Кинлöн сiя иньыс?

Кыдзкö ме локтi пöрись морт ордö.

— Но, висьтась инö, кытшöм могöн тэнö еныс вайöтiс миянö, — шуис старикыс.

— Не ен, а топонимика менö вайöтiс, — висьталi ме.

— Кин сiя сэтшöмыс? — дивуйтчыштiс старик. — Вöвлi миян Нимика, а Топанимикасö эг тöдлы. Кинлöн сiя иньыс?

И ковсис сэк меным висьтасьны, что топонимика — не морт, а интереснöй наука, кöда занимайтчö географическöй названнёэзöн, или, кыдз нiйö шуöны учёнöйез, топонимияöн. Топонимиялöн эм учöтжык, но унаись богатжык сой — микротопонимия. Быдöс, кытшöм ниммез пыртöмась школьнöй картаэзö, — этö топонимия; учöтик географическöй объекттэз — ыббез, видззез, рассэз, шоррез, туйез, улицаэз — этö микротопонимия. И нiйö быдöс колö тöдны, колö гижны.

— А мыйлö сiя колас, поди? Кытшöм польза сэтiсь? — оз верит меным старикыс. — Ме чайта — некытшöм...

А сёжö пользаыс, тыдалö, эм. И не учöт. Польза не только öтiк мортлö — сылö, кин интересуйтчö, а и деревнялö, колхозлö, леспромхозлö — быдсöн государстволö.

Колö, шуам, осьтны колхозлö виль карьер нето адззыны торф. Босьтас председатель колхознöй муэзлiсь карта и казялас ниммез: Галямыс... Сьöдшор. «Ага, шуас, ноко видзöтам, мый сэтчин эм». И Галямыс iсь адззасö галя, а сэтчинiсь, кытi котöртö Сьöдшор, адззасö сьöдмусин да торф. Геологлö уна висьталасö сэтшöм ниммез, кыдз Вохрамыс, Кöрткерöс, Сёйгарьян; археологлö — Шойнаыб, Курöгкар; историклö — Сарантуй, Вогулка ю, Тюмень деревня. Леспромхозiсь да районiсь руководителлез, кöр пондасö тöдны, кыдз шусьö виль посёлок гöгöр местаыс, оз ни шуö посёлоксö Сосновка öн либо Берёзовка öн, кöдна районас не öтiк ни.

Кытчö бы тэ эн мун — ылö ли, матö ли, — быдлаын панталан местаэзлiсь ниммез. Эмöсь ниммез городдэзлöн, посаддэзлöн, деревняэзлöн; быд юлöн, тылöн, керöслöн эм ним. Абу кольччöмась нимтöг не вöррез, не нюррез, не кöджжез. Öтiк кылöн шуны — быд месталöн эм аслас ним. Нельки сэтшöм учöтик муок вылiсь, кыдз тiян огородец, позяс адззыны десяток торья нима места: öшынувт, посöдзпон, чомбок, вирöдздор, банядын, ямасай, кыдзувт, нюрдорйöр, воротадор, картабöр, паськыт видзок да мöдiккез. Ежели тiян огородечын, садын эмöсь не öтiк кыдз, льöмпу, яблоня, то нылöн быдыслöн эм торья ним — вожа кыдз, шöрись кыдз, чукыля яблоня, том яблоня. Тодильнöй ним лоас и неыджыт гöплöн, и ыджыт кöчкалöн, и межалöн.

Дак кин нö и кöр думайтöм энö ниммесö да сеталöм местаэслö, юэслö, деревняэслö?

Миян тöдса старикным меным шуис сiдз:

— Олöма кöркö Гундыр. Нимкодясьны вöлöма лют да страшнöй выдумщик. Сказка колö висьтавны — часöт жö думайтас-гарддяс; бöбöтны тэнö колö — емтöг вурас, он и казяв. Дак вот сiя и сетавлöма пö ниммесö: эта — Кырйыв, эта — Чукыляшор, эта — Изнадор. Видзöтас морт вылö, шуас: тэ пö лёль, тэ — трус, а тэ — пакот.

Мöдiк пöрись морт меным баитiс мöднёж:

— Кöркö эд некытшöм деревня татöн абу вöвлöм, некытшöм ним абу тöдлöмась. Öтiк позын öтiк олö, мöдiк позын — мöдiк, ровно шыррез нораэзын. Сэтчö локтасö татара, босьтасö этö мусö и ас мознаныс быд местасö пондасö шуны. Кылас эта йылiсь Грознöй царь, иньдöтас ассис войскосö, вашöтас татарасö. Ачыс бöр мунас, но коляс монахöс и тшöктас гижны, кытöн кытшöм му эм, кытшöм ва, кытшöм вöр. Сiя монахыс и гижас быдöс иньвенскöй местаэсö да каждöй мортлö вот пуктас. А кочёвскöй да косинскöй деревняэсö оз адззö, сiдз нiя и кольччасö вольнöй лöдззезöн, а миянöс бороннöй каббезö пöртасö.

[*Эстöн, видно, баитсьö первöй перепись йылiсь, кöдö керис Строгановскöй вотчинаэзын 1579 годö Яхонтов. Юрлинскöй, кочёвскöй, косинскöй да гайнскöй муэз вöлiсö государственнöйöсь, сiйöн и шувлiсö сэтчинiсь отирсö «вольнöй лöдззезöн», а нiя иньвенсасö — «баронскöй каббезöн». Сёрöнжык, 1691 годö, Пётр I козьналiс Лолог ю гöгöрись муэсö Г. Д. Строгановлö.]

Эм эшö öтiк легенда. То сiя.

Кама гöгöрöт тыр деревняэз вöлöмась да чисто пырттöмöсь. Вот святöй Стефан и пуксяс из вылö да кывтас Кама кузя. Кывтö и видзöтö, кытöн кытшöм деревня сулалö. Адззö: керöс вылын керкуэз чукöртчöмась — ним сылö Керöс; адззö: вöр пыдöсö деревняыс пуксьöма — Дзибьяин.

Кывтас Кама кузяс да сэсся мöдiк юэзö мунас. А мый сылö — сьöкыт разь? То из вылын, то кöчка вылын, то аслас колпак вылын уйö и каждöй деревнялö сетö ним. А вöр да нюр местаэсö, кытöн отирыс озö олö, некыдз оз шу.

Вот этадз висьтасьöны легендаэз да преданнёэз. Давайте веритам этаö недыр кежö и видзöтам, кыдз отирыс олiсö деревняэзын да местаэзын, кöдналöн эз вöлö ниммез.

...Петыштiс аслас карись пан Бурмат, нёджжасьö öтмöдöрö. Адззö: кар дынас сибöтчö Кöчко, том вöралiсь. Сылöн пельпон вылас шатин, а шатин вылас öшалöны онняюрöн вель тума кöччез.

— Ой, кысь тэ сымдасö ваян? — юалö князь.

— Ылiсь, Бурмат. Этчинкана сё кыссьылi.

— Уна, видно, сэтчин нiя?

— Кыдз кöдзыв шуксьö. Ог на ешты кыйсянöс лöсьöтны, а сiя дарсасьö ни сэтчöкан... Öтiкöс бедьнам кольмöтi, мöдiк син одзам кымöснас пуö жвангисис...

— Кыдз сэтчин сюрны?..

— Перво этчинкан мунан, вöлись сэтчинкан, сыбöрын сэтчинкансянь этчöжык, а этчöжыксяняс бöрана этланьö, тожно кежан сы ладорö и пыран тэльö, кытöн энiя... — Кöчко мыччалiс певнас пельпон вевдöрöттяс бöрланяс и гажöн содтiс: — энiя, кузь пеллес, кульмöны.

Вот и вежöрт, кытöн сымда кöчыс олö!

Не, эта не сiдз вöлi. Эз вермы сiдз лоны. Кыдз только морт велалiс баитны, сiдз и пондiс сетавны местаэслö ниммез. И быль, поди, унажык ниммесö думайтiс бур выдумщик, кöдалöн синыс лэчытжык и юрыс умнöйжык. Нюра вöр, например, шуис Согра öн; мыс, кытöн олöны дзодзоггез — Дзодзогмыс; кар, кöдö керис аслас увтыркöт Дöй — Дöйкар, а юсö сэтiсь — Дöйюг (юг — öддьöн важын сiдз шусис ю, ва). Сiдз шогмисö Катшакерöс, Гыркалог, Ошкымöс, Расвывворотадор, Ручпоз, Шорйыв, Ошыб, Кызмарьялог да уна-уна мöдiккез.

Быд предметлöн эм ним. Абу сылöн нимыс сэтчöдз, кытчöдз сiя оз ковсьы мортлö, кытчöдз оз сюр сы син одзö, кытчöдз оз шед сы киö. Отир оз любит, мед сы гöгöр мукöд местаэс кольччисö нимтöг, и первöй жö удобнöй кадö сэтшöм местаэслö сетö ним. Вöр туёк, кöдö керлöма Петра — Петракертуй; ю дор, кытчö вöйлöма Ванька нима вöв — Ванькавöйöмувт; места, кытчö Конан чапкöма керок — Конанкерокчапкöм. Öтiк места миян улицаын одзжык некыдз эз шусьлы, а вот неважын гарйим сэтчö колодец, и öнi сiя местаыс лоис — Колодецдын. Мöдгод кытшöмкö бригада кутас да весöтас нюра баддяин, и пондасö шуны сiйö местасö Виль ректас нето Нюрволь али эшö кыдзкö.

Öнi давайте видзöтам, кытшöм географическöй объекттэз кытшöвтöны миянöс, кывзыштам, мый баитö ны йылiсь отир, думайтыштам, мый сэтöн правдаыс и неправдаыс. Пармалiсь быдöс ниммесö, конечно, мийö, ог вермö видзöтны да и ог тöдö сымдасö. Ме только аслам деревня гöгöрись гижи полтораста гöгöр ним; сэтшöм деревняэс öтiк Кудымкарскöй районын вит сотня гöгöр, сiдзкö, ниммез сэтöн — семнадцать тысяча мымда. А округас — нёлись-витiсь унажык.

Дата добавления: 2015-11-16