Деревняö, Роман дядьыс ордö, Сева локтiс первуись. Сiя олö Перемын, дас этажа керкуын. Керкуыс сулалö Кама ю дорись керöс вылын, а квартираныс нылöн медвылiсь этажас. Но и эссянь оз тыдав сiя деревняыс, кытöн олö Роман дядьыс.
Сева не ачыс локтiс, а папыс вайöтiс. Зоночкаыслö вöлись нёль год, сылöн и не быд кылыс бура шогмö: деревня туйö шуö деевня, город туйö — гоёд.
Локтiсö рытнас, сёйыштiсö, и Севаöс водтöтiсö узьны. А сылöн мыдзыс чулалiс, и некыдз оз вермы ланьтны. И тöдвылас усис, кыдз Перемас кöркö локтiс Роман дядь.
Мамыс кытчöкö петiс квартирасис, а Сева орсiс кухняын.
Кылö, кинкö пырис. Лöня, жагвыв. Этö не мамыс, сiя котöрöн пырö-петö.
Сева локтiс ыбöс дынö, адззö: ыбöс коласас видзöтчö ыджыт шапкаа гöрд рожабана юр.
— Серёга татöн олö?
— Татöн олö Сейгей Гоёдков, а не Сейёга.
— Но, но — Сергей. Ме очавон сылöн, деревняись.
— Пый, дядя Очавон.
Пырис, пöдналiс ыбöссö, шапкасö сюйыштiс конувтас да юалiс:
— Уборнöйныт кытöн?
— Мый сiя?
— Но эта... кытчö öтöрасьлöны. Сайман да кытчö котöртан... этö кернытö? Сева вежöртiс, мый колö локтiсь дядьыслö, висьталiс:
— Ме горшок дынö котöйта. И туалетö пыявла.
— Во-во: туалет! Кытöн сiя?
— То тай.
Этö вöлi тöвнас. А öнi гожум... И Сева деревняö локтiс.
Куйлiс, куйлiс Сева да онмöссис. А сэтчö мыйкö кыкись укöстiс: — Му-у-у! Му-у!
Саймис Сева, думайта: «Кин уксö? Пароход али поезд?» Эз вермы тöдны, бöра онмöссис. Узьö и вöтасьö. Вот сiя пукалö пароход вылын, а пароход уйö Кама ю кузя. Уйис, уйис да петiс берегö, мунö рассэзöт, деревняэзöт. То туйсö пöдналiс керöс, и пароход уксö:
— Му-у-у! Му-у-у! Сет меным туйсö!
А керöсыс оз и думайт вешшыны, лöгöн горалö пароходыс вылö:
— Ррав-ав! Ав-вув-вув! Мун боки, эн сибöтчы ме дынö!
Пароход пöртчис поездö и орддис керöссö. Мунö туйтöг. Веськытланяс горöтлöны баддез:
— Ба-а-а! Бля-баа!
Шульгаланяс мексöны понуллез:
— Ме-ме-ее! Ме-ээ!
Одзсяняс, кöдна вевдöрöт поезд мунö, горзöны мыррез:
— Вик-вик-вик! Эк-эк!.. Рок-рок-эк! Видз шöрын турун зород чеччалö да ивзö:
— Ив-ив! Иго-го!
Зород бокись турунъюррес öтамöд коласын ыждалöны:
— Ге-ге-ге! — Кря-кря! Кряк!
— Куд-куд-куд-дда!
Мунiс, мунiс, петiс ыббез вылö и вились пароход лоис. Уйö тшöк сюэзöт и уксö:
— Му-у-у! Му-у-у!
Сылö шондi кинас макайтö да вургö:
— Вург-гвур! Вург-вур-вургу!
И бöра керöс пантасьö. Поезд сiйö кежны тшöктö:
— Му-у-у!
Керöсыс оз кеж, пыксьö. Вот сiя лöгасис, чеччöвтiс вывлань, и йылыс потiс — дзик борддэз лоисö. И нiйöн борддэзнас шовк-шовк керис да чирöстiс:
— Ноко ректö-ö-ö!
Мый ректыны? Кысь ректыны?..
Сева осьтiс синнэсö. Öшынö видзöтiс пуксян шондi. А öтöрас горалiс:
— Ку-ку-рек-ку!
Вежöртiс Сева: этö петух китсасьö.
А вöтнас мый кылiс?
Может, не зород, не пуэс, и не пароход горöтлiсö?
Дак киннэз сэки?
ЛЁК КЫВВЕЗ
Митюлöн мамыс сельсоветын техничка. А техничка — этö няня, только не садикын уджалö, а сельсоветын. Митюлö вит год тырис таво, и сiя тöдö, мый сэтшöм школа, магазин, клуб — садиксянь нуöтлiсö сэтчин.
Но сельсоветын эз на вöвлö — сiя посад саяс, сэтчинöдз ылынöв. Гортсяняс оз и тыдав. А садиксянь, ежели кайны палисадник столб вылö, казялан флаг да труба. Трубаыс лэбтiсьö горсянь, кöдö лонтö Митюлöн мамыс.
А флагыс кытiсь петö? Может, сiйö видзö дядяыс, кöдö шуöны депутат? Сiя, натьтö, чочком уссэза, кыдз Дед Мороз. И, кыдз садикись Лиль Иванна, лунтыррезöн сяткöтö да баитö телефонöт.
Эта мымда и тöдö Митю сельсоветыс йылiсь.
— Мам, тэ менö нуöтлы сельсоветас, — кыдзкö корис Митю. — Ме только видзöта, нем ог вöрöт.
Но мамыслö некöр:
— Мöдпырся, мöдпырся. Кöр шонытжык лоас и луннэс содасö.
Митю эз вунöт мамыслiсь кöсйöмсö и, кöр локтiсö ни сьöдракаэз, бöра корсис. И сэк мамыс öтiк рытö босьтiс зонсö садикись да нуöтiс сьöрас.
Сельсовет — кирпичнöй керку. Чочком, гöрд юра, ыджыт öшына. Дзик виль костюма морт, кöдалöн ыджыт стеклоа очки. Натьтö, сiйöн и янсöтчис самöм керкуэс дынiсь, медбы эз нятьöсьмы нысянь. Öнi видзöтö нылань да сералыштлö.
А флагыс талун гажтöм: каттисьöм ороп бердас, оз и вöрзьöтчы. И некин сiйö оз видз — потш бердö кöрталöм.
— Мам, а флагыс мыйлö? Разь праздник?
— Татöн сiя не только праздник коста öшалö — пыр. Государство öшöтiс сiйö: вот этö пö, отир, менам совет, а тiянлö — хозяин. Вот и петö: флаг эм, дак государство эм, и хозяин ловья.
— И техничка ловья... А ежели флагыс оз ло?
— Мый тэ, мый тэ, Митю! Сiдз оз ков баитны!..
Но вот ыбöс вылiсь босьтiсö замок, пырисö пытшкас, чöвтчисö.
— Мам, а кытöн депутатыс лыддисьö?
— Кытöн? А то эна жыррезын, — мамыс мыччалiс медсайись ыбöссэз вылö.
— Депутатыс йöзыслö не хозяин?
— Тожö хозяин. Кыдз инö не да?
Мамыслö некöр баитны, колö чышкисьны-миськасьны, и Митюсö колис öтнасö:
— Видзöтчы, да эн котрась, эн ёркöт. И нем эн вöрöт.
Зоночка и сiдз этö тöдö: не гортас эд. И не садикын. Сiя сувтчис зелёнöй ыбöс одзö, кöда вылын öшалö сьöд пöлок, а пöлок вылас — чочком букваэз, дзик потшок вылын курöггез пукалöны. Ыджытöсь, лöньöсь да рамыникöсь, сiдз и тшöктöны: лыддьöт миянöс, пожалуйста!
Митю букваэсö пыр жалейтö: эд кöр нiйö некин оз лыддьöт, дак нылö öтнаныслö недолыт овны.
А может, нiя тожö баитöны, кöр öтнаныс, кöр некин ны вылö оз видзöт?
«Ноко мый висьталасö нiя меным?..»
Жагвыв, буква бöрсянь буква вылö чунёкнас мыччалöмöн, кыдз велöтiс ыджытжык сойыс, Митю лыддьöтiс быд буквасö.
И петiс сылöн: предатель.
Предатель?
Митю мымдакö вежöртiс жö, мый сiя лоö, и думайтö: «Мыля депутатыс предатель?» Стёпка-ябедаöс сiдз садикас шуöны, дак сiя пыр Лиль Иванналö норасьö. А депутатыс кинлö нö лёкöтчö?
Гусьöник мунiс мамыс дынö:
— А депутатыс предатель?
Мамыс ва боннас зоныслiсь невна öмсö эз тупкав:
— Эн лёб, кöдö оз ков!.. Кин сiдз шуö?
— Этчин гижöма, чочкомöн.
— Кинкö разь мелöн бöбалiс? Кытöн ноко?
Митю мыччалiс, и мамыс только серöмтчис да шуис:
— Ноко кыкöн лыддьöтам: пред-сед-атель. И лоö: председатель.
— Председатель!.. — зоночка тожö серöмтчис.
Конечно, председатель! Мамыс сы йылiсь и баитлö, а Митю соралiс сiйö депутаткöт.
Пред-сед-атель! Сiя и эм посадас хозяиныс. И ны деревняын. И колхозас тожö невночка хозяин.
Мамыс миськасьö кытöнкö жырын, а Митю коридорсяняс председательыс жырö нёджжöвтiс. Сэтчин гажа, шондi югьялö. Жырас шкаф, пызан, стуллэз. Пызан вылас телефон. Сэтшöм жö, кыдз Лиль Иванналöн, но гöрд. Сэтöн жö графин, сы вылö кыминьтöмась стакан.
Сайись пельöсас, джоджас, сьöд ящик сулалö, сы вевдöрын мыйкö учöтжык, кöдö чышьянöн вевттьöмась. Чышьян увтсис букваэз мыччисьöмась. Тожö чочкомöсь, быд букваыс торья кружокын. Кöть учöтикöсь, а быдыс бура тöдчö.
Лыддьöтiс и сэтiсь. Не öтпыр. Мыйкö Митю йылiсь гижöмась: «Я час мить бю».
Мый бы сiя сэтшöмыс вермас лоны?
Уськöтчис мамыс дынö.
— Мам, сэтчин Митюöс вартлöны пö...
— Мый эд кысь тэ и адззан, — сералö мамыс. — Кинлö жö ме тэнö сета вартлынытö? Сэтöр синасö да читкыля юрасö?
— Быль, мама! Сiдз и шуö... Ме öнi бура-бура лыддьöтi!
— Кин сiдз шуö? Ноко öтлаын видзöтам. Видзöтiсö.
— А-а, вон мый сэтöн!
Мамыс босьтiс чышьянсö, и мыччисисö букваа пуговкаэз. Нёль лёдзöн, дзик лисничоккез вылын. А медулiсь лёдзас, кöда вöлi абу сюрöма вевттьыны чышьяннас, тöдчисö букваэз: я, ч, с, м, и, т, ь, б, ю, ъ.
Этö и лыддьöтöма Митю, да бöра невночка сорасьöма.
— Сiя, Митю, печатайтан машинка, и сэтöн некытшöм лёк кыввез абу, — висьталiс мамыс. — А нимыс сылöн — «Любава». То адззан?
Былись, лёдззес вевдöрын басöка-басöка вöлi гижöма «Лю-ба-ва».
— А ме думайтi — видчан кыввез...
ЛЕВЛЕНИЯ
Карчйöрын видзöтчö Нечайика — паськыт вывтыра, паськыт ныра-öма старуха, пасьтасьöм паськыт платьеö.
— Левления! Тэ кытöн? Ö-öв, Левления!
Нечайика не только Женя внучкасö, но и быдöс тöдса йöзсö шуö быдса нимöн. Да и подасö, только ассис.
Мöс сылöн — Гöрданея, баля — Баляболина. Нельки каньыслöн тыра ним — Канерий.
А Женя, конечно, Левления.
— Левления, а Левления! Кытчö бöрана нёкыртчин?
Шыыс кöс, гора — куим карчйöр сайö кылö. Эта шы вылö пондöны лявгыны деревняись поноккез, а Женялöн, кöда кытöнкö карчйöрас, шы не тöв.
Сiя былись нёкыртчис. Не сайöвтчис, не дзебсисис, а кык кусiнь кöстiсьöмöн пырис важмöм кöньöсö, кöдö оз ни туй видзны, а чапкыны жаль.
Женя, бабыс сьöрья нылочка, невночка асныр, невночка дыш, невночка хитрöй.
Да мыля оз ло хитрöй, кöр витöт класс ни кончитiс?
Ачыс учöт (кöньöсö тöрö!), а ылöтчöмнас вель ыджыт.
Пукалö кöньöсас и думанас видчö: «Но тай эна баббес! Кин нiйö сэтшöммезнас керöма? Пыр велöтöны, пыр дозирайтöны — миянлö ловзисьны оз сетö...»
— Левления, мыся! Нявдаыс луксö тыртö, весöтны колö! Ноко пет кöньöссит! «Кыдз нö сiя тöдiс, кытöн ме? Али синнэс пу пырйöттяс шуч адззöны? Вот меным бы сiдз! — думайтö Женя, но сэк жö бöр керсьö: — Оз, оз ков сiдз! А колö кужöмöн дзебсисьны — медбы и милиция эз адззы, ежели кошшисьны пондас. Сэк бы ме эг понды нятьöсьтны киэзöс...»
И сэтчö Женя юрö пырис (кыдзкö сидзис, а не пельöттяс пырис!) кинлöнкö шушкöм: «Ме отсала тэныт, ежели сетан платьетö.»
Платьеыс Женялöн важ ни, мый сiйö жалейтны? Ковсяс, дак вильö небасö.
Кöсйисис, и сылö висьталiсö: «Кöр ковсяс сайöвтчыны йöз син одзись, висьтав этадз: «Ем аол öкмöштык нöкорот!» Сэсся шу сiйö предметсö, кöдаö пöртчан бы. А висьталан:«Рöб аол нöтром!» — и лоан морт... Лöсялö?» «Лöсялö, лöсялö!» «Сэк чöвт платьетö».
И нылочка вежис платьесö заветнöй кыввез вылö.
А мый? Öтöрас жар, позьö и платьетöг овны — здоровöйжыкöн лоан.
Женялöн памятьыс бур: мый öтпыр кылас, некöр оз вунöтчы. И öнi быд кылыс сылö юрвемас мöртчис, кыдз кашаö пань.
— Левления! — бабыс павкöтiс кок нырнас кöньöс пыдöсас. — Öнi жö пет да сэсся эн сайлась! Кöть шыр моз муас пыр, сёравно адзза!
Асныра нылочка эз ешты висьтавны волшебнöй кыввесö: Нечайика сюйыштiс кисö кöньöсас да кыскис внучаткасö шондi югöр увтö.
— Мыйлö нö чöвтчин, нетулика?
— Жар да...
— Но, ась. Мун тяпайт лук колассэсö.
Бабыс тожö невна дыш, невна асныр, невна хитрöй. Сiя Женясö только повзьöтлö, что кöть кытiсь адззас.
«Видзöта, кыдз тэ менö адззан! — думайтö нылочка. — Только пыран, ме оп! — и абу!» Нечайика пырис оградаö.
Внучаткаыс мунiс грядок дорö, но тяпкасö, кöда сэтöн куйлiс, киас эз босьт: кин сысся асныравнытö пондас?
Дзур-вир оссис оградаись ворота.
«Бабö петiс, колö дзебсисьны! — шуис аслыс хитрöй морток да висьталiс волшебнöй кыввесö: «Ем аол Öкмöштык нöкорот!.. Пöртча тяпкаö!»
И лоис тяпка.
И грядок бокас водiс.
Нечайика казялiс, что весöтчисьыс абу, лэбтiс шум:
— Левления! Лок татчö, пасьтöм лягуша! Дыржык лöгöтлы, дак шатьсö пешлан менам! «Пешла, пешла! — дразнитчö Женя-тяпка. — Лок матöжык, — и коксö-оропсö лэбтiс да зурзис, бытьтö бабсö чувйыштiс. — Пешла, мый нö ог да!»
Казялiс я, эз я Нечайика тяпкалiсь зурасьöмсö, но локтiс грядок дынö.
— Но, кык уджалiсь тяпйисьöмась, а грядыс сё тай ёгья! — И эшö öддьöнжык лэбтiсис видчыны. — Но дышкуль, но асныр! И кин кодь сiя шогмöма, кинсянь пышшавнытö велалöма?
Женя-тяпка сералö: «Тэсянь, баба, тэсянь велалi. Кинсянь эшö?» Старуха бытьтö кылiс нiйö кыввесö да висьталiс:
— Лöгöт, лöгöт бабтö, боккет лудöны дак...
Сiя лэбтiс волшебнöй тяпкасö — сьöкыт, дзик изовöй.
— Миян я эта?
Кутiс ороп конецöттяс да тор-тор кыскис му кузяс.
Этö Женялöн юрбöрыс торöтö, но сiя чöлö, асныр.
«Ась и онняюрöн кыскалö, а ог казьмöтчы».
Нечайика тяпкасö чапкис гид öшын увтö, кытчö тöн петкöтлiсö порсь назём.
Шляпкисис Женя-тяпка небытiнас, кынымкö гутöс ляпкöтiс, а кöдна ловйöн кольччисö, койыштiсö бокö да сэк жö и пуксисö назём вылас, тяпка вылас.
Эз думайт хитрöй нылочка, что сы вылö усяс эттшöм наказаннё — куйлыны нильыг местын да дукын пасьтöг!
Дукыс — мед, сiя оз курччась. А гутыс, гутыс мый керö! Ой, кытшöм нёштöмöсь — вежöсь да лöзöсь, чорыт и чорыт кокаöсь. Нiя чеччöны-пуксьöны, яй гильöтöны, курччасьöны.
И не вöрзьöтчыны, не чеччыны: Нечайика кыдз сувтiс гид дынас, сiдз и сулалö, бытьтö коккес лякасисö му бердас.
Али тöдö, что тяпкаыс — сылöн ылöтчись Левленияыс, и нарошно оз тэрмась мунны сы дынiсь?
Может, и сiдз. Сiя эд тожö невночка асныр и невночка хитрöй.
«Ой-ой! — гусьöн маитчö Женя-тяпка. — Эна гуттэс кувтöдз гильöтасö нето ульöн сёясö!» — Ачыс то ли сералö, то ли горзö.
Но вот Нечайика пырис оградаö, и Женя-тяпка горöтчис: «Рöб аол нöтром!»
И сэк жö чеччис назём чукöр вывсис мортöн, пондiс туплясьны-ниртчыны турунас. Но яйыс куш ляк, а ляксö туруныс оз чышкы.
И котöртiс ю дорö гывьясьны.
Петiс карчйöрсис, а тротуар кузяс мопед вылын пöльтö Илька, кöда часто кутчисьлö Женя чикись бердö.
А Женя пасьтöм, куш назём,— порсь дука.
Мый нö керны? Мöдiс бöр карчйöрас пырны, а сэтчинсянь петö бабыс.
«Тожö серавны ме вылын кутчас. Да и весöтчыны вашöтас!» — повзис Женя да висьталiс волшебнöй кыввесö: «Ем аол öкмöштык нöкорот!» И шуис пöртчыны галяö.
Пöртчис тупöсь ыжда галяö и водiс тротуар шöрас.
Асныр, асныр!
Сэтчö и локтö Илька.
Тротуарыс векнитик, галяыс куйлö шöрас, и мопедлöн одзись колесоыс инмис галя вылас да нильдiс бокö.
— Охо!
Илька сувтöтiс мопедсö, сюйыштiс галясö сиденнё увтас, и тарöвтчис ю дорö да сувтчис. Сэтчин кыскис галясö да мый вын шентiс сiйö ю шöрас — ась оз падмöтчы туй вылас!
Больс! Тупöсь кодь галя сунгисис ваö.
Усьöм местасяняс öтмöдöрö паськалiсö неыджыт гыэз.
Шардöм Женя-галя мöртчис ю пыдöсiсь нятьö и чутыр оз кер.
Эстöн бур: гуттэз абу, дукыс абу, жарыс абу. И бабыс оз адззы, позяс и шоччисьны.
«Спасибо тэныт, Илька!»
Но сэтчö уйыштiс сы дынö кинкö кузь киа-кока, паськыт бöжа да тоша.
«Вакуль!»
Сiя эз вöв вакуль.
И тошыс, и киэс эз вöлö — нiйö повзьöм синнэс рисуйтiсö: сы дынö сибöтчис бобр.
«Ой, сёяс вакульыс!»И Женя-галя бырзьыштiс: «Рöб аол нöтром!»
Эз на ештö гыэс лöньсьыны, кыдз ва пытшкись мыччисис Женялöн юрыс, и сы пеллезöдз локтiсö бабыслöн кöс шыа кыввез:
— Левления! Нильыг лягуша! Ноко öнi жö пет васис!
Дыш нылочка мöдiс висьтавны волшебнöй кыввесö, но эз ни лысьт — вакульыс кыскас пыр кежö йирас. Чери моз уйыштiс берег дорас, пондiс петны васис да казялiс Илькасö. Мый керны? Бöрас — вакуль, одзас — Илька.
— Левления! Тэ эшö дыр пондан ме вылын кешитчыны? — чирзö бабыс берегсяняс. — Али боккет лудöны ни?
Женя саймис, кылö:
— Левления! Чеччы жö да мунам весöтчыны!
Видзöтö Женя: сiя гортас, верандаын. Гöрд платьеыс öшалö койка юр вылын. «Колö жö сэтшöмсö вöтасьны!» — думайтö Женя. Нюжöтчис, кикокнас вöрöтыштiс да шуис:
— Видзчись, баба, мунам весöтчыны.
Чеччис не тэрмасьöмöн и петiс карчйöрö. Гид öшын дынöт мунiкö дзар керис назём чукöр вылö: сэтöн кыскасисö веж да лöз гуттэз.
«Оййй!» — вывтырнас зэгнитчис Женя да котöртiс гряддэз дынö.
Дата добавления: 2015-11-16; просмотров: 49 | Нарушение авторских прав
| <== предыдущая страница | | | следующая страница ==> |
| ОРСÖТЧИСЬ ОШ | | | НИМЛУН КЕЖÖ ТОРТ |