КЫК ÖТКОДЬ ДА ЧИКА

(Бичирок, 1965)

Таво Витя вежöртiс, что понтöг овны сылö оз туй, что понтöм оланыс — джыння олан. Этö сiя казялiс сэк, кöр кончитiс кватьöт класс и быдтiс вель кузь кудриэз, кöдна сайöвтiсö сылiсь паськыт кымöссö. А кыдз казялiс, сразу жö уськöтчис кычанокöс кошшыны. Джын сельсоветсö кытшöвтiс, а сётаки адззис. Да кытшöмö — чистопороднöй спаниель! Мун сыкöт кöть дозмöравны, кöть уткаавны, сёровно кинöскö ваян. Конечно, эм кö тэнат пишаль. А Витялöн бур эм — курковöй.

И вот зоночка пондiс велöтны Чикасö (сiдз шуис сiя ассис кычансö), мед арнас поныс вермис адззыны пöткаöс. Понок былись вöлöма мывкыда: куим неделя бöртi велалiс ни сетны кыкнан лапасö, кужис служитны да «серавны». Эшö кык неделя бöртi велалiс ваявны хозяиныслö шентöм кöч кок. Но эта вöлi етшаöв: колiс, мед сiя кошшис уткаэзöс. Эта понда Витя натодиль небис магазинiсь пластмассовöй уткапиян, кöда ачыс ветлöтiс-пöлiнясис и кваксiс лягуша моз. Чожа Чика и уткапиянсö пондiс адззыны турун коласiсь и вайны хозяиныс дынö.

Нем и баитны, мывкыда пон быдмö. Мымда радыс Витялöн — торта пеллесö адззö!

И вот лоис кад керны экзамен, мыччавны челядьлö, мыйö велалiс Чика. Локтiсö Боря да Маша, Витялöн очавон да очасой. «Майöг да пыкöт», — сiдз баитлiсö ыджыт мыгöра Боря да учöтик Маша йылiсь челядь.

Быдöнныс петiсö огородечö, петкöтiсö сьöраныс нёль кока ёртнысö. Витя сеталiс командаэз, а пон керис быдöс сiдз, кыдз колiс.

— А öнi видзöтö, кыдз сiя уткаöс адззö, — висьталiс Витя да сетiс пон видзан кöвсö Борялö, а ачыс заводитiс да дзебис чачасö огородеч пельöсiсь турунас, ылöжык поныс дынсянь. Сэсся локтiс бöр, малыштiс Чикалiсь юрсö, мездöтiс ошейник бердсис кöвсö, тшöктiс:

— Кош, кош!

Пон уськöтчис сэтчин, кытчö чуньнас мыччалiс Витя.

Чожа челядь адззылiсö, кыдз мывкыда спаниель чеччöвтiс турун коласö — сап! — и эм добыча! Витя сулалiс сiдз, кыдз Пётр I шведдэзöс паздöм бöрын, и видзис киас сахар торок — Чикалö гöснеч. А поныс, юрсö чатыртöмöн, сибöтчис хозяиныс дынö и пуктiс сы кедаэз одзö сера типокöс. Витя дыркодь ниртiс синнэсö — абу я эта вöт?

— Сiя... сiя миянлiсь кутöма, — горзöмсорöн висьталiс Маша и босьтiс типоксö киас. — Видзöт, джагöтöма...

— Ха-ха-ха-а, — рызйö Боря. — Бура пондас пызанпонас вöравны.

И ковсис Витялö сетны ассис чача-уткапиянсö да фонарик-колбаска, мед тупкыны Машалiсь да Борялiсь öммезнысö.

Но Борялöн öмыс сэтшöм, что сiйö быдса дзодзогöн и куим фонарикöн он тупкав. Сiйöн и Витялöн айыс, Елиз Степан, рытнас висьталiс гортас:

— Мед сэсся ме тип джагйисьсö эг адззыв!

— Сiя сэсся дугдас, — пондылiс дорйисьны зоныс. — Вöравны эд колö, а понтöг кытшöм вöралöм?

— Ме öтiксö кыкись ог баитлы, — бöра висьталiс айыс, и зоночка сэсся шы эз сет: тöдiс айсö, кытшöм сылöн воляыс и кытшöм кокнита ветлö сы ошлопан кодь киэзын небытик шатёк.

Витя сэк шог сьöлöмöн нуöтiс понсö Кокор деревняö и сетiс ас кодяс жö сьöд юра Гришалö, кöда понсö радейтiс сiдз жö бура, кыдз пым блиннэз. Но ашынас Чика бöр локтiс и лунтыр орсiс аслас важ хозяинкöт. А рытнас айыс эшö öддьöнжык öдззис ыждавны: посöдзись öшöмась айыслöн ботинкиэз, и сiя сёрмис киноö. Нiйö, конечно, нöбöтöма кытчöкö Чика.

«Эх, Чика, Чика, мывкыда спаниель! Разь позьö сiдз керны? Лучше бы тэ отсалiн меным кутны уткаöс. Сэк бы тятюö раммис: сiя сiдз любитö утка яйсö!» — этадз думайтiс Витя ботинкиэсö кошшикö.

Весь тöждiсис том вöралiсь: Чика отсалiс, и айыс пöттöдз сёйис утка яйсö.

А лоис эта сiдз.

Витя кылiс, что Сорда арайын пöжшöмась уткаэз и, натьтö, эз на эшö мунö. Кöть и абу на сылöн охотничöй билет, но, кыдз только пондiс туйны вöравны, нiя Гришакöт босьтiсö пишаллез, кытсöвтiсö поннысö и лэдзчисö арай дорö, кöда неылын и вöлi Витя горт дынсянь.

Рамыник лунтöв вöрöтыштлiс косьмöм осокасö, и сiя лöгöнмоз вашкис-пышкайтiс, ровно вашöтiс дынсис вöралiссесö. Кыт мышкыртчöмöн, кыт нёльподöн челядь кыссисö Чика сьöрсянь матöжык арай дорас. Вот Чика кынымиськö шагньöвтiс гусясьöмöн, сувтчыштiс, эшö мöдiс шагньöвтны, да сiдз и тувдiс местаас öт коксö лэбтöмöн да пеллесö чурдöтöмöн.

Витя да Гриша сэк одзсиныс казялiсö уткаэзöс, и сьöрсьöн-бöрсьöн кожгисö-лыйисö кык пишаль...

Час-мöд бöртi Витя панялiс ни чöскыт шыд, а айыс, тырппезнас чупкöтöмöн, вильöтiс госа утка кок и, натьтö, думайтiс сы йылiсь, что пон — мортлöн бур отсалiсь.

— Кöбы Чикаыс гортын олiс, дак каждöй лун бы этадз сёйим, — шуö Витя.

Айыс кывзö оз кывзы, но яйсö ошкö:

— Утка яйысви некытшöм яй абу: чöскыт и стрась пöтöса.

Но сэтчö пырö Витялöн тёткаыс, Елиз Наста, воныс кодь жö ыджыт да ён инька.

— Нянь-сов тiянлö, — керкутырьяс баитö сiя.

— Лок яй сёйны, сойö, — рочалö сiйö Степан. — Вешшы пызан саяс, öддьöн и чöскыт.

— Перво бы вежтiсьны, вонö, колiс да вöлись яйсö сёйны. Менам эд нiя вöлiсö, а не вöр уткаэз.

Не сiдз керис Степан, кыдз сойыс тшöктiс: перво сёйыштiс уткасö да вöлись вежтiсис. А зоныслö сыбöрын висьталiс:

— Ашын рытнас мыччалан меным, кытчö дзебан понжугтö.

Эх, овсис, тыдалö, тэнат, мывкыда спаниель! Пондыв не керны сiйö, мый айыт тшöктö!

Крепыта узис Степан госа яй бöрсянь, а Витя ойшöрöдз сё думайтiс, кыдз бедасö Чика юр весьтiсь кылöтны. И вот сылöн чужис план. Некинлö сiя эз висьтась сы йылiсь, только Гришалö ашынас баитiс. А öбед кад гöгöр арай дорись гривка вылын лэбтiсис неыджыт мысок, вевттьöм зелёнöй ежаöн. Сы весьтын, дзик мусяняс быдмöма, веж видзис пуовöй зыр, кöдалiсь Витялöн айыс неважын чегöтiс оропсö да чапкис песö.

Витя пукалö гривка йылас, видзöтö сэтчин, кытiсь тöн Чика адззис уткажуггесö, кöднö эз вермы сёйны кытшöмкö тарварыш и кöдна асьныс пырисö сы пишаль увтö. Видзöтö сiя руд осока ладорö и мыйкö висьтавлö Гришалö. А сiя пукалö ежа вылас, дзик седлоö вожасьöм, и мырсьö-гижö зыр вылас Витя диктуйтöм сьöртi. Гижö сiя не перыта, но басöка, и конечно каждöйыс, кин локтас этчö, лыддьöтас гижöмсö.

— Чожа ни? — юасьö Витя.

— Готов, — юöртö Гриша. — Только точка сувтöта и быдöс.

— Не точка, а восклицательнöй знак колö, — тшöктö Витя.

— Не-е, этчö сiя оз лöсяв, — оз согласитчы мöдыс и висьталö правило, кöр кытшöм знак сувтöтсьö. Но Витя тшöктö, и Гриша рисуйтö чöрс ыжда знак.

— Лыддьöт ноко, кыдз петiс, — корö Витя. Гриша малыштiс зу кодь тшöк юрсисö и норöнмоз пондiс нюжлавны: «Эстöн дзебöма умнöй Чика, кöда вернöя служитiс отирлö, но кулiс лёкöтчись морт кузя!»

— Гиж «куйлö», а не «дзебöм». И «Чикасö» сьöджыка лöсьöт.

— Вув-вув-ам! — лэбтiсис вувтны поныс, кöр кылiс ассис нимсö, да чуть эз пöрöт зырсö, кöда бердö вöлi домалöма кöлыс.

— Дугды, бöбöв, — кутiс понсö Витя. — Тэныт оз ков вувтны, тэ — кулöм. Вежöртiн?

Мывкыда пон, тыдалö, вежöртiс — лöньсис. Гриша пуртокöн зыртiс неколан кывсö, гижис сы местö коланаö, а Витя зорокöн пыдöжык вартiс зырсö да висьталiс:

— Тэ, Гриша, бура видз сiйö да эн лэдзав öтнасö.

Рытнас Витя мöдiс мыччавны айыслö, кытчö «дзебис» понсö, но айыс дышöтчис мунны, ыстiсис мыдзöм вылö. А чожа быдöс деревняыс тöдiс ни, что мывкыда пон Чика лоис му пытшкын Елиз Наста лёкöтчöмсянь.

Дыр Витя эз ветлы Кокорö: то лук тшöтшкöртiс, то боби готтис — мамыслö отсалiс. Сэсся и сентябрь вöтiс, велöтчыны кад локтiс.

И вот кыдзкö субботаö кык öткодь лöсьöтчисö бöра уткаавны. Гриша кутiс понсö кöв вылö, и куимнанныс рытъяв кадö петiсö Кокорись да иньдöтчисö Сорда арайлань. Зоночкаэс мунiсö шытöг, а Чика чепсасис öтмöдöрö, нюкайтчис, сувтчылiс — керис ассис пон делоэсö. Сiдз нiя лэдзчисö Сюзьва ю дорö, кайисö подöн ветлан пос вылö, мед вуджны мöдöрас. А паныт нылö тюк только мöдлапöвсяняс петiс Тимишна, Борялöн бабыс. А сiя сэтшöм морт: мый адззылас нето кылас, час бöртi пондас тöдны быдöс деревняыс. Витя кыш-паш чöвтчис да каттис курткаас Чикасö, босьтiс сiйö морос одзас. Тимишна пантасис пос шöрас, кежыштiс бокö, мед лэдзны челядьсö. Кöть умöля ни адззö старуха, а тöдiс соседсö.

— Мый инö, Витюк, тэ сэтшöмсö ваян? — юалiс сiя.

— Порсёк, баба, неби, — бöбöтiс зоночка.

— Кытiсь инö, дитя? Меным бы тожö колö да... Кылiс йöз шысö Чика да и тявнитiс. А Тимишналö и диво:

— А мыля инö сiя, дитя, не порсьпиян моз виксö?

— Сэтшöм родiсь, баба, сiя, оз роксы не оз виксы. Индийскöй порсь, — ылiсянь ни видзис ответсö Витя да висьталiс ёртыслö: — Эх, неладно ме кери! Часöт жö мунас гортö да юасьны пондас... Пуксьöтны бы тэнö, бабунь, ракетаö да космосас лэдзны!

Кыдз шуис Витя, сiдз и лоис. Рытнас, кöр Степан локтiс уджалансянь, чож юöр новйись видзчисис ни сiйö посöдзын. И, конечно, висьтасис «индийскöй» порсь йылiсь, кöда пö виксö пон моз и кöдалöн пö бöжыс дзик понлöн (Тимишна этö содтiс ассяняс ни, кыдз прокод керлывлiс и одзжык).

Степан вежöртiс сэк: зоныс сiйö бöбöтiс. Висьталiс старухалö, что абу нылöн некытшöм порсь, и мунiс арай дорö, не öтпöв лыддьöтiс зыр вылiсь гижöмсö, чапкалiс ежа комоккесö, кöдна увтiсь адззис пыдöстöм ведра да отопкиэз. «Чöв ужо, не морт, — лöгасис сiя, — ме велöта тэнö, кыдз бöбöтчыны!.. Кытöн жö сiя öнi? Да конечно сэтчин, кытöн дзульзьöны челядьыс — Катша кöз дын», — сiдз решитiс Степан и мышкыра юрöн, мыдзöм походкаöн мунiс гортас.

* * *

Сорда арайын быдмö уна пуягöд. И чуть только воас сiя, челядь рытывбыт поздiсьöны сэтчин. А таво ягöдыс — гöрд только видзö, дзик кинкö содззезнас коялöма сiйö турунас.

Сiдз вöлi и талун. Локтiсö челядь школаись, кöда сёйыштiс, а кöда нянь кусöкнас и котöртiс арай дорö. Ягöдалiсö-керисö, сэсся шоччисьыштiсö, сказкаэз висьтасисö-кывзiсö да дзебсисьлыны пондiсö. Кок вылас сьöкыткодь Боря куимись ни галитiс, размöдöн кошшисö и мöдiккез. Дугдiсö орсны, пондiсö гортö лöсьöтчыны. Катша кöз увтiсь босьтiсö доззэзнысö, пасьталiсö орсiк кежö чапкылöм гунькаэзнысö. Одзиссес кайисö яг дорö ни, кöр бöрсяняныс кылiсö Колялiсь, меджаг зоночкалiсь, авзöм:

— Кин колис туисоксö, эй?!

— Видзöт аслат киись, эм я тэнат! — шыасис сылö паныт кöдакö.

— Бертö буди, а то ме коля сiйö! — эз öвсьы Коля. — Этö, натьтö, Маша колис.

Сэк вöлись казялiсö, что Машаыс былись абу ныкöт. Боря уськöтчис Коля вылö, кöда галитiс медбöрын:

— Эх тэ, кошшись! А эшö ошшасьö: ме пö кöть кинöс адзза. Кошшы нö! А чурöтас — эшö галитны пондан.

— Но и понда, — дузiс зоночка да мунiс кошшисьны, а мукöдыс кольччисö видзöтны, кин одзалас котöртны стукалочка дынö. Но весь нiя видзчисисö: нылочка некытiсь эз пет. Сэк пондiсö кытсасьны:

— Пет, Маша, эн тешитчы!

— Онмöссин я мый я, одз курöг!

— Ми мунам эд, орс вöлись нюриссескöт!

— Маша, мамыт корö!

Былись, ыб ворота дорын, деревня понас, кылiс Елиз Насталöн горöтлöм. Голосыс сылöн сэтшöм, что пондас кö кытсавны курöггезöс, Кокорöдз кылö.

Но Маша сё чöлiс.

Сэк челядьыс быдöнныс кутчисö кошшыны-соровтны матiсь понулляинiсь, бадь кусттэзiсь, нёджжалiсö быд нёпинсö, быд колода увтсö, нельки бедьöн чувйисö турун зородок. Абу нылочка, дзик муас пырис.

Сэтчö и Наста локтiс, тöдiс, мый лоис, и тожö öдззис чывны-котрасьны да кытсавны нывсö, но сылö паныт только говкыс нерсис. Инька вежöртiс, что Машакöт лоис мыйкö умöль, и котöртiс деревняö, мед лэбтыны кошшисьны отирöс.

* * *

Витя да Гриша жагвыв бертiсö гортаныс. Мöдiсö нiя орддьыны челядь чавзанiнсö, мед эз казяв лёк син нылiсь понсö, да охота лоис тöдны, кытшöм шум-гам ыпöтö арай дорас, и кежисö сэтчин жö.

Самöй арай дорас вöлi карьер, кытiсь тöвнас шедтiсö и кыскалiсö тракт вылö галя. Вот сэтчö и чукöртчöмась öнi челядьыс да споритöны мыйкö.

Витя да Гриша сибöтчисö ны дынö, пондiсö юасьны, мый лоис.

— Машаöс кошшам, — висьталiс Боря.

— Карьерсис?

— Ну. Дзебсисьöм, адззан, а галяыс буждöм.

— Шыасис разь?

— Горзö некö...

— Ноко, кывзам эшö, — корис Витя и жмитчис пельнас кöдзыт галяа му бердас. Сы дынö уськöтчис Чика, пондiс нюкайтчыны.

— Адззан, сэтчин сiя! — горöтiс Боря.

— Чöв тэ, эн авзы, — макнитiс сы вылö кинас Гриша. — И тiйö курччöвтö кыв йыввезнытö.

Но поныс мунiс ни бокö, и Витя шуис:

— Абу некин сэтчин.

— Абу, — согласитчис сыкöт и Гриша. — Может, гортас ни да?

— Часöт мамö вöлi, абу пö гортын, — юöртiс Боря. — Следдэс сьöртi колö...

— А кытöн следдэс? — юалiс Витя.

— Катша кöз увтас, натьтö. Сэтчинсянь эд мунiс, — висьталiс Коля.

— Кöдöрö мунiс?

— Эг казяв.

— Лапöта син тэ! Видзöтны колiс! Али синнэтö карманат видзан? — видiс Коляöс Боря: öддьöн ни жаль вöлi сылö öшöм соёкыс.

Витя уна лыддьöтлiс служебнöй поннэз йылiсь и öнi бергöтлiс юрас, мый и кыдз керны: «Колö сетны нюкайтны поныслö öшöмыслiсь кытшöмкö вещь», — усис тöдвылас сылö.

— Пондылам, — висьталiс Витя и нуöтiс Чикасö Катша кöз увтö, кытöн сулалiс öтка туисок. Тюкнитiс чуньнас вевтас — поныс нюкайтiс; мыччалiс туис гöгöрись пашмöм голиэз вылö — Чика бöра нюкайтiс.

— Кош, кош! — горöтыштiс Витя и личöтiс кöвсö. Пон кивыль-кивыль керис бöжнас, видзöтыштiс хозяиныс чужöмö.

— Оз кыв дуксö, — шуис кöдакö лöня сулалан челядь коласiсь.

— Овчарка бы дак...

— А тi эд карзö, — öлiс нiйö Витя. — И вешшö бöрлань.

Челядь тойласьöмöн петитчисö невна. Витя вились тшöктiс:

— Кош, кош, Чика!

Пон орсыштiс пеллезнас, дукалiс туисок гöгöрсö и кыскис Витяöс карьерлань. Витя бöрсянь утугаöн уськöтчисö остальнöйес.

Чика бöра вайöтiс карьер дынö.

— Адззан, сэтчин и эм, — норöн-норöн шуис Боря и вирснитiс нырнас. Но пон ветлöтыштiс карьер öм одзас и люткис-котöртiс öтка кöз дынö, кöда гöгöр быдмис тшöк петшöр и кытчö эз и думайтö нёджжöвтны челядь.

Сэтiсь и адззисö Машаöс — сiя вöрöтчытöг куйлiс кöс вужья вылын.

— Адззис, адззис...

— Дзöт кытчö пырöм...

— Узьö... — пондiсö шушкöтчыны челядь.

Былись, Маша карöтiс-узис, и Боря пондiс видны сiйö: — Сэтшöм и эм сiя: кок йылас онмöссьö.

Но кöр локтiс Елиз Наста да чеччöтiс нывсö, челядь казялiсö, что Машалöн нырсис вир петö — доймöма. А киас мыйлöкö босьтöма бедь. Поди, кытшöмкö зверь сы вылö уськöтчис, и нылочка вашöтiс сiйö бедьнас?

Витя, дзик Шерлок Холмс, ештöма ни гöгöр видзöтны и баитö, кöз вылас чуньнас мыччалöмöн:

— Вон кысянь усьöма. Кайны мöдöма, да улыс чегöм.

— Былись эд, сё тай ув бердас видзсьö.

* * *

Степан мунiс кошшыны племянницасö би шедтан кадö ни. Сылö эз веритсьы, что Маша öшис, но арай дорын чива-люва чавзiсö ыджыт и учöт, и тэрмасьöмöн иньдöтчис сэтчин жö. Думайтiс Маша йылiсь, Витя йылiсь, кöда сiдз кокнита бöбöтiс сiйö поннас. "Вот кытшöм порядок лоис миян, — чидiс мужик. — Кин одзжык чеччас, сiя и хозяин; кинлö кыдз колö, сiдз и керö».

Эна думаэзöн петiс сiя ворота сайö и панталiс кык зоночкаöс. Öтыс, кöмтöм да öтпöвса паськöмока, гажöн висьтасис:

— Тшöктiс кошшыны, а сiя кы-ыдз нетшкöвтчас, кы-ыдз чеччöвтас и давай пöльтны...

Мöдыс отсалiс сылö:

— Сразу адззис! Вот этö да-а!

— Кин адззис? — юалiс Степан.

— Поныс.

— Кытшöм пон?

— Хы, оз тöд, — дивуйтчöмöн горöтчыштiс кöмтöмыс. — Вон видзöт кытшöм.

Степан дзар керис сылань, кытчö мыччалiс зоночка. Сорда гривка вылiсь кайисö Витя да Гриша. Шöраныс оськалiс чочком, лöзкодьсера пон. Панталiс бы сiйö Степан öтнасö — эз бы тöд: сiдз быдмöма да нюжалöма. Витя казялiс айсö, зэлöтыштiс кöвсö. Степан тэчис киэсö кос вылас, оськöвтiс нылö паныт. Витя сувтiс Чика одзö, сайöвтiс сiйö паськыт голенищеа сапоггезнас. Айыс керис шаг-мöд и сувтiс да мöртчöтiс синнэсö зоныс чужöмö.

Сэтöн и вöтiс челядьсö Наста, кöда нöбöтiс нывсö, дзик кагаöс, морос одзас. Вот инька петiс челядь одзö, сибöтчис воныс дынö, шуис:

— Спасибо, кыдзкö поныс адззис, а то бы эз вöв Машаö. Вовлы, Степан, ашын — быдöс уткаэзöс сета. Ачыт сёй и понтö верд на здоровье.

Степан сыныштiс кыз чуннезнас сук юрсисö, босьтiс сойыс киись нылочкасö, висьталiс:

— Тшыг, натьтö, поныс... Ась вердас. Шыд часöт чöвтлi, да эг ешты панялыштны. Как раз сайкалiс, — и иньдöтчис деревняö.

Не сойыс моз горöн баитiс Степан, но сылiсь баснисö кылiсö и Витя, и сы гöгöр сулалiсь челядьыс. Шынньöвтiс Витя, лэдзис одзас понсö: видзöтö пö менчим мывкыда спаниельöс — то сiя!

Только Гриша гажтöма дзарнитiс Витя вылö да пондiс малавны Чикалiсь гривасö.

КУЖИС КЕРНЫ (1965)

(видзöт и 1992 вося вариант)

Арся мича лунö ми Вовакöт ветлiм тшакьявны. Миянлö колiс не косьтан тшак, и сiйöн ми эгö копрасьö не маслянка, не гöрд гриб одзын, кöда вöлi сымда — кöть зырöн тэч, а мунiм сэтчин, кытöн йылöны ниндуллез, ельдöггез, гöстшаккез, яг рыжиккез — солалан тшак.

Арыс вöлi сибавлöм ни аслас кисточкаöн быд листа пу дынö, и öнi нiя сулалiсö гöрдвевья паськöмаöсь.

Ми дыркодь кытшлалiм неыджыт шор дорись вöрсö, буракодь мыдзим и пуксим шоччисьыштны вель паськыт видз вылö. Сьöраным миян нянь-совся нем эз вöв, а кынöм öддьöн ни везгис-сималiс, и ми öктiм кöс улоккез, мед керны биок да пöжавны синявкаэз.

Вдруг менö негорöн кытсöвтiс Воваыс. Ме бергöтчи сыланьö. Сiя жмитiс чепöльнас öмсö — эн баит пö! — и мыччалiс чуньнас зород вылö, кöда сулалiс дас метр ылына ме дынсянь. Ме дзар кери сэтчин, но нем эг казяв интереснöйсö: зород кыдз зород — кык стожар, турун шаттез, пыкöттэз. Ме жмитыштi пельпоннэзнам — ог, мыся, вежöрт. Вова сибöтчис ме дынö да вашкыштiс:

— Зород вылас кöч пукалö.

— Мы-ый? — дивуйтчи ме да, кöр казялi руд комок, висьталi: — Тупка, натьтö, лунйö сэтöн.

Сэтчö вирдыштiсö-петiсö вöрсис кык пон и ме бердöт топ уськöтчисö зород дынас, гöгöртiсö сiйö да нюжöтчисö-сувтiсö миян доззэз бокö и пондiсö дзарьясьны.

— Но, мый вöджжат, шардöммез! — горöтыштi ме. Кузь кока поннэз легнитiсö пеллезнаныс и котöртiсö нюкайтчöмöн сэтчинлань, кысянь локтiсö.

Кыдз только саясисö поннэс, зород вывсянь кульк-мельк берездасис кöч, пуксьыштiс, дзар керис миян вылö гöрд синнэзнас, орсыштiс пеллезнас — и свиркнитiс пипуаинас.

«Кыдз жö сiя кайис эта вылына зород вылас?» — думайтi ме, биоксö вадзöтiкö. Вова, бытьтö тöдiс менчим думаэзöс, висьталiс:

— Ведра вывсянят чеччöвтöма. Видзöт, пöрöтöма. Былись, ведра куйлiс бок вылас пыдöснас зородлань, и кынымкö тшак сы дынсянь валяйтчисö метрся ылынжык — тыдалö, кöчыс тойыштсикас резыштöма нiйö бöрись коккезнас. Мывкыда, руд гöн!

Дата добавления: 2015-11-16