МЕДБÖРЬЯ ЮÖРРЕЗ 6 страница

Радмис Сергей, шынньöвтiс дедлö паныт:

― Здорово, здорово, деда! Адззан, гöститны бöра локтi.

― Самöй раз! Мöдöдз лун няньтöг пукала. Оссис Вильваыс, эг ешты гортö ветлыны. Асывнас Öльöксаникалöн жöникыс вердö бы вöлi миянöс — чапкис сай берегсяняс няньöн сумка — да кытчö тэ: эз вермы миян дынöдз иньдыштны, юыс кватитiс сумкасö.

Старик серöмтчис беззаботнöя, дзик рад вöлi, что сумкаыс усис ваö. Кöс тырппесö нюлöм бöрын шуис невна ошшасьöмöн:

— Кыйи асывнас быдса ведра кельчиэз. Поди, панялыштан ваоксö?

— Пу, пожалуй. Няньыс менам эм сумкаам.

Стариклöн избушка учöтик, лажмыт — юр потолокöдз павкö. Веськытланись пельöсö Игнат тэчöма кирпичись учöтик горок, сы бокö лöсьöтöм паськыт лабич — узьлан места, öтiк пельöсö дорöм пызанок. Стена вылын шваткöтöны ходиккез, правильно ли не ли, а мыччалöны кад — куим час. «Ух тэ, — думыштiс Сергей, — кык часся дыржык дас верстасö локтi».

— Кытöн нö дубаса командаыт? — юалiс сiя.

Игнат гуддисис ни мыйкö горöдз дынын, жольöтiс котелокöн, кыккусiнь кöстiсьöмöн.

— И-и, — нюжöтiс сiя и öвтыштiс кинас. — Асывсянь мунiсö Старицаö турунокла и öнöдз абу. Баита тай, вöрзис юыс, одзöв сылöтны пондiс. Ендiмö, батя, вердчаннэз кыскалöмöн, турунтöг пуксим.

Сергей öшöтiс тувйö плащсö, пыркöтiс ыбöс косяк бердö шапка.

— Эта мый! Вердчаннэзтöг лун-мöдсö позьö овны. Ми вот горючöйтöг кольччим, талун тракторрез сувтiсö, а как раз вöр тарлавны колö.

— Кылi ни. Асывнас укнитiс Петькаыс менам син одзын. Юыс вöрзьö ни вöлi, а сiя сёровно пелитчис. Инмис бы лажмыт местаö — вуджис бы, пожалуй, а сiя лöсялiс ямаö. Арнас сэсь поснитик галькасö экскаваторöн колхозным гарйис клуб увтö...

Старик мыйкö кошшис лабичок увтiсь, мышкырасис сiдз, что кузь тошнас чышкис джоджсö.

— Юртöм тiян Петьканыт, совсем юртöм. Повзьöтiс менö, нечистöй дук, öнöдз кикок дрöжитö. Эд колö жö... Тшöктöм начальникныт Кондовникöт гöнитны леспромхозас, а сiя, кульпиян, гöнитiс веськыта. Сiдз и думайтi — вöйöтас жеребецсö Вильваас...

— Да тэ мый, деда, неужели уйис?!

— Уйис, юртöм. Кыдз война вылын действуйтiс — буля-боля, була-бола. Бур — жеребецыс вына, а то вöйис бы. А кытшöм этö терпитны. Дошлöй сiя, нечистöй дук. Казялiс, что йыыс перерыввезöн уйö, вевдöрланись хоботас заторрез, тыдалö, аркмывлöны. Вот и бöрйис сэтшöм кад, кöр ю вылас нем эз вöв — пырис и уйис...

Эта юöр, дзик пыжьян, чувйыштiс Сергейöс. «Вон мый сэтöн вöлöма! А ме öшöтi юрöс, кад эстöн öшта, тьфу!» — сьöвзис сiя и уськöтчис ыбöсö. Петька вермис уйны, а сiя, Сергей Комолов, узьмöм я мый я? Тожö уяс. План чужис простöй: вуджны öнi жö деревняö, пантасьны народкöт, корны отсöт. «Вот пукся Петька моз вöв вылö и уя». Но старик, кыдз кöин, чеччöвтiс сы сьöрö, крепыта кутiс фуфайка воротöт, трекнитiс сiдз, нельки юр зэгалiс.

— Эн бöбав, кылiн? Пыр керкуас, сёрнитыштам! Адззан, мый ю вылас керсьö?

Вильва вылöт öнi уйис свальнöй йы. Тыдалö, кытöнкö вывланьынжык былись вöлöма затор, öнi мезмöма и кывтö Пальник увтöт, ферма бокöт.

— Адзза, деда, но вуджны колö.

Стариклö и кывджын эз тöр. Сiя кыскис Сергейöс, кыдз тарашитчись баранöс, пуксьöтiс лабичö.

— Перво сёйыштам, пукалам-керам. Видзöтан, йыыс и чулалас быдöс. Сэк вöлись и вуджан. Ачым пыжын вуджöта.

Бурöсь вöлiсö кыввез, и баитiс старик спокойнöя, убедительнöя. Да и ачыс казялiс Сергейыс, что вöв вылын öнi Вильвасö он вудж, жамнитасö гырись йы пласттэз. А мый жö керны? Дона вöлi быд минута: рыт гöгöрас должен вöрзьыны и Льöмва — Вильвалöн приток, вöр тарлавны ковсяс. Уна ли сiйö киэзöн туплялан?

И öзйис сьöлöмын биок.

Сiя — эта биокыс — важын ни чепсасис, гыжъясис сьöлöмын учöтик бичироккезöн, пондывлiс гусьöн шаитны, но дзик эз тырмы воздух, — куслiс бöр. И только Петькалöн уйöм йылiсь юöрыс пöльтыштiс моросö свежöй ру — би чавкнитiс вына и быдöс сотана. И сьöкыт ни вöлi сiйö кусöтны.

«А мый, если?..»

Неважын, неделя-мöд вöлись чулалiс сэксянь, Сергей кольлалiс Ленаöс клубсянь. Рыт вöлi пемыт, уль. Лена жмитчис Сергей бердö, шоныт керкуись петöм бöрын дрöжитiс. И сэк Сергейлöн сьöлöмас тожö чужис биок, чужис казявтöг, совсем видзчисьтöм «А мый, если?..» Дыр думайттöг зонка ыжмитiс Ленасö аслас морос бердö, чатыртiс невна юроксö да сiдз жаритiс-окалiс, нельки аслыс диво лоис! Окалiс первöй раз, смелöя, решительнöя и, конечно, юасьтöг. Лена сэк, колö шуны, ештiс малыштны Сергейлiсь пельбоксö, бура сöтiс, но этö сöтöмсö зонка примитiс ответнöй окыштöм туйö... «А мый, если?..»

— Ладно, деда, пу чериватö. Сiдз и ло, пукала татöн, кытчöдз йыыс оз кывт, — равнодушнöя шуис Сергей. — Сёровно нем он кер. Унажык чериоктö пукты, а ме муна видзöта, кыдз йыыс уйö.

— Вот эта мöдiк басни!

Берег дорö лэдзчикö, Сергей шедтiс йöрись кузь потш, пешлiс сiйö — крепыт я? Дзарнитiс öтмöдöрö. Некин некытöн абу, только сайись берегас, невна увланьынжык, колхозниккез кыйисö саккезöн чери. Ю важмоз ковöтiс и пизис, йы кывтiс орлытöг. Самöй берег дорöт, лэчыт доррезнас мусö гöрöмöн, уйис сажень кык кузя, вевдöрсяняс сöнöгöн вевттьöм йы пласт. Зэр воттез пышналöмась сiйö, бытшкалöмась дзик пыжьяннэзöн, но пласт вöлi эшö крепыт, увтыс свиттялiс, кыдз мрамор, уйис увереннöя. Сергей кокнита чеччöвтiс сы вылö, потшсö пыкöталiс берегас. Дикöй, öддьöн дзирыт чувство сывьялiс вывтырсö, сьöлöм токöтiс сiдз, бытьтö дзескыт лоис местаас. Вот эттшöм жö чувство и вöлi Ленасö окавтöн. Ух-х...

— Серёга, берт, берт, нечистöй дук! — горöтлiс берегсянь Игнат, öвтiс киэзöн и готов вöлi ачыс пырны ваас.

Но сёр ни, дырöв эз кватитчы старик, что бöбöтас сiйö бöбмöм зон. Вот быд вын сiя пыксис потшнас, иньдöтiс йысö юыслö поперёк. Визыв ва кокнита петкöтiс пластсö шöрас, медвизыв местаö. И öдззис бергöтлыны сэтöн, качайтны, пизьдыны! Гырись вачиррез чеччалiсö сажень сувда, бытшкалiсö чужöм, вадiсö шучкöп паськöм. И мымда бы эз пессьы Сергей, мымда эз старайтчы сынны береглань, ю нöбöтiс и нöбöтiс сiйö увлань...

— Э-эх! Беда тай! — горöтiс Сергей, и кöр мöдiк ыджыт йы пласт пондiс бульчикайтны ордчöн — сiя думайттöг лэбзьыштiс паськыт сьöд щель весьтöт, усис кыминь, зубыта дойдiс пидзöссö, но потшсö эз лэдз кисис и чожа сувтiс кок йылö. Эта пласт вывсянь сiя чеччöвтiс мöдiк вылö, куимöт вылö, ачыс горöтлiс мыйкö.

Ферма дынын кузь тоша старик чеччалiс кокись кок вылö, вылына лэбтывлiс киэсö неболань, дзик мöдiс лэбзьыны, кутны этö дерзкöй детинасö, а может, кеймисис енлö, корис том мортлö пощада.

— А мый, а мый?! Вöяс, лешакпиян!

Но морт тышкасис ыджыт вдохновеннёöн, ыджыт вынöн пессис юыскöт, смертькöт. Вот сiя пыдына татшкис ва пыдöсö потшсö, лэбтiсьыштiс воздухö, секунда кык кежö кынмывлiс сэтöн и, дзик борда, плавнöя усис паськыт йы тор вылö, кöда увтсянь фонтанöн кайисö чочком вачиррез. Дед Игнат куньлiс эта коста синнэсö и мыйкö шушкис лöзöтöм тырппезöн, тошыс треситчис.

Ю некыдз эз мöд лэдзны ассис пленниксö. Вына сiя вöлi öнi, а орсiс тожö, кыдз кань шыркöт, бергöтлiс йы торресö, пизьдiс нiйö, и, кажитчö, вот-вот öдззас торжествуйтны победа. Но морт пессис кужöмöн, хитрöя: чеччалiс как раз нiя йы торрез вылö, кöдна вöлiсö надёжнöйжыкöсь, крепытöсь.

Вот матын ни берегыс, вит метр кольччис, не унажык. Паныт зонкалö котöртöны ни мужиккез, нiя öвтöны киэзöн, горöтлöны — любöй минутаö готовöсь сетны отсöт.

— Вуджис эд, вуджис, кульöм зон! — радöн и кокнит сьöлöмöн чирзiс старик. — А мый!

И вдруг ыджыт йы пласт, кыдз бöбсялöм, чувйыштiс кысянькö боксянь, сöтiс быд вын Сергейлöн йы тор кузя и керис сiйö няж-няж. Зонка мöдiс, тыдалö, чеччöвтны эта бöбмöм пласт вылö, но эз ешты и сунгисис ваö.

И дзик не Сергейсö, а Игнатöс кöдзыт ва сотыштiс биöн, осьта сикöджöт пырис моросö, сьöлöм дынö, пемдöтiс синнэз.

— Вöйис! Морт вö-öйи-ис!

Игнат кутiс киэзнас дзормöм юрсö, шлёпкисис местаас.

— А-а-а-а!..

Кынымкö год бöрланьын, эта жö кадö, Вильваö вöйис стариклöн внучек, дзирыт сьöлöма Ванько. Иньдöтчöм рытнас пыжын фермаö, аслас Валя — мöсвысьтiсь дынö, думайтöма, тыдалö, окасьыштны сыкöт, и локтöма ни вöлi ю шöрöдз, но шальнöй йы тор клöбыснитöм пыжсö. Только неделя бöртi Гырка йир дынiсь кыскисö сылiсь пöльтчöм и лöзöтöм шойсö. Вына и бодрöй вöлi старик, но öтiк лунö сэк дзормис и рапмис совсем и сетiс чорыт кыв: некинöс, нельки ассис врагöс, не лэдзны тулыснас Вильва дынö. Но вот бöбöтiс сiйö кульпиян Серёга, бöбöтiс и сунгисис... Мый сiйö тшöктiс пырны ваас, кин тойыштiс?

Старик пукалiс вöрöтчытöг, кыдз тувдöм — öшöтчöм тоша, лöзöтöм чужöма, куньöм синнэза. Сiя нем эз вермы горöтчыны и молитваэз шушкыны эз письты.

Но вот сай берегас радöн пондiсö горöтлыны черикыйиссез, чирзыны сiдз, что валöн шумыс эз пöдты нылiсь голоссэсö:

— Сувт, сувт коккез вылö!

— Кутчись зорыс бердö! Э-эй, кутчись!

Игнат перыта чеччöвтiс местасис, осьтiс мигайтана синнэсö. Слава богу! Кокнита ловзисис пöрись морт, кöр казялiс люзьва Сергейöс. Детина юртöм петух моз чеччалiс сай берегын, старайтчис шонавны. Заботливöй киэз чöвтiсö ни сылiсь сьöкыт паськöмсö, кыскисö деревнялань. Но Сергей эз вунöт бергöтчыны фермалань. Вот казялiс сiя стариксö, вылына лэбтiс веськыт кисö, шынньöвтiс счастливöя и гажöна:

— Деда-а! Дзирытжыкö пу чериватö, сейчас локта!

Ах, бес, эшö сералö сiя пöрись морт вылын, кешитчö, юртöм! Игнат мыччалiс паныт кулак: ужо, локтан тэ, нечистöй дук...

Колхознöй правленнёын, председательлöн шоныт кабинетын Сергей Комолов чувствуйтiс асьсö öддьöн бура. Ёна сiйö монлалiс Вильваыс, быдöс коскаэз пыркöтöма, веськыт кокыс совсем дубалöм, но спиртöн зыртöм тело приятнöя сотчис кöс паськöм увтын, бытьтö неважын только пöльтiсö быд местаöт коросьöн. Пальникын народ вöлöма öддьöн чуткöй и добрöй. Зонка эз и казяв, кыдз ваись петöм бöрын сiйö пыртiсö кинлöнкö керкуö, чöвтiсö начöдз, сэк жö вайисö кöс йöрнöс-вешьян, ватнöй телогрейка, шапка, нямöттэз, а сылiсь ва паськöмсö öшöтiсö косьтыны.

Адззисис кинлöнкö и бутылка спирт. Сергейöс сiдз зыртiсö, — зелляыс нельки кучикыс пыр йиджöма: юрын öнi тöдчöмöн кильöтыштлiс.

Председатель — Макар Кузьмич кодь жö лысöй юра и пöльтчöм чужöмбана, не том ни годдэза мужик — пукалiс аслас пызан сайын и дугдывтöг дивуйтчис:

— Йы тор вылын Вильва вуджин? А мый тэ, батя! А вдруг вöйин бы?

— Но если вöйöм йылiсь думайтны, — пожалуй, вöйи бы. А менам мöдiк дума вöлi, — шынньöвтiс Сергей и содтiс: — Семьдесят тысяча кубометр ваас лэдзны колö, а горючöйным öтiк воть абу.

— Сiдз и абу поди? Тöда ме Макарнытö — жила. Пукалö добро вылын, кыдз Кащей, и синнэсö мöдралö. Эз понды сiя гленитчыны меным медбöрья кадö, вылынöла нырсö лэбталö. Кори тöвнас пуд-мöд полосовöй кöрт, дак баитны эз понды. «Абу-у, абу-у! Öтiк грамм абу-у!»

Председатель нерис Макар Кузьмичöс öддьöн кужöмöн, шувлiс этö «абусö» как раз сiдз, кыдз вермис бы висьтавны öтнас льöмвинскöй начальник. Эта коста сiя кутлiс шульга пельсö, Макар Кузьмич моз быглялiс синнэсö и невна пиньöвтлiс öмсö. И голосыс председательлöн вöлi истово начальниклöн голос кодь. Сергей видзöтiс и серöмтчис кокнитика, дзик челядёк, кöдалö интереснöй морт мыччалiс страшнöй рожа.

— Абу пö? И эз и сет? — смех сорöн юасис сiя. — Весь баитö. Быдса куча кöртыс куйлö кузница дынын. Ужо, ме вая кöр-нибудь, а öнi отсалiт бы, а?

Председатель дзарнитiс öтöрö, бытьтö мöдiс тöдны, бур я погоддяыс, сэсся вештiс одзсис кытшöмкö бумагаэз, чеччис пызан сайись.

— Отсалам, эн тöждiсь, — шуис сiя. — Ачым вежöрта — государственнöй вöрыс. Вöлi бы Макарлöн — шыш бы мыччалi. А сiдз — отсалам.

И отсалiсö, спасибо нылö. Эз чулав дас минута мымда, а берег дорын пизис ни удж. Чукöртчисö сэтчö мужиккез да зонкаэз, вайисö геззэз, трос, скобаэз. Кинкö ештöм ни доддявны вöв и öнi кыскалiс кыськö кыз керрез, кинкö котрасьöм складö — вайис горючöй качайтан насос, шланггез.

— Кынымкö год бöрланьын эз тырмы фермаын вердчан, — висьтасис Сергейлö важын ни бриттöм тоша, важ зипуна да кузь голенищеа сапоггеза мужик. — Мый керны? А этадз жö йы кывтiс, тулыс вöлi. Зэрö — не пырны не петны, но ми лöсьöтiм плот, тэчим сы вылö турунсö быдса зород, домалiм плот бердö трос и чапким конецсö сай ладорас. Вöввез кыскисö плотсö. Сымда и вöлi.

Сергей умöля вежöртiс, но гогинялiс юрöн. А мужик — сiйö ёрттэс шуисö Зинко Прокопöн — висьталiс ни быдöнлö, мый колö керны, мый бердö перво кутчисьны. Недыр мыйись берег дорын камöтiсö черрез, кылiс смех, а Зинко Прокоп горöтлiс командирскöй басöн:

— Э-э-й, курöггез-морттэз, уджалö буржыка, позьöтö кисойезнытö, адззат, кадыс оз терпит!

Ачыс босьтiс зор, давай быглявны керресö ва дорас, мöдiккез отсалiсö Зинко Прокоплö, и чожа вит пу водiсö ордчöн.

— Етшаöв! — горöтчис Прокоп. — Эшö кык пу колöны, крепытжык плотыс лоас. Эй, Васька, тэ мый öмтö осьтiн? Дернит эшö кык пу!

Плот керисö надёжнöйö, крепытö: öтмöдöрсянь кутiсö скобаэзöн, каттисö тросöн, клячалiсö тран-тран, — кöть мореöт уй. Важ обоновка бердiсь гыжтöтiсö кузь трос, домалiсö сылiсь öт конецсö плотыс бердö, а мöдсö Прокоп сетiс кытшöмкö паськыт пельпоннэза, неыджыт мыгöра детиналö, кöда лöсялiс бокас:

— Кут, Петрован, да чапкы троссö сай берегас. Тэ — вына!

И серöмтчис, дзик вöв гöрдлыны пондiс: го-го-го! Петрован кутчисьö вöлi тросыс бердö — чапка пö, но Прокоп кокнита тойыштiс сiйö:

— Гöгыт петас. Тросыс двадцать пуд мымда лэбтö. Домав давай кузьжык гез. Сiйö чапкан...

Трос бердö домалiсö гез, гез конец бердö кытшöмкö кöрттор — медбы сьöкытжык вöлi — и Прокоп пуктiс кыкнан кидолоньсö öм дорас, дзик рупор керис:

— Эй-й, морттэз-курöггез! Дед Игнат! Кытöн тэнат инькаэс? Кутö ге-езсö! Да вöввесö доддялö, вöввесö доддялö, мыся!

Кытчöдз фермаын доддялiсö Сергейлiсь вöввесö да домалiсö додьыс бердö чапкöм гезсö, Зинко Прокоп ештiс висьтавны небывальщина:

— Вот, значит, локтасö Вильва дынö öтпыр старик гозъя, думайтöны: кыдз мöд ладорас вуджны? Старик и шуö: «Кутам вон пусö, ме пукся сы вылö и уя. А тэ кыдз-нибудь локтан ни бöрсяням». Ладно, кутiсö васис кыз кер, старик вожасис сы вылö, а старухаыс домалiс коккесö пуыс бердö гезокöн — полö, значит, медбы эз вöй юрвердiсьыс. Вот бур дело, ладно, домалiс и тойыштiс керсö! Старик сразу жö сунгисис ваас, только коккес, кыдз майöггез, мыччисисö ва вевдöрас. Старухаыт клоп вачкис боккес кузя да и горöтлö: «Ай, пöрись, пöрись! Видзöт, кытшöм дошлöй: эз на вудж юсö, а нинкöммесö косьтö ни!..»

Может, сотняись ни Прокоп висьтасис этö, но быдöн, кин вöлi берег дорас, дружнöя сералiсö, синваэз петтöдз ваксисö. Сералiс öтлаын и Сергей. Гажа лоис сылö, долыт. Эта визыв и дружнöй отир отсаласö, горючöй лоас сай берегас. Вот и трос нюжалö ни, кыдз струна, дрöгнитiс кок увтын плотыс, плавнöя вöрзис местасис, юкйöвтiсö öтмöдöрö йы торрез...

— Давай, да-авай! Ыскöвт, милай-й! — горöтлiс Прокоп, ачыс зорöн тойлалiс йы пласттэз, кöдна норовитiсö люкавны плотсö. Но повны вöлi немись: ыджыт плот и трек эз кер, уйис ковöтöмöн, только ва öтмöдöрö резсис.

Ферма дынын тэчисö плот вылö пустöй бочкаэз, бура домалiсö гезöн и сiдз жö, кыдз локтiсö татчö, уйисö бöр вöйöм тракторыс дынö. Сергей осьтiс цистерна горловинасö и чуть синваэс эз петö — сэтшöм сылö любо вöлi кывны горючöйлiсь тöдса дуксö... Шоччисьлöмöн — перво öтiккез, сыбöрын мöдiккез — качайтiсö горючöйсö бочкаэзö, шутитiсö. Зинко Прокоплöн и öмыс эз тупкасьлы, лёбис и лёбис небылицаэз.

— Серёга! — горöтлiс сiя. — Морт тэ богатöй, лесопунктын уджалан. Сувтöт, буди, джын литра! Бурö тэныт сказка висьтала, а охота кö, быль верма гардны. Вот кывзы жö, мый öтчид вöрын мекöт вöлi...

Погоддя тшыксис. Лажмыта уйисö сьöкыт кымöррез, дугдывтöг пызитiс и пызитiс поснитик зэрок. Но тöдчис — не ар öнi, а гора тулыс. Деревня улицасянь жольöтiсö Вильваö визыв шоррез, юас бульчикайтiсö йы пласттэз, ветлiсö сьöд валлэз. Да и воздухыс не арся: кöть зэрö, а сёровно кылö тулыслöн лолалöмыс — уль тöлок вайöтö вöр ладорсянь сылöм лыслiсь кокнитик запах, муись кайö парок, öтлаасьö уль воздухкöт.

Пальниковскöй колхозлöн председатель вовлiс берег дорö, видзöтiс, кыдз мужиккез качайтöны горючöйсö, и шуис радöнмоз Сергейлö:

— Мый, герой, ловзис сьöлöмыт? То-то жö! Висьтав Макарушкоытлö, мед нырсö эз лэбтав öддьöн. Мыйкö унаöв ни ошибкаэсö керö. Эз разь одзжык позь горючöйсö вайны?

— Висьтала, быдöс висьтала. Вот локта гортö и лöгувьям поткöта мöд пельсö, — кöсйисис Сергей.

— Молодец! — ошкис председатель. — Поткöт, лысöй чортлiсь. Вот смехыс лоас: пельтöм начальник, ха-ха-ха...

Кöр быдöс бочкаэз тырисö, Сергей котрасис деревняö, пасьталiс бöр ассис кöс ни паськöмсö, благодаритiс чуткöй отирöс.

— Нем понда, — шуисö сылö.

Вöлi пемдандор, кöр тыра плот вöввез отсöтöн вöлi кыскöма ферма дынö. Му вылö чапкöм потшшез кузя колхозниккез быглялiсö бочкаэсö шонтiсян керкуок бокö. Куим бочка Сергей быгыльтiс телегаö, клячалiс бытшöмика. Зинко Прокоп висьталiс сёжö, кыдз сiя öтiк тулысö инмывлöм вöрын ош гуö, повзьöтöм кулавлытöдз рукйöсь хозяинсö, и шуис медбöрын:

— Но, висьтав миянлö спасибо да ло здоров!

— Спасибо, ёрттэз, ыджыт спасибо тiянлö лесопунктiсь рабочöйезсянь. Кöр ковсяс отсöт, отсалам тiянлö тожö, — дзирыта шуис Сергей и жмитiс быдöнлiсь киэз.

Мöсвысьтiссез паськыта осьтöм синнэзöн видзöтiсö Сергей Комолов вылö. Дед Игнат гартсис сэтöн жö, клопöтiс оча ки и сё старайтчис чувйыштны Сергейлö бокас.

— Ах, нечистöй дук, ах, кульпиян, бöбöтiн менö лешки-вошки! Но ладно! Ошка сёжö. Морт тэ смелöй, а смелöй некытчö, батя, оз йöрмы. Лок жö пырам избушкаас, пусис чериваыс, кыв ньылыштан.

Сергей только öнi казялiс, кыдз сималiс сылöн кынöмыс. Быдса лун котрасис эд, эз и шоччись. Пырис избушкаас, пуксис пызан сайö да ловзисьтöг лэбтiс быдса котёлок.

— Тэ шоччисьышт невна, чукöрт вынтö, пригодитчас туяс, — баитiс Игнат. — Да и вöвветö шоччöтыштны колö.

Сергей öнi кывзiс ни стариксö, эз понды асныравны: пуксис горбокö и кунис синнэсö. Старик лонтöма горсö сэтчöдз, что кирпиччез бердö павкöтчыны оз туй, öд сiдз и ветлö, дзик баняын, лолавны немöн. Медбы не мешайтны Сергейлö, дед Игнат босьтiс сак да лэдзчис ю дорö кыйны чериок, инькаэз петiсö сёдны пода. Сергей кыдз вöлi, сiдз и онмöссис горбокас.

И — колö жö! Эз ешты зонка куньны синнэсö, кыдз воздухын чужис Леналöн чужöмыс. Сiя бабыв моз лэбзьыштiс кысянькö, öдззис бергавны воздухас, сибöтчис зонка дынö. Вот быд мигö мича чужöм тöдчö сё ятнöйжыка и ятнöйжыка, вот позьö ни адззыны, кыдз югьялöны пемытiнас нывкалöн синчачаэс, сотчöны дзик шомоккез и быдöс чужöмыс шынь видзö гажöна-гажöна.

— Бр-р! Онмöсси я мый я? — осьтiс синнэсö Сергей, зэгнитiс юрсö и аслыс эз верит: сы одзын избушкаас сулалiс нывка, вывтас пасьталöма кузь брезентовöй плащ, лэбтöм капюшон увтсянь дзуз видзöны лукавöй синоккез, рожабан йыввес гöрдöтöмась.

— Лена?

— Шоччись, шоччись! Сыбöрын баитыштам, — шыасис Лена. — Сейчас ме пыра бöр, только вöввезлö турун сета.

Голос Леналöн небытик, ласковöй, некытшöм признак абу, что лöгалö. Сергей чеччöвтiс местасис, кутiс сiйö пельпоннэзöт.

— Кыдз тэ татчö сюрин? Тэ вöввезöн локтiн?

— Конечно, горючöй жö колö. Эта... Гыровыс бертiс дзик гегдöм курöг, вот и ковсис...

Он дзик эз и вöвлы, пышшис Сергей дынiсь. Сiя отсалiс нывкалö юскыны коренниксö, личöтiс сбруя, сетiс зöр.

— Молодец, Ленок, — баитiс Сергей, кольччöм бочкаэсö телегаö быглявтöн.— Горючöйсö тырмöмви ваямö. Интересно, кыдз тэ логгесö вуджин, эн и вам?

— Логгесö вуджтöн ме вöв вылö пуксьывлi, — шуис Лена и неетша дивитiс Сергейöс: «Видзöт, кытшöм дошлöй — вежöртöма эд!»

Избушкаын шонтiсьтöн Лена висьталiс:

― Меным юöртiсö ни, кыдз тэ юсö вуджöмыт. Вон мöсвысьтiссес баитiсö. Ох, Серёжа, Серёжа! Кытшöм тэ сёжö...

— Кытшöм?

— Но... бесшабашнöй, упорнöй...

― Ха! Упорнöй! Эшö шуас вот геройöн. Зонка кылiс, кыдз рожабаннэс пыкнитiсö биöн. Öддьöн старайтчис сiя, медбы не гöрдöтны, но гöрдöтiс, топ и топ помидор лоис.

Нывка пукалiс горбокас, юрсö невна мышкыртöма, видзöтö кок нырресö. Не чужöмыс, не синнэс оз тыдалö Сергейлö, но не слепöй жö сiя, адззö, мый шогмö Ленаыскöт. «Ме йылiсь думайтö. Вог кутны да чупнитны бы сiйö, только лöсялас ли?» Беспияноккез вöрзисö моросын, чепсасьöны. Но Сергей öвтыштiс кинас, серöмтчис беззаботнöя. — Ме разь упорнöй? Чепуха! Вот Петька Угрин — мöдiк басни. Тöдан, мый сiя керöма? Начальникыс тшöктöма мунны Кондовникöт, вуджны Вильвасö пос вылöт. Этö лоö, шестьдесят километр круг керны, ашынöдз бы тырмис. Но и вот, гöнитöм сiя веськыта, эстi и вуджöм юсö.

— Эстi? Да кыдз жö сiдз?!

— Кыдз! Иньдöтöм жеребецсö ваас, сöтöм нагайкаöн и уйöма. Чожа, Натьтö, тракторрезöн локтас, кыскас ассис дизельсö. Вот сiя кытшöм, Петькаыс, а тэ — «Упорнöй».

— Ой, Серёжа, Серёжа, — дзирыта горöтчис паныт Лена. — Кытшöм зонкаэз эмöсь миян посёлокын! А эта...

— Эн баит сы йылiсь, оз ков...

Джын час мымда и пукалiсö нiя избушкаын, кытчöдз вöввез шоччисисö и марскисö чорыт зöр, а уна йылiсь ештiсö баитны эта кадö, висьталiсö быдöс, мый вöлi сьöлöмын и юрын. Сергей шоналiс совсем и видзöтлiс ни часы вылö, лöсьöтчис вöлi пасьтасьны, но Лена тшöктiс висьтавны эшö колхозниккез йылiсь.

— Да мый висьтасьнытö, быдлаын дзирыт сьöлöмаэс эмöсь. Отсалiсö...

И юöртiс быдöс, кыдз вöлi делоыс. Мöдiс и председатель йылiсь висьтавны, кыдз сiя норасис Макар Кузьмич вылö, но öшын увтын вдруг пондiсö топöтны сьöкыт сапоггез, дед Игнат сюйыштiс юрсö избушкаö, шыасис горöн:

— Вöр кывтö! Вöр кывтö!

Подавöдитiссез шумöн лэдзчисö ю дорö видзöтны первöй сплавсö, чирзiсö радöн, дзик челядёккез. Нылöн горöтлöм чушкис Сергейыс сьöлöмö. «Кытшöмкö лесопункт пондöтöма ни скатка, а Льöмваын горючöй абу...» Сiя шупыта пасьталiс куртка, чапкис пельпоннэз вылö плащ.

— Ленок, лöсьöтчы туйö. Вöр кывтö, вежöртiн? — И чепöссис вöввез дынö. — Öнi миянöс кыдз енöс видзчисьöны.

— Видзчисьöны, Серёжа, ой, видзчисьöны...

Кöр вöввез вöлiсö доддялöмöсь и бергöтöмöсь ни посёлоклань Лена сибöтчис Сергей дынö и шуис тöждiсьöмöн:

— А менö, натьтö, кошшöны...

— Кыдз этö? Кин кошшö?

— Ме жö гусьöн локтi. Кöр Викторыс бертiс, начальникным чуть весьö эз пöр — öдззис горöтлыны, видчыны. Мыччалiс сiя Гыровыслö пужсö, стрась! Удж вылiсь вашöтны мöдiс... Но ме эта коста и петi конторасис, некин эз и адззыв, кыдз гöнитi... Ме жö тöдi, что тэ горючöйтöг он лок...

— Вот кыдз! А ме думайтi, тэнö начальник иньдiс. М-да... А мый бы тэ баитiн сэк, кöр туй вылас несчастье аркмис, но, шуам...

— Ой, Серёжа, Серёжа! Да кытшöм жö несчастье шогмас, кöр ме... Но, тöдан... Кöр ме любита!

Öтöрын вöлi пемыт ни, небосянь сё пызитiс и пызитiс, ю дорын горалiс тулыс, ковöтiс визыв ваöн, орсiс йы торрезöн, ыджыт керрезöн, и только берег дорись пемыт вöр увгис гажтöма и тревожнöя, дзик бöрдiс, мыля одз сiйö саймöтiс тöвся кыз онiсь эта тулысыс.

Дата добавления: 2015-11-16