ЧЕСТНÖЙ ОКТЯБРЯТСКÖЙ

Колодец дынын Дёма кылiс то кытшöм басни:

— Эмöсь ни, Даниловна, огуреццет?

— Шогмисö, не ошшасьöмöн. Таво годыс бур ны понда.

Дёмалö син одзас сiдз и сувтiсö корзинаэз, кöднаын чукöрöн куйлiсö огуреццез. Эттшöмсö сiя адззывлiс мöйму, кöр пыралiс колхознöй карчйöрö, и, конечно, сiйö пöттöдз вердiсö.

Карчйöрö мунны могыс адззисис: колö адззывны Васёкöс, Даниловналiсь внучекöс, кöда часто отсалö бабыслö весöтчыны. А Даниловна сё ни вердас.

Сiдз и керис Дёма. Локтiс карчйöрö, шутньöвтiс небурика. Некин эз шыась. Пырис йöрас и казялiс Никульöс: старик пуксьöм теплица бокас да шаттезiсь гöрдззö корзинка.

— Деда, Васёк татöн абу? — юалiс Дёма.

Никуль и юрсö эз лэбты. Сыкöт он баит унасö — воть оз кыв.

«А мый сэтöн баитнытö? — пырис Дёма юрö дума. — Звено часöт обедайтö, Никуль домасьöма корзина бердö...»

Гортас Дёма бертiс пöт кынöмöн и гажа синнэзöн. Воноккеслö сетiс быдса огурецöн и некинлö эта йылiсь эз тшöкты висьтасьны. А медучöт вонокыс оз вермы быдöс сёйыштны да дедыслö ваяс, а дедыс — Дёма дынö:

— Тэ кытiсь этö? Эн я гусяв?

— Эг, деда, эг... Ёрттэзö вердiсö.

— Вот адззан, йöзыс виль карч ни сёйöны, а тэ, дышкучик, и киськасьны он отсав.

Добрöй дедыс петiс керкусис, и воришко радöн шынньöвтiс: ылöтiс сётаки дедсö. И мöдiс ни радсяняс öтiк кок вылын чеччалыштны, но... сы вылö видзöтiс Ленин! Видзöтiс чикыртöм синнэзöн и хитрöя шыннялiс стена вывсянь, кытчö Дёма öшöтiс Ильичлiсь портретоксö. Сэтчö жö усис тöдвылас учительлö кöсъясьöмыс — что лоас честнöйöн — пеллезви гöрдöтiс. Медбы вунöтны этö недолыт минутасö, сiя сайöвтчис комö да пондiс видзöтны виль маркаэз. Дыркодь видзöтiс, а бöбöтчöмыс некыдз эз пет юрсис. Кытчö бы эшö сайöвтчыны? Петiс комсис, а дедушка Ленин бöра панталiс сiйö лукавöй серöмöн. Дёма öнi эз ни гöрдöт, но стыдыс сё сотiс пельйыввесö, и сiя эз лысьт лэбтыны синнэсö пызан весьтiсь стена вылö, кытöн ордчöн Ленин портреткöт öшалö картинка, а сы увдöрын гижöма: «Октябрёнок — Ильичлöн внучек».

Кузьлун Дёма ветлöтiс шуштöм-гажтöм, а рытнас, кöр локтiс кад узьны, мунiс дедыс дынö, шуис:

— Сiя не гöснеч вöлi!..

— Мыйыс?

— Огуреццес.

— Сiдзкö, гусялiн? Ай-яй-яй! — дедыс вель дыр гогинялiс юрнас. — Кыдз нö тэ сiдз керин? Сэтшöм покасьсö-ту?

— Эсся ог понды... И бöбöтчыны ог понды. И этö... — Дёмалö стыд вöлi горöтчыны сiйö сьöкыт кывсö, но зоночка вермис асьсö, шуис:

— Гусясьны ог понды. Честнöй октябрятскöй, деда!

— Но, но, сiдз и гижам, — лöгöн висьталiс дедыс да содтiс: — Медбы не тэныт, не меным не вунöтны... А öнi вод узьны.

Дата добавления: 2015-11-16