Пукала, кыя нинкöм. Сьöктан волькыт, шуль [1] веськыт да небыт, и удж мунö шупыта. Ашын мамöлöн нимлун, и рытöдззас нинкöмсö колö кыйыштны да пышнавны, медбы мамö нимлунсö панталiс виль нинкöмöн. Гортын мужикыс ме öтнам, и семьясö колö кöмöтны меным. Дедö, кöда олö не миянын, сiдз и шуис: «Тэныт, кага, дас год ни, — быдса мужик. Вот и кöмöт мамтö да сойетö. Нинкöм кыйны — не пу пöрöтны. Да и грамота оз ков».
Шватка-кыя, сьöктанöлö зника ог сет. Вдруг оссис ыбöс, и ме одзö сувтiс понпутша Пашок, ме кодь жö винерик да чож белей. Сiя годöн пöрисьжык, тöдö месся унажык, и быд виль юöрсö ме кыла сысянь.
— Вась, Параньсö гортсис гусялiсö! — сярзьыштiс Пашок.
— Кыдз этö?
— А вот сiдз... — Сiя вирс-вирс керис нырнас. — Сапырнитiсö, кöстiсö, мешöкö татшкисö... Сыбöрын — телегаö, и аллё! Артём гусялiс... кыз юр!
«Беднöйка Парань, — жалейтыштi ме нывкасö, кöда тöн эшö потшшуйтiс менö чöскыт анькытшöн. — Колö бöр гусявны!»
Пашок, Параньлöн очавон, тэрмöтö менö:
— Чапкы ни сьöктантö, мездыны колö эд!
Парань Пашколö, адзза, эшö жальжык: нывкаыт очавонсö бура имийтiс [2]: то рисьтупöсь сетас, то юрсисö шырас, а неважын вöлi вурöма йöрнöс. Сiя пелёка, веськыт ворота, гöрд кизя — дзик базарскöй.
— А кыдз мийö тэкöт мездам? Артёмыс лэдзас разь?
— Сiя юскисис да вöвнас видз вылö мунiс. Вöрöтчы, кытчöдз эз берт!
Артём — зонка вына да повтöм. Армияö лöсьöтчö, командирöн мöдö лоны. Лыйсьö метока — ворошиловскöй стрелок. И значок сэтшöм эм. А вот учöт вежöра, тыдалö, — гусясьны кутчöм! Шедан сылö — брынгалас бöрпонат и сивьят тэчас. Но Параньсö жаль: сiя рамыник да бура сьылö.
«А öнi иган сайын, натьтö, и горзö. Поди, чомö, а то и гуö пöдналiс...»
Артёмлöн керкуыс мöд дорас, и, медбы сидзны сэтчин, колö мунны Марко пиян öшын увтöт. А сэтöн — ыджыт дзодзог — Вижлок. Пияннэс турунок перкйöны, а сiя, кока куд [3], лэбтöм шмак юрсö да сiйö и вöджжö [4], кинöс бы кокавны.
Вижлоклöн нырыс пурт кодь лэчыт — вешьян пырйöт вирöдз вундыштö, а бордыс вачкö — топ пыркöтчан [5]. Ме öтпыр шедлi ни сылö, дак сэсся ог ни бöбась.
Котöртiм улiсь улицаöт. Артёмлöн ворота жын-жын игана пытшксяняс. Разь видзас осьтöн, ежели мортöс гусялiс?
Ворота пöдана, а оградаыс только джынысви вевттьöм öтöрсяняс. А Конка йöрсянь крышаыс абу — вот сэтчинöт и пыримö.
Только лэдзчим заплод вылiсь, прыснитiс-несйис вöв, и Артём шуис:
— Ло здоров, Чалко!.. Тэнат несыт бур, сiдзкö, быдöс бур лоас!
Пашок кань моз чывкнитiс заплод вевдöрöт. Ме чепöсси сы бöрсянь, да эг ешты берездасьны заплод саяс: кокöс шамыртiс Артёмлöн ошлапаа ки и менö кыскис оградаас.
— Тэ мый кошшан татiсь?
Ме чöла, а Пашок горöтлö заплод сайсяняс:
— Лэдз, буди, Параньсö, а то павкас тэныт! Артём тешитчö:
— Кытшöм нö типок сэтчинка шывгö? Не Пашок я — бöжтöм петушок?! А Пашок паныт:
— Вот висьтала дядьöлö, дак сiя сiдз мыччалас тэныт типсö — и гусясьны дугдан! А вöрзьöтан кö Васясö, ой, и зубыт лоас тэныт!
— Мый тэ, Пашок! Он жö сiйö кер! — бытьтö повзис Артём. — Паранька, лок жö дорйы менö, вартлыны мöдöны!
Артём дынö котöрöн сибöтчис Парань, сералö:
— Кин ноко öбижайтö Артёмсö?
— То тай-ка, — Артём сувтöтiс менö Парань одзö. — Тэнö мездыны локтöма.
— Но, но, но... — Парань малыштiс юрöс, босьтiс менö, кыдз кагаöс, киас, чуп окыштiс да шуис: — Но, спасибо, любушко! Только оз ков мездыны: ме, кага, ачым сетчи гусявнытö...
Парань менö лэдзис оградасис да пöднасис потш вылö.
«Вон мый керсьöма сэтöн! — думайта. — А ме сымда кад весь öштi. Сы коста нинкöмö кыйсис бы...»
Дата добавления: 2015-11-16; просмотров: 42 | Нарушение авторских прав
| <== предыдущая страница | | | следующая страница ==> |
| Чики-чоки вöлöн | | | ГЕРОЙСЯНЬ КОЗИН |