Мый и керсьö!

Канин Шура ёрттэскöт ышки-пойки сибöтчис сiя öшын увтö, кытчö колiс усьны Чикалякалö. Локтiсö, кошшисьöны, а сiя абу. Не ловья, не кулöм абу.

Ветлöтiсö ывтiжык — абу! Лег-лег адззис орöм шышыбар кор, висьталiс:

— Этö сiя чегöтiс. Усис сы вылö, и листыс чегис. Ачыс мунiс кытчöкö. Мöдiк содтiс:

— А может, лэбтiсис да пу вылö пуксис?

— Кужис бы лэбавны, дак коридорöттяс эз бы котрась, — думайтöмöн висьталiс Лег-лег да сетiс команда: — Тiйö — этчин, мийö Каниныскöт керкусö кытшöвтам.

Рознитчисö, топ ягöдавтöн, да видзöтны быд гöпоксö, быд кустоксö, быд коласоксö. И пу йыввесö нёджжалiсö, и стенаэсö, а Канин Шура нельки пöвторресö, кöдна муас ни пырöмась, шедтавлiс.

Абу и быдöс! Дзик му пытшкас пырис. И вдруг сэтчö:

— Адззим!

Быдöнныс чукöртчисö горöтлiсьыс дынö, адззöны: сы коккез одзын куйлö хомяк.

— Сiя разь эттшöм? — öбида сорöн висьталiс Канин Шура. — Сiя кык кока... Сюроккез...

Челядьыс дынö локтiс старик, юалiс:

— Мый öштiт?

Мöддэс споритöны ас коласаныс, оз и кылö стариксö:

— Кытшöм сюроккез? Тэ ачыт сюра!

— Вöлiсö сюррес! Ачым адззылi! — вермалö мöддэсö Лег-лег. — Юав Каниныслiсь, сылöн эд сiя.

Старик горöнжык ни:

— Öйез, тi мый етшасят? Не кайöс я öштiт?

Кылiс Канин Шура:

— Кайöс. Чочком чаркиока. Адззылiн разь?

— Адззылi. Пон нöбöтiс. Пешалöм öмас и — люг-люг-люг! Ю ладорö мунiс.

— Кытшöм поныс?

— Кытшöм? Да нёль кока, кык пеля, öтiк бöжа, — сералö старик и бытшöмика ни содтö, — ровно бы бусöйкодь.

Лег-лег да Канин Шура нетшкöвтчисö ю ладорö, но только ештiсö керны куим-нёль оськöв, нiйö сувтöтiс воспитатель:

— Тiйö кытчö эшö? А ноко бертö! Джöмдiсö кошшиссес, бертiсö, каньгöны:

— Лэдзлö, пожалуйста!

— Кык минута кеж! Воспитатель нылö:

— Медодз ольпассез лöсьöтö... Кыдз тай чеччöмась, сiдз и чапкöмась!

— Менам лöсьöтöм, — казьмöтö Канин Шура.

— А тэ, Шура, öнi жö Валентина Байтеряковна дынö. Кылiн?

Канин Шура ыш ловзисис да юрсö öшöтöмöн медодз иньдöтчис лагерь пыранiнлань. И первуись сiя аслас олöм коста жалейтiс, что велалiс рисуйтчыны. Да, да! Эз бы велав, дак и эттшöм котрасьöмыс эз шогмы. Вон Лег-лег нем бердö оз кутчы, дак сылö бур! Öтiкö тöдö — пöттöдз узьны. Да эшö — сёйны. А сiйö тшöктöны берся уджсö керны: стенгазета лэдзны, альбом серöтны, лозунг гижны... Сэтчö картонжугыс киас пырис... Не, картоныс сэтöн немви. Ножнич — вот кин виноватыс. Одзжык эта мымда рисуйтчис и быдöс бур вöлi. А вундыштiс — и вот... Волшебнöй я мый ножничыс? Кинлöн сiя?

И зонкалö юрас сидзис вильтор: рисуйтны бумага вылö кытшöмкö гагöс да тожö вундыштны — пондас али оз кыскасьны? Пондас кö, недыр и курöглö чапкыны, зато тöдан, волшебнöй я ножничыс. И сэк... И сэк сiйö ножничсö колö гортас нуöтны. Гортын сiя вермас бура ковсьыны...

Эшö бы, натьтö, мечтайтöв-керис, да Вабайыс дынöдз туйыс эз вöв кузь.

Медбöрын думыш керис: «Сюрас öнi меным. Вашöтасö лагерсис».

Сэтшöм думаöн и кайис мöдöдз этаж вылö. Нельки часы одзö сувтчыштiс да видзöтiс, ештас я сюрны рытся автобус вылö, кöда мунö ны деревняöт.

Сьöлöмнас тöдiс, что павкас сылö, но эз тöд, мый ёна павкöтасö.

Пырис начальница кабинетö, чöлö. А сылö:

— Орссис, бöб юр?

Недолыт сылö сэтшöм кыввезсянь. Öшöтiс юрсö, кеда ныррес вылiсь серресö видзöтö.

— Кöть бы извинитчин эд, Канин! Чöлöв-керис Канин Шура, кык кыв петiсö öмсис:

— Извинитö менö...

— А мый понда? — кутчисис нiя кыввез бердö Вабай. — Кöть вежöртiн ни öнi?.. Но, чöв, вежöртан, кöр аймамыт карманö пырам... Зеркало — кык сотня руб, попугай да ур — эшö донажыкöсь...

«Кык сотня да кык сотняся унажык, — решайтö задача Канин Шура, — этö жö... Уф-ф!» Кымöсыс вазис и нырыс пымалiс, но мышкыртöм юрыс ачыс лэбис, и Канин Шура пичкис эшö кык кыв:

— Мый пондаись?

— Мый понда сымдасö? — Вабай сувтiс кок йылас. — Али мый понда извиняйтчынытö? Эшö висьтала: зооугöлокись клеткаэз осьтлiн — öтiк; зеркало жугдiн — мöдiк...

Сэтчö чöлiсь зоночка дзодзог моз пондiс гегзыны:

— Эг ме! Эг-эг!

— Тöдам: ачыт эн. Да эд чавканыт осьтлöм, а сiя кинлöн? Колiс видзöтны сы сьöрын.

Кöд коста Вабай велöтiс овны Канин Шураöс...

Дата добавления: 2015-11-16