|
Читайте также: |
Нёштöма, но и нёштöма шогмис!
Мöдiсö зоночкаэс час кежö лагерсис петавны, а чожа ойшöр сибалас.
Пукалöны Канин Шура да Лег-лег ыджыт жырын, кöда ыбöс вылын öтöрсяняс гижöма: «Челядь комната». А улынжык — иган. А неылын эта ыбöс дынсянь пукалö дежурнöй милиционер.
Вот сiдз!
Эстiсь он пышшы, эстöн не пионерлагерь. Пукалöны кык ёрт, ныррезнаныс вирскöны — ештöмась кытöнкö сайкавны. Да разь дыр сайкавнытö, кöр вывтат öтпöвса трико, носкитöм кедаэз и куш юр?
Одзаныс, лажмыт пызанок вылын, шашкаэз да домино. Но зоночкаэслö не орсöмви.
Öтыс, Канин Шура, тöждö Чикаляка понда. Эшö неважын видiс сiйö, мыля ыжмалö. А öнi жалейтö: медбы эз доймы, эз сюр пон öмö, нето машина колесо увтö. Вон — сiя, Канин Шура, ыджыт ни зоночка, да и то машинакöт люкасис.
Мый Чикаляка öнi керö? Кытöн сiя?
И нырнас вирс да вирс!
Мöдыс, Лег-лег, пукалö куньöм синнэзöн да унажыксö пишкö, а не вирскö: пиш-пиш, пиш-пиш... вирс! Пишкö, но оз узь.
Сылö син одзас мыччасьöны кыктор: лагерись завхоз да велосипед. Öтыс жöдзö лагерись кочегарка дынын, кытöн сетiс Лег-леглö ассис сюра машинасö, — места оз адззы. И сё видзöтö Чойкар ладорö — видзчисьö Лег-легöс. (Эд колö гортас мунны, а транспортыс абу!)
Мöдторыс, велосипед, сулалö кöртовöй йöр пытшкын, кытчö сiйö пöдналiс инспектор Туйлов. Сулалö шуштöм-гажтöм, дзик сирота, дзик шогöсь. Да и мыйсянь гажьявнытö? Рульыс пиньöла, одзись крылоыс нюмрасьöм, быдöс куш бус...
Йирки-ёрки оссис ыбöс, пырис погона тётя — эта жырись хозяйкаыс, шынньöв пыр юöртiс:
— А ме тiянлö, челядь, ёртöс вайöта. Йöртлöмась вытрезвительö, да сiя эд абу код... Эстöн узяс, а сэсся видзöтам, кытчö сiйö иньдöтны.
Висьталiс сiдз и аслас сумкаись кыскис Чикалякаöс да сувтöтiс стул вылö. Сiя узян синнэзöн дзарьясис жырас, но некинöс эз адззы.
— Чикаляка! — кыкнан зоночкаыс уськöтчисö сы дынö. — Чикаляка!
Эта горöтлöмсянь Чикаляка зэгнитчис, быдсöн саймис да казялiс Канин Шураöс:
— Папа! Папа!
И чеччöвтiс Канин Шура киэзö, грання ныроксö сюйыштiс сы тшöка увтö. Погона тётя некыдз оз вермы вежöртны:«Кытшöм папа? Кыдз этö учöтик морток вермас лоны айöн? Да кинлö айнас?!»
— Чикаляка менам, Чикаляка, — дзульзьö Канин Шура ыбшар моз да аканьыслiсь спинасö лапкöтö, юрсö малыштö, сюроккесö кымöснас люкалö.
И Лег-лег ошкö-жалейтö:
— Олель миян! — и бинтуйтöм бордсö чуньнас павкöтлö. — Эстi эки?
— Абу ни зубыт, веськалiс... Погона тётя вежöртiс сэтöн:
— Дак вон мый: сiя тiян! Кыкнанныс, кыдз öтiк, шыасисö:
— Миян, миян!
— Дак сiя... чиля да кака? Сэк сылö кашничок вайны? Али ачыс ни туалетас ветлö?
Чикаляка локтiс лöгасьтöдз. Сiя петух моз сувтiс погона тётя одзö, чижйöвтiс:
— Гöна пель! Ме разь чиля да кака? Ме — Чикаляка — сэтшöм нима. — И, дзик первоклассник, нимсö ятнöя торйöтiс нёль торйö: — Чи-ка-ля-ка. Вежöртiн?
— Вежöртi ни, вежöртi, — шыннялö погона тётя. — Сiдзкö, туалетас ачыт котрасян.
— Ачым, ачым! Ме быдöс ачым кера. Нельки ачым сьыла. И чепöстiс сьыланкыв:
Не чавкан ме и не рака,
А ме только Чикаляка.
Нырö грання, сюрö йыла,
Кокö йöктö, öмö сьылö.
И тупи-тапи йöктыштiс, чочком чаркиэзнас сюрки-сярки керыштiс. Погона тётя оча ки шовкöтö:
— Но и Чикаляка! Кужö, кужö! И конфет сылö сетiс.
А челядьыслö юöртiс:
— Ми звонитiм лагерьö, мед эз öштö тiянöс.
Лег-лег вирснитiс нырнас, няргыштiс: — А велосипедыс? Ме пола: мырддяс кузь юрсиа мужикыс.
— Оз. Сiя не сылöн. Ми эд завхозыскöт баитiм жö... И петö, что öнi колö узьны и нем йылiсь оз ков тöждiсьны... Чöскыт он тiянлö!
И челядьыс да Чикаляка водiсö узьны.
И ойбыт эз саймылö, только узиканыс зоночкаэс то видчисö, то сералiсö, а Чикаляка кинлöкö золотöй погоннэзöн ошшасис. Узисö пöттöдз, и ашынас.
Дата добавления: 2015-11-16; просмотров: 81 | Нарушение авторских прав
| <== предыдущая страница | | | следующая страница ==> |
| Чикаляка лöсьöтчö лоны генералöн | | | Чики-чоки вöлöн |