|
Читайте также: |
Лег-леглöн юрыс ыджыт, и сыын пусьö берся дума.
Казялiс Канин Шуралiсь тöждöмсö да шуис ас пондасис: «Колö отсавны мортыслö, кытчöдз ныр вылас оз усь. Кöр усяс, сьöкыт чеччöтны». Этадз сылöн айыс висьтавлö. И сибöтчис Лег-лег Канин Шура дынö:
— Жаль сiя, ну?
— Мымдакö жаль...
— Дак мунам кошшисьны.
— Кин миянöс лэдзас?
— Да ми недырик, некин оз и казяв. Пуксям автобус вылö и аллё!
— Менам етша деньгаö.
— Да мый тэ полан? И сiдз мунам. Деньгатöг.
Канин Шура согласитчис. Но «сiдз» мунны эз лöсяв: шофёр билеттэсö вузалiс ыбöс одзас, а зоночкаэт, конечно, не шыррез.
Пондылiсö корсьыны грузовик вылö — эз сувтчы. Мый сэтöн керан, кöр оз лöсяв?
Но Лег-леглöн юрыс сы понда и ыджыт, медбы сыын чужисö бытшöм думаэз.
— Мунам велосипедöн, — кöсйисис сiя. — Видзчись менö эстöн, чожа локта. Эз чулав и вит минута, а Лег-лег пöльтыштiс-локтiс виль велосипед вылын.
Сувтсöн — коккес дженытöлöсь пукавнытö. Велосипедыс басöк, югыт-лöз, топ рудзöгчача.
— Кытiсь нö? — юалiс Канин Шура.
— Завхозыслiсь. Кöдаöн öнтай ысласи. Только, шуö, тэрмасьлö... На вашöт. Ме — пассажир.
Манитчыны некöр. Канин Шура вожасис велосипед вылö, Лег-лег кышасис бöрас (кöть учöт, а чирскан моз чеччалö!), и — адззисьлытöдз, лагерь!
Туйыс волькыт — асфальт, бöрсяняныс отсалö тэрмасьны тöлок, и кык круга машина шырöтö-котöртö зэв кокнита.
Пондылiс ныкöт одзасьны пон — выныс эз судз.
Ны весьтöт вель дыр лэбзис рака — кольччис.
Машинаэз йылiсь, конечно, нем и баитны — нылiсь колесоэсö не кокöн бергöтöны.
Километр бöрсянь километр, чукыль бöрсянь чукыль, и вот Чойкар локтiс. Кольччис поперегавны куим улица да кежны шульгалань, и сэтчин, неыджыт кырасок сайын, мыччисяс ветпункт. Этö туйсö Канин Шура тöдö ни: вовлiс порсь понда лекарствола.
Медбöрья улицасö вуджикö велосипедыс сьöрö вöтчис кузь юрсиа мужик да мöдiс кутчисьны руль бердас. Канин Шура перыта бергöтiс рульсö мöдöрö, и сэк жö нiйö мыйкö вынöн зангис да пöрöтiс туй шöрас.
«Машина, — вежöртiс Канин Шура. — Люкасим».
Сiя пуксис му вылас, дзарнитiс ас гöгöрас: ордчöн куйлiс велосипед, сы сайын — Лег-лег. Сылöн синнэс куньöмöсь, оз и чушыкты.
«Вийсьöма... Кулöм!»
Канин Шуралiсь вывтырсö кöдзыт ваöн гывьялiс.
Но Лег-леглöн öт синыс оссис да видзöтiс этчин-сэтчин. Сэсся оссис и мöдыс, вöлись ачыс чеччöвтiс кок вылас да шушкыштiс:
— Пышшам, Канин!
И велосипедсö пондiс лэбтыны, но сiйö тойыштiс бокö кузь юрсиа мужикыс:
— Эн вöрöт, воришко!
— Сiя менам! — паныт сувтiс Лег-лег. — Тэ эн вöрöт!
Сибöтчис чочком шляпаа морт, кыз голосöн горöтчис кузь юрсиаыслö:
— Пукты, кысь босьтiн... Ковсяс гаишникöс корны... Челядьыс тэнат?
— Нiя разь челядь? Гусясьöны, бöбöтчöны! Нiйö кульны колö!..
Видчö кузь юрсиаыс, но асныравны эз лысьт и велосипедсö водтöтiс туй вылас. Шляпаа морт йöрнöс воротöттяс чеччöтiс Канин Шураöс, сувтöтiс одзас: «Час сетас», — мелькнитiс Канин Шуралöн юрас, и сiя кунис синнэсö. Но мужик рамöн юалiс:
— Кытi зубыт?
— Некытi, — дузöмöн висьталiс Канин Шура да осьтiс синнэсö. И канава сайись казялiс веж «Нива», кöда нырнас пырöма палисадникö.
«Этö сiя...»
— Некытi, шуан? Сэк ладно! Ладно сэк, — баитö шляпаа морт. — И кин тiянöс кыскис туй шöрас, а?
Лег-лег мый вын горöтiс:
— Вон сiя эд!.. Ми бокöттяс мунiм, а сiя... Кузь юрсиа сылö кулаксö мыччалö:
— Эшö мöдiк вылö ыстiсян? Шпана пиян!..Кульны тiянöс колö!
Локтiс зелёнöй машина, бокас гижöма: ГАИ. Машина пытшксис петiс милиционер, туй шöрöттяс ветлöтiс одз-бöр, чорыт шыöн висьталiс:
— Ме инспектор Туйлов. — И юалiс: — Стряпайтiт бура, челяддё?
— То кöда стряпайтiс, — Лег-лег мыччалiс чуньнас кузь юрсиа мужик вылö. — Сiя миянлiсь велосипедсö тойыштiс. Од веритö? — И Канин Шуралö: — Висьтав ноко, Канин!
Кузь юрсиа шуö:
— Велосипедыс менам, ёрт инспектор... А мый петiс? Гусялiсö да пышшöны, ме сьöраныс... Кутны мöдi...
— Бöбöтчö! Бöбöтчö! Бöбöтчö! — вынсьöтчöмöн ыксö Лег-лег. Канин Шура отсалiс сылö:
— Мийö эг гусялö. Шляпаа морт шуö:
— Ковсис меным канава саяс чеччöвтны, а нето...
— Сi-iдз, — висьталiс Туйлов. — Тэ, тэ да тэ, — сiя перчаткаа кинас тюкöтiс зоночкаэс да кузь юрсиаыс ладорö, — мунатö мекöт. А тэ, водитель... Ачыт петан али отсавны?
— Ме понда эд тöждiсьö, пета.
— Сэк мун аслат туй кузя и ло здоров! А эта кадö.
Дата добавления: 2015-11-16; просмотров: 47 | Нарушение авторских прав
| <== предыдущая страница | | | следующая страница ==> |
| Канин Шура вермасьö аскöттяс | | | Чикаляка лöсьöтчö лоны генералöн |