Дзоли, кыдз шуисö Оляöс гортас, шочыника пышшавлiс бабыс дынiсь, кöда вексö зiлис ассис «эн бöбав» да «оз туй». Пышшавлiс сэк, кöр бабыс пондас сунасьны. А сунасьлiс öнi сiя часто, сiдз кыдз пöрисьöв ни лоис. Пуксяс кытчöкö шоччисьны — и синнэс куньсьöны. А гожумнас частожык пукавлö огородеч сайись кыдз увтын, паськыт лог дорын. Эта логыс дыннас пыкöтасьö Тшакшор юокö, а кытчö мунö сылöн йылыс и кузь я сiя — Дзоли оз тöд. А кыдз охота тöдны!
Дак вот сiя, нёль годся мортыс, петкöтiс бабсö да Серко каньсö котрасьны. Бабыс пуксис кыдз увтас, пуись лöсйöм лабичокö и висьталiс Дзолилö:
— Ме сунасьышта, может, а тэ ылö эн мун. Канёкыскöт эстöн орс.
— Озъягöдок сёя бы...
— А лог дорсис и кошшы.
— Сэтöн етша да.
— Тэныт тырмас. И мийö учöтнаным сэсь сёйлiм, а быдöс эг вермö сёйыштны. И мамыт да папыт прокод сэтöн тусясисö — эз вермö быдöс öктыштны. И тэ сьöрись кольччас.
— Но, но, — шуис Дзоли и мунiс шочыник верöсъяинö. Сы сьöрö кыссис и Серко.
Смекайтö ягöддэсö Дзоли, а нiя оз адззисьö.
— Серко, отсав кошшыны, — тшöктö канёксö. А Серколö некöр: сiйö бабылоккез бöбöтлöны.
«Кöть бы öтiк адззиси», — думанас кеймисьö нылочка да лэчытжыка видзöтö ас гöгöрас. И тюк — мырок дорын ягöд тусь: гöрд и гöрд, свиттялö да шыннялö.
— Адззи, Серко! — ошшасьö каньыслö. — Сiя то кытöн менö видзчисьöма!
Янсöтiс тусёксö за бердсис, чапкис öмас. Тусёкыс небытик-небытик, эшö тырппес коласын паськалiс.
— Чöскы-ыт! Компотся чöскытжык!
Дзар керис мöдöрö, а сы вылö видзöтöны сразу кык тусь. Да не видзöтöны, а сiдз и корсьöны öмас.
— Бöра пантасисö, Серко! — радуйтчö Дзоли. — А лог йылас, натьтö, тыр и тыр,
Öтсö кокыштiс-босьтiс, мöдсö за бердсис чепöльтiс и кыкнансö öтдруг ньылыштiс.
— Мунам ылöжык!
Нiя иньдöтчисö лог дорöттяс вывлань, яг ладорö. Но сэтчö кинлiськö повзис Серкоыс, чушнитiс да жмитчис нылочкаыс коккез бердö. Дзоли видзöтiс ас гöгöрас и казялiс кокора увтiсь чочком чук, сьöд синнэз да руд пелёккез.
— Тэ пон? — юалiс учöтик ягöдалiсь.
— Тев! — шыасис чочком чук да нюлыштiс тырппесö.
— Эн тевгы, ме тэнчит ог пов!
Но чочком чук петiс кокора увтiсь, чеччöвтiс Дзоли дынö и эшö лöгöнжык пондiс тевгыны.
— А, да тэ не пон, а ручок! — тöдiс нылочка. — Миян Танялöн эм букварь, дак сэтчин и тэнö рисуйтöмась.
Ручок эз понды кывзыны Дзолисö. Сiя эшö матöжык сибöтчис да мöдiс курччöвтны повтöм ягöдалiсьлiсь коксö. А Серкоыс сэтчö кы-ыдз пышнитас и лапанас сап да сап чочком чуксö!
Эз видзчись эттшöмсö ручокыс и повзьöмсяняс да зубытсяняс никöстiс, дзик вартлöм кычан, и татшкисис-пырис кокора увтас.
А Дзоли да Серко котöртiсö гортаныс.
Ай да Серко — ёртсö эз сет öбидитны!
Дата добавления: 2015-11-16; просмотров: 56 | Нарушение авторских прав
| <== предыдущая страница | | | следующая страница ==> |
| КОЛÖ ДЖИНСОВÖЙ ВЕШЬЯН | | | ЧЕСТНÖЙ ОКТЯБРЯТСКÖЙ |