МЕДБÖРЬЯ ЮÖРРЕЗ 1 страница

(Авторсянь)

Кинкö сулалö менам спина сайын и орöттöг шушкö:

— Тырмас, сувтöт этчö точка.

Совет, конечно, бур. Ме ог вермы не кывзыны сiйö, и пуктi ни вöлi точка. Но таво арнас пода вöдитiссезлöн окружнöй совещаннё вылын ме видзчисьтöг пантаси Миколь Сенякöт. Медбöрья кадö сiя ёна вежсьöма: щеголяйтiс виль йöрнöсöн, синнэс югьялiсö гажöн и счастьеöн, нельки коккес, кажитчö, веськытжыкöсь лоöмась. Миколь Сеня кыдз вермис висьтасис меным сельскöй сход йылiсь. Дöнзьöма сёдаки Исай Сергеевичлö, соседдэс матегалöмась лёнсö, мыля не пыр олiс народ йылiсь заботаэзöн, вунöтлiс сельчанаыс олан йылiсь, öддьöнöв бöбалiс пишальöн.

— Но народ веритiс сылö, колис председательöн. Морт сiя бытшöм сё жö, честнöй, — юöртiс меным Сеня. — А Кузьмич...

А Кузьмичлöн оланыс Ректанас овсьöма. Лесничествоын сылö сетöмась сивилёнас, вашöтöмась удж вылiсь. Пондывлöм корсьыны колхозö, да кин сiйö сэтшöмсö примитас? Вот и дорöм керку öшыннэсö и мунöм семьянас кытчöкö леспромхозö.

Сеня пукалiс мекöт буфетын, öддьöн чöскыта сёйис жаритöм яй, юис жигулёвскöй сур, вöлi оланнас стрась довольнöй. Киас сьöкыт кружка видзикö, Сеня кыдзкö лукавöя, нельки бöбалöмöн нёджжöвтiс ме вылö и шуис шынньöвсорöн:

— А миян деревняын эшö öтiк дело вöлi... будичи!

— Но-но! Висьтась, Семён Николаевич, ме кывза. И сiя висьталiс.

Эта «делоын» главнöй геройнас бöра вöлöма сто годся дед Митипер. Арся Микола панытö пöрись морт решитöма невна юрбитыштны енлö. Кыкöн старухаыскöт мунöмась Максялöн баб ордö. Пырасö нiя куимöн жырас, пелитчасö гор сайö и давай славитны Христос-батюшкосö. Неетша поклоннэз тэчасö ен полка одзын, сякöй молитваэз лыддьöтасö. Сыбöрын довольнöйöсь, бодрöйöсь сувтасö коккез вылö, лöсьöтчасö ни петны гор сайсис, кыдз дед Митипер вдруг ыджыт вниманнёöн мöртас синнэсö святöй угодник чужöмö. Старик шамыртас тошсö кырымö, дыр вöрöтас тырппезöн.

— Диво, — шуöма сiя аскежас. — Диво...

И сэк жö кватитас угодниксö джаджок вылiсь, вайöтас синнэз одзö.

— Дзöт, сiя и эм. Пон кулись!

Старухаэз перво чуть весьö абу пöрöмась, сыбурна повзясö. Чожжык петасö гор сайись, кутчисясö киэзöн юррез бердö: ох, ох! Этö первöй минутаö сiдз, кöр оз на ештö садясьны. А кöр садясясö да вежöртасö быдöс, нiя, бытьтö томыник ичмоннез, давай жö ваксьыны да кульны ки долоннезöн боккезнысö: ах сiя, Макся, ох, супоней! Колö жö! Этта, мый керöма, кульпиян... Ха-ха-ха! Хи-хи-хи!

Сэтöн и лöгасяс дед Митипер, пондас кучиксис петны: «Мый тi баксатö, пöрись кокораэз, мыля бессö гажöтатö, разь эта шутка дело?»

И локтöма старухаыс одзö топ, юалöма сылiсь ехиднöя и строгöя:

— Тэ этö мыля Максялöн рожа вылö гожумбыт юрбитiн, пон кулисьлö кеймин? Вот ме тэнö, увья кикимораöс! Вот чичас! Ме вылö некöр эз юрбит, а Макся вылö каждöй лун...

И нюжöтас киэсö аслас старухалань, мöдöма кутны сiйö да невна гильöтыштны боккесö. И гильöтыштiс бы, мый сылiсь босьтан. Да старухаэс, кыкнанныс, ештöмась сёдаки öшöтчыны дедлöн тош бердö. И чуть абу торкöмась мортсö.

— Давай-ко, кума, пыртам сiйö, лешакöс, джоджулö. Корамö фершалöс, ась сэтчин, пемытiнас, укол проклённöйлö заваритö!

— Давай инö!

Кылас этшöмсö дед Митипер и но жö пыксьыны-вартчыны киöн и кокöн. Веретяын быдöн тöдö, что дед Митипер, кöда эшö неважын ветлывлiс ош вылö рогатинаöн, смерться öддьöнжык полö уколiсь. И часöт, медбы не öштыны джоджулын ловсö, сiя решитöма бöра «пессьыны»: давай жö чепсасьны то одзланьö, то бöрланьö. И мезмöма смертьыс киэзiсь! Сiя чепсасяс, чепсасяс да кыдз чеччöвтас порог сайö! Кыкнан старухасö петкöтöм тош бердас öтöрö...

— Дыр нiйö кыскалiс улича шöрöт! — кончитiс рассказсö Миколь Сеня. Эта коста сiя нельки эз и серöмтчы, бытьтö делоыс как раз сiдз и вöлi. — Лэдзасö старухаэз Митиперлiсь тошсö тожно, будичи, кöр старикыт иньдöтчас Пихтовöй йирлань. Пöдтыны ваас мöдöма ёрдöммесö... Дак!

— Гажöна тi олат! — шуи ме.

— А мыйнö... Вот чожа строитасö комплекс, пондам видзны куимись унажык пода. Сэк, будичи... эшö гажажык оланным лоас!

Сэтöн Миколь Сеня шынньöвтiс паськыта-паськыта, югйöвтiс быд чукырокöн, шуис ошшасьöмöн:

— А менам, адззан, виль часы эм. Тöн районнöй начальство бöра сетiс. Бура пö гожумнас уджалiн, примит виль часы. Пастухлö часытöг уджавны некыдз оз лöсяв.

ВЕРЕТЯ

(Орчч. повеськöт: Öтiк лун и öтiк ой)

I.

Деревня миян, Веретя, сулалö керöс увтын. Веретя сайын сразу жö пондöтчö вöр. Отир баитö, бытьтö сылöн и конецыс абу, орлытöг кыссьö пö топ Вятка волокöдз, а сыбöрын öтлаасьö тундракöт. Ыджыт сiя, настоящöй тайга, но веретинса лыддьöны асланысöн и шуöны вöрсö öддьöн простöя — Дзибья расöн.

Сюрны Дзибья расö кокнит. Колö только вуджны деревняыс увтiсь учöтик юок да инмыны кык йöр коласö, векнитик улицаö. Деревняыс дынын йöррес бытшöмöсь, керöмöсь волькыт потшшезiсь. Но джын верста мунöм бöрын позьö казявны, кыдз нiя жагвыв пöртчöны öсекö. Вуджны сiйö пода оз вермы: косьмöм уввез, кыдз штыккез, чуй видзöны öтмöдöрö, сiйö и видзöт, медбы не косявны кынöм нето вöра.

Эна кык йöр коласöт ветлöтöны отир и пода...

Веретинскöй сельсоветiсь председатель Исай Сергеевич Вольлапин бура тöдö, что йöррес кыссьöны, конечно жö, не тундраöдз. Петан Чукашор дынöдз и казялан, кыдз улицаыс пондö паськавны. Öт йöрыс крута кежö шульгалань, мымдакö мунö шорыс пöлöн, сэсся бöра чукыльтчö шульгалань и петö Веретя увтö. Сiя йöрйö паськыт ыб, кытöн таво путриктö шогдi. Мöд йöрыс кежö веськытлань и кыссьö топ Ректан деревняöдз. Сiя тожö кытшöвтö ыб, кыкись ыджытжыкö мöдысся, и сэтöн быд торыс эм: шор дорас кöдзöмась зöр, öтiк керöс покат вылын быгалö рудзöг, чуть ылынжык тыдалö анькытш, а вон сэтчин, Ректан бокас, учöтик расок сайын, колхозниккез кöдзöмась кукуруза.

Но не шогдi и не кукуруза интересуйтöны талун Исай Сергеевичöс. Мунö сiя Чукашор сайö, Дзибья расö, кытöн быдса месяц ни мöймуся öшкаэз да бракуйтöм мöссэз öктöны яй. Сельсоветiсь председательлö вдруг öддьöн охота лоис тöдны, кыдз таво подаыс вочмö, кыным граммöн содöны суткинас öшкаэз, кыдз олöны пастуххез. Вот и мунö видзöтны быдöс аслас синöн. Эм, конечно, и мöдiк мог...

Кынымкö год бöрланьын, Дзибья расö жö мунтöн, Исай Сергеевичöс монлалiс томыник ош. Шорокыс сайын и пантасис сiя, чеччöвтiс кöньöсся кызжык колодаэз сайсянь, зубыта сöтiс мортлö спинаас, уськöтiс кок йылiсь. Вот и верит отирлö, бытьтö ошшез некöр оз кутчисьö вермасьны морткöт, он кö вöрзьöт нiйö. Вольлапин и кваркыш эз ешты керны, кыдз сюрис зверьыс увтö. Бур кöть сiя, что вына тожö вöлi, ошыс кодь жö: паськыт мороса да кыз кисойеза, а то беда бы. Исай Сергеевич ештiс гöленищеись кыскыны лэчыт пурт да ёткыны сiйö оропви ошыс кынöмö. Годовöй пестун рявкнитiс и чеччöвтiс вöрö, выскыррез сайö, а Исай Сергеевич кынöм вылас кыссис бöр Веретяö: шульга кокыс вöлi чегöма.

Мунö сiя талун и невна крöмликтö. Мунö и касьтывлö, кыдз вöлi делоыс. Усяс вöрас кöс ув, дзуркнитас тöлок увтын косьмöм пу — Исай Сергеевичлöн синнэс дзарнитöны ни эна шыэзлань. Повны сiя оз пов, не сэтшöм морт, медбы дрöгнитны кытшöмкö ризьнитöмись, — просто синнэс паськытжыкöсь лоисö. Беда велöтас лоны осторожнöйöн.

Исай Сергеевич чужис и быдмис Веретяын, вöралiссез коласын, но сiя кадöдз, кытчöдз эз шедлы Мишаыс увтö, киас пишаль некöр эз босьтлы. Эз кыскы сiйö эта штука дынö, некытшöм интерес эз вöв. А кöр петiс районнöй больницаись, кытöн веськöтiс коксö, мужик первöй делоöн кежлiс магазинö, бöрйис öддьöн бур двухстволка и, гортас крöмликтiкö, лыйис телеграфнöй столб вылiсь ракаöс. И сэтшöм бытшöма эта шогмис, что мужикыт сьöлöмсянь радуйтчис, кыдз кагаок. Сыбöрын босьтiс ракасö, лыддис, кыным дробь инмöмась сылö моросас, и вайис вийöм кайсö горт деревня дынöдз. И только сэк, кöр казялiс, что эта ракаись нем он пу не он пöжав, чапкис сiйö кинкö карчйöрö.

Эта рака вöлöм не простöй, а кытшöмкö волшебнöй я мый я. Эз сiя сет Исай Сергеевичлö не спокой не он. Мый бы эз кер сельсоветiсь председатель, а эз понды вермыны узьны, кытчöдз оз вий кытшöм-нибудь каёкöс. Вöравны, конечно, сiя эз куж, таррезöс да сьöлаэзöс вийны эз вермы, а кöрымкайезöс, катшаэзöс, чавканнэзöс паздiс не етша, паздiс сэтчöдз, что Ректан деревняись лесник Кузьма Кузьмич öтпыр шуис иньыслö:

— Бытшöм браконьер лоас. А браконьер — миян нянь... Сэсся мунiс сельсоветö, сетiс Исай Сергеевичлö выговор:

— Кöть тэ и председатель, а накажитам, он кö дугды бöбавны. Позьö разь колана кайезöс сымда вийны? Муна тöн Öкуль Ягöт, а туй вылас быдса куча пичиккез валяйтчöны. Мыйлö тэ нiйö вийин?

Грубöйкодь морт вöлi Исай Сергеевич, «карактернöй», и вермис бы висьтавны лесникыслö, мед юрсö эз сюй, кытчö оз ков, мед перво кутö да вöлись баитö, но талун гöрдöтiс, кыдз зоночка, кöдö пельöттяс петкöтiсö йöз карчйöрись. Председатель только и вермис шуны:

— Сэсся öтiк ракаöс ог вий. Веритан, ог вий!

Кузьма Кузьмич, хитрöя шыннялiкö, мунiс гортас: «Ог пö вий... ха-ха-ха! Виян...» А Исай Сергеевич пондiс думайтны, мый сылö öнi керны пишальнас. Кытшöмкö бес пукалiс моросын, чепсасис, корсис петны öтöрö, мунны вöрö и не простöй киэзöн, а пишальöн. Сельсоветскöй делоэз решайтiкö, юрас пыр вöлi öтiк дума — пишаль. Локтас гортö, а пишаль — вот сiя — öшалö кровать весьтын, сiдз и корсьö киö. А босьтны киö немлö: кинöс виян деревняас?

Öтпыр рытнас Исай Сергеевич юалiс иньыслiсь:

— Тэ, тыдалö, бöра окрошка лöсьöтан ужнайтны? Бöра только öтiк ва?

— Мый нö тэ, Исаюшко, ылалiн я мый я? — горöтчис паныт иньыс. — Гожумнас окрошкасö кин оз сёй? Свежöй огуреццез, быдкодь зелень. А ме вот эшö кушманок тёрита. Бур сёяныс...

— «Кушманок», — нерис иньсö Исай Сергеевич. — А яй тор мыля он пукты?

Иньыс только клоп вачкис кыкнан кинас боккес кузя:

— О господи! Да тэнчит вийöм ракаэсö я мый я пуа? Яйыс эшö ыб вылын ветлöтö.

— А типпез пöжин таво? Пöжин! Джыныс петушоккез петалöмась, сiдз эд? Но дак öтiклiсь юрсö позис бы и мургыльтны...

Исай Сергеевич эшö мыйкö мöдiс висьтавны, но вдруг тшöк мунiс, Сiя перыта чеччöвтiс местасис, уськöтчис пишаль дынö.

― Марья! — рявкнитiс горöн и гажöна. — Марья! Вот адззылан, яй лоас.

Минута бöртi Исай Сергеевич, кыдз ылöстöм, котрасис типпез сьöрын, старайтчис вашöтны ылöжык горт дынсис. И кöр öтiк петушок торйöтчис ёрттэс дынiсь да, борддэсö паськöтöмöн, котöртiс карчйöр бокöт, Исай Сергеевич метитчис сыö пишались да гымгис-лыйис. Петушок чеччöвтiс саженься вылынжыка и сунгисис петшöррез коласö. Поснитик гöн лэбзис öтмöдöрö, плавнöя уялiс рытся воздухын.

Эта рытсянь Исай Сергеевич керку дынын чуть да и бöра кывлiс пишались лыйсьöм. Хозяин лыйлiс петушоккезöс. Иньыс только клопöтiс боккесö да ванзiс синва сорöн:

— Ылалiс! Совсем ылалiс! О господи, господи...

Соседдэз только жмитлiсö пельпоннэзöн. Исай Сергеевич — сельсоветiсь председатель, начальник. Пондыв, висьтав сылö, что öддьöнöв бöбалö пишальöн... Оз лöсяв. Да и кинлiсь петушоккесö лыйлö? Ассис. А хозяин — барин. Мый сылö охота, сiйö и керас. Охота лоас — черöн юррезнысö орлалас, охота — пишались лыяс, а вермас и гöн сорöн жаритны да сёйны. Кинлö кытшöм дело?

Но вöлöма дело öтiк мортлö. Вовлiс сельсоветö бöра Кузьма Кузьмич, баитыштiс-керис öтiк-мöдiк йылiсь, а сыбöрын явитiс:

— Ошöс адззылi Чукашор дынiсь! Ыджыт, сатана! Эх, вöлi бы менам пишальö сэтшöм жö, кытшöм тэнат — вийи бы заразаöс. Но умöль пишальö, эг лысьт лыйны... Ошыс сэтöн и олö, Чукашор дынас, колхознöй мöссэзöс вöджжö. А тэ... Эх, петушоккезöс лыйлан...

Лесник инмис точкаö, öзтiс Исай Сергеевичöс. И бöра хитрöя шыннялiс, гортас мунтöн: «Лыяс... ха-ха-ха! Сiдз и тöд — лыяс!»

Мунö талун Исай Сергеевич, нöбöтö пельпон сайын двухстволка, малалыштлö киöн патронташ. Патроннэз сэтöн тыр. И быдыс зарядитöма пуляöн. Аскерöм гранёнöй пуляöн. Сто грамм мымда лэбтас быд пуляыс. Шмоткас сэтшöмыс ош кымöсö — и готово дело.

Чукашор дынын улица паськалiс, йöррез торьясисö. Торьясисö и туёккез. Öтiк кежис веськытлань, чуклясьöмöн кыссис шорыс пöлöн, мöдiк пырис шульгаланись кусттэз увтö. Паськытжык туёкыс, кöда öддьöнжык тальöма пода и отир коккезöн, мунiс веськыта Дзибья расö. Эта туёк вуджö уна логгез, уна шоррез, чуклясьö сэтчöдз, кытчöдз оз пет Кöрвийöмö. Кöрвийöм — ыджыт палёж. Кöркö гуляйтöма сэтчин би, палитöма вöрсö. Öнi сулалöны кöс пожуммез, сотчöм бока кöззэз да сiсь гырка пипуэз. Баитöны, бытьтö пö Веретясис öтiк вöралiсь вийöма кöркö татöн оленьöс — кöрöс. Озö нiя олö татöн, пермяцкöй вöррезас, ветлöтöны кытöнкö тундра дынын, а эта ылавлöм кысянькö. Ылавлöм и шедöма вийны. Вот и ним лоис палитöм вöрыслö — Кöрвийöм.

Кöрвийöмын мортлö моросви путриктö небытик турун, и колхозниккез йöрйисö палёжсö öсеккезöн, керисö торья загоннэз, весöтiсö шоррез дынö туёккез и пондiсö видзны татöн пода. Пастух Миков Сеня дозирайтö зоныскöт сотняся унажык öшкаöс да бракуйтöм куканьöс, öктö колхозлö яй.

Кыным пыдöжык пыран Дзибья расö, сыным пемытжык лоö. Тоша кöззэзлöн сьöкыт уввез öшöтчöмась туйыс весьтö, сырйöны чужöм, сапоггез чуть да и бöра падмöны муись петöм кыз вужжез бердö. Кöть гожум, а вöрас руыс уль, сiсьмöм тшак дукöн нырö вачкö. Пöльтыштлö тöлок. Кайез татöн етша. Öтi-öтi кылöны нылöн голоссэз. Пи-пи-пис... чив-чив-чив... Неылын ыджыт шумöн лэбтiсис тар. Исай Сергеевич чепöссис сы сьöрö, лэбтывлiс ни пишальсö, но лэдзис бöр. Он жö понды пуляöн вийны тарсö! Вот ош — эта мöдiк дело. Тöдö председатель и сiйö, что вийны тарсö öнi оз туй — Кузьма Кузьмич лэбтас шум, позоритас. А виян ошöс, дак спасибо висьталасö пастуххез, да и колхозниккез ошкасö...

Öтiк лог дынын туёк жагвыв кежис бокö, ордйис паськыт нюр... Эта нюрсянь больгöмöн визывтö ыджыткодь шор, нöбöтö логыс пыдöсöт мöймуся кöс турун заэз, сьöдöтöм листтэз да патшыра голиэз.

Таланись берегын кöркö мунöма тöвчик, пöрлалöма крест-накрест ыджыт пуэз. Öтiк пу инмöма усьны сай берегас, поперегалöма шорсö. Паськыт уввес косьмöмась ни, пондöтчöмась сiсьмыны, а пуыс ён эшö. Сы вылöт и вуджöны шор саяс. Исай Сергеевич керис кыз чигарка, пуксис колодаыс вылö. Вит километр мымда, натьтö, оськалiс, мыдзис, да и дойдöм кокыт сё ни жö дойдöм: невна и мунан, а пондö садейтны. Исай Сергеевич нюжöтiс коксö, пишальсö сувтöтiс колода бокö. Гажа татöн местаыс, бытшöм. Луныс жар, а эстöн ыркыт, лолассьö долыта. Öтiк умöль — ош оз пантась. Не весь шуöны: мунан вöрö кошшыны телега радз вылö нето мöдiк кытшöм тор вылö чукыля пу, дак быдöс кöзоккесö и кыдзоккесö дзик син одзын кинкö веськöтас.

Исай Сергеевич босьтiс юр вывсис быгалöм фуражка, чышкис сiйöн пымалöм кымöссö, ыш ловзисис. Гажтöм, кöр видзчисян ошöс, а сiя оз пантась!..

II

Бытшöм местаö пуксис шоччисьны Исай Сергеевич. Кольлам сiйö этчö, ась пукалыштö, а асьным мунам чожжык одзлань: вуджам веськыта паськыт нюрсö, локтам Кöрвийöмö. Кöрвийöмын тожö местаыс бытшöм, и эм татöн настоящöй олан. Горöн тронгöны джынняннэз, кылöны силькан шыэз, и ой и лун лявгö учöтик понок. Кыдз сылöн мылаыс оз быр, öтнас лешак тöдö. Ойнас сiя полö ошшезлiсь, сiйöн и жмитчö подаыс бердö, вувтö кежгöтчöмöн. Луннас Шарик радуйтчö шондiлö, аслас хозяинлö, зоночка Гришалö и тожö никсö и лявгö. Кытчö нö воштiсян: кöть пон, а бура тöдö, что вердöны сiйö дугдывтöг вувтöмыс понда. Кöрвийöмын сулалö избушка, öнi зоночка Гриша лонтö гор и жаритö тшак, пуö похлёбка да каша. Гришалöн айыс — Миков Сеня — мунiс йöрйыны туруна виль места, керны виль загон. Тюк да тюк, тюк да тюк кылö неыджыт шор дынын. Сеня пöрлалö кöзоккез, тэчö нiйö öтамöд вылö. Нёджжöвтан и сразу казялан — öсек шогмö.

Миков Сеня — учöтик мыгöра нездоровöй мужик. Быдöс сiя косьмöма, коккес чукыльтчöмась, чужöмыс кык чунь пасьта, рушмöм, кыдз шондi вылын тшак, сьöдöтöм. Тош эта чужöм вылö, кыдз назьмиттöм му вылö сю, оз быдмы. Öтiк тылöп öт рожабан вылас петöм, мöдiк — мöд вылас, куимöт — читкыльтчöма тырп дорас — вот тэныт и тош. Мый бурыс эм эта чужöм вылын, дак только разь синнэз: ыджытöсь, голубöйöсь, добрöйöсь. Ныын, кыдз зеркалоын, тыдалö Миков Сенялöн душаыс — небытик да рам. Баитöны, кöркö томнас Миков Сеня быдса бутыль самогон юöма, усьöма лым вылö да сэтöн и узьöм. Сэксянь абу ни адззывлöма бур ойлунсö.

Мужичок эта безответнöй, асьсö дорйытöн кыв оз вермы висьтавны. Мукöд морт керас кытшöм-либо нёштöм дело, сымда сорас да панас — самöй раз бы решётка сайö, — видзöтан — прав кольччö, а Миков Сенялö быдлаын, кыдз баитöны Веретяын, клин да палка. Мöйму гожумнас сiя сьöлаöс вийöма. Но и мый бы сэсь? Вийин дак тыткы, кин тэнö кутас сьöланас эта Дзибья расын? Дак нет, Миков Сеня и сiйöн шедöма. Кузьма Кузьмич штрафуйтöм мужиктö полтинник вылö да эшö сьöласö мырддьöм. Кывсьывлiс, пондывлöма мырддьыны и пишальсö, но Сеня «чапкöма» мыйкö Кузьмичыслö.

― Да мый ни эта сэтшöмыс, кытшöм ни эта олан? — видчö иньыс. — Да тэнчит тай кывтö гаггез сёйöмась, да öмат тай кашаыс кынмöма! Да не виноват жö тэ, сюрис сьöлаокыс дак!

― А мый... Ме тай баита вöлi... Дак мый... — только и вермис шыасьны Сеня.

Иньыс, ыджыт мыгöра, кыз корпöса, — кöть кытшöм ыбöс сылö векнитöв, — вына и сэтшöм лöг — синнэзас биэз югьялöны. Видас, видас сiя мужиксö быдкодь нёштöм кывнас, а Сеня паныт и горöтчыны нем оз ешты.

Сэтшöм морттэсö деревняын озö любитö, озö нiйö вежöртö, сеталöны нылö быдкодь нёштöм нимкоддез, и овсьö сэтшöммеслö сьöкыта. А Сенялö овсьö кыкись сьöкытжыка, мыля семьяыс ыджыт. Куим нылочка быдмöны, школаын эшö оз и велöтчö, кык зоночка котрасьöны гожумнас эшö вешьянтöг, только Гришалö и тырис четырнадцать год, таво кончитiс кватьöт класс, öнi отсасьö айыслö. Челядьсö Сеня любитö, и кöр иньыс öддьöнöв пондас норасьны, мыля нiя уна, Сеня баитö нежнöя:

— Чöв, Парась... Вот быдмасö... Тожно! Красуйтчыны пондам... Ая-зона öнi шедтöны трудоденнез уна, нянь босьтöны дивоöн, да кыдзкö сё сiдз шогмö, что нем бурыс абу. Паськöмок Сеня вылын только сiя и эм бытшöмжыкыс, кöдö сетiс колхознöй правленнё кыдз пастухлö, — брезентовöй плащ да кирзовöй сапоггез.

— Вот... — мукöдпырся баитлö зоныслö Сеня. — Вот дак сiдз, мыся... кулямö таво унажык бадь кач... посадö кыскам... Деньга тыр лоас... Дак...

Бадь качсö посадын былись примитöны, кило понда сетöны дас копейка, и ая-зона мукöдпырся кульöны сiйö. Уна татöн, шор дорас, бадьыс быдмö, конец абу, да унасö тожö он куль: сотня мымда куканнес — дозирайтны колö. Только кутчан бадь бердö, а сэтöн быгалöм сина порозок пешлö ни кöш кымöснас йöрсö, петö бы загонсис, тэрмасьö ош дынö.

Подасö Сеня любитö, дозирайтö и вердö бура. Мöйму быд куканёк суткинас килоöн содöма, Сенялö колхознöй правленнё сетöма премия. Корлöмась Сеняöс и районнöй совещаннё вылö, сэтчин сетöмась дона часы, да счастьеыт абу дак эд мöдiклiсь он одзöст: гортас локтiкö öштöма часысö.

Талун луныс гажа, шоныт, и Сенялöн сьöлöм вылас долыт. Уджалö и видзöтлö гусьöник шондi вылö — чожа я павжун?

— Ая! — чирзö кылö Гриша. — Бöра мöсыс локтiс! Ая-а!

А беда тай эта мöскöт! Бöра Миков Сеняöс костiалö.

Таво тулыснас öтiк мöсок вдруг пондiс шогавны и йöвсявтöнняс вайис куканёксö кулöмö. Мыля сiдз шогмис — некин оз тöд. Может, умöль вердас вöлi, может, доймис, а может, эшö мый-нибудь. Чожа подавöдитиссез казялiсö, что сылöн и вöраыс косьмöм. Вöлi вежöртана — видзны сiйö оз туй, абу некытшöм выгода. Мöдiсö нуöтны заготскотö, да кин сэтчин примитас? Мöсок сэтчöдз умöльтчöма, только кучик да коскаэз. Думайтiсö-керисö и сетiсö сiйö Миков Сенялö.

— Кулас дак кулас, а оз дак оз...

А Миков Сенялö мый? Сетöны — колö босьтны. Иньыс висьталiс жö, что кулас, дак дöнзяс сэк Сенялö, но мöдыт споритны оз куж. Вашöтiс мöссö öтлаын табуныскöт Кöрвийöмö, вердiс торья загонын, юкталiс кытшöмкö лекарствоэзöн и мый главнöйыс — некöр эз вунöтлы высьтыны. Перво капля-мöдöн и петлiс йöлыс, пань мымда вайлiс. А öнi дивуйтчы — быдса литр вайö да сэтшöм сукö, кыдз сметана. Скотина вöлöма вежöра: пондiс сёйны, юны и, кытчöдз он высьты, некöр оз мун йирсьыны — сэтöн и буалö-баксö избушкаыс дынын. Талун Сеня уджалiкас вунöтiс сiйö высьтыны. И öнi, избушка дынö локтiкö, радуйтчö: вочмас, пожалуй, арöдззас, йöв сетны пондас. Да, кöть бы вочмис*, эз* кув, а то правленнё винитны пондас, а иньыс пешлас бöра медбöрья юрси тылöппесö...

— Гришка, готов сёяныт?

— Готов, ая... Тшакыс öддьöн чöскыт и кашаыс тожö...

— Вот, ужо... Часöт, мыся, йöв лоас, дак... — Сеня миссьöтiс киэсö шорас, гывьялiс чужöмсö, чышкисис плащ поланас.

Гриша петкöтiс чумантыр шоныт ва, Сеня гывьялiс мöслiсь вöрасö, малалiс чорыт киэзнас, сэсся öдззис высьтыны. Вöснитик-вöснитик чочком сунисокöн йöв визывтiс чуманас. Мöс эта коста небурика öвтiс бöжнас, синнэзас югьялiс счастье. Шарик нюжвыла никсiс сэтöн жö, видзчисис парнöй йöвсö. Гриша шöралiс нянь. Картина вöлi мирнöй.

И вдруг пон унньöвтiс лёкгоршöн, дзик лэчыт йыла майöгöн чувйыштiсö бокас, пуляöн чепöссис öсек сайö. Мöс лэбтiс юрсö, повзьöмувьяс тэчкис Сеня чуманö, швычкис чужöм кузя бöжнас и, нёштöма баксiкö, котöртiс пельöс сайö. Сеня чер-бар летитiс гатш. Мый лоис? Совсем неылын, вöрас, кинкö бузгис-лыйис пишались да сэтшöм горöн, что говк чанöтiс пеллез и, кажитчö, быдöн, кин вöлi ловья, чеччöвтiс местаись, öдззис котöртны и лэбзьыны. Пуэз вылын вöрисö листтэз.

— Гришка-а-а! — горöтiс Сеня и проворнöя чеччöвтiс кок йылö.

— Мый?

— Кинкö лыйис вöрас! Дзик пушкаись лыйис, тожно!

— Вöралö кинкö...

— Бöбöв! Кинлö öнi вöравнытö? Кинкö ошöс вийис, мыся! Петкöт пишальöс, котöрта... Отсöт колас... дак!

Гриша петкöтiс важ берданка. Сеня кватитiс сiйö и кыдз вöлi, сiдз и чепöссис шор саяс. Пон уннялöмöн лэбзис кытiкö чашьяöт, и Сеня вöтчис сы сьöрö, котöртiс сувтчывтöг. Лэчыт еммеза лыссэз сырйисö чужöм кузя, гыжьясисö, но пастух зубытсö эз и кыв, сё котöртiс и котöртiс, чеччöвтöмöн вуджис шорсö, пырис кусттэз коласö. Пон уннялiс совсем матын, нёштöма эрзiс и кылiс, кыдз пурис кинöскö.

Эта вöрын быд мырок и быд кöчка Сенялö вöлi тöдса. Быд туёкыс вöлi тальöма чукыля коккезöн. Сеня эз пов татöн некинiсь, лыддис вöрсö асласöн и только öтiк зверь спокой эз сет — этö ош. Сеня лыддис вöрас асьсö хозяинöн, ош — асьсö. Хищник пыр ветлöтiс матi, грöзитчис гыжьявны джын табунсö. Сеня тöдiс этö и кöть кöр вöлi готов пантавны сiйö. Умöлик пишальыс сылöн, ложаыс быдöс каттьöма проволокаöн, дулоыс сiмöм, но сёжö пишаль. И зарядитöм сiя пуляöн...

Неыджыт кушинок вылын Сеня шоччöтiс ловсö, сулалыштiс, невна кывзiсис. Пон дугдiс лявгыны, но кытöнкö неылын кадiсь кадö кылiс сылöн эрзöм. И эшö кылiс, кыдз совсем матын, нюр дорас, ризьöтiсö кöс уввез, буткöтiсö кинлöнкö сьöкыт сапоггез. Матi котöртiс морт, котöртiс, кыдз и Сеня, веськыта, туйтöг. «Неужели пышшис зверьыс?» — думайтыштiс пастух и горöтiс поныслö:

Дата добавления: 2015-11-16