МЕДБÖРЬЯ ЮÖРРЕЗ 2 страница

— Шарик! Шарик!

— Эр-р-р!

Пон вöлöма совсем ордчöн. Неыджыт бадь кусттэз сайын сiя пурис кытшöмкö зверьöс. Сеня чеччöвтiс сылань, перыта лöсьöтчис лыйны. И бöрöн-бöрöн петитчис ылöжык, петитчис сэтчöдз, кытчöдз эз падмы колода бердö. Быд торсö видзчисис Сеня эта вöрын, но только не сiйö, мый казялiс. Кусттэз сайын вартчис ранитöм лось... Пон летiс сылiсь горшсö, юис ранаись вир...

Сеня дыр сулалiс киэсö öшöтöмöн, эз тöд, мый керны. Мöдiс мунны чожжык бöр аслас избушкаö, пышшыны. Вöлi и сэтшöм дума: вöтчыны сы сьöрö, кöда котöртiс нюр саяс. Но коккес эз кывзö, дзик кынмисö. А пон сё эрзiс сэтöн и летiс лосьсö. Сеня босьтiс пишальсö дулоöт, сьöкыт шаггезöн локтiс зверьыс дынö, зубыта öбыртiс поныс спина кузя.

— Дак... мыся!

И сэтöн гымнитiс-лыйис пишальыс. Лöзкодь би югöр чавкнитiс дулосис, пемдöтiс синнэз. Сеня совсем öшис артсис, дыр малалiс ньылöма лысинасö, боккесö, мороссö и, кöр казялiс, что ловья, радуйтчöмöн гогинялiс юрнас! Ловья! Эта öддьöн гажöтiс Сеняöс, но Шариклöн уннялöмыс сразу жö дзугыльтiс сьöлöмсö. Лось! То сiя, эшö совсем неважын гордöй и величавöй, куйлö сы одзын, вартсьö бöрись коккезнас му бердö. Сы паськыт синнэзын везъясис шог, кыдз бусöсь зеркалоын тöдчисö онняюрöн сувтöм кöзоккез, бадь кусттэз, быдкодь турун заэз.

― Гришка-а! Лок, мыся... Беда-а! Лось сэтöн...

— А-а! — говкöн шыасис вöрыс.

Сенялö кажитчис, бытьтö кинкö кешитчöмöн шуис: «А-а... шедiн!»

III

Лось вöлi ыджыт, ён. Кыдз опытнöй подавöдитiсь, Сеня думанас öшлiс сiйö и петiс кык центнерся неетшажык чистöй яйыс. Пуля жвангöма сылö одзись лопаткаэс увтö, мунöма шучкöп. Сеня тöдiс, что горшсö сылiсь колö öнi жö орöтны, лэдзны вирсö, нето тшыкас яйыс и некин сiйö оз понды сёйны. Но кыскыны голенищеись пурт некыдз эз решитчы. Сулалiс сэтöн, пишальыс вылö нырыштсьöмöн, юрас ветлiсö сьöкыт думаэз. Чувствуйтiс мужик, что кинлöкö павкас или оз зверьсö вийöм понда, а сылö, Миков Сенялö, дöнзяс бöра. Кин эстöн пишальöн ветлöтö? Сiя, Сеня. Кин мöйму сьöлаöс гожумнас вийис? Бöра жö Сеня. Ох, сьöкыт му вылас овны! Вöрзис пастухлöн сьöлöмыс, голубöй и добрöй синнэсö вевттис сэтшöм жö вез, кытшöм вöлi лосьыслöн куньсьытöм синнэзын. Сы одзын сулалiс ни иньыслöн фигураыс и, кажитчö, нюжöтiс ни киэсö, медбы кутчисьны юрси бердö. Чужöмыс лöг, истово сатаналöн, öмыс пиньöвтчöм, киэс дрöжитöны, синнэс бичиррез койöны. «Мый, кырныш, — жекыртiс сiя пиннесö. — Шедiн бöра? Кытчö прокыт абу, а сэтчö тырмис?»

Дзарнитiс Сеня сы чужöмö, а сiя, чужöмыс, совсем не шадра, совсем не иньыслöн. Ыджыт ныра, тшöтшкöртöм сьöд усоккеза, гöрд рожабан йыввеза паськыт рожа шыннялiс сы одзын, шыннялiс кешитчöмöн, ехиднöя. «О господи, — Сеня тувдiс местаас, — да эта эд ачыс Кузьма Кузьмич!»

— Пöрöтiн? Даровöй яёк охота лоис сёйыштны? — сысйöвтiс сiя пиннес пыр и нетшкöвтiс Сеня киись пишальсö: — Сiдз! Сё эшö тшынöтö...

― Дак... Вийис тай кинкö, мыся...

— Баит! «Кинкö!» Лешакыс я мый я петалiс? Тöда ме тэнö.

Да, кыдз думайтiс Сеня, сiдз сiя и петö, тыдалö. Оз вермы эта морт дорйыны асьсö. Каша сы öмын кынмöма, кыдз баитö иньыс, кывсö гаггез бытшкалöмась. Сеня тöдö ни, мый сiйö видзчисьö: лесник эшö рявзöв-керас, повзьöтас сiйö кулавлытöдз, а вöлись кыскас бумага и гижас акт. Мöйму, кöр вийис сьöласö, как раз сiдз и вöлi быдöс.

— Дак... не ме, мыся, вийи...

Лесник öмалiс сiйö:

— Голяыт кыз — вежтiсян. Пятьсот руб только сулалö. Да... Виль деньгаöн, конечно. А оз адззись сымдаыс, дак принуд сетасö...

Кузьма Кузьмич кыскис голенищеись лэчыт пурт, шупыта орöтiс лосьыслiсь горшсö, лöсьöтчис кульны зверьсö. Сеня казялiс, что пурт оропыс омöн вевттисьöма бурöй пятноэзöн, и вежöртiс: вирöн боссьöма пуыс. Неетша, тыдалö, эта пурт потрошитöм аслас векын быдкодь зверьсö да подасö. Дрöж кутiс пастухöс. Мылякö пырис юрö, что Кузьма Кузьмич обязательно песöв-керас сiйö, вартлас. Лесникыс жö шупыта и кужöмöн кулис зверьсö, пишкис горöн и порой пыдына ыш лолалiс, дзик кинöскö жалейтiс. Синнэз сылöн дугдiсö кöдзны бичирресö, öм дорас кынмис чукыля шынньöв.

— Но, кыдз — акт пондам гижны? — вешьян кок бердас киэсö чышкикö юалiс лесник.

— Дак... будичи... не ме, мыся...

Ышки-пойки локтiс Гриша, повзьöм синнэсö мöртiс лосяс, сэсся дзарнитiс айыс чужöмö.

— Кин сiйö, ая?

— Эва, кин?! — нюмыртiс тырппесö Кузьма Кузьмич. — Вон пöрöтöма!

— Айö? Да сiя мöс высьтiс, кöр лыйисö вöрас.

— Баит! Адззан, пишаль дулосис сё эшö тшын петö... Лесник кыскис косксис чер, öдззис керавны яй.

Пастухлö неохота вöлi жöдзны сэтöн и лöсьöтчис мунны аслас мирнöй пода дынö, избушкаö, но лесник сувтöтiс:

— Терпитышт, кытчö тэрмасян? А тэ, — горöтчис Гришалö, — марш татiсь. Мун, дозирайт подасö. Но, кинлö баита?

И кöр Гришалöн спинаыс саясис бадь кусттэз сайö, лесник локтiс Сеня дынö, пуктiс сьöкыт кисö сы пельпон вылö.

— Вот мый, Семён Миколаевич, — горöтчис чорыта и лöгöнмоз. — Морт тэ умнöй, уна баитны он любит. Но дак кывзы: эн лёб некинлö, что лосьсö вийин. Чöв! Абу меным некытшöм выгода кульыштны тэнчит пятьсот рубсö, вежöртiн? Ачым тöда: абу тэнат деньгаыс. Но дак вот — чöв! Ме тэныт бурö кера, тэ меным тожö мый-нибудь бурö керан. Лоам кыдз добрöй морттэз... Вот туруналi талун, ытшкиси Пикан лог дорас. А уна я öтнам ытшка? Сiдз — ноша турун. Вот и отсалiн бы меным, йöрт ашын подасö загонас, ась йирсьöны, а ачыт лок видзокö вылö. Литовка верман не вайны. Эм менам лишньöй... Кöдöн мöйму...

Лесник баитiс не тэрмасьöмöн, быд кывсö дзик вессэз вылын öшлiс, но Сеня вежöртiс сiйö не сразу, только мигайтiс голубöй синнэзнас да часто осьтлiс öмсö — мыйкö мöдiс жö висьтавны... А кöр вежöртiс, радмис. Ытшкисьны? Да господи! Конечно, позяс! Ытшкисьны Сеня вермас, заптас турун. Сьöкыт, конечно, уджыс, но сёжö не пятьсот руб вежтыны!

— А лосьсö верман невночкаöн сёйны. Только эн шед, осьта öм! Но мый, оча ки?

— Дак мый... Ме тай баита вöлi... Кöть и не ме вийи, да...

Сеня эз куж сайлавны ассис радуйтчöмсö. Лесник ёна жмитiс сылiсь кисö, дыр треситiс. И лэдзис Сеняöс избушкаö. Сеня мунiс, юрсö öшöтöмöн, мунiс пишальтöг: Кузьмич сiйö мырддис сёжö.

Джын час мымда эшö лесник дзöрис лосьыс дынын. Сiя кулис симöт, керис ыджыт чуманнэз, чуманнэзас тэчис миськалöм яй и вöтьöтiс нiйö шорас. Шорас ваыс ключевöй, кöдзыт, неделя сэтöн куйлас яйыс и немымда оз тшык. Сэсся Кузьмич öктiс лыссэз да быдкодь ёг, сайöвтiс быдöс воровскöй следдэсö. И мунiс Пикан лог дорö, аслас видз вылö.

Сёр рытöдз уджалiс сэтöн Кузьма Кузьмич. Вжи-вжи-вжи... Литовка бур, лэчыт. Турун липакöн водiс му вылö, шогмис кыз кошенина. Джын гектар мымда бритiс лесник и нельки эз мыдз. Кокнитöсь вöлiсö юрас думаэз. Быдöс шогмис сiдз, кыдз думайтiс. Исай Сергеевич шедiс капканö.

«Öнi керан тэ меным öтiк дело», — бадь куст вылö литовкасö öшöтiкö шынньöвтiс лесник.

Керас я? Может, ерепенитчыны пондас? И лесник чорыта решитiс: оз! Полiсь сiя, стыдитчись. Оз лысьт явитны йöзыслö, что бöбалiс вöрас. Вон сэк кыдз гöрдöтiс, кöр пичиккес йылiсь басниыс мунiс, кыв сетiс — ог пö сэсся понды лыйсьыны... Ха-ха-ха... Вот тэныт и эз!

И Кузьма Кузьмич бöра серöмтчис аскежас, серöмтчис довольнöя. Не весь быдса пуд сов видзис, коялiс шор дорас, медбы лоссесö велöтны сэтчö. Мöдiс ачыс вийны зверьсö, но да ладно, йöз киэзöн буржык öгырсö куравны. Öнi позьö не тöждiсьны, Исай Сергеевич сетас быдöс, мый колö...

Гортас мунтöн Кузьма Кузьмич кежалiс шор дорас, ыджыт пестерö тэчис свежöй яй, иньдöтчис Ректанлань. Мунiс повтöг. Кин пантасяс, дак пантась: лесник тшак вайö...

Сьöкыт вöлi пестерыс, вит пуд мымда лэбтiс, но волыссэз эзö орöтö пельпоннэсö, оськассис кокнита. И смех петiс: Миков Сеняыс, Миков Сеняыс... ха-ха-ха... Эз и думайт, натьтö, нем, а видзöт, тожö шедiс капканö, кыдз гут чераньвезö!

IV

Ыджыт колхознöй зород бокын куйлiкö, Исай Сергеевич Вольлапин старайтчис вежöртны, мый шогмис вöрас. Вийны лосьöс, конечно, эз и думайт, а вот, колода вылын пукалiкö, казялiс и лыйис, лыйис почти метитчытöг, а инмис, тыдалö. Мыйлö лыйис — кöть юрсö орöт, оз вермы висьтавны. Эз вермы видзсьыны да и только! И повзис сiдз, что öнöдз кикокыс дрöжитö, öнöдз чигарка оз вермы каттьыны. Эшö бы! Пыр петушоккезöс да ракаэзöс паздiс и вот — пöрöтiс лосьöс!

Первöйыс, мый, пырис юрö, — этö вöлi дума: суськисьны! Мый бы эз вöв, а колö суськисьны. Деревняын важын ни некин эз вийлы лоссесö, и öнi кывсяс кö, что сельсоветiсь председатель дзугö советскöй законнэз, — лэбас ыджыт скандал. Некин сылö оз верит, бытьтö вийис зверьсö не нарочно, кöть кин висьталас, что даровöй яй вылö öмсö осьтöма. А раз сiдз, то позорöн мун сельсоветсис да эшö вежты штраф. Кыдз сэсся овны деревняас? Нет, колö суськисьны. Эз сiя вий некытшöм лосьöс — и точка! Кин адззылiс?

Только кылiс сьöлöмыс: сьöкыт лоас.

Шондiыс лэдзчандорын ни. Мыдз и повзьöмсянь пиньöла öма, Исай петiс зород увтiсь, дойдöм коксö му бердöт кыскöмöн, жагöник мунiс деревнялань. Киас видзис тöрмöм бедь, коскас вöлi простöй ремень. Пишальсö и патронташсö сiя чапкис кытчöкö выскыррез увтö. Ась сэтчин сiсьмöны, сэсся некöр оз и вай гортас...

Ыркытсялiс. Веретя увдöрын везъясис туман. Шондi пöттöдз сералiс луннас, купайтчöв-керис голубöй океанас, öнi дышöтчöмöн лэдзчö вöрас, краситö пу йыввесö лиловöй краскаöн. А неболöн мöд ладорас петö ни тöлiсь — ыджыт, блед, öдва тыдалö. Чожа пемдас, сьöд шальöн вевттисяс мыдз муыс, и тöлiсь шынньöвтас югыта-югыта. Эта кадö деревняö локтöны видз вывсянь ытшкисиссез, тэрмасьöны медбöрья рейссэзiсь машинаэз. Шум сулалö öтмöдöрын. То эстöн, то сэтчин кылöны гора голоссэз, нывкаэз сьылöны частушкаэз, пондöтчö «пилитны» гармоння. Каждöй керö, мый сылö любо, мый охота. Мыдз морт водö шоччисьны, куритны любитiсь — керö чигарка, тшыг — пуксьö пызан сайö. Только öтнас Исай Сергеевич, кыдз ёрдöм, керö не сiйö, мый колiс бы: жагöник мунö гортас и соседдэз шогья дзебö синнэсö. Сылö кажитчö, бытьтö каждöйыс мыччалö сы вылö чуньöн, баитö пильскöмöн: «Лосьöс вийöм. Тыдалö, законнэсö не сы понда эд гижöны». Интересно, кывсис эз деревняас. Кин вылö думайтöны? Ужо, вон, сойыс паныт шедö...

— Эй, Марфа, привет!

— Бур рыт, Исай! Тэ кысянь нö сiдз?

— Вöрö ветлi, видзоккез видзöтi, — ылöтiс сойсö. Ылöтiс и кылö, кыдз гöрдöтiс. Сьöкыт. Стыд петö.

Марфа Сергеевна, кыз яя и крепыт вывтыра, кыдз быдöс веретинскöй ичмоннез, — пыртö гуись туисöн ырöш.

— Горшыт эд косьмö, лок жö ю!

Исай Сергеевич чатыртiс туиссö, юис. Бура горшыс косьмöма. Кöин моз эд котрасис вöрас, гöгралiс нюрсö — веськыта колодаэз да выскыррез кузя, мыррез да кöчкаэз вылö падмалöмöн котрасис. Нельки вунöтлiс дойдöм кокыс йылiсь, некытшöм шог эз кыв. Öнi юис и гусьöник видзöтлiс сойыс вылö, старайтчис тöдны, мый думайтö сiя. Но чужöмыс Марфалöн приветливöй, синнэс сьöртi тöдчö — рад гöститöтны вонсö, уважайтö сiйö. А лосьыс йылiсь, тöдчö, нем абу кылöма.

— Спасибо, Марфа, бура юи!

— Да ю эшö, ю!

— Тырмас, спасибо.

Быдöс приметаэз сьöртi деревняын абу на кылöмась нем. Быдыс приветливöя здоровайтчö сыкöт, быдыс баитö бы. Да ужо, мый кывнытö? Кин адззылiс, что Исай Сергеевич ветлiс вöрö и вийис лосьöс? Некин эз. Нельки ачыс сiя эз адззыв. Лыйис и öдззис котöртны. Лосьыс мелькнитiс син одзас, некö джöмдыштiс, да эд вермис мыр бердö падмыны, вот и джöмдiс. А может, сюрис кокнита ранитны, öнi котрасьö вöрас, бытьтö нем эз и вöв. Эта дума содтiс Исай Сергеевичлö вын, морт тöдчöмöн лоис бодрöйжык, кокнит сьöлöмöн пырис аслас оградаö. Иньыс часöт только локтöма колхознöй видз вывсянь, öнi высьтiс мöс. Дзарнитiс жöникыс вылö и шы эз сет. И синнэс сэтшöмöсь жö, кытшöмöсь вöлiсö асывнас — и не добрöйöсь и не лöгöсь. Нем абу кылöма. Да ужо, мый кывнытö?

— Марья, мыйкö сёйыштны бы!

— Ылалiн? Он адззы, мый кера?

Исай Сергеевич пырис керкуö, миссис, вежис паськöмсö. Адззис нянь тор, курччöвтiс. И только сэк казялiс, что кынöмыс немымда оз симав, оз вермы сёйны. Сьöлöмсö сöскö кытшöмкö гаг, юрö быд берсяыс пырö. А вдруг кинкö адззылiс? Кывлiс Исай Сергеевич, что вöрын быд куст сайсянь синнэз видзöтöны. Не весь отирыс баитö: охота ёртыткöт мыйкö гусьöн баитны, дак мун паськыт ыб вылö, сэтчин некин оз кыв баснинытö. А вöрö эн мун — вöрыслöн пеллез кузьöсь, быдöс кылöны.

V

Эшö неважын Веретяын вöлi торья колхоз и сылöн аслас правленнё вöлi. Но колхозсö öтлаöтiсö мöдiк колхозкöт, правленнё лоис посадын. Одзжык рыттэзнас колхозниккез пукавлiсö правленнёын. Öксясö сэтчö, керасö чигаркаэз и баитöны öтi-мöдi йылiсь, джендöтöны рытся кадсö. А кöр правленнёыс лоис посадын, колхозниккез велалiсö öксьывлыны сельсоветö. Кыдз рыт, сiдз и локтöны куритны, баитыштны. Мукöдлöн некытшöм и дело абу, нельки табаксö оз курит, а сёровно локтö. И вежöртана — морт оз вермы овны öтнас, кыскö сiйö мöдiк дынö. Исай Сергеевич любитiс отирсö и тожö сёр рытöдз пукавлiс аслас кабинетын. А мый, мунны кö талун да пукалыштны невна? Может, и кывсяс мый-нибудь, видзöтан, кокнитжык лоас.

Марья сё эшö высьтiс мöссö, а Исай Сергеевич оськалiс ни сельсоветö.

Но татöн, кыдз нарочно, некин абу. Только сельисполнитель дед Макар пукалö председательскöй пызан сайын, папкö махорка. Öтнас сымда куритöма кабинетас — кöть чер öшöт.

— Кыдз луныс чулалiс, деда?

Дед мыччалiс чукыльтчöм певсö, кань моз чикыртыштiс синнэз.

― Бур, öнi сельисполнительöн уджавны, öддьöн лöсялö, — шыасис сiя. — Одзжык мый вöвлi: сельисполнитель мыччас кывсö и понок моз котрасьö деревняись деревняö, повесткаэз новйöтö, то öтiкöс, то мöдiкöс сельсоветö корö. Мужичок тышкасяс иньыскöт, сiйö корöны ни видыштны; кытшöм-нибудь кодуль лэдзас зорöн соседыслiсь öшыннэз — лок сельсоветö, штраф вай; кинкö гусясяс, а сельисполнитель — на повестка, сельсоветö лок. А öнi бу-ур! Мöдöдз лун ни пукала и кöть бы оча чунь вачки.

Дед Макар морт интереснöй. Шуны кö, сiя некытшöм не дед: Макар некöр эз гöтрасьлы и сылöн, конечно, эз вöв öтiк внучек. Эз пет сельисполнитель и годдэзнас: сылö только разь год-мöд бöртi тырас пятьдесят. Баитны кö тош йылiсь, то Макар быдтiс сiйö натодиль сы понда, медбы кажитчис солиднöйжыкöн. Новйö Макар важ милицейскöй форма, кöдö сетлiсö эшö война одзын, — шоркйисьöмö, бырöмö. Гожумнас нешоча кышавлö коккезö вочöм пимиэз, «мыля томнас маитчöма ревматизмöн».

Макарöс деревняас лыддьöны несерьёзнöй мортöн, шуöны мöдöра кучикöн, а унажыксö Бöжöн. Бытшöм басни сысянь шоча кылан, вексö пильскö-сералö, шыннялö хитрöя, синнэсö чикыртöмöн. Мукöдпырся Макар норасьлö аслас судьба вылö, лыддьö асьсö несчастнöй мортöн, кöдалö оз лöсяв некытшöм должность. И эта быль.

Эшö не сiдз важын вöлi сiя Веретяын участковöй милиционерöн. Исполнительнöй да честнöй служака, эз сетлы сiя воля не тöдсаэзлö, не роднöйезлö, эз отсавлы некинлö, кин шедлiс закон статья увтö. Хулиганнэзöс да бöбавны любитiссезöс Макар наказывайтлiс жалейттöг и чожажыксö, натьтö, этасянь нiя орисö начöдз. А если и мыччисяс кытшöмкö мазурик, дак öмлöсавны сiйö вермö и ачыс веретинскöй общественность. Дженытжыка шуны, öтiк бытшöм лунö вöлi висьталöма, что участковöй милиционерлöн должностьыс Веретяын упраздняйтсьö.

Горюйтыштiс невна Макар и кутчисис сельсоветö налоговöй агентöн. И бöра лыддисис не медбöрья мортöн. Сiя дышöтчытöг ветлöтiс деревняэзöт, пыравлiс колхозниккез ордö, корис мымда колö деньга, гижлiс квитанцияэз, а недоимщиккесö сiя веськыта шувлiс несознательнöй гражданаöн и повзьöтлiс нiйö страшнöй судöн. Но быдöнлö тöдса постановленнёэз бöрын колхозниккезлiсь чинтiсö налоггесö, чинтiсö сiдз, что öнi кöть кин ни вайö деньгасö сельсоветö ачыс. Макарлö бöра нем лоис керны.

Дыр жугдiсö юррез колхозiсь правленнёын и сельсоветын, думайтiсö-мырсисö, кытчö бы сувтöтны дед Макарöс. Руководящöй местаэз сылö некытöн эз адззисьö. Сельскöй хозяйствоын, веретинса кыввез сьöртi, Макарлöн киэс вöлiсö чукыляöсь, керны нем эз куж — не гöрны, не кöдзны.

― Кытчö жö тэнö воштыны? — юасисö сылiсь.

— А сувтöтö министрöн! Верма эд, поди!

― Вот мый, сувтöтам тэнö колхознöй ыббез дозирайтны, а нет — сторожöн, — висьталiс председатель.

― Колхознöй ыббез дозирайтiсьлiсь должностьсö Макар шуис öддьöн нёштöмöн: ковсяс пö отвечайтны, если травитчасö сюэз, а сторожöн лоны согласитчис. Бур делоыс: складдэз дынын эм избушка и оз ков лонтны ассис холостяцкöй керкусö. Макар служитiс виль должность вылын, натьтö, вит год гöгöр. Эта вöлi öддьöн бытшöм служба: ойнас варт кынымиськö кöрт тор кузя и нюжлась шоныт избушкаын. Весь олöмсянь Макар кутчисис быдтыны тош, а сэсся велалiс не совсем приличнöй дело бердö: гожся ойезö пондiс вöджжыны влюблённöй параэзöс. Оз ештö озйыны пым сьöлöммез кытöн-нибудь пемытжык пельöсын, оз ештö окасьыштны, кöть кыкнанлö вöлi охота, а вежöм кучик сэтöн и эм: петас дзик му пытшкись, китшкö-сералö и пильтыралö öмсö. Вот эта привычка понда и нимтiсö томмес сiйö бöжöн и öнi, медбы нимкодьыс крепытжык вöлi, содтöны бöжыс дынö быдкодь эпитеттэз. Понбöж, — вот кыдз сiйö пондiсö шуны. Зонкаэз да нывкаэз грöзитчисö мургыльтны сылiсь юрсö и мургыльтiсö бы — молодёжыс Веретяын öддьöн дзирыт. Но колхозiсь председатель висьталiс öтпыр, что Макарлö только весь пуктöны трудоденнез — воррез деревняын абу и видзны сторожсö немлö.

— Мый жö тэкöт керны, горе тэ менам? — юасис бöра председатель.

— А иньдö коммунизмö, — отвечайтiс Макар.

Бöра думайтiсö-керисö, не öтiк лун жугдiсö юррез. Эта вопросöн колiс тэрмасьны: дед Макар корис пособие, кыдз сiя баитiс, «вынужденнöй прогул понда».

— Иньдам сiйö сельсоветö, — шуис бригадир. — Лоас сэтчин штатнöй сельисполнительöн.

Макар согласитчис, кöть перво и ёна полiс, что сельсоветiсь öння председатель Исай Сергеевич Вольлапин öддьöнöв пондас сiйö, тоша мортöс, вашöтлыны деревняись деревняö быдкодь бумажкаэзöн. Но весь полiс. Исай Сергеевич — морт спокойнöй, корны отирсö сельсоветö эз любит, а кöр колас, — звонитлiс телефонöн. Макар пондiс овны, кыдз ен: колхоз сылö нянь тор сетö, нора, кытöн колö узьлыны, эм, а уджавны почти нем оз ков. Дед Макар бöра кутчисис важыс бердö: вöджжыны томмесö, мыйöн эшö ёнжыка лякöтiс ним дынас интереснöй «Понбöжсö».

Кыдз адззам, морт сiя былись несерьёзнöй, етша сыын солидностьыс, но Веретяын мукöддэс полöны сыись. Кöр стариклö сетасö кыв собраннё вылын, уна дзебöны юррез, сайöвтчöны одзын пукалiссез сайö. Понбöж сiя, любитö згальничайтны, а сэтöн шырзьö веськыта. И кыдзкö пыр сiдз шогмö, что баитö правильнöя. Öтiк кылöн — страннöй морт, вурöмась сiйö, кажитчö, кытшöмкö неöтiк рöма тороккезiсь неöткодь сунисöн. Вот и вежöрт сэтшöмсö!

— Чёрт сылiсь кучиксö мöдöртöма, — баитöны öтiккез. Мöдiккез содтöны:

— Кеслöма кывсö, а лязны вунöтöма...

Исай Сергеевичлö талун мылякö öддьöн неохота вöлi пантасьны эта кöсыник старичоккöт.

— Районсянь эз звонитö? — юалiс сiя лöгöнмоз.

— Кыдз не звонитны? Районас эд тожö отир. И телефоннэз эмöсь. Звонитiсö. Тшöктiсö висьтавны, кыдз быдмö кукуруза, сводка корисö да эшö цифраэз: уна я таво челядьыс первöй классö мунасö. Но ме и висьталi быдöс, кыдз тэ тшöктiн.

— И сэсся нем?

— А мый эшö вермас лоны? Пыралiс тай неважын бригадир, юалiс тэнö, кытöн, шуö, председательыс? Но ме и висьталi, мунiс, мыся, кытчöкö аслас председательскöй делоэзöн.

— Эз и висьтав, мыйлö вовлiс?

— Меным? Кытшöм сылö интерес меным висьтавны? Ме эд, поди, дед Макар... А эшö лесник вовлiс... Неважын вовлiс... Да...

Макар юöртiс этö и чеччис председательскöй местаись, локтiс öшын дынö. А Исай Сергеевич ачыс эз казяв, кыдз бергöтiс чужöмсö, синнэсö дзебöмöн лöсьöтiс куритны.

— Тожö эз висьтав, мыйлö вовлiс?

— Кузьмаыс? Да мый сiя, ылöстöм я мый я, меным пондас висьтавны? Эз, нем эз висьтав. Юалiс тэнö и мунiс.

Старик бöра чикыртiс синнэсö, тшакыльöн лэдзис öмсис табак тшын, шынньöвтiс. Исай Сергеевичлö кажитчис, бытьтö старик тöдö мыйкö, сiйöн и пильтырасьö сiдз, орсö. И эшö öддьöнжык гажтöмтчис, совсем рапмис. «Кывсяс, сёровно кывсяс», — думайтiс сiя. А старик нёштöмасис одзлань:

― Гортас мунтöн лесникыс кежалiс Миков Сеня ордö. Но, ме и вугыртi бöрсяняс... Эге, думайта, делоыс сöстöм я? Мыйлö мужиклö пырны Миков Сеня ордö, кöр абу сiя гортын? Не Парасьыс дынö я вовлö гусьöн... Хе-хе-хе... Инька сiя здоровöй, госыс пизьö, а мужикыс öдва коккесö кыскалö. Оз я, мыся, Парасьыс бокö тальччав?..

Эта юöр эз гленитчы Исай Сергеевичлö, охота вöлi грубöя öмавны стариксö, но шуис спокойнöя:

— Но и мый?

— Да нем абу вöлöм...

И вдруг чужöмыс лоис серьёзнöй, старик дугдiс вежмасьны.

— Öшын увтас сулавтöн кылi öтiк басни, кöдö колiс бы тöдны тэныт. Кывзан?

— Висьтась!

— Кузьма Кузьмичыс тшöктiс локны Парасьыслö ытшкисьны. Лок, шуö, Пикан лог дорас, да гусьöник, мед некин эз адззыв. Отсалан, шуö, турун заптыны. А он, шуö, лок, дак вежтан пятьсот руб...

— Мы-ый?

— Пятьсот руб пö вежтан. Сеняыс пö лосьöс вийöма!

Исай Сергеевич перыта öзтiс чигарка, горша кыскис моросö тшынсö. Сiдз! Значит, вийöм сёжö лосьыс!.. Сiдз! И думайтöны Миков Сеня вылö...

— Сiдз... — шыасис сiя Макарлö. — Пятьсот руб пö вежтан?

— Не, туруноксö заптан меным, дак нем пö оз ло... Батрачитны тшöктö...

— Тэ мыйкö не сiйö баитан, дед. Тэ...

— Кывзы, кöсйисин дак, — спокойнöя öмалiс сiйö Макар. — Баита ме правильнöя и сiйö, мый колö. Тшöктö аслыс турун заптыны, уджöтö бы весь, кинкö шуанöн, батрачитны тшöктö. Этö кöть кин вежöртас. Кöркö тай кулаккез вöлiсö, да пыр батраккес ниртiсö-уджалiсö ны вылö. Босьт Кузьмичсö. Хозяйствоыс сылöн сэтшöм, кытшöм кöркö мукöд кулакыслöн эз и вöв. Да тэ ветлы, видзöт ачыт...

— Ветла, видзöта, — кöсйисис председатель. И ачыс оз тöд мыйлö — содтiс: — А тэ унасö эн лёб... Кулаккез!.. Перво проверитны колö, а вöлись баитны. Вежöртiн?

— Дак... Кыдз не вежöртны? Дед Макар и вдруг нем оз вежöрт... Быдöс вежöртi. — И бöра пöртчис дурачокö, пиньöвтiс öмсö нёштöм шынньöлöн: — А сельисполнительöн бур öнi уджавны! Пукав татöн да сьöлав потолокö. Спокой сельсоветаным!

Председатель дзарнитiс осудитöмöн, мöдiс мыйкö висьтавны, да только öвтыштiс кинас: вежöм дак вежöм и эм, мый сылiсь босьтан?

VI

А спокой öшис, эз ло. Дикмöтiс Исай Сергеевичöс стариклöн висьтасьöмыс. Морт шедiс вабергачö, кыдз миян баитöны — веретяö.

Сьöкыт вöлi висьтавны, мый шогмис сы юрын. Быдöс сэтöн сорасис-пансис, каттисис, кыдз кань лапаэз увтын тшакыль — некытшöм арт абу. Кытшöмкö гаг шушкö гусьöник: колö суськисьны, мый бы эз вöв, а суськисьны! Кинкö мöдiк чувйö вемсö и тшöктö öнi жö мунны винитчыны, а куимöт повзьöтлö: «Вашöтасö сельсоветсис позорöн и лоан тэ, кыдз горттöм пон: кинлö охота, сiя и сöтас бедьöн бöр кузят. Суськись! Кин тэнö вöрсис адззылiс? Некин! Вор, кöдö эз кутö, — не вор!»

«Не тэ вылö думайтöны, — баитiс гагыс. — Миков Сеняöс зэлöтöмась, сiйö адззылöмась лосьыс дынiсь, ась сiя и тöждiсьö, тэныт кытшöм дело?»

Дата добавления: 2015-11-16