МЕДБÖРЬЯ ЮÖРРЕЗ 4 страница

— Но народ веритiс сылö, колис председательöн. Морт сiя бытшöм сёжö, — юöртiс Сеня. — А Кузьмич... Кузьмичлö, мыся, ковсис мунны деревнясис. Вашöтiсö сiйö. Тырмас пö тэныт...

Эстöн Миколь Сеня паськыта шынньöвтiс, горöтчис ошшасьöмöн:

— А менам бöра виль часы эм... Вот! Талун начальство козьналiс. Бура пö уджалiн, новйы часы, оз пö туй сытöг пастухыслö...

ТУЛЫС ГОРАЛÖ

(ордч.: Оча морос)

Кöр сылас лым и Льöмва вылын кажöтöмöн пондöтчö потласьны йы, кöр локтасö чавканнэз да сьöдкайез и посёлок сайын, пемыт вöррезöн вевттьöм логгезын, нёштöм кыз голоссэзöн öдззасö быд асылö баксыны вöр пороззэз — корны дынаныс подругаэзнысö, — сэк и слепöй сорасьтöг висьталас, что локтiс тулыс. Льöмвинскöй вöррезö тулысыс локтö маласьöмöн, дзик полö падмыны мыррез бердö и усьны кыминь, локтö жагöника-жагöника. Луннас крышаэз да пу лыссэз вывсянь виялöны вотьваэз, «сотчö» лым, а ойнас пöльтыштас кöдзыт тöлок, и вотьваэз пöртчöны кузьмöса йыжоллезö, лымыс чорзьö сiдз, что чарöмыс вермас терпитны и вöлöс. Быдса месяц мукöд годö вермасьöны тулысыс да тöлыс öтамöдкöт и только апрель конецын ни лымыс сылö досповна, эшö сэк, кöр уль тöлок лун и ой пöльтö шоныт ладорсянь и мукöдпырся зэрö...

— Тулысыс миянö сувтöм вöлöн локтö, — шутитöны Льöмваын.

Но не пыр овлö сiдз. Таво эшö март пондöтчикö пондiс сылöтны, а апрель первöй луннэзö посёлокись лымыс гора шоррезöн быдöс визывтiс Льöмваö. Ва нöбöтiс сьöрас гырись чаггез, чегласьöм лыссэз да киськалöм турунчиррез. Только öтi-öтiлаын кольччисö йы коркаэз, и öнi няжöтiсö нiя кок увтын, кыдз поснитик стекло торрез. Льöмва сьöдöтiс и син одзын пöльтчис. Сiя ружтöмöн шагыралiс йысö, старайтчис чапкыны вывтсис. Кöть кин ни адззис, что не талун дак ашын сiя оссяс.

* * *

Льöмвинскöй лесопункт лöсьöтчис сплав кежö. Берег дорын, плотбищеын, мунiс дзирыт удж: рабочöйез бергöтлiсö слегаэз, нюжöтiсö ваыс дорöдз лёженнез, куталiсö öтамöд бердö скобаэзöн, медбы эз вешшö бокö, кöр ны кузя пондасö тарлавны вöр. Кузницаын талун дорисö медбöрья багоррез, йитiсö орласьöм трос. Штабеллез дынын камöтiсö черрез, кылiс горöн баитöм, мукöдпырся öзйылiс песня.

Асывнас дас час гöгöр гаражись петiс трелёвочнöй трактор и, быд кöртокнас гольöтöмöн, мунiс контора öшын увтöт штабеллезлань, кытöн сулалiсö вылын мачтаэз. Трактор сибöтчис öтiк мачта дынö, петитчис бöрöн. Öнi колiс нюжöтны кузь трос, кышавны сiйö сай берегас блок бердö.

— Матöжык лок, матöжык! — чирзiс парусинаöн вевттьöм дженытик курткаа, гöрд шарфа детина томыник трактористлö, кöда крутöя, почти öтiк местаын, бергöтiс тракторсö, но некыдз эз вермы вештыны мачтаыс дынöдз.— Кинлö ме баита — матöжык лок! Кынмин я мый я, адззан тросыс оз судз!

Тракторист сувтöтiс машинасö, ачыс мыччис кабинаись солидолöн ляксьöм чужöмсö и минута сьöрна лöгöн видзöтiс гöрд шарфаыс вылö. дзик эз вежöрт, мый сылö горöтлiсö. Эта бöрсянь зонка ехиднöя шынньöвтiс и вöлись дыша лэдзчис му вылö.

— Да но тэнö, арттöмöс! Тожö эд горöтлö, кыдз сера петух. Он адззы — мысок сэтöн, нильдалö тракторыс йы вылас, — шыасис сiя.

Эна кыввез бöрын тракторист нетшкöвтiс гöрд шарфаыс киись трос конецсö, кокнита кыскис тракторыс дынöдз, домалiс кытшöмкö мöдiк трос бердö и шуис кешитчöмöн:

— Проктöм курöг! Невна кыскыштны эн вермы. Этö тэныт не клубын пиньласьны.

Детиналö колiс бы лöгасьны, но сiя мышкыртiс юрсö и юалiс мирнöя:

— Мыля öтнат локтiн? Начальникыс куим машина кöсйис.

— Кöсйис да кöстiс. Горючöй абу. Сiдз вот.

Шум плотбищеын содiс. Трактор гургöмöн кыскис сьöкыт трос, дзуртiс мачта, сярöтiсö блоккез. Рабочöйез быглялiсö лым увтiсь петöм керрез, вешталiсö нiйö бокö, медбы эз мешайтчö тракторрезлö, кöр нiя пондасö лэдзны штабеллезiсь вöрсö. Гöрд шарфа детина жöдзис сэтöн жö, мукöдпырся вовлiс рабочöйез дынö, сеталiс приказаннёэз. Этö вöлi сплав сьöртi мастер Виктор Гыров, понпутша чужöма, вöснитик корпöса и кымöс вылö невна петöм синнэза морт. Сiя уджалiс татöн первöй год, вöлi неопытнöй, чувствуйтiс асьсö не аслас кучикын и, дугдывтöг нервничайттöн, часто горöтлiс весь, мыйсянь уна рабочöйез ештiсö ни лöгасьны, кыдз лöгасис и томыник трактористыс...

Кытöнкö ыпнитiс взрыв. Тыдалö, плотбищеысся невна увланьынжык подрывниккез кутчисисö поткöтлыны аммоналöн йы. Рабочöйез лэбтiсö юррезнысö и дзарнитiсö сэтчинлань, а Виктор Гыров дрöгнитiс, нельки осьтiс öмсö. Кынымкö морт серöмтчисö, осудитöмöн гогинялiсö юррезöн.

— Эн пов, не атомнöй бомба, — шыасис кинкö.

Виктор Гыров шы эз сет, жагöник вешшис ылöжык. Лун пондöтчис умöля. Зонка ештiс ни кывны неетша обиднöй кыввез, нёштöм смех. «И мыля менö оз любитö?» — думайтiс сiя.

Контора посöдзсянь шупыта лэдзчис и котöртiс штабеллез дынö бытшöм статя, кокнитик походкаа нывка. Зелёнöй дженытик юбкаа, чим гöрд кофтаа, сiя вачкисис тулыс вылö — сэтшöм жö мича, сэтшöм жö гажа. Нывка сувтiс джын туй вылас, нёджжöвтiс öтмöдöрö да горöтiс:

— Виктор! Виктор! Котöрт контораö, начальник корö!

— Сейчас, Лена,— шыасис паныт Гыров.

Лена топытжыка зэлöтiс пельпоннэз бердö чышьянсö, бергöтчис и шупыта мунiс бöр. Тулысся тöв орсiс сы кудриэзöн, павтыралiс нiйö. Вöлi кöдзыткодь, и Лена тэрмасис аслас пызан сайö, шонытiнö, чеччалiс веськыта вагöппез вевдöрöт. А Виктор, коккесö му бердöт кыскöмöн, жагöник мунiс берег пöлöн. Сiйö мучитiс вопрос — мыйлö бöра корис начальникыс, поди лöгасис? Мыйкö неприятнöй вöлi сы паськöмын и походкаын. Кузь мыгöра и винерик пельпоннэза, сiя мунiс пöлiнясьöмöн, кыдз тури, паськыт курткаыс öшалiс дзик майöг вылын, векнитик и дженытик кока штанi эшö öддьöнжыка нёштöмсьöтiс фигурасö. Кажитчö, татöн ли, вöрын уджавтöн, да эшö нятя тулысся кадö форситны, дак нет — Виктор кöмалöм кыз подошваэза туфлиэз и öнi полiс, мед не вадны нiйö — ылына ордйис вагöппесö да нятя местаэсö.

Гöрд шарф конеццесö куртка увтö сюйикö зонка жагöник кытшöвтiс кузь штабель и мечтайтöмöн дзарнитiс Леналань. Тöн, посёлковöй клубын танцуйттöн, Лена ласкова шыннялiс сылö, мыйкö шушкис пель одзас. А кин жö не рад адззывны Леналiсь, посёлковöй красавицалiсь, шынньöвсö? Викторлöн сьöлöмыс сылö öнi, пессьö особеннöя, кыдзкö öтдруг чöскыта и тревожнöя... Только öтiк тор беспокоитö зонкасö: тöн танцуйттöн Ленаыс мыйкö часто касьтывлiс Сергей Комоловöс. Неужели сё сiйö любитö? Этö сы бöрын, мый шогмис ны коласын? Да не жö! Гыров оз верит эталö. «Талун рытнас муна клубö и ог лэдз сiйö дынсим», — думайтö Гыров. Эта кадö чужöмыс казявтöг гöрдöтiс, понпутшшез öзйисö биöн и кыкнан рожабаныс, кымöсыс, вöснитик кузь нырыс вевттисисö öгралан точкаэзöн.

Лесопункт контораын, быд ыбöс сайын, мунiс, кылö, обычнöй конторскöй удж: шваткöтiсö счётыэз, арифмометррез, кинкö горöн баитiс телефонöт. Коридорын техничка Марфа тётка пукалiс öшын дынын и полöмöн дзарьялiс начальник кабинетлань. Кабинетас кинкö горöтлiс, видчис нёштöм кыввезöн и, кöр эта горöтлöмсянь пондывлiсö дрöжитны öшын стеклоэз, Марфа тётка лэбтывлiс веськыт кисö кымöс вылö и негорöн шушкис молитва:

— Господи, господи, христос сыкöт...

— Мый лоис, тётка Марфа? Кин вылын сiдз ыждалö? — юалiс Виктор, техничкаыс дынö сибöтчикö.

— Беда шогмис, беда, — повзьöм голосöн шыасис тётка Марфа и кымöссö пернапасалöм бöрын содтiс: — Трактор горючöйнас вöйöма...

Виктор Гыров и одзжык пыравлiс начальник кабинетö полöмöн, а талун некыдз эз решитчы кутчисьны ыбöс вугыс бердö. Тётка Марфалöн юöр сьöртi начальник вöлi кöинся лöгжык, и Виктор, кöда тöдiс ни эта мортлiсь крут характерсö, полiс сувтны сы синнэз одзö. Зонка пуксис техничкаыс бокö, веськыт коксö пуктiс шульга пидзöс вылö и пешалiс öмас папироса. Спичкаэз кыскикö öвтыштiс кинас: «Кöр корас, сэк вöлись и пыра».

— Кинöс нö сiдз видö? — юалiс сiя.

— Да кинöс жö видны, кыдз не асьсö? Ачыс эд виноват. Важын ни колiс тракторсö иньдыны, дак сё кыскис, сё вöр петкöтны старайтчис, а öнi курччалö бы гырдззасö, да кысь ваян? Клöбыснитчöм машинаыс Вильваас. Йыыс абу терпитöма да...

Эта вöлi былись беда. Лесопунктын мукöдыс неöтпырись баитлiсö, что нёштöм дело вермас петны, не иньдыны кö аскадö горючöйла трактор.

— Одз сылöтö, Макар Кузьмич, кыдз бы этö... не сёрмыны.

Но начальник — эшö не сiдз пöрись, но рушмöм ни чужöма и лысöй юра морт, — быд пырся дзарьялiс неболань и öмавлiс сэтшöммесö:

— Талун сылöтö, ашын мороз лоас. Эшö öшкалöн сюррес усяласö. Уджалыштам, ёрттэз, кыскалам вöрсö.

Дело сыын, что Льöмвинскöй лесопункт мартын öдва-öдва тыртiс план и сылö оз кöсйö премия. Макар Кузьмич сетiс аслыс чорыт кыв: мый бы эз ло, а получитны солиднöй премия апрельын. Но и эта месяцö вöрсö кыскалiсö неритмичнöя. Туйез тшыксисö одз, тракторрез буксуйтiсö, эз вермö вöрзьыны, кöр кышаласö лишньöй додьöн. Заптöм вöр пондiс ендыны тöвся делянкаэзö. Не примитны кö строгöй мераэз, премия бöра кывзас ылi начальник карман дынöт.

— Быдöс туяна тракторресö иньдö вöр кыскавны, быдöс! Вежöртiт? — горöтлiс Макар Кузьмич.

— А кыдз жö горючöйыс? Бырсьö эд...

— Ештам эшö. Кытчöдз эм — уджалö.

Но таво тулыс видзчисьны эз понды, шупыта пырис льöмвинскöй вöррезö, одзжык сылöтiс. Макар Кузьмич, может, первуись аслас векын панталiс сiйö гажтöма, гудыра сьöлöмöн. Горючöй тöдчöмöн бырсис, а сэтöн сибалö вöр кылöтан кад. Семьдесят тысяча кубометр куйлiс öнi Льöмва дорын. Если быглявны сiйö киэзöн, то ковсяс быдса месяц, а тулысся ванырыс мунö быдöссö кынымкö лун. И начальник, кöр думыш керис, что быдöс эта вöрыс вермас «косьмыны» берег вылын, иньдiс нефтебазаö медбур трактористöс — Петька Угринöс.

— Куим лун тэныт сета, — баитiс сылö начальник. — Мун веськыта, бур туйесö эн кошшы.

— Керам! — шуис тракторист и петiс туйö.

Быдöс расчёттэз сьöртi сiя должен вöлi локны эшö тöн рытнас, но Петька эз лок. Начальник ойбыт бергалiс бокись бок вылö, унаись петавлiс öтöрö и дзарьялiс пальниковскöй туйлань: оз я мыччись тракторыс? Но ыджыт дизельлöн шумыс некытöн эз кыв.

Одз асывнас Макар Кузьмич ветлiс заправкаö, аслас киэзöн пломбируйтiс медбöрья тыра бочка — НЗ, сэсся висьталiс диспетчерлö, медбы трелёвочнöй тракторрез эз петö талун гаражись. Только öтiкö и сетiс плотбищеö нюжлавны троссö. Кабинетас сiя локтiс мыдз и лöг, пуксис пызан сайö и эз ешты конецöдз думайтны гажтöм думаэсö, кыдз Петька Угрин пырис сы дынö косви ва, люммöм сина и косялöм фуфайкаа: зонка, öдва ештöм чеччöвтны кабинаись, кöр сылöн сьöкыт машина увтын лотшнитöм йыыс. Макар Кузьмич дзарнитiс сы вылö и баснитöг вежöртiс быдöс. Сiя сьöкыта шлёпкисис стул вылö, кыкнан кинас кутiс юрсö. Петька жö ляпкисис шоныт гор бокö. Сылöн кальскöтiсö пиннес, ачыс дрöжитiс и некыдз эз вермы шонавны. Зонка казялiс, кыдз начальниклöн перво смешнöя пöльтчисö рожабаннэс, синбугыллес паськалiсö, и кажитчö, öнi жö петасö орбитаэзiсь, чужöмыс кельдöтiс, тырппес вöснямисö и жмитчисö.

Макар Кузьмич не öтiк минута пукалiс шыасьтöг, сэсся перыта лэбтiс юрсö, дзик онöс вашöтöм могись трекнитiс сiйö и дзарнитiс Петькалань:

— Кытöн?

— Дак кытöн, Пальник увтас... Только ештi лэдзчыны йыыс вылö, сэтöн и сунгисис. Кык дизель öнi ковсясö, медбы лэбтыны...

— Сiдз! А горючöйыс?

— Дзонь. Додьыс лöсялiс, тыдалö, плашкот вылö, пуксис не пыдына. Макар Кузьмич пондiс ветлöтны джодж кузя пельöсiсь пельöсöдз, вöлi бодрöйжык ни, кöть шульга пельыс, кöдö война вылын шöри поткöтöма осколок, сё эшö смешнöя летъялiс.

— Шогмас жö, а? — баитiс сiя. — Кыт вöснит, сэт и орö. Кин думайтiс, что эта одза пондас сылöтны! Но да ладно! Повзин поди?

Петька öвтыштiс кинас:

— Некöр вöлi. Öтiк секундаö шогмис.

— Бур, что эн вöй. Вермин бы и менö сьöрат кыскыны... Мун, шоччись гортат час мымда, веж паськöмтö. А сэсся пуксьы вöв вылö — босьт менчим жеребецсö, сiя чож — и гöнит Кондовникöт леспромхозö. Ылынöв сэтчинöт, но зато пос, — рискуйтны оз ков. Висьтав леспромхозас, мый шогмис, и кор отсöт. Сiдз?

— Сiдз, гöнита öнi жö!

Петька петiс кабинетiсь, а начальник бöра öдззис ветлöтны пельöссянь пельöсö. Колiс примитны срочнöй мераэз, мый бы эз вöв, а судзöтны горючöй. «Косьтыны» берег вылö неöтiк дас тысяча кубометр вöр — эта вöлi бы адззывлытöм скандал. Но кысь öнi ваян горючöйсö? Мунны Пальникö машинаöн — нем и думайтны: сiя пуксяс первöй жö логö. Иньдыны подводаэз? Конечно, позис бы иньдыны, да мый доддялан? Кадыс как раз сэтшöм, кöр оз туй мунны не додьöн не телегаöн.

— Уф-ф... — шлёпкисис аслас стул вылö Макар Кузьмич и гымнитiс пызан кузя. — Дур-рак! Ах, пöрись дурак! Мый думайтiн одзжык? Кин вылö надейтчин?

— Господи, господи... Кöть бы нем эз ло сыкöт, — кеймисьö эта кадö тётка Марфа. — Беда...

Макар Кузьмич шумитöв-керис кабинетас, пондылiс кытчöкö звонитны, но эз вермы. И сэк чорыта решитiс: «Иньда подводаэз! Да! Кык телега... Ямщиккезöн — комсомолеццезöс. Только нiйö. Медперво, конечно, Комоловöс. Сергей Комолов мöйму пожар коста биись кыскис кагаöс, сы вылö позьö надейтчыны. А мöдсö? Кинöс мöдсö?»

Дзирыт вöлi кадыс, öддьöн дзирыт. Уна бригадаэз мунiсö ни пикеттэзö лöсьöтны обоновка, мастерскöй участоккез сё эшö заптiсö вöр, берег дорын колiс сувтöтны эшö кынымкö мачта, лöсьöтчыны скатка кежö. Быдлаö колiс отир. Кинöс öнi, луннас, иньдан опаснöй туйö, кöр посёлокын только инькаэз да челядь. И вдруг начальниклö усис тöдвылас Виктор Гыров. Только сiйö, сэсся некинöс. Кöть и шуöны зонкатö кын туриöн, но весь — детина здоровöй и том, сэтчö жö активист, собраннёэз вылын пыр активнöя выступайтö. Баитны кö сы жаг йылiсь, то эта пожалуй буржык: Серёжка öддьöнöв дзирыт, часто рискуйтö, а эта, Гыровыс, сайкыт, вермас панöвтны мöдсö, оз лэдз рискуйтны оланнас... «Эх, аслым бы мунны, — думайтiс начальник, — да кытчö ни. Сiйö и видзöт, больницаö вода, быдлаöт висьö...»

— Лена! — горöтiс Макар Кузьмич и кынымиськö сöтiс стена кузя. — Кор öнi жö Гыровöс, вон берег дорас сiя!

Мöдiк стенаö сöтöм бöрын кабинетö тöвчикöн пырис не öддьöн ни том инька, кöдö Макар Кузьмич сэк жö иньдiс гаражö — сэтчин Сергей Комолов ремонтируйтiс талун трелёвочнöй трактор.

— Кор сiйö татчö.

Чулалiс неетша кадыс, тётка Марфа пуктiс не öтiк пернапас, а Виктор Гыров сё эз мыччись. «Кынмис я мый я?» — думыш керис начальник и осьтiс коридорö ыбöссö. Виктор, бытьтö нем эз и вöв, пукалiс техничка бокын, куритiс папироса.

— Не тэнö разь корисö? Мыля он пыр?

Гыров кыскис юрсö пельпоннэзö, дзик полiс, что сы кузя сöтасö кулакöн, и саясис ыбöс сайö.

— Öнi жö пукты телегаö куим бочка, доддяв пара вöв и гöнит Пальникö. Горючöй сэтчин. Вежöртiн?

— Но ме жö...

— Некытшöм «но». Мунан Комоловкöт. И вежöрт — государственнöй важностя дело вылö иньда!

Виктор петiс.

«Государственнöй важностя дело! Кыввес кытшöмöсь!» — думайтiс аслас пызан сайын Лена Базукова и видзöтiс öтöрö: сэтчин Виктор Гыров ляшмасьöмöн шагнялiс дворлань, юрсö öшöтöма, кыдз умöлик вöв, öдва вöрö. «Кытшöм сiя узьмöм, дзик курöг!» — дивуйтчис Лена. Нывкалö вöлi гажтöм, сьöлöм асывсянь ни места оз адззы. Лесопункт сюрис критическöй положеннёö, а сыкöт, комсомольскöй секретарькöт, начальник и баитны эз понды. Вон ыстö сьöкыт туйö Гыровöс, Серёжкаöс ыстö. Нылö бур — зонкаэз. А Ленаöс пукöтöны кабинетын, некытчö оз иньдö. Чужны бы тожö зонкаöн, лоны Сергей кодьöн — вынаöн, смелöйöн, невна грубöйöн...

И вдруг Лена чеччöвтiс местаись, чепöссис начальник кабинетö,

— Макар Кузьмич! — чорыта шуис сiя. — Иньдö менö горючöйысла. Меным колö... Но, тöдат... мунны колö!

Начальник öвтыштiс кинас, öмалiс лöга:

— Не кад öнi шутитны, Лена. Мун уджав. Кер, мый тшöктiсö. Вежöртас разь Макар Кузьмичыс сiйö, мый вöлi Лена сьöлöмын?

Кысь, поди, сымдасö... Чуть ли не сыркьявтöн нывка пырис аслас кабинетö, пуксис пызан сайö. И эшö гажтöмжык лоис...

Кынымкö дас минута бöртi сiя адззылiс, кыдз кык подвода, кын муыс кузя колесоэзöн ёркйöмöн, мунiсö Пальниклань.

Медбы Льöмвасянь сюрны Пальникö, перво колö вит верста мымда мунны Льöмва ю пöлöн, вуджны пыдын кырас, сэсся круто кежны шульгалань и вöлись веськыта ни гöнитны тшöк кöзъяинöт.

Туй эстi вöлi умöль и сьöкыт. Канаваэзын доррезви сулалiс тулысся гудыра ва, пыдын ныроккезын пукалiс ырöш гуща кодь кизерик нять, мукöдлаын, кытчö тöвнас лэбтывлöма морт сувда столаэз, куйлiс öнi кыз йы, а лажмыт местаэзын, паськыт логгезын да нюррезын сё эшö вöлi шыдöс кодь чорыт лым. Лым увтын больгисö шороккез, мыйкö кышöтiс, и вöввез тальччалiсö полöмöн — фырскайтiсö и тревожнöя орсiсö пеллезöн.

Ныроккеза и нятя местаэзын телегаэз чеччалiсö и ёркйисö сiдз, что Виктор Гыров öдва вермис видзны вöснитик голя вылас кузьмöса юрсö. Настроеннё вöлi умöль. Лесотехникумын велöтчикö зонка некöр эз думайт, что ковсяс кöркö пуксьыны телегаö ямщик туйö и мунны кытчöкö несчастнöй горючöйла. «Кинкö вöйöтiс тракторсö, а меным колö маитчыны», — думайтiс сiя. Охота вöлi кинлöкö норасьны, мыля начальникыс думайттöг иньдiс сiйö сьöкыт туйö, да кинлö эстöн норасян? Сергей Комолов кыдз пуксис телегаас, сiдз и ньылыштiс кывсö, эз на горöтчы нем. Вон öвтö сiя коккезнас, думайтö мыйкö, ачыс кöин кодь лöг.

Гыров, конечно жö, эз тöд, что Сергей Комолов талун умöля чулöтiс ойсö: онмöссис только югдандорас, но и сэк шоччисьны эз удайтчы — öдва кунис синнэсö, кыдз вöтасис Лена Базуковаöс. Ятнöя, öддьöн бура адззылiс, кыдз клубись петöм бöрын нывка баитiс бытьтö сыкöт, Сергейкöт, сэсся мунiс пельöс сайö и давай окасьны Гыровкöт.

Сергейлö только неважын тырис двадцать год. Льöмваö тулыслiсь локтöмсö сiя казялiс таво быдöнся одзжык. Эшö февральын зонка кылiс, кыдз сьöлöмас чавкнитiс öддьöн дзирыт шондi, югдöтiс сэтчинiсь быдöс пельöсоккез и том жилаэзöт öдззис визывтны, конечно жö, не тулысся ва, а сэтшöм дзирыт вир, кытшöм некöр одзжык эз вовлы. Сергей эз и казяв, кыдз сы моросö пырис Лена Базукова. Öнi кöть кытчö воштiсь: не уджавны, не шоччисьны. Мунас Сергей делянкаö трелюйтны вöр, пуксяс штурвал сайö, а юрö пырö ни Лена. Зонка старайтчö думайтны вöр йылiсь, кык норма сетöм йылiсь, но быдöс весь. Ох, не етша ни сiя жельдiс вöрас мырресö аслас тракторöн — Лена йылiсь думайттöн оз и казяв, кыдз каяс кокора вылö... Невна вунöтчыштас и бöра вазьöм кабина стекло пыр мыччисьö Леналöн чужöмыс, чужö дзик воздухись и ваксьö-сералö тракторист вылын!

Сергей вöлi öддьöн бытшöм морт. Посёлокын сiйö том и пöрись тöдiсö кыдз медбур трелёвщикöс. Медбöрья годдэзö эз на вöв сэтшöм случай, кöр сiя эз тырт бы лунся норма. Частожык вöвлi сiдз, что сiя луннас сетлiс кык нормаöн. Знатнöй механизаторлöн портрет öшалiс Доска почёта вылын, сы йылiсь гижисö газетаэзö.

А кöр тöдсасис Ленакöт, зонка уджалiс эшö буржыка. Мöдiс гленитчыны аслас уджöн сьöлöмшöрыслö. И гленитчис. Лена частожык пондiс вовлыны делянкаö, быд пырся сувтчывлiс эстакада дынö и видзöтлiс, кыдз уджалöны Сергей да Иван Истомин. Клубын кынымкö кино нiя видзöтiсö ни ордчöн пукалiкö, и не сэтшöм морт вöлi Комолов, медбы не лысьтны кольлавны Ленаöс гортöдз. Льöмваын паськалiсö юöррез, что Лена да Сергей дружитöны. А кин жö вермас висьтавны, что тшыныс овлö битöг? Вöлi вежöртана, что май гöгöрас лöсялас свадьба.

Но не веськытöсь любитöмыслöн туйес. Шогмис сэтшöм дело, кöда йылiсь буржык бы вöлi не казьмöтлыны: öтiк стыд...

Öтпыр комсомольскöй собраннё бöрын льöмвинскöй молодёжь решитiс танцуйтыштны. Клубын орсiс радиола. Плавнöя да ритмичнöя бергалiсö кругын параэз. Радиола дугдiс орсны. Недыр мыйись кинкö горöн висьталiс: «Дамскöй вальс». Сергей одзжык некöр эз танцуйтлы, эз и думайтлы нельки, и öнi пукалiс пельöсын, гусьöник следитiс, кин дынö локтас Лена... А Лена лöсьöтiс зеркало одзын кудриэсö, шынньöвтiс ачыс аслыс и иньдöтчис Комоловлань. Кокнитик платье топа пукалiс сы вылын, коккезас шваткöтiсö вылын каблука туфлиэз, синнэс югьялiсö счастливöя и гажöн.

— Мунам? — шуис сiя Сергейлö.

— Танцуйтны?

Сергейлöн дзик усьыштiс сьöлöмыс, рожабаннэс гöрдöтiсö. Мый керны? Не висьтавны жö, что танцуйтны оз куж. Эх, мый лоас, сiя и ло! Сергей решительнöя пуктiс шульга кисö Леналöн небыт пельпон вылö, петiсö параэз коласö. Лена, конечно, первöй жö кругын казялiс, что кавалерыс бергалö, кыдз трактор, умöля кывзö музыкасö. Но сё кыскис и кыскис одзлань. И вдруг бергалiкас Лена чирöстiс лёкгоршöн, веськыт коксö кöстiс и легöтiс сiйöн, чужöмыс чочкоммис, кыдз бумага. Музыка сразу жö лöнис, зонкаэз шумöн локтiсö Лена дынö, отсалiсö пуксьыны стул вылö, а Виктор Гыров горöтлiс:

— Позор! Комсомолец хулиганитö! Коксö нывкаыслiсь тальöма! Колö обсудитны сiйö собраннё вылын!

― Сергей этö эз ни кыв. Сiя оз и тöд, кыдз петiс клубись, кыдз котöртiс посёлок улица шöрöт и дзик кыз онiсь саймис Иван Истомин керку дынын. Тöдiс зонкаыс, что шадра чужöма мортлöн пыр запасын сулалö тыра фляжка. Мый вöлi Истомин ордiсь петöм бöрын, Сергей бöра жö оз тöд. Только ашыння рытас ни тракторист Петька Угрин юöртiс, что адззöма сiя Комоловсö клуб дынiсь, лым столаись да кыскöма гортас, кыдз упадьöс.

Вот и быдöс история. Комолов, конечно, юны сэсся эз понды, но стыд сотiс мороссö и немöн — не сьöкыт уджöн, не ойбыттэзöн öтöрöт ветлöтöмöн — эз вермы бурöтны асьсö. Кык неделя ни чулалiс сэксянь, а Сергей эз на пантасьлы Ленакöт, нельки эз и тöд, мый нывкаыс думайтiс сы йылiсь. Тöн пыралiс клубö, но эшö порогсянь казялiс, что Лена танцуйтö Гыровкöт, ласкова шыннялö сылö, баитö гусьöник... Сергей, кыдз кöин, чеччöвтiс бöр öтöрö, мöдiс кежавны бöра Истомин ордö, но ладно — мöдыт эз лöсяв гортас.

«Интересно, мый нiя баитiсö, мый сiдз шыннялiс Ленаыс?» — думайтö талун Сергей и тэрмöтö вöввесö. Коренникыс, кыз коккеза и шыгыра спинаа битюг, öдва вöрö. Сергей повзьöтлö сiйö плетьöн, трекöтö вожжи.

Льöмва дынiсь кырассö вуджöм бöрын подводаэз пырисö кöзъяинö. Эстöн туй вылас куйлiс эшö пыдынкодь лым, только мукöдлаын мыччисьöма кын муыс. Телега колесоэз нилисö лымсö, вöйлiсö му бердöдз, и ны следдэзö сразу жö йиджис ва. Туй дорас, паськыт лыссэза кöззэз увтын, сiдзжö сулалiс сöнöга ва, вöрас кöвьясис кокнитик туман. Мукöдлаын мыччисьöмась ни векнитик кöчкаэз, и ны вылын пежьялiс зэррезöн миссьöтöм пуягöд кор, веж видзисö первöй лымдорчачаэз.

Сергей дзарьялiс Гыровлань, старайтчис вежöртны сы чужöм сьöртi, мый йылiсь нiя баитiсö тöн Ленакöт, но сылöн понпутша чужöмыс вöлi кыдз нятьын тальöм бумага — нем йылiсь эз баит. Комолов нет-нет да и шынньöвтас ехиднöя, гусьöн сьöвзяс канава сайöдз. Öддьöн интереснöй вöлi Гыровыс, совсем кыдз кульöм ур. Вон пукалö сiя телегаын, гегдö: киэсö жмитöма пидзöссэз коласö, горбыльтчöм вопросительнöй знак моз, вирскö ульсалöм нырнас. «И эттшöмыскöт Лена танцуйтö клубын? Тьфу!»

Вит верстася унажык ни мунiсö нiя Пальниклань, а некöда эшö öтiк кыв эз горöтчö. Но вот Гыровлöн досповна бырис мылаыс мунны чöлöмöн, öдззис горöтлыны нюжвыла голосöн:

Дата добавления: 2015-11-16