаныс запоннэз туйö петуха чышкöттэз, кöдна видзсьöны гаруснöй йиэз вылын.

Кöд коста челядьыс чöвтчисö да миссисö, пызан вылын сайкалiс ни няняшыд. Пуксисö челядь, пондiсö сёйны. Бур, тыдалö, эта сёяныс, чöскыт: челядьлöн только паннез мелькайтöны. А Öрина баб содталö бекöррезö да ошкö уджалiссесö. Кöр курмассисö бекöр пыдöссэс, том стряпкаэз вайисö блиннэз. Нiя пышкайтiсö, пизисö дзирыт виын, дразнитчисö рöмсялöм боккезнаныс, а öмын сiдз и сылiсö асьныс. Сэтчö жö компот вайисö. Сiя, тыдалö, тожö эз курöт челядьлiсь öмнысö.

— Спасибо тэныт, баб, — шуöны челядь, пызан сайись чеччикö. — Чöскыта вердiн!

А баб нылö паныт:

— И тiянлö, работниккез, ыджыт спасибо. Вашöтiтö менчим пес шогöс, сьöлöмöс бурмöтiтö!

Дата добавления: 2015-11-16