МЕДБÖРЬЯ ЮÖРРЕЗ 5 страница

— Кывзы, Сергей, кыдз тэ думайтан, сетас миянлö начальникыс премия, если ваям горючöйсö?

— Этö кытшöм заслугаэз понда?

— Кыдз кытшöм заслугаэз понда? Эттшöм сьöкыт туйö иньдiс, государственнöй важностя дело, шуö.

«Не быдöс я мый я сы юрын?» — думайтыштiс Сергей, но висьталiс серьёзнöя:

— Ежели сiдз, то, пожалуй, сетас. Мый сылö деньгасö жалейтны, государственнöй эд.

Медбöрья кыввесö сiя горöтчис совсем ни кешитчöмöн, яд сорöн, но

Гыров согласитчис добродушнöя:

— Конечно, государственнöй... Вот и ме сiдз думайта...

«Эх, локны бы сы дынö да öбыртны юр кузяс: эн лёб, мый оз ков, — лöгалö Сергей. — Пелитчö, куштöм рака, Лена дынö, бöбöтлö фокстроттэзöн. Сёжö интересно, мый нiя лёбисö тöн? Может, сералiсö ме вылын?»

Медбы чинтны лöгсö, Сергей трекнитiс вожжи, сöтiс коренниксö плетьöн.

— Но, но, вöрöт коккетö, дышкучик!

Погоддя син одзын пондiс тшыксьыны. Не весь, тыдалö, баитöны, что тулысся лунö сiя сизимись вежсьывлö. Асывнас югьялiс шондi, гажöтiс отирсö, а öнi сьöкыт кымöррез уйöны чуть не кöз йыввез бердöт. Воздух тырис ва бусöн, вот-вот öдззас зэрны. Неылын вöрас лотшкис-чегис сiсь пу, шумöн усис му вылö — сылöма, тыдалö, кынмалöм гыркыс, эз ни вермы öшшыны кок йылас. Понуллез сайын нёштöм голосöн мукнитiс лось, дзик сiмöм трубаö пöльыштiс — мм-б-у! Тöвнас лось пороззэз олöны торйöн, а öнi кошшöны подругаэзнысö, баксöны вöрас...

— Эй, тэ... Гыров! — шыасис Комолов. — Интересно меным тöдны, мый тi Ленаыскöт тöн лёбит? Мыйкö шыннялiс тай сiя... Гыров дрöгнитiс, пуксис телегаас веськытжыка.

— Кытшöм сэтшöм интерес лоис? Он я думайт бöра сы бердö кутчисьны? Тэныт, трактористлö, колiс бы мöдiк йылiсь думайтны, Ленаыс не пара, батя,— сiя интеллигентнöй... А тэ танц...

— Мый?! Да тэ кин йылiсь сiдз баитан?! — лосьыс моз жö мукöстiс Сергей не аслас голосöн и сувтöтiс вöввесö. Кыкись и ковсис только чеччöвтны, медбы локны Гыров дынöдз.

— Тэ мый, а? — кватитiс Викторöс моросöт. Синнэс тырисö вирöн, тырппес дрöжитiсö, а пидзыртöм кулакыс ачыс лэбис Гыровыс юр вевдöрö. И кин тöдö, мый бы лоис, если эта кулакыс павкис сы юр бердö, но неылын бöра мукнитiс лосьыс, паныт сылö шыасис мöдiк и чожа пондiс кывны, кыдз лöг пороззэз öдззисö пичöтны öтамöдöс. Сергей кулаксö жагöник бöр лэдзис.

«Эх, зверрез, дак зверрез и эмöсь. И ми тожö...» — сайкалiс Сергей и дзарнитiс вöрас. Совсем матын, паськыт лог пыдöсын, тышкасисö лоссез. Нiя вылына ордчывлiсö, сувтлiсö бöрись коккез вылö, муксiсö, зурасисö. Сергей сюйыштiс öмас куим чунь и шутньöвтiс разбойник моз, сэсся босьтiс бедь и давай клёнöтны пу бердö. Лоссез ордчалöмöн сьöрсьöн-бöрсьöн пырисö чашьяö.

— Адззылiн, мый шогмö? — юалiс сiя Гыровлiсь, кöда дрöжитiс быдöс вывтырнас. — Да дугды тэ, эн пов! Ме не пороз, ог понды тышкасьны. Только висьтав морт моз, мый тöн баитiт?

— Дак... баитiмö тай, — мыкталiс повзьöм детина. — Ме юалi, кужö ли сiя «рокн-ролл» танцуйтны...

— Но и мый?

— Ог пö.

— Сiйöн и шыннялiс?

— Сiйöн.

— Уф-ф! — ловзисис Сергей и колис Гыровöс. Вежöртiс сiя: эта мортлöн ылöстöм вопрос вылö любöй нывка шынньöвтiс бы.

Сергей добрöйжыка ни видзöтiс Гыровлань и пуксис телегаö. И бöра кынымкö верста мунiсö чöлöмöн, только мукöдпырся то öтыс, то мöдыс горöтлiсö вöввез вылö, шутнялiсö. Вöрын эшö усисö кынымкö сiсьмöм пу, öтiк пöрис совсем матын, и Гыров дрöгнитiс. «Вот ляпкöтас эшö, — думыш керис сiя и сразу жö вашöтiс этö думасö: — Тьфу, мыля ляпкöтас и непременно менö? Вон Сергей одзас мунö. Пöрны дак пöрас перво сы вылö», Но настроеннё сёровно вöлi умöль.

Öтiк векнитик лог вуджтöн нiя вамисö лым сора ваын. Медбы не кынмыны, Сергей джын верста мымда мунiс подöн, шоналiс. Гыров горöтлiс эта коста:

— Нем миян оз пет! Лучше бертам бöр!

— Горючöйтöг? Да тэ мый! А премиясö кин получитас?

— Сибдам эшö кытшöм-нибудь логö.

— Вöввезным вынаöсь, кыскасö.

Гыров эшö мыйкö мöдiс горöтчыны, но эта кадö вöрас вдруг пондiс горавны песня, и детина осьтiс öмсö. Кинкö нылö паныт локтiс Пальниксянь и сьылiс, чанöтiс вöрсö:

Пельминборö, Пельминборö,

Голубöй Весляна ю дорö как раз,—

Менö корö, менö корö,

Пым сьöлöмö кыскö каждöй час.

Песня вöлi бодрöй проглаза и гора, кыдз тавося тулысыс, и сьылiс сiйö приятнöй женскöй голос ыджыт чувствоöн и душевнöя. Позис вежöртны, что сочинитiс песнясö ачыс сьылiсьыс, сочинитiс аслас любитöм йылiсь, аслас милöй йылiсь. Голосыс сьöртi Сергей тöдiс, что этö Вера сьылö, Пальниковскöй мöсвöдитан фермаöн заведующöй.

Чожа чукыль сайсянь мыччисис кокнитик дортöм розвальö доддялöм вöв, сы вылын, коккесö öтiк ладорö öшöтöмöн, пукалiс югыт чужöма, кузь голубöй плаща нывка. Лесопунктлiсь подводаэсö казялöм бöрын сiя джын кыв вылын орöтiс песнясö, перыта лöсьöтiс гöрд чышьянсö и сюйис сы увтö кымöс вывсис лэдзчисьöм кудриэсö, ачыс шынньöвтiс.

— Здравствуй, Серёжа! — гажöн шыасис сiя.

— Здравствуй, Вера! Кытчö нö сiдз?

— Йöв тiян детсадö кыска. — И гогиньыштiс юрнас Гыровлö: здорово пö и тэ. — Гажтöм вöрас лоис и öдззи сьывны.

— Бура сьылан. Дед Игнат гортын?

— Гортын. Чери кыйö. Вон иньдiс тётка Марфалö. Нöбöт, шуö, кöч нянь. А тi не горючöйла ли?

— Мыйнö.

Вера дугдiс шыннявны, дзик повзьыштiс.

— Ой, Серёжа, Серёжа! Весь эд мунат. Эшö асывнас Вильваыс вöрзис, оз туй öнi вуджны. Вон и Петька Угрин паныт шедiс, мöдö Кондовникöт леспромхозас мунны.

Сергей öшöтiс юрсö. Быд торсö сiя видзчисис, только не этö. Вöрзис кö Вильва, то он ни сэк сiйö вудж, а тракторыс вöйöма сай берегас. Лесопунктiсь вöрзикö Сергейлöн вöлi ни юрас план: качайтны горючöйсö бочкаэзö и быглявны нiйö йыыс вылöт, а öнi мый керны?

— Баитi ме тэныт, бергöтчам бöр, дак эн кывзы, — шыасис Гыров. Сергей эз и дзарнит сыланьö, юрас ветлiсö виль думаэз. Конечно, бертны гортö эшö не сёр, да кытшöм синнэзöн пантасян начальникыскöт?

— Вермам ли шедны фермааныт? — юалiс сiя Вералiсь.

— Ме тай локтi. Только Шагыра логö чуть эг пöр: умöль сэтi. Ме бы тiян местын, конечно, бертi — од вермö öнi босьтны горючöйсö.

— Не, Вера, оз туй простоöн локны. Тракторрез сулалöны. Мунам, Гыров, — горöтчис Сергей и трекнитiс вожжи.

Гыров бобгис мыйкö ныр увтас, но паныт шы эз лысьт сетны. Да и кытшöм толк? Сергей сёровно бы эз кывзы сiйö. Вон тэрмöтö сiя вöввесö, чуть ли не рысьöн гöнитö, дзик тёща ордö тэрмасьö блиннэз сёйны.

Шагыра лог дынö сибалiкö, медбы не вадiсьны, Сергей Вераыс моз жö пуксис вöв вылö, кутчисис повод бердö. Гыров пондылiс жö вöлi кайны, но кокыс нильдiс оглобля вывсянь и, кыдз грузчиклöн пельпон вылiсь мезмöм мешöк, шлёпкисис канаваö, только ва öтмöдöрö резсис. Сергейлö ковсис лэдзчыны бöр, кутны Гыровöс куртка воротникöт и, кыдз кöтöтöм курöгöс, кыскыны канавасис.

— Гöжин я мый я, он вермы вöв вылас пуксьыны?

— Ог сэсся мун некытчö, — чуть ли не горзöмöн баитiс Гыров. — Здоровьеö менам не казённöй, донажык кытшöмкö горючöйся. Тьфу, быдöс вами, натьтö, шогавны понда...

— Чожа локтам фермаöдз, шонтiсям. Дед Игнат чериöн вердас. Интереснöй сiя морт. Быдпырся, кöр леспромхозö муна, ме кежавла сы дынö, — спокойнöя баитiс Сергей и старайтчис бурöтны Гыровсö. Мöдыс, паськöмсö пыркöтiкö, эшö одззася горöнжык вирскис нырнас и бобгис:

— Оз ков меным некытшöм чери. И тэныт ог советуйт мунны, эшö вöян кытчöкö и вöввесö вöйöтан...

— Стыдитчы! Вон нывка морт мунö да песняэз сьылö, а тэ — зонка морт — ныртö öшöтiн.

― Ог, мыся, мун! Ме мастер, а не горючöй кыскалiсь...

— Но и мун вакрамеш, если тэ мастер, — лöгасис Сергей. — Сёровно толкыс тэсянь етша. Только бочкаэтö тарлав менам телегаö, может, пригодитчасö.

— Бочкаэз — пожалуйста. Ме не ответчик, если вöйöтан. Сiдз и начальниклö висьтала.

Гыров быглялiс бочкаэсö, кысь только и прокыс мыччисис, уджалiс перыта. Сергей кваркыш эз ешты керны, кыдз Виктор бергöтiс вöввесö, пуксис телегаö и сöтiс коренникыслö. «Вот паразит, мунiс эд. Мый öнi керны?» — думайтiс зонка и видзöтiс, кыдз Гыровыс саясис чукыль сайö. И только дыр мыйись Комолов киэсö лöсьöтiс рупор моз, моросö кыскис унажык воздух, горöтiс мымда вын:

— Э-эй! Кывзы тэ, мастер! Некытшöм тэ не мастер, а шкура! Шкура, мыся!

Горöтiс и дзик кокнитжык лоис.

Лесотехникум кончитöм бöрын Лена Базукова мымдакö уджалiс леспромхозiсь главнöй механик отделын. Быдса луннэзöн нывка только сiйö и керис, что гижис нямöтся кузьжык заявкаэз, отсалiс механиклö составляйтны планнэз, быдкодь графиккез. Удж вöлi не сы сьöртi, сьöлöм некöр эз и бурмывлы.

— Мыйлö тi менö эстöн видзат? Эта понда разь нёль годсö техникумас велöтчи? — пизис нывка, кöр главнöй механик пуктывлiс сы одзö виль заявка и тшöктывлiс сiйö гижны мöдпöв.

— Терпитышт, Лена, — баитiс механик. — Вот пондасö ковсьыны мастеррез — иньдам лесопунктö.

Но кыдзкö шогмывлiс сiдз, что мастеррез некытчö эзö ковсьö. Быд лесопунктын нiя тырмисö. Лена сё пукалiс и пукалiс аслас пызан сайын, писарскöй почеркöн гижис бумагаэз. И кин тöдö, мый дырна бы ковсис пукавны татöн, если бы эз шогмы öтiк случай: леспромхозö локтiс Виктор Гыров. Сiя тожö кончитöма лесотехникум и öнi ошшасьöмöн мыччалiс начальстволö диплом. И на тэныт — сiя жö лунö получитiс мастерлiсь должность, Льöмвинскöй лесопунктлö важын ни ковсьöма специалист. Леналöн вирöн пизис сьöлöмыс, лöгувьяс гижис заявленнё, кытöн корис сэк жö иньдыны бöр комбинатö нето сетны уджсö специальность сьöртi.

— Вежöртi ме тiянöс, — баитiс сiя лöгувьяс мыкталöмöн. — Тiянлö колöны зонкаэз, мужиккез, а нывкалö öтiк туй — пукавны контораын. Ме разь виноват, что чужи нывкаöн?

Леспромхозiсь директор видзöтiс-керис Лена чужöмö, невна думайтыштiс синнэсö куньöмöн, сэсся босьтiс гöрд карандаш и гижис заявленнё вылас: «Иньдыны Льöмвинскöй лесопунктö». Сэтчин ковсьöмась не öтiк мастер! Виктор Гыров и Лена Базукова пуксисö ордчöн попутнöй машина вылö и мунiсö Льöмваö. Нывка вöлi сэтшöм рад, что эз и ветлы аслас квартираö, решитiс чемодансö босьтны кöр-нибудь сёрöнжык.

— Спасибо тэныт, что локтiн, — шыннялiс сiя Гыровлö. — Ковсис бы меным пöрисьмытöдз пукавны писарьöн.

Гыровлöн вöрзис сьöлöмыс. Лесотехникумын нывкаэз сiйö эзö любитö, а татöн видзöт мый шогмö! — эз на ешты локны, а пукалö ни ордчöн нывкакöт, да кытшöм нывкакöт — светсö гöгöрт, а сэтшöмсö он пантав! Если и одзлань сiдз пондас делоыс мунны, Гыров лоас медсчастливöй мортöн, эта боевöй и басöк мастеркöт позяс бытшöма овны.

Лесопунктын нiйö панталiс Макар Кузьмич.

— Да мый нiя, ылöстöмсялiсö я мый я, — паськöтiс сiя киэсö. — Ме жö мастеррезöс кори!

— Ме мастер и эм, — шыасис Лена. — Вот приказ. Может, диплом видзöтат?

Макар Кузьмич бытьтö абу и кывлöм некöр, что мастеррезнас уджалöны и нывкаэз, дыр эз вермы нем горöтчыны паныт. Сёжö босьтiс Леналiсь дипломсö, бергöтлöв-керис сiдз и этадз, нельки öшын дынö вайöтлiс, дзик мöдiс казявны, абу я сiя фальшивöй.

— Пырав ашын, — шуис сiя, Леналö дипломсö бöр сетiкö.

А Гыровкöт уна и баитны эз понды — иньдiс руководитны бригадаöн, кöда берег дорö петкöтöм пуэсö орлалiс сортименттэз вылö и штабелюйтiс нiйö. Лена перво öддьöн лöгасис, сiйö маитiс öбида, и готов вöлi горзыны, но кутiс асьсö киö и чорыта решитiс вайöтны пондöтöм делосö конецöдз. «Не ме лоа, если ог получит уджсö специальность сьöртi», — думайтiс сiя.

Ашынас Макар Кузьмич быднёж кулитiс вöрын уджалöмсö, шуис сiйö лешаччöйöн, пондывлiс, кыдз умöлик сваха, ылöтны Ленаöс, бытьтö мастеррес кытчöдз озö ковсьö, но мöдыт и кывзыны эз понды.

— Леспромхозын висьталiсö, что ковсьöны. Ачыс директорыс баитiс.

— Но тэ жö нывка, петас я мыйкö? — мургис начальник.

— Тi менö оскорбляйтат. А эшö пöрись морт, — отвечайтiс Лена. Начальниклöн смешнöя вöрис дойдöм шульга пельыс, синнэс мигайтiсö.

— Но и бес тэкöт. Примита нормировщицаöн, а сыбöрын, может, и участок сета, — öвтыштiс сiя кинас да чепöльтiс öшöтчöм пельсö.

Лена споритны эз понды, казялiс, что начальник öддьöн полö нывкаэзiсь и сыкöт унасö он баит. Сiя согласитчис лоны технормировщицаöн — эта сёжö не писарь, матынжык, сулалö производствоыс дынын.

Лесопунктiсь техничка тётка Марфа сувтöтiс аслас квартираö эшö öтiк кровать, сайöвтiс сiйö ыджыт цветтэза ситецись вурöм занавесöн и шуис Леналö:

— Вот и ладно, мама-ныла моз пондам овны.

Сiдз эта нывка сюрис Льöмваö. Сiя вöлi весёлöй, любитiс шутитны томмескöт, и гажа характернас чожа гленитчис льöмвинскöй молодёжлö: комсомолеццез бöрйисö сiйö асланыс секретарьöн. Овны лоис интересножык. Уджавтöн кадыс чулалiс казявтöг. Лена часто ветлывлiс делянкаэзö, тöдсасис вöрзаптiссезкöт, велöтiс технология, рыттэзнас чулöтiс собраннёэз, организуйтiс художественнöй самодеятельность.

Гыров пыравлiс Марфа ордö часто. Тöдчис ни, что сiя любитiс Ленасö: пырас, пуксяс пызан дынö и видзöтö полöмöн Лена вылö, гусьöник корö клубö. Лена любитiс танцуйтны и Гыровлö откажитлiс шоча. Тётка Марфа вежöртiс этö ас мознас и гусьöн думайтiс ни свадьба йылiсь. Но юасьны, любитö я Лена Гыровöс, Марфа эз понды: адззылiс öтпыр, кыдз ны посöдз дынын нывка сулалiс Комоловкöт, некыдз эз вермы янсöтчыны... Гыров дугдiс пыравлыны ны ордö.

Чожа посёлокын кывсис, бытьтö Сергей юöма Лена увья вина, валяйтчöма лымын. Старуха клопöтiс только боккесö: мый нö эта сэтшöмыс шогмö? Абу я ылöстöм Ленкаыс? Öтiк сылö оз гленитчы, мöдiк оз гленитчы, а куимöт вылын син одзын сералö. Вот кольччас жöниктöг — посёлокас и сытöг невестаэс тыр. Но Лена немымда эз тöждiсь. Ветлöтiс сё сэтшöм жö гажа да мича, шутитiс быдöнкöт, мечтайтiс получитны мастерскöй участок.

— Чожа, тётка Марфа, мастерöн лоа, начальник баитiс ни öтпыр...

— Мастерöн? Сiдзкö, зонкаэз вылын командуйтны пондан, — шыасис Марфа и шынньöвтiс лукавöя: — Öнджа, не одзöв ли? Öнi ни кывсьö, зонкаэс артсиныс петöмась, вина пö горесянь юöны...

Леналöн дзугыльтчис сьöлöмыс. Посёлокын сiя и ачыс ни кылiс,что пöриссес оз ошкö сылiсь мывкыдсö, жалейтöны Комоловöс. Повариха Секлетинья син одзын баитö, бытьтö Лена тшыксьöма городас велöтчикö, юрас пö тöв ветлö... Лена перво серавлiс только, энö басниэсö кывзiкö, но тётка Марфалöн кыввез бöрын лоис не ас сьöртi. Шогмис быдöс не сiдз, кыдз колiс бы. Сергей не öддьöн и талис коксö, а сiя чирöстiс дзик пурт увтын, повзьöтiс зонкасö. Кöть сьöлöмыс и чувствуйтiс, что быдöс лоас бур, Сергей оз лöгась сы вылö, но мöдыт вон кык неделя ни оз лысьт паныт шедны, нем оз баит. Леналöн вöлi дума ветлыны зонкаыс дынö, баитыштны, пöртны быдöс шуткаö, но мылякö полiс да и моросас кытшöмкö бес баитiс: любитö, дак ачыс локтас. Сергей жö эз лок. Лена вежöртiс, что сiйö сотö стыд. Стыдсянь и юис винасö. Да, нёштöм дело петiс!

Но мед ни ёна тшыксис настроеннёыс Леналöн тöн: луншöр кадö вайисö ВЛКСМ райкомись письмо, кöдö, лыддьöтöм бöрын нывкалöн кикокыс дрöжитны пондiсö! Письмоын юöртiсö, что локтöма райкомас жалоба. Сыын кинкö гижöма, бытьтö Сергей Комолов ой и лун пируйтö, уджавны пондiс умöля. Секретарь тшöктiс проверитны этö фактсö и, подтвердитчас кö сiя, обсудитны Комоловöс комсомольскöй собраннё вылын.

Только эта эз и тырмы! Да кин жö вермас висьтавны, что Сергей ой и лун юö винасö, кинлöн юрыс висис напраслинасö каттьыны? Сёжö воштiсьны вöлi некытчö, факт кольччö фактöн: Сергей пируйтöм, тракторист Петька Угрин кыскöм сiйö гортас. Ух, сьöкыт! Мый лоас, если былись Сергейсö ковсяс обсудитны собраннё вылын? Да разь пондас сiя любитны эта бöрын Ленаöс? Нет, колö талун жö ветлыны сы дынö, баитыштны, кыскыны сэсся оз туй.

Рытнас Лена мунiс клубö, надейтчис пантавны татöн Сергейöс. Клубын, кыдз пыр, орсiс радиола, зонкаэз да нывкаэз танцуйтiсö. Первöйöн синмö усис Гыров. Сiя вежмасис кругын, пиньласис быднёж и чувствуйтiс, тыдалö, асьсö öддьöн бура. «Не сiя ли гижис райкомас, — думыш керис Лена. — А мый? Гыровлöн тырмас сэтчö прокыс. Ужо, юала гусьöник». Сергей татöн эз вöв, и нывка локтiс Гыров дынö:

— Охота танцуйтыштны. Мунам?

Гыров радувьяс и шыасьны эз вермы, сiя только шынньöвтiс ылöстöма и кутiс Леналiсь кисö.

— Сергей вылö кинкö жалоба гижöма. Тэ он тöд кин? — юалiс Лена.

Ответыс туйö Гыров шамыртiс сылiсь кисö и сюльтыртiс ассис:

— Эта танец бöрын фокстрот лоас, мунан мекöт?

«Но тэнö, курöгöс!» — Лена сьöласис думанас, мöдiс кольны кавалерсö джодж шöрас, но вöлi кыдзкö небытшöм. А колöма кольны! Эта коста и пырис клубö Комолов. Сiя дивуйтчöмöн нёджжöвтiс танцуйтiссезлань и шай-пай лоис, перыта петитчис бöрöн-бöрöн и чепöссис öтöрö. Лена адззылiс этö и сэк жö вежöртiс: Сергейкöт лучше не пантасьны...

Талун Леналöн потласис-висис юрыс, сьöлöм эз адззы места. «Кульыс менö кыскис клубас да эшö кутчисьны Гыровыс бердö», — видiс сiя асьсö. Петас жö дело! Кöть пуксьы да гиж заявленнё, кöть вакрамешö мун. Конечно, вöлi бы öддьöн бур, если начальникыс иньдiс горючöйысла не Гыровöс, а сiйö. Мунiкас, поди, миритчисö бы. Но иньдiсö Гыровöс, кыдз бытьтö начальник оз тöд: Сергей да Виктор оз лöсялö. Эх, да мыйкö разь вежöртас Макар Кузьмич, эта пельтöмыс!

Кадыс вöлi луншöр ни. Лена сюйис пызанö бумагаэсö и петiс öтöрö. Погоддя тшыкöма: пызитö зэрок, воздух уль, — кыдз эттшöм кадö горючöйсö ваясö?

Посöдзас сулалiкö Лена казялiс, кыдз чукыль сайсянь петiс подвода и веськыта улицаыс шöрöт мунiс детсадлань. «Да эта жö Вера локтö!» — радмис нывка и чепöссис котöртны.

— Вера! А-у, Вера! — чирзiс сiя. Вера сувтöтiс вöвсö.

— Ой, Лена! А ме локта и думайта, мыся, гортын я тэ? Нывкаэз пантасисö шумнöя, шыннялiсö и горöн радуйтчисö кыкнанныс. Вера тöвнас часто кежавлiс тётка Марфа ордö, ваявлiс дед Игнатсянь поклоннэз (Игнатыс вöлi Марфалöн вон), и кык нывка чожа тöдсасисö, пондiсö дружитны. Вера бура сьылiс песняэз, Леналöн вöлi тожö приятнöй голос, и нiя кыкöн мукöдпырся выступайтлiсö клубын рабочöйез одзын.

— Кыдз нö тэ вöрöттяс локтiн? Туйö эшö ветлыны?

— Умöль туйыс, Лена, но ме локтi тай, — шыасис Вера. — Кытчö нö воштiсян, кöр челядьнытлö йöв колö. А тöдан мый, меным эд жöниккет пантасисö! Мылякö лöгöсь кыкнанныс...

Лена гöрдöтыштiс и öмалiс подругасö:

— Жöниккез! Он я Гыровсö жöникöн лыддьы! Сiя... Сiя нечестнöй морт, сiя...

Леналö вöлi öддьöн сьöкыт, но сёжö вермис висьтавны, мый татöн шогмис медбöрья кадö. Вера кывзiс и шыннялiс. Сiя нельки горöн серöмтчис, кöр басниыс локтiс Леналiсь коксö тальöмöдз: «Ой, кытшöм сiя трактор!»

Медбöрын Лена висьталiс:

— Гыровыс, натьтö, напраслинасö райкомас каттис, некинлö сэсся.

— И тэ тöждiсян? Поди, горзiн ни? А эшö комсомольскöй секретарь! Да неужели тэ эн вермы öнöдз Сергейыскöт баитны? Ох, Лена, Лена! Кытöн колö, дак гордостьыс миян чепöль абу, а кытöн оз ков — сiя тыр. Но эн тöждiсь, чулалас быдöс. Вот вайи тiянлö чери. Жаритö сiйö, а ме, ветла детсадас, вöлись кежавла тiянö...

— Чери? — шыасис Лена. — Разь оссис ни Вильваыс?

— Эшö пемыткодь вöлi, кöр йыыс вöрзис, öнi любо видзöтны. Дед Игнат быдса ведра асывнас кыйис...

Лена сiдз и дрöгнитiс:

— Вöрзис йыыс? А кыдз жö горючöйыс? Сiя эд сай берегас?

— Сай берегас. Да мый тэкöт, мыля сiдз бледöтiн?

— Ох, кыдз бы нем эз шогмы!

И быдöс сiя, мый асывсянь маитiс Ленаöс, пондiс кажитчыны учöтикöн да незначительнöйöн. Быдöс эта саясис кытчöкö ылö-ылö, рознитчис, кыдз кокнитик тöлоксянь туман, а мыйкö мöдiк — ыджыт и сьöкыт — чужис моросын, визывтiс сэтчин, кыдз гудыра кунва. Эта вöлi тревога любимöй морт понда, тöждiсьöм: мунiс сiя сьöкыт туйö, мунiс ненадёжнöй морткöт, быдöс я лоас бур да ладно?

— Вера, эд тiян Ванчикныт эта жö кадö вö... вöйис!

Вера вежöртiс, мый шогмö Лена сьöлöмын и, медбы бурöтны подругасö, шуис спокойнöя:

— Нем оз ло, эн тöждiсь. Горючöйсö чередь ваясö, сьöкыт сiйö öнi судзöтны, но умöльыс нем оз шогмы. Дед Игнат фермаас кольччис, сiя оз лэдз некинöс юыс дынö. Сы бöрын, кыдз вöйис внучекыс, старик лоис öддьöн осторожнöй...

Но успокоитны Ленаöс вöлi сьöкыт ни. Сiя эз и мун öбедайтны, пырис бöр аслас кабинетö.

Детсадланьö вöвсö бергöтiкö Вера казялiс, кыдз Пальник ладорсянь шумöн гöнитiс Гыров. «Бертöма, — вежöртiс нывка. — Но мыля öтнас?»

Контораись котöрöн петiс Лена и чирзiс Гыровлö:

— А кытöн Сергей? Тэ мыля öтнат?

— Сiя мунiс, — öвтыштiс кинас Гыров. — Асныра сiя, нем оз кывзы. Ужо, локтас кад, обсудитам комсомольскöй собраннё вылын, сэк вежöртас.

Вера вöлi ылынкодь ни и эз кыв, мый паныт Гыровыслö висьталiс Лена, только тöдiс, что подругаыслö öнi öддьöн сьöкыт. Вежöртiс и сiйö, что райкомас жалобасö гижис, конечно, Гыров.

Спокойнöя и дыша нöбöтö ассис сöстöм васö таёжнöй ю Вильва гожумнас. Сереброöн свиттялö сiя югыт шондi увтын, орсö сингусялана переливвезöн. Лажмытик местаэзын — перекаттэзын — сiя бергöтлö учöтик галькаэз, больöтö уна шыöн, быд вынiсь старайтчö буржыка шлифуйтны иззэза пыдöссö. Мукöд гожуммезö, кöр дырöн оз овлö зэррез, ваыс син одзын пакмö, кокнитик парöн кайö неболань, и сэк Вильвасö вуджтöн позьö и кокпятаэз не вадны.

Но полöм петö видзöтны эта ю вылö тулыснас, кöр сiя ружтöмöн чеглалö кыз йы, вöтьö лажмытик береггез и, кыдз лöг пороз, люкалö хоботтэз...

Эшö вöрись петтöдз Сергей кылiс ловзьöм юыслiсь шысö. И зонка сьöлöмö пырис гажтöм чувство: «Не вуджны öнi сiйö». Но мый бы вöв, а колiс мунны одзлань. Мöд берегас вöлi золотося донажык горючöй.

Мöсвöдитан ферма дынын, шонтiсян керкуок бокын, Сергей сувтöтiс вöввесö, сетiс нылö турун. Ачыс сэк жö котöртiс Вильва дорö. Ю визывтiс паськыта, увгис и бульчикайтiс дзик бöбсялöм. Йы пласттэз шочыника мыччисьлiсö хобот сайсянь, уйисö бергалöмöн юыс шöрöт, мукöдпырся пыдына сунгисьлiсö пыдöсö, сувтлiсö онняюрöн и, дзик ловьяöсь, люкасисö и зыртчисö öтамöд бердö. Ва пизис ны коласын, бытьтö котёлын. Öтвыв йы торрезкöт, тожö öтмöдöрö бергалöмöн кывтiсö вуж сорöн летыштöм неыджыт пожуммез, уна вожа мыррез, быдкодь колодаэз.

Сергей дзар керис деревнялань и казялiс васис неыджыт цистерна. Сiя сьöд видзис лажмытик берег дорас и, кажитчö, вöрис — перыта кывтiс вапаныт, а трактор бузгисьöм кытшöмкö ямаö сiдз, что тыдалiс только кабина юрыс, кöда тожö дзик уйис вывланьö. Петька Угрин, тыдалö, мöдöма вуджны юсö перекатöт, но сорасьöма невна и лöсялöма ямаö. «Эх, и сунгисьöм жö! — дивуйтчис Сергей. — Интересно, кыдз сiя ештiс чеччöвтны?»

Гажтöм сылö лоис этö картинасö видзöттöн. Ю дорын сулавтöн керис вывод, что весь, пожалуй, локтiс, öтiкöн нем эстöн он соровт.

Умöль овлö мортлö, кöр сiя кольччö öтнас. Вöлi бы кин-нибудь ордчöн, баитыштiсö бы, примитiсö кытшöмкö мераэз.

Öшöтöм юра сулалiс сiя ю дорас, видзöтiс цистерналань и сiдз ылалiс думаэзнас, нельки дрöгнитiс, кöр сы спина сайын кылiс тöдса голос:

— Здорово, нечистöй дук!

Бергöтчис Сергей и адззö: сулалö сэтöн дед Игнат, фермаись сторож, öт кинас малалö важын ни сынавтöм дзор тошсö, мöднас видзö вешьянсö, кöда, тыдалö, оз öшшы кöс кадж вылас. Старик пасьталöма дзелёвöй воротника пась, кокас сюйöма автомобильнöй камераись керöм калошиа пимиэз. Сулалö и шыннялö кыдзкö хитрöя. Быдöнöс — и шофёрöс, и трактористöс, каждöй механизаторöс — старик шуö нечистöй дукöн, мыля ны паськöмсянь вачкö солидолöн, бензинöн да соляркаöн.

Дата добавления: 2015-11-16