МЕДБÖРЬЯ ЮÖРРЕЗ 3 страница

«Мун öнi жö винитчы, — öмалiс сiйö мöдiк. — Эн ло подлецöн, жалейт Миков Сеняыслiсь челядьсö».

«Нем оз ло, — баитiс первöйыс. — Миков Сеня ытшкисяс невна лесникыслö и быдöс чулалас. А лось мый? Зверь сы понда и шогмö, медбы сiйö вийны... Эн пов...»

Öтöрын важын ни пемдiс, руд туман кудельöн тшаклясис юокыс весьтын, пöльтiс ыркыт тöлок, вöрöтiс пу лыссэз. Гармоння медбöрьяись керис пики-вики и лöнис, — нывкаэз да зонкаэз мунiсö горттэзö. А Исай Сергеевич сё пукалiс аслас посöдзын, думайтiс.

«Мыйöн виноват Миков Сеняыс? Мыля сiя должен ытшкисьны? — токöтiс юрас. — А Кузьмичыслöн некытшöм стыд абу!»

— А, чёрт! — шуис Исай Сергеевич и курни-верни лэдзчис посöдзсис. Мöдiс öнi жö мунны лесник ордö, но сувтiс. Мыйлö? Мый сiя вермас висьтавны эта мортлö? Да и сёр ни, узьö, натьтö. Не мунны ли Миков Сеня ордö, юавны Парасьыслiсь, мыйлö вовлiс лесникыс? Может, Макар нем эз и кыв, а просто вежмасьö, пешлö Исайлiсь нерввесö?

Миков Сеня керкуö йиркöтчыны оз ков: оградаас и воротаыс абу, посöдз ыбöс эшö мöйму дзир вылiсь усьöма. Сеня мöдöма жö лöсьöтны сiйö, вон нельки виль косяккез сувтöтöма, да öвтыштöма кинас: сiдз олас.

Исай Сергеевич кайис дзуртана поспуэз вылöт, осьтiс керку ыбöс. Пемыт керкуас, кыдз гуын. Öшыннэсö сайöвтöмась льöмпуэз да кыдззез, нельки тöлiсь югöрсö оз лэдзö. Но вот синнэз велалiсö пемытiнас, казялiсö джоджись ольпась. Сэтöн узьöны челядь. Öтiк, кык, куим... Эшö лабичын вон кинкö нюжласьö.

— Одз тай водöмась. Мыдзит разь?

Лабичын узисьыс лэбтiс юрсö, тулис синнэз, но чожа тöдiс Исай Сергеевичöс, горöтчис гажöн:

— Мыдзан небось: лунтыр котраси...

— Кытöн мамыт?

— А-а, баня мунiс лонтны. Асывнас пывсьöтны миянöс мöдö. Коканыт, шуö, рака тiянлö сапоггез кöмöтöм, чöвтны пö колö нiйö... Ох, зубытöсь нiя, эна сапожоккес... А мамö горзö, дядя. Он верит? Быль...

«И энö ме мöдi öбидитны?» — думайтiс Исай Сергеевич.

— Висьтав мамытлö, ась оз горзы. Быдöс пö бур лоас. Висьталан?

Вежöртiс я, эз я мыйкö учöтик юр — кин тöдö. Усис сiя подушка вылö и ланьтiс, тыдалö. Председатель сулалыштiс невна и петiс öтöрö. Гортас мунтöн дзарнитiс Миков Сеня карчйöрö, учöтик баня вылö. Сiя былись лонтiсис, трубаись петiс тшынок...

«Ашын баита Парасьыскöт, талун сёр ни», — решитiс Исай Сергеевич.

Сiдз нем сорöн бертiс гортас, водiс Марья бокö.

Узис сiя öддьöн умöля, веськыта шуны — совсем эз узь. Важын ни дугдiс баитны радио, размöд косьöвтiс загонын паськыт вижлоксö петух, а Исай Сергеевич сё бергалiс и бергалiс бок вылiсь бок вылö, орöттöг куритiс папиросаэз. Иньыс узис крепыта, ныр горöн, но вот и сiя саймис.

— Мый нö тэ бергалан, ылалiн я мый я?

— Чöв, Марья, узь...

Бöра базанитiс петух, горöн шевкйисис борддэзнас. Чожа асыв. А Исай Сергеевич куритiс, мöдiс онмöссьыны, но онмöссян разь? Юрö быд берсяыс пырö, вемсö бытшкалöны гаггез. Кыдз и тöн рытнас, зородас пукавтöн, старайтчис вежöртны, мыйлö сiя лыйис лосьсö, касьтылiс быдöс, кыдз вöлi делоыс, но бурыс нем эз сод. Лыйис да и только, лыйис бöбалöм могись, а видзöт, мый шогмис. Эх, бöр бы бергöтны!

«А тэ узь, эн думайт, — шушкис гаг. — Быдöс чулалас. Миков Сеня ытшкисяс и быдöс лоас бур...»

Бур я? Вдруг Миков Сеняыс гижас жалоба, пондас норасьны?

«А кин сылö веритас? Неохота ытшкисьны — вежты штраф», — сералiс гаг.

И öтiк думасянь, что пондас винитны невиновнöй мортöс, мырддяс поснитик челядьлiсь, может, медбöрья нянь кусöк, Исай Сергеевич кымöс вылö петiсö кöдзыт ньылöм воттез, кышöпöн сувтiс юрсиыс. Нет, оз ло эта! Исай Сергеевич оз вермы лоны подлецöн!

«А Кузьмичыс кыдз нö вермö?» — бöра шыасис гагыс.

Да, да, кыдз сiя вермö? Часто баитö радио, баитöны лекторрез, докладчиккез, гижöны книгаэзö, газетаэзö, что эм эшö мукöд юрын быдкодь нёштöм тенденция, эмöсь капиталистическöй пережитоккез. Исай Сергеевич кывлiс эта йылiсь и вунöтлiс сразу жö. Может, кытöнкö и эмöсь сэтшöм морттэс, а Веретяын кин, поди, новйöтас аслас юрын кытшöмкö тенденцияэз. А сэтöн, видзöт, мый вöлöма! Кытшöмкö паршивöй лесник зэлöтöма мортöс, аслас видз вылын ытшкисьны тшöктöм, уна челядя мамöс синваöдз вайöтöм. И только сiйöн, мыля сылö, эта умöлик мортлö, колö турун, медбы тöвйöтны карта тыр пода. И кытöн эта шогмö? Веретяын! Сiя сельсоветын, кытöн председательнас Исай Сергеевич Вольлапин...

Вийöм лось кыдзкö жагöник-жагöник вешшис синнэз одзись, петiс юрись, öшис совсем, а мыйкö мöдiк, ыджыт да значительнöй, пырис юр вемас. Тенденция! Вот мый сiя вöлöма! Тенденция олöма ордчöн, богатсялöм, а Исай Сергеевич, аслас пишальöн бöбавтöн, эз и казяв нем. А кытшöм сiя ачыс, Исай Сергеевичыс? Быд собраннё вылын баитö коммунизм йылiсь, дзик книга лыддьöтö, а мый петö? Вийис лосьöс, вийис не нарочно, а винитчыны полö. Эшö невиновнöй мортöс мöдiс пидзöссэз вылö сувтöтны. Тыдалö, аслат кучикыт сё ни жö донажык кытшöмкö йöз кучикся, аслат юрын тожö тай эта самöй тенденцияыс пукалö! Крепыт, тыдалö, сiя. Тенденция, тыдалö, оз тöд некытшöм жалость, быд торсö керас...

Юрси кышöпöн сувтö. И эз ни думайт Исай Сергеевич некытшöм он йылiсь, тöдвылö усисö Макарлöн кыввес: «Бур öнi сельисполнительöн овны... Спокой!» Мый старик мöдiс висьтавны эна кыввезöн? Натьтö сiйö, что Веретинскöй сельсоветын кокнита овсьö нечестнöй отирлö, раз некöр нiйö сельсоветö оз корлö...

— Ужо, старик, адззылан, кытшöм спокой лоас! — шушкис кöс тырппезöн Исай Сергеевич. — Котрасьöв-керан. Ашын первöй делоöн висьтала народыслö, что ме лосьсö вийи. Сiдз и висьтала: мый охота, сiйö и керö мекöт, только тöдö, что не нарочно вийи... сiдз, бöбалöм могись. Даровöй яйыс оз ков меным, а вот шогмис жö урöс... Штраф, конечно, вежта. Не штрафын делоыс. Штраф — тьфу: вузала öшкаöс и вежтiся. Тi только веритö, что не нарочно вийи лосьсö... А сэсся мый? А сэсся кора сельсоветö Кузьма Кузьмичöс. Нет, лучше ачым ветла сы дынö. Висьтав, шуа, подлец, кыдз богатсялiн. Да не меным висьтав, а народлö! Вот и удж тэныт лоас, дед Макар!

А гаг сё эшö абу узьöм, шыасис гусьöник:

«А может, одзöв? Может, сiдз быдöс чулалас? Öшкасö сёжö кык год вердiн, яй сёйны мöдiн...»

И бöра сорласис быдöс Исай Сергеевич юрын, öшис артыс. Син одзас чужисö нёштöм картинаэз, ветлiсö лöз круггез. Вот локтiс кысянькö дед Макар, кутiс Исай Сергеевичöс кипöлöт, петкöтiс сельсоветiсь да сувтöтiс порог вылö: «Эн куж морт моз овны, дак тарöвтчы!» И чужйис небытик местаö пидзöснас. Веретинса, том и пöрись, вак-вак серöмтчисö, пильтыралiсö öммез... А сэсся локтiс кысянькö шадра чужöма Парась, сувтiс пидзöссэз вылö: «Эн öбидит челядьöс, ен нимöн кеймися!» И окалö бы киэз...

И эта кадö Исай Сергеевич чирöстiс лёкгоршöн, чанöтiс керкусö, иньыслiсь пеллесö:

— О-ой!

Эта чирöстöм öтiк мигö сувтöтiс Марьяöс кок йылö.

— Мый лоис?!

Синнэз Марьялöн паськытöсь, повзьöмöсь, юрсиыс пашмöм, лэдзчисьöм. Инька видзöтö веськыта жöникыс öмö, старайтчö мыйкö вежöртны.

— Ох, лешак, шогмас жö! — бобгö жöникыс и кидолоньнас зыртö кымöссö, чышкö кöдзыт ньылöм.

— Вöтасин?

— Кытшöм вöтасьöм, эг на узь да! — Исай Сергеевич öзтiс папироса, невна садясис и сё только зыртiс да зыртiс кымöссö.

— Тэ мый, ылалiн я мый я? Мый чирзан? Исай Сергеевич висьталiс:

— Нюжöтi этадз киэзöс кровать юр вевдöрöт, кошша пызан вылiсь папиросаэз да спичаэз. Öт кинам папиросаэсö кошша, мöднам спичаэсö. И кыдз кватитас кинкö киöс! Но ме и чирöстi... Пемыт эд...

— Ох, — ыш ловзисис Марья. — Беда тэкöт. Кин вöлöма?

— Кин, кин! Аслам киö. Шульга киö кутöма веськытöс! Тьфу, лешак...

Исай Сергеевич волькöтiс шпынöн сувтöм юрсисö, лолалiс сьöкыта, а иньыс сулалiс вöрöтчытöг, видзöтiс сылö öмас.

— Мый он узь?

— Беда, Марья. Лосьöс тöн вöрас вийи, — и содтiс веськыта: — Кыдз тэ думайтан, уна я арнас öшканым понда сетасö? Вежтiсьны ковсяс...

Марья шлёпкисис кровать вылö, киэзнас кутiс юрсö.

— Лосьö-ö-с? Да мый нö ни эта эттшöмыс! Ох...

Исай висьталiс, кыдз вöлi делоыс, иньыс пильскис-горзiс, видiс жöниксö сатанаöн, норасис кинлöкö аслас несчастнöй судьба вылö и чышкис простыня дорöн ва чужöмсö. А жöникыслö вдруг лоис öддьöн кокнит, гажа, дзик малыштiс кинкö добрöй киöн чужöмсö, лöньсьöтiс сразу. Кöть и горзö иньыс, дак ась. Женскöй синваыт женскöй и эм, — кыдз асывся шондi югöррез увтын лысва, — чожа косьмö.

И вöралiсь первуись шынньöвтiс эта суткиö, сьöвзис аскежас: «Тен-ден-ци-я! Колö жö...»

VII

Исай Сергеевич Вольлапин вовлывлiс Ректанö часто, чуть ли не каждöй лун, и вермис бы любöйлö висьтавны, что тöдö этö деревнясö доль и поперёк. Да и мый сэтöн не тöдны? Тридцать кыным керку сулалöны керöс покат вылын, вöр дорын, быд керку öшын увтын быдмöны льöмпуэз да кыдззез, быд керку бöрын карчйöр, гиддэз, амбаррез. Быдöс бытьтö бы тöдса. А вот локтiс талун и казялiс, что не сiдз ни тöдса. Юав, кин олö мукöд керкуын, дак и висьтавны сьöкыт лоас. Некöр эз пыравлы мукöд ордö, просто мог эз вöв.

Деревня шöрас, веськыта туй вылас, кинкö тшупöма виль сруббез. Кин этö кутчисьöм строитчыны? А вот керкужуг совсем ни готов киссьыны — крыша сiсьмöма, слегаэз петöмась, бытьтö моритöм вöвлöн ордлыэз. Дзар керан — думайтö дзик керкуокыс: мыля хозяин оз воч сiйö?.. Нет, эз казявлы одзжык Исай Сергеевич сэтшöм торресö, эз...

Кöркö важын ни пыралiс сiя мыйлöкö Кузьма Кузьмич ордö, дыркодь пукалiс, а вот видзöт тэ, некыдз оз вермы уськöтны тöдвылö, кытшöм вöлi керку пытшкыс: то ли штукатуритöм стенаэза, то ли абу? Тöдö только, сулалiс сiя деревня дорас ни, — карчйöрас кöззэз быдмöны, — вöрыс сысянь и пондöтчö. Локтiс талун эта усадьба дынö Исай Сергеевич и дивуйтчыны оз вермы: важ керку местö Кузьмич вильö сувтöтöм, кытшöвтöма сiйö басöк стынöн, сайланись бокас нюжöтöм кузь карта, быдöс жын-жын дорöм — ем пыс ыжда осьта некытöн абу. Ограда воротаыс виль, краситöм. Дзарнитан и сразу казялан — сьöкыт сiя, надёжнöй, плахася кызжык тёссэзiсь дорöм, и некыдз-нибудь, а быд пöвсö кутöма тассэз бердö болтöн и, медбы гайкаэс эз мöртчö пуас, тэчöма ны увтö паськыт шайбаэз. Сотня год сэтшöм воротаыс сулалас, нем оз ло. Сьöкыт, невежöртана чувствоöн локтiс Вольлапин эта ворота дынö, нёджжöвтiс öтмöдöрö и дыр жольöтiс ыджыт кольцоöн, брякöтiс воротаас кулакöн, мыдзтöдз йиркöтчис. «Сё я мый я узьö?» Сувтлiс кок чуннез вылö, мöдiс дзарнитны оградаас воротаыс вевдöрöт, но и сэтöн чаль тöрик осьта абу. Только кылiс, кыдз загонас лёкгоршöн, дульсö ньылалöмöн, эралiс пон, жольöтiс проволока кузя цепöн, гыжьялiс воротасö.

Но вот йиркнитiс керку ыбöс, кинкö, сьöкыт сапоггезöн ёркйöмöн, лэдзчис посöдзсянь.

— Кин сэтчин?

— Ме локтi! Осьт жö воротатö!

— Гхе, Исай Сергеевич некö?

Перво жолькнитiс иган, сэсся дзуртöмöн, нёштöма вижгöмöн вешшис кöрт кузя кытшöмкö сьöкыт предмет — может, шорень, а может, и лом, — и ворота кокнита оссис Исай Сергеевич одзын. Пон, тшыг кöин моз, чеччöвтiс паныт, готов вöлi лешки-вошки керны, но хозяин зубыта чужйис бокас:

— Сыть, сволочь! Тэ мый?!

Куканься ыджытжык буско шымыртiс бöжсö и, цепнас жольöтöмöн, пырис гидö.

— Но и ворота тэ жвангöмыт! Мыйлö бы сэтшöмсö?

— Пыр, пыр, Исай Сергеевич, гöсь лоан... А ворота... мый ворота, оз туй сытöг — вöр дорын ола.

— Сiдз, сiдз...

— Вöрас эд не только ошшез ветлöтöны... Гы-гы!..

Хозяин лэдзис Исай Сергеевичöс одзас, корис пырны керкуö. Пон кыкнаннысö кольлалiс лöг синнэзöн.

Кузьма Кузьмич керкуын кык нето куим жыр, первöйыс ыджыт, сöстöм, югыт. Порог дынас, веськытланись пельöсын, шлёпкисьöм-пуксьöм паськыт крестьянскöй гор, шульгаланяс — виззя дöраöн вевттьöм лажмытик пуовöй кровать. Пызан вылын бекöррез, гырниччез, шöралöм нянь — тыдалö, завтракайтöмась.

— Öдя! Öдя! Да кытчö тэ, кудоба, воштiсин? Он адззы, дона гöсь локтiс!

Сайись жырись петiс кöсыник инька, сетiс поклон Исай Сергеевичлö. Öт кинас сiя шупыта сюйис гöрд чышьян увтö петöм юрси тылöппесö мöднас мыйлöкö кутiс запон дорсö.

— Сёйны лöсьöт, кöс треска, да шупытжыка, — горöтчис хозяин. И кöр Öдяыс шысеттöг чепöссис гор дынö, Кузьма Кузьмич вöлись сетiс кисö Исай Сергеевичлö, здоровайтчис.

— Пуксьы сразу пызан сайö, сёйыштам. — И бергöтчис иньыслань: — Киэтö, киэтö перво миссьы! Куль-ту-ра! — сэсся котöрöн петiс посöдзö, гымнитiс, кылö, чулан ыбöсöн.

Исай Сергеевич пуксис лабичö, думайтiс, мыйсянь пондöтны баснисö, пуксьыны я не я пызан сайö? Öдя вайис быдса бекöр шыд, петкöтiс кыськö солалöм ельдöггез, весöтiс луккез. А Кузьма Кузьмич, сё сiдз жö котöрöн, пырис ни керкуö, пызан вылö торс сувтöтiс бутылка.

— Важын ни неби, да сё некöр вöлi юны. Талун джагöтам.

— Асывнас?

— Добрöй морткöт и асывнас лöсялас. Пуксьы. Да тэ мый пыксян, кыдз баран? Пуксьы, мыся!

— Не сёйны локтi, Кузьма Кузьмич. Дело эм.

— Вот-вот! Пызан саяс и баитам. Ме эд тöдi, что тэ локтан. Кыдз жö, кыдз жö... Деревняын оз туй другтöг овны, сьöкыт. Бур друг кöть кöр отсалас...

Лесник чуть ли не кипöлöт кыскис Исай Сергеевичöс пызан сайö, мöдыт старайтчис мездiсьны. И кöр казялiс, что Кузьма Кузьмич öддьöнöв пондiс пессьыны, Вольлапин шуис строгöя:

— Дугды! Ме думайтi... тэ...

Наблюдательнöй морт вöлi Кузьма Кузьмич, лэчыт сина, но, тыдалö, эз казяв, кыдз гудыртчис председательлöн чужöмыс, кыдз нёштöма вöрисö рожабан йыввес. Лесник сё сюльтыртiс ассис, баитiс кокнита:

— Тэ думайтiн: вöтьны ме тэнö понда, нятьö сюйыштны? Не, дружок, добрöй отирыс не сiдз керöны. Добрöй морт пыр отсалас, висьталас, кыдз бедаись петны. Лок пуксьы, сёйыштам. Сёйыштам, юыштам, дело йылiсь баитыштам...

— Кывзы, тэ, — орöтiс сiйö Исай Сергеевич. — Кытшöм беда йылiсь баитан, кинлö мöдан отсавны? Нем мыйкö ог вежöрт.

— Э-э, да тэ тай вон мый, — гогинялiс юрнас лесник. — Кыдз жö сiдз, а? Морт умнöй, вежöртны бы колö.

И бöра, дзик нем эз и вöв, трекнитiс Исай Сергеевичöс киöттяс, мыччалiс пызанлань. Öдя сулалiс горöдз дынын, дзарьялiс полöмöн и, натьтö, вирöдз ни зыртiс киэсö запон дорнас. Быдöс сiя кыдзкö кöрчитчöм, кöстiсьöм, дзик пельпон вылас сьöкыт из пуктöмась, и кöр жöникыс бергöтчис сылань да муркнитiс мыйкö, инька чожжыка чуйнитiс сайись жырас. Исай Сергеевич вежöртiс: не кокнита овсьö эта керкуын, некытшöм гаж абу.

— Вот мый, — чорыта горöтчис хозяин, кöр казялiс, что председатель оз и думайт пешлыны сылiсь нянь-совсö. — Он бы асывнас ю, дак оз и ков. Пырав рытнас. Юыштам, баитам...

Эта кадö öшын увтас кышöтыштiсö мöймуся косьмöм листтэз, ризь-ризь керис мыйкö. Хозяин тшöк мунiс, чепöссис öшын дынö, дыр нёджжасис и кывзiсис, сулалiс вöрöтчытöг, кыдз пон, кöда казялiс неылiсь вöр уткаöс и полiс шардöтны сiйö.

— Мый лоис? — юалiс Исай Сергеевич.

— Нем оз кыв, — шыасис лесник да öвтыштiс кинас: — Кань, тыдалö, шырöс кутiс.

Öтöрын горöн баитiсö инькаэз, мужиккез — мунiсö видз вылö. Дзуртiсö телегаэз. Пондöтчис виль лун, пондöтчис удж.

— Отсалiн бы, а? — вдруг горöтчис Кузьма Кузьмич и пуктiс кисö Исай Сергеевичлö пельпон вылас. — Тэ меным отсалан, ме — тэныт. Лоам кыдз добрöй морттэз.

— Мый сэтшöмыс? Мыйöн ме тэныт отсала? — Исай Сергеевич лэбтiс юрсö, кинас нуöтiс тшöкаыс кузя, дзик зыртыштiс кытшöмкö вез. — Сьöкыт тэнö вежöртны: то тэ меным кöсйисян отсавны, то отсöт коран...

— Тэ — меным, ме — тэныт! Сiдз эд му вылас керсьö. Адззан, умöля ола: не чомын, не пызан вылын нем абу. А кинлö жö неохота буржыка овны? Чери пыдынжык места кошшö, морт — шонытжыкö... Отсав меным. Тэ — председатель, советскöй власть, тэ — верман... Адззан, кыдз ола...

— Да кыдз тэ олан? Медбура Ректанас олан, этö быдыс сiдз шуас. Пода тэнат карта тыр, керку строитöмыт крепость кодьö. Мый тэныт оз тырмы?

Исай Сергеевич баитiс спокойнöя, не тэрмасьöмöн, кöть охота вöлi чеччöвтны кок йылö, кутны этö «умöля» олiсьсö моросöт да нямыртны, кыдз гадöс.

— Пода менам карта тыр? — дивуйтчис Кузьмичыс. — Эн ни баит! Кыдз тэнат кылыт бергöтчö! Подасö эд вердны колö, а мыйöн вердан? Öтiк турунок вылын подасö он видз... Картов колö. Вот и сетiн бы тэ меным муок. Вон карчйöр пустуйтö, мöдöдз год хозяиныс, Проня Петькаыс, городын олö, а карчйöрыс пустуйтö. Колхоз кöдзö кукуруза, а толкыс мый? Тшыкöтö только мусö, проволочник плодитö. Сет, Исай Сергеевич, сет! А ме тэныт отсала, вот кыдз отсала!

— Да муыс эд колхознöй, кыдз ме сета тэныт? — юалiс Исай и öдва видзсис местаас. А лесник готов вöлi кыскасьны гаг моз, виклясьны джоджöт, лишь бы сöтны унажык колхознöй мусö. Эта минутаö кытшöмкö адззывлытöм жадность, кытшöмкö вöвлытöм бес сывьялiс сiйö, вайöтiс мортсö сэтчöдз, что висьтав — «сета» — и сiя öнi жö окалас кокпыдöссэтö, тшöкты, дак вияс мортöс, гöннас сёяс понöс и синöн кваркыш оз кер. Вот кытшöм вöлöма тенденцияыс!

— Муок, шуан, колö? — юалiс Исай Сергеевич, тырп дорресö кинас сайöвтiкö.

— Ныв посадас олö, сы вылö и гижимö бы... Быдöс бы вöлi бур да ладно...

— Вот кыдз! — Исай чеччис лабичсис.

— А ме! Да господи, быдöс бур да ладно лоас! Лосьыс йылiсь öтiк пель оз кыв.

Дрöгнитiс Исай Сергеевич, пуксис бöр. Талун вунöтлiс ни сiя эта зверь йылiсь, локтiс öтiк думаöн — разоблачитны ворöс, подлецöс, и вот бöра ёрдöм лось! И кöр лесник казялiс сылiсь дрöгнитöмсö, шынньöвтiс аслас кöин шынньöлöн, кырныш моз уськöтчис атакаö:

— Мый, шедiн?! Вот, вот... Ме — тэныт, тэ — меным! Оча ки? Кыдз ранитöм зверь чеччöвтiс Исай, пидзыртiс кулаккесö:

— Тэ кинкöт сiдз баитан? Кинöс небны мöдан?

Лесник и синöн кваркыш эз кер, öтiк мускул эз вöрзьы сы чужöм вылын, только сьöд усоккес дзик лэбтiсисö щетинаöн, лöсьöтчисö бытшкасьны.

— Öтта, кыдз горöтлö, — шуис сiя спокойнöя. — Эм чуланам öтiк штука, адззи тöн вöрсис... Öнi думайт, кыдз тэныт буржык лоас.

— Пишаль? Адззин сёжö? Ах, лешак! Ха-ха-ха!.. А ме думайтi, кытiсь, мыся, öнi кошшыны! И патронташсö вайин?

— Чапкы вöрас ем — и сiйö адзза! — ошшасьöмöн горöтчис лесник и синнэзнас мыччалiс пызан вылö. — Пуксьы, баитыштам,

— Кывзы тэ, лешак, — бöра лöгасис Исай. — Ог ме тэкöт понды öтiк пызан сайын пукавны. Тэ — подлец! Вовлiн видны менö кытшöмкö каёккез понда, чуть эн горзы, сiдз жалейтiн нiйö. Но ме и думайтi: бытшöм, мыся, мортыс, нежнöй, — природа любитö. А тэ подлец вöлöмыт, зверь. Тэ мортöс ульöн верман сёйны. Не сiдз я баита? И тöд, что лосьыс йылiсь ме юöртi ни кытчö колö и вежта штрафсö. Пятьсот руб — тьфу! Не нарочно вийи, но вежта. Светас овтöн мыйыс оз овлы...

Кузьма Кузьмич эз вермы видзсьыны, öмалiс сiйö:

— Вись-та-лiн? Бöбöв! Мыйлö тэ этö керин? Быдöс бы бур да ладно вöлi, муок и колiс только меным, а тэ... эх! Позьö разь юртöг овны? А эшö председатель...

— Дугды. Лучше висьтав, мыйлö Сенясö иньдiн видз вылат? Мый, батрак сiя тэныт?

Нюжöтiс чужöмсö лесник, казялiс — озö шутитö, вазис кымöсыс, öшöтчисö киэс. Но сетчыны эз и думайт, дорйисис:

— Сеняöс? Да тэ мый, ылöстöмсялiн? Кöр ме сiйö адззылi? Да кин этö напраслинасö гардiс?

— Разоблачитам! — горöтiс Исай Сергеевич. — Разоблачитам! Эн суськись. Горзö тэ понда казённöй гортыс.

Эта кадö öшын увтын бöра мыйкö ризьнитiс и кижган голос шыасис öтöрас:

— Правильно, Исай Сергеевич! Горзö сы понда тюрьмаыс!

И если бы сюра чёрт мыччисис öнi керкуас, здоровöй мужик етшажык бы повзис, кыдз повзис лесник, кöр казялiс öшын увтсис дед Макарлiсь пашмöм юрсö. Старик шыннялiс сэтöн, вежмасис.

— У-у-у! — унньöвтiс Кузьма Кузьмич и чеччöвтiс öшын дынö. — Вия! Вия вежöмöс!

И сöтiс бы, и вийис бы, натьтö, Макарсö, но Исай Сергеевич кутiс сылiсь кисö:

— Дугды!

Сай жырись петiс Öдя, дзарнитiс полöмöн.

— Мый сэтöн шогмö? — и перыта саясис юр. Исай Сергеевич бергöтчис Макарлань:

— Мыйлö локтiн?

— Хе-хе-хе! Мыйлö локтi? Ме эд сельисполнитель... Тэ некытчö он иньды, дак ачым мунi... Казялi асывнас — Ректанö шыбыльтан, но и вугыртi бöрсянят... Кытчö, мыся, сiдз Исай Сергеевичыс лöсьöтчис? Не Кузьмичкöт я окасьны? Морт ме любопытственнöй... Мыся, поди, эта чераньыс кутас тэнö аслас везö. Эг тöд, что тэ сэтшöм правильнöй. Простит...

Лесник бöра чеччöвтiс сылань:

— Кутны сiйö колö! Йöз карчйöрын луннас ветлöтö. Быдöс посадкаöс талис. Кöртавны колö!

— Эх, повзьöтiс! — шынньöвтiс Макар и мыччалiс лесниклö кывсö. — Ме тэнчит таля, паразитлiсь! Ме только неважын Кöрвийöмсянь локтi... Ойбыт ветлöтi... Да-да! Ытшкисьö сэтчин видз вылат Миков Сеняыс, повзьöтöмыт сiйö. А менö он повзьöт.

— Мун, мун гортö, не места эстöн пиньгыны! — горöтчис Исай Сергеевич.

— Ме — мый, ме муна. Муна и висьтала быдöнлö: Исайыс честнöй морт, а Кузьмичыс — черань. Муна... О-о, да татчö тай эшö öтiк гöсь тэрмасьö, видзöт, кыдз люшкö, хе-хе... Сайöвтча, мед не повзьöтны сiйö.

И эз ешты саясьны сылöн юрыс, кыдз оградаын лёкгоршöн öдззис эрзыны пон, пурöмöн-пурис кинöскö, жольöтiс цепöн.

— Öдя! Öдя! Да тэ мый! Тэ мыля воротасö осьтöн колин? — рявкнитiс Кузьма Кузьмич и чеччöвтiс пороглань. Иньыс одзалiс сiйö, чывкнитiс посöдзö. Но сёр ни. Кинкö, понсö öлöмöн, кайис посöдзас, кышöтiс нинкöммезöн. Осьта ыбöсöт Исай Сергеевич казялiс шадра чужöма мортöс — Миков Сенялiсь иньсö.

— Тэ кытчö, кытчö? — горöтчис Кузьмич и старайтчис панöвтны Парасьсö. — Мун бöр, мун.

Но инька кутчисис сы киэз бердö, усис пидзöссэз вылö.

— Родимö-öй, эн брезгуйт, вот вайи... Кузьма Кузьмич, жалейт челядьöс, абу нiя виноватöсь. Эн штрафуйт! Да и ытшкисьны öнi некöр!

Кузьма Кузьмич тойыштiс сiйö, сэсся лэбтiс кулаксö да быд вынiсь öбыртiс иньыс моросö. Öдя чер-бар летитiс пельöсö, нюжалiс джоджас:

— А-а-а!

— Горöтлы эшö, сволочь! Кинлö ме баитi: эн колявлы воротасö осьтöн? Не тэныт баитi? — рявзiс жöникыс.

Исай Сергеевич чепöссис посöдзас, кутiс лесниксö моросöт:

— Бöбсялiн?

Öдя ойзiс и пильскис, жагöник чеччис джоджсис.

— Висьтала-а-а! Быдöс висьтала! — герьялiс сiя.

Кузьма Кузьмич эшö лэбтылiс кулаксö, но Исайлöн вына киэз тойыштiсö сiйö керкуас. И только сэк Öдя чеччöвтiс посöдзсис, перыта котöртiс öтöрö, ачыс сё горöтлiс деревняыс пасьта:

— Висьтала-а-а!

Кулавлытöдз повзьöм Парась уськöтiс кисис кöзича, жолькнитiс стекло, рез-паз жугалiс кытшöмкö посуда, и джодж кузя öдззис визывтны мыйкö гудыра. Исай Сергеевич только öнi вежöртiс, мыйлö талун ойнас Парасьыс лонтiс банясö: самогон керöма...

— Мыйлö тэ сiйö керин?

Парась лэбтiсис пидзöссэс вылiсь, койыштiс синнэзсис лöг бичиррез:

— Тiянлö, тiянлö кери! Юö, жоритö! А миянлö мый? Миянлö Сенякöт только вежтiсьны! Миянлö только ытшкисьны йöзыслö!

Керкуын мурзис Кузьма Кузьмич, шумöн ветлöтiс джодж кузя, сэсся шлёпкисис веськыта лабичö, киэзöн кутiс юрсö. Вежöртiс: мый кузя бы эз вöв гезыс, а эм и сылöн конец.

Керку дынö важын ни öксис народ, сулалiс шум. Исай Сергеевич петiс öтöрö, виноватöй синнэзöн, полöмöнмоз дзарнитiс йöзыс вылö, висьталiс:

— Адззат, мый шогмö? Кулак вылö инмимö. И веськыта кö шуны, — вор ворöс кутiс. Да, виноват ме, ёрттэз, лосьöс вийи...

Кинкö сулалö менам спина сайын и орöттöг шушкö пель одзам:

— Тырмас. Сувтöт этчö точка.

Сiйö, этö «кинкöсö», кывзiкö, ме сувтöтi ни точкасö. Но таво арнас подавöдитiссезлöн окружнöй совещаннё вылын ме видзчисьтöг пантаси Миколь Сенякöт. Медбöрья кадö сiя ёна вежсьöма: щеголяйтiс виль йöрнöсöн, синнэс югьялiсö гажöн и счастьеöн, нельки коккес веськытжыкöсь лоöмась.

Миколь Сеня кыдз вермис висьтасис меным сельскöй сход йылiсь, кöда вылын павкöма Исай Сергеевичлö сы понда, мыля сiя умöля интересуйтчис сельчанаыс оланöн, дугдывтöг бöбалiс пишальнас.

Дата добавления: 2015-11-16