Видзчись, Деду. . .

Лена велöтчö нёльöт классын и кужö ни вурсьыны машинаöн. Талун сiя вурö сарафан. Не аслыс — Маша подружкалö, кöда олö пöрись бабкöт.

Мастерскöйын басöкжыка вурисö бы, да сэтчин вурöмыс понда босьтöны донöн, а бабыслöн сымда деньгаыс абу, вот сiя и тшöктiс вурны Ленасö.

— Конечно, вура, — кöсйисис Лена. — А шöралас Васса

Петровна. Баб юалiс:

— А сiя кужö? Может, ме ачым умöлика шöрала?

— Сiя быдöс кужö, сiя миян пионервожатöй и велöтчö институтын.

Старуха шынньöвтiс да нем эз шу, только думыш керис: «Бур морт, тыдалö, вожатöйныс, ежели сiйö сiдз донтöны челядьыс».

Мöдлун школаын ёлка — челядьлöн гажа праздник, и сарафансö колö вурны талун. Ёлка вылын лоасö мукöд велöтчиссезлöн маммез. А Машалöн — оз: сiя олö мöдiлаын, нылыс дынö оз и вовлы. Кыдз сiдз позьö керны мамлö — этö Лена некыдз оз вермы вежöртны. И Машалöн бабыс сiдз жö шуö. Сiя ассис нывсö и нимнас некöр оз шу, а сё — горттöм кöк.

То и вурсис сарафаныс. Лена вевттис машинасö, дзимлялiс вурсян ёгсö. «Ноко мый менам шогмис?»

Нылочка пуктыштiс сарафансö одзас да мунiс зеркало дынö. Зеркало пытшксянь сы вылö видзöтiс гöгрöс чужöма шыннялiсь нылочка, и тöдвылас усисö мамыслöн кыввес: «Шондiбана тэ менам, Ленуш...»

Сарафаныс басöк, но Леналö кузьöв, и нылочка шуис ас пондас: «Дзик сказкаись Алёнушка лои...» Сiя мöдiс чукыльтны чикисёксö одзланяс, но чикисёкыс дженытöв, пельпон вылас оз öшшы: бöр нильдiс спина саяс, только лöз лентанас свигнитiс.

Видзöтчис-керис Лена, каттис сарафансö да пуксис юны чай.

Сылö вöлi долыт: кужис отсавны мортлö. Эта дынö содiс мöдiк гаж: таво ёлка праздниксö пондас осьтны сiя, Лена. Васса Петровна линейка вылын висьталiс ни, что дружиналöн совет медбур велöтчисьöн шуис Ленаöс — сылö и осьтны праздниксö.

Леналiсь гажа думаэсö дзугис почтальон — вайис телеграмма. А сэтöн гижöм: «Каникуллэз коста видзчисям Ленаöс. Бабыс шогалö, меным колö отсасись. Василий дед».

Дед-бабыс олöны деревняын, Ленаэс дынö оз локтö. Дедыс басöка орсö гармошка вылын, кöда шусьö тальянка, а бабыс сьылö частушкаэз. И важ песняэз. Кыкнанныс нiя öддьöн добрöйöсь. Дедыс нёль год воюйтöма фашисттэзкöт, но война йылiсь оз любит висьтасьны. Кöр Лена пондас юасьны, только и шуас: «Лёк сiя вöлi. Адззан: синтöг менö колис... Уна йöз сёйис, но СССР-сö эз вермы — виньдiс и джагалiс... Ась некöр сэсся сэтшöмыс оз ло».

Нылöн асланыс керку, эм ыджыт карчйöр и учöтик-учöтик трактор. Сiйöн Василий дед и гöрö, и ытшкисьö, и пес ваялö. Кольöм гожумсö Лена чулöтiс ны ордын, и сылö деревняыс бура гленитчис. Сiя сулалö керöсок вылын, а бокас больгö юок, бытьтö сьылöтö лöз видззесö да ыббесö, ны сайись вöрсö. Быдлаын шондiгаж, небыт турун да сю, быдкодь ягöд да карч. Шор дорын йирсьöны баляэз да кöзаэз, а дзелёккес котрасьöны, чеччалöны, люкасьны велöтчöны. И сэтшöм басöкöсь нiя — дзик орсiсь кагаэз. И эшö öтiк диво: пруд вылын уялö уна дзодзог. Нiя чочкомöсь да ыджытöсь, дзик кыз пельöса подушкаэз, кытшöмöсь бабыс койка вылын...

Öтöрас лымок павьялö, а Леналöн син одзас гожся деревняыс, пеллезас юоклöн шыыс: дзоль-дзоль-дзоль...

«Колö мунны деревняас. Ашын жö, — решитiс Лена. — Вот юышта чайсö и ветла мамö дынö, тшöкта небны билет». Но кöр юсис чайыс, думаыс вежсис: «Чулöта ёлкасö да вöлись и муна. Дедö да бабö вежöртасö, нем оз шуö».

Нылочка сувтiс зеркало одзö, чатыртiс юрсö, артист моз паськöтыштiс киэсö да лыддьöтiс стишок:

Сьылам-орсам гажöна,

Йöктам шувка-шовка...

Здравствуй, зарниа Виль год,

Öзйы, мича ёлка!..

Ыбöс дорын силькнитiс звонок, и сэк жö пырис Маша да юалiс:

— Вурин? Ноко вай видзöта.

— То тай куйлö, — Лена мыччалiс диван вылö. — Пасьтавлы, меряйт. Может, оз и лöсяв.

Маша чöвтчыны эз понды, только Лена моз жö пуктыштiс одзас да дзарнитiс зеркалоö.

— Сэтшöм басöк! — ошкис Маша сарафансö. — Гортын пасьтавла... Тэнö, Лена, öнi жö школаö корисö.

― Кин?

— Васса Петровна.

Маша мунiс гортас, а Лена автобусöн кайис городö, кытöн сылöн школаыс. Школа виль и югьялö, дзик витринаын чача: чочком кирпичыс абу на самöм, краситöм местаэс свиттялöны.

Аслас школакöт Лена пыр пантасьö гажöн. И öнi, кöр петiс автобусiсь, бöра любуйтчыштiс. Боксяняс школаыс вачкисис паруса корабль вылö: улiсь этажыс гöрдкодь и краситöма сiдз, что шогмöма ныр, а лöзкодь колоннаэс тöдчöны мачтаэз моз.

Школа вевдöрöт уйисö кокнитик кымöроккез, и Леналö кажитчис, что кушин вылiсь самöм лымыс — море, и сы кузя уйö корабль.

Васса Петровна Ленаöс панталiс улын, ласкова шыасис:

— Локтiн? И нырыт дзонь?

— Дзонь. Ме эд автобусöн.

— Тöлыс лёк, мыся, кынтан ныртö... Но, мунам залö. Физиккес важын ни видзчисьöны.

— Физиккез? Кытшöм физиккез? — повзьыштiс нылочка.

— Мунам, ачыт адззылан.

Васса Петровна кутiс сiйö ки пöлöт да нуöтiс залö. Öтiк «физиккезöс» Лена тöдö ни: нiя туалетiсь ыбöс вугö лэдзлiсö ток и повзьöтiсö уна челядьöс. Сэтшöммескöт абу охота пантасьны.

Лена зал дынас ни öтпыр юалiс:

— Нiя физиккес — не ылöстöммес?

— Эна — умнöйöсь...

Нiя пырисö залö. Сэтöн сулалiс ёлка. Сiя вöлi лöнь да гажтöм, дзик дузöм морт. И Леналö сiдзжö гажтöм лоис.

— Роман! Дима! — кытсöвтiс Васса Петровна. ― Тi кытöнöсь? Занавес сайсянь петiсö кык зоночка, и Лена серöмтчис: öтыс вöлöма сыкöт ордчöн олiсь Димка, полiськодь да вежöра морт.

— Тi готовöсь? — юалiс нылiсь Васса Петровна.

Роман шуис:

— Кыдз пионеррез.

А Димка только юрнас зэгнитiс.

— Керам репетиция. — Васса Петровна тшöктiс чöвтчыны Ленаöс да сувтöтiс сiйö микрофон одзö. — Тэ эссянь и пондан лыддьöтны. Ме поздравита челядьсö, и тэ пондан баитны... И сiдз, быдöнныт асланыт местаэзö!.. Пондöтчим!..

Васса Петровна баитiс дзирыта и гажöн, бытьтö быльнöй праздник коста. А Леналöн сiдз эз пет, и пионервожатöй дугдöтiс сiйö:

— Гажöнжык, Лена! Гажöнжык колö! И тэрмасьтöг. Тэ праздник осьтан. Тэ — волшебница!..

Только куимöтпырсяс, кöр Лена стишоксö лыддьöтiс мед ни визыла, ёлкаыс, дзик сказкаын, югйöвтiс голубöй-голубöй биоккезöн да öдззис горавны музыка. Горалiс недырик, секунда-мöд, и сыбöрын омöн уввес коласын öзйисö мöдкодь рöма лампочкаэз — гöрдöсь, вежöсь, зелёнöйöсь, а кöз йылокас рöмсялiс зарниа звезда.

Этасянь бура гажсялiс и кöзыс, и залыс, и быдсöн рытыс, и Лена пондiс чеччавны кок ныррез вылас да шовкöтны оча долонь.

Школасянь горт посёлокö Лена бöра мунiс автобусöн. Только ештiс чеччыны, и улицаын öзйисö биэз. Нiя талун вöлiсö дзик жö югытжыкöсь, гажажыкöсь, бытьтö тожö радуйтчöны локтан Виль годыслö.

Мöдiк улицаö кежикö Лена казялiс старушкаöс, кöда пукалiс лымöн тырöм тротуар бокын. Котöртiс сы дынö, юалiс, мый лоис.

— Уси, кага, да чеччынытö ог вермы-ы-ы! — ружтö старуха. — Отсалiн бы...

— Чужйисин, натьтö? Эн я доймы?

— Падми я, нильдi я — ог и тöд... Кыдзкö не öддьöн дойми. Старухаыс ён, Лена чеччöтiс сiйö сьöкыта.

«Усяс кö мöдпырись, кынмалас эстöн», — думайтiс нылочка да вöзйисис кольлавны, но старуха откажитчис:

— Тэ, кага, гортат тэрмась, адззан, пемыт лоö. А менам... киссьöмö тыдалö ни, — старуха мыччалiс пöлiня бока керку вылö. Сылöн тыдалiсö кык öшын, но öтас биыс эз вöв, и керкуыс видзöтчис, топ пöв сина морт. Посёлокас сэтшöм важ керкуэс неетша, и ныын унажыксö олöны öтка баббез.

«Эта, натьтö, сэтшöм жö», — думайтiс нылочка да юалiс:

— Öтнат олан, мужиктöг?

— Мужикö, кага, эм, да кöзяиныс абу.

— Кыдз нö сiдз?

— Не быд мужикыс эд кöзяин, кага. Дышкучик сiя менам.

И пенсияыс сылö дöнзис умöлик. Аслам пенсияöн, позьö шуны, верда. — Старуха ойзыштiс да иньдöтiс Ленасö: — Но, котöрт гортат. Да эн жö усь ме моз!

Лена котöртiс да думайтiс эта старуха йылiсь. А горт дынас ни юрас пырис мöдiк шог: «Бабö, натьтö, этадз жö усис да доймис.» И сэтчö дзик кылiс дедыслiсь голоссö: «Видзчися Ленаöс. Меным колö отсасись».

Неылын Лена керку дынсянь öтöрас вöлi телефон, и Лена звонитiс школаö да корис Васса Петровнаöс. Кöть и вöлi сёркодь, а вожатöй абу на мунöма и локтiс телефон дынас.

— Васса Петровна, ме ёлка вылас ог лок, — висьталiс Лена.

— Кин баитö? Лена, тэ?

— Ме, Лена...

— Кыдз сiдз — он лок? Тэ мый сiйö баитан? — дивуйтчис Васса Петровна. — Эттшöм честь сылö керисö, а сiя — ог лок! А тöдан я тэ, что сэтшöмыс оланас öтпырись овлö?

— Ог лок, Васса Петровна, — эшö öтпыр висьталiс Лена. — Ась ме туйö лоас Маша. Сiя тожö отличница.

— Но мый лоис тэкöт, Лена? Висьтав кöть!

— Деревняись локтiс телеграмма: бабö шогалö. И корöны менö.

— Öддьöн шогалö?

Эта йылiсь Лена эз тöд и эз понды баитны, а висьталiс:

— Ашын колö меным мунны.

— Лок телеграмманат школаö, мунам директор дынö, — горöтчис Васса Петровна, но сэк жö бöр керсис: — Оз ков локны, Лена. Эн лок. Тэ кылан, Лена?

— Кыла, Васса Петровна.

— Мун бабыт дынö, Лена. Тэ сэтчин öддьöнжык колан... Адззисьлытöдз!

— Адззисьлытöдз, Васса Петровна! — паныт горöтчис Лена да öшöтiс трубкасö.

Кöркö ештöма ни петны тöлiсь. Сiя югыта видзöтö Лена вылö, бытьтö вöзйисьö лоны сылö ёртöн. И нылочка шуö:

— Лок, лок мекöт! Меным гажажык лоас!

И нiя кыкöн котöртiсö Лена мам дынö: — öтыс туй кузя, мöдыс — небоöт. Котöртiсö, медбы мамыскöт öтлаын мунны телеграфö да иньдöтны дженытик телеграмма: «Видзчись, деду, ме локта, Лена».

Дата добавления: 2015-11-16